1. Mang fan nthingar da folgad ko ginang ni pi’ Jesus?

I WELIY Jesus ko fare yiiy rok u murung’agen e tin tomuren e rran ni gaar: “Mu ayuwgad, ma dab mpaged gimed . . . [ko] pi n’en ni ma magafan’uy ngay ko biney e tamilang.” (Luke 21:34) Ba t’uf ni ngad folgad ko re ginang ney. Mang fan? Ya chiney e gad be mada’nag e magawon ni ku be mada’nag gubin e girdi’.

2. Mang boch e magawon ni be mada’nag pi walagdad ni ma k’aring e mochuch ngorad?

² Bay yu ngiyal’ ni ma yib boor e magawon ngodad ni taab yay ni ma k’aring e mochuch ngodad. Am lemnag e n’en ni ke buch ko pi cha’ ni baaray. Reb e Pi Mich ni ka nog John * ngak e bay ba mit e m’ar rok ni ka nog e multiple sclerosis ngay. Kub gel e kireban’ ni tay u nap’an ni chuw e ppin rok u tomuren 19 e duw ni kar mabgolgow. Ngemu’ miki tal l’agruw i ppin ni fak ndakur pigpiggow ngak Jehovah. Ku bay ba wu’ i mabgol ni ka nog Bob nge Linda ngorow ni kur mada’nagew boch e magawon nib thil ko magawon ni i mada’nag John. Kan n’agrow ko maruwel ma dakiyog ni ngar piew puluwon e naun ni yow be par riy. Ki yog e togta ngak Linda ni bay ba mit e m’ar ko gum’ircha’ rok nrayog ni nge yim’ riy, nge kub mit e m’ar ni ke kirebnag fithik’ i dow ndabkiyog ni nge cham ko m’ar.

3. Mang e rayog ni nge pagan’dad ngay nrogon ni bay ko Filippi 4:6, 7?

³ Rayog ni nge pagan’dad ni Jehovah ni Ir e Sunmiydad maku ir e Chitamangidad ni ma t’ufegdad e manang rogon lanin’dad u nap’an ni kad mochuchgad. Baadag ni nge ayuwegdad ni ngad athamgilgad u fithik’ e magawon ni gad be mada’nag. (Mu beeg e Filippi 4:6, 7.) Boor ban’en ko Thin rok Got ni be weliy murung’agen boch e magawon ni i yan e pi tapigpig rok u fithik’. Ku be weliy rogon ni ayuwegrad Jehovah ni ngar athamgilgad u fithik’ e pi magawon nem ni i k’aring e mochuch ngorad. Chiney e ngad weliyed murung’agen boch i yad.

4. Mang boch e magawon ni i mada’nag Elijah, ma uw rogon Jehovah u wan’?

⁴ I pigpig Elijah ngak Jehovah u ba ngiyal’ nib mo’maw’ e par riy ma boor e magawon ni i mada’nag nib mo’maw’. Ahab nreb fapi Pilung nu Israel nde yul’yul’ e leengiy Jezebel ni be’ nib pin nib kireb ni ma liyor ngak Baal. Ra guyew rogon ni nge garer e liyor ni yibe tay ngak Baal u lan e re nam nem, ma boor e profet rok Jehovah nra thangew e fan rorad. Machane Elijah e yag ni nge mil ndan li’ nge yim’. Ki yag ni nge par nib fos u nap’an ni yib e uyungol ko re nam nem ni bochan e i taga’ ngak Jehovah. (1 Ki. 17:2-4, 14-16) Maku reb e, ki taga’ Elijah ngak Jehovah u nap’an ni togopuluw ngak e pi profet nge piin ni yad be liyor ngak Baal. I pi’ e athamgil nga laniyan’ piyu Israel ni ngar liyorgad ngak Jehovah. (1 Ki. 18:21-24, 36-38) Ere boor yay ni guy Elijah rogon ni be yororiy Jehovah ma be ayuweg u nap’an ni be mada’nag boch e magawon nib mo’maw’.

5-6. Uw rogon e lem rok Elijah nrogon ni bay ko 1 Kings 19:1-4? Uw rogon ni ke dag Jehovah nib t’uf Elijah rok?

