1, 2. (a) Mang reb e magawon ni ma mada’nag e piin gallabthir, ma uw rogon nrayog ni ngar pithiged e re magawon ney? (b) Mang aningeg ban’en ni gad ra weliy?

 I YOG ba wu’ e mabgol ni yow ma par u France nra gaargow: “Bochan nib mich Jehovah u wan’mow, ma gathi aram e be yip’ fan ni kub mich u wan’ pi fakmow.” Ku rognew nra gaargow: “Michan’ e gathi ban’en ni yira gargeleg be’ ma bay rok. Ya ban’en ni fin ma yag ngak pi fakdad ni buchuuw ma buchuuw.” Ma reb e walag ni pumoon ni ma par u Australia e yoloy ni gaar: “Bin th’abi mo’maw’ e maruwel ni ga ra tay u puluwon fakam e aram e ngam guy rogon ni nge gel e michan’ rok. Thingar mmaruwel nga urngin ban’en nrayog ni ngam maruwel ngay ya nge yag nim rin’ e re n’ey. Ya rayog ni ngam lemnag ni ke tamilang u wan’ fakam rogon ni kam pi’ e fulweg u reb e deer ni ke fith. Me yan i boch nga tomuren miki sul ngki fith fare deer ni ke fith ngom bayay! Rayog ni ngam pi’ e fulweg u reb e deer ni ke fith fakam ngom e daba’ me tamilang u wan’, machane ra gabul ma ke thil. Ere, rayog nib t’uf ni ngam sul u daken boch ban’en ni kam weliyew fakam ni boor yay.”

² Faanra gur reb e gallabthir, ma gur, bay yu ngiyal’ ni ga ma lemnag ko rayog ni ngam fil ban’en ngak fakam mag ayuweg ya nge yag ni nge gel e michan’ rok? Bin riyul’ riy e, dabiyog ni ngad rin’ed e re maruwel ney ni yigoo gadad. (Jer. 10:23) Machane, faan gad ra sap ngak Got ni nge ayuwegdad, ma aram e rayog rodad. Baaray aningeg ban’en nrayog ni nge ayuwegem u rogon ni ngam  ayuweg pi fakam ni nge gel e michan’ rorad: (1) Ngam nang rarogorad nib fel’ rogon. (2) Mu fil ngorad e pi n’en ni kam fil u murung’agen Jehovah ni ke taw nga gum’irchaem. (3) Mu fanay boch e fanathin nra yib angin. (4) Mu gum’an’nagem mu um meybil.

3. Uw rogon nrayog ni nge folwok e piin gallabthir u rogon ni ma fil Jesus ban’en ngak pi gachalpen?

³ Der ma magagawon Jesus ni nge fith ngak pi gachalpen murung’agen e pi n’en ni ke mich u wan’rad. (Matt. 16:13-15) Ere, mu folwok rok. Ba fel’ ni nga mog ngorad ni ngar weliyed lanin’rad ko ngiyal’ ni gimed be sabethin ara gimed be rin’ boch ban’en u taabang. Re n’ey e ba muun ngay ni ngam weliyed murung’agen boch ban’en ni be maruwar u wan’rad. I yoloy reb e walag nib pagel ni 15 e duw rok ni ma par u Australia ni gaar: “Ba ga’ ni ma weliy Papa’ murung’agen e michan’ rog ngog maku ma ayuwegeg ni nggu fal’eg i lemnag boch ban’en ni gag rog. Ba ga’ ni ma fitheg ni ma gaar: ‘Mang e be yog e Bible?’ ‘Ba mich u wan’um e n’en ni be yog, fa?’ ‘Mang fan nib mich u wan’um?’ Baadag ni nggu pi’ e fulweg ko pi deer ney nrogon ni ke sum u lanin’ug, ma gathi kemus ni nggog ngak e n’en ni ka rognew Nina’ ngog. Nap’an nug ilal boch, mab ga’ ni ma yog ngog ni ngar gu tamilangnag ngak e fulweg rog ko pi deer ney.”

4. Mang fan nib fel’ ni ngam gum’an’nagem ngam pi’ e fulweg ko pi deer ni be fith fakam ngom? Mu weliy ban’en ni ke buch.

