BAY reb e maruwel ni ga baadag ni ngam rin’ u lan e ulung, machane dabiyog ni ngam rin’ e chiney, fa? Sana rayog ni be rin’ be’ e re maruwel nem, fa aram reb e maruwel ni um rin’ kafram. Machane bochan ni kam pilibthir, ara kam m’ar, ara ga be magawon ko salpiy, ara bay boch ban’en nib milfan ngom ni ngam rin’ u lan e tabinaw rom, ma aram fan ndabkiyog ni ngam rin’ e re maruwel nem. Fa reb e bochan boch ban’en ni be thilthil u lan e ulung ma ke t’uf ni ngam tal i rin’ boch e maruwel ni ke n’uw nap’an ni ga be rin’. Demtrug fan ndabkiyog ni ngam rin’ e re maruwel ney, machane sana rayog ni ga be lemnag nda mur rin’ gubin ban’en ni ga baadag ni ngam rin’ ni fan ko pigpig rom ngak Got. Ra buch ban’en ni aray rogon ma dariy e maruwar riy ni bay tapgin ni nge kireban’um yu ngiyal’. Machane mang e ra ayuwegem ni nge dabi kireban’um, ara mu damumuw, fa aw e pi n’em nga lanin’um? Ma uw rogon nrayog ni ngam par ni gab felfelan’?

Rayog ni ngad filed ban’en u rogon ni ngad pared ni gad ba felfelan’ ko n’en ni rin’ John ni Tataufe. Boor e maruwel nib manigil ni i rin’ John u fithik’ e felfelan’, machane ba mudugil nib thil rogon ni lemnag e pigpig nra tay ngak Jehovah ko n’en ni buch rok. Rayog nde lemnag ni kab n’uw nap’an nra par u kalbus nga n’umngin nap’an e machib nra tay. Yugu aram rogon, ma i par John nib felfelan’ maku aram rogon e lem rok u n’umngin nap’an e yafos rok. Mang e n’en ni ayuweg? Ma uw rogon ni ngad pared ni gad ba felfelan’ ngki mada’ ko ngiyal’ ni ke buch boch ban’en nra k’aring e kireban’ ngodad?

Nap’an e duw ni 29 C.E., me tababnag John fare maruwel ni ke pi’ Jehovah ngak ni aram e nge ayuweg e girdi’ ngar nanged murung’agen fare Messiah u m’on ni nge yib. I gaar: “Mpied keru’med ko denen ni gimed be rin’, ya gagiyeg nu tharmiy e ke chugur!” (Matt. 3:2; Luke 1:12-17) Boor e girdi’ nra motoyilgad. Bin riyul’ riy e, boor e girdi’ nra milekaggad nib n’uw yang ni bochan e ngar rung’aged e n’en ni be machibnag. Maku boor i yad e taw e pi thin nem nga gum’ircha’rad, ma aram e n’en ni k’aringrad ni ngar kalgadngan’rad ko kireb rorad mi yad un ko taufe. De rus John ni nge ginang e pi tayugang’ ko teliw ni yad be lemnag ni yad ba mat’aw u murung’agen e gechig ni yira tay ngorad ni faanra dab ra thilgad. (Matt. 3:5-12) Nap’an ni taufenag John Jesus ko duw ni 29 C.E., ma aram e ke rin’ e n’en nth’abi ga’ fan nthingari rin’ ko machib ni i tay. Ka aram nap’an ni i pow’iy e girdi’ ni ngar leked Jesus ni ir fare Messiah ni kan micheg.​—John 1:32-37.

Bochan ni yugu ba thil e maruwel rok John, ma aram fan ni gaar Jesus: “John ni i taufe e ba ga’ ngak urngin  e girdi’ ni kar pired u roy u fayleng.” (Matt. 11:11) Ba mudugil nib felfelan’ John ko tow’ath ni yag ngak. Boor e girdi’ e ngiyal’ ney ni ke pi Got boor e tow’ath ngorad ni bod rogon John. Bagayad e pi cha’ney e reb e walag ni pumoon ni ka nog Terry ngak. Ke pag 50 e duw ni kar pigpiggow e ppin rok ni ka nog Sandra ngak u polo’ e tayim rorow. I gaar Terry: “Boor e tow’ath ni ke yag ngog. Kafram e ug pioneer, maku bay ba ngiyal’ ni ug pigpig u Bethel, mu kug mang reb e special pioneer, mu ug lekag e ulung, me boch nga tomuren mug mang reb e district overseer, ma aram e chiney e kug sul bayay kug mang reb e special pioneer.” Gad ma felfelan’ u nap’an nra yag reb e maruwel ni ngad rin’ed ni fan ko pigpig rodad ngak Jehovah. Machane gad ra fil ko n’en ni buch rok John ni faanra ngad pared ni gad ba felfelan’, ma aram e ba t’uf ni ngad athamgilgad u nap’an nra thil rogon e par rodad.

