1, 2. Mang boch ban’en nthingari cham e pi tapigpig rok Jehovah ngay?

 KA NAP’AN Abel ni be’ nib yul’yul’ keb i mada’ ko ngiyal’ ney ni ma mada’nag e pi tapigpig rok Got boch e magawon. Nap’an ni yol apostal Paul ko pi Kristiano ni Hebrew, me yog ngorad ni ‘boor ban’en ni kar gafgowgad riy’ u nap’an ni yad be gay rogon ni ngar fel’gad u wan’ Jehovah me tow’athnagrad. (Heb. 10:32-34) I taarebrogonnag Paul e pi gafgow ara pi magawon ni be yan e pi Kristiano u fithik’ ko pi magawon ni ma mada’nag e piin ni yad ma un nga boch e gosgos u Greece ni bod rogon e sagreng, nge thal, nge tug. (Heb. 12:1, 4) Ngiyal’ ney e gad be sagreng i yan ko yafos, ma bay e pi toogor rodad ni yad baadag ni ngar magawonnaged gadad, ara ra guyed rogon ni nge tun aydad, ara ra k’aringed gadad ni nge dab ki felfelan’dad ma dab ki yag ngodad e pi tow’ath ni gad be sonnag ni ka bay boch nga m’on.

² Som’on e gad be cham ngak Satan nge re fayleng nib kireb ney. (Efe. 6:12) Ere, rib ga’ fan ni ngad guyed rogon ndabi magawonnagdad e “yungi n’en ni ke fal’eg e moonyan’ rogon ke par riy be cham ngodad.” Re n’ey e ba muun ngay e pi machib nge llowan’ ko re fayleng  ney, nge boch e ngongol nib kireb ni bod rogon e ngongol ndarngal, nge tamagow, nge langad, nge muun alkul, nge ngan fanay boch e falay ni kireb. Ma gubin ngiyal’ nthingar da chamgad ko pi meewar rodad nge boch ban’en ni ma muleg lanin’dad.​—2 Kor. 10:3-6; Kol. 3:5-9.

3. Uw rogon ni ma skulnagdad Got u rogon ni ngad gelgad ko pi toogor rodad?

³ Ere gur, rayog ni ngad gelgad ko pi toogor rodad ney? Rayog, machane dabiyog ni ngad gelgad ni faanra dab da chamgad ngorad. I taarebrogonnag Paul ir ngak be’ ni ma un ko tug kakrom. I yog ni gaar: “Gu bod be’ ni girdien e tug nder adbey e tug rok.” (1 Kor. 9:26) Ere, thingar da chamgad ngak e pi toogor rodad ni bod rogon reb i girdien e tug ni be cham ko toogor rok. Ma skulnagdad Jehovah ma ma ayuwegdad ko cham ni gad be tay ko toogor rodad. Ma pi’ boch e fonow ngodad ko Thin rok nrayog ni nge ayuwegdad. Ku ma ayuwegdad u daken e pi babyor rodad nib puluw e thin riy ko Bible, nge pi muulung, nge assembly, nge convention ni gad ma un ngay. Ere, ga be fol ko pi n’en ni ga be fil ko pi n’ey, fa? Faanra dab mu fol riy, ma taareb rogom ngak reb i girdien e tug ni ga be “adbey e tug” rom, ma dabiyog ni ngam gel ko toogor rom.

4. Uw rogon ni nge dabi gel e kireb ngodad?

⁴ Gubin ngiyal’ nthingar da pared ni gad be tedan’dad, ya rayog ni nge cham e pi toogor rodad ngodad ko ngiyal’ ndarud lemnaged ni yad ra cham ngodad ara u nap’an ni kad meewargad. Aram fan ni be ginangdad e Bible ni gaar: “Dab mu digey e kireb nge gel ngom; machane ngam ngongliy e ngongol nib fel’ ngam gel ngak e kireb.” (Rom. 12:21) Fare thin ni be gaar, “dab mu digey e kireb nge gel ngom” e be dag nrayog ni ngad gelgad ko kireb. Rayog ni ngad gelgad ko kireb ni faanra ud chamgad ngay ni gubin ngiyal’. Machane, faan gad ra tal ndab kud chamgad ma aram e rayog ni nge gel Satan ngodad, nge re fayleng rok ney, nge pi meewar rodad. Ere, dariy e ngiyal’ ni ngam pag Satan nge k’aring e marus ngom ma dab kum ulul ko cham ni ga be tay ngak!​—1 Pet. 5:9.