⁴ Faanra bay boch e machib rodad ni gathi ri kari mich u wan’ fakam, mag guy rogon ndab mu puwan’ ngak ara mu non ngak u reb e kanawo’ nra m’ug riy ni kam damumuw. Mu gum’an’nagem mag ayuweg ni nge fal’eg i lemnag fare n’em. I yog reb e matam ni gaar: “Yug dab mu fek owchem ko pi deer ni ma fith fakam ngom. Dab mu lemnag ni yug dariy fan e pi n’en ni ma fith, maku dab mu guy rogon ni nge dab kum weliyew murung’agen ban’en ni bochan e ga be magagawon ni ngam weliyew fare n’em u taabang.” Bin riyul’ riy e, ba fel’ ni ngam lemnag ni pi deer nem ni be fith fakam e aram e pow riy nib ga’ fan boch ban’en u wan’ ma baadag ni nge nang fan. Mus nga nap’an ni ka fini gaman 12 e duw rok Jesus, ma ku ma fith boch e deer nib ga’ fan. (Mu beeg e Luke 2:46.) Reb e fel’ yangaren u Denmark ni 15 e duw rok e yog ni gaar: “Nap’an ni gog ko gallabthir rog ni be maruwar u wan’ug ko riyul’ e ba’ ney e teliw fa danga’, ma dar puwan’gow ngog ni yugu aram rogon nsana ke magafan’row ni bochan e pi n’em ni ku gog. Gubin e deer nug fith ngorow mar piew e fulweg riy ni yow be fanay e Bible.”

5. Uw rogon nrayog ni nge dag e piin gallabthir nriyul’ ni yad baadag ni ngar ayuweged pi fakrad ni nge mich Got u wan’rad?

⁵ Mu guy rogon ni ngarim nang rarogon pi fakam, nge rogon ni yad ma lem, nge pi n’en ni ma magafan’rad ngay. Yug dab mu lemnag ni bochan e yad ma un ko muulung nge machib ma aram e ba mich Jehovah u wan’rad. Mu weliyed boch ban’en u murung’agen e tirok Got ban’en u nap’an ni gimed be rin’ boch ban’en u reb e rran ngu reb. Mmeybilgad u taabang mu kum pi’ e meybil ni farad. Mu guy rogon ni ngam nang boch ban’en ni yad be mada’nag ni be skengnag rogon e michan’ rorad, mag ayuwegrad ni ngar nanged rogon ni ngar gelgad ko pi n’em.

6. Faanra i tiyan’ e piin gallabthir ko fol Bible, ma uw rogon nrayog ni nge ayuwegrad u rogon ni ngar filed ban’en ngak pi fakrad?

⁶ Baadag e girdi’ ni yad ma motoyil ngak Jesus ni bochan e ba t’uf Jehovah rok, nge Thin rok, ma kub t’uf e girdi’ rok. (Luke 24:32; John 7:46) Ireray e n’en ni ku ra ayuweg e piin gallabthir ni nge yag nra nanged e n’en ni bay u gum’irchaen pi fakrad. (Mu beeg e Deuteronomy 6:5-8; Luke 6:45.) Ere, gimed e piin gallabthir e ngaum tedan’med ngaum filed e Bible nge boch e babyor rodad ni yima ngongliy. Mu filed murung’agen e pi n’en ni kan sunmiy, mi gimed beeg boch e article u lan e pi babyor rodad ni be weliy murung’agen e re n’ey. (Matt. 6:26, 28) Faan gimed ra rin’ ni aray rogon ma aram e rayog ni nge ga’ e tamilangan’ romed, miki ga’ fan Jehovah u wan’med, me yag nim skulnaged pi fakmed nib fel’ rogon.​—Luke 6:40.

7, 8. Faanra suguy reb e gallabthir laniyan’ ko tin riyul’ u lan e Bible, ma mang angin nra yib riy? Mu weliy ban’en ni ke buch.

