1, 2. Mang boch ban’en ni yima towasariy e piin fel’ yangaren ni nge mich u wan’rad e ngiyal’ ney, ma mang boch ban’en nrayog ni ngar rin’ed ni nge ayuwegrad ko re n’ey?

 REB e bitir u skul e yog ngak bochi pin u Britain ni gaar: “Gab balyang ni ke mich Got u wan’um.” Ma bay reb e walag nib pagel u Chiyamen ni yoloy ni gaar: “Pi sensey rog e yad ma lemnag ni n’en ni be yog e Bible u murung’agen e pi n’en ni kan sunmiy e bogi yat. Ere, yad ma lemnag ni gubin e bitir u skul nib mich u wan’rad ni kad sumgad ko gamanman.” Ma bochi pin nib fel’ yangaren ni ma par u France e yog ni gaar: “Pi sensey u skul rog e yad ma gin ngay ni ka bay boch e bitir nib mich e Bible u wan’rad.”

² Faanra gur reb e tapigpig rok Jehovah ni kab fel’ yangarem ara fin ga be fil murung’agen, ma gur, ga be guy nib gel e towasar ni yibe tay ngom ni nge mich u wan’um fare machib ni ke sum e girdi’ ko gamanman ko bin ni nge mich u wan’um ni bay be’ ni ke sunmiy urngin ban’en, fa? Faanra aram rogon, ma bay boch ban’en nrayog ni ngam rin’ ni nge gel e michan’ rom me par ndabi war. Reb ko pi n’em e aram e ngam fanay e tamilangan’ ni ke pi’ Got ngom, ya aram e n’en ni “ra yororiyem.” Re n’ey e ra ayuwegem ni ngam siyeg e pi machib nde riyul’ me gelnag e michan’ rom ngak Jehovah.​—Mu beeg e Proverbs 2:10-12, BT.

3. Mang e gad ra weliy ko re article ney?

³ Bin riyul’ e michan’ e be tor ko tin riyul’ ni kad filed u murung’agen Got. (1 Tim. 2:4) Ere, nap’an ni ga be fil e Thin rok Got nge pi babyor rodad ni kan  ngongliy, ma gathi kemus ni nga yugum beeg e thin riy, ya ba t’uf ni ngam fal’eg i lemnag e pi n’en ni ga be beeg. Mu fanay e tamilangan’ rom ya nge yag nim “nang fan” e pi n’en ni kam beeg. (Matt. 13:23) Faan ga ra rin’ ni aray rogon, ma aram e rayog ni ngam pirieg boch ban’en riy ni be micheg ni Jehovah e Ir e Ke Sunmiy urngin ban’en maku ir e ke yib e Bible rok.​—Heb. 11:1

4. Mang fan ni pi n’en ni ke riyul’ u wan’ be’ u murung’agen Got nge rogon ni ke sum boch e yafos e gubin ni be tor nga daken e michan’? Mang e ba puluw ni ngad rin’ed?

⁴ Bay be’ ni ke yog ngom ni fan nib mich fare machib u wan’ ni ke sum e girdi’ ko gamanman e bochan ni ke yog e piin llowan’ nriyul’ e re machib nem, machane dabiyog ni nge mich Got u wan’ ni bochan e dawori guy nga owchen, fa? Boor e girdi’ ni yad ma lem ni aray rogon. Machane, baaray ban’en nthingar dab da paged talin: Demtrug ko ba riyul’ Got u wan’ be’ ara ba riyul’ fare machib u wan’ ni ke sum e girdi’ ko gamanman, ma l’agruw e gali n’ey ni be tor nga daken e michan’. Ni uw rogon? Dariy bagadad ni ke guy Got ara ke guy rogon ni ke sunmiy ban’en. (John 1:18) Maku dariy be’ ndemtrug ko ba llowan’ fa danga’ ni ke guy rogon ni ke pig ba mit e yafos ke ngal’ ni yugu ban’en. Dariy be’ ni ke guy e galuf ni ke pig ke ngal’ ni kus. (Job 38:1, 4) Ere, gad gubin nthingar da maruwelgad ko tamilangan’ ni kan pi’ ngodad ma gad fal’eg i yaliy e mich u boch ban’en ya nge yag nda nanged ko uw rarogon reb e ban’en nge reb. I weliy apostal Paul murung’agen e pi n’en ni kan sunmiy ni gaar: “Ka nap’an ni sunumiy Got e fayleng, ma fel’ngin ndabiyog ni ngan guy, ni aram gelngin ndabi m’ay biid nge rarogon ni ir Got, e kan guy nrib tamilang. Girdi’ e rayog ni nge nang fan e pi n’ey u fithik’ e pi n’en ni ke m’ay i sunumeg rok Got. Ere dakuriy e tawey rorad nga bayang!”​—Rom. 1:20.

