1. Susun ni nge uw rogon u wan’dad e michan’ ni bay rodad?

 MICHAN’ e aram reb e fel’ngin ni bay ko piin Kristiano nrib ga’ fan, ya gathi gubin e girdi’ ni bay rok. (2 Thess. 3:2) Machane, ma pi’ Jehovah e “michan’” ko pi tapigpig rok. (Rom. 12:3; Gal. 5:22) Ere, urngin e piin ni bay e re fel’ngin ney rorad e thingar ra pininged e magar riy ngak.

2, 3. (a) Mang boch e tow’ath nrayog ni nge yag ngak be’ ni bay e michan’ rok? (b) Mang boch e deer ni ngad weliyed e fulweg riy?

² I yog Jesus Kristus ni ma pow’iy e Chitamangin e girdi’ ngak u daken Fak. (John 6:44, 65) Ere, faanra mich Jesus u wan’ be’ ma aram e rayog ni ngan n’ag fan e denen rok. Ma aram e n’en nra bing e kanawo’ ngak facha’ ni nge par e tha’ u thilrow Jehovah nib fel’ ndariy n’umngin nap’an. (Rom. 6:23) Machane, mang e kad rin’ed ni ngan pi’ e biney e tow’ath nrib pag feni fel’ ngodad? Bochan ni gadad bogi tadenen, ma aram fan ni bay rogon ni ngad m’ad. (Ps. 103:10) Machane, bay ban’en nib fel’ ni ke guy Jehovah rodad. Ma bochan e runguy rok ngodad ma aram fan ni ke munguynag lanin’dad ya nge yag nda motoyilgad ko fare thin nib fel’. Nap’an  nda filed fare thin nib fel’, ma aram e ngiyal’ ni tabab ni nge m’ug nriyul’ ni ke mich Jesus u wan’dad ma gad be athapeg e yafos ndariy n’umngin nap’an.​—Mu beeg e 1 John 4:9, 10.

³ Machane, mang e michan’? Gur, ra nge michan’dad ma aram e be yip’ fan ni kemus ni ngad nanged murung’agen e pi tow’ath ni ke micheg Got nra pi’ ngodad boch nga m’on? Ma bin th’abi ga’ fan riy e, mang boch e kanawo’ nthingar da maruweliyed e michan’ rodad riy?

4. Mu weliy fan ni michan’ e gathi kemus ni ban’en ni bay u lanin’um.

⁴ Ra nge michan’um ma gathi kemus ni ngam nang e n’en nib m’agan’ Got ngay. Ya michan’ e ban’en nra k’aring be’ ni nge ngongol u rogon nib puluw ko n’en nib m’agan’ Got ngay. Ra mich u wan’ be’ rogon kanawoen ni ma thapeg Got e girdi’ ngak ma aram e n’en nra k’aring facha’ ni nge weliy fare thin nib fel’ ngak yugu boch e girdi’. I weliy apostal Paul ni gaar: “Faan ga ra yog nga dap’i l’ugunam ni lungum, ‘I Jesus e ir e Somol,’ ma ke mich u wun’um ni Got e faseg ko yam’, ma aram e kam thap ngak Got. Ya ra mich u wun’dad me mat’awnagdad Got ngak; ma gadad ra yog nga dap’i l’ugundad, ma aram e kad thapgad.”​—Rom. 10:9, 10; 2 Kor. 4:13.

5. Mang nrib ga’ fan e michan’, ma uw rogon nrayog ni ngad ayuweged e michan’ rodad ni nga i par nib gel? Mu susunnag.

⁵ Ba tamilang ni faanra nge yag e yafos ndariy n’umngin nap’an ngodad u lan e bin nib beech e fayleng rok Got mab t’uf ni nge yag e michan’ ngodad ma gad guy rogon ni nge par nib gel. Michan’ rodad e bod rogon reb e woldug nib t’uf ni ngaun rannag ya nge yag ni par nib dammal ma be ilal nib fel’ rogon. Machane, faanra dab ud rannaged e re woldug nem ma ra munmun me mororoy nge yim’. Ere ku arrogon e michan’ rodad ni faanra dab ud guyed rogon ni nge par nib gel ma ra war i yan nge mada’ ko ngiyal’ ni ke mul e michan’ rodad. (Luke 22:32; Heb. 3:12) Machane, faan gad ra ayuweg e michan’ rodad ma aram e rayog ni nga i ‘ilal e michan’ rodad’ ma be par nib ‘yal’uw rogon nib mich Kristus u wun’dad.’​—2 Thess. 1:3; Titus 2:2.