⁷ Faan ga ra suguy lanin’um ko tin riyul’ u Bible, ma aram e ga ra adag ni ngam weliy e pi n’em ngak chon e tabinaw rom. Gathi kemus nu nap’an ni gimed be fal’eg rogomed ni fan ko muulung ara nap’an e fol Bible ni tabinaw e fin aram e ngiyal’ ni ngam weliyed e pi n’ey riy, ya demtrug e ngiyal’ nrayog ni ngam weliyed riy. Maku  reb e, re n’ey e gathi ban’en ni ngan rin’ u fithik’ e towasar, ya thingari mang bang ko sabethin ni gimed ma tay. Bay ba wu’ e mabgol u Meriken nib ga’ ni yow ma weliy murung’agen Jehovah ngak chon e tabinaw rorow u nap’an ni yad be yaliy boch ban’en ni kan sunmiy ngu nap’an ni yad be kay ba mit e ggan. I yog e gal labthir nem nra gaargow: “Gamow ma puguran ngak pi fakmow rogon e t’ufeg ni ke dag Jehovah ngodad nge rogon ni i lemnagdad u nap’an ni ngongliy e pi n’em.” Bay ba wu’ e mabgol u South Africa nra yad be milay’ l’agruw i buliyel ni fakrow mab ga’ ni yow ma weliy ngorow boch ban’en nib manigil u murung’agen e pi n’en ni kan sunmiy ni bod rogon ni ma pil e awoch nge rogon ni ma ilal e woldug. Ki yog e gal labthir nem nra gaargow: “Gamow ma gay rogon ni nggu ayuwegew gal fakmow ni ngari ga’ fan e yafos u wan’row nge boch ban’en riy nrib manigil ni yira ngat ngay.”

⁸ Ku bay reb e matam u Australia nnap’an ni ke gaman ragag e duw yangaren ba pagel ni fak ma aram me fek nga ranow nga bangi ban’en ni kan chaariy yilen boch e gamanman nge boch e yafos ngay ni immoy kakrom, me ayuweg fak ni ngari mich Got u wan’ nge pi n’en ni ke sunmiy. I yog e re matam nem ni gaar: “Kug guyew yaan boch ban’en u maday ni yibe lemnag ni immoy kakrom ni ka nog e ammonoids nge trilobites ngay. Gu nangew ni mit nem e yafos ndakuriy e chiney e rriyul’ nrib fel’ yaan, maku bay boch ban’en u rarogon nib mo’maw’ ni ngan nang fan, ma rib fel’ rogon ni kan sunmiy, maku taareb rogon ko pi n’en nrayog ni ngad guyed e ngiyal’ ney. Ere, faanra ke sum e yafos u bochi ban’en nrib achig me ngal’ i yan nga boch e yafos ni boor ban’en u rarogon nib mo’maw’ ni ngan nang fan, me ere mang fan ni immoy e tiney e yafos kakrom ni boor ban’en u rarogon nib mo’maw’ ni ngan nang fan? Rug ngat ko pi n’en nug fil u rarogon e pi yafos nem, ma aram mug weliy ngak fakag.”

9. Mang fan nib ga’ angin e fanathin ni yima fanay, ma uw rogon ni fanay reb e matin e re n’ey?

⁹ Ba ga’ ni ma fanay Jesus boch e fanathin nra k’aring e girdi’ ni ngar lemnaged boch ban’en, me taw nga gum’ircha’rad, ma dab ra paged talin. (Matt. 13:34, 35) Piin bitir e ba ga’ ni yad ma fal’eg i lemnag boch ban’en. Ere, gimed e piin gallabthir e ngam gayed rogon ni ngaum weliyed boch e fanathin u nap’an ni gimed be fil boch ban’en ngak pi fakmed. Ireray e n’en ni rin’ reb e matin ni ma par u Sapan ni bay l’agruw i pagel ni fak. Nap’an ni gaman meruk e duw rok bagayow ma bagayow e ragag, ma aram me fil ngorow murung’agen fare thal i nifeng nib liyeg e fayleng nge rogon ni lemnagdad Jehovah u nap’an ni sunmiy e re n’ey. I tamilangnag e re n’ey ngorow ni aram e pi’ e milik, nge suga, nge coffee ko gal pagel ni fak nem, me yog ngorow ni ngar aruyew e coffee rok. I yog ni gaar: “Rib fel’ rogon nra aruyew. Ere, nap’an nug fithrow ko mang fan ni kar aruyew e coffee rog nib fel’ rogon, ma aram ma rognew ngog ni yow baadag ni ngar aruyew ni bod rogon ni gu baadag. Ere, gu weliy ngorow nnap’an ni sunmiy Got fare thal i nifeng nib liyeg e fayleng, ma aram me fal’eg boch ban’en nge tay nga fithik’ e re thal i nifeng nem miki ngongliy u reb e kanawo’ nra yib angin ngodad.” Ba puluw rogon ni weliy e re matin nem e re fanathin nem nga yangaren fa gal pagel ni fak. Ma re n’ey e ayuwegrow ni nge mit ngorow e n’en ni kar filed ko bin ni kemus ni nge weliy murung’agen ngorow!

