ROFEN ndalip fen e maruwel ni kakadbul ko January 24, 2018, mi ri felfelan’ girdien e Bethel nu Meriken ngu Canada u nap’an nra rung’aged ban’en nib manigil ni ka nog. Ka nog ni Brother Kenneth Cook, Jr. e ke mang reb i girdien fare Ulung ni Ma Pow’iyey ni fan ko Pi Mich Rok Jehovah.

Cha’ney i Brother Cook e ni gargeleg min chuguliy u reb e binaw u Meriken ni ka nog yu Pennsylvania ngay. Ke fil e tin riyul’ rok reb e bitir ni yow nga skul u nap’an ni ke chugur ni nge chuw u high skul. Ma nap’an e duw ni 1980 ko June 7 min taufenag. Ma aram me tabab ni nge pigpig u polo’ e tayim rok ko duw ni 1982 ko September 1 nreb e regular pioneer. Tomuren ni ke gaman l’agruw e duw ni ke pioneer, ma aram min pining ni nge tabab ko pigpig u Bethel ni bay u Wallkill u New York ko duw ni 1984 ko October 12.

Ere nga tomuren ma be pigpig Brother Cook u lan 25 e duw nib thilthil e maruwel ni i rin’ ko gin ni yima Printnag e babyor rodad riy ngu Bethel Ofis. Ke leay be’ nib pin ni ka nog Jamie ngak ko duw ni 1996, ma aram me un ngak ko pigpig u Bethel u Wallkill. Ma nap’an e duw ni 2009 ko December, ma aram min fekrow nga Patterson u New York ko gin ni bay e Watchtower Educational Center riy. Ma aram min pi’ reb e maruwel ngak Brother Cook ni aram e nge maruwel ko fare Department ko Writing Correspondence. Ma nap’an e duw ni 2016 ko April u tomuren ni sul Brother nge Sister Cook bayay nga Wallkill, ma de n’uw nap’an ma aram mu kun fekrow nga Brooklyn u New York. Lal e pul nga tomuren ma aram min thilyeg e gin ni ngar pirew riy bayay. Aram e kan pi’row nga Warwick ko gin ni bay e tochuch rodad riy u New York. Ma nap’an e duw ni 2017 ko January, ma aram min dugliy ni nge mang reb e taayuw ko fare Writing Committee ko fare Ulung ni Ma Pow’iyey.