1. Mang reb e kanawo’ ni ma dag Jehovah riy ni ma lemnag rarogodad nrogon ni kan weliy ko Efesus 6:10-13? Mu weliy rogon.

REB e kanawo’ ni ma dag Jehovah riy ni ma lemnag rarogodad ni gadad e pi tapigpig rok e aram e ma ayuwegdad ni ngad togopuluwgad ngak e pi toogor rodad. Satan nge pi moonyan’ rok e aram e tin th’abi ga’ e toogor rodad. Ere ma ginangdad Jehovah u murung’agrad, ma ma pi’ ngodad e tin nib t’uf ya nge yag nda togopuluwgad ngorad. (Mu beeg e Efesus 6:10-13.) Faan gad ra fanay e ayuw ni ke pi’ Jehovah ngodad mad taga’gad ngak, ma aram e rayog ni ngad gelgad ngak Moonyan’. Rayog ni nge pagan’dad ngak Got ni bod rogon apostal Paul ni yoloy ni gaar: “Faanra ba’ Got u ba’ rodad, me mini’ e rayog rok ni nge togopluw ngodad?”​—Rom. 8:31.

2. Mang e gad ra weliy ko re article ney?

² Gadad e tin riyul’ e Kristiano e dubdad ni ngaud lemnaged murung’agen Satan nge pi moonyan’ rok. Gad ma tedan’dad nga rogon ni gad be fil murung’agen Jehovah nge pigpig ni gad be tay ngak. (Ps. 25:5) Machane, ba t’uf ni ngad nanged rogon ni ma maruwel Satan. Mang fan? Ya nge yag ni ngad gelgad ngak. (2 Kor. 2:11) U lan e re article ney e gad ra weliy riy reb e kanawo’ ni ma fanay Satan nge pi moonyan’ rok ni ngar bannaged e girdi’. Ku gad ra weliy rogon nrayog ni ngad togopuluwgad ngorad.

3-4. (a) Mang ngongolen e pig? (b) Uw urngin e girdi’ ni ke mich ngongolen e pig u wan’rad?

³ Reb e kanawo’ nib ga’ ni ma fanay Satan nge pi moonyan’ rok ni ngar bannaged e girdi’ riy e aram e ngongol ko pig. Piin ni yad  ma un ko pig e yad ma yog ni bay boch ban’en ni yad manang ara rayog ni ngar k’aringed ni nge buch ndabiyog ni nge rin’ e yug girdi’. Bod ni, bay boch e girdi’ ni yad ma yog nrayog ni ngar nanged e tin ni bay nga m’on u daken e gathliy ara pi n’en ni bay u lan e lang. Ma boch e girdi’ e yad ma rin’ boch ban’en ni nge m’ug riy ni gowa yad be non ngak e piin ni kar m’ad. Ku boch e girdi’ e yad ma rin’ boch ban’en ni bay rogon nga ngongolen e moonyan’, maku yad ma guy rogon ni ngar piggad ngak be’ ni nge buch ban’en rok. *

⁴ Uw feni yoor e girdi’ ni ke mich ngongolen e pig u wan’rad? Nap’an ni kan fithfith boch e girdi’ u 18 e nam u Latin America nge boch e binaw u Caribbean, ma gonap’an taab guruy u dalip guruy ko girdi’ u rom e kan pirieg nib mich u wan’rad e pig, nge tin nib machmach ban’en. Kub chugur ni nge taareb urngin e girdi’ nib mich u wan’rad nrayog ni ngan non ngak e pi kan. Kan fithfith boch e girdi’ u lan 18 e nam u Africa, mab pag baley ko girdi’ riy e ka rogned nib mich u wan’rad e tin nib machmach ban’en. Machane demtrug e gin’en ni gad bay riy, ma thingar da ayuwgad u ngongolen e pig. Ya be guy Satan rogon ni nge bannag “e girdi’ nu fayleng ni polo’.”​—Rev. 12:9.

5. Uw rogon ngongolen e pig u wan’ Jehovah?

⁵ Jehovah e ir e “Got ko tin riyul’.” (Ps. 31:5, NW) Ere uw rogon ngongolen e pig u wan’? Ri ma fanenikay! I yog Jehovah ngak piyu Israel ni gaar: “Dab mu maligachniged pi fakmed u fithik’ e nifiy u daken e altar romed; ma dab mu paged e girdi’ romed ngar uned ko bey ara chib; ara ur motokangad; ara ra fanayed falayin e fal’egyan’ fa adag; ara pong thagith. Ya Somol ni Got romed e ba fanenikan e girdi’ ni ma ngongliy e mit ney e ngongol nib sonogor.” (Deut. 18:10-12, BT) Piin Kristiano e gathi ka yad bay u tan fare Motochiyel ni pi’ Jehovah ngak piyu Israel. Machane, gad manang ndawori thil Jehovah ma ka be fanenikay ngongolen e pig.​—Mal. 3:6.