5. (a) Mang e rayog ni nge ayuwegdad ni ngad ululgad ni ngad guyed rogon ni nge tow’athnagdad Got? (b) Chon mini’ u Bible e gad ra weliy murung’agrad?

⁵ Faanra ngad gelgad ko cham ni gad be tay, ma dariy e ngiyal’ ni ngad paged talin fan ni gad be cham. Faanra ngad fel’gad u wan’ Got me tow’athnagdad, ma thingar dab da paged talin fapi thin ni bay ko Hebrews 11:6 ni be gaar: “En nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.” Fare bugithin ni Greek ni kan pilyeg u roy ni “be gayiy” e be yip’ fan ni ngan athamgil min maruwel nib gel. (Acts 15:17) Be weliy e Bible murung’agen boch e pumoon nge ppin ni ur athamgilgad u rogon nrayog rorad ni nge yag e tow’ath rok Jehovah ngorad. Jakob, nge Rachel, nge Josef, nge Paul e ur mada’naged boch e magawon nrib mo’maw’, machane i yag rorad ni ngar athamgilgad u fithik’ e pi magawon nem. Ere, uw rogon nrayog ni ngad folwokgad ko pi girdi’ ney?

6. Mang e ayuweg Jakob ni nge athamgil, ma uw rogon nni tow’athnag ni bochan e re n’ey? (Mu guy e sasing ni bay u tabolngin e re article ney.)

⁶ Ba gel e athamgil ni i tay Jakob ni bochan e ba t’uf Jehovah rok, ma kub ga’ fan e tirok ban’en u wan’, ma rib mich u wan’ e n’en ni ke micheg Jehovah ni aram e ra tow’athnag e piin owchen. (Gen. 28:3, 4) Aram fan ni yugu aram rogon ni ke chugur ni nge gaman 100 e duw rok, mi ri athamgil u rogon nrayog rok ni nge yag e tow’ath rok Got ngak; ma kur fathalgow reb e engel rok Got. (Mu beeg e Genesis 32:24-28.) Gur, i yag rok Jakob ni nge fathal ko re engel nem u gelngin? Danga’! Machane, kari dugliy u wan’ ndabi pag ir nge mada’ ko ngiyal’ ni kan tow’athnag! Ma riyul’ nni tow’athnag ko athamgil ni tay. I tunguy Got Israel ngak (ni fan e re bugithin nem e “ke fathal ngak Got” ara “ke fathal Got”). Ere, ke yag ngak Jakob fare tow’ath ni ku gad  be nameg ni nge yag ngodad ni aram e ngad pared ni kad fel’gad u wan’ Jehovah ma be tow’athnagdad.

7. (a) Mang magawon e mada’nag Rachel? (b) Uw rogon ni athamgil nge mada’ ko ngiyal’ nni tow’athnag?

⁷ Rachel ni leengin Jakob e ri ku baadag ni nge guy rogon nra lebguy Jehovah e pi n’en ni ke micheg ngak figirngin. Machane, i mada’nag Rachel reb e magawon nrib mo’maw’, ya dariy fak. Ma u nap’an Rachel e faanra dabi diyen reb e ppin ma rib gel e kireban’ ni ma tay. Ere, uw e yib gelngin riy ni nge yag ni nge athamgil u fithik’ e pi magawon ni i mada’nag nrayog ni nge muleg laniyan’ maku dariy ban’en nrayog ni nge rin’ ngay? Dariy ba ngiyal’ ni mulan’. Ya i par ni be athamgil ma be p’eyn’iy e meybil. Ere, rung’ag Jehovah e meybil rok Rachel, ma aram me munmun me tow’athnag me yag ni nge diyen. Aram fan ni yog ni gaar: “Kug puluw ngak walageg ni ppin, ma kug gel!”​—Gen. 30:8, 20-24.

