1. Mang reb e ban’en nri gad baadag u rarogon Jesus? Mu tamilangnag.

REB e ban’en nri gad baadag u rarogon Jesus e manang rarogon e pi magawon ni gad ma mada’nag ni bochan e dawor da flontgad. Nap’an ni immoy u fayleng ma i ‘un ko felfelan’ ngak e piin ni kar felfelan’gad,’ ma be un ko “meyor ngak e piin ni yad be yor.” (Rom. 12:15) Bod nnap’an ni sul 70 i gachalpen ni kar ra felfelan’gad u tomuren e machib ni kar ted, ma aram me suguy gelngin Got nib thothup “Jesus ko felfelan’.” (Luke 10:17-21) Maku reb e, nap’an ni guy gelngin e kireban’ ni ke tay e girdi’ rok Lazarus u nap’an ni ke yim’, ma aram “me ri taganan’.”​—John 11:33.

2. Mang e k’aring Jesus ni nga i dag e runguy ko girdi’?

² Yugu aram rogon ni Jesus e ir be’ nib flont, ma mang e k’aring ni nga i dag e runguy ko girdi’ ni tadenen ma be taganan’ ngorad? Bin som’on, Jesus e ba t’uf e girdi’ rok. Kad weliyed ko fa binem e article ni “ba fel’” e girdi’ u wan’. (Prov. 8:31) Bochan nib t’uf e girdi’ rok ma aram e n’en ni k’aring ni nge nang rogon laniyan’ e girdi’. I weliy apostal John ni gaar: “Ri manang Jesus e n’en ni be lemnag e girdi’.” (John 2:25) Ri ma taganan’ ko girdi’. Maku arrogon e girdi’ ni yad ma thamiy rogon e t’ufeg ni be dag ngorad, ma aram e n’en ni i k’aringrad ni ngar adaged ni ngar motoyilgad ko fare thin nib fel’. Ku arrogodad ni faanra ud runguyed e girdi’, ma aram e rayog ni ngad ayuweged yad u nap’an e machib.​—2 Tim. 4:5.

3-4. (a) Faanra gad ma runguy e girdi’, ma ra uw rogon e machib u wan’dad? (b) Mang e gad ra weliy ko re article ney?

³ Manang apostal Paul nib milfan ngak ni nge machib, maku arrogodad. (1 Kor. 9:16) Machane, faanra gad ma runguy e girdi’, ma aram e gathi kemus nra ud machibgad ni bochan e ban’en nthingar da rin’ed, ya gad ra machib ni bochan e ba t’uf e girdi’ rodad ma gad baadag ni ngad ayuweged yad. Ku gad manang ni  “ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Faanra aray rogon ni gad ma lemnag e machib, ma aram e rayog ni ngad felfelan’gad ko machib ni gad be tay.

⁴ Re article ney e gad ra weliy riy rogon ni ngad daged e runguy ko girdi’ u nap’an e machib. Som’on e gad ra weliy e n’en nrayog ni ngad filed rok Jesus u rogon ni ma lemnag e girdi’. Ngemu’ ma gad weliy aningeg e kanawo’ u rogon ni ngad folwokgad rok.​—1 Pet. 2:21.

5-6. (a) Mini’ e piin ni i runguyrad Jesus? (b) Mang fan ni i runguy Jesus e piin ni i machibnagrad nrogon ni kan yiiynag ko Isaiah 61:1, 2?

⁵ Am lemnag reb e kanawo’ ni ma dag Jesus e runguy riy. Immoy bayay ni kari aw parowrad pi gachalpen ni bochan e machib ni ka ur ted. Dawori yag ni ngar ‘abichgad,’ me piningrad ‘nga ranod nga bang ndariy be’ riy nga yugu ra toffangad buchuuw.’ Yugu aram rogon, me m’on boor e girdi’ nga ranod ra songad ko gin ni be sor Jesus nge pi gachalpen ngay. Ere mang e rin’ Jesus u nap’an nra tawgad ngaram, me guy e pi girdi’ nem? “Ri taganan’ * ngorad, ya yad bod e saf nde moy e en ni ma gafaliyrad rorad. Ma aram me tabab i machibnag boor ban’en ngorad.”​—Mark 6:30-34.