6. Mang l’agruw e kanawo’ ni kan weliy murung’agen e michan’ riy ko Hebrews 11:1?

⁶ Be weliy e Bible murung’agen e michan’ ko Hebrews 11:1. (Mu beeg.) L’agruw ban’en ni be tor e michan’ ngay ndabiyog ni ngad guyed: (1) “Pi n’en ni ir e ke l’agan’dad ngay.” Re n’ey e ba muun ngay e pi n’en ni kan micheg nra buch machane dawori buch. Pi n’ey e bod rogon e ngiyal’ ni yira thang e kireb nge ngiyal’ nra yib e bin nib beech e fayleng. (2) “Pi n’en ndarid guyed nga owchedad.” Gad manang nriyul’ ni bay Jehovah Got, nge Jesus Kristus, nge pi engel, nge Gil’ilungun Got u tharmiy ni yugu aram rogon ndabiyog ni ngad guyed nga owchedad. (Heb. 11:3) Ere, uw rogon ni ngad micheged nriyul’ e pi n’en ni ke l’agan’dad ngay, ma kki mich u wan’dad e pi n’en ni bay ko Thin rok Got ndabiyog ni ngad guyed? Thingari m’ug ko thin nge ngongol rodad, ya faanra danga’, ma aram e de polo’ e michan’ rodad.

7. Uw rogon ni be ayuwegdad e n’en ni rin’ Noah ni ngad nanged rogon ni nge yag e bin riyul’ e michan’ ngak be’? (Mu guy e sasing ni bay u tabolngin e re article ney.)

⁷ Hebrews 11:7 e be weliy murung’agen e michan’ rok Noah. Be yog ni ke “motoyil ko tin ni yog Got ngak ni murung’agen e pi n’en ni bayi taw, ni bogi ban’en ndabiyog ni nge guy Noah e ngiyal’ nem. Me fol ko tin ni ke yog Got ngak ni nge rin’, me toy fare barkow ni ark fithingan, ni re ark nem e ir e faseg Noah nge girdi’ nu tabinaw rok.” I dag Noah nib gel e michan’ rok u nap’an ni ngongliy fare arke nib ga’. Dabisiy ni i fith e piin buguli yoror rok ngak ko mang fan ni be ngongliy e re arke nem. Ere gur, i par Noah nde fulweg lungun e pi girdi’ nem ara yog ngorad ni ngar talgad i weliy boch ban’en ndariy rogon ngorad? Danga’, ya michan’ rok e aram e n’en ni k’aring ni nge machib nde rus me weliy ko girdi’ murung’agen fare ran ni bayi pag Got nge yib. Dabisiy ni yog Noah ko girdi’ fapi thin ni yog Jehovah ngak ni faani gaar: “Kug turguy u wun’ug ni nggu thang owchen urngin e girdi’. Bay gu thang owcherad, ya re fayleng ney e ke sug ko ngongol rorad nib kireb. . . . Bay gu pi’ e ran nge yib nga daken e fayleng ni nge  thang mit urngin ban’en nib fos. Ma urngin ban’en ni bay u daken e fayleng ni bay yim’.” Maku reb e, dariy e maruwar riy ni yog Noah ko girdi’ rogon nrayog ni ngar mageygad ni yad ba fos, ya ki sul u daken e n’en ni yog Got ni gaar: “Ngam man nga lan e re barkow nem.” Ki dag nib gel e michan’ rok ni aram e i “machibnag e tin nib mat’aw.”​—Gen. 6:13, 17, 18; 2 Pet. 2:5.

