1. Mang e gad gubin ni gad baadag ni nge rin’ e girdi’ rodad?

I YOG reb e walag nib pin ni ka nog Pauline * ngak ni gaar: “Nap’an nug nang e tin riyul’ ma aram mug adag ni nge gubin e girdi’ u lan e tabinaw rog mar uned ngog ko par u Paradis. Rug baadag ni nge un Wayne ni pumoon rog nge bochi pagel ni fakmow ngog ko pigpig ngak Jehovah.” Bay boch e girdi’ rom ndawor ra filed murung’agen Jehovah maku dawori t’uf rorad, fa? Ba mudugil ni ga baadag ni ngam pigpiggad e girdi’ rom ngak Jehovah u taabang ni bod rogon Pauline.

2. Mang boch e deer ni gad ra weliy ko re article ney?

² Dabiyog ni ngad towasariyed e girdi’ rodad ni nge m’agan’rad ko fare thin nib fel’. Machane rayog ni ngad pied e athamgil nga lanin’rad ni ngar lemnaged e n’en ni be yog e Bible. (2 Tim. 3:14, 15) Mang fan nib t’uf ni ngad machibnaged e girdi’ rodad? Mang fan ni ngad gayed rogon ni ngad nanged rogon lanin’rad? Mang e ngad rin’ed me yag nda ayuweged e girdi’ rodad ni nge t’uf Jehovah rorad ni bod gadad? Ma uw rogon nrayog ni nge ayuwegdad e pi walag u lan e ulung?

3. Mang fan ni ngad machibnaged e girdi’ rodad nrogon nib puluw ko 2 Peter 3:9?

³ Dabki n’uw nap’an ma bayi thang Jehovah e re m’ag ney. Kemus ni piin bay rogon ni nge “yog e yafos ndariy n’umngin nap’an  ngorad” e yad ra magey ni yad ba fos. (Acts 13:48) Boor e tayim ni gad ma tay, maku gad ma athamgil ni ngad machibnaged e girdi’ ko gin gad ma par riy ndad nanged yad. Ere ku gad baadag ni ngad machibnaged e girdi’ rodad ya nge yag nra pigpiggad ngak Jehovah. Jehovah ni Chitamangidad ni gad ba t’uf rok e “dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.”​—Mu beeg e 2 Peter 3:9.

4. Mang reb e ban’en nde puluw nrayog ni ngaud rin’ed u nap’an ni gad be machibnag e girdi’ rodad?

⁴ Dab da paged talin ni fare thin nra yognag e yafos ko girdi’ ni gad ma weliy e bay reb e kanawo’ ni gad ra weliy riy mab puluw, ma bay reb nde puluw. Yugu aram rogon nsana gad ma gonopiy rogon ni gad ma non ngak be’ ndad nanged u nap’an e machib, machane nsana rayog nnap’an ni gad ra machibnag e girdi’ rodad ma darud kol ayuwgad u rogon e thin ni gad ma yog ngorad.

5. Mang e dab da paged talin u m’on ni ngad weliyed e tin riyul’ ko girdi’ rodad?

⁵ Gad ra lemnag e yay nsom’on nda guyed rogon ni ngad machibnaged e girdi’ rodad, ma sana boor i gadad e dabun rogon ni rin’ e re n’ey, ma be athapeg ni manga ki yag ni nge rin’ u yugu reb e kanawo’. I fonownag apostal Paul e piin Kristiano ni gaar: “Gubin ngiyal’ nthingar umogned e thin ngorad nib fel’ ma ba’ fan, ma thingar mu nanged rogon ni ngam pied e fulweg nib mat’aw ko tin ni ke fith be’ nge be’ ngomed.” (Kol. 4:5, 6) Ba fel’ ndab da paged talin e re fonow ney u nap’an ni gad be non ko girdi’ rodad, ya faanra danga’ ma rayog ni nga dogned boch ban’en nra kirebnag lanin’rad ko bin ni ngad ayuweged yad ni ngar motoyilgad ngodad.

6-7. Mu weliy ban’en ni ke buch ni be dag nib ga’ fan ni nge nang e piin Kristiano rogon laniyan’ e piin mabgol rorad ndarur pigpiggad ngak Jehovah.

⁶ Ngam nang rogon lanin’rad. Pauline ni kad weliyed murung’agen boch kafram e ki gaar:  “Som’on e kemus ni yigoo murung’agen Got nge Bible e gu baadag ni nggu weliy ngak figirngig. Da gur weliyew e pi n’en ni gamow ma rin’ u reb e rran ngu reb.” Machane Wayne ni figirngin Pauline e de yoor ban’en u Bible ni manang, maku der ma nang fan e pi n’en ma weliy Pauline ngak. Rogon u wan’ Wayne e gowa bod ni ke par Pauline ni yigoo murung’agen e teliw rok e be lemnag. Ke magafan’ ya be lemnag ni be un Pauline nga reb e ulung nib kireb ma kan bannag.

