1-2. Mang fan nib gel e magafan’ ni tay Jesus?

NAP’AN e bin tomur e rran ko yafos rok Jesus nib girdi’, ma rib gel e magafan’ ni tay. Dabki n’uw nap’an ma bayi chel boch e girdi’ ni kireb ngar gafgownaged mi yad li’ nge yim’. Machane, gathi kemus ni yigoo yam’ ni nge tay e i magafan’ ngay. Rib t’uf e Chitamangin rok ma baadag ni nge rin’ e tin nib m’agan’ ngay. Manang ni faanra par nib yul’yul’ u fithik’ e pi skeng nib mo’maw’ ni bayi mada’nag, ma aram e rayog ni nge un i thothupnag fithingan Jehovah. Kub t’uf e girdi’ rok Jesus, ma manang ni athap rodad ko yafos ni manemus boch nga m’on e be yan u rogon e yul’yul’ nra tay ngak Jehovah nge mada’ ko yam’.

² Yugu aram rogon feni gel e mochuch ni i tay Jesus, machane i par nib gapas. I gaar ko pi apostal rok: “Nggu pi’ e gapas rog ngomed.” (John 14:27) Bay e “gapas rok Got” rok, ara gapas ni ma thamiy be’ ni bochan e ba fel’ e tha’ u thilrow Jehovah. Re gapas nem e ir e yororiy e tafinay rok Jesus nge gum’irchaen.​—Fil. 4:6, 7. 

3. Mang e gad ra weliy ko re article ney?

³ Dariy bagadad nra mada’nag e skeng ni bod e tin ni yib ngak Jesus, machane urngin e piin ni yad be folwok rok Jesus e yad ra mada’nag boch e skeng. (Matt. 16:24, 25; John 15:20) Ku ra i magafan’dad yu ngiyal’ ni bod rogon Jesus. Ere mang e rayog ni ngad rin’ed ya nge dabi pag rogon e magafan’ rodad ndabkiyog ni ngad pared nib gapas lanin’dad? Ngad weliyed dalip ban’en ni rin’ Jesus u nap’an ni be machib ko ngiyal’ ni immoy u fayleng, ma gad guy rogon nrayog ni ngad folwokgad rok u nap’an ni kad mada’naged e skeng.

4. Mu weliy boch ban’en ni be dag ni i par Jesus ni be meybil u nap’an e bin tomur e rran ko yafos rok u fayleng nrogon nib puluw ko 1 Thessalonika 5:17?

⁴ Mu beeg e 1 Thessalonika 5:17. Yigi par Jesus ni be meybil u  nap’an e bin tomur e rran ko yafos rok u fayleng. Nap’an ni dag ngak pi gachalpen rogon ni ngar madnomnaged e yam’ ni tay, ma aram me yibilay fare flowa nge wain. (1 Kor. 11:23-25) U m’on nra chuwgad pi gachalpen ko gin nra ted fare madnom ko Paluk’af riy, ma aram mar meybilgad u taabang. (John 17:1-26) Maku nap’an nra tawgad pi gachalpen nga daken fare Burey nu Olives, ma boor yay ni meybil. (Matt. 26:36-39, 42, 44) Tin tomur e thin ni yog Jesus u m’on ni nge yim’ e yog u daken e meybil. (Luke 23:46) I weliy ngak Jehovah urngin ban’en ni buch rok ko bin tomur e rran ko yafos rok u fayleng u daken e meybil.

5. Mang fan ni rus e pi apostal rok Jesus?

⁵ Reb i fan ni yag rok Jesus ni nge athamgil u fithik’ e pi skeng ni yib ngak e bochan ni i taga’ ko Chitamangin u daken e meybil. Machane, pi apostal rok e de yag ni ngar pared ni yad be meybil e re nep’ i n’em. Wenegan ni yib riy e rrusgad u nap’an ni yib e skeng ngorad. (Matt. 26:40, 41, 43, 45, 56) Nap’an nra yib e skeng ngodad, ma rayog ni ngad pared ni gad ba yul’yul’ ni faan gad ra folwok rok Jesus mu ‘ud meybilgad.’ Mang e rayog ni ngad yibilayed?

6. Uw rogon nra ayuwegdad e michan’ ni ngad pared ni gad ba gapas?

⁶ Rayog ni ngad meybilgad ngak Jehovah ni nge ‘gelnag e michan’ rodad.’ (Luke 17:5; John 14:1) Ba t’uf e michan’ rodad ni bochan e urngin e piin ni yad be folwok rok Jesus e ra i skengnagrad Satan. (Luke 22:31) Uw rogon nra ayuwegdad e michan’ ni ngad pared ni gad ba gapas ni yugu aram rogon ni boor e magawon ni gad be mada’nag nra m’ay reb miki yib reb? Nap’an ni gad ra rin’ urngin ban’en nrayog rodad ni ngad pithiged reb e magawon ni keb ngodad, ma michan’ rodad e ir e ra k’aringdad ni ngad paged fan urngin ban’en ngak Jehovah. Rayog ni ngad pared nib gapas lanin’dad nge gum’ircha’dad ni  bochan e ba pagan’dad ni manang e n’en ni nge rin’ ni kab fel’ nga rogon ni gad manang.​—1 Pet. 5:6, 7. 