⁶ Am lemnag fan ni i taganan’ Jesus ko girdi’. I guy ni pi girdi’ nem e “yad bod e saf nde moy e en ni ma gafaliyrad rorad.” Dabisiy ni guy Jesus ni bay boch i yad nib gafgow ma kub gel e maruwel ni be tay ni nge ayuweg chon e tabinaw rok. Sana ku bay boch i yad ni ke yim’ be’ nib t’uf rok. Ere dabisiy ni manang Jesus rogon e magawon ni yad be mada’nag. Kad weliyed ko fa binem e article nsana bay boch e pi magawon ney ni i mada’nag Jesus. Ma lemnag rarogon e girdi’ ma baadag ni nge fal’eg lanin’rad.​—Mu beeg e Isaiah 61:1, 2.

7. Uw rogon ni ngad folwokgad rok Jesus?

⁷ Mang e gad be fil ko n’en ni i rin’ Jesus? Ku gad bod Jesus ya ke liyegdad e girdi’ ni “yad bod e saf nde moy e en ni ma gafaliyrad rorad.”  Boor e magawon ni be mada’nag e pi girdi’ ney. Machane, bay ban’en rodad nib t’uf rorad, ni aram fare thin nib fel’ ni murung’agen Gil’ilungun Got. (Rev. 14:6) Ere aram fan ni gad be folwok ko en ni ir e Masta rodad gad be machibnag fare thin nib fel’ ni bochan e gad be “runguy e piin ni meewar ma ba gafgow.” (Ps. 72:13) Gad be runguy e girdi’ ma gad baadag ni ngad ayuweged yad.

8. Mang reb e kanawo’ nrayog ni ngad daged e runguy u nap’an e machib? Mu weliy rogon ni kan susunnag.

⁸ Mang e rayog ni nge ayuwegdad ni ngad runguyed e piin ni gad ma machibnag? Ba t’uf ni ngaud lemnaged rogon e lem ko pi girdi’ nem, ma gad rin’ ngorad e tin ni gad baadag ni ngar rin’ed ngodad. * (Matt. 7:12) Chiney e ngad weliyed aningeg e kanawo’ nrayog ni ngad rin’ed e re n’ey riy. Som’on e ngad lemnaged e n’en nib t’uf rok be’ nge be’. Nap’an ni gad ra yan ko machib ma taareb rogodad ko togta. Reb e togta nib manigil e ma lemnag e n’en nib t’uf u reb e m’ar ngu reb. Ma fith boch e deer ko m’ar maku ma motoyil u nap’an ni be weliy be’ e m’ar rok. Yugu dabi pos me dugliy rogon e re miti tafalay ni nge tay ngak be’, ya ra pag ba ngiyal’ ni nge yan ya nge yag ni fal’eg i yaliy e n’en ni be buch ko fare m’ar mfini dugliy rogon e re miti tafalay ni nge tay ngak. Ku arrogodad nsusun e gathi taab kanawo’ e ngad fanayed ni ngad machibnaged e girdi’ riy. Ya ngad fal’eged i yaliy rarogon be’ nge be’ nge rogon boch ban’en u wan’.

