RA BAGADAD ma baadag ni ngan lemnag ni ir be’ nib fel’. Machane, rib mo’maw’ ngodad ni ngad manged girdi’ nib fel’ e ngiyal’ ney ni bochan e boor e girdi’ ni kar “dabuyed e tin nib fel’.” (2 Tim. 3