5. Mang boch ban’en ni kan ngongliy nra ayuwegdad ni ngad maruwelgad ko tamilangan’ ni kan pi’ ngodad?

⁵ Ra ngad “nanged” ban’en ma be yip’ fan ni nge tamilang ban’en u wan’dad nde mom ni ngan guy ara de gagiyel. (Heb. 11:3) Girdi’ nib tamilangan’rad e gathi kemus ni yad ma fanay owcherad nge telrad, ya ku yad ma fal’eg i lemnag ban’en nib fel’ rogon. Boor ban’en ni ke ngongliy e ulung rok Jehovah nrayog ni nge ayuwegdad. Ma pi n’ey e bogi ban’en ni kan fal’eg i gay murung’agen nib fel’ rogon. Ere, rayog ni nge ayuwegdad e pi n’ey ni ngari mich u wan’dad e En ni Ke Sunmiydad ni nge yan i par ni gowa kad ‘guyed’ nga owchedad. (Heb. 11:27) Pi n’ey ni kan ngongliy rogon ni fan ngodad e ba muun ngay fare video ni kenggin e The Wonders of Creation Reveal God’s Glory (Pi N’en ni Kan Sunmiy e Be Gagiyelnag Feni Sorok Got), nge fare brochure ni kenggin e Was Life Created? (Gur, Kan Sunmiy Gubin Ban’en nib Fos, Fa?), nge fa binem ni kenggin e The Origin of Life​—Five Questions Worth Asking (Rogon ni Ke Sum e Yafos​—Lal e Deer ni Bay Rogon ni Ngan Fith), nge fare  ke babyor ni kenggin e Is There a Creator Who Cares About You? (Bay Be’ ni Ke Sunmiyem Nri Ma Lemnagem, Fa?). Ku boor ban’en ni yima tay ko pi magazine rodad nrib manigil. Ku bay boch ban’en ni yima fith ngak boch e girdi’ ni llowan’ nge yugu boch e girdi’ ni kan tay nga lan fare babyor ni Awake! ni be weliy e n’en ni ke ayuwegrad ni nge mich Got u wan’rad. Fapi article ni kenggin e “Was It Designed? (Bay Be’ ni Ke Sunmiy, Fa?)” e be tamilangnag boch ban’en nib manigil nrayog ni ngad guyed ko pi n’en ni kan sunmiy. Mab ga’ ni ma guy e piin llowan’ rogon ni ngar ngongliyed boch ban’en ni taareb rogon ko pi n’em ni kan sunmiy.

6. Mang angin nra yib ngodad ni faanra ud beeged boch e babyor rodad ni kan ngongliy ni fan ngodad? Uw rogon ni ke yib angin e re n’ey ngom?

⁶ Baaray e n’en ni yog reb e walag nib pagel ni ma par u Meriken ni 19 e duw rok u murung’agen fa gal ke brochure ni kad weliyed murung’agen aray u lang. I yog ni gaar: “Rib ga’ angin e gal ke babyor ney ngog. Boor yay ni kug fil.” Ma reb e walag nib pin ni ma par u France e yog ni gaar: “Rug ma ngat nga rogon ni kan ngongliy fapi article ni kenggin e ‘Was it Designed? (Bay Be’ ni Ke Sunmiy, Fa?)’! Be tamilangnag e pi article ney ni piin th’abi salap i ngongliy e naun, nge kanawo’, nge boch e masin e rayog ni ngar folwokgad u boch ban’en u rarogon e pi n’en ni kan sunmiy, machane dabiyog ni ngari yan i aw ni bod rogon e pi n’em.” Ki yog e gallabthir rok reb e rugod ni 15 e duw rok ni ma par u South Africa nra gaargow: “N’en th’abi som’on ni ma beeg e re rugod ni fakmow nem u lan fare Awake! e fare article ni bay boch e ‘Deer’ riy ni kan fith ngak boch e girdi’.” Me gur, ga ma fal’eg i fil e pi babyor ney nib fel’ rogon, fa? Ya rayog ni nge ayuwegem ni ngari gel e michan’ rom ngam man mu par ni kam bod rogon ba ke gek’iy nrib toar lik’ngin nga fithik’ e but’. Ma re n’ey e ra ayuwegem ni nge dabi mich boch e machib nde riyul’ u wan’um.​—Jer. 17:5-8.

