1, 2. Mang fan ni bay rogon e munmad ni ma tay e Pi Mich Rok Jehovah? (Mu guy e sasing ni bay u tabolngin e re article ney.)

 BAARAY e n’en ni yog reb e shimbung u Netherland u murung’agen reb e muulung ni tay boch e tayugang’ u barba’ e teliw. I gaar: “Ba ga’ nnap’an nra ba gel e gowel ma rayog ni ngam guy ni yad be munmad ni yug dariy yaramen. Machane, gathi aram rogon e pi convention ara boch e muulung nib ga’ ni ma tay e Pi Mich Rok Jehovah . . . . Ya ga ra yaliy e piin pagel nge piin pumoon ma kar chuwgad ko jacket ma kar m’aged e tie, ma piin buliyel nge piin nib pin e kar chuwgad ko skato . . . nib fel’ n’umngin, mab yalen, ma kub m’ag nga rogon e munmad e ngiyal’ ney.” Arrogon, ba ga’ ni yima yog boch ban’en nib fel’ u murung’agen e Pi Mich Rok Jehovah ni bochan e yad ma ‘gonopiy rogon e mad rorad ni nge yan i par nib fel’ rogon, ma yad ma yin’ e mad nrogon yalen e munmad; ma . . . yad ma ngongliy e ngongol nib fel’ nib m’ag ngak e [piin] ni yad be dag ni yad girdien Got.’ (1 Tim. 2:9, 10) Re thin ney e be weliy apostal Paul riy murung’agen e piin nib pin, machane re n’ey e ku bay rogon ngak e piin pumoon ni Kristiano.

² Bochan ni gadad e girdi’ rok Jehovah ma aram fan nib ga’ fan u wan’dad rogon e munmad ni gad ma tay. Ma re n’ey e kub ga’ fan u wan’ fare Got ni gad ma pigpig ngak. (Gen. 3:21) Dariy e maruwar riy ni pi n’en ni be yog e Bible u murung’agen rogon e munmad ni ngaun tay nge rogon ni ngaun fal’eg yaay e be tamilangnag ni bay rogon e re miti munmad ni baadag e En  Th’abi Tolang u ga’ngin e palpalth’ib ni nga i tay e tin riyul’ e tapigpig rok. Ere, aram fan ni gathi kemus ni ngaud munmadgad nrogon ni gad baadag, ya susun ni ngkud lemnaged e n’en nib m’agan’ Jehovah ngay ni ir e Somol rodad Nth’abi Tolang.

3. Mang e rayog ni ngad filed ko fare Motochiyel ni pi’ Got ngak piyu Israel ni murung’agen rogon e munmad ni ngaur ted?

³ Immoy e Motochiyel ni pi’ Got ngak piyu Israel kakrom ni i ayuwegrad u boch e ngongol nib kireb ni i rin’ e pi nam u toobrad. I tamilangnag e re Motochiyel nem nrib fanenikan Jehovah rogon e munmad ni ma tay boch e girdi’ ndabiyog ni nge gagiyel riy ko yad e pumoon fa yad e ppin. (Mu beeg e Deuteronomy 22:5.) Ere, ba tamilang ko motochiyel ni pi’ Got u murung’agen rogon e munmad ni ngaun tay nde m’agan’ ngay ni nga i chuw e piin pumoon ko mad ko ppin ara nga i chuw e piin nib pin ko mad ko pumoon, ara nge munmad be’ u reb e kanawo’ nra mo’maw’ ni ngan nang riy ko facha’ e be’ nib pumoon ara be’ nib pin.

4. Mang e rayog ni nge ayuweg e piin Kristiano ni ngar dugliyed rogon nib fel’ ni ngaur munmadgad?

⁴ Bay boch i kenggin e motochiyel ko Thin rok Got nra ayuweg e piin Kristiano ni ngar dugliyed rogon nib fel’ ni ngaur munmadgad. Rayog ni nge ayuwegrad e pi kenggin e motochiyel ney ni yugu aram rogon nib thilthil e gin ni yad ma par riy, ara rogon e yalen, nge yafang ko nam rorad. De t’uf ni nga nog ngodad fithingan e re miti mad nib fel’ ni ngad chuwgad ngay nge fithingan e tin nde fel’ ni ngad chuwgad ngay. Ya ba t’uf ni ngad paged e pi kenggin e motochiyel u Bible ni nge pow’iydad, ya pi n’ey e ku ma pagdad ni ngad mel’eged e pi mad ni gad baadag ni ngad chuwgad ngay. Ere, chiney e ngad weliyed murung’agen boch i kenggin e motochiyel nrayog ni nge ayuwegdad ni ngad “nanged e tin nib m’agan’ Got ngay​—ni tin nib fel’, nib fel’ u wan’ Got ma rib yal’uw” u nap’an ni gad be dugliy e re miti mad ni ngad chuwgad ngay.​—Rom. 12:1, 2. 

