1-2. (a) Mang boch e kanawo’ ni ke bannag Satan e girdi’ riy? (b) Mang e gad ra weliy ko re article ney?

SATAN ni ir e “chitamangin urngin e malulifith” e ke bannag e girdi’ ni tabab u nap’an Adam nge Efa. (John 8:44) Boch ko pi ban rok nem e ba muun ngay boch e machib nde riyul’ u murung’agen e yam’ nge n’en ni ma buch u tomuren ni ke yim’ be’. Boor ban’en ni yima rin’ nib l’ag rogon ko pi machib nde riyul’ u murung’agen e yam’ ni ke yib rok Satan. Ere bochan e re n’ey ma boor e pi walag ni yad be athamgil ni ngaur “pired” nib mudugil e michan’ rorad u nap’an ni ke yim’ reb i girdien e tabinaw rorad ara be’ ko gin ni yad ma par riy.​—Jude 3.

² Faanra ireray e magawon ni ka ga be mada’nag, ma mang e ra ayuwegem ni ngam par ni gab mudugil mag fol ko n’en ni be fil e Bible u murung’agen e yam’? (Efe. 6:11) Uw rogon ni ngam fal’eg laniyan’ mag pi’ e athamgil ngak reb e walag ni Kristiano ni yibe towasariy ni nge un nga boch ban’en nde m’agan’ Got ngay? Re article ney e ra weliy rogon e fonow ni ma pi’ Jehovah ni nge pow’iydad. Machane som’on e ngad weliyed e n’en ni be yog e Bible u murung’agen e yam’.

3. Mang wenegan e bin som’on e ban?

³ De lemnag Got ni nga i yim’ e girdi’. Machane faanra nge yag ni nge par Adam nge Efa ni manemus, ma thingar ra folgow rok Jehovah. I tay chilen ni gaar: “Ke mus ni fare ke gek’iy ni ma tamilangnag an’uy ko tin nib fel’ nge tin nib kireb e dab mu koy. Thingar dab mu koy wom’engin. Ya rofen ni ga ra kay e ga ra yim’.” (Gen. 2:16, 17) Ma nga tomuren e re n’ey me k’aring Satan e magawon. I non u l’ugun ba porchoyog ngak Efa ni gaar: “De riyul’ e re bugithin nir; ya gathi gimew ra yim’.” Ba gel e kireban’ riy ya mich u wan’ Efa e re ban nem, ma aram me kay wom’engin fare ke gek’iy. Ma nga tomuren miki un figirngin ngak i kay wom’engin fare ke gek’iy. (Gen. 3:4, 6) Ere ireray  kanawoen ni ke af e denen nge yam’ ngak e girdi’.​—Rom. 5:12.

4-5. Uw rogon ni ka be ulul Satan i bannag e girdi’?

⁴ Ke yim’ Adam nge Efa nrogon ni ke yog Got nra buch. Machane ka de tal Satan i bannag e girdi’ u murung’agen e yam’. Boch nga tomuren miki tabab ni ngki weliy yugu boch e ban. Reb ko pi ban ney e fare machib u murung’agen nra yim’ be’ ma ka bay ban’en rok ndabi yim’ nra yan ko giyow ko kan. Ba thilthil rogon ni yima weliy rogon e re ban ney ni kab kakrom i yib ke mada’ ko chiney.​—1 Tim. 4:1.

⁵ Mang fan ni ke mich u wan’ boor e girdi’ e pi ban rok Satan? Manang Satan rogon e n’en ni gad ma rin’ u nap’an ni ke yim’ be’, ere ma fanay e re n’ey ni nge bannagdad. Bochan ni kan sunmiydad ni ngad pared ni manemus, ma aram fan ni dubdad ni ngad m’ad. Gad ma sap ko yam’ ni ir e toogor rodad.​—1 Kor. 15:26.