8. Mang e ni thagthagnag nga laniyan’ James ni nge weliy u rarogon e michan’ ni bay ko tin riyul’ e Kristiano?

⁸ Dariy e maruwar riy nde n’uw nap’an nga tomuren ni yoloy apostal Paul e babyor rok ngak e pi Hebrew ni be weliy murung’agen e michan’, ma aram me yoloy James e gi rok e babyor. Taareb rogon e n’en ni yog James u murung’agen e michan’ ko tin riyul’ e Kristiano ko n’en ni yog Paul, ya yog ni bin riyul’ e michan’ ni bay ko piin Kristiano e gathi kemus ni ban’en ni bay u lanin’rad, ya kub chagil e ngongol rorad ngay. I yoloy James ni gaar: “Mu dag ngog rogon nrayog ni nge mich Got u wun’um nde chag e ngongol rom ngay, mu gu dag ngom e michan’ rog ngak Got ko ngongol rog.” (Jas. 2:18) Ki weliy James e n’en nib thil u thilin e bin baaray ni kemus ni nge riyul’ ban’en u wan’ be’ ko bin ni nge chagil e ngongol rok be’ ko michan’ rok. Pi moonyan’ e ba mich u wan’rad ni bay Got, machane dariy e bin riyul’ e michan’ rorad. Ya yad ma rin’ boch ban’en nib togopuluw ko pi n’en nib m’agan’ Got ngay. (Jas. 2:19, 20) Machane, i weliy James  murung’agen be’ nib moon ni immoy kakrom nib mich Got u wan’ ni gaar: “I diin e ga’ rodad i Abraham me mat’aw ngak Got? I mat’aw ngak Got u daken e ngongol rok ko fa ngiyal’ nem ni pi’ Isak ni fak ni ba maligach u daken e altar. Damur guy? Michan’ rok ngak Got nge ngongol ni rin’ e peth nge maruwel u taabang; me yan i aw e michan’ rok ngak Got ni ke fel’ rogon u daken e ngongol ni rin’.” Tomuren e re n’ey ma aram miki tamilangnag James ni michan’ e thingari chagil e ngongol ngay. I gaar: “Bod rogon e dowef nra dariy e pogofan riy ma ba yam’, ere ku er rogon e michan’ ngak Got nra de chag e ngongol ngay ma ba yam’ fare michan’.”​—Jas. 2:21-23, 26.

9, 10. Uw rogon ni ke ayuwegdad apostal John ni ngad nanged feni ga’ fan ni ngad maruweliyed e michan’ rodad?

⁹ Ba pag 30 e duw nga tomuren, me yoloy apostal John e Gospel rok nge dalip yang e babyor ngki pi’ ngak yugu boch e Kristiano. John e ku manang rarogon e bin riyul’ e michan’ ni bod rogon yugu boch e girdi’ nra yoloyed boch e babyor ko Bible. Machane, kemus ni yigoo ir u fithik’ e piin ni ur yoloyed e pi babyor ko Bible e th’abi yoor yay ni fanay fare bugithin ni Greek nib ga’ ni yima pilyeg ni “maruweliy e michan’.”

¹⁰ Bod ni, yog ni gaar: “En nra mich u wan’ [ara “maruweliy e michan’ rok ngak”] e en ni Fak Got e aram e ke yog e yafos ndariy n’umngin nap’an ngak; ma en ndabi fol rok e en ni Fak Got e dabiyog e yafos ngak, machane be par e damumuw rok Got u daken ndariy n’umngin nap’an.” (John 3:36) Michan’ ni ma dag e tin riyul’ e Kristiano e ba muun ngay e fol ni yad ma tay ko pi motochiyel rok Jesus. Ba ga’ ni i sul John u daken boch ban’en ni i yog Jesus ni be tamilangnag feni ga’ fan ni ngaud maruweliyed e michan’ rodad.​—John 3:16; 6:29, 40; 11:25, 26; 14:1, 12.

11. Uw rogon nrayog ni ngad daged nib ga’ fan u wan’dad e tin riyul’ ni kad filed?

¹¹ Ri gad ba felfelan’ ni ke fanay Jehovah gelngin nib thothup ni nge dag e tin riyul’ ngodad me ayuwegdad ni nge mich fare thin nib fel’ u wan’dad me m’ug ko ngongol rodad! (Mu beeg e Luke 10:21.) Dariy e ngiyal’ ni ngad talgad i pining e magar ngak Jehovah ni ke pow’iydad ngak u daken Fak ni ir e kad “l’eged owchedad ngak . . . yi ir e be tor e michan’ rodad ngak.” (Heb. 12:2) Rogon ni ngad daged nib ga’ fan u wan’dad rogon e runguy ni ke dag Got ngodad e aram e ngaud gelnaged e michan’ rodad u daken e meybil nge fol Bible.​—Efe. 6:18; 1 Pet. 2:2.

