1-2. (a) Mang e ma yaliy Jehovah u nap’an nra guy bokum milyon e girdi’ ni yad be muulung ni ngar madnomnaged fare Abich ni Blayal’ rok Somol? (Mu guy e sasing ni bay u tabolngin e re article ney.) (b) Mang e gad ra weliy ko re article ney?

AM LEMNAG ko mang e ma yaliy Jehovah u nap’an nra guy bokum milyon e girdi’ ni yad be muulung ni ngar madnomnaged fare Abich ni Blayal’ rok Somol. Gathi kemus ni ma yaliy urngin e girdi’ ni kar bad, ya ma yaliydad ni be’ nge be’. Bod ni ma guy e piin ni yad ma yib ni gubin e duw ni ngar uned ko re muulung ney. Bay boch e pi girdi’ ney ni kar athamgilgad ni ngar bad ko muulung ni yugu aram rogon ni ba gel e togopuluw ni be yib ngorad. Bay boch i yad ni gathi ri yad ma yib ko pi muulung ni gad ma tay, machane yad ma athamgil ni ngar uned ko Puguran ya yad manang ni ban’en nib ga’ fan nthingar ni rin’. Ku manang Jehovah e piin ni ireram e som’on rorad ni kar uned ko Puguran nsana bochan e yad baadag ni ngar nanged murung’agen e re muulung ney.

² Mmudugil nib felfelan’ Jehovah ni nge guy ni boor e girdi’ ni kar uned ko Puguran. (Luke 22:19) Machane gathi kemus ni ma lemnag Jehovah urngin e girdi’ ni ke yib ko puguran. Ya n’en nib ga’ fan u wan’ e fan ni kar bad. Ere gad ra weliy e fulweg u reb e deer nib ga’ fan u lan e re article ney ni aram e: Mang fan ni gad ma un ko pi muulung nib muun e Puguran ngay nge pi muulung u lan e wik ni aram ban’en ni ke pi’ Jehovah ni fan ngak e piin ni yad ba t’uf rok?

3-4. (a) Mang fan ni gad ma un ko muulung rodad? (b) Nap’an ni gad ra un ko muulung, ma mang e m’ug u murung’agdad? (c) Mang fan nthingar dab da paged e madnom ko Puguran nrogon ni be tamilangnag e 1 Korinth 11:23-26?

³ Bin th’abi ga’ fan ni gad ma un ko muulung e bochan ni bang ko liyor rodad. Ku gad ma un ko pi muulung ney ni bochan e aram e gin  ni ma skulnagdad Jehovah riy. Piin nib tolangan’rad e dubrad maku darur lemnaged nib t’uf ni nge fil be’ ban’en ngorad. (3 John 9) Machane gadad e gad ba thil ya gadad baadag ni nge skulnagdad Jehovah nge ulung rok.​—Isa. 30:20; John 6:45.

⁴ Nap’an ni gad ra yib ko muulung ma re n’ey e be m’ug riy ni gad ba sobut’an’ mab m’agan’dad ngay ni nge skulnagdad Jehovah. Gathi kemus ni ngad uned ko re muulung ney nib ga’ fan ko rofen ni yira madnomnag e Puguran ko yam’ ni tay Jesus riy, ya gad manang ni ban’en nthingar da rin’ed. Ya ku bochan ni gad be fol u fithik’ e sobut’an’ ko n’en ni tay Jesus chilen ngodad ni ngad rin’ed ni gaar: “Ngiyal’ ni gimed ra unum e n’en ni ba’ riy e ngam rin’ed ni nge pugurag ngomed.” (Mu beeg e 1 Korinth 11:23-26.) Pi muulung ney e ma gelnag e pagan’ rodad ko n’en ni bay nga m’on me puguran ngodad feni ri gad ba t’uf rok Jehovah. Machane manang Jehovah ni gathi kemus ni taab yay u reb e duw e ba t’uf ni ngan pi’ e athamgil nga lanin’dad min gelnag e pagan’ rodad. Aram fan ni ke pi’ ngodad e pi muulung ni gad ma un ngay ni gubin e wik miki pi’ e athamgil nga lanin’dad ni ngad uned ngay. Ere sobut’an’ e ma k’aringdad ni ngad folgad riy. Gad ma tay in e awa u gubin e wik ni ngad fal’eged rogodad ni fan ko pi muulung ney ma gad un ngay.