6-7. (a) Gur, ke yag rok Satan ni nge mithag e tin riyul’ u murung’agen e yam’? Mu weliy rogon. (b) Uw rogon ni be ayuwegdad e tin riyul’ u Bible ni nge dab da rusgad ko piin ni kar m’ad?

⁶ Yugu aram rogon ni be gay Satan rogon ni nge bannag e girdi’, machane der yag ni nge mithag e tin riyul’ u murung’agen e yam’. Bin riyul’ riy e, ke yoor e girdi’ e chiney ni ke nang maku yad be weliy e n’en ni be fil e Bible u murung’agen rarogon e piin ni kar m’ad nge athap rorad. (Ekl. 9:5, 10; Acts 24:15) Ere pi n’ey e ma fal’eg lanin’dad me ayuwegdad ni nge dab da rusgad ara maruwaran’dad ko n’en ni ma buch rok e piin ni kar m’ad. Bod ndarud rusgad ngorad ara da rusgad nri chey me buch ban’en nib kireb rorad. Gad manang ni gathi ka yad ba fos ma dabiyog ni ngar gafgownaged be’, ya bod ni yad be mol. (John 11:11-14) Ku gad manang ni piin ni kar m’ad e dar nanged ni be yan e tayim u dakenrad. Ere nap’an nra taw ngal’an ni ngan faseg e yam’, ma mus ngak e piin ni kar m’ad ni ke yan bokum e chibog e yad ra lemnag nde n’uw nap’an ni kar m’ad.

⁷ Tin riyul’ u rarogon e piin ni kar m’ad e ba tamilang, mab mom ni ngan nang fan, mab puluw e thin riy. Re n’ey e ba thil ko pi ban rok Satan ni ma athukuy lanin’uy! Pi ban nem e gathi kemus ni be bannag e girdi’ ya ku be gathibthibnag e En Tasunmiy. Ere faanra nge tamilang u wan’dad gelngin e gafgow ni be k’aring Satan, ma baaray dalip e deer ni ngad weliyed e fulweg riy: Uw rogon ni be fanay Satan e pi ban rok ni nge gathibthibnag Jehovah? Uw rogon ni pi n’ey e be k’aring e girdi’ ni ngar lemnaged ndariy fan ni nge mich u wan’rad fare biyul ni ke pi’ Kristus? Ma uw rogon ni be gelnag e kireban’ nge gafgow ko girdi’?

8. Uw rogon ni be fanay Satan e pi ban rok ni nge gathibthibnag Jehovah nrogon ni kan tamilangnag ko Jeremiah 19:5?

⁸ Pi ban rok Satan u murung’agen e piin ni kar  m’ad e be gathibthibnag Jehovah. Pi ban ney e ba muun ngay fare machib ni murung’agen e infierno. Re machib ney e be gathibthibnag Got! Ni uw rogon? Be k’aring e girdi’ ni nge mich u wan’rad ni fare Got ko t’ufeg e taareb rogorow Satan ni ir be’ nib kireb. (1 John 4:16) Ere uw rogon e re n’ey u wan’um? Bin th’abi ga’ fan riy e, uw rogon u wan’ Jehovah? Ya gad manang ndabun e ngongol nib kireb.​—Mu beeg e Jeremiah 19:5.

9. Uw rogon ni be k’aring e pi ban rok Satan e girdi’ ni ngar lemnaged ndariy fan ni nge mich u wan’uy fare biyul ni ke pi’ Kristus ni bay murung’agen ko John 3:16 nge 15:13?