12. Mang boch e kanawo’ nsusun e ngad maruweliyed e michan’ rodad riy?

¹² Susun e ngaud pared ni gad be maruweliy e michan’ rodad ko pi n’en ni ke micheg Jehovah. Machane, thingar ud rin’ed e re n’ey u boch e kanawo’ nrayog ni nge guy e girdi’. Bod ni, gubin ngiyal’ ni gad ma machibnag murung’agen Gil’ilungun Got ma gad be ayuweg boch e girdi’ ni ngar manged boch i gachalpen Jesus. Maku reb e, gubin ngiyal’ ni gad ma ‘ngongliy e ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got u fithik’ e mich u wun’uy ngak Kristus.’ (Gal. 6:10) Maku reb e, gad ma athamgil ni ngad n’aged e ‘bin kakrom i gadad nge tin ni ke mecham ngay’ ma gad siyeg e pi n’en nrayog ni nge magawonnag e michan’ rodad.​—Kol. 3:5, 8-10.

13. Uw feni ga’ fan ni nge “mich” Got u wan’dad? Uw rogon ni be weliy e Bible e re n’ey, ma mang fan?

¹³ Be gaar e Bible: “Dariy be’ nra fel’ u wan’ Got ni faanra de mich Got u wan’. Ya en nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.” (Heb. 11:6) Be yog e Bible ni ‘michan’’ rok be’ ngak Got e aram reb ko ‘tin’ ni som’on ban’en nib t’uf ni nge yag ngak be’ ni baadag ni nge mang reb e tin riyul’ e Kristiano, ya aram bang ko def ko michan’ rodad. (Heb. 6:1) Machane, tin riyul’ e Kristiano e thingar ra puthuyed ‘pangirad nib fel’ nga rogon nib michan’rad ngak Kristus’ ya nge yag nra pared ni ‘yad ba t’uf rok Got.’​—Mu beeg e 2 Peter 1:5-7; Jude 20, 21.

14, 15. Uw feni ga’ fan e michan’ ni faanra ngan taarebrogonnag ko t’ufeg?

¹⁴ Pi Kristiano ni ur yoloyed boch e babyor ko  Bible e ra tamilangnaged feni ga’ fan e michan’, ya bokum miriay yay nra weliyed murung’agen u lan e pi babyor ko Bible ni ur yoloyed. Dariy reb i fel’ngin e Kristiano ni kan weliy murung’agen ni aram feni yoor yay. Ere gur, be yip’ e re n’ey fan ni michan’ e aram e bin th’abi ga’ fan e fel’ngin nib t’uf ni nge yag ngak e piin Kristiano?

¹⁵ Nap’an ni be taarebrogonnag Paul e michan’ ko t’ufeg me yoloy ni gaar: “[Faanra] gelngin nib michan’ug ngak Kristus e rayog ni chuweg e burey u tagil’, machane faanra de t’uf Got rog nge girdi’, ma dariy rogog.” (1 Kor. 13:2) I tamilangnag Jesus nrib ga’ fan ni nge t’uf Got rodad u nap’an ni pi’ e fulweg ko fare deer ni fith be’ ni faani gaar: “Bin ngan e motochiyel e ir e th’abi ga’ u fithik’ e Motochiyel?” (Matt. 22:35-40) Ere, faanra bay e t’ufeg rok be’ ma aram e ra mom ni ngki yag boch i fel’ngin e Kristiano ngak nib muun e michan’ ngay. Be gaar e Bible: “Be’ nib t’uf Got rok nge girdi’ e dabiyog ni nge pag ir ndab ki michan’.” Be’ ni aray rogon e rib mich u wan’ urngin ban’en ni ke yog Got ko Thin rok.​—1 Kor. 13:4, 7.

16, 17. Uw rogon ni kan tamilangnag murung’agen e michan’ nge t’ufeg u lan e Bible? Bin ngan ko gal fel’ngin ney e kab ga’, ma mang fan?