5, 6. Susun ni mang e nge rin’ rogon e munmad rodad ngak yugu boch e girdi’?

⁵ Nni thagthagnag nga laniyan’ apostal Paul ni nge tamilangnag murung’agen reb i kenggin e motochiyel nib ga’ fan ni bay ko 2 Korinth 6:4. (Mu beeg.) Boor ban’en nrayog ni nge nang e girdi’ u murung’agdad ni bochan rogon ni gad ma fal’eg yaadad. Boor e girdi’ ni yad ma dugliy rarogon be’ u wan’rad ni bochan rogon yaan facha’ u “wuru’ i downgin.” (1 Sam. 16:7) Ere, bochan ni gadad e pi tapigpig rok Got, ma aram fan ni gad manang nrogon e munmad ni gad ma tay e gathi kemus ni be yan u rogon e n’en ni gad baadag ni ngad chuwgad ngay. Susun ni nge k’aringdad e pi kenggin e motochiyel ni kad filed ko Thin rok Got ni ngad siyeged ndab ud chuwgad ko mad nib k’ad nga dowdad, fa ra gagiyelnag yu yang u dowdad, ara k’aring boch e girdi’ ni ngar ar’arnaged boch ban’en nib kireb. Re n’ey e kub muun ngay e mad ni yima chuw ngay ni ma gagiyelnag e yungin nib mith u dowey. De fel’ ni ngad k’aringed be’ ni nge kirkireb ara nge dabuy ni nge sap ngodad ni bochan rogon e munmad ni kad ted.

⁶ Faanra ud pared ni gad bbeech, ma kub yalen e munmad rodad nge rogon ni gad ma fal’eg yaadad, ma aram e ra i tay e girdi’ fadad ni gadad e pi tapigpig rok Jehovah ni ir e Somol rodad Nth’abi Tolang. Re n’ey e ku rayog ni nge k’aringrad ni ngar adaged ni ngar liyorgad ko fare Got ni gad be liyor ngak. Maku reb e, faanra ba yalen e munmad rodad maku ra i fal’eg thin e ulung rodad. Ma angin nra yib riy e ra adag e girdi’ ni ngar motoyilgad ko fare thin nib fel’ ni gad ma machibnag.

7, 8. Mingiyal’ e ba fel’ ni nge yalen rogon e munmad rodad?

⁷ Thingar ud chuwgad ko mad nib yalen nra dag nib ga’ fan e thin ni gad be machibnag maku gad be pining e sorok ngak Jehovah. Fan ni gad ma rin’ e re n’ey e bochan e Got rodad ni ir reb e Got nib thothup, nge pi walagdad u lan e ulung, nge girdi’ ni gad ma mada’nag u nap’an e machib. (Rom. 13:8-10) Rib ga’ fan ni nge yalen rogon e munmad ni ngad ted u nap’an ni ngad uned ko muulung ngu nap’an ni gad be yan ko machib. Susun e ngad munmadgad u reb e kanawo’ “nib m’ag ngak e [piin] ni yad be dag ni yad girdien Got.” (1 Tim. 2:10) Riyul’ ni bay boch e mad nib m’ag ni ngaun chuw ngay u reb e nam, machane de m’ag nga yugu reb. Machane, gadad e girdi’ rok Jehovah e demtrug e gin ni gad ma par riy, ma susun  e ngad guyed rogon ndab da magawonnaged laniyan’ e girdi’ ni bochan rogon e munmad ni gad ma tay.

⁸ Mu beeg e 1 Korinth 10:31. Nap’an ni gad ra un ko pi assembly nge convention ni gad ma tay, mab t’uf ni ngad munmadgad nib fel’ rogon mab yalen. De fel’ ni ngad munmadgad ni bod rogon e girdi’ nu fayleng. Mus ko ngiyal’ ni ka darod da pared nga reb e hotel u nap’an reb e pi muulung ney, ngu nap’an ni gad be rin’ boch ban’en u m’on ngu tomuren fare muulung, ma susun e dab ud munmadgad ndariy yaramen. Faan gad ra fol ko re n’ey, ma aram e rayog ni ngaud felfelan’gad ngay ni nga u dogned ni gadad boch e Pi Mich Rok Jehovah, maku dab da magagawongad ni ngad machibgad u nap’an ni ke mab e kanawo’ ngodad.