8. Mang magawon e i yan Josef u fithik’ nrib n’uw nap’an? Uw rogon nrayog ni nge ayuwegdad e n’en ni rin’ Josef ko magawon ni i yan u fithik’?

⁸ N’en ni rin’ Jakob nge Rachel e dariy e maruwar riy ni ayuweg Josef ni fakrow, maku aram e n’en ni ayuweg u nap’an ni mada’nag boch e magawon nrib mo’maw’. Nap’an ni ka fini gaman 17 e duw rok Josef, me buch ban’en rok nri thilyeg rogon e par rok. Bochan ni awan’ e pi walagen ni pumoon ngak, ma aram mar pied ni chuway’ ni nge mang sib. Boch nga tomuren min kalbusnag u Egypt u lan boor e duw ni yugu aram rogon ni gathi ir e ba kireb e rok. (Gen. 37:23-28; 39:7-9, 20-21) De mulan’ Josef; maku de aw nga laniyan’ e n’en nrin’ ngak, maku de lemnag ni nge sulweg taban. Ya rib ga’ fan u wan’ e tha’ u thilrow Jehovah ma aram e n’en ni i par ni be lemnag. (Lev. 19:18; Rom. 12:17-21) Ere, rayog ni nge ayuwegdad e n’en ni rin’ Josef. Bod ni, faanra boor ban’en nib kireb ni i buch rodad u nap’an ni ka gad bbitir ara boor e magawon ni gad be yan u fithik’ e ngiyal’ ney, ma dab da paged gadad ya ngad athamgilgad. Ma gad manang ni faan gad ra rin’ ni aray rogon ma ra tow’athnagdad Jehovah.​—Mu beeg e Genesis 39:21-23.

9. Uw rogon nrayog ni ngad folwokgad rok Jakob, nge Rachel, nge Josef?

⁹ Am lemnag reb e magawon ni ga be mada’nag e chiney ni ke mang skeng ngom. Rayog ni sana yibe rin’ boch ban’en ngom nde mat’aw, ara yibe laniyan’ ngom, ara yibe moningnagem. Fa reb e sana ke t’ar be’ e thin nga dakenam ni bochan e ke awan’ ngom. Faanra be buch boch ban’en rom ni aray rogon ma ngam lemnag e n’en ni ayuweg Jakob, nge Rachel, nge Josef nge yag nra ululgad ko pigpig ni ur ted ngak Jehovah u fithik’ e felfelan’ ko bin ni ngar paged yad ni nge mulan’rad. I pi’ Got gelngirad me tow’athnagrad ni bochan e ur daged nib ga’ fan e tirok ban’en u wan’rad. Ur pared ni yad be athamgil ma yad be ngongol nib puluw ko pi n’en ni ur yibilayed. Kar da chugurgad nga tungun e re m’ag nib kireb ney, ere rib ga’ fan ni ngad chichiiyed pa’dad ko athap rodad! Ere, ba m’agan’um ngay ni ngam athamgil mag maruwel nib gel ya nge yag nim fel’ u wan’ Jehovah, fa?

10, 11. (a) Mang fan nib t’uf ni ngad maruwelgad nib gel ni nge yag e tow’ath rok Got ngodad? (b) Mang e ra ayuwegdad ni ngad dugliyed boch ban’en nib mat’aw ni ngad rin’ed ma gad gel nga boch ban’en nra muleg lanin’dad me magawonnagdad?

¹⁰ Mang boch ban’en ni gad ma mada’nag ni be dag nthingar da maruwelgad nib gel ya nge yag ni tow’athnagdad Got? Reb e magawon ni ma mada’nag boor e walag e aram e rogon ni ngar gelgad ko pi meewar rorad. Ku bay boch e walag nthingar ra athamgilgad ni ngar adaged e machib. Maku reb e, sana rayog nib t’uf ni ngam k’adan’um ni yugu aram rogon ni kam m’ar ara be kireban’um ni bochan e yigoo gur. Ku bay boch e walag ni be mo’maw’ ngorad ni ngar n’aged fan u wan’rad ban’en ni ke yog ara ke rin’ be’ ni dubrad. Demtrug n’umngin nap’an ni kad pigpiggad ngak Jehovah, ma gad gubin nthingar da chamgad nga  boch ban’en nrayog ni nge magawonnag rogon e pigpig ni gad be tay ngak Got ni ir e en ni ma tow’athnag e piin ni yad ba yul’yul’ ngak.