¹⁶ Michan’ nge t’ufeg e aram l’agruw e fel’ngin nrib ga’ fan ni nge yag ngodad. Aram fan ni i weliy e pi Kristiano ni ur yoloyed boch e babyor ko Bible murung’agen e gal fel’ngin ney u taabang. I yog Paul ngak pi walagen ni ‘michan’ rorad ngak Kristus nge rogon nib t’uf Kristus rorad nge girdi’, e thingar ron’ed nga dakenrad ni bod fa gi wasey ni ma upunguy e salthaw ngorongoren ngay.’ (1 Thess. 5:8) Ki yoloy Peter ni gaar: “Ba t’uf [Jesus] romed, ni yugu ara’ rogon ndamur guyed; ma mmich u wun’med, ni yugu ara’ rogon ndamur guyed e chiney.” (1 Pet. 1:8) I yog James ngak pi walagen ni kan dugliyrad ni gaar: “I Got e ke mel’eg e girdi’ ni gafgow u roy u fayleng ni ngari gel e michan’ rorad ngak Got nguur pired nib pagan’rad ngak me yog ngorad e gin nsuwon Got ni yog nra pi’ ngak e piin nib t’uf Got rorad.” (Jas. 2:5) Me yoloy John ni gaar: “Baaray e tin ni yog [Got] ni ngad rin’ed: ni aram e nge pagan’dad [“nge michan’dad,” NW] nga fithingan Fak ni Jesus Kristus me bagadad me t’uf rok bagadad.”​—1 John 3:23.

¹⁷ Yugu aram rogon nib ga’ fan e michan’, machane bay boch ban’en u rarogon e re fel’ngin ney nra chuw u nap’an nra riyul’ e athap rodad ma gad guy ni ke lebug e pi n’en ni ke micheg Got. Machane, t’ufeg rodad ngak Got nge girdi’ e ban’en nib t’uf ni nge par rodad ndariy n’umngin nap’an. Aram fan ni yog Paul ni gaar: “Ere dalip ban’en ni baaray nra par: ni aram e michan’ ngak Kristus, nge l’agan’ ngak, nge rogon ni gadad ba t’uf rok Got nge rogon nib t’uf Got rodad nge girdi’; ma bin th’abi ga’ ko pi n’ey e rogon ni gadad ba t’uf rok Got nge rogon nib t’uf Got rodad nge girdi’.”​—1 Kor. 13:13.

18, 19. Mang angin e michan’ ni bay ko girdi’ rok Got e ngiyal’ ney? Mini’ e bay rogon ni ngan pining e sorok ngak ko re n’ey?

¹⁸ Pi tapigpig rok Jehovah e ngiyal’ ney e ke mich Gil’ilungun Got u wan’rad ma yad ma rin’ boch ban’en ni fan ngay. Ku yad gubin ni yad ma t’ufeged yad. Ma yad ma rin’ e re n’ey ni bochan e kar paged gelngin Got nib thothup ni nge pow’iyrad ko pi n’en ni yad ma rin’. (Gal. 5:22, 23) Angin ni ke yib riy e ke pag meruk e milyon e pi walag ni pumoon nge ppin u ga’ngin yang e fayleng ni ke yag ni ngar pared u fithik’ e gapas nge taareban’. Riyul’ ni ireray e bin riyul’ e michan’ nge t’ufeg ni bay ko tin riyul’ e Kristiano!

¹⁹ Dariy be’ ni ir e be maruweliy e pi n’ey u gelngin. Ya be yag ni nge buch e re n’ey ni bochan e be ayuwegdad Got. Ma “re n’ey e ba pow ni bay i par ndariy n’umngin nap’an, ni ban’en ni yira pining e sorok riy ngak Jehovah.” (Isa. 55:13, NW) Arrogon, rogon ni ‘ke thapegdad [Got] ngak, ni bochan e ke mich Jesus u wun’dad’ e ‘ba tow’ath ni ke pi’ Got ngodad.’ (Efe. 2:8) Ere, ka ra ulul Jehovah i ayuweg boor e girdi’ ni nge michan’rad ngak. Ma tomur riy e aram e piin ni yad ba flont, ma yad ba mat’aw, ma yad ba felfelan’ e aram e piin ni yad ra suguy e fayleng mu ur pininged e sorok ngak Jehovah ndariy n’umngin nap’an!