⁵ Mu beeg e 1 Kings 19:1-4. Machane nap’an ni guy Jezebel ni leengin e en Pilung rogon ni nge li’ Elijah nge yim’, ma aram me rus Elijah. Ere mil nge yan ko fare binaw nu Beersheba. Ri mulan’ nib gel, ma aram mi “i athpeg u wan’ ni manga yigi yim’.” Mang fan ni lem ni aray rogon? Elijah e “be’ ni ku bod gadad” nde flont. Rogon e lem rok e ku bod rogon e lem rodad. (Jas. 5:17) Rayog ni kari mochuch ma kki aw parawon. Maku reb e, sana ki lemnag ni athamgil ni ke tay ni nge ayuweg e girdi’ ni ngar liyorgad ngak Jehovah e ke yan i aw nib m’ay fan, ma dariy be’ u  Israel ni be liyor ngak Jehovah ya kemus ni yigoo ir. (1 Ki. 18:3, 4, 13; 19:10, 14) Sana gad ra gin nga rogon e lem ni i tay Elijah. Machane bin riyul’ riy e, manang Jehovah rogon laniyan’.

⁶ De puwan’ Jehovah ngak Elijah ni ke weliy laniyan’, ya ayuweg ni ngki yib gelngin bayay. (1 Ki. 19:5-7) Boch nga tomuren me yal’uweg Jehovah e lem rok Elijah u fithik’ e sumunguy. I rin’ boch ban’en ni nge dag ngak feni gel gelngin. Ki yog ngak ni ka bay 7,000 e girdi’ u Israel ndarur liyorgad ngak Baal. (1 Ki. 19:11-18) Pi n’ey ni rin’ Jehovah e dag ngak Elijah nib t’uf rok.

7. Bochan ni kad nanged rogon ni ayuweg Jehovah Elijah, ma mang e be micheg e re n’ey ngodad?

⁷ Ga be mada’nag reb e magawon ni be k’aring e mochuch ngom, fa? Rayog ni nge fel’ lanin’dad ni bochan e kad nanged ni manang Jehovah rogon laniyan’ Elijah! Re n’ey e be micheg ngodad ni ku manang rogon e mochuch ni gad ma tay. Manang e tin ndabiyog rodad ma manang e n’en ni gad ma lemnag nge rogon lanin’dad. (Ps. 103:14; 139:3, 4) Faan gad ra folwok rok Elijah ngad taga’gad ngak Jehovah, ma aram e ra ayuwegdad ni ngad athamgilgad u fithik’ e pi magawon ni gad be mada’nag ni be k’aring e mochuch ngodad.​—Ps. 55:22.

8. Uw rogon nra ayuwegem Jehovah ni ngam athamgil u fithik’ e pi n’en ni be k’aring e mochuch ngom?

⁸ Mochuch e rayog ni nge k’aringem ni ngam lemnag ndabi chuw e magawon rom, miki k’aringem ni nge mulan’um. Faanra buch e re n’ey rom ma dab mu pagtalin nra ayuwegem Jehovah ni ngam athamgil u fithik’ e pi n’en ni be k’aring e mochuch ngom. Uw rogon nra ayuwegem? Be pi’ e athamgil nga lanin’um ni ngam weliy e magawon rom ngak nge rogon lanin’um. Ga ra meybil ngam ning e ayuw ngak ma ra fulweg taban. (Ps. 5:3; 1 Pet. 5:7) Ere um meybil ngak Jehovah ngaum weliy e magawon rom ngak. Dabi non ngom ni bod rogon ni non ngak Elijah, machane ra non ngom u daken e Thin rok ni bay u lan e Bible nge ulung rok. Pi cha’ ni ga ma beeg murung’agrad u Bible e rayog ni nge fal’eg lanin’um, miki pi’ e athap ngom. Ku arrogon e pi walag ni ku rayog ni ngar pied e athamgil nga lanin’um.​—Rom. 15:4; Heb. 10:24, 25.

9. Uw rogon nrayog ni nge ayuwegdad reb e fager rodad ni be pagan’dad ngak?

⁹ I yog Jehovah ngak Elijah ni nge pi’ boch e maruwel rok ngak Elisha. Aray rogon ni pi’ Jehovah reb e fager nib manigil ngak Elijah nrayog ni nge ayuweg u nap’an ni ke mulan’. Ere ku arrogodad nnap’an ni gad ra weliy e pi n’en ni bay u lanin’dad ngak reb e fager rodad ni be pagan’dad ngak, ma aram e rayog ni nge ayuwegdad ni ngad athamgilgad u fithik’ e mochuch ni gad be tay. (2 Ki. 2:2; Prov. 17:17) Faanra ga be lemnag ndariy be’ nrayog ni ngam weliy lanin’um ngak, ma aram e rayog ni ngam meybil ngak Jehovah ni nge ayuwegem ngam pirieg reb e Kristiano ni ke ilal ko tirok Got ban’en nrayog ni nge pi’ e athamgil nga lanin’um.

