BE WELIY e Bible murung’agen boch e pumoon ni yad ba yul’yul’ ni ur lemgad ni “ku bod gadad e tiney e girdi’.” (Jas. 5:17) Bod nrayog ni ngad nanged fan e n’en ni be yip’ Paul fan ko fapi thin ni yog ni bay ko Roma 7:21-24. I yog ni gaar: “Faanra gub adag ni nggu rin’ e tin nib fel’, ma ke mus ntin nib kireb e rayog ni gu rin’. . . . Ere kar gu gafgow!” Nap’an ni gad be cham nga rarogodad ndawor da flontgad, ma rayog ni nge fel’ lanin’dad ni faan gad ra nang ni mus ngak Paul maku aray rogon e lem rok ni yugu aram rogon ni ir be’ nib yul’yul’.

Machane ku bay boch ban’en ni ki weliy Paul rogon laniyan’ riy. I yog ni gaar: “En ni Fak Got. . . . e gub t’uf rok ma ke pi’ e pogofan rok ni fan ngog.” (Galatia 2:20) Rib mich u wan’ Paul e re n’ey. Me gur, aram rogon e lem rom, fa? Rayog ni gathi gubin ngiyal’ ni ga ma lem ni aray rogon.

Faanra ka gad be lemnag ndariy fadad ni bochan e kireb ni ud rin’ed kafram, ma rayog ndabi mich u wan’dad ni gad ba t’uf rok Jehovah ma ke n’ag fan e kireb rodad. Ku rayog ni nge mo’maw’ ngodad ni ngad lemnaged ni fare biyul ni pi’ Jesus e ba tow’ath ni fan ngodad. Gur, riyul’ ni baadag Jesus ni ngad lemnaged fare biyul ni aray rogon, fa? Faanra baadag, me ere mang e ra ayuwegdad ni ngad nanged nre biyul nem e ba tow’ath ni fan ngodad? Ngad weliyed murung’agen e gal deer ney.

Arrogon, baadag Jesus ni ngad lemnaged ni fare biyul ni ke pi’ e ba tow’ath ni fan ngodad. Uw rogon nrayog ni nge mich e re n’ey u wan’dad? Am lemnag e n’en ni buch ni be weliy e Luke 23:39-43 (NW) murung’agen. Bay be’ nib moon ni kan richibiy nga ba ley i gek’iy u barba’ rok Jesus. Me yog nib kireb e rok ko kireb ni ke rin’. Rayog nrib gel e kireb ni ke rin’ e re moon ney ni bochan e kemus ni yigoo piin nib gel e kireb ni kar rin’ed e yima richibiyrad nga ba ley i gek’iy ni ngar m’ad. Kari magafan’ e re moon ney ma aram me wenig ngak Jesus ni gaar: “Ri ga ra lemnigeg ko ngiyal’ ni ga ra yib ni gur e kam mang pilung!”

Mang e rin’ Jesus? Am lemnag gelngin e amith ni bay Jesus u fithik’ u nap’an ni cheleg lolugen ya nge yag ni sap ko fare moon. Yugu aram rogon gelngin e amith ni bay u fithik’, machane me siminmin me yog ban’en ni fal’eg laniyan’ fare moon. I gaar ngak: “Nggog ngom e daba’ ni ga ra moy rog u Paradis.” Rayog ni kemus ni nge puguran Jesus ngak fare moon ni ‘en ni Fak e Girdi’ e de yib ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.’ (Matt. 20:28) Machane de rin’ ni aray rogon, ya micheg ngak fare moon u fithik’ e sumunguy nre maligach nem e fan ngak. Nap’an ni yog fa gal bugithin ni “ngom” nge “rog,” ma aram e be dag e gol ko re moon nem. Miki yog ngak nra un ko par u paradis u fayleng.

Dariy e maruwar riy ni baadag Jesus ni nge nang e re moon ney nre biyul nem e ku ra yib angin ngak. Faanra aray rogon u wan’ Jesus be’ nib kireb ndawori yag ni nge pigpig ngak Got, me ere ku aray rogon laniyan’ ngak reb e Kristiano ni kan taufenag ni be pigpig ngak Got. Ere mang e ra ayuwegdad ni ngari mich u wan’dad ni fare biyul rok Kristus e ku fan ngodad ni be’ nge be’ ni yugu aram rogon ni ud rin’ed boch e denen kafram?

