Ga Ma Pag e En Th’abi Salap ko Ma’th’ib ni Nge Yal’uwegem, Fa?
“Gimed bay u lan paag ni bod rogon bangi but’ ni bay u lan pa’ be’ ni ma ma’th’ib.”—JER. 18:6.
TANG: 23, 22
1, 2. Mang fan ni i par Daniel nrib “t’uf rok Got”? Uw rogon ni ngad yul’yul’gad ni bod rogon Daniel?
NAP’AN nni fek e pi Jew nga Babylon ni kalbus, ma re mach nem nni fekrad ngay e ba mach nib sug ko liyos nge girdi’ ni yad ma liyor ko pi kan nib kireb. Machane, immoy boch e Jew ndar paged e ngongol ko girdi’ nu Babylon ni nge magawonnagrad ni bod rogon Daniel nge fa dalip i pagel ni fager rok. (Dan. 1:6, 8, 12; 3:16-18) Ra dugliyed u wan’rad ni yigoo Jehovah e ir e ngar liyorgad ngak ya ir e en ni ma yal’uwegrad ni bod rogon Be’ ni Ma Ma’th’ib. Machane, i yag rorad ni ngar folgad rok Jehovah! Yugu aram rogon nib n’uw nap’an ni par Daniel u Babylon; machane, i yog e engel rok Got ni ir be’ nrib “t’uf rok Got.”—Dan. 10:11, 19.
2 Piin ni yad ma ma’th’ib kakrom e yad ma fanay ban’en ni ngar gelgiyed e but’ u langgin ni nge yan i aw nga rogon ni yad baadag. Tin riyul’ e tapigpig rok Jehovah e ngiyal’ ney e yad manang ni Jehovah e ir e Th’abi Tolang u Ga’ngin e Palpalth’ib, ma ir e en ni bay mat’awun ni nge yal’uweg girdien e pi nam ni bod rogon faen ni ma ma’th’ib. (Mu beeg e Jeremiah 18:6.) Ku bay mat’awun ni nge yal’uwegdad ni be’ nge be’. Machane, bochan ni ke pi’ e puf rogon ngodad ma aram fan ni baadag ni gadad rodad e ngad dugliyed ni ngad folgad rok. Ere, chiney e ngad weliyed rogon nrayog ni ngad paged Got ni nge yal’uwegdad ni bod rogon e but’ nib munguy u lan pa’ be’ ni ma ma’th’ib. Gad ra weliy e fulweg ko re dalip i deer ni baaray ni be gaar: (1) Uw rogon ni ngad siyeged boch ban’en u rarogodad nrayog ni nge mo’maw’nag ngodad ni ngad folgad ko pi fonow rok Got? (2) Uw rogon ni nge yag boch e fel’ngin ngodad nra momnag rogon ngodad ni ngan yal’uwegdad ni bod rogon e but’ nib munguy? (3) Uw rogon ni nge fol e pi gallabthir ni Kristiano rok Got u nap’an ni yad be yal’uweg pi fakrad?