5. Mang e ma rin’ e piin nib sobut’an’rad ni be piningrad Jehovah ni nge skulnagrad?

⁵ Gubin e duw ma boor e girdi’ nib sobut’an’rad ni ma m’agan’rad ngay ni ngar paged Jehovah ni nge skulnagrad. (Isa. 50:4) Yad ma felfelan’ u nap’an ni yad ra un ko Puguran ma aram ma yad tabab ni ngar uned ko pi muulung u lan e wik. (Zek. 8:20-23) Gadad e piin ni kad nanged e tin riyul’ nge piin ni ka yad beech ko tin riyul’ e gad ma felfelan’ u taabang ni nge skulnagdad miki pow’iydad Jehovah ni ir e ma ‘ayuwegdad maku ma chuwegdad u fithik’ e gafgow.’ (Ps. 40:17) Gur, ku bay ban’en nga bang nrayog ni nge yibnag e felfelan’ ngodad nib ga’ fan ko bin ni nge m’agan’dad ngay ni nge skulnagdad Jehovah nge Jesus ni Fak nrib t’uf rok?​—Matt. 17:5; 18:20; 28:20.

6. Uw rogon ni sobut’an’ e ke ayuweg be’ nib moon ni nge un ko Puguran?

⁶ Ra reb e duw ma gad ma athamgil ni ngad pininged gubin e girdi’ nrayog ni ngar uned ko fare Puguran ko yam’ ni tay Jesus. Boor e girdi’ nib sobut’an’rad ni kad pininged ni kar uned ko fare puguran ma ke yib angin ngorad. Am lemnag reb e ban’en ni ke buch. Boch e duw kafram ma bay be’ nib moon nni pi’ bang e babyor ngak ni yibe pining ko Puguran, machane me yog ko fare walag nib pumoon ndabiyog ni nge un. Machane re nep’ nem ko Puguran me gin fare walag nib pumoon ngay ni ke yib fare moon nga Tagil’ e Liyor rodad. Kari felfelan’ e re moon ney nga rogon ni ke yib e pi walag ra pininged e magar ngak ma aram me tabab ni nge un ko muulung u lan e wik. Bin riyul’ riy e, reb e duw nga tomuren ni un ko puguran ma kemus ndalip e muulung nde un ngay. Mang e ke ayuweg e re moon ney ni nge dugliy ni nge un nga gubin e muulung? Ba sobut’an’ ma aram fan ni ke thilyeg e lem rok. Fare walag ni pumoon ni pining e re moon ney e boch nga tomuren me gaar, “Re moon ney e rib sobut’an’.” Mmudugil ni ke pow’iy Jehovah e re moon ney ni nge pigpig ngak, ma aram e chiney e kan taufenag.​—2 Sam. 22:28; John 6:44.

7. Uw rogon ni tin ni gad ma fil u nap’an e muulung nge tin ni gad ra beeg u lan e Bible e ra ayuwegdad ni ngad sobut’naged lanin’dad?