Bochan ni pi’ Jesus e maruwel ngak Paul ni nge machib, ma aram fan nrayog ni nge tamilang u wan’ ni ke yim’ Jesus ni fan ngak. Ni uw rogon? I weliy ni gaar: “Gu ma pining e magar ngak Kristus Jesus ni ir e  Somol rodad, ni ir e ma pi’ gelngig ko maruwel ni gu be tay. Gu ma pining e magar ngak ni bochan e be finey nrayog ni nge pagan’ ngog, nge bochan e turguyeg ni nggu pigpig ngak, ni yugu aram rogon nib kireb e thin ni ugog nib togopluw ngak kakrom, mu ug gafgownag ma gu be yog e thin nib kireb nga fithingan.” (1 Tim. 1:12-14) Bochan ni pi’ Jesus e re maruwel ney ngak Paul ni yugu aram rogon ni boor ban’en nib kireb ni i rin’ kafram, ma aram e n’en ni micheg nga laniyan’ ni be runguy Jesus, mab t’uf rok, ma be pagan’ ngak. Ku arrogodad ni kki pi’ Jesus e re maruwel ney ngodad ni ngad machibnaged fare thin nib fel’. (Matt. 28:19, 20) Ere gur, rayog ni nge ayuwegdad e re maruwel ney ni nge tamilang u wan’dad ni kki yim’ Jesus ni fan ngodad?

Albert ni ka fini sul bayay ko ulung rok Jehovah u tomuren ni ke chugur ni nge gaman 34 e duw ni kan tharbog e weliy ni gaar: “Dabiyog ni nggu pagtalin e pi n’en nib kireb ni ug rin’ kafram. Machane nap’an ni gu ra un ko machib, ma gu ma lemnag ni ke pi’ Jesus ba maruwel ni nggu rin’ ni bod rogon apostal Paul. Re n’ey e ma yibnag e felfelan’ ngog, ma ma ayuwegeg ni nge dab kug par ni gu be lemnag e tin nib kireb ni kug rin’, mu kug lemnag boch ban’en nib fel’ u murung’ageg, nge yafos rog, nge rogon e par rog boch nga m’on.”​—Ps. 51:3.

U m’on ni nge nang Allan e tin riyul’, ma boor e kireb ni i rin’ maku ir be’ nib ta cham. I gaar: “Kug ma sul ngaug lemnag e gafgow ni ug tay ko girdi’. Yu ngiyal’ e gu ra lemnag e re n’ey, ma ri ma k’aring e kireban’ ngog. Machane gu be pining e magar ngak Jehovah ni ke pag ba tadenen ni bodeg ni nge fek fare thin nib fel’ i yan ko girdi’. Nap’an ni gu ra guy ni ke motoyil e girdi’ ko fare thin nib fel’, ma ri ma puguran ngog feni rib manigil Jehovah nge rogon nri ma t’ufegey. Gu ma lemnag ni be fanayeg ni nggu ayuweg e girdi’ ni bay boch ban’en nib kireb ni ur rin’ed ni bod gag.”

Nap’an ni gad ra machib, ma aram e gad be rin’ ban’en nib fel’, ma kub fel’ e tin ni gad be lemnag. Re n’ey e ma micheg nga lanin’dad ni be runguydad Jesus, ma gad ba t’uf rok, ma be pagan’ ngodad.

N’umngin nap’an ni ka bay e re m’ag rok Satan ney, maku ra i kireban’dad ko kireb ni ud rin’ed kafram. Ere mang e ra ayuwegdad ni ngad chamgad ko biney e lem?

Bay be’ nib pin ni ka nog Jean ngak ni ka ma kireban’ ni bochan e n’en ni i rin’ u nap’an ni kab fel’ yangaren. Ngiyal’ nem e i dake be pigpig ngak Jehovah machane ka be rin’ boch ban’en nib kireb. I yog ni gaar: “Rug baadag e re n’ey ‘ni Got e ka ba ga’ nga lanin’dad.’” (1 John 3:19, 20) Ku arrogodad nrayog ni nge fel’ lanin’dad ni bochan e gad manang ni Jehovah nge Jesus e yow manang ni gad bogi tadenen. Dab mu pagtalin ni kar piew fare biyul u fithik’ e t’ufeg ni fan ngak e piin ni kar kalgadngan’rad ko kireb ni kar rin’ed, ma gathi fan ngak e piin ni yad ba flont.​—1 Tim. 1:15.

Faanra ud meybilgad ma gad be fal’eg i lemnag rogon e ngongol rok Jesus ngak e piin ndawor ra flontgad, ma gad be athamgil u rogon nrayog rodad ni ngad rin’ed fare maruwel ni machib ni ke pi’ ngodad, ma aram e rayog ni ngad micheged nga lanin’dad ni fare biyul e fan ngodad ni be’ nge be’. Faan gad ra rin’ ni aray rogon, ma aram e rayog ni nga dogned fapi thin ni yog Paul ni faani gaar: “Gub t’uf rok [Jesus] ma ke pi’ e pogofan rok ni fan ngog.”