Haykanush nreb e publisher u Armenia ndawori un ko taufe e pirieg ba passport u bang nib chugur ko gin ni ma par riy. Mu lan e re ke passport nem e bay bogi debit card riy nge bogi salpiy. Ma aram me yog ko pumoon rok ni ku ir reb e publisher ndawori un ko taufe.

Ngiyal’ nem e ri be magawon e re wu’ i mabgol ney ko salpiy maku boor e malfith rorow. Yugu aram rogon, mar dugliyew ni ngar fekew fapi salpiy i yan ko fare address ni bay ko fare passport. Nap’an nra sulwegew fapi salpiy ko fare moon ni fen fare ke passport, mar ra ngatgad chon e tabinaw rok ko n’en ni ke rin’ e re wu’ i mabgol ney. I yog Haykanush nge pumoon rok ni fan ni kar rin’ew e re n’ey e bochan e n’en ni kar filew u Bible. Yow manang nthingar ra yul’yul’gow, ma aram mar fanayew e biney e kanawo’ ni ngar weliyew boch ban’en u murung’agen e Pi Mich Rok Jehovah, mar piew boch e babyor ngak girdien fare tabinaw.

I yog chon fare tabinaw ni yad baadag ni ngar pied boch e salpiy ngak Haykanush ni bochan e n’en ni ke rin’, machane me siyeg. Faani bin migid e rran me yib e ppin ko fare pumoon ni kan pirieg e passport rok nga tafen Haykanush nge pumoon rok me pi’ ba luwaw ngak Haykanush ni kan ngongliy ko diamond ni nge pining e magar ngak ko n’en ni ke rin’, ma aram me yog ngak nthingari fek e re luwaw nem.

Boor e girdi’ e yad ra gin nga rogon feni yul’yul’ Haykanush nge pumoon rok ni bod rogon e n’en ni rin’ e re tabinaw ney. Machane gur, ra ngat Jehovah ko re n’ey? Uw rogon u wan’ Jehovah rogon e yul’yul’ ni ke dag e re wu’ i mabgol ney? Ba ga’ fan e re n’ey u wan’, fa?

De mo’maw’ ni ngan pirieg e fulweg ko pi deer ney. Fan nde mo’maw’ e bochan nib mich u wan’ e pi tapigpig rok Jehovah ni kab ga’ fan pi fel’ngin Got ni ma m’ug ko ngongol rodad ko diamond, ara gol, ara ku boch ban’en nib tolang puluwon. Arrogon, ba thil rogon ni ma lemnag Jehovah e pi n’en nib ga’ fan nge pi n’en nde ga’ fan nga rogon ni ma lemnag yooren e girdi’. (Isa. 55:8, 9) Ma pi tapigpig rok e yad ma lemnag ni faan yad ra athamgil ni nge m’ug pi fel’ngin Jehovah rorad ma aram reb e ban’en nrib ga’ fan.

Rayog ni ngad guyed e re n’ey ko n’en ni be weliy e Bible u murung’agen e gonop nge tamilangan’. Be gaar e Proverbs 3:13-15: “Ba felan’ e en ni ke yog e gonop ngak, ya ke yib e tamilangan’ ngak. Ya fel’ ni ma yib riy e boor ko fel’ ni ma yib ko silber; ba ga’ fan ngom ko gol. Gonop e ka ba ga’ fan ko pi n’en nib t’uf ma ba tolang puluwon ni yima nunuw ngay; dariy ban’en ni gab adag nrayog ni ngam puluwnag ngay.” Ere, dariy e maruwar riy ni kab ga’ fan e gal fel’ngin ney u wan’ Jehovah ko pi n’en nib tolang puluwon.

Ma uw rogon e yul’yul’?

Jehovah e ir be’ nib yul’yul’, ma dabiyog ni nge “ban.” (Titus 1:2) I thagthagnag nga laniyan’ apostal Paul ni nge yol ko pi Kristiano ni Hebrew ko bin som’on e chibog ni gaar: “Um pired ni gimed be yibiliymad ngak Got. Ya gamad e mmudugilan’mad ngomad ndariy ban’en ni be yog lanin’mad ngomad ni kug rin’ed nib kireb, ya gamad ba adag ni nguug rin’ed e tin nib mat’aw [“ngaug yul’yul’gad,” NW] ni gubin ngiyal’.”​—Heb. 13:18.

