1, 2. (a) Uw rogon nib thil e athap ko tin riyul’ e Kristiano ko pi n’en ni be athapeg e girdi’ ko fayleng rok Satan? (b) Mang l’agruw e deer nib ga’ fan ni gad ra weliy e fulweg riy?

 RIB manigil e athap ni bay rok urngin e tin riyul’ e Kristiano! Demtrug ko gad boch e piin ni kan dugliyrad ara gad ba muun nga “yugu boch e saf,” ma gad gubin ni gad be athapeg ni ngad guyed ni ke lebug e n’en nib m’agan’ Jehovah ngay aram ko som’on me yag ni nge gagiyel feni thothup e ngachal rok. (John 10:16; Matt. 6:9, 10) Dariy ban’en nrayog ni nge athapeg be’ ni kab fel’ ni bod rogon e re n’ey. Ku gad be athapeg ni nge tow’athnagdad Got ni aram e nge pi’ e yafos ndariy n’umngin nap’an ngodad ma gad mang bang ko “bin nib beech e lan e lang” ara “bin nib beech e fayleng” rok. (2 Pet. 3:13) Machane, chiney ndawori buch e pi n’ey e gad be athapeg ni ngad guyed rogon nra ulul Jehovah i pow’iy e girdi’ rok ma be ayuwegrad e ngiyal’ ney ko tin tomuren e rran.

² Piin ni yad bang ko fayleng rok Satan e ku bay boch ban’en ni yad be athapeg, machane dar nanged ko ra lebug fa danga’. Bod ni, bokum milyon e girdi’ ni yad ma un nga boch e gosgos ni ma yag e salpiy riy e yad ma athapeg ni ngar gelgad u reb e pi gosgos nem ara nge yag boor e salpiy riy ngorad, machane dar nanged ko ra buch ni aram rogon fa danga’. Machane, bin riyul’ e michan’ e aram e nge “pagan’dad” ko pi n’en ni gad be athapeg. (Heb. 11:1) Machane, sana rayog ni ga be lemnag ko, uw rogon nrayog ni nge gel e pagan’ rom ko pi n’en ni ke l’agan’um ngay? Ma mang boch i angin nra yib ngom ni  faanra ngari mich u wan’um e pi n’en ni ke l’agan’um ngay?

3. Mang fan ni bay e michan’ ko tin riyul’ e Kristiano?

³ Dariy bagadad nni gargeleg ni bay e michan’ rok; ma re n’ey e ku gathi ban’en ni yugu ma yag ngodad ndad maruweliyed. Michan’ ni bay ko piin Kristiano e ke yag ngorad ni bochan e kar paged gelngin Got nib thothup ni nge pow’iy lanin’rad. (Gal. 5:22) Der yog e Bible ni bay e michan’ rok Jehovah ara ba t’uf ni nge yag e michan’ ngak. Bochan ni ir e gubin ma rayog rok mab gonop, ma aram fan ndariy ban’en nrayog ni nge taleg ni nge dabi lebguy e n’en nib m’agan’ ngay. Bochan nrib mudugil u wan’ nra lebug e pi n’en ni ke micheg, ma aram fan nrogon u wan’ e gowa ke buch e pi n’em. Aram fan ni ma weliy murung’agen e pi n’en ni ke micheg ni ma gaar: “Ke m’ay!” (Mu beeg e Revelation 21:3-6.) Ma piin Kristiano e bay e michan’ rorad ni bochan e Jehovah e ir reb e Got ni “rib yul’yul’” ma gubin ngiyal’ ni ma rin’ e pi n’en ni ke micheg.​—Deut. 7:9.