7. Mang fan ni baadag Got ni ngam nang e n’en nib thil u thilin e tin nib fel’ ko tin nib kireb?

⁷ Gur, ba kireb ni ngan fith boch ban’en u murung’agen e Bible? Danga’, ya baadag Jehovah ni ngam nang e n’en nib thil u thilin e “tin nib fel’ ko tin nib kireb,” ya nge yag nim micheg nga lanin’um nriyul’ e pi n’en ni kam fil u Bible. Dabun Jehovah ni nge mich ban’en u wan’um ni bochan e aram e n’en ni ke mich u wan’ yugu boch e girdi’. Ere, mmaruwel ko tamilangan’ ni kan pi’ ngom ya nge yag ni yag e bin nib puluw e tamilangan’ ngom, ya re tamilangan’ nem e aram e n’en nra yan i par ni ke mang def ko bin riyul’ e michan’ ni ke yag ngom. (Mu beeg e 1 Timothy 2:4; Hebrews 5:14.) Rogon e pi n’en ni ga ma mel’eg ni ngam fil u lan e Bible e aram reb e kanawo’ nra ayuwegem ni nge yag e bin riyul’ e tamilangan’ ngom.

8, 9. (a) Mang boch ban’en nra adag boch e walag ni ngar filed u Bible? (b) Uw rogon ni ke yib angin ngak boch e walag e pi n’en ni kar fal’eged i lemnag u nap’an e fol Bible ni kar ted?

⁸ Bay boch e walag ni yad ma fil murung’agen boch e yiiy u lan e Bible, ara ra taarebrogonnaged e pi n’en ni be yog e Bible ko pi n’en ni ke pirieg e piin ni yad ma gay chepin boch ban’en, ara piin ni yad ma gay murung’agen e girdi’ nge boch ban’en ni immoy kakrom, nge pi n’en ni ke pirieg e piin llowan’. Reb e yiiy nrib manigil ni ngan fil murung’agen e aram fare yiiy ni bay ko Genesis 3:15. Re yiiy nem e be tamilangnag kenggin e machib ni bay u lan e Bible, ma gad manang nre machib nem e murung’agen rogon nra gagiyelnag Gil’ilungun Got mat’awun ni nge gagiyeg nge rogon feni thothup e ngachal rok. Ku be tamilangnag e re yiiy nem rogon nra chuweg Jehovah e gafgow ni ke yib ngak urngin e girdi’ ni ka nap’an fare magawon ni sum u Eden. Ere, uw rogon nrayog ni ngam fil murung’agen e re yiiy nem ni bay ko Genesis 3:15? Reb e kanawo’ e aram e ngam yoloy boch e thin nu Bible nga but’ ni be tamilangnag boch ban’en u murung’agen e re yiiy nem nge rogon nra lebug. Me migid mag gay ko wuin e ni yoloy e pi thin nu Bible nem, ngemu’ mag yoloy nga but’ ni be yan u rogon e ngiyal’ ni buch reb nge reb. Faan ga ra rin’ ni aray rogon ma rayog ni ngam guy ni piin nra yoloyed e pi thin nu Bible nem e ba thilthil e ngiyal’ ni ur moyed riy, machane ra bagayad ma bay ban’en ni yoloy ni ir e ke ayuweg e re yiiy nem ni nge tamilang i yan. Re n’ey e ra ayuwegem ni nge yag nim micheg ni gelngin Jehovah nib thothup e aram e n’en ni i pow’iy e piin ni ur yoloyed e pi thin nu Bible nem.​—2 Pet. 1:21.