10. Uw rogon ni n’en ni ke buch rok Elijah e be pi’ e athap ngodad, ma uw rogon nrayog ni nge ayuwegdad e n’en ni kan micheg ko Isaiah 40:28, 29?

¹⁰ I ayuweg Jehovah Elijah ni nge athamgil u fithik’ e mochuch ni be tay me ulul ko pigpig ni i tay ngak u lan boor e duw nib yul’yul’. N’en ni ke buch rok Elijah e be pi’ e athap ngodad. Bay yu ngiyal’ nrayog ni ngad mochuchgad nib elmerin ma aram me aw parowdad. Machane faan gad ra taga’ ngak Jehovah, ma aram e ra pi’ gelngidad ni ngad ululgad ko pigpig ni gad be tay ngak.​—Mu beeg e Isaiah 40:28, 29.

11-13. Uw rogon ni magawon dalip e tapigpig rok Got kakrom ni bochan e mochuch ni ur ted?

¹¹ Ku bay boch e girdi’ ni be weliy e Bible murung’agrad ni kub gel e mochuch ni ur ted. Hannah e ba gel e mochuch ni i tay ni bochan e dabiyog ni nge diyen ni ban’en nib gel e tamra’ riy.  Ku bay e bin baaram e ppin ko pumoon rok ni yugu be yog e thin nib kireb ngak. (1 Sam. 1:2, 6) Ere bochan e mochuch ni i tay Hannah ma aram fan nrib gel e kireban’ ni i tay. I par ni yugu be yor ma dakir kay ban’en.​—1 Sam. 1:7, 10.

¹² Immoy yu ngiyal’ ni i mochuch David ni Pilung. Am lemnag e pi magawon ni i mada’nag. Ba gel e mochuch ni i tay ni bochan e yugu be lemnag urngin e kireb ni ke rin’. (Ps. 40:12) Ki chel Absalom ni fak nib t’uf rok nge togopuluw ngak, me boch nga tomuren min li’ nge yim’. (2 Sam. 15:13, 14; 18:33) Ku bay reb e fager rok nib chugur e tha’ u thilrow ni chel nge togopuluw ngak. (2 Sam. 16:23–17:2; Ps. 55:12-14) Boor e tang ni yoloy David ni be weliy rogon e mulan’ ni i tay nge rogon ni i pagan’ ngak Jehovah.​—Ps. 38:5-10; 94:17-19.

¹³ Boch nga tomuren miki tabab reb e psalmist ni nge awan’ nga rogon e par ko girdi’ nib kireb. Cha’ney e rayog ni ir owchen Asaf nreb e Levite ni ma pigpig ko “tempel” u Jerusalem. Mochuch ni tay e re psalmist ney e k’aring ni nge daki felfelan’ ma daki fel’ u wan’ e tin ni bay rok. Ki tabab ni nge lemnag nde gaman e tow’ath ni be yag ngak ko pigpig ni be tay ngak Got.​—Ps. 73:2-5, 12-14, 16, 17, 21.

14-15. Mang e gad be fil ko fa dalip i tapigpig rok Jehovah ni be weliy e Bible murung’agrad u rogon ni ngad sapgad ngak Jehovah ni nge ayuwegdad?

¹⁴ Fa dalip i tapigpig rok Jehovah ni kad weliyed murung’agrad e yad gubin ni ur taga’gad ngak ni nge ayuwegrad. Ur weliyed e magafan’ rorad ngak u daken e meybil, nge urngin ban’en ni i k’aring e mochuch ngorad, maku yad be ulul ni nga ranod nga tagil’ e liyor rok Jehovah.​—1 Sam. 1:9, 10; Ps. 55:22; 73:17; 122:1.

¹⁵ I runguyrad Jehovah nge fulweg taban e meybil rorad. Hannah e yag ni nge gapas laniyan’. (1 Sam. 1:18) Me David e yoloy ni gaar: “En nib mat’aw e boor e gafgow ni ma yib ngak,  machane i Somol e ma chuweg u fithik’ ni gubin.” (Ps. 34:19) Fare psalmist e boch nga tomuren me thamiy ni gowa ke “kol” Jehovah pa’ be pow’iy u daken e fonow ni be pi’ ngak u fithik’ e t’ufeg. I tang ni be gaar: “Gag e kari felan’ug, ya gu be par u tooben Got! U fithik’ Somol ni Got e kug par riy ndabi buch ban’en rog.” (Ps. 73:23, 24, 28) Mang e gad be fil ko pi cha’ney? Bay yu ngiyal’ ni gad ma mada’nag e magawon nib gel ni ma k’aring e mochuch ngodad. Machane faan gad ra fal’eg i lemnag rogon ni ke ayuweg Jehovah boch e girdi’, ma gad taga’ ngak u daken e meybil, ma gad fol rok ni aram e ngad rin’ed e tin ni ke yog ni ngad rin’ed, ma aram e rayog ni ngad athamgilgad u fithik’ e pi magawon nem.​—Ps. 143:1, 4-8.