⁷ I yog Pauline ni immoy ba ngiyal’ nra yan i blayal’ nge nap’an e Sabado nge Madnom ma boor e tayim ni ma chag ngak e pi walag u nap’an e muulung, nge machib, maku yad ma tay e abich u taabang. I gaar: “Bay yu ngiyal’ nra sul Wayne nga tabinaw ma de moy be’, ma aram me kireban’ ni bochan e be lemnag ni ka yugu ni digey ni yigoo ir.” Bin riyul’ riy e, ke tawrengnag Wayne e ppin nge bitir rok. De nang ko mini’ e pi cha’nem ni yad be chag Pauline, ma ra lemnag ma bod ni kab ga’ fan e pi cha’nem u wan’ Pauline ngak. Ere yog Wayne ni ngar dargow Pauline. Gur, rayog ni ngam lemnag boch e kanawo’ nrayog ni nge dag Pauline riy ni manang rogon laniyan’ e pumoon rok?

8. Mang e ba ga’ ni ma tiyan’ e girdi’ rodad ngay nrogon nib puluw ko 1 Peter 3:1, 2?

⁸ Mu dag e ngongol nib fel’. Ba ga’ ni pi n’en ni gad ma rin’ e ir e ma tiyan’ e girdi’ rodad ngay, ma gathi tin ni gad ma yog. (Mu beeg e 1 Peter 3:1, 2.) Munmun me tamilang e re n’ey u wan’ Pauline. I gaar: “Gu manang ni ka gamow ba t’uf rok Wayne ma dabun ni nggu dargow. Machane re n’em ni yog ni nggu dargow e ke tamilangnag u wan’ug nib t’uf ni nggu tabab i rin’ boch ban’en nrogon nib m’agan’ Jehovah ngay. Kab ga’ fan ni nggu dag e ngongol nib fel’ ko bin ni nggu par ni gu be machibnag.” I tal Pauline i towasariy Wayne ni ngar weliyew murung’agen e Bible, me tabab ni ngar weliyew e pi n’en ni yow ma rin’ u  reb e rran ngu reb. I guy Wayne ni ke mang Pauline be’ nib gapas miki guy ni fachi pagel ni fakrow e ke tabab ni be fol rorow. (Prov. 31:18, 27, 28) Nap’an ni guy Wayne angin e thin nu Bible ni ke yib nga lan e tabinaw rok, ma aram me m’agan’ ngay ni nge lemnag e n’en ni be yog e Thin rok Got.​—1 Kor. 7:12-14, 16.

9. Mang fan ni ngad ululgad i guy rogon ni ngad ayuweged e girdi’ rodad?

⁹ Mu ulul i guy rogon ni ngam ayuweg e girdi’ rom. Ke dag Jehovah e kanawo’ nrayog ni ngad folwokgad riy. ‘Der tal’ i guy rogon ni nge bing e kanawo’ ngak e girdi’ ni nge m’agan’rad ko fare thin nib fel’ me yag e yafos ni manemus ngorad. (Jer. 44:4) I yog apostal Paul ngak Timothy ni nge ulul i ayuweg e girdi’. Mang fan? Faanra rin’ ni aray rogon, ma aram e ra ayuweg e yafos rok nge yafos ko piin yad ra motoyil ngak. (1 Tim. 4:16) Gad baadag ni nge nang e girdi’ rodad e tin riyul’ u lan e Thin rok Got ni bochan e yad ba t’uf rodad. Thin nge ngongol rok Pauline e munmun me yib angin nib fel’ nga lan e tabinaw rok. Chiney e be felfelan’ ni bochan e yow be pigpig e pumoon rok ngak Jehovah u taabang. Yow l’agruw ni yow ma pioneer, me Wayne e ke mang reb e piilal.