9. Mang e yugu dab da lemnaged u rarogon e girdi’? Mu tamilangnag.

⁹ Nap’an ni ga ra mada’nag be’ u nap’an e machib, ma yugu dab mu lemnag ni ga manang rarogon facha’ ara n’en nib mich u wan’ nge fan nib mich fapi n’em u wan’. (Prov. 18:13) Ba t’uf ni ngam fith boch e deer ngak facha’ u fithik’ e gonop ya nge yag nim nang boch ban’en u rarogon nge n’en nib mich u wan’. (Prov. 20:5) Faanra ba puluw ko yalen ko nam rom ni ngan rin’, ma aram e rayog ni ngam fith murung’agen e maruwel rok, nge gin ni yib riy, nge rogon laniyan’ u boch ban’en. Faan gad ra fith boch e deer, ma aram e gad be pag facha’ ni nge yog ngodad fan nib t’uf ni nge nang fare thin nib fel’. Ma nap’an ni gad ra nang fan nib t’uf ni nge nang fare thin nib fel’, ma aram e rayog ni ngad daged e runguy ngak ma gad ayuweg ko n’en nib t’uf rok ni bod ni rin’ Jesus.​—Mu taarebrogonnag ko 1 Korinth 9:19-23.

10-11. Mang e bin l’agruw e kanawo’ nrayog ni ngad daged e runguy ko girdi’ nrogon nib puluw ko 2 Korinth 4:7, 8? Mu weliy ban’en ni ke buch.

¹⁰ Bin migid, mu susunnag u lanin’um rogon e par rorad. Gad manang fan rarogon e pi n’en ni be buch rorad. Bin riyul’ riy e gad gubin ndawor da flontgad, ere ku bay e magawon rodad. (1 Kor. 10:13) Gad manang nib mo’maw’ e  par ko re m’ag ney. Kemus ni yigoo Jehovah e rayog ni nge ayuwegdad ni ngad athamgilgad. (Mu beeg e 2 Korinth 4:7, 8.) Machane faan ga ra lemnag e piin ndariy e tha’ u thilrad Jehovah, mab mudugil nib mo’maw’ e par rorad u lan e re m’ag ney ni bochan e der ayuwegrad Jehovah. Ere be taganan’dad ko pi girdi’ ney ma gad baadag ni ngad feked fare “thin nib fel’” i yan ngorad ni murung’agen ban’en ni kab pag feni fel’.​—Isa. 52:7.

¹¹ Am lemnag e n’en ni buch rok reb e walag ni ka nog Sergey ngak. Nap’an ndawori fil e tin riyul’ ma ir be’ nib tamra’ ma gathi ri ma non. Ba mo’maw’ ngak ni nge non ko girdi’. Munmun ma aram me un ko fol Bible. I yog ni gaar: “Nap’an nug fil e Bible, ma aram mug nang nib milfan ko piin Kristiano ni ngar weliyed e michan’ rorad ngak yugu boch e girdi’. Rug lemnag ndabiyog ni nggu rin’ e re n’ey.” Machane nap’an ni par nge lemnag rarogon e piin ndawor rrung’aged e tin riyul’, me nang nib mo’maw’ rogon e par rorad ni bochan e dar nanged Jehovah. Ki ulul ngay ni gaar: “Rib gel e felfelan’ nge gapas ni tay lanin’ug ni bochan e pi n’en nib beech ni kug fil. Kug nang nib t’uf ni ngki nang yugu boch e girdi’ e pi thin ney.” Nap’an ni gel e runguy rok Sergey ko girdi’, ma aram me yag ni nge machib ndaki rus. I yog ni gaar: “Kug gin ngay ni bochan e kug guy nnap’an ni kug weliy e thin nu Bible ko girdi’ ma ke yag ni nge gel boch e pagan’ rog. Re n’ey e ki gelnag e michan’ rog ko pi n’en ni ka fin gu fil.”

12-13. Mang fan nib t’uf ni ngad gum’an’gad u puluwon e piin ni gad ma machibnagrad? Mu weliy rogon ni kan susunnag.

¹² Bin dalip, mu gum’an’nagem u puluwon e piin ni ga be machibnagrad. Dab mu pagtalin nsana bay boch e tin riyul’ u lan e Bible nri gad manang machane yad e darur lemnaged. Maku boor i yad e kari mich boch e machib u wan’rad. Sana rayog ni yad be lemnag ni teliw rorad e ir e be ayuweg e yalen rorad ni nge par, ma be chugurnag thilrad chon e tabinaw rorad, nge girdi’ u lan e binaw rorad. Ere uw rogon ni ngad ayuweged yad?