¹¹ Bin riyul’ riy e, ba mo’maw’ ni ngad dugliyed ni ngad rin’ed e tin nib mat’aw ma gad ngongol ni bod rogon e piin Kristiano. Riyul’ e re n’ey ni faanra be waliydad lanin’dad nga bang nde puluw. (Jer. 17:9) Faanra ireray e magawon rom, mag yibilay gelngin Got nib thothup ni nge ayuwegem. Meybil ni ga ra tay nge gelngin Got nib thothup e aram e n’en nrayog ni nge pi’ gelngim ni ngam rin’ e n’en nib mat’aw me tow’athnagem Jehovah. Maku reb e, ngam puluwnag e ngongol rom ko n’en ni ga be yibilay. Mu gay rogon ni ngam beeg taabochiyang u lan e Bible u gubin e rran, mag tay e tayim ni ngaum fil e Bible rom ni yigoo gur, nge tayim ni fan ko Fol Bible ni Tabinaw.​—Mu beeg e Psalm 119:32.

12, 13. Uw rogon ni kan ayuweg l’agruw e Kristiano ni ngar gelgow nga boch e ar’ar nib kireb ni immoy rorow?

¹² Boor e Kristiano ni ke yag ni nge ayuwegrad e Thin rok Got, nge gelngin nib thothup, nge pi babyor rodad ni ngar gelgad nga boch ban’en ni yad ma ar’arnag nib kireb. Immoy reb e fel’ yangaren ni beeg fare article ni kenggin e “How Can You Resist Wrong Desires? (Uw Rogon Nrayog ni Ngam Siyeg e Ar’ar nib Kireb?)” ni bay ko Awake! ko December 8, 2003 ni thin ni Meriken. Mang angin ni yib ngak? I yog ni gaar: “Gu be athamgil nib gel ya nge yag nug siyeg e lem nde puluw. Nap’an nug beeg u lan e re article nem ni ‘boor e walag nrib mo’maw’ rorad ni ngar gelgad nga boch ban’en nib kireb ni yad ma ar’arnag,’ mi ri fel’ lanin’ug ni bochan e kug nang ni gag bagayad e pi walag ni yad bay u ga’ngin yang e fayleng. Kug nang ni gathi yigoo gag e bay e magawon rog ni  aray rogon.” Re fel’ yangaren ney e ki ayuweg fare article ni kenggin e “Alternative Life-Styles​—Does God Approve? (Gur, Ba M’agan’ Got Ngay ni Nge Par Be’ u Reb e Par ni Yugu Ba Thil?)” ni bay ko Awake! ko October 8, 2003 ni thin ni Meriken. I yog ni kan tamilangnag ko re ke babyor nem ni pi magawon nem ni ma mada’nag boch e walag e rayog ni ngan taarebrogonnag nga ‘ba liliy nib gel e amith riy.’ (2 Kor. 12:7) Ere, yugu aram rogon nib mo’maw’ ko pi walag ney ni ngar pared nib fel’ e ngongol rorad, machane bay e athap rorad ni fan ko pi n’en ni ka bay nga m’on. I yog e re fel’ yangaren nem ni gaar: “Aram fan nrayog ni nggu par ni gub yul’yul’. Gu be pining e magar ngak Jehovah ni be fanay e ulung rok ni nge ayuwegdad nge yag nda athamgilgad u lan e re m’ag nib kireb ney.”