6. (a) Uw rogon ni ma fanay Satan ngongolen e pig ni nge gafgownag e girdi’? (b) Mang e tin riyul’ u rarogon e piin ni kar m’ad nrogon ni be yog e Eklesiastes 9:5?

⁶ Be ginangdad Jehovah ndab da uned nga ngongolen e pig, ya manang ni ma fanay Satan e re ngongol ney ni nge gafgownag e girdi’. Ku ma fanay Satan ngongolen e pig ni nge wereg boch e ban ni bod rogon fare machib ni piin ni kar m’ad e ka bay ban’en u fithik’rad ndabi yim’ ni ma par u bang. (Mu beeg e Eklesiastes 9:5) Ku ma fanay Satan ngongolen e pig ni nge k’aring e marus ko girdi’ me palognagrad rok Jehovah. Be nameg ni piin ni yad ma pig e nge pagan’rad ko pi kan nib kireb ko bin ni nge pagan’rad ngak Jehovah.

7. Mang e ke yog Jehovah ngodad?

⁷ Kad weliyed faram ni ke yog Jehovah ngodad e tin nib t’uf ni ngad nanged ya nge dabi bannagdad Satan nge pi moonyan’ rok. Ngad weliyed boch e kanawo’ nrayog ni ngad togopuluwgad riy ngak Satan nge pi moonyan’ rok.

8. (a) Mang e bin th’abi fel’ e kanawo’ nrayog ni ngad togopuluwgad riy ko pi kan nib kireb? (b) Uw rogon ni be gagiyelnag e Psalm 146:4 e ban rok Satan u murung’agen e piin ni kar m’ad?

⁸ Mu beeg mag fal’eg i lemnag e Thin rok Got. Ireray e bin th’abi fel’ e kanawo’ nrayog ni ngad togopuluwgad riy ko pi ban ni be wereg e pi kan nib kireb. Thin rok Got e bod bangi sayden nib m’uth nrayog ni nge gagiyelnag e pi ban rok Satan. (Efe. 6:17) Bod ni, be tamilangnag e Thin rok Got nde riyul’ fare machib nrayog ko piin ni  kar m’ad ni ngar nonad ko piin ni kab fos. (Mu beeg e Psalm 146:4.) Ku be puguran ngodad ni kemus ni yigoo Jehovah e rayog ni nge yog ngodad e n’en nra buch boch nga m’on. (Isa. 45:21; 46:10) Ere faan gad ra beeg ma gad fal’eg i lemnag e Thin rok Got ni gubin ngiyal’, ma aram e rayog ni ngad siyeged ma gad fanenikay e pi ban ni baadag e pi kan nib kireb ni nge mich u wan’dad.

9. Mang boch ban’en ni yima rin’ ni bay rogon nga ngongolen e pig ni ngad siyeged?

⁹ Mu siyeg boch ban’en ni bay rogon nga ngongolen e pig. Bochan ni gadad e tin riyul’ e Kristiano, ma aram fan ndab da uned nga ngongolen e pig. Bod ni, dab darod ngak e pi sothuw ara da guyed rogon ni ngad nonad ngak e piin ni kar m’ad u yugu boch e kanawo’. Kad weliyed ko fare article ni ke yan ni ku darud uned i rin’ boch ban’en ni yima rin’ nib l’ag rogon ko yam’ ni bay rogon ko fare machib ni piin ni kar m’ad e ka bay ban’en u fithik’ i dowrad ndabi yim’. Ku darud fanayed e pi n’en ni bay u lan e lang ara da uned ko bey ni ngad guyed rogon ni ngad nanged e tin ra buch nga m’on. (Isa. 8:19) Gad manang ni pi ngongol ney e bay e riya’ riy ni bochan e faan gad ra un ngay, ma aram e gad be maruwel Satan nge pi moonyan’ rok u taabang.

10-11. (a) Mang e ke rin’ boch e girdi’ ko bin som’on e chibog u nap’an ni kar nanged e tin riyul’? (b) Mang fan nsusun e ngad folwokgad ko pi Kristiano ko bin som’on e chibog nrogon ni be yog e 1 Korinth 10:21, ma uw rogon ni ngad rin’ed e re n’ey?

¹⁰ Mu n’ag boch ban’en ni bay rom ni bay rogon ko pig. Immoy boch e girdi’ ko bin som’on e chibog ni yad ma par u Efesus ni ur uned nga ngongolen e pig. Machane nap’an nra nanged e tin riyul’, mar dugliyed ni ngar rin’ed ban’en nib papey. “Boor e piin ni yad ma pig nra kunuyed e babyor rorad nga taabang ngar urfiyed u p’eowchen urngin e girdi’.” (Acts 19:19) Pi cha’nem e kar dugliyed ni ngar togopuluwgad ko pi kan nib kireb. Pi babyor rorad ni bay rogon ko pig e rib tolang puluwon. Machane dar pied ngak yugu boch e girdi’ ara ra pied nchuway’, ya ra urfiyed ni gubin. Kab ga’ fan u wan’rad rogon ni ngar felfelan’naged Jehovah ko bin ni ngar lemnaged puluwon e yu ke babyor nem.