4. Mang reb e ban’en ni i athapeg boch e pumoon nge ppin ni ur moyed u m’on ni nge sum e ulung ni Kristiano?

⁴ Fare babyor ni Hebrews ko guruy ni 11 e be yog fithingan 16 e pumoon nge ppin nib gel e michan’ rorad. Be yog e Bible ni boor e pi girdi’ nem nge ku boch e girdi’ nra ‘daged ngak e girdi’ gelngin e michan’ rorad ngak Got.’ (Heb. 11:39) Yad gubin nib ‘pagan’rad’ nra pi’ Jehovah faen “fak” ara owchen ni kan micheg ni nge thang Satan ni toogor rok me lebguy e n’en nib m’agan’ ngay aram ko som’on. (Gen. 3:15, BT) Pi girdi’ nem ni yad ba yul’yul’ ngak Got e ra m’ad u m’on ni nge bing Jesus Kristus ni ir e en fak ara “owchen” fare pin e kanawo’ ngak boch e girdi’ ni nga ranod nga tharmiy. (Gal. 3:16) Machane, gad ba felfelan’ ya gubin ban’en ni ma micheg Jehovah e der ma yan i aw nib m’ay fan. Ere, aram fan nib mich u wan’dad ni yira fasegrad mar pared u paradis u fayleng ni kar flontgad.​—Ps. 37:11; Isa. 26:19; Hos. 13:14.

5, 6. Mang e i par Abraham nge chon e tabinaw rok ni be l’agan’rad ngay? Uw rogon nra pared nib gel e michan’ rorad? (Mu guy e sasing ni bay u tabolngin e re article ney.)

⁵ Baaray e n’en ni be yog e Hebrews 11:13 u murung’agen boch e girdi’ ni ur moyed u m’on ni nge tabab e ulung ni Kristiano: “Urngin e pi girdi’ ney nra m’ad nib mich Got u wun’rad; nde yog ngorad ko biney e tamilang e pi n’en ni yog Got ni bayi pi’ ngorad, machane ra changargad u urel mi yad guy e tin ni ke yog Got ni bayi pi’ ngorad mi yad felfelan’ ngay.” Bagayad e pi girdi’ nem e aram Abraham. Ere gur, i par Abraham ni be lemnag rarogon e par nra tay u tan e gagiyeg rok faen “fak” ara owchen fare pin ni kan micheg? Ba tamilang e fulweg ni pi’ Jesus ko re deer ney u nap’an ni yog ngak e piin ni ur togopuluwgad ngak ni gaar: “Chitamangimed i Abraham e i felfelan’ ni bayi guy e birog e rran, me guy me felfelan’.” (John 8:56) Ku arrogon Sarah, nge Isak, nge Jakob, nge ku boch e girdi’ ni ur pared ni be l’agan’rad ko pi n’en nra yibnag Gil’ilungun Got boch nga m’on ni ir e “ke gonopiy yaan ke toy.”​—Heb. 11:8-11.

⁶ Uw rogon ni par Abraham nge chon e tabinaw rok nib gel e michan’ rorad? Dabisiy nra filed murung’agen Got ko pi ga’ rorad, ara boch ban’en ni ur guyed u nap’an nni pilyeg e changar rorad, ara ur beeged boch e babyor ni bay e thin rok Got riy ni un yoloy kakrom. Machane, n’en nib ga’ fan riy e dar paged talin e n’en nra filed u murung’agen Got ma ur pared ni gubin ngiyal’ ni yad be lemnag e pi n’en ni ke micheg Got, nge pi motochiyel rok, ma ur fal’eged i lemnag e pi n’em. Bochan nrib mudugil u wan’rad e athap rorad, ma aram fan ni ur pared ni yad ba yul’yul’ ngak Got ni yugu aram rogon ni immoy yu ngiyal’ ni ur mada’naged e magawon ara togopuluw.

7. Mang boch ban’en ni ke ngongliy Jehovah ni nge ayuwegdad ni nge gel e michan’ rodad? Mang e thingar da rin’ed ko pi n’ey?