9, 10. Mang fan nsusun e ngad paged fare thin ni bay ko Filippi 2:4 ni nge gagiyegnag rogon e munmad rodad?

⁹ Mu beeg e Filippi 2:4. Mang fan nib t’uf ni nge lemnag e piin Kristiano rogon laniyan’ yugu boch e walag ko munmad ni yad ma tay? Reb i fan e bochan ni pi tapigpig rok Got e yad ma athamgil ni ngar folgad ko fare fonow nu Bible ni be gaar: “Thingar mu lied ngem’ e ar’ar nu fayleng ni be maruwel u fithik’ i dowmed, ni aram e darngal, nge puwlag, nge ar’ar nib kireb ni ma waliy e girdi’ ko denen.” (Kol. 3:2, 5) De fel’ ni ngad mo’maw’naged ngak yugu boch e walag ni ngar folgad ko re fonow ney. Bay boch e walag ni kar digeyed boch e ngongol ni puwlag ni ur rin’ed kafram ni ka be mo’maw’ ngorad ni ngar chamgad ko pi ar’ar nib kireb ni bay rorad. (1 Kor. 6:9, 10) Ere, de fel’ ni ngad mo’maw’naged e re n’ey ngorad.

¹⁰ Nap’an ni gad bay u fithik’ pi walagdad ni pumoon nge ppin, ma susun e dab da munmadgad u reb e kanawo’ nra mo’maw’nag ko ulung rodad ni nge par nib fel’ e ngongol ko girdi’ riy. Ma susun e ngad rin’ed e re n’ey ni yugu demtrug ko gad bay u taabang u nap’an reb e muulung ara nap’an ni kad muulunggad nga taabang ni fan nga yugu reb e ban’en. Yugu  aram rogon nib puf mat’awdad ni ngad dugliyed rogon e re miti mad ni gad baadag ni ngad chuwgad ngay, machane thingar dab da chuwgad ko mad nra mo’maw’nag ngak yugu boch e walag ni ngar pared nib beech e lem, nge thin, nge ngongol rorad. (1 Pet. 1:15, 16) Be’ nib t’uf Got rok nge girdi’ e “de kireb daken, ara ke mus ni ir e ma lemnag ir.”​—1 Kor. 13:4, 5.

11, 12. Mang e ba fel’ ni ngad lemnaged u nap’an ni gad be dugliy e re miti mad ni ngad chuwgad ngay?

¹¹ U m’on ni nge dugliy reb e tapigpig rok Got rogon e re miti mad ni nge chuw ngay, mab fel’ ni nge nang ni gubin ban’en ma bay ngal’an. Riyul’ nrayog ni nge thil rogon e mad ni ngad chuwgad ngay ni bochan rogon e yafang, nge ngiyal’ ni gad bay riy u nap’an reb e duw, nge rarogon e gin ni gad ma par riy. Machane demtrug rogon e yafang, ma motochiyel rok Jehovah e ka be par ni ka rogon.​—Mal. 3:6.

¹² Ra taw nga nap’an e gowel ma rayog ni nge mo’maw’ ni ngad chuwgad ko mad nib yalen. Ere, ra m’ug ni gad be tayfan pi walagdad ni faanra dab da chuwgad ko mad ni kaygi k’ad ara kaygi ga’ ngodad ni be lul’lul’ nga but’ nga i m’ug yu yang u dowdad riy nsusun e dabi m’ug. (Job 31:1) Maku reb e, nap’an ni gad be toffan u dap’el’ay ara gad be maluk ko swimming pool ma susun e ngki yalen rogon madan e maluk ni ngad chuwgad ngay. (Prov. 11:2, 20) Yugu aram rogon ni boor e girdi’ nu fayleng ni yad ma chuw nga boch e madan e maluk ni ma gagiyel yu yang u dowrad riy nib mith, machane gadad e piin ni gad ma pigpig ngak Jehovah e susun ni ngad rin’ed boch ban’en ni yira pining e sorok riy ko Got rodad ni ir reb e Got nib thothup mab t’uf rodad.

13. Mang fan nsusun e ngad paged fare thin ni bay ko 1 Korinth 10:32, 33 ni nge gagiyegnag rogon e re miti mad ni ngaud chuwgad ngay?