 ¹¹ Ere uw rogon ni ngad folwokgad rorad? Gad ba gonop ni faan gad ra n’ag boch ban’en ni bay rodad ni bay rogon ko pig. Re n’ey e ba muun ngay e bonod, ara boch ban’en ni ma fanay e girdi’ ni nge ayuwegrad ko pi kan nib kireb.​—Mu beeg e 1 Korinth 10:21.

12. Mang boch e deer ni ngad fithed gadad riy ni bay rogon ko tin ni gad ma chuweg e chalban rodad ngay?

¹² Mu fal’eg i yaliy e tin ni ga be chuweg e chalban rom ngay. Am fithem ni nge lungum: ‘Gu ma beeg yu ken e babyor ara boch e article ko Internet ni murung’agen ngongolen e moonyan’, fa? Uw rogon e musik ni gu ma motoyil ngay, nge kachido nge pi n’en ni gu ma yaliy u TV, nge video games ni gu ma fafel ngay? Gur, bay boch riy ni bay rogon nga ngongolen e pig? Bay yaan e vampire, nge zombies, ara yaan e kan riy, fa? Gur, pi n’ey e be dag ni pig, ara ngan bucheg waathan be’, ara ngan pig ngak be’ e kemus ni bogi ban’en ni yima rin’ ni ngan felfelan’ ngay ma dabi yib wenegan, fa?’ Riyul’ ni gathi gubin e yat ni ke tunguy be’ min ngongliy ni kachido e bay rogon ko pig. Nap’an ni ga be fal’eg i lemnag e tin ni ngam chuweg e chalban rom ngay, mag guy rogon ni ngam mel’eg e tin nra ayuwegem ni ngam siyeg e tin ma fanenikay Jehovah. Gad baadag ni ngad rin’ed e tin nrayog rodad ya nge par ‘ndariy ban’en ni be magawonnag lanin’dad’ ma gad ba fel’ u wan’ Got.​—Acts 24:16. *

13. Mang e thingar da siyeged ndab da rin’ed?

¹³ Dab mu un i weliy boch ban’en u murung’agen e pi kan nib kireb. Thingar da folwokgad ko n’en ni rin’ Jesus. (1 Pet. 2:21) U m’on ni yib Jesus nga fayleng, ma immoy u tharmiy ni boor ban’en ni manang u murung’agen Satan nge pi moonyan’ rok. Machane da i weliy murung’agen e tin ni ke rin’ e pi kan nib kireb nem. Ya baadag Jesus ni nge fil murung’agen Jehovah ko  girdi’, ma gathi nge weliy murung’agen Satan. Ere, rayog ni ngad folwokgad rok Jesus ni aram e dab ud weliyed boch ban’en u murung’agen e pi moonyan’. Ya ba fel’ ni nge m’ug ko thin rodad ni n’en ni bay u lanin’dad e ‘yu bugithin nib manigil’ ni aram e tin riyul’.​—Ps. 45:1, BT.

14-15. (a) Mang fan ndab da rusgad ko pi kan nib kireb? (b) Mang e mich riy ni ma ayuweg Jehovah e girdi’ rok e ngiyal’ ney?

¹⁴ Dab mu rus ko pi kan nib kireb. Gad be par u ba fayleng nib kireb, ere rayog ni nge buch boch ban’en nib kireb rodad. Bod nrayog ni nge maad’ad be’, ara yib e m’ar ngak, ara yim’ nib tomgin. Machane dab da lemnaged ni pi n’ey ni ma buch ko girdi’ e pi kan nib kireb e ma k’aring. Be weliy e Bible nrayog ni nge buch ban’en rok be’ nib kireb “ndan lemnag.” (Ekl. 9:11, NW) Ke dag Jehovah ni kab gel gelngin ngak e pi kan nib kireb. Bod nde pag Satan ni nge li’ Job nge yim’. (Job 2:6) Ma nap’an Moses, me dag ni kab gel gelngin ngak e piin ma pig u Egypt. (Ex. 8:18; 9:11) Ki dag Jesus ni kab gel gelngin ngak Satan nge pi kan nib kireb u nap’an ni yin’rad u tharmiy ngaray nga fayleng. Ma gad manang ni Jehovah e ir e pi’ gelngin Jesus ni nge rin’ e re n’ey. Dabki n’uw nap’an ma ra nin’ Satan nge pi kan nib kireb nga lan fare low nib toar ndabkiyog ni ngar gafgownaged e girdi’.​—Rev. 12:9; 20:2, 3.