NGAD SIYEGED BOCH BAN’EN U RAROGODAD NI MA K’ARINGDAD NI NGE GELAN’DAD
3. Mang boch ban’en u rarogodad nrayog ni nge k’aringdad ni nge gelan’dad? Mu weliy ban’en ni ke buch.
3 Be gaar e Proverbs 4:23 (BT): “Mu kol ayuw u rogon ni ga be lem; ya lanin’um e be dugliy rogon e yafos rom.” Mang boch ban’en u rarogodad nthingar da kol ayuwgad riy? Pi n’ey e ba muun ngay e tolangan’, nge denen ni yima rin’, nge michan’ ni be war. Pi n’ey e rayog ni nge k’aringdad ni nge dab kud folgad mu ud togopuluwgad. (Dan. 5:1, 20; Heb. 3:13, 18, 19) Ireray e n’en ni buch rok Uzziah ni Pilung nu Judah. (Mu beeg e 2 Kronicles 26:3-5, 16-21, BT.) Som’on e i “rin’ e tin nib m’agan’” Jehovah ngay ma be “fol rok.” Machane, nap’an ni par ni ke “gel gelngin” ma aram “me tolangan’” ni yugu aram rogon ni Got e ir e ayuweg ni nge gel gelngin. Ki guy rogon ni nge urfiy e incense u lan e tempel. Ma re maruwel nem e ban’en ni kemus ni yigoo pi prist e rayog ni ngar rin’ed. Ma nap’an ni puwan’ e pi prist ngak ma aram me damumuw! Ere, mang wenegan ni yib ngak? I tamra’nag Jehovah e re pilung nem nib tolangan’ ma aram me par nib daraw u n’umngin nap’an e yafos rok.—Prov. 16:18.
4, 5. Faanra dab da kol ayuwgad ko tolangan’, ma mang e rayog ni nge buch rodad? Mu weliy ban’en ni ke buch.
4 Faanra dab da kol ayuwgad ko tolangan’, ma aram e rayog ni ngad tababgad ni ngad ‘tolangniged gadad u lanin’dad nge pag rogon e lem nsusun e nguud tiyed,’ ma re n’ey e rayog ni nge k’aringdad ndab kud folgad ko pi fonow nu Bible. (Rom. 12:3; Prov. 29:1) Am lemnag e n’en ni buch rok reb e piilal u lan e ulung ni ka nog Jim ngak. Bay ban’en nra weliyed boch e piilal nde m’agan’ ngay. I yog ni gaar: “Gog ngak e pi walag nem ni yad ba kireb ya darur daged e t’ufeg, ma aram mug wan nggu chuw.” Sogonap’an nel’ e pul nga tomuren, ma aram me chuw ko re ulung nem nge yan nga yugu reb e ulung nib chugur e ngaram, machane da kun tay ni ir reb e piilal. I yog ni gaar: “Kari kireban’ug. Ug lemnag ni gag e ba fel’ e rog ma aram mug chuw ko tin riyul’.” Ragag e duw ni par Jim ndaki un ko muulung nge machib. I yog ni gaar: “Bochan gelngin fanag tolangan’, ma aram mug tabab ni nggon’ e kireb nga daken Jehovah ko n’en ni ke buch. Boor e duw ni i yib e pi walag u lan e ulung ra guyed gag ma yad be guy rogon ni ngar ayuweged gag, machane de m’agan’ug ngay ni ngan ayuwegeg.”
5 N’en ni buch rok Jim e be tamilangnag rogon nrayog ni nge k’aringdad e tolangan’ ni ngad gayed e tawey ko kireb ni kad rin’ed, me mo’maw’ ni ngan yal’uwegdad. (Jer. 17:9) I yog Jim ni gaar: “Ug par ni gu be lemnag ni pi cha’nem e ba kireb e rorad.” Me gur, bay bayay ni ke kirebnag reb e walag lanin’um ara ke kireban’um ni bochan e kan chuweg boch e tow’ath rom u lan e ulung? Faanra ke buch rom ni aray rogon, ma mang e kam rin’? Kam pag e tolangan’ ni nge gagiyegnigem? Fa kam guy rogon ni ngam awnag e gapas u thilmew walagem u lan e ulung mag par ni gab yul’yul’ ngak Jehovah?—Mu beeg e Psalm 119:165; Kolose 3:13.