I par John ni Tataufe nib felfelan’ ni bochan e ba ga’ fan u wan’ e tow’ath ni ke yag ngak. Am lemnag reb e ban’en ni buch. Tomuren nni taufenag Jesus me lich e girdi’ ni ur leked John me yoor e tin ni be lek Jesus. I magafan’ pi gachalpen John, ma aram mi yad gaar ngak: “Chiney e aram e be taufe, ma gubin e girdi’ ni be yan ngak!” (John 3:26) Me fulweg John ni gaar: “Re moon ni nge mabgol e aram e cha’ nib mil suwon ngak e re pin ni nge leay; ma re moon ni fager rok fare moon ni ir e nge mabgol e ba sak’iy u tooben ni be motoyil, ma ra rung’ag laman fare moon ni nge mabgol me felfelan’. Erera’ rogon e felfelan’ rog ni ke yan i aw nga rogon.” (John 3:29) De tagenging John ngak Jesus, ara lemnag nde ga’ fan e maruwel rok ni bochan e kab ga’ fan e maruwel ni be rin’ Jesus. N’en ni rin’ e ulul nga i par nib felfelan’ ni bochan e ba ga’ fan e maruwel rok u wan’ ni ir fare “moon ni fager rok fare moon ni ir e nge mabgol.”

Rogon ni ma lemnag John boch ban’en e aram e n’en ni ayuweg ni nge par nib felfelan’ ni yugu aram rogon nde mom e maruwel rok. Bod nnap’an nni gargeleg John me mang reb e Nazarite, ere aram fan ndabiyog ni nge unum e wain. (Luke 1:15) I weliy Jesus rogon feni mom e par ku John ni gaar: “I par yu ngiyal’ ni ke pag e abich ma da i unum e wain.” Machane Jesus nge pi gachalpen e gathi yad boch e Nazarite, ere de t’uf ni ngar taleged yad u boch ban’en, maku rayog ni ngar pared ni bod rogon e tin ni ka bay e girdi’. (Matt. 11:18, 19) Maku reb e, yugu aram rogon nde ngongliy John e maang’ang, machane manang ni kan pi’ gelngin pi gachalpen Jesus ni ngar ngongliyed e maang’ang ni kub muun ngay boch e girdi’ ni ur moyed ni yad pi gachalpen. (Matt. 10:1; John 10:41) Yugu aram rogon me ulul John ni nge rin’ e maruwel ni ke pi’ Jehovah ngak u fithik’ e pasig ko bin ni nge pag e pi n’ey ni nge magawonnag laniyan’.

Faanra ba ga’ fan u wan’dad e maruwel ni gad be rin’ e chiney ni fan ko pigpig rodad ngak Jehovah, ma aram e rayog ni ngad pared ni gad ba felfelan’. Terry ni kad weliyed murung’agen boch kafram e gaar: “Ug tiyan’ug nga gubin e maruwel ni un pi’ ngog.” Nap’an ni sul nge lemnag e pi duw ni i pigpig riy u polo’ e tayim rok, ma aram me gaar: “Dariy ban’en ni kug kalngan’ug riy, ma da gur pagtalin e pi n’en ni buch rog nrib manigil.”

Rayog ni ngki gel e felfelan’ rodad ni faan gad ra lemnag fan nib ga’ fan reb e maruwel ni gad be rin’, ara ban’en nib milfan ngodad ni ngad rin’ed ni fan ko pigpig rodad ngak Jehovah. Re n’ey e bochan ni gad be maruwel “Got u taabang.” (1 Kor. 3:9) Ban’en nib tolang puluwon e rayog ni nge par nib fel’ yaan ni faanra gubin ngiyal’ ni gad be ayuweg. Ere ku arrogodad nrayog ni ngad pared ni gad ba felfelan’ ni faanra gubin ngiyal’ ni gad ma lemnag feni ga’ fan e maruwel ni gad ma tay Jehovah u taabang. Re n’ey e ra ayuwegdad ni nge dab ud taareb rogonnaged e athamgil ni gad be tay ko athamgil ni be tay yugu boch e girdi’. Ku ra ayuwegdad ni nge dab da lemnaged ni maruwel ni ke pi’ Jehovah ni ngad rin’ed e de ga’ fan ko tin baaram e maruwel ni ke pi’ ngak yugu boch e girdi’.​—Gal. 6:4.

Sana rayog ni manang John ndabi n’uw nap’an e machib nra tay. Machane sana de lemnag nra tal ko machib nib tomgin. (John 3:30) Nap’an e duw ni 30 C.E. ni ka fini gaman nel’ e pul nga tomuren ni ke taufenag Jesus, ma aram me yon’ Herod ni Pilung nga kalbus. Machane i rin’ e tin nrayog rok ni nge ulul i machibnag e tin nib mat’aw ban’en. (Mark 6:17-20) Ere mang e ra ayuweg ni nge par nib felfelan’ ni yugu aram rogon ni ke thil boch ban’en u rogon e par rok? I par ni be tiyan’ ko tirok Got ban’en.