7. Mang e kam fil ko n’en ni yog Robert?

⁷ Meybil e ra ayuwegdad ni ngad pared nib gapas lanin’dad ni yugu demtrug e miti skeng ni gad be mada’nag. Am lemnag e n’en ni buch rok Robert nreb e piilal nib yul’yul’ ni ke pag 80 e duw rok. I yog ni gaar: “Fare fonow ni bay ko Filippi 4:6, 7 e ke ayuwegeg ni nggu athamgil u fithik’ boor e skeng ni kug mada’nag u lan e yafos rog. Kug mada’nag e magawon ko salpiy. Ma immoy ba ngiyal’ ndaki yag ni nggu par ni gag reb e piilal.” Ere mang e ke ayuweg Robert ni nge par nib gapas laniyan’? I yog ni gaar: “Nap’an ni yug ra tabab ni nge magafan’ug, ma aram mug meybil. Ba mich u wan’ug ni faanra ug par ni gu be meybil nib gel, ma aram e rayog ni nge gapas lanin’ug.”

8. Ku mang reb i fan ni i par Jesus nib gapas laniyan’ nrogon ni bay ko John 8:29?

⁸ Mu beeg e John 8:29. Mus nga nap’an ni yibe gafgownag Jesus me par nib gapas laniyan’ ni bochan e manang ni be felfelan’nag e Chitamangin. I par nib yul’yul’ ni yugu aram rogon nib mo’maw’ ngak. Ba t’uf e Chitamangin rok me tay ni pigpig ni be tay ngak Jehovah e aram e n’en th’abi ga’ fan u lan e yafos rok. U m’on ni yib nga fayleng, ma immoy u tooben Got “ni bod be’ nib salap i muruwliy ban’en.” (Prov. 8:30) Ma nap’an ni immoy u fayleng, mi i fil murung’agen e Chitamangin ko girdi’ u fithik’ e pasig. (Matt. 6:9; John 5:17) Rib gel e felfelan’ ni i tay Jesus ko re maruwel ney ni i rin’.​—John 4:34-36.

9. Faanra ud pared ni gad be machib, ma uw rogon nra ayuwegdad ni ngad pared nib gapas lanin’dad?

⁹ Rayog ni ngad folwokgad rok Jesus ni aram e  ngad folgad rok Jehovah mu ‘ud muruwliyed e maruwel rodad ni fan ngak Somol.’ (1 Kor. 15:58) Faanra ud ‘pared ni yigoo thin rok Got e gad be machibnag ko girdi’,’ ma aram e rayog ni nge puluw e lem rodad u murung’agen e pi magawon rodad. (Acts 18:5) Bod ni, piin ni gad ma mada’nag u nap’an e machib e kab gel e magawon ni yad ma mada’nag ko tin ni gad ma mada’nag. Machane, nap’an ni yad ra fil rogon ni nge t’uf Jehovah rorad mar folgad ko pi fonow rok, ma aram e rayog ni nge mon’og e par rorad mar felfelan’gad. Gubin yay ni gad ra guy ni ke buch e re n’ey, ma aram e rayog ni ngari pagan’dad nra ayuwegdad Jehovah. Ma re pagan’ ney e ra ayuwegdad ni ngad pared nib gapas lanin’dad. Reb e walag nib pin ni kab kafram i yib ni ma lemnag ni ir be’ ndariy fan maku ma par nrib kireban’ e ke guy nriyul’ e re n’ey. I yog ni gaar: “Faanra ug par ni gu be machib, ma aram e ba mom ni nggu gagiyegnag rogon e lem ni gu be tay me yag ni nggu par ni gub felfelan’. Gu be lemnag ni fan e re n’ey e bochan nnap’an ni gu ra un ko machib ma gu ma thamiy ni kar gu chugur ngak Jehovah.”