⁷ Tin ni gad ma fil u nap’an e muulung nge nap’an ni gad ma beeg e Bible rodad e ra ayuwegdad ni ngad sobut’naged lanin’dad. U lan e pi wik u m’on ko Puguran ma pi muulung rodad e ba ga’ ni yima weliy e n’en ni rin’ Jesus nge rogon e sobut’an’ ni dag ni aram e pi’ e yafos rok ni biyul. Ma u lan e pi rran u m’on ko Puguran mab fel’ ni ngad beeged e Bible u murung’agen e tin ni buch rok Jesus u m’on ni nge yim’ nge fos ko yam’ ni tay. Tin ni gad ra fil u nap’an e pi muulung nge tin ni kad beeged u lan e Bible u murung’agen e n’en ni rin’ e rra ga’nag fan u wan’dad e maligach ni ke pi’ Jesus ni fan ngodad. Ku ra k’aringdad ni ngad folwokgad u rogon ni dag nib sobut’an’ ma gad rin’ e n’en nib m’agan’ Jehovah ngay ni yugu aram rogon nib mo’maw’ ngodad.​—Luke 22:41, 42.

8. Uw rogon ni ke dag Jesus nder rus?

⁸ Ku gad ma gay rogon ni ngad folwokgad rok Jesus ni aram e ngad daged ndarud rusgad. Am lemnag rogon ni dag nde rus u lan e pi rran u m’on ni nge yim’. Ri manang ndab ki n’uw nap’an ma pi toogor rok e yad ra tamra’nag mi yad pirdiiy mi yad ra thang e fan rok. (Matt. 20:17-19) Machane i m’agan’ ngay ni nge yim’. Nap’an ni taw ko ngiyal’ nem ni yad bay u Gethsemane me non ngak e pi apostal rok ni yad ba yul’yul’ ni gaar: “Mu sak’iygad nga darod. Mu sapgad, baaray faanem ni ir e nge yognigeg!” (Matt. 26:36, 46) Ma nap’an ni yib bu ulung i girdi’ ni bay talin e cham rorad ni ngar koled me yib nga m’on nge yog ko ir mini’. Ma aram miki yog ngak e pi salthaw ni ngar paged fapi apostal nga ranod. (John 18:3-8) Ere kari dag Jesus nder rus! Ngiyal’ ney e ku ma athamgil e piin Kristiano ni kan dugliyrad nge piin ni yad yugu boch e saf ni ngar folwokgad rok Jesus u rogon ni dag nder rus. Uw rogon?

9. (a) Mang fan nib t’uf ni nge dab da rusgad ni ngad uned ko muulung ni gubin ngiyal’? (b) Uw rogon angin e n’en ni gad ma rin’ ni ma yib ngak e pi walag ni kan kalbusnagrad ni bochan e michan’ rorad?

⁹ Ra ngad uned ko muulung ni gubin ngiyal’ mab t’uf ndab da rusgad u nap’an ni gad ra mada’nag e magawon nib gel. Bay boch e walag ni yad ma un ko muulung ni yugu aram rogon ni be kireban’rad ni bochan e ke yim’ be’ nib t’uf rorad, ara be mulan’rad, ara kar m’argad. Maku bay boch e walag ni yad be un ko muulung ni yugu aram rogon nib gel e togopuluw ni be tay chon e tabinaw nge piin ni yad ba tolang ko am ngorad. Am lemnag rogon angin e n’en ni gad ma rin’ ni ma yib ngak e pi walag ni kan kalbusnagrad ni bochan e michan’ rorad. (Heb. 13:3) Nap’an ni yad ra rung’ag ni gad be pigpig ngak Jehovah ndemtrug ko mang skeng e gad be mada’nag, ma ri ma yib e athamgil nga lanin’rad ni ngar pared nib mudugil e michan’ rorad, mar pared ndab ra rusgad, ma yad ba yul’yul’. Ireray ban’en ni buch rok apostal Paul. Nap’an ni kan kalbusnag u Roma, ma ri ma felfelan’ u nap’an nra rung’ag ni be pigpig e pi walag ngak Got u fithik’ e yul’yul’. (Fil. 1:3-5, 12-14) Sana u m’on ni ngan pag ara ngiyal’ ni yugu ni pag riy me yoloy bangi babyor ngak e pi walag ko ulung nu Hebrew. U lan e gi babyor nem e pi’ e athamgil riy nga laniyan’ e pi Kristiano ni yad ba yul’yul’ ni ngar ‘pired ni ra bagayad ma ba t’uf bagayad rok nrogon e walag ni ma par u fithik’ Kristus,’ ma dab ra paged e muulung ni yad ma tay u taabang.​—Heb. 10:24, 25; 13:1.