⁹ Pi ban rok Satan u murung’agen e piin ni kar m’ad e be k’aring e girdi’ ni ngar lemnaged ndariy fan ni nge mich u wan’uy fare biyul ni ke pi’ Kristus. (Matt. 20:28) Reb e ban’en ni ku ma fanay Satan e aram fare machib nnap’an nra yim’ be’ ma bay e yaal rok ndabi yim’. Faanra riyul’ e re machib ney, me ere gubin e girdi’ ni yad ra par ni manemus. Maku reb e, ra yan i aw nde t’uf ni nge pi’ Kristus e yafos rok ni biyul ni fan ngodad. Dab mu pagtalin ni fare maligach ni pi’ Kristus e aram e bin th’abi fel’ e kanawo’ ni kan dag e t’ufeg riy ngodad. (Mu beeg e John 3:16; 15:13.) Am lemnag rogon laniyan’ Jehovah nge Jesus ko pi machib ney ni be darifannag e re tow’ath ney nrib manigil!

10. Uw rogon ni be gelnag e pi ban rok Satan e kireban’ nge gafgow ko girdi’?

¹⁰ Pi ban rok Satan e be gelnag e kireban’ nge gafgow ko girdi’. Piin gallabthir ni ke kireban’rad ya ke yim’ reb i fakrad e rayog ni ka nog ngorad ni ke fek Got fare tir nga tharmiy ni nge mang reb e engel. Ere gur, re ban rok Satan ney e be warnag fa be yin’ daken e kireban’ rorad? Fare machib ni googsur ni murung’agen e infierno e yima fanay ni ngan micheg nib puluw ni ngan gafgownag be’ nib muun ngay ni ngan urfiy be’ u daken baley i gek’iy ni ke togopuluw ko machib ko galesiya. Be yog ba ken e babyor ni bay reb e tafen e puf oloboch ni ka nog e Spanish Inquisition ngay ni bay boch e girdi’ riy nib mich u wan’rad nre gafgow ney ni yad ma tay ko girdi’ e yibe “dag ngorad rogon e n’en nra buch rorad u infierno” ni bochan e yad be togopuluw ko machib ko galesiya. Re n’ey e ra ayuwegrad ni ngar kalgadngan’rad u m’on ni ngar m’ad ya nge yag ndab ranod nga infierno. Boor e girdi’ u yugu boch e nam e yad ma lemnag nib milfan ngorad ni ngar liyorgad ngak e pi ga’ rorad ni kar m’ad mi yad tayfarad mar guyed rogon ni ngar fel’gad u wan’rad. Ku bay boch i yad ni baadag ni nge felfelan’nag e pi ga’ rorad ya nge dabin gafgownagrad. Ba gel e kireban’ riy ya pi machib rok Satan ney e der ma fal’eg lanin’uy. Ya bin riyul’ riy e ma k’aring e magafan’ nge marus ngak e girdi’.

11. Uw rogon nrayog ni nge towasariydad e girdi’ rodad ara pi fager rodad ni ngad rin’ed ban’en nib togopuluw ko Thin rok Got?

¹¹ T’ufeg rodad ngak Jehovah Got nge Thin rok e ra pi’ gelngidad ni ngad folgad rok ngki mada’ ko ngiyal’ ni be towasariydad e girdi’ rodad ara pi fager rodad ni ngad uned nga boch ban’en ni yima rin’ nib l’ag rogon ko yam’ nde puluw ko Bible. Bod nrayog ni nga rogned nde t’uf facha’ ni ke yim’ rodad ara darud ted fan ya ngar k’aringed e tamra’ ngodad. Fa reb e rayog ni nga rogned ni n’en ni gad be rin’ e ra k’aring facha’ ni ke yim’ ni nge sul nga i gafgownag e piin ni ka yad ba fos. Ere uw rogon ni ngad pared ni gad ba mudugil ma gad fol ko tin riyul’ u Bible? Mu lemnag rogon nrayog ni ngam fol ko pi kenggin e motochiyel u Bible ni baaray.