Jesus Kristus e ir e en ni dag e bin th’abi fel’ e kanawo’ u rogon ni ngaun yul’yul’. Bod nnap’an ni non Kaiafas ni ir e En Th’abi Tolang ko Prist ni gaar: “Chiney e nggog ngom u daken fithingan fare Got ni be par nib fos ni nggu tiyem nga p’eowchen nga mog e tin riyul’: mog ngomad ko gur fare Messiah ni Fak Got gur fa danga’,” ma aram me yog Jesus ni ir fare Messiah. I yog e tin riyul’ ni yugu aram rogon ni manang nrayog ni nge yog e pi tapuf oloboch rok e pi Jew ni be darifannag Got min li’ nge yim’.​—Matt. 26:63-67.

Ma uw rogom? Faanra ke mab e kanawo’ ngom ni ngam mithag boch ban’en u murung’agen ban’en ara ngam ban ni bochan e nge fel’ rogom riy, ma kag ra par ni gab yul’yul’ fa danga’?

Riyul’ nib mo’maw’ ni ngan yul’yul’ e ngiyal’ ney ko tin tomuren e rran ni bochan e boor e girdi’ ni “ke mus ni yad e yad be lemnagrad, ma kari gel e chogow rorad.” (2 Tim. 3:2) Nap’an nra mada’nag be’ e magawon ko salpiy ara ba mo’maw’ ni nge pirieg e maruwel, mab mom ni nge dab ki yul’yul’. Ku boor e girdi’ nib mom ngorad ni ngaur moro’ro’gad, ara ra sasalapgad, ara ra uned nga boch e ngongol ndariy e yul’yul’ riy. Bochan ni kari garer e re lem ney u gubin yang, ma aram fan ni boor e girdi’ ni yad ma lemnag nde puluw ni ngar yul’yul’gad. Mus ko piin Kristiano ni bay boch i yad nde yag ni ngar yul’yul’gad ma kki kireb thirad u lan e ulung ni bochan ‘chogowen e salpiy.’​—1 Tim. 3:8; Titus 1:7.

Machane, yooren e piin Kristiano e yad ma folwok rok Jesus. Yad manang ni kab ga’ fan pi fel’ngin Got ko salpiy ara yugu boch e flaab. Aram fan ni pi Kristiano ni ka yad ma un nga skul e darur sasalapgad u skul ni bochan e nge fel’ e grade rorad. (Prov. 20:23) Riyul’ ni gathi gubin ngiyal’ nra yag boch e tow’ath ngodad ko yul’yul’ ni gad be tay ni bod e n’en ni buch rok Haykanush. Machane, ireray e n’en nib m’agan’ Got ngay, maku ra ayuwegdad ni ngad pared nib beech e nangan’ rodad. Ma aram reb e ban’en nrib ga’ fan.

Ke m’ug e re n’ey ko n’en ni buch rok be’ ni ka nog Gagik ngak. I yog ni gaar: “U m’on ni nggu mang reb e Kristiano, ma ug un nga barba’ e maruwel ni en ni fen e bayi n’en ma kemus ni buchuuw ko win ni be yag ko company rok e ir e ma fal’eg babyoren. Bochan ni gag e gub migid ngak, ma baadag ni nggu bannag e en ni ma maruwel ko ofis ko tax ni ma yib ni nge yaliy rogon e tax ni be pi’ e company ni bochan e ‘nge m’agan’ ngay’ ni nge dabi yog murung’agen e sasalap ni be tay e company. Ere, bochan e re n’ey ma aram e goo yimanangeg ni gag be’ ni gub sasalap. Machane, nap’an ni gu fil e tin riyul’, ma aram e da kug un ko re maruwel nem ni yugu aram rogon nib fel’ puluwog riy. Ma n’en ni gu rin’ e gu fal’eg reb e siyobay ngog. Machane, n’en nth’abi som’on ni gu rin’ e aram e gu fal’eg babyoren e company rog mug pi’ urngin e tax nthingar gu pi’.”​—2 Kor. 8:21.