¹⁵ Boor e mich riy ni gad be guy ni be ayuweg Jehovah e girdi’ rok e ngiyal’ ney. Am lemnag e re n’ey: Gad be machib ma gad be fil e tin riyul’ ko girdi’ u ga’ngin yang e fayleng. (Matt. 28:19, 20) Bochan e re n’ey ma ke yag ni nge gagiyel e pi ngongol nib kireb ni be rin’ Moonyan’. Riyul’ ni faan manga rayog rok Satan ni nge talegdad ni nge dab kud ululgad i rin’ e re maruwel ney, ma ra rin’. Machane dabiyog rok ni nge rin’ e re n’ey. Ere de t’uf ni ngad rusgad ko pi kan nib kireb. Gad manang ni Jehovah e “ma fal’eg i yaliy e re fayleng ney ni ga’ngin, ni nge pi’ gelngin e piin yad ba yul’yul’ ngak u gum’ircha’rad.” (2 Kron. 16:9, BT) Ere faanra gad ba yul’yul’ ngak Jehovah, ma aram e dabiyog ko pi kan nib kireb ni ngar gafgownaged gadad ndariy n’umngin nap’an.

16-17. Mu weliy e n’en ni buch ni be dag nib t’uf ndab da rusgad ya nge yag ni ngad togopuluwgad ngak e pi kan nib kireb.

¹⁶ Ba t’uf ndab da rusgad ya nge yag nda togopuluwgad ko pi kan nib kireb, nib ga’ nu nap’an  nra togopuluw e pi fager nge girdi’ rodad ngodad ya yad be lemnag ni bay ban’en nib kireb nra buch rodad ni faanra dab da uned ngorad ko tin ni yad be rin’. Machane ma tow’athnag Jehovah e piin ndarur rusgad. Am lemnag e n’en ni buch rok Erica, nreb e walag ni ma par u Ghana. Nap’an ni gaman 21 e duw rok, me adag ni ngan fil e Bible ngak. Bochan ni chitamangin Erica e be’ ni ma pig, ma aram fan ni un lemnag ni nge un i rin’ boch ban’en ni bay rogon ko pig nib muun ngay ni nge kay ufin e gamanman ni kan ognag ko pi got rok e chitamangin. Ere nap’an ni siyeg Erica ndabi kay e pi ggan nem, ma aram me lemnag chon e tabinaw rok ni be darifannag e pi got rorad. Ra lemnaged nra gechignagrad e pi got rorad ni aram e nge yib e m’ar ngorad.

¹⁷ Ere chon e tabinaw rok Erica e ra guyed rogon ni ngar towasariyed ni nge un ngorad ko tin ni yad be rin’, machane de fol rorad ni yugu aram rogon ni manang nrayog ni ngan chuweg u tabinaw. Machane bay boch e walag u lan e ulung nrogned ngak nrayog ni nge par rorad. Ere ke tow’athnag Jehovah Erica, ya yag ni nge par u reb e tabinaw nib taareb e michan’ rorad, mar manged pi walagen ni pumoon nge ppin. (Mark 10:29, 30) Yugu aram rogon nni chuweg u tabinaw, min urfiy e chugum rok, machane ka be par nib yul’yul’ ngak Jehovah me un ko taufe. Chiney e be pigpig ni ir reb e regular pioneer. Der ma rus ko pi kan nib kireb. I weliy murung’agen chon e tabinaw rok ni gaar: “Gu ma yibilay chon e tabinaw rog ni gubin e rran ya nge yag nra nanged Jehovah me yag fare puf rogon ngorad ni ke yag ngak e piin ni yad be pigpig ngak e Got rodad ni ma t’ufegey.”

18. Mang e tow’ath nra yag ngodad ni faanra pagan’dad ngak Jehovah?

¹⁸ Gathi gad gubin ni gad ra mada’nag e skeng ni aray rogon. Machane, gad gubin nib t’uf ni ngad togopuluwgad ko pi kan nib kireb, me pagan’dad ngak Jehovah. Gad ra rin’ ni aray rogon, ma boor e tow’ath nra yib ngodad, ma dabiyog ni nge bannagdad Satan. Maku reb e ra ayuwegdad ndab kud rusgad ko pi moonyan’. Bin th’abi ga’ fan riy e ra gel e tha’ u thildad Jehovah. Aram fan ni yoloy James nreb i gachalpen Jesus ni gaar: “Mpied gimed nga pa’ Got ngam paged famed ngak. Mi gimed togopluw ngak fare moonyan’, me mil romed. Mu chugurgad ngak Got, me chugur ngomed.”​—Jas. 4:7, 8.