¹³ Ku bay reb i kenggin e motochiyel nib ga’ fan nra ayuwegdad u rogon e re miti mad ni ngad mel’eged ni ngad chuwgad ngay. Susun e ngad lemnaged rogon e nangan’ rok yugu boch e girdi’ ndemtrug ko taareb e michan’ rodad fa danga’. (Mu beeg e 1 Korinth 10:32, 33.) Susun e dab da chuwgad nga boch e mad nra magawonnag laniyan’ yugu boch e girdi’. I yoloy Paul ni gaar: “Nge bagadad me yan nga laniyan’ walagen ni girdien Kristus ni fan ngak faanem, ya nge ayuweg nge gel e michan’ rok ngak Somol. Yi Kristus e de yan nga laniyan’.” (Rom. 15:2, 3) Arrogon, tin nib m’agan’ Got ngay ni i rin’ Jesus nge ayuw ni i pi’ ngak yugu boch e girdi’ e aram e n’en nib ga’ fan u wan’ ma gathi pi n’en nra fel’ rogon riy. Ere, ku arrogodad nsusun e dab ud chuwgad nga boch e mad ni gad baadag ni ngad chuwgad ngay ma gad k’aring e girdi’ ni ngar dabuyed ni ngar motoyilgad ko thin ni gad be machibnag ngorad.

14. Uw rogon nrayog ni nge fil e piin gallabthir ngak pi fakrad rogon ni ngaur n’ufed Got u daken e munmad ni yad ma tay?

¹⁴ Ba milfan ko piin gallabthir ni Kristiano ni ngar filed ngak chon e tabinaw rorad ni ngar folgad ko pi kenggin e motochiyel u Bible. Re n’ey e ba muun ngay ni ngaur guyed rogon ni nga i felfelan’ Got nga rogon e munmad ni yad ma tay pi fakrad nge rogon ni yad ma fal’eg yaarad. (Prov. 22:6; 27:11) Faanra i dag e piin gallabthir e kanawo’ nib fel’ nrayog ni nge folwok pi fakrad riy u rogon ni ngan rin’ e re n’ey, ma yad be fonownagrad nib fel’ rogon ma yad be rin’ u fithik’ e t’ufeg, ma aram e yad be fil ngak pi fakrad ni ngaur ted fan fare Got ni yad be pigpig ngak ni ir reb e Got nib thothup. Kub fel’ ni faanra i yog e piin gallabthir ngak pi fakrad e kantin ni bay boch e mad riy nib fel’ ni ngan chuw ngay. Kub t’uf ni ngan fil ngorad ni gathi kemus ni ngar mel’eged ba mit e mad ni ngar chuwgad ngay ni bochan e yad baadag, ya ngkur mel’eged e mad nra n’uf Jehovah ni fare Got ni yad be fek fithingan.

15. Mang e susun ni nge pow’iy rogon ni gad ma mel’eg e mad ni ngad chuwgad ngay?

¹⁵ Bay e fonow ko Thin rok Got nrayog ni nge ayuwegdad u rogon ni ngad mel’eged boch ban’en nib fel’ rogon ni yira pining e sorok riy ngak Got. Yugu aram rogon, mab puf mat’awdad ni ngad mel’eged rogon e re miti mad ni ngad chuwgad ngay. Ya ra bagadad ma rogon e mad ni baadag ni ma chuw ngay, nge rogon e tin nrayog puluwon rok. Machane, n’en nth’abi ga’ fan ni ngad lemnaged e aram e susun  ni nga i par e mad rodad nib beech, mab yalen, ma ngkud yarmiyed rogon e mad ni ngad chuwgad ngay nga bang nge nga bang, ma ngkud guyed rogon ndabi magawonnag laniyan’ e girdi’ ko binaw rodad.

16. Mang nib ga’ fan e athamgil ni gad ma tay ni nge yalen rogon e munmad rodad?

¹⁶ Riyul’ nde mom ni ngad dugliyed ban’en nib fel’ rogon, ngu fithik’ e gonop. Boor e kantin ni kemus ni yigoo mad nib ga’ ni be chuw yooren e girdi’ ngay e ngiyal’ ney e aram e re miti mad ni yima pi’ riy ni chuway’. Ere, rayog ni nge mo’maw’ ni ngan pirieg e skato, nge kenggin, nge jubong riy nib fel’ nrayog ni ngan chuw ngay ni gathi kaygi k’ad nga dowey. Machane, dariy e maruwar riy nra guy e pi walag e re n’ey ma kub ga’ fan u wan’rad e athamgil ni gad ma tay ni ngad chuwgad nga boch e mad nib fel’ ma kub yalen. Maku reb e, kab gel e felfelan’ ni gad ra tay ni ngad mel’eged e mad ni ngad chuwgad ngay ni yira pining e sorok riy ngak e Chitamangidad ni bay u tharmiy ko bin ni nga darod nga tabon lanin’dad.