10. Mang e kam fil ko n’en ni yog Brenda?

¹⁰ Kum lemnag e n’en ni buch rok reb e walag nib pin ni ka nog Brenda ngak. Ir nge ba rugod ni fak e bay ba mit e m’ar rorow nib ubchiya’. Brenda e ma par u wheelchair ndabiyog ni nge un ko yan maku dariy gelngin. Ma un ko machib u mit e tabinaw ko ngiyal’ nrayog, machane ba ga’ ni ma machib u daken e babyor ni ma yoloy nga i pi’ ngak boch e girdi’. I yog ni gaar: “Nap’an ni tamilang u wan’ug miki m’agan’ug ngay ndab kug gol, ma aram me yag ni nggu tiyan’ug ko machib ni gu be tay. Bin riyul’ riy e, machib ni gu ma tay e ma ayuwegeg ni nge dab kug lemnag e pi magafan’ rog. Ma k’aringeg ni nggu tiyan’ug nga rogon ni nggu ayuweg e piin ni gu ma yol ngorad ni yad bay ko binaw ni ma machib e ulung rog riy. Re n’ey e yug ma puguran ngan’ug e athap rog boch nga m’on.”

11-13. (a) Mang e i rin’ e pi apostal rok Jesus nge yugu boch e girdi’ ni be m’ug riy ni yad e tin riyul’ e fager rok Jesus? (b) Mang angin e pi fager rok Jesus ngak?

¹¹ N’umngin nap’an ni i machib Jesus, ma pi apostal rok ni yad ba yul’yul’ e ur pared ni yad e tin riyul’ e fager rok. Yad fa mit nem e fager ni bay murung’agen u Proverbs ni be gaar: “Boch e pi tafager e ka ba gel farad yul’yul’ ngak e walag.” (Prov. 18:24, BT) Rib ga’ fan e pi fager nem u wan’ Jesus. Dariy reb i walagen Jesus ni yow ngayal ni mich Jesus u wan’. (John 7:3-5) Ku immoy ba ngiyal’ ni lemnag e girdi’ rok ni ke kireb lolugen. (Mark 3:21) Yugu aram rogon, ma nap’an ni taw ko fare nep’ u m’on ni nge yim’, ma rayog ni nge gaar ngak e pi apostal rok ni yad ba yul’yul’: “Urngin e gafgow ni yib ngog ma mpired rog nda mpaged gag.”​—Luke 22:28.

¹² Immoy yu ngiyal’ ni i oloboch e pi apostal rok Jesus, machane da i par ni be lemnag e oloboch rorad miki guy nib michan’rad ngak. (Matt. 26:40; Mark 10:13, 14; John 6:66-69) Nap’an ni ur med e pi apostal rok ni yad ba yul’yul’ ngak u taabang ko bin tomur e nep’ u m’on ni ngan li’ nge yim’, ma aram me gaar ngorad: “Nggog ni gimed e tafager rog, ni bochan e kug weliy ngomed urngin e tin ni kug rung’ag rok e Chitamag.” (John 15:15) Dariy e maruwar riy nrib gel e athamgil ni i pi’ e pi fager rok Jesus ngak. Ayuw nra pied ngak u nap’an e machib e k’aring e felfelan’ nib gel ngak.​—Luke 10:17, 21.

¹³ Gathi yigoo pi apostal rok Jesus e yad e fager rok, ya ku bay boch e pumoon nge ppin ni fager rok ni ur ayuweged ko machib ni i tay nge ku boch ban’en. Immoy boch i yad nra pininged Jesus nga taferad ko abich. (Luke 10:38-42; John 12:1, 2) Ku immoy boch i yad ni ur milekaggad u taabang mar pied boch e tin ni bay rorad ban’en ngak. (Luke 8:3) Immoy e fager rok Jesus ni yad ma ayuweg ni bochan e yad manang ni ku ra ayuwegrad. I rin’ boch ban’en nib manigil ni fan ngorad maku da i lemnag ni ngar rin’ed boch ban’en ndabiyog rorad. Yugu aram rogon nib flont  Jesus, machane ba ga’ fan u wan’ e ayuw ni i pi’ e pi fager rok ngak ni yugu aram rogon ndar flontgad. Ma dariy e maruwar riy nra ayuweged ni nge par nib gapas laniyan’.

14-15. Uw rogon ni ngad yognaged boch e fager nib manigil, ma uw rogon nrayog ni ngar ayuweged gadad?