6. Mang e rayog ni nge buch ni faanra ud rin’ed e kireb?
6 Faanra da mechameged ngodad ni ngaud denengad, ara ngaud mithgad ngaud denengad, ma rayog ni nge k’aringdad e re n’ey ni nge dab kud folgad ko fonow ni be pi’ Got ngodad. Re n’ey e ku ra momnag ngodad ni ngaud rin’ed e kireb. Bay reb e walag ni pumoon ni i rin’ boch ban’en nib kireb ni yog ni pi kireb nem ni i rin’ e munmun ma daki magawonnag laniyan’. (Ekl. 8:11) Ku bay reb e walag ni pumoon ni ke mecham ngak ni nga i yaliy yaan e ngongol ni puwlag ni gaar: “Munmun ma aram mug dabuy daken e piin piilal.” Ngongol nib kireb ni i rin’ ni ke mecham ngay e kirebnag e tha’ u thilrow Jehovah. Munmun ma aram me gagiyel e kireb ni i rin’, ma aram me ayuweg e piin piilal. Riyul’ ndawor da flontgad. Machane, faanra da rin’ed ban’en nib kireb ma gad yoror rodad ara da taweygad nga boch ban’en ma dab da weniggad ngak Got ni nge n’ag fan e kireb rodad, ma aram e gad ba gelan’.
7, 8. (a) Uw rogon ni m’ug ko ngongol rok piyu Israel kakrom nib war e michan’ rorad? (b) Mang e gad be fil ko re n’ey?
7 N’en ni buch rok piyu Israel u nap’an ni chuwegrad Jehovah u Egypt e be tamilangnag rogon nrayog ni nge gelan’dad u nap’an ni ke war e michan’ rodad. Boor e maang’ang ni i guy piyu Israel ni i rin’ Got ni fan ngorad, ma bay boch riy ni yira ngat ngay! Yugu aram rogon, ma nap’an nra chugurgad ko fare Nam ni Kan Micheg, ma aram me war e michan’ rorad. Daki pagan’rad ngak Jehovah ma aram mar rusgad, mar tababgad ni ngar gun’gun’naged Moses. Kur lemnaged ni ngar sulod nga Egypt ko gin ni ur moyed riy ni yad e sib! Ri kireban’ Jehovah ko n’en nra rin’ed. Ere, yog ni gaar: “Uw n’umngin nap’an ni nge par e pi girdi’ ney ni yad be darifannigeg?” (Num. 14:1-4, 11; Ps. 78:40, 41) Bochan nib gelan’ piyu Israel mab war e michan’ rorad, ma aram fan nra m’ad u daken e ted.
8 Ngiyal’ ney ni gad be chugur i yan ko bin nib beech e fayleng e ri yibe skengnag e michan’ rodad nib fel’ rogon. Ere, ba fel’ ni ngad fal’eged i yaliy rogon e michan’ rodad. Bod nrayog ni ngam lemnag fapi thin ni yog Jesus ni bay ko Matthew 6:33, mag fithem ni nge lungum: ‘Gur, pi n’en nib m’on u wan’ug nge pi n’en ni gu ma dugliy ni nggu rin’ e be m’ug riy nriyul’ nib mich u wan’ug e n’en ni yog Jesus, fa? Gu ra digey e muulung ara machib ni bochan e maruwel ni gu ma un ngay ni nge yog e salpiy riy ngog, fa? Mang e gu ra rin’ ni faanra boor e tayim nge gelngig nib t’uf ni nggu fanay ko maruwel ni gu ma un ngay ni nge yag e salpiy riy ngog? Gu ra pag e re fayleng ney ni nge gagiyegnag rogon e lem ni gu ma tay me k’aringeg ni nggu chuw ko tin riyul’, fa?’
9. Mang fan nsusun e ngaud “changargad” ngodad ko gad be ngongol u fithik’ e michan’ rodad ngak Kristus fa danga’, ma uw rogon nrayog ni ngad rin’ed e re n’ey?
9 Kum lemnag reb e tapigpig rok Jehovah nder ma fol ko pi motochiyel u Bible u murung’agen e piin ni gad ma chagil ngorad, nge piin ni kan tharbograd ko ulung, nge pi n’en ni yima chuweg e chalban ngay, mag fithem ni nge lungum, ‘Gur, gag e ray?’ Faanra kad guyed ni kad tababgad ni ngaud lemgad ni aray rogon, mab t’uf ni ngad gurgad ngad fal’eged i yaliy rogon e michan’ rodad! Ya be fonownagdad e Bible ni be gaar: “Mu changargad ngomed ko gimed be par ni gimed be ngongol u fithik’ e michan’ romed ngak Kristus fa danga’.” (2 Kor. 13:5) Dab da bannaged gadad, ya gubin ngiyal’ ni ngad fanayed e Thin rok Got ni nge yal’uweg e lem rodad.