17. Mang boch ban’en nib t’uf ni nge lemnag reb e walag ni pumoon u m’on ni nge dugliy ndabi puy soroben nge m’ay?

¹⁷ Ma uw rogon e bin baaray ni nge digey e pi walag ni pumoon sorobrad ndab ra puyed nge m’ay? Rogon ni immoy ko fare Motochiyel rok Moses e piin pumoon e thingar dab ra puyed sorobrad nge m’ay. Machane, ngiyal’ ney e daki moy e piin Kristiano u tan fare Motochiyel rok Moses. (Lev. 19:27; 21:5; Gal. 3:24, 25) Bay boch e nam nde kireb ko yalen riy ni kemus ni nge puy reb e walag ni pumoon sorben nge ngoch, machane dabi m’ay. Re n’ey e dabi magawonnag laniyan’ e girdi’ u nap’an e machib. Bin riyul’ riy e, bay boch e pumoon ni yad ma yog e thin u lan e ulung ndarur puyed sorobrad nge m’ay. Yugu aram rogon, ma bay boch e walag ni pumoon ni kar dugliyed ni ngar puyed sorobrad nge m’ay. (1 Kor. 8:9, 13; 10:32) Ku bay boch e nam nde puluw ko yalen riy maku de fel’ ni nge digey e piin Kristiano sorobrad ndab ra puyed nge m’ay. Ya bin riyul’ riy e, faanra rin’ reb e walag e re n’ey ma rayog ni nge mo’maw’nag ngak ni nge pining e sorok ngak Got maku ra yan i aw ni ir be’ nib kireb pangin.​—Rom. 15:1-3; 1 Tim. 3:2, 7. 

18, 19. Uw rogon nra ayuwegdad fare thin ko Mikah 6:8 u nap’an nri gad be athamgil ni nge yan i aw rogon e munmad ni gad ma tay nib fel’ u wan’ Got?

¹⁸ Gad ba felfelan’ ni bochan e dawori pi’ Jehovah boch e motochiyel ni be yog chi rogon e re miti mad ni ngad chuwgad ngay nge tin ndab da chuwgad ngay, nge rogon ni ngad fal’eged yaadad. Ya ke pagdad ni ngad maruwelgad ko puf rogon ni bay rodad ma gad dugliy boch ban’en nib fel’ rogon nib puluw ko pi kenggin e motochiyel u Bible. Ere, mus nga rogon e munmad ni gad ma tay nge rogon ni gad ma fal’eg yaadad nrayog ni ngad daged riy ni gad be ‘fol rok Got u fithik’ e sobut’an’.’​—Mik. 6:8.

¹⁹ Gad manang ni Jehovah e ir reb e Got nib machalbog mab thothup ma pi motochiyel rok e aram e pi n’en nrayog ni nge pow’iydad nib fel’ rogon. Ere, faanra gad baadag ni nge m’ug ni gad ba sobut’an’ ma aram e gad ra athamgil ni ngad folgad ko pi motochiyel rok. Maku reb e, faanra ba sobut’an’dad ma ra ud lemnaged rogon laniyan’ yugu boch e girdi’. Ere, rogon nra m’ug riy ni gad be ‘fol rok Got u fithik’ e sobut’an’’ e aram e ngad folgad ko pi motochiyel rok mu u darod nga laniyan’ yugu boch e girdi’.

20. Mang e susun ni ngad guyed rogon ni nga i lemnag yugu boch e girdi’ u rogon e munmad ni gad ma tay nge rogon ni gad ma fal’eg yaadad?

²⁰ Susun e ngad guyed rogon ndab i yog e girdi’ boch ban’en nib kireb u rogon e pigpig ni gad be tay ngak Jehovah ni bochan rogon e munmad rodad. Susun e ngad guyed rogon ni nge mom ko pi walag nge yug girdi’ ni ngar nanged ni gadad boch e tapigpig rok Jehovah ni ir reb e Got nib mat’aw. Bay rogon e re miti ngongol ni baadag ni nga i dag e pi tapigpig rok, ma gad ba felfelan’ ngay ni ngaud ngongolgad ni aram rogon. Ma rib fel’ e n’en ni ma rin’ e pi walag nib yalen rogon e munmad ni yad ma tay, ma kub fel’ e ngongol rorad, ma yad ma k’aring e girdi’ ni ngar adaged ni ngar motoyilgad ko fare thin nib fel’ ni gad be machibnag, maku yad ma pining e sorok ngak Jehovah, ma yad ma felfelan’nag. Faanra ud gonopiyed rogon e re miti mad ni gad ma chuw ngay, ma dariy e maruwar riy ni gad ra ulul i n’uf Jehovah ni Faen nrib sorok nga rogon ‘feni rir nge feni maluplup’.’​—Ps. 104:1, 2.