⁹ I yoloy reb e walag ni pumoon ni ma par u Chiyamen ni gaar: “Rib gagiyel rogon ni kan tamilangnag kenggin e machib u lan e Bible ni bay rogon nga Gil’ilungun Got, ya re n’ey e rayog ni ngan taarebrogonnag nga ba yil’ i gaf nib gol ramaen ni kan tay nga lan e Bible. Riyul’ e re n’ey ni yugu aram rogon ni 40 e pumoon nra yoloy e Bible, ma yooren i yad e ba thilthil e  ngiyal’ ni ur moyed riy maku immoy boch i yad ndar nanged boch i yad.” Ku bay reb e walag nib pin ni ma par u Australia ni beeg fare article ni bay ko fare Wulyang ko Damit ko December 1, 2013 ni be weliy fan fare Paluk’af, ma aram mi ri pi’ e athamgil nga laniyan’. Re madnom nem ni un tay e bay rogon ko fare thin ni bay ko Genesis 3:15 nge ngiyal’ ni yib fare Messiah riy. I yoloy ni gaar: “Pi n’en nug fil ko re article nem e ayuwegeg ni nggu nang feni manigil Jehovah. Rug ngat nga rogon ni ke yarmiy rogon e re madnom nem ni nga i tay piyu Israel nge rogon ni lebug u daken Jesus. Gu tal i beeg e re article nem nggu fal’eg i lemnag rogon feni manigil e re abich nem ni un tay ni fan ko Paluk’af!” Mang fan ni lem e re walag ney ni aray rogon? Bochan ni ke fal’eg i lemnag e pi n’en ni ke beeg ma aram me “nang fan.” Ma re n’ey e gelnag e michan’ rok me ayuweg ni ngari chugur ngak Jehovah.​—Matt. 13:23.

10. Uw rogon ni be ayuwegdad rogon feni yul’yul’ e piin nra yoloyed e Bible ni ngari pagan’dad ko thin ni bay riy?

¹⁰ Reb e ban’en nrayog ni ngki gelnag e michan’ rodad e aram e ngad filed murung’agen boch e girdi’ u Bible nge rogon farad yul’yul’ nge rogon nda ur rusgad. Boor e piin ni ur yoloyed boch e babyor kakrom e yad ma n’uf e nam rorad nge pi tayugang’ riy nga lang. Machane, pi profet rok Jehovah e gubin ngiyal’ ni yad ma yog e tin riyul’. Kub m’agan’rad ngay ni ngar weliyed murung’agen e pi n’en nda i yag rorad nge pi pilung ko nam rorad. (2 Kron. 16:9, 10; 24:18-22) Maku reb e, yad ma tamilangnag murung’agen e pi oloboch ni ur rin’ed nge oloboch ni i rin’ yugu boch e tapigpig rok Got. (2 Sam. 12:1-14; Mark 14:50) I yog reb e pagel ni ma par u Britain ni gaar: “Gathi ri ma m’ug e yul’yul’ ni aram rogon. Ere, re n’ey e be ayuwegdad ni nge pagan’dad nriyul’ ni Bible e ke yib rok Jehovah.”

11. Uw rogon nrayog ni ngari ga’ fan e pi kenggin e motochiyel nu Bible u wan’ e piin fel’ yangaren?

¹¹ Boor e girdi’ ni kari mich u wan’rad ni Got e ir e ke thagthagnag e thin ni bay u lan e Bible ni bochan e rayog ni nge pow’iydad e pi kenggin e motochiyel ni bay riy. (Mu beeg e Psalm 19:7-11.) Reb e walag nib pin ni kab fel’ yangaren ni ma par u Sapan e yog ni gaar: “Rib gel e felfelan’ nug ted chon e tabinaw rog u nap’an nug tababgad ni ngaug folgad ko pi n’en ni bay u lan e Bible. I yag ni nggu pired u fithik’ e gapas, nge taareban’, nge t’ufeg.” Pi kenggin e motochiyel u lan e Bible e ma ayuwegdad ni nge dab da uned ko liyor ni googsur ma dabi mich u wan’dad boch ban’en nde riyul’ ni ke mich u wan’ boch e girdi’. (Ps. 115:3-8) Ma uw rogon e pi n’en ni ma machibnag e piin ni yad ma yog ndariy e Got? Gur, rayog ni nge rin’ e re n’ey ban’en nga rogon ni ma lem e girdi’, fa? Pi machib ni bod rogon fare machib ni ke sum e girdi’ ko gamanman e ba ga’ ni ma n’igin ni nge yan i aw ni pi n’en ni kan sunmiy e ku yad boch e got, ya ma k’aring e girdi’ ni ngar lemnaged nib gel gelngin e pi n’en ni kan sunmiy ko bin ni ngar lemnaged ni Jehovah e ir e ba gel gelngin. Piin ni yad ma yog ndariy e Got e yad ma yog ni kemus ni yigoo gadad e rayog ni ngad rin’ed boch ban’en nra yib angin ko par rodad boch nga m’on. Machane, bin riyul’ riy e der yag rorad ni ngar rin’ed e re n’ey.​—Ps. 146:3, 4. 