10-11. (a) Mini’ e piin nsusun ni ngad pininged ko Puguran? (b) Mang fan ni be yog e Efesus 1:7 ni ngad rin’ed e re n’ey?

¹⁰ Gad ma dag ndarud rusgad u nap’an ni gad ra pining e girdi’ rodad, nge piin ni gad nga maruwel, nge yugu boch e girdi’ ni ngar uned ko Puguran. Mang fan ni gad ma pining e pi girdi’ ney? Rib ga’ fan u wan’dad e n’en ni ke rin’ Jehovah nge Jesus ni fan ngodad, ma aram fan nri gad baadag ni ngad pininged e girdi’ ni ngar uned ko Puguran. Gad baadag ni ngar filed rogon nra yib angin e “runguy rok” Jehovah ngorad ni bochan fare biyul.​—Mu beeg e Efesus 1:7; Rev. 22:17.

¹¹ Nap’an ni gad ra dag ndarud rusgad ni ngad muulunggad nga taabang, ma aram e ku gad be dag reb e fel’ngin nrib ga’ fan. Re fel’ngin ney e ki dag Got nge Fak u reb e kanawo’ nrib manigil.

12. (a) Uw rogon ni muulung ni gad ma un ngay e ma gelnag e t’ufeg rodad ngak Jehovah nge Jesus? (b) Mang e be pi’ e 2 Korinth 5:14, 15 e athamgil riy ngodad ni ngad rin’ed ya ngad folwokgad rok Jesus?

¹² T’ufeg rodad ngak Jehovah nge Jesus e aram e n’en ni ma k’aringdad ni ngad uned ko muulung. Ma tin ni gad ra fil u nap’an e muulung e ma gelnag e t’ufeg rodad ngak Jehovah nge Fak. Gubin ngiyal’ u nap’an e muulung ni yibe puguran ngodad e n’en ni kar rin’ew ni fan ngodad. (Rom. 5:8) Ma fare muulung ko Puguran e aram e bin nri be puguran ngodad rogon feni gel e t’ufeg rorow ngodad, nib muun ngay e piin ndawori ga’ fan fare biyul u wan’rad. Ere bochan nrib ga’ fan u wan’dad e re n’ey, ma aram fan ni gad ma gay rogon ni ngad folwokgad rok Jesus ko tin ni gad ma rin’ u reb e rran ngu reb. (Mu beeg e 2 Korinth 5:14, 15.) Maku reb e, t’ufeg rodad e ma k’aringdad ni ngad pininged e sorok ngak Jehovah ni bochan fare biyul ni ke pi’. Reb e kanawo’ ni gad ma pining e sorok ngak riy e aram u daken e pi fulweg ni gad ma pi’ u nap’an e muulung ni ke yib u gum’ircha’dad.

13. Uw rogon ni ngad daged feni rib t’uf Jehovah nge Fak rodad? Mu weliy.

¹³ Rayog ni ngad daged feni rib t’uf Jehovah nge Fak rodad ni aram e nge m’agan’dad ngay ni ngad paged fan gubin ban’en ngorow. Ba ga’ ni gad ma rin’ e re n’ey ya nge yag nda uned ko muulung. Boor e ulung ni yad ma tay e muulung u lan e wik u tomuren ni kan mu’ ko maruwel ni ke aw parowoy. Ma reb e muulung e yima tay ko Sabado ara Madnom ko ngiyal’ ni ma toffan e girdi’ riy. Gur, manang Jehovah ni gad ma un ko muulung ni yugu aram rogon ni ke aw parowdad? Mmudugil ni manang! Bin riyul’ riy e, ra gadad be athamgil nib gel ma aram e ri ma ga’ fan u wan’ Jehovah e t’ufeg ni gad ma dag ngak.​—Mark 12:41-44.