10. Mang fan nib t’uf ni ngad gum’an’naged gadad?

¹⁰ Mu gum’an’nagem. Nap’an nda dugliyed ni ngad folgad rok Got, ma boor ban’en nda thilyeged u lan e yafos rodad nge pi n’en nib mich u wan’dad. Rayog nib mo’maw’ ko girdi’ rodad ni nge m’agan’rad ko pi n’ey ni kad thilyeged u rarogodad. Ba ga’ ni n’en ni yad ma tiyan’rad ngay ko som’on e rogon ndakurud uned ngorad nga boch e madnom ko teliw rorad, ma dakurud uned nga ngongolen e am. Rayog nsom’on e bay boch i yad nra damumuw ngodad. (Matt. 10:35, 36) Machane susun e dab da lemnaged ndabiyog ni ngar thilgad. Faan gad ra tal i guy rogon ni ngad ayuweged yad ni ngar nanged fan e pi n’en ni ke mich u wan’dad, ma aram e gowa bod ni kad dugliyed ndariy rogon ni nge yag e yafos ni manemus ngorad. Dawori pi’ Jehovah mat’awdad ni ngad rin’ed e biney e maruwel, ya Jesus e ir e ke pi’ mat’awun ni nge rin’ e re n’ey. (John 5:22) Faan gad ra gum’an’naged gadad, ma ra munmun ma rayog ni nge m’agan’ e girdi’ rodad ni ngar motoyilgad ko fare thin nib fel’.​—Mu guy fare kahol ni kenggin e “ Mu Fanay e Website Rodad ni Ngam Fil Ban’en Ku Be’.”

11-13. Mang e kam fil u rogon e ngongol rok Alice ngak e gallabthir rok?

¹¹ Mu gol ko girdi’ rom machane dab mu pagrad ni ngar pingeged lanin’um. (Prov. 15:2) Am lemnag e n’en ni buch rok Alice. I fil murung’agen Jehovah u nap’an ni be par u bang nib palog ko gallabthir rok. Gallabthir rok Alice e yow ma lemnag ndariy e Got ma yow ma un nga ngongolen e am. I nang nde fel’ ni nge son nge n’uw nap’an mfini weliy ngorow e pi n’en nib fel’ ni be fil. I gaar: “Faan ga ra son nge n’uw nap’an mfin mu weliy ngak girdien e tabinaw rom e tin ke mich u wan’um nge tin ga ma rin’, ma aram e yad ra gin mar damumuwgad.” Ere guy rogon ni nge gay murung’agen boch ban’en ni be athapeg nra adag e gallabthir rok ni ngar nangew murung’agen, ni bod rogon e t’ufeg. Ngemu’ mi i yoloy e babyor nga i pi’ ngorow ni bay riy e n’en ni be yog e Bible u murung’agen e pi n’em, miki fith rogon lanin’row riy. (1 Kor. 13:1-13) Ma pining e magar ngorow ni kar chuguliyew ke ilal ma yow be ayuweg, maku ma pi’ e tow’ath ngorow. Nap’an ni yan i guy e gallabthir rok nga taferow me rin’ gubin ban’en nrayog rok ni nge ayuweg e chitiningin ko maruwel u tabinaw. Som’on e de m’agan’ e gallabthir rok Alice ngay u nap’an ni yog ngorow murung’agen e pi n’en ni ka fini mich u wan’.  

¹² Nap’an ni yan i guy e gallabthir rok ma aram me ulul nga i beeg e Bible ni gubin e rran. I gaar: “Re n’ey e ayuweg e chitinag ni nge nang feni ga’ fan e Bible u wan’ug.” Ki dugliy e chitamangin Alice ni nge fil boch ban’en u Bible ya nge nang fan ni ke thil fak. Ku baadag ni nge pirieg boch  ban’en u Bible nrayog ni nge gathibthibnag. I gaar Alice: “Gu pi’ ba ken e Bible ngak mug yoloy boch e thin nga langgin ni fan ngak.” Mang angin ni yib riy? Dariy ban’en ni pirieg e chitamangin Alice nrayog ni nge gathibthibnag u lan e Thin rok Got, ya n’en ni buch e taw e pi thin ni i beeg riy nga gum’irchaen.

¹³ Ba t’uf ni ngad golgad machane dab da paged e girdi’ rodad ni ngar pingeged lanin’dad, ni mus ni faanra ke yib e skeng ngodad. (1 Kor. 4:12b) Alice e athamgil ko togopuluw ni i tay e chitiningin ngak. I gaar: “Nap’an nug un ko taufe, me yog e chitinag ngog ni ‘gag reb e bitir ni gub kireb.’” Ere mang e rin’ Alice? I gaar: “Gu weliy murung’agen e teliw ni ka fin gu un ngay. Machane gog ngak u fithik’ e tayfan ni kug dugliy ni nggu mang reb e Pi Mich Rok Jehovah, ma dab gu thilyeg e lem rog. Gu micheg ngak nrib t’uf rog, ma aram ma gamow yor ni gamow l’agruw, ma tomuren ma aram mug fal’eg boch e ggan nge kay. Ka aram nap’an ni tabab e chitinag ni nge nang ni Bible e aram e n’en ni ke ayuwegeg kug mang be’ nib manigil.”