12. Mang boch ban’en ni yima rin’ ko yam’ nde puluw ko Bible?

¹² Mu dugliy ni ‘ngam pithigem’ ko machib nge pi n’en ni yima rin’ nde puluw ko Bible. (2 Kor. 6:17) Bay reb e nam u lan e Caribbean ni boor e girdi’ riy nib mich u wan’rad nu tomuren nra yim’ be’, ma ra magey “yaan” ni nge gafgownag e piin ni ur gafgownaged u nap’an ni kab fos. Be yog reb e babyor nrayog ni nge sul “yaan” facha’ nga i “gafgownag e girdi’ u lan reb e binaw.” Bang ko yalen u Africa ni ngan upunguy gubin e therek u lan e naun rok be’ ni ke yim’ min sapeg e sasing ko rungrung. Yima rin’ e re n’ey ni bochan e bay boch e girdi’ ni ma yog ni piin ni kar m’ad e yad ra sul ma thingar dab ra guyed yaarad! Ere gadad e pi tapigpig rok Jehovah e  der mich u wan’dad e pi machib ni bay rogon ko pi ban rok Satan ara da uned i rin’ boch ban’en ni bay rogon ngay!​—1 Kor. 10:21, 22.

13. Faanra be maruwar u wan’um boch ban’en ni yima rin’ nib l’ag rogon ko yam’, ma mang e ngam rin’ nrogon ni be yog e James 1:5?

¹³ Faanra be maruwar u wan’um boch ban’en ni yima rin’ nib l’ag rogon ko yam’, ma ngam meybil ngak Jehovah ngam ning e gonop ngak. (Mu beeg e James 1:5.) Mu fal’eg i gay murung’agen e re n’ey u lan e pi babyor rodad nib puluw ko Bible. Ma faanra kab t’uf ni ngam nang boch ban’en riy, mag yan mu guy e piin piilal u lan e ulung rom. Dab rogned ko mang e ngam rin’, machane rayog ni ngar ayuweged gur ni ngam pirieg boch i kenggin e motochiyel u Bible nra ayuwegem ni bod e tin ni kan weliy u roy. Ere nap’an ni ga ra rin’ e pi n’ey, ma aram e ga be fil rogon ni ngam ‘nang’ e n’en nib thil ko “tin nib fel’” nge “tin nib kireb.”​—Heb. 5:14.

14. Mang boch e kanawo’ ni nge dab da magawonnaged e nangan’ rok yugu boch e girdi’ riy?

¹⁴ “Urngin [ban’en] ni ngam rin’ed ni fan e nga nog e sorok riy ngak Got. Um ngongolgad ni gimed be guy rogon ndab mu magawonniged laniyan’ e girdi’.” (1 Kor. 10:31, 32) Nap’an ni ngad dugliyed ko ngad uned nga boch ban’en ni yima rin’, ma susun ni ngkud lemnaged ko mang e ra rin’ e re n’ey ko nangan’ rok e girdi’ nib ga’ ni pi walag ni Kristiano. Dubdad ni ngad magawonnaged e nangan’ rok be’! (Mark 9:42) Maku reb e, gad baadag ndab da rin’ed ara dogned ban’en nra kirebnag laniyan’ e piin ni gathi yad boch e Pi Mich Rok Jehovah. T’ufeg e aram e n’en nra ayuwegdad ni ngad nonad ngorad u fithik’ e tayfan, ma gad pining e sorok ngak Jehovah. Susun ndab da luaged e girdi’ e thin ara da gathibthibnaged e tin ni yad ma rin’. Dab mu pagtalin ni t’ufeg e ban’en nib gel gelngin! Faan gad ra dag ni gad be lemnag rarogon e girdi’ ma gad be tayfarad u fithik’ e t’ufeg, ma aram e rayog ni nge munguy laniyan’ e piin ni be togopuluw ngodad.

15-16. (a) Mang fan nib fel’ ni nga dogned ko girdi’ e n’en nib mich u wan’dad? Mu weliy ban’en ni ke buch. (b) Uw rogon nib puluw e thin rok Paul ko Roma 1:16 ngodad e ngiyal’ ney?