12, 13. Mang reb e kanawo’ nrayog ni ngad weliyed ko girdi’ murung’agen e Bible ara pi n’en ni kan sunmiy nra yib angin?

¹² Uw rogon ni ngam ayuweg e girdi’ ni nge mich e Bible u wan’rad ma ngki mich u wan’rad nriyul’ ni bay be’ ni ke sunmiy urngin ban’en? Som’on e, yug dab mu lemnag ni ga manang e n’en ni ke mich u wan’ e girdi’. Bay boch e girdi’ ni yad ma yog nib mich fare machib u wan’rad ni ke sum e girdi’ ko gamanman, machane ku yad ma lemnag nriyul’ ni bay e Got. Yad ma lemnag ni sunmiy Got bochi ban’en nib achig me munmun me ngal’ e re n’em nga yugu boch ban’en nge taw ko ngiyal’ ni ke sum boch e yafos riy. Ku bay boch e girdi’ nib mich e re machib ney u wan’rad ni bochan e yad ma lemnag ni faanra gathi ban’en nib riyul’ ma dabin fil ko bitir u skul. Maku bay boch e girdi’ ndaki mich Got u wan’rad ni bochan e dubrad e n’en ni be rin’ e pi yurba’ i teliw. Ere, som’on e ba fel’ ni ngam fith ngak facha’ ko mang e n’en ni ke mich u wan’ nge fan ni ke mich e pi n’em u wan’, mag fal’eg e motoyil ko n’en nra yog. Faan ga ra rin’ ni aray rogon ma rayog ni nge adag facha’ ni nge motoyil ngom.​—Titus 3:2.

¹³ Faanra be togopuluw be’ ngom ni bochan e ba mich u wan’um ni Got e ir e ke sunmiy urngin ban’en, ma mang e rayog ni nga mog ngak? Rayog ni nga mog ngak ni nge weliy rogon nrayog ni nge sum ban’en ni ir rok ni faanra dariy Be’ ni Ke Sunmiy. Mog ngak ni faanra ke sum e yafos u bochi ban’en nib achig, me ere ba mudugil nre n’em ni ir e ke yib urngin mit e yafos riy e rayog ni nge yoor. Bin riyul’ riy e, yog reb e sensey u reb  e skul nib tolang ni faanra nge yag ni nge ngal’ reb e ban’en nga reb ma (1) ba t’uf ba thal i ban’en nib gilgith ni nge ayuweg, (2) ba t’uf ni ngki yag ni nge fek gelngin boch ban’en me maruwel ngay, (3) ba t’uf boch ban’en riy ni ir e ra dugliy rogon yaan ni nge yan i aw nge rogon nra ilal i yan, ma (4) kub t’uf ni nge yag ko re n’em ni nge yoor i yan. Ki yog ni gaar: “Ra gin be’ nga rogon feni yoor nochi ban’en u rarogon e tin th’abi achig e yafos ni bay.”

14. Mang e rayog ni ngam rin’ ni faanra ga be lemnag ndab k’ayag rom ni ngam weliy ngak be’ murung’agen fare machib ni ke sum e girdi’ ko gamanman ara ngam micheg ni bay be’ ni ke sunmiy urngin ban’en?

¹⁴ Faanra ga be lemnag ndab k’ayag ni ngam weliy murung’agen fare machib ni ke sum e girdi’ ko gamanman ara ngam micheg ni bay be’ ni ke sunmiy urngin ban’en, ma rayog ni ngam fanay fare thin ni yog Paul ni faani gaar: “Urngin e naun ma mmudugil ni ba’ be’ ni ir e toy​—mi Got e ir e ke sunumeg urngin ban’en.” (Heb. 3:4) Re thin ney e ra yib angin me ayuweg faen ni ga be non ngak ni nge fal’eg i lemnag e n’en ni gimew be weliy! Arrogon, pi n’en nib fos e boor nochi ban’en u rarogon nib mo’maw’ ni ngan nang fan nib thil nga rarogon e naun ni kan toy. Ere, faanra aray rogon me ere ba mudugil ni bay be’ ni ir e ke sunmiy e pi n’en nib fos. Ku rayog ni ngam fanay reb e babyor nib puluw ni ngam fanay. Immoy reb e walag nib pin ni fanay fa gal ke brochure ni faan kad weliyed murung’agen u nap’an ni be non ngak reb e pagel ni ke yog nde mich Got u wan’, machane ba mich fare machib u wan’ ni ke sum e girdi’ ko gamanman. Reb e wik nge boch nga tomuren, me yog fare pagel ngak ni gaar, “Chiney e ka fini mich Got u wan’ug.” Tomuren e re n’ey ma aram me un fare pagel ko fol Bible, me munmun ma aram me mang reb i walagdad.