⁷ Ke pi’ Jehovah e Thin rok ngodad ni aram e Bible ni kan ngongliy nib polo’ ni fan e nge ayuwegdad ni ngad pared nib gel e michan’ rodad. Faanra ngad pirieged e ‘felfelan’’ ma gad rin’ e tin nib “fel’,” ma aram e thingar da beeged e Thin rok Got ni gubin e rran. (Ps. 1:1-3; mu beeg e Acts 17:11.) Ba t’uf ni ngad folwokgad rok e pi tapigpig rok Jehovah ni ur moyed u m’on ni nge sum e ulung ni Kristiano ni aram e ngaud fal’eged i lemnag e pi n’en ni ke micheg Got ma gad fol ko pi motochiyel rok. Ku boor e tow’ath ni ma pi’ Jehovah ngodad u daken e pi n’en ni ma pi’ “fare tapigpig nib yul’yul’ ma ba gonop” ngodad ni nge ayuweg e michan’ rodad. (Matt. 24:45) Ere, faanra ga’ fan u wan’dad e pi n’en ni gad ma fil ko pi n’em ni ke pi’ Jehovah ngodad, ma aram e rayog ni ngad boded e pi tapigpig rok kakrom nib gel e michan’ rorad ma i ‘pagan’rad’  ko pi n’en ni yad be athapeg ni nge yibnag Gil’ilungun Got.

8. Uw rogon nrayog ni nge gel e michan’ rodad u daken e meybil ni gad ma tay?

⁸ Meybil e ku aram reb e ban’en ni i ayuweg e pi tapigpig rok Got kakrom ni ngar pared nib gel e michan’ rorad. Ki gel e michan’ rorad u nap’an ni ur guyed rogon ni i fulweg Got taban e meybil rorad. (Neh. 1:4, 11; Ps. 34:4, 15, 17; Dan. 9:19-21) Ere ku arrogodad nrayog ni ngaud weliyed ngak Jehovah e pi n’en ni be magafan’dad ngay, ya gad manang nra rung’ag e meybil rodad, ma ra pi’ gelngidad ni ngad athamgilgad u fithik’ e pi magawon rodad ndabi mulan’dad. Ma nap’an nra fulweg Got taban e meybil rodad, ma aram e rayog ni nge gel e michan’ rodad. (Mu beeg e 1 John 5:14, 15.) Michan’ e aram bang u wom’engin gelngin Got nib thothup. Ere, aram fan nib t’uf ni ngaud pared ma gad be ‘ning’ ngak Got ni nge pi’ ngodad ni bod rogon ni yog Jesus ni ngad rin’ed.​—Luke 11:9, 13.

9. Yugu aram rogon nib t’uf ni ngaud yibilayed boch ban’en ni bay rogon ngodad, machane mini’ e piin nib t’uf ni ngkud yibilayed yad?

⁹ Machane, gathi kemus ni yigoo ayuw rok Got e ir e ba t’uf ni ngad ninged u daken e meybil rodad. Ba “pire’” ban’en ni ‘yira ngat ngay ni ke ngongliy’ Jehovah nrayog ni ngaud pininged e magar nge sorok riy ngak ni gubin e rran! (Ps. 40:5) Maku reb e, nap’an ni gad ra meybil ma susun e ‘dab da paged talin e piin ni ka nin’rad nga kalbus, ni nguud lemniged ni gowa gad ba’ rorad u kalbus.’ Kub t’uf ni ngaud yibilayed pi walagdad ni yad bay u ga’ngin yang e fayleng nib ga’ ni piin ni ‘yad ma yog e thin rodad.’ Riyul’ nri ma gel e michan’ rodad miki gel e chugur ko tha’ u thildad Jehovah u nap’an ni gad ra guy rogon ni be fulweg taban e meybil rodad!​—Heb. 13:3, 7. 

10. Mini’ boch e tapigpig rok Got kakrom nra siyeged ni ngar rin’ed boch ban’en nib togopuluw ko michan’ rorad? Mang e pi’ gelngirad ni ngar rin’ed e re n’ey?