¹⁵ Mu guy rogon ni nge nang e girdi’ ko gin ni ga be par riy ni gur reb e Pi Mich Rok Jehovah. (Isa. 43:10) Faanra yim’ reb i girdien e tabinaw rom, ma rayog ni nge damumuw e girdi’ rom ara piin buguli yoror rom ni faanra dab mu un ngorad ko n’en ni yad be rin’ ni fan ko fare yam’. Machane faan ga ra weliy e michan’ rom ngorad u m’on riy, ma rayog ni nge mom ngom ni ngam par ni gab yul’yul’. Francisco ni ma par u Mozambique e yoloy ni gaar: “Nap’an nug filew Carolina ni ppin rog e tin riyul’, ma aram mu gognew ngak girdien e tabinaw romow ni aram e dab kug tew fan e piin ni kar m’ad. Ere nap’an ni yim’ walagen Carolina nib pin, ma aram e n’en ni skengnag e n’en ni kug dugliyew. Rogon e  n’en ni yima rin’ ko yam’ ko gin ni gamow ma par riy e faanra yim’ be’ ma ngan maluknag u nap’an ni yibe tay reb e madnom nib l’ag rogon ko teliw. Ma nga tomuren ma en nrib chugur ngak e thingari mol ni dalip e rran ko gin ni kan puog fapi ran ni un maluknag fare yam’ ngay. Fan ni yima rin’ e pi n’ey e nge fal’eg laniyan’ e yaal ko fare yam’. Ere lemnag e tabinaw rok Carolina ni ir e nge yan i mol ko gin ni kan puog fapi ran ni kan maluknag fare yam’ riy.”

¹⁶ Ere mang e rin’ Francisco nge ppin rok? Ke weliy Francisco ni gaar: “Bochan e ba t’uf Jehovah romow ma gamow baadag ni nggu felfelan’nagew, ma aram mug siyegew ni nggu unew ko pi n’em ni yibe rin’. Kari damumuw chon e tabinaw rok Carolina ngomow. Ka rogned ni gamow be darifannag fare yam’ ma dab kur bad ra guyed ara ra ayuweged gamow. Ere bochan ni kug weliyew e michan’ romow u m’on riy, ma aram fan nde t’uf ni ngkug weliyew ngorad bayay ko ngiyal’ nem ni kar damumuwgad. Bay boch e girdi’ romow nrogned nib puluw e n’en ni kug rin’ew ni bochan e kug mu’gow i weliy e n’en nib mich u wan’mow. Ere munmun me aw e damumuw ko girdi’ rok Carolina ma aram me yag ni nge aw e gapas u thilmad. Bin riyul’ riy e, bay boch i yad ni yib nga tabinaw romow ni ngar ninged boch e babyor nib puluw e thin riy ko Bible.” Ere dariy ba ngiyal’ ni ngad tamra’gad ni ngad pared ni gad ba mudugil ma gad fol ko tin riyul’ ni be weliy e Bible u rogon e yam’.​—Mu beeg e Roma 1:16.

17. Mang e ra ayuwegdad ni ngad manged e bin riyul’ e fager ngak reb i walagdad ni Kristiano ni ke yim’ be’ nib t’uf rok?

¹⁷ Nap’an nra yim’ be’ nib t’uf rok reb i walagdad ni Kristiano, ma thingar da rin’ed e tin rayog rodad ni ngad manged e “bin riyul’ e fager” ni ‘bod e walag ko ngiyal’ ni ke yib e gafgow’ ngak. (Prov. 17:17, NW) Ere uw rogon ni ngad manged e “bin riyul’ e fager” ngak reb e walag ni ke kireban’ ya ke yim’ be’ nib t’uf rok ma yibe towasariy ni nge un nga boch ban’en nde puluw ko Bible? Am lemnag l’agruw i kenggin e motochiyel u Bible nra ayuwegdad ni ngad fal’eged laniyan’ e piin ni ke kireban’rad.