¹³ Am lemnag e re n’ey: Ra uw rogon ni faanra ke kireb ba wethal nib t’uf ni ngan thilyeg? Ba ga’ ni yira ngongliy reb e wethal nib beech nga  tooben ma ka yibe yan u daken fa bin baaram e wethal ni ke n’uw nap’an. Ma nap’an nra m’ay i ngongliy fare wethal, ma aram min buthug fa binem e wethal ni ke n’uw nap’an. Ere ku arrogon nu m’on ni nga dogned ngak be’ ni nge digey e pi n’en ni ke mich u wan’ “kafram,” ma som’on e ba t’uf ni ngad ayuweged ni nge ga’ fan u wan’ e tin riyul’ ni “ka fini fil” ni immoy nde nang kafram. Fin aram e ngiyal’ ni yad ra thilyeg lanin’rad u boch ban’en. Rayog nib t’uf ba ngiyal’ nib n’uw nap’an ni ngad ayuweged e girdi’ ni ngar thilyeged boch ban’en u rarogorad.​—Rom. 12:2.

14-15. Uw rogon ni ngad ayuweged e piin nri buchuuw ara dariy ban’en ni yad manang u murung’agen e yafos ni manemus u fayleng? Mu weliy ban’en ni ke rin’ be’.

¹⁴ Faanra gad be gum’an’ u puluwon e girdi’ u nap’an e machib, ma aram e dab da lemnaged ni ngar nanged fan ara m’agan’rad ko tin riyul’ u lan e Bible ko yay nsom’on ni ka fin rung’aged. Bochan e runguy rodad ngorad ma aram e n’en nra k’aringdad ni ngad ayuwegdad yad ni ngar fal’eged i lemnag e n’en ni be yog e Bible ni buchuuw ma buchuuw. Am lemnag rogon ni gad ra ayuweg be’ ni nge fal’eg i lemnag murung’agen e athap ko yafos ni manemus u paradis u fayleng. Boor e girdi’ e ri buchuuw ara dariy ban’en ni yad manang u murung’agen e re machib ney. Rayog nsana ba mich u wan’rad nnap’an nra yim’ be’ ma dakuriy e athap rok. Fa reb e yad ma lemnag ni gubin e girdi’ nib fel’ e goo yad ra yan nga tharmiy. Ere uw rogon nrayog ni ngad ayuweged yad?

¹⁵ Baaray rogon ni ke yog reb e walag ni ma ayuweg e girdi’ ni nge tamilang u wan’rad murung’agen e athap ko yafos ni manemus u fayleng. Som’on e ma beeg e Genesis 1:28. Ngemu’ me fith ngak facha’ ko uw e baadag Got ni nge par e girdi’ riy nge rarogon e par ni baadag ni ngar ted. Yooren e girdi’ e ma lungurad, “Baadag ni ngar pared u fayleng ni ke fel’ e par rorad.” Bin migid, me beeg e Isaiah 55:11 me fith ko be lemnag facha’ ni ke thil e n’en nib m’agan’ Got ngay fa dawor. Ba ga’ ni ma yog facha’ ni danga’. Tomur riy ma aram me beeg e Psalm 37:10, 11, me fith ko ra uw rogon e par ko girdi’ boch nga m’on. Bochan ni ma fanay e Bible ni aray rogon, ma aram rogon ni ke yag ni nge ayuweg boor e girdi’ ni ngar nanged ni kab m’agan’ Got ngay ni nge par e girdi’ u fayleng ni manemus.

16-17. Mang boch e kanawo’ nrayog ni ngad daged e runguy riy nrogon nib puluw ko Proverbs 3:27? Mu susunnag.