¹⁰ I weliy apostal Paul murung’agen boch e skeng ni i mada’nag boch e tapigpig rok Got ko Hebrews ko guruy ni 11. Bod ni weliy murung’agen boch e ppin nib mich Got u wan’rad ni yim’ pi fakrad ni pumoon, min fasegrad ko yam’ boch nga tomuren. Ki weliy murung’agen e piin nra “siyegned ni ngan pagrad, min gafgownagrad ngar m’ad ni fan e ngan fasegrad ko yam’ nga reb e tamilang ni kab fel’.” (Heb. 11:35) Yugu aram rogon ndad nanged ko mini’ e pi girdi’ nem ni i weliy Paul murung’agrad, machane gad manang ni immoy boch e girdi’ kakrom nni malangnagrad ngar m’ad ni bochan e ur folgad rok Got ma ur rin’ed e tin nib m’agan’ ngay. Boch e pi girdi’ nem e aram Naboth nge Zekariah. (1 Ki. 21:3, 15; 2 Kron. 24:20, 21) Daniel nge fapi pagel ni fager rok e ki mab e kanawo’ ngorad nrayog ni ngan “pagrad” ni faan yad ra rin’ boch ban’en nib togopuluw ko michan’ rorad. Machane, bochan nib mich u wan’rad nib gel gelngin Got nrayog ni nge ayuwegrad, ma aram e n’en ni ayuwegrad ni ngar pared ni yad ba yul’yul’. Rogon feni gel e michan’ rorad e ra yan i bod ni gowa kar “ninged l’ugun e layon” mar ‘thanged e nifiy nib gel.’​—Heb. 11:33, 34; Dan. 3:16-18, 20, 28; 6:13, 16, 21-23.

11. Mang boch e skeng ni i mada’nag boch e profet kakrom ni bochan e michan’ rorad?

¹¹ Bochan e michan’ rok boch e profet ni bod rogon Mikayah nge Jeremiah, ma aram fan ni ‘un moningnagrad . . . mi nin’rad nga kalbus.’ Ku bay boch e tapigpig rok Got ni bod rogon Elijah ni i yan u ‘daken e ted i yan nge yungi n’en ndabi tugul ban’en riy, ma be par u lan e yiy nge low u tan e but’.’ Gubin e pi tapigpig rok Got ney nra athamgilgad u fithik’ e pi skeng ni ur mada’naged ni bochan e be ‘pagan’rad ko pi n’en ni ir e ke l’agan’rad ngay.’​—Heb. 11:1, 36-38; 1 Ki. 18:13; 22:24-27; Jer. 20:1, 2; 28:10, 11; 32:2.

12. Mini’ e dag e bin th’abi fel’ e kanawo’ u rogon ni par nib yul’yul’ u fithik’ e pi skeng ni mada’nag? Mang e ayuweg ni nge rin’ e re n’ey?

¹² Tomuren ni weliy Paul murung’agen boch e pumoon nge ppin nib gel e michan’ rorad, ma aram me weliy murung’agen e en ni dag e bin th’abi fel’ e kanawo’ ngodad ni aram e Somol rodad i Jesus Kristus. Be gaar e Hebrews 12:2: “De pag ir. . . . Machane bochan e felfelan’ ni be sonnag ma daki tafinaynag e tamra’ nra tay ko yam’ ni nge tay . . . me ere chiney e ke par nga but’ u ba’ ni mat’aw rok Got u tagil’ Got.” Arrogon, susun ni ngad “tafinayniged” rogon ni dag Jesus feni gel e michan’ rok u nap’an ni mada’nag e tin th’abi mo’maw’ e skeng. (Mu beeg e Hebrews 12:3.) Immoy boch e Kristiano kakrom nra folwokgad rok Jesus mar pared ni yad ba yul’yul’ nge mada’ ko yam’ ndar paged e michan’ rorad ni bod rogon Antipas. (Rev. 2:13) Pi Kristiano ney e ra yag fare tow’ath ngorad ni  aram e ngan fasegrad ko yam’ ma ranod nga tharmiy. Ma binem e fos ko yam’ e “kab fel’” ko bin ni i athapeg boch e girdi’ ni yad ba yul’yul’ ni ur moyed u m’on ko pi girdi’ ney. (Heb. 11:35) Ba ngiyal’ u tomuren ni tabab Gil’ilungun Got ko gagiyeg ko duw ni 1914, ma gubin e pi girdi’ nem ni yad ba yul’yul’ ni kan dugliyrad e goo ra fosgad ko yam’ nga ranod nga tharmiy, ma aram e gin ni yad ra un riy ngak Jesus ngar gagiyegnaged e girdi’ nu fayleng.​—Rev. 20:4.