15, 16. Uw rogon ni ngam thilyeg rogon ni ga be weliy boch e thin nu Bible ya nge m’ag ngak e en ni ga be non ngak? Mang e ngam nameg ni ngam rin’?

¹⁵ Rayog ni ngkum rin’ e re n’ey u nap’an ni gimew be non be’ ni be maruwar e Bible u wan’. Mu gay rogon ni ngam nang ko mang e ke mich u wan’ nge boch ban’en ni baadag ni ngan weliy murung’agen. (Prov. 18:13) Faanra baadag ni ngan weliy murung’agen boch ban’en ko science, mab mudugil nra motoyil ngom u nap’an ni ga ra weliy boch e thin nu Bible ngak nib puluw ko science. Ku bay boch e girdi’ nra motoyil ni faan ga ra micheg ngak nib puluw e pi yiiy u lan e Bible nge chepin boch e girdi’ ni bay riy. Fa reb e rayog ni ngam weliy murung’agen e pi kenggin e motochiyel u lan e Bible nrayog ni nge pow’iyey ni bod rogon e pi n’en ni weliy Jesus ko fare Welthin Rok u Daken e Burey.

¹⁶ Dab mu pagtalin ni n’en ni ga be nameg e ngam ayuweg e girdi’ ni nge taw e thin rok Got nga gum’ircha’rad. Gathi ga be guy rogon ni ngam gel ko tugthin. Ba ga’ ni faanra ga be non ngak e piin ni yad ba ilal ngom, mab fel’ ni ngam fal’eg e motoyil, mag fith boch e deer u fithik’ e tayfan, mag weliy lanin’um u fithik’ e sumunguy nge tayfan. Faan ga ra rin’ ni aray rogon, mab mudugil ni yad ra tayfam. Re n’ey e ku ra ayuwegrad ni ngar nanged ni kam fal’eg i lemnag e pi n’en ni ke michan’um ngay. Ma aray reb e ban’en nder ma rin’ e piin fel’ yangaren. Machane, riyul’ ndariy fan ni ngam fulweg lungun e piin ni yad baadag ni ngar luaged e thin ara ngar moningniged gur.​—Prov. 26:4.

17, 18. (a) Mang e rayog ni ngam rin’ ya nge yag ni mich nga lanin’um ni ireray e tin riyul’? (b) Mang deer e gad ra weliy e fulweg riy ko bin migid e article?

¹⁷ Bin riyul’ e michan’ e gathi kemus ni be tor nga daken e pi kenggin e machib u lan e Bible. Ere, mu fal’eg i fil e tin nib toar e machib u lan e Thin rok Got ni bod rogon ni ga be gay e machaf nib mith. (Prov. 2:3-6) Kum fanay boch e babyor nge boch ban’en ni kan ngongliy ko thin rom ni bod rogon fare Watchtower Library ni bay ko DVD, nge fare Watchtower ONLINE LIBRARY, nge fare Watch Tower Publications Index, ara fare Research Guide for Jehovah’s Witnesses. Maku reb e, rayog ni ngam nameg ni ngam beeg e Bible nib polo’. Ma rayog ni ngam rin’ e re n’ey u lan 12 e pul. Dariy ban’en nra gelnag e michan’ rodad ni bod rogon e Thin rok Got ni gad ma beeg. Bay reb e walag ni ma lekag e ulung ni weliy murung’agen e ngiyal’ ni kab fel’ yangaren ni gaar: “Reb e ban’en ni ayuwegeg ni nge mich u wan’ug ni Bible e Thin rok Got e aram e gu beeg nib polo’. Nap’an ni gu rin’ e re n’ey mfin aram e ngiyal’ nrug nang fan e pi chep u lan e Bible ni ug fil u nap’an ni ku gub bitir. Aram e ngiyal’ nug tabab ni nggu mon’og ko tirok Got ban’en.”

¹⁸ Ere, gimed e gallabthir e rayog ni ngam ayuweged pi fakmed ni nge gel e michan’ rorad. Machane, uw rogon ni ngam rin’ed e re n’ey? Ireray e n’en ni gad ra weliy ko bin migid e article.