¹⁶ Bin aningeg, mu lemnag rogon ni ngam dag ko girdi’ ni ga be lemnagrad. Gur, ba kireb e ngiyal’ ni ka darod nga tafen be’, fa? Faanra aray rogon, ma rayog ni ngad weniggad ngak ma gad yog ni bay kud sulod ko ngiyal’ nib fel’. Ma uw rogon ni faanra ba t’uf e ayuw rok facha’ u ban’en? Fa reb e kad mada’naged be’ nib m’ar ara ke pilibthir ndabkiyog ni nge yan nga bang mab t’uf e ayuw rok u ban’en? Faanra aray rogon, ma rayog ni ngad ayuweged facha’.​—Mu beeg e Proverbs 3:27.

¹⁷ Bay reb e walag nib pin ni rin’ bochi ban’en nib achig ni fan ngak be’, me yib angin nib fel’.  Bochan ni ke kireban’ nga ba tabinaw ni ke yim’ reb i fakrad, ma aram me yoloy bangi babyor nge pi’ ngorad. Ki yoloy boch e thin nu Bible nrayog ni nge fal’eg lanin’uy ko gi babyor nem. Ere mang e rin’ e re tabinaw nem? I yoloy e chitiningin e re tir nem ni gaar: “Kari kireban’ug fowap. Machane, rib gel e ayuw ni ke tay e gi babyor ney ni kam yoloy ngomad. Kammagar ko gi babyor ney, ya kari fal’eg lanin’mad. Sana ba chugur i gaman 20 yay ni kug beeg e gi babyor ney fowap. Rib sumunguy e thin riy, ma kari fal’eg lanin’mad. Ere karim magar.” Dariy e maruwar riy ni faan gad ra guy rogon ni ngad nanged rarogon e piin ni yad be gafgow ma gad guy rogon ni ngad ayuweged yad, ma aram e rayog ni nge yib angin nib fel’.

18. Mang e susun ndab da paged talin u murung’agen e machib ni gad ma tay nrogon nib puluw ko 1 Korinth 3:6, 7, ma mang fan?

¹⁸ Gad baadag ni nge puluw rogon e lem rodad ko machib ni gad ma tay. Riyul’ ni gad be un i ayuweg e girdi’ ni ngar nanged murung’agen Got, machane gin th’abi ga’ fan ko re maruwel ney e gathi gadad e gad be rin’. (Mu beeg e 1 Korinth 3:6, 7.) Jehovah e ir e be pow’iy e girdi’ ngak. (John 6:44) Bin riyul’ riy e ra be’ ma ir rok e ra dugliy ko nge motoyil ko fare thin nib fel’ fa danga’ ni be yan u rogon e n’en ni bay u gum’irchaen. (Matt. 13:4-8) Dab mu pagtalin ni boor e girdi’ nde m’agan’rad ko thin ni i machibnag Jesus ni yugu aram rogon ni ir e bin th’abi fel’ e Sensey ni immoy! Ere, susun e dabi mulan’dad ni faanra boor ko piin ni gad be guy rogon ni ngad ayuweged yad e dubrad ni ngar motoyilgad ngodad.

19. Mang angin nra yib ni faanra ud daged e runguy u nap’an e machib?

¹⁹ Faanra ud daged e runguy u nap’an e machib ma rayog ni nge yib angin ngodad. Ya ri gad ra felfelan’ ko machib ni gad ma tay. Kub gel e felfelan’ ni gad ra tay ni bochan e gad be pi’ ban’en ngak be’. Maku reb e, gad be momnag ngak e piin ni yad baadag “ni nge yog e yafos ndariy n’umngin nap’an ngorad” ni nge m’agan’rad ko fare thin nib fel’. (Acts 13:48) Ere, “urngin ngiyal’ nra puf rogodad ma ngad ngongliyed e ngongol nib fel’ ngak urngin e girdi’.” (Gal. 6:10) Faan gad ra rin’ ni aray rogon, mab gel e felfelan’ ni gad ra tay ya gad be pining e sorok ngak e Chitamangidad ni bay u tharmiy.​—Matt. 5:16.