¹⁴ Fager nib manigil e ra ayuwegdad ni ngad pared ni gad ba yul’yul’ ngak Jehovah. Bin th’abi fel’ e kanawo’ ni nge yag boch e fager nib manigil ngodad e ngkud manged boch e fager nib manigil. (Matt. 7:12) Bod ni be pi’ e Bible e athamgil nga lanin’dad ni ngad fanayed e tayim rodad nge gelngidad ni ngad ayuweged yugu boch e girdi’ nib ga’ ni “piin ni gafgow” ara piin ni ke t’uf e ayuw rorad. (Efe. 4:28) Ga manang be’ u lan e ulung rom nrayog ni ngam ayuweg, fa? Rayog ni ngam fek e chuway’ rok reb e walag ndabiyog ni nge yan nga bang ni bochan e ke pilibthir ara ba m’ar, fa? Rayog ni ngam pi’ boch e ggan ngak chon reb e tabinaw ni yad be magawon ko salpiy, fa? Faanra ga manang rogon ni ngam fanay fare website ni jw.org^® nge fare JW Library^® app, ma gur, rayog ni ngam ayuweg boch e walag ko ulung rom u rogon ni ngar pirieged boch ban’en nib manigil u rom, fa? Faan gad ra tedan’dad nga rogon ni ngad ayuweged yugu boch e girdi’, ma aram e rayog ni ngad felfelan’gad.​—Acts 20:35.

¹⁵ Rayog ni nge ayuwegdad e pi fager rodad u nap’an ni kad mada’naged boch e skeng, mar ayuweged gadad ni ngad pared nib gapas lanin’dad. I motoyil Elihu ngak Job u nap’an ni be weliy murung’agen e gafgow rok. Ku arrogon e pi fager rodad ni yad ra ayuwegdad ni aram e ngar motoyilgad ngodad u nap’an ni gad be weliy e pi n’en ni be magafan’dad ngay. (Job 32:4) Susun e dab da lemnaged ni pi fager rodad e yad e ngar dugliyed e n’en ni ngad rin’ed. Machane, gad ba gonop ni faan gad ra motoyil ko fonow ni yad be  pi’ ngodad nib puluw ko Bible. (Prov. 15:22) Susun e dab da tolangnaged e lem rodad ngad siyeged e ayuw ni ke ognag e pi fager rodad ngodad u nap’an ni ke t’uf e ayuw rodad, ya ngad folwokgad rok David ni Pilung ni sobut’nag e lem rok nge pag e pi fager rok ngar ayuweged. (2 Sam. 17:27-29) Riyul’ ni fager nib manigil e reb e tow’ath ni ke yib rok Jehovah.​—Jas. 1:17.

16. Mang e taare kanawo’ ni bay nrayog ni nge yag e gapas ngodad nrogon ni bay ko Filippi 4:6, 7? Mu weliy rogon.

¹⁶ Mu beeg e Filippi 4:6, 7, NW. * Mang fan ni ke yog Jehovah ngodad nu “daken Kristus Jesus” e rayog ni nge yag e gapas rok riy ngodad? Ya faanra tamilang me mich u wan’dad rogon ni be lebguy Jesus e n’en nib m’agan’ Jehovah ngay, ma aram e rayog ni nge par nib gapas lanin’dad nge gum’ircha’dad. Bod ni ke yag ni ngan n’ag fan urngin e denen rodad u daken e biyul ni maligach ni ke pi’ Jesus. (1 John 2:12) Re n’ey e ri ma fal’eg lanin’dad! Bochan ni Jesus e ir e Pilung u Gil’ilungun Got, ma ra chuweg urngin e gafgow ni gad be yan u fithik’ ni bochan Satan nge re m’ag rok ney. (Isa. 65:17; 1 John 3:8; Rev. 21:3, 4) Ireray ban’en nrib manigil ni gad be athapeg! Yugu aram rogon nib mo’maw’ e maruwel ni ke pi’ Jesus ngodad, machane bay rodad ni be ayuwegdad ko ngiyal’ ney ko tin tomuren e rran ko re m’ag ney. (Matt. 28:19, 20) Re n’ey e be ayuwegdad ni nge dab kud rusgad! Faanra nge yag e gapas ngodad ma rib ga’ fan ni nge l’agan’dad, ma dab kud rusgad, ma gad par nib fel’ lanin’dad u fithik’ e magawon ni be yib ngodad.

17. (a) Uw rogon ni nge par reb e Kristiano nib gapas laniyan’? (b) Mang e rayog ni ngad rin’ed nrogon ni kan micheg ko John 16:33?

¹⁷ Ere uw rogon ni ngam par nib gapas lanin’um ni yugu aram rogon nib gel e skeng ni ga be mada’nag? Aram e ngam folwok ko pi n’en ni i rin’ Jesus. Som’on e ngaum par ni ga be meybil. Bin migid, ngam fol rok Jehovah mag machib u fithik’ e pasig ngki mada’ ko ngiyal’ nib mo’maw’ ngom. Ma bin dalip, mu taga’ ko pi fager rom ni ngar ayuweged gur u fithik’ e pi skeng ni ga be mada’nag. Faan ga ra rin’ ni aray rogon, ma gapas rok Got e ra yororiy lanin’um nge gum’irchaem. Angin nra yib riy e ga ra gel ko pi skeng ni ga be mada’nag ni bod Jesus.​—Mu beeg e John 16:33.