13, 14. Mang boch e skeng ni i mada’nag Rudolf Graichen, ma mang e ayuweg ni nge athamgil u fithik’ e pi skeng nem?

¹³ Bokum milyon e pi tapigpig rok Got e ngiyal’ ney ni yad ma folwok ko n’en ni rin’ Jesus ni aram e yad ma par nib tamilang e athap rorad u wan’rad ma darur paged e pi skeng ni yad ma mada’nag ni nge warnag e michan’ rorad. Am lemnag e n’en ni rin’ be’ ni ka nog Rudolf Graichen ngak nni gargeleg u Chiyamen ko duw ni 1925. Ma yib ngan’ bogi sasing ni immoy u dow e rungrung ko naun rok ni yaan boch ban’en ni be weliy e Bible murung’agen. I yoloy ni gaar: “Immoy reb e pi sasing nem ni yaan ba wolf nge ba fak e saf, nge reb ni yaan bochi tir nge ba gamanman ni leopard, nge reb ni yaan ba fak e garbaw nge ba layon. Gubin e pi gamanman ney ni yad be par u fithik’ e gapas ma be pow’iyrad bochi pagel . . . . Rib ga’ angin e pi sasing nem ngog, ma ke par u lanin’ug ke mada’ ko ngiyal’ ney.” (Isa. 11:6-9) Ireray e n’en ni ayuweg ni nge par nib yul’yul’, ma de maruwar u wan’ e athap rok  ko yafos ni manemus u paradis u fayleng ni yugu aram rogon ni boor e duw ni i par reb e ulung ni ka nog e Nazi Gestapo ngorad ngaur gafgownaged, ma boch nga tomuren miki gafgownag reb e ulung ni sum ko Ngek u Chiyamen ni ka nog e Communist Stasi ngorad.

¹⁴ Ku bay boch e skeng nib mo’maw’ ni ki mada’nag Rudolf. I yim’ e chitiningin u ba mit e m’ar ni ka nog e typhus ngay u nap’an ni immoy u reb e concentration camp u Ravensbrück, ngemu’ miki war e michan’ ko chitamangin ma aram me sayinnag bangi babyor ni be yog ni gathi ir reb e Pi Mich Rok Jehovah. Tomuren nni pag Rudolf u kalbus, ma aram mi i lekag boch e ulung, ma boch nga tomuren ma aram me un ko fare skul u Gilead. Tomuren ni mu’ ko re skul nem ma aram min pi’ nga Chile ni nge mang missionary, ma ka i lekag boch e ulung u rom. Machane, ku bay boch e skeng ni ki mada’nag Rudolf. Reb e duw nga tomuren nra mabgolgow reb e missionary ni ka nog Patsy ngak, ma aram me yim’ bochi tir nib pin ni fakrow ni ka fin nni gargeleg. Boch nga tomuren u nap’an ni ka fini gaman 43 e duw ko ppin rok, ma aram miki yim’. Yugu aram rogon urngin e skeng ni i mada’nag Rudolf, machane i par nib yul’yul’ ngak Jehovah. Ki mada’ ko ngiyal’ ni ke pilibthir ma ke m’ar, machane ki ulul ni nge pigpig ni ir reb e pioneer nge reb e piilal u lan e ulung. Bay murung’agen e re walag ney ko Fare Wulyang ko Damit ko August 1, 1997, ko page 20-25 ko thin ni Meriken. ^[1]

15. Mini’ boch e Pi Mich Rok Jehovah ni ka be yag ni ngar pared ni yad ba felfelan’ ni yugu aram rogon ni yibe gafgownagrad?