16-17. (a) Mang fan ndab da palognaged gadad rok Jehovah nge girdi’ rok? (b) Uw rogon nrayog ni nge yib e athamgil nga lanin’dad?

¹⁶ Bay ban’en ni kub ga’ fan ni gad ra fil ko fa dalip i tapigpig rok Jehovah ni kad weliyed murung’agrad. Susun e dab da palognaged gadad rok Jehovah nge girdi’ rok. (Prov. 18:1) Nancy nib gel e mochuch ni tay u nap’an ni chuw e pumoon rok e yog ni gaar: “Boor e rran ni dabug ni ngguy ara nggu non ngak be’. Machane n’umngin nap’an ni gu be par ni gub palog ko girdi’ mfin aram e be mun daken e kireban’ rog.” Machane nap’an ni tabab Nancy ni nge gay boch e kanawo’ nrayog ni nge ayuweg yugu boch e girdi’  riy ni ku yad be mada’nag e magawon, ma aram me thil rogon ni i lemnag e magawon rok. I yog ni gaar: “Gu ma motoyil u nap’an ni be weliy boch e girdi’ e magawon rorad. Kug guy nnap’an nug tabab ni ngaug lemnagrad nge magawon rorad, ma aram me yag ni nge dab kug par ni yigoo gag nge magawon rog e gu be lemnag.”

¹⁷ Nap’an ni gad ra un ko muulung, ma aram e rayog ni nge yib e athamgil nga lanin’dad. Gad ra rin’ e re n’ey ma aram e gad be bing e kanawo’ ngak Jehovah ni nge ‘ayuwegdad me fal’eg lanin’dad.’ (Ps. 86:17) Ireray e gin ni ma pi’ gelngidad riy u daken gelngin nib thothup, nge Thin rok, nge girdi’ rok. Nap’an ni gad ra un ko muulung, ma aram e rayog ni nge ‘fel’ rogodad’ ko michan’ ko pi walag me bagadad me pi’ e athamgil nga laniyan’ bagadad. (Rom. 1:11, 12) Bay reb e walag nib pin ni ka nog Sophia ngak ni gaar: “Ke ayuwegeg Jehovah nge pi walag ni nggu athamgil u fithik’ e magawon rog. Rib ga’ fan e muulung u wan’ug. Kug guy ni faanra yoor e tayim ni gu be tay ni fan ko machib nge pi walag u lan e ulung, ma aram e be mom rogon ni nggu athamgil u fithik’ e mochuch nge magafan’ ni gu be tay.”

18. Mang e rayog ni nge rin’ Jehovah ni fan ngodad u nap’an ni ke mulan’dad?

¹⁸ Nap’an nra mulan’dad ma dab da paged talin ni gathi kemus ni ke micheg Jehovah nra chuweg e pi n’en ni be k’aring e mochuch ngodad ni manemus boch nga m’on, ya kki yog nrayog ni nge ayuwegdad e ngiyal’ ney ni ngad athamgilgad u fithik’ e pi n’en ni be k’aring e mochuch ngodad. Ra ‘pingeg lanin’dad ni nge m’agan’dad ngay’ me yib gelngidad ya nge yag nda athamgilgad u fithik’ e pi n’en ni be k’aringdad ni nge mulan’dad ma gad lemnag ndakuriy e athap rodad.​—Fil. 2:13.

19. Mang e be micheg e Roma 8:37-39 ngodad?

¹⁹ Mu beeg e Roma 8:37-39. Ke micheg apostal Paul ngodad ndariy ban’en nrayog ni nge daregdad ko t’ufeg rok Got. Uw rogon nrayog ni ngad ayuweged e pi walag ni yad be guy rogon ni ngar athamgilgad u fithik’ e pi n’en ni be k’aring e mochuch ngorad? Bin migid e article e gad ra weliy riy rogon ni ngad folwokgad rok Jehovah ngad runguyed pi walagdad ni yad be mochuch ma gad ayuwegrad.