MU PAR NI BOD ROGON E BUT’ NIB MUNGUY
10. Mang e rayog ni nge ayuwegdad ni ngad boded e but’ nib munguy u lan pa’ Jehovah?
10 Ma fanay Got e Thin rok, nge ulung ni Kristiano, nge machib ni nge ayuwegdad ni ngad pared nib mom rogon ni ngan yal’uwegdad ni bod rogon e but’ nib munguy. Ran e ma munguynag e but’. Ere, faanra ud beeged e Bible ni gubin e rran ma gad be fal’eg i lemnag e thin riy ma rayog ni nge mom rok Jehovah ni nge yal’uwegdad ni bod rogon e but’ nib munguy. Kakrom e tay Jehovah chilen ko pi pilung u Israel ni ngar abweged e Motochiyel rok nga bang ni ngaur beeged ni gubin e rran. (Deut. 17:18, 19) Ma pi apostal rok Jesus e yad manang nthingar ra beeged e thin ni bay u lan e Babyor nib Thothup ma ur fal’eged i lemnag, ya ra yib angin ko machib ni yad ma tay. Nap’an ni ur yoloyed boch e babyor ko Bible, ma bokum miriay yay ni ur sulod u daken e thin ni bay ko Pi Babyor ko Bible nni Yoloy Nsom’on ni Thin ni Hebrew ma ur pied e athamgil nga laniyan’ e girdi’ ni ur machibnaged ni ngar beeged e thin ni bay u lan e babyor nib thothup. (Acts 17:11) Ngiyal’ ney e kub ga’ fan ni ngaud beeged e Thin rok Got ni gubin e rran, mu ud fal’eged i lemnag. (1 Tim. 4:15) Ya re n’ey e ra ayuwegdad ni ngaud pared nib sobut’an’dad, me mom rok Jehovah ni nga i yal’uwegdad.
Mu fanay e pi n’en ni ma pi’ Got ngodad ni nge ayuwegem ni nge mom ni ngan yal’uwegem ni bod rogon e but’ nib munguy (Mu guy e paragraph 10-13)
11, 12. Uw rogon ni ma fanay Jehovah e ulung ni Kristiano ni nge yal’uwegdad ni be yan u rogon e n’en nib t’uf rok bagadad nge bagadad? Mu tamilangnag.
11 Ma fanay Jehovah e ulung ni Kristiano ni nge yal’uwegdad ni be yan u rogon e pi n’en nib t’uf rok bagadad nge bagadad. Jim ni faan kad weliyed murung’agen e tabab ni nge munguy laniyan’ u nap’an ni guy reb e piilal rogon ni nge ayuweg. I yog ni gaar: “Dariy ba ngiyal’ ni yog nib kireb e rog ko n’en ni ke buch rog ara gathibthibnageg. Ya i yog e thin nib fel’ ngog ma be dag ngog nriyul’ ni baadag ni nge ayuwegeg.” Sogonap’an dalip e pul nga tomuren, ma aram me pining e re piilal nem Jim ni nge un nga reb e muulung. I yog Jim ni gaar: “I dag e girdi’ u lan e ulung ngog ni kar ra felfelan’gad ni kar guyed gag, ma t’ufeg nra daged ngog e aram reb e ban’en ni k’aringeg ni nge thil e lem rog. I tamilang u wan’ug ni lem rog e gathi aram e n’en nib ga’ fan. Ma bochan ni ayuwegeg e pi walag u lan e ulung nge ppin rog, ma aram me yag ni ngkug sul nggu gel bayay ko tirok Got ban’en. Ma ppin rog e par nib mudugil ko tin riyul’ nde war e michan’ rok. Kub ga’ e ayuw ni pi’ fapi article ngog ni bay ko Fare Wulyang ko Damit ko November 15, 1992 ni kenggin e ‘Dab Mon’ e Kireb Riy Nga Daken Jehovah’ nge ‘Mu Pigpig ngak Jehovah u Fithik’ e Yul’yul’.’”