10, 11. (a) Mang fanathin e rayog ni ngam fanay ni ngam ayuweg fakam ni ngari mich Got u wan’? (Mu guy e sasing ni bay u tabolngin e re article ney.) (b) Mang boch e fanathin ni ga ma fanay ni kam guy ni ke yib angin?

¹⁰ Mang reb e fanathin nrayog ni ngkum fanay ni ngam tamilangnag ngak fakam ni bay Be’ ni Ke Sunmiy  urngin ban’en? Bod nnap’an ni kam yowgiliy e thow kam tay e marew ngay ma rayog ni ngam weliy ngak rogon ni kam ngongliy fare thow nge feni ga’ fan ni ngan fol u kanawoen nsusun e ngan ngongliy. Tomuren e re n’ey, ma rayog ni ngam pi’ reb i wom’engin e gek’iy ngak fare tir, ni bod rogon ba arfath, mag fith ngak ni lungum: “Ga manang nre arfath ney e ku bay ‘rogon nni ngongliy’?” Ngemu’ mag sey fare arfath nge ruw raba’, mag pi’ reb e awoch riy ngak, mag weliy ngak nre awochngin e arfath nem e bod rogon kanawoen i ngongliy ba mit e ggan, ma aram e gin ni bay riy rogon ni kan ngongliy fare arfath. Machane, re n’em e kab gel e mo’maw’ riy nga rogon ni kan ngongliy fare thow ni kan yowgiliy. Ku rayog ni ngam fith fare tir ni nge lungum: “Faanra bay be’ ni ir e pirieg rogon ni yima yowgiliy e thow, me ere mini’ e sunmiy e re arfath ney?” Faanra ke ilal boch fare tir, ma rayog ni ngam weliy ngak nrogon ni kan sunmiy fare ke gek’iy ni kan fek fare arfath riy nge re arfath nem e ke yib u ban’en ni ka nog e DNA ngay. Ngemu’ ma rayog ni ngam yaliyew boch e fanathin ni bay ko fare brochure ni kenggin e The Origin of Life​—Five Questions Worth Asking (Rogon ni Ke Sum e Yafos​—Lal e Deer ni Bay Rogon ni Ngan Fith) ko page 10 nge mada’ ko 20.

¹¹ Boor e gallabthir ni yad baadag ni yad ma weliy e bitir rorad murung’agen fapi article ni bay ko fare babyor ni Awake! ni kenggin e “Was It Designed? (Bay Be’ ni Ke Sunmiy, Fa?).” Fa reb e ra fanayed e pi article nem ni ngar filed boch ban’en ngak pi fakrad nib mom ni ngar nanged fan. Bod ni, bay ba wu’ e mabgol u Denmark nra taarebrogonnagew e sikoki ko arche’. Rognew ni lungurow: “Sikoki e bod yaan e arche’. Machane gur, rayog ni nge tay e sikoki e tamango ngemu’ me diliiy nge taw ko ngiyal’ ni ke pil ke yib boch e sikoki nib achichig riy? Ma uw rogon e arche’, ba t’uf bangi ban’en ni ngaur awgad riy ni bod rogon fa yungi n’em ni kan ngongliy rogon ni ma aw e sikoki riy, fa? Ma uw rogon lingan e sikoki ni faanra ngan taarebrogonnag nga laman e arche’ ni be tang? Ere, mini’ e kab gel e llowan’ rok, en ni ke ngongliy e sikoki fa En ni Ke Sunmiy e arche’?” Faan ga ra weliy boch ban’en ni aray rogon ngak fakam, mu kum fith boch e deer ngak nib fel’ rogon, ma aram e rayog ni ngam ayuweg ni nge maruwel ko “tamilangan’” ni bay rok mi ri mich Got u wan’.​—Prov. 2:10-12, BT.