14. Mang fan nthingar dab da paged e girdi’ rodad ngar pingeged lanin’dad?

¹⁴ Rayog nib n’uw nap’an mfini tamilang u wan’ e girdi’ rodad feni ga’ fan u wan’dad e pigpig rodad ngak Jehovah. Bod nnap’an ni dugliy Alice ni nge pioneer ko bin ni nge un ko re miti maruwel ni baadag e gallabthir rok ni nge un ngay, ma aram miki yor e chitiningin bayay. Machane de thilyeg Alice laniyan’. I gaar: “Faan ga ra pag girdien e tabinaw rom ni ngar pingeged lanin’um u taa ban’en, ma aram e ku yad ra guy rogon ni ngar pingeged lanin’um u yugu boch ban’en. Faan ga ra gol ngorad machane dab mu pagrad ngar pingeged lanin’um, ma aram e rayog ni bay boch i yad nra motoyil ngom.” Ireray e n’en ni buch rok Alice. Gallabthir rok e yow ma pioneer e chiney ma chitamangin e ir reb e piilal.

15. Uw rogon ni “tin nib fel’” ni ma rin’ yugu boch e walag e rayog ni nge ayuweg e girdi’ rodad nrogon nib puluw ko Matthew 5:14-16 nge 1 Peter 2:12?

¹⁵ Ma fanay Jehovah e “tin nib fel’” ni ma rin’ e pi tapigpig rok ni nge pow’iy e girdi’ ngak. (Mu beeg e Matthew 5:14-16; 1 Peter 2:12.) Faanra en mabgol rom e gathi ir reb e Pi Mich Rok Jehovah, ma gur ke mada’nag boch e pi walag u lan e ulung? Pauline ni faan kad weliyed murung’agen e pining e pi walag u lan e ulung nga tabinaw rok ya nge yag ni nangrad Wayne. I yib ngan’ Wayne e n’en ni rin’ reb e walag ni pumoon ni aram e n’en ni ayuweg ni nge nang e tin riyul’ u murung’agen e Pi Mich. I gaar: “I fek e matal rok ko maruwel ni bochan e nggu yaliyew reb e gosgos ni yibe pag u TV. Ma aram mug gaar u wan’ug, ‘Cha’ney e ku taareb rogon ko yug girdi’!’”

16. Mang fan nsusun e ngad pininged e girdi’ rodad ni ngar uned ko muulung?

¹⁶ Reb e kanawo’ nrib fel’ nrayog ni ngad ayuweged e girdi’ rodad riy e aram e ngad pininged yad ngar uned ko muulung ni gad ma tay. (1 Kor. 14:24, 25) Yay nsom’on ni un Wayne ko muulung e nap’an e Puguran ni bochan e nni tay u tomuren e maruwel rok mab ngoch nap’an. I yog Wayne ni gaar: “De yag ni ngar gu nang fan e welthin nni pi’, machane n’en nug gin ngay e rogon e ngongol ko girdi’ u rom. Ra bad ra pininged e magar ngog mi yad rurug paag. Rayog ni nggu nang ni yad boch e girdi’ ni yad ba yul’yul’.” Bay ba wu’ i mabgol nri yow ma ayuweg Pauline nge fachi pagel ni fak u nap’an e muulung nge machib. Ere nap’an ni dugliy Wayne ni nge fil boch ban’en u murung’agen e tin ke mich u wan’ Pauline, ma aram me yog ko fare pumoon ni nge fil e Bible ngak.

17. Mang e dab don’ed e kireb riy nga dakendad, machane mang fan dabi mulan’dad u puluwon e girdi’ rodad?

¹⁷ Gad be athapeg ni nge gubin e girdi’ rodad mar uned ngodad ko pigpig ngak Jehovah. Machane rayog ndab ra bad ko tin riyul’ ni yugu aram rogon ni gad be athamgil ni ngad ayuweged yad ni ngar manged boch e tapigpig rok Got. Faanra ireray e n’en ni kar dugliyed, ma dab mu lemnag ni gur e kireb rom. Bin riyul’ riy e, dabiyog ni ngad towasariyed be’ ni nge mich u wan’ e tin ke michan’dad ngay. Machane faanra guy e girdi’ rom rogon ni gab felfelan’ ni bochan e ga be pigpig ngak Jehovah, ma aram e rayog ni nge thil e lem rorad. Mu yibilayrad mag gol ngorad, ma dab mu tal i guy rogon ni ngam ayuwegrad! (Acts 20:20) Nge pagan’um nra tow’athnag Jehovah e athamgil ni ga be tay. Faanra dugliy e girdi’ rom ni ngar motoyilgad ma aram e rayog ni nge yag e yafos ngorad!