12 Munmun me yag ni ngki mang Jim reb e piilal bayay. Ma ka aram nap’an i yib ni be ayuweg boch e walag u lan e ulung ni ku bay e magawon rorad ni aray rogon ni nge yag nra gelgad ko tirok Got ban’en. I yog ni gaar: “Som’on e gu lemnag nib gel e tha’ u thilmow Jehovah, machane bin riyul’ riy e danga’! Kug kalngan’ug ni kug pag e tolangan’ rog ke k’aringeg ni nggu fek owcheg ko tin nib ga’ fan ban’en mug par ni yigoo thibngin e girdi’ e gu be yaliy.”—1 Kor. 10:12.
13. Mang boch e fel’ngin ni ma yag ngodad u daken e machib ni gad ma un ngay, ma mang angin?
13 Uw rogon nrayog ni nge yal’uwegdad e machib ni gad ma un ngay? Fare thin nib fel’ ni gad ma weliy ko girdi’ e rayog ni nge ayuwegdad u rogon ni ngaud daged e sobut’an’ nge yu yang u wom’engin gelngin Got nib thothup. (Gal. 5:22, 23) Am lemnag boch e fel’ngin ni ke yag ngom ni bochan e machib ni ga ma un ngay. Maku reb e, nap’an nra m’ug rarogon Kristus ko ngongol rodad ma aram e gad be k’aring e girdi’ ni ngar adaged e thin ni gad ma machibnag, ma re n’ey e rayog ni nge k’aring boch i yad ni nge thil rogon ni yad ma lemnagdad. Bod ni, immoy l’agruw e Pi Mich Rok Jehovah u Australia nra guyew rogon ni ngar machibnagew reb e ppin ni kar mada’nigew u nap’an e machib, mi ri damumuw fare pin ngorow me yog boch e thin nib kireb ngorow. Machane, de togopuluw fa gal walag ya ra parew ngaur motoyilgow ko n’en ni be yog fare pin ngorow. Ere, faani boch nga tomuren, ma aram me kal fare pin ngan’ ko n’en ni ke rin’, ma aram me yol ko branch ofis u rom. Baaray e n’en ni yog: “Gu baadag ni nggu wenig ko fagali cha’ nri yow ba gum’an’ mab sobut’an’row ni faan ra bow nga tafnag, ya ug lemnag ni gag e gub fel’, maku reb e ri gub tolangan’. Ri gub balyang ko n’en ni kug rin’ ni kug sak’iy nga p’eowchen l’agruw ni’ ni yow be wereg e Thin rok Got mu gog boch e thin nib kireb ngorow ya ngar chuwgow.” Ga be lemnag ma faan gomanga damumuw e gal walag nem, ma ra yoloy e re ppin nem boch e thin ni aram rogon, fa? Dabisiy ni danga’. Ere, rib ga’ fan e machib ni gad ma tay, ya rayog ni nge ayuwegdad nge piin nib migid ngodad!
MU FOL ROK GOT U NAP’AN NI GA BE YAL’UWEG PI FAKAM
14. Faanra baadag e piin gallabthir ni nge yib angin e skul ni yad be tay ngak pi fakrad, ma mang e thingar rin’ed?
14 Yooren e bitir ni kab achig e yad baadag ni ngan fil ban’en ngorad mab sobut’an’rad. (Matt. 18:1-4) Ere, ba gonop e piin gallabthir ni faan yad ra ayuweg pi fakrad ni ngar filed e tin riyul’ me t’uf rorad u nap’an ni ka yad ba achig. (2 Tim. 3:14, 15) Riyul’ ni faanra nge yib angin e skul ni ma tay e gallabthir ngak pi fakrad ma yad e som’on ni nge t’uf e tin riyul’ rorad mu ur folgad riy ni gubin ngiyal’. Faanra rin’ e piin gallabthir ni aray rogon ma ra mom ngak pi fakrad ni nge t’uf e tin riyul’ rorad. Maku reb e, ra tamilang u wan’rad ni fonow ni yibe pi’ ngorad e be dag ni yad ba t’uf ko gallabthir rorad nge Jehovah.