12. Uw rogon nrayog ni ngam fanay boch e fanathin nra ayuweg fakam ni nge mich e Bible u wan’?

¹² Fanathin nra yib angin e ku rayog ni nge ayuweg reb e bitir ni ngari mich e Bible u wan’. Am lemnag fare thin ni bay ko Job 26:7. (Mu beeg.) Uw rogon ni ngam tamilangnag ngak fakam ni Got e ir e thagthagnag e re thin nem ngan yoloy nga Bible? Yug rayog ni nga mog ngak fakam ni Got e ir e ke yib e re thin nem rok. Machane, dabisiy ni kab fel’ ni ngam ayuweg fakam ni nge fal’eg i lemnag boch ban’en. Mu tamilangnag ngak ni immoy Job u m’on ni ngan ngongliy fapi teligiy ni yima yaliy e t’uf riy nge boch ban’en ni bay u wuru’ e fayleng, nge boch ban’en ni yima af ngay ngan yan nga wuru’ e fayleng. Ma gog ngak fare tir ni nge tamilangnag ni faanra aram rogon me ere ba mudugil ndawori nang e girdi’ e ngiyal’ nem ni fayleng e yugu bay u lan e lang ndariy ban’en ni be kol. Ku rayog ni nga mog ngak ni nge fanay reb e bat’ ara malang ni nge tamilangnag ni ban’en nib tomal e dabiyog ni nga yigi par u lan e lang, ya ba t’uf ban’en ni nge gif nga daken. Ere, re n’ey e be tamilangnag ni yugu aram rogon ni ke kakrom ni kan yoloy e Bible, machane gubin e thin riy nib puluw ni bochan e Jehovah e ir e ke yib rok.​—Neh. 9:6.

13, 14. Uw rogon nrayog ni nge ayuweg e piin gallabthir pi fakrad ni ngar nanged feni ga’ fan e pi kenggin e motochiyel u Bible?

¹³ Rib ga’ fan ni ngam ayuweg fakam ni nge tamilang u wan’ feni ga’ fan e pi kenggin e motochiyel u Bible. (Mu beeg e Psalm 1:1-3.) Boor e kanawo’ nrayog ni ngam rin’ e re n’ey riy. Bod nrayog ni nga mog ngak fakam ni nge susunnag ni ke lemnag ni nge yan i par nga reb e donguch ndariy be’ riy ma thingari mel’eg boch e girdi’ ni nge un ngak ngar pared u rom. Ngemu’ mag fith ni nge lungum, “Mang boch e fel’ngin nib t’uf ni nge yag ngak e pi girdi’ nem ni faanra nge yag nim pared u rom nib taareb lungumed?” Ku rayog ni ngam weliy ngak fapi fonow nib manigil ni bay ko Galatia 5:19-23.

¹⁴ L’agruw ban’en nrayog ni nge fil fakam ko re fanathin ney. Bin som’on e, ra fil riy ni pi motochiyel rok Got e ma sunmiy e gapas nge taareban’ u thilin e girdi’. Ma bin l’agruw e, pi n’en ni be fil Jehovah ngodad e chiney e be fal’eg rogodad ni fan ko par ni gad ra tay u lan e bin nib beech e fayleng. (Isa. 54:13; John 17:3) Rayog ni ngam weliy murung’agen boch e walag ni bay murung’agrad u lan e pi babyor rodad ya nge yag nim tamilangnag e n’en ni ga be weliy murung’agen. Rayog ni ngam weliy boch ban’en ni bay ko fapi article ni kenggin  e “Bible e Rayog ni Nge Thilyeg e Ngongol Rok Be’” ni bay ko Fare Wulyang ko Damit. Maku reb e, faanra bay reb e walag u lan e ulung ni i rin’ boch ban’en nib kireb kafram ma ke yag ni nge thilyeg e ngongol rok ni bochan e nge fel’ u wan’ Jehovah, ma rayog ni ngam pining nga tafenam ya nge yag ni weliy e n’en ni buch rok me yag ni nge rung’ag fakam. Pi n’ey e rayog ni nge tamilangnag feni ga’ fan e pi kenggin e motochiyel u lan e Bible!​—Heb. 4:12.

15. Mang reb e ban’en ni ngam nameg u nap’an ni ga be skulnag fakam?

¹⁵ Baaray e n’en ni gad be weliy: Nap’an ni ga be fil ban’en ngak fakam, ma ngam fal’eg i lemnag boch ban’en, mag fanay e pi n’em ni ngam fil boch ban’en ngak fakam u reb e kanawo’ nra adag ni nge fil fapi n’em riy. Mu guy rogon ni nge lemnag boch ban’en, mu kum lemnag rogon yangaren. Mu fil ban’en ngak u reb e kanawo’ ndabi chalban ngay, ma ra ayuweg ni nge gel e michan’ rok. I yog reb e matam ni gaar: “Dabi chalbam i fil ngak fakam taab n’en u boor e kanawo’.”