I yog Gagik ni gaar: “Baley u puluwog ko bin baaram e maruwel ni ug un ngay e ir e ug yognag ko siyobay rog, ere rib mo’maw’ ni nggu pi’ e tin nib t’uf ko tabinaw rog. Machane, kab gel e felfelan’ ni gu be tay e chiney ko kafram. Ma dakuriy ban’en ni be magawonnag e nangan’ rog u p’eowchen Jehovah. Gu ma dag e kanawo’ nib fel’ ngak l’agruw i pagel ni fakag, ma ke yag ni nge yag boch e maruwel ngog u lan e ulung. Chiney e ba ga’ ni ma yog e girdi’ ni gag be’ ni gub yul’yul’ ni kub muun girdien e tax ngay nge ku boch e girdi’ ni gamad ma maruwel u taabang.”

Ma t’ufeg Jehovah e piin nib ga’ fan e thin rok u wan’rad, ma yad ma athamgil ni nge m’ug pi fel’ngin rorad nib muun e yul’yul’ ngay. (Titus 2:10) I thagthagnag nga laniyan’ David ni Pilung ni nge yog e pi thin ni baaray ni gaar: “Chiney e kug pilibthir, ni gathi ku gub pagel, machane dawor gguy be’ nib fel’ ni gomanga ke pag Somol faanem, ara gguy pi fak ni yad be man ggan.”​—Ps. 37:25.

Ireray e n’en ni buch rok Ruth ni ir be’ nib yul’yul’. De pag Naomi ni chitiningin e pumoon rok ni yugu aram rogon ni ke pilibthir. Me yan i par nga Israel ko gin nrayog ni nge liyor riy ko bin riyul’ e Got. (Ruth 1:16, 17) Nap’an ni immoy u Israel ma i dag ni ir be’ nib yul’yul’ ma ma maruwel nib gel ni be kunuy e tin ni ke magey u wom’engin e woldug ni ke mul u milay’ nrogon ni bay ko Motochiyel. Gubin ngiyal’ ni i pi’ Jehovah e tin nib t’uf rok Ruth nge Naomi ni bod rogon ni i ayuweg David boch nga tomuren. (Ruth 2:2-18) Machane, gathi kemus ni i pi’ Jehovah e tin nib t’uf ko par rok Ruth. Ya ki mel’eg ni nge mang reb e ga’ rok David ni Pilung nge fare Messiah!​—Ruth 4:13-17; Matt. 1:5, 16.

 Bay boch e tapigpig rok Jehovah nib mo’maw’ rorad ni ngar yognaged e tin nib t’uf ko par rorad. Machane, yad ma maruwel nib gel maku yad ma tedan’rad ko maruwel rorad ko bin ni ngar sasalapgad u boch ban’en ni bochan e ngar pithiged e magawon rorad. Aray rogon ni yad ma dag nib ga’ fan pi fel’ngin Got u wan’rad nib muun e yul’yul’ ngay, ko bin ni nge ga’ fan e chugum nge ku boch ban’en u wan’rad.​—Prov. 12:24; Efe. 4:28.

Ma dag e pi Kristiano u ga’ngin yang e fayleng nib pagan’rad ngak Jehovah nrayog ni nge ayuwegrad ni bod rogon ni ayuweg Ruth kakrom. Rib pagan’rad ngak e En ni ke micheg fapi thin ni gaar: “Ri dab gu pagem; ma ri dab gu n’igem.” (Heb. 13:5) Boor yay ni ke dag Jehovah nrayog rok ni nge ayuweg e piin ni yad ma athamgil ni ngar yul’yul’gad u gubin ban’en, maku ra rin’ e re n’ey. Dariy ba ngiyal’ ni ke thilyeg fapi thin ni ke micheg ni aram e ra pi’ e tin nib t’uf ko par rodad.​—Matt. 6:33.

Arrogon, girdi’ e ba ga’ fan e diamond nge ku boch ban’en nib tolang puluwon u wan’rad. Machane, rayog ni nge pagan’dad ni kab ga’ fan u wan’ e Chitamangidad ni bay u tharmiy e yul’yul’ ni gad ma tay nge ku boch i fel’ngin ni ma m’ug ko ngongol rodad ko pi malang nib tolang puluwon!