¹⁵ Yugu aram rogon ni yibe gafgownag e Pi Mich Rok Jehovah, machane ka yad be felfelan’ ko athap rorad. Bod ni, boor e walag ni pumoon nge ppin u Eritrea, ngu Singapore, ngu South Korea ni kan kalbusnagrad. Yooren e pi walag ney e kan kalbusnagrad ni bochan e yad ma fol ko fare thin ni yog Jesus ni aram e dab ra uned ko cham. (Matt. 26:52) Boch e pi walag ney ni kan kalbusnagrad e aram Isaac, nge Negede, nge Paulos ni ke pag 20 e duw ni kan kalbusnagrad u Eritrea. Yugu aram rogon nib gel e gafgow ni kan tay ko pi walag ney, maku danir pagrad ni ngar ayuweged e gallabthir rorad ni kar pilibthirgad ara ngar uned ko mabgol, machane ka yad be par ni yad ba yul’yul’. Gad ra yaliy e sasing rorad ko fare website rodad ni jw.org, ma be m’ug riy nrib gel e michan’ rorad. Mus ko pi matanagen e kalbus ni yad ma tayfan e pi walag ney.

16. Faanra ba gel e michan’ rom, ma uw rogon nra ayuwegem?

¹⁶ Yooren e pi tapigpig rok Jehovah e dawor ra mada’naged e togopuluw ni aram gelngin. Machane, ku yibe skengnag e michan’ rorad u yugu boch e kanawo’. Boor i yad e yad be gafgow ko par, ara yad ma par u boch e nam ni yibe mahl riy, ara kar gafgowgad ni bochan e yoko’, ara durru’, ara boch ban’en ni ma yib ni yima gafgow riy. Ku bay boch i yad ni yad bod Moses nge ku boch e tapigpig rok Got kakrom ni bod rogon Abraham, nge Isak, nge Jakob nra paged e flaab rorad ni fan e ngar pigpiggad ngak Jehovah. Pi walag ney e ri yad ma athamgil ni ngar pared ni yad ba palog u chogowen e fel’ rogon ko re fayleng ney. Ere, mang e ke ayuwegrad ni ngar rin’ed e re n’ey? Ba t’uf Jehovah rorad ma rib mich u wan’rad nra yal’uweg gubin ban’en nde mat’aw ni be buch e ngiyal’ ney, maku ra tow’athnag e pi tapigpig rok ni yad ba yul’yul’ ngak ni aram e ra pi’ e yafos ndariy n’umngin nap’an ngorad u lan e bin nib beech e fayleng ni urngin ban’en riy mab mat’aw.​—Mu beeg e Psalm 37:5, 7, 9, 29.

17. Mang e kam dugliy ni ngam rin’, ma mang e gad ra weliy ko bin migid e article?

¹⁷ Kad filed ko re article ney ni faanra ud meybilgad ni gubin ngiyal’ ma gad be fal’eg i lemnag e pi n’en ni ke micheg Got, ma aram e rayog ni nge par e michan’ rodad nib gel. Re n’ey e ra ayuwegdad ni ngad athamgilgad u fithik’ urngin e skeng ni gad ra mada’nag ma gad par nib “pagan’dad ko pi n’en ni ir e ke l’agan’dad ngay.” Machane, ku bay boch ban’en nib l’ag rogon ko michan’ ni be weliy e Bible murung’agen, ma aram e n’en ni yira tamilangnag ko bin migid e article.