Nap’an ni immoy John u kalbus ma boor ban’en ni i rung’ag u rogon ni be mon’og e machib ni i tay Jesus. (Matt. 11:2; Luke 7:18) Ba mich u wan’ John ni Jesus e ir fare Messiah, machane sana dabisiy ni i lemnag ko uw rogon nra lebguy Jesus gubin ban’en ni be yog e Babyor nib Thothup u murung’agen fare Messiah. Bochan ni fare Messiah e ku ra mang pilung, me ere gur, re n’ey e be yip’ fan ndab ki n’uw nap’an ma bayi tabab  Jesus ko gagiyeg? Ma nap’an nra mang Jesus e pilung ma gur, ra pag John u kalbus? Baadag John ni ngki nang boch ban’en u murung’agen e n’en nra rin’ Jesus. Ere aram fan ni l’og l’agruw i gachalpen ni nga ranow ra fithew ba deer ngak Jesus. Re deer nem e: “Gur faanem ni yog John ni bay yib fa ka bay be’ ni nguug sonniged?” (Luke 7:19) Nap’an nra sulow mab mudugil ni motoyil John nib fel’ rogon u nap’an nra weliyew ngak murung’agen e maang’ang ni be ngongliy Jesus. I yog Jesus ngorow nnap’an e yow ra sul ma nge lungurow ngak John: “Piin ni malmit e kar guyed ban’en, ma piin ni mugutgut e kar uned ko yan, ma piin ndaraw e ke chuw e daraw rorad, ma piin ni biling e ke yog ni ngar rung’aged ban’en, ma piin kar m’ad e kan fasegrad, ma Thin Nib Fel’ ni yib rok Got e kan machibnag ko piin ni gafgow.”​—Luke 7:20-22.

Dariy e maruwar riy ni pi n’ey ni weliy e gali cha’ney ngak John e pi’ e athamgil nga laniyan’, ya be micheg ni Jesus e ir e be lebguy fapi yiiy u murung’agen fare Messiah. Yugu aram rogon ni wub ni ke tay Jesus ni ir fare Messiah e dabi ayuweg John ni ngan pag u kalbus, machane manang John ni machib ni i tay e ba ga’ fan. Bay fan ni nge felfelan’ ni yugu aram rogon e n’en ni ke buch rok.

Faan gad ra tedan’dad ko tirok Got ban’en ni bod rogon John, ma aram e rayog ni ngad athamgilgad u fithik’ e felfelan’ nge gum’an’. (Kol. 1:9-12) Rayog ni ngad rin’ed e re n’ey ni faan gad ra beeg e Bible ma gad be fal’eg i lemnag e thin riy. Ra ayuwegdad e re n’ey ni nge dab da paged talin ni maruwel ni gad be tay ni fan ngak Got e dabi yan i aw nib m’ay fan. (1 Kor. 15:58) I gaar Sandra: “Nap’an ni gu ra beeg reb e guruy ko Bible ni gubin e rran ma ma ayuwegeg ni nggu chugur ngak Jehovah. Re n’ey e ke ayuwegeg ni nggu mon’eg e tin nib m’agan’ ngay ma gathi tin nib m’agan’ug ngay.” Ku rayog ni ngad guyed rogon ni ngad nanged murung’agen e pi n’en ni be buch ko fare maruwel ni machib ni be tay e pi walag ni fan ngak Jehovah. Re n’ey e ra ayuwegdad ni nge dab kud pared ma gad be lemnag e tin be buch rodad, mad tedan’dad ko tin be lebguy Jehovah. Ki gaar Sandra: “Pi n’en ni yima pi’ ni yu pul ko JW Broadcasting^® e ra ayuwegdad ni ngad chugurgad ko ulung, ma gad par ni gad ba felfelan’ ko maruwel ni gad be rin’.”

Yugu aram rogon nib ngoch nap’an e machib ni tay John ni Tataufe, machane ba gel e maruwel ni i tay ni fan ko machib “ma ba gel gelngin e thin rok ni bod Elijah,” maku ir “be’ ni ku bod gadad e tiney e girdi’.” (Luke 1:17; Jas. 5:17) Faan gad ra folwok rok u rogon ni dag nib ga’ fan u wan’ e maruwel ni ke pi’ Jehovah ngak, nge rogon ni i tiyan’ ko tirok Got ban’en, ma aram e rayog ni ngkud pared ni gad felfelan’ ko pigpig ni gad be tay ngak Got ndemtrug e n’en nra buch rodad.