18. Mang fan ni yor Jesus, ma mang e gad ra fil ko n’en ni rin’?

¹⁸ “[Mu] un ko meyor ngak e piin ni yad be yor.” (Rom. 12:15) Rayog ni nge mo’maw’ ngodad ni ngad nanged e n’en ni nga dogned ngak be’ ni ke kireban’ ya ke yim’ be’ nib t’uf rok. Yugu aram rogon ndad nanged ko mang e nga dogned ngak, machane faanra guy ni gad be yor ma ra nang ni gad be lemnag. Nap’an ni yim’ Lazarus ni fager rok Jesus  me yor Maria nge Martha nge ku boch e girdi’ ni bochan e ba t’uf Lazarus rorad. Me yan i bin aningeg e rran ngay me taw Jesus ngaram, miki un ngorad ko ‘meyor’ ni yugu aram rogon ni manang ni bayi faseg Lazarus ko yam’. (John 11:17, 33-35) Meyor ni tay Jesus e ku be dag rogon e kireban’ ni tay Jehovah u nap’an ni yim’ Lazarus. Nap’an ni guy e tabinaw rok Lazarus ni ke yor Jesus mar nanged ni ku yad ba t’uf rok, ma re n’ey e ba mudugil ni fal’eg laniyan’ Maria nge Martha. Ere ku taareb rogon nnap’an nra nang e pi walag ni yad ba t’uf rodad ma gad be lemnagrad, ma aram e yad ra nang ni magawon ni ke yib ngorad e gathi yigoo yad e yad be yan u fithik’, ya ku bay e pi fager rorad ni be lemnagrad.

19. Uw rogon ni ngad folgad ko fare thin ko Eklesiastes 3:7 u nap’an ni ngad fal’eged laniyan’ reb e walag ni Kristiano ni ke yim’ be’ nib t’uf rok?

¹⁹ “[Bay] ngal’an ni ngan th’ab gulungey nge ngal’an ni ngan welthin.” (Ekl. 3:7) Ku reb e kanawo’ ni ngam fal’eg laniyan’ reb e walag ni Kristiano ni ke yim’ be’ nib t’uf rok e ngam motoyil ngak nib fel’ rogon. Mu pag ni nge weliy e n’en ni bay u laniyan’ ma dabi aw nga lanin’um e “thin” ni be yog nde puluw. (Job 6:2, 3, BT) Ya rayog ni ke mochuch ni bochan e towasar ni be yib ko girdi’ rok ni gathi yad boch e Pi Mich Rok Jehovah. Ere mmeybilgow u taabang mag wenig ngak e En ni ma rung’ag e “meybil” ni nge pi’ gelngin facha’ me tamilangnag laniyan’. (Ps. 65:2) Faanra rayog mi gimew beeg e Bible u taabang. Fa reb e mu beegew reb e article u lan e pi babyor rodad nib puluw e thin riy ko Bible ni bay murung’agen be’ riy nrayog ni nge pi’ e athamgil nga laniyan’.

20. Mang e gad ra weliy ko bin migid e article?

²⁰ Ri gad ba felfelan’ ni kad nanged e tin riyul’ u murung’agen e piin ni kar m’ad nge athap rorad boch nga m’on! (John 5:28, 29) Ere ngad daged ko thin nge ngongol rodad ndarud rusgad ni ngad pared ni gad ba mudugil ma gad be fol ko tin riyul’ u Bible, ma nap’an nra mab e kanawo’ ngodad ma ngad weliyed e pi n’em ngak e girdi’. Bin migid e article e gad ra weliy riy murung’agen e pig ni aram reb e kanawo’ ni ku ma fanay Satan ni nge taleg e girdi’ ndab ra nanged e tin riyul’. Gad ra weliy fan nib t’uf ni ngad paloggad u boch ban’en ni yima rin’ nib kireb nge boch ban’en ni yima chuweg e chalban ngay nib l’ag rogon ko pig.