¹³ A kum lemnag e n’en ni buch rok reb e walag nib pin ni ma par u Meriken. I yoloy ni gaar: “Gu baadag ni nggu pining e magar ngomed ni gimed ma pi’ e tin nib t’uf romad ni gubin ngiyal’, ma ki gimed ma pi’ ko ngiyal’ nthingari ni pi’ riy. Gu ra beeg e pi article ney ma gowa gag e kan yoloy ni fan ngog. Ke yoor e duw ni gu ma ar’arnag ban’en nib fanenikan Jehovah. Ere, bay yu ngiyal’ ni gu baadag ni nggu pageg ndab kug cham ko ar’ar rog. Gu manang ni Jehovah e ir be’ ni ma runguyey ma ma n’ag fan e kireb, machane gu ma lemnag ndabiyog ni nge ayuwegeg ni bochan e bay e biney e ar’ar nib kireb rog nda gur dabuy. Re n’ey e ke magawonnag e pi n’en ni gu ma rin’ . . . . Ere tomuren nug beeg fare article ni kenggin e ‘Bay e Lem Rom ni “Ngam Chogownag ni Ngam Nang” Jehovah, Fa?’ ni bay ko Fare Wulyang ko Damit ko March 1, 2013, mug nang nri baadag Jehovah ni nge ayuwegeg.”

14. (a) Uw rogon e pi meewar rok Paul u wan’? (b) Uw rogon nrayog ni ngad gelgad ko pi meewar rodad?

¹⁴ Mu beeg e Roma 7:21-25. Manang Paul nrib mo’maw’ ni nge togopuluw ko pi meewar rok nge pi n’en nib kireb ni ma ar’arnag. Machane, manang ni faanra taga’ ngak Jehovah u daken e meybil me dag ko ngongol rok nriyul’ ni ke mich fare biyul ni pi’ Jesus u wan’, ma aram e rayog ni nge gel ko pi n’ey. Ma uw rogodad? Yugu aram rogon nthingar kud chamgad ko pi ar’ar nib kireb ni bay rodad, machane rayog ni ngad gelgad ngay. Ni uw rogon? Dab da taga’gad nga gelngidad, ya ngad folwokgad rok Paul ma gad taga’ ngak Jehovah ni nge ayuwegdad me mich fare biyul u wan’dad.

15. Mang fan nrayog ni nge ayuwegdad e meybil ni ngad pared ni gad ba yul’yul’ me yag ni ngad k’adedan’dad u fithik’ e pi skeng ni ma yib ngodad?

¹⁵ Bay yu ngiyal’ nrayog ni nge pagdad Got ni ngad daged gelngin nri be magafan’dad nga reb e magawon ni gad be mada’nag. Bod ni, uw rogon ni faanra ke yib ba mit e m’ar nib ubchiya’ ngodad (ara reb i chon e tabinaw rodad), ara yibe rin’ boch ban’en nde mat’aw ngodad? Faan gad ra wenig ngak Jehovah ni nge ayuwegdad me pi’ gelngidad ni ngad pared ni gad ba yul’yul’, ma gad ba felfelan’, ma gad ba gel ko tirok ban’en, ma aram e be m’ug riy ni be pagan’dad ngak. (Fil. 4:13) Pi n’en ni ke buch rok boch e Kristiano u nap’an Paul nge ngiyal’ ney e be micheg nrayog ni nge pi’ e meybil gelngidad me ayuwegdad ni nge pagan’dad ya nge yag nda k’adedan’dad u fithik’ e pi magawon rodad.

16, 17. Mang e kam dugliy u wan’um ni ngam rin’?

¹⁶ Ri baadag Moonyan’ ni nge guyem ni kam pag paam ke ul nga but’ ni bochan e ke mulan’um. Mu dugliy u wan’um ni ngam chichiiy paam ko “tin nib fel’.” (1 Thess. 5:21) Dab mu pagtalin nrayog ni ngam cham ngam gel ngak Satan, nge re fayleng rok ney nib kireb, nge pi n’en ni ga ma ar’arnag nib kireb. Rayog ni ngam gel ko re cham ney ni faanra pagan’um nrayog rok Got ni nge pi’ gelngim.​—2 Kor. 4:7-9; Gal. 6:9.

¹⁷ Dab mu tal ko cham ni ga be tay, mag ulul ni ngam maruwel nib gel, ma ga be athamgil. Ya faan ga ra rin’ ni aray rogon, ma aram e rayog ni ngari pagan’um nra puog Jehovah ‘nga dakenam e pi n’en nib fel’ nge pag e fol riy.’​—Mal. 3:10.