16. Mang nib ga’ fan ni nge gum’an’ e gallabthir u nap’an ni yad be fil ban’en ngak pi fakrad? Mu tamilangnag.

¹⁶ Faanra nge gel e michan’ rok be’ mab t’uf gelngin Got nib thothup rok. (Gal. 5:22, 23) Michan’ e ban’en nib t’uf ni ngan maruweliy ni nge gel i yan ni bod rogon wom’engin e gek’iy ni ma ga’ ni buchuuw ma buchuuw. Ere, nap’an ni ga be fil ban’en ngak fakam mab t’uf ni ngam gum’an’nagem mag k’adan’um u puluwon. Reb e matam ni ma par u Sapan ni bay ba pagel nge bochi pin ni fak e gaar: “Boor e tayim ni gamow ma tay leengig ni fan ngak gal fakmow. Nap’an ni ka yow ba achig, ma gu ma fil ban’en ngorow u lan 15 e minit u gubin e rran. Kemus ni yigoo rofen ni bay e muulung e da gur rin’ed e re n’ey. De mo’maw’ e re ragag nge lal i minit nem u wan’mad.” Ki yoloy reb e walag ni ma lekag e ulung ni gaar: “Nap’an ni kab fel’ yangareg, ma boor e deer rog nge boch ban’en ni ma maruwar u wan’ug, ma yooren riy e da gur ma weliy ngak be’. Munmun, ma boor ko fapi deer ni ug lemnag nge boch ban’en ni i maruwar u wan’ug nni weliy e fulweg riy u nap’an e muulung, ara nap’an e fol Bible ni gamad ma tay e tabinaw rog, ara gu pirieg e fulweg riy u nap’an ni gu be fil e Bible ni yigoo gag. Aram fan nrib ga’ fan ni nge par e piin gallabthir ma yad be fil ban’en ngak pi fakrad.”

17. Mang nib ga’ fan ni nge gelnag e piin gallabthir e michan’ rorad? Uw rogon ni ke dag ba wu’ e mabgol e kanawo’ nib fel’ nrayog ni nge folwok pi fakrow riy?

¹⁷ Michan’ rom e aram reb e ban’en nrib ga’ fan. Ma fal’eg i yaliy pi fakam e n’en ni ga ma rin’, ma ra yib angin e pi n’ey ngorad. Ere, mu ulul ngam gelnag e michan’ rom. Mu dag ngak pi fakam nrib riyul’ Jehovah u wan’um. Bay ba wu’ e mabgol ni yow ma par u Bermuda nnap’an nra magafan’row nga boch ban’en, ma yow ma meybil pi fakrow u taabang ni nge ayuwegrad Jehovah nge pow’iyrad ko n’en ni ngar rin’ed, ma aram mar piew e athamgil nga laniyan’ pi fakrow ni nge bagayad me meybil rok ni yigoo ir. Rognew ni lungurow: “Ku ma lungumow ko bin nib ilal e ppin ni fakmow, ‘Ngari pagan’um ngak Jehovah, mag tiyan’um ko pigpig ni ga be tay ngak, ma dabi pag rogon e magafan’ rom.’ Nap’an nra guy angin e pi n’em ni ke rin’, ma ma tamilang u wan’ ni Jehovah e ir e be ayuwegmad. Re n’ey e ke ayuweg ni ngari mich Got nge Bible u wan’.”

18. Mang reb e ban’en nib ga’ fan nthingari nang e gallabthir?

¹⁸ Bin riyul’ riy e, ra reb e bitir mab milfan ngak ni nge maruweliy e michan’ rok. Gur e kam yung e woldug ga be puog e ran ngay, machane yigoo Got e rayog ni nge ayuweg nge ga’. (1 Kor. 3:6) Ere, mu ning gelngin Jehovah nib thothup ni nge ayuwegem, mag athamgil ni ngam skulnag fakam, ya faan ga ra rin’ ni aray rogon, ma ra tow’athnagem.​—Efe. 6:4.