15, 16. Uw rogon ni nge dag e piin gallabthir ni be pagan’rad ngak Got u nap’an ni yira tharbog reb i fakrad ko ulung?
15 Yugu aram rogon ni bay boch e bitir ni kan chuguliyrad ko tin riyul’, machane bay boch i yad ni yima tharbograd ko ulung, mar k’aringed e kireban’ ko girdien e tabinaw rorad. Reb e walag nib pin ni ma par u South Africa e yog ni gaar: “Nap’an nni tharbog ba pagel ni walageg ko ulung, ma gu ra lemnag ma gowa ke yim’. Rib gel e kireban’ nug tay!” Ere, mang e rrin’ed e gallabthir rok? Ra folgad ko fonow ni bay ko Thin rok Got. (Mu beeg e 1 Korinth 5:11, 13.) I yog e gallabthir ko re pagel nem nra gaargow: “Gu dugliyew u wan’mow ni nggu folgow ko thin nu Bible ni bochan e gamow manang ni faan gamow ra rin’ gubin ban’en nrogon nib m’agan’ Got ngay, ma ra yib angin nib fel’. Gamow manang ni faan yira tharbog be’ ko ulung ma aram rogon ni be yal’uweg Jehovah facha’, ma Jehovah e ma yal’uwegdad u fithik’ e t’ufeg maku ma rin’ u rogon nsusun e nge rin’. Ere, da ug nonow ko bitir romow. Fin ngiyal’ nrib t’uf ni nggu weliyed ban’en ni bay rogon ko tabinaw romad e aram e ngiyal’ ni gamad ma non.”
16 Uw rogon u wan’ e re pagel nem ni fakrow e re n’ey? Boch nga tomuren me yog ni gaar: “Gu manang nder fanenikayeg chon e tabinaw rog, ya yad be fol rok Jehovah nge ulung rok.” Ki ulul ngay ni gaar: “Nap’an nra yan i math e liyeb ngom, ma aram e n’en nra k’aringem ni ngam wenig ngak Jehovah nge ayuwegem me n’ag fan e kireb rom, ma re n’ey e ra ayuwegem ni ngam nang gelngin feni t’uf e ayuw rok rom.” Am lemnag gelngin e felfelan’ ni tay chon e re tabinaw ney u nap’an ni sul e re pagel ney ko ulung! Arrogon, faan gad ra lemnag Got u fithik’ urngin ban’en ni gad ma rin’, ma rayog ni nge yib angin ngodad.—Prov. 3:5, 6; 28:26.
17. Mang fan ni ngaud folgad rok Jehovah ni gubin ngiyal’, ma uw rogon nra yib angin e re n’ey ngodad?
17 I yiiynag Isaiah ni profet ni pi Jew ni kan fekrad nga Babylon e yad ra kalngan’rad me lungurad: “Gur Somol e chitamangimad gur. Gamad bod e but’ ni yima ngongliy e th’ib riy, me gur e ga bod e en ni ma ngongliy e th’ib. Kam sunumiymad.” Ku yad ra wenig ngak Got ni nge lungurad: “Dab kum damumuw ngomad nge pag rogon, ara mu lemnag e denen romad ndariy n’umngin nap’an. Gamad e girdi’ rom; mu runguymad.” (Isa. 64:8, 9) Ku arrogodad ni faan gad ra sobut’nag lanin’dad ngad folgad rok Jehovah ni gubin ngiyal’, ma gad ra par ni gad ba t’uf rok ni bod rogon Daniel ni profet. Ma bin th’abi ga’ fan riy e ra i fanay e Thin rok, nge gelngin nib thothup, nge ulung rok ni nga i yal’uwegdad ya nge boch nga m’on me yag nda manged “pi fak” ni kad flontgad.—Rom. 8:21.