14. Uw rogon ni ke dag Jesus e kanawo’ ngodad u rogon ni ngan pag fay ni ngan dag e t’ufeg?

¹⁴ Ke dag Jesus e kanawo’ ngodad u rogon ni ngan pag fay ni ngan dag e t’ufeg. Gathi kemus ni m’agan’ ngay ni nge yim’ ni fan ngak pi gachalpen, ya ki par ni ke mon’eg e tin ni yad baadag ko tin ni baadag. Bod ni yugu aram rogon ni ke aw parawon ara ke mulan’, machane ki m’agan’ ngay ni nge yan i guy pi gachalpen. (Luke 22:39-46) Ma ki tiyan’ ko n’en nrayog ni nge pi’ ngak e girdi’ ma gathi tin nrayog ni ngar pied ngak. (Matt. 20:28) Ere nap’an nra gel e t’ufeg rodad ngak Jehovah nge pi walagdad ni bod e t’ufeg ni i dag Jesus, ma aram e gad ra rin’ e tin nrayog rodad ni ngad uned i madnomnag fare Abich ni Blayal’ rok Somol nge muulung ni ku gad ma tay.

15. Chon mini’ e piin nri gad baadag ni ngad ayuweged?

 ¹⁵ Gad ba muun ko fare ulung i walag ni Kristiano ni yad ma t’ufeged yad ma gad ma felfelan’ ni ngad pininged boch e girdi’ nib beech ni ngar uned ngodad ko pigpig ngak Jehovah. Machane ri gad baadag ni ngad ayuweged e piin ni “kad manged girdien e tabinaw rok Got u fithik’ e mich u wun’uy ngak Kristus” ni kar talgad ko machib ara dakurur uned ko muulung. (Gal. 6:10) Gad ma dag nri yad ba t’uf rodad ni aram e ngad pied e athamgil nga lanin’rad ni ngar uned ko pi muulung. Ku ngad pininged yad ngar uned ko Puguran nreb e muulung nib ga’ fan. Ri gad ma felfelan’ ni bod rogon Jehovah nge Jesus u nap’an nra sul reb e walag ngak Jehovah ni ke tal ko machib nge muulung. Ya Jehovah e ir e Chitamangidad nge en ni ma Gafaliydad ni gad ba t’uf rok.​—Matt. 18:14.

16. (a) Uw rogon ni ngad pied e athamgil nga lanin’dad? Uw rogon nra ayuwegdad e muulung ni gad ma un ngay? (b) Mang fan ni ireray ba ngiyal’ u reb e duw nib fel’ ni nge yib ngan’dad e thin rok Jesus ni bay ko John 3:16?

¹⁶ U lan e pi wik ni bay yib ma ngad pininged urngin e girdi’ nrayog ni ngar uned ko fare Puguran ni yira tay ko Biyernes ni blayal’ ko April 19, 2019. (Mu guy fare kahol ni kenggin e “ Gur, Ga Ra Piningrad?”) U lan e bin ni bay yib e duw ma ngad rin’ed gubin e tin nrayog rodad ni ngad pied e athamgil nga lanin’dad ni ngad uned ko muulung ni gubin ngiyal’ ni aram ban’en ni ke pi’ Jehovah ngodad. Nap’an ni be chugur ni ngan thang e re m’ag ney ma muulung ni gad ma tay e ra ayuwegdad ni ngad pared nib sobut’an’dad, ma gad par ndarud rusgad, ma gad be dag e t’ufeg. (1 Thess. 5:8-11) Ere ngad daged ngak Jehovah nge Jesus u polo’ i gum’ircha’dad nib ga’ fan u wan’dad e t’ufeg nib gel ni kar dagew ngodad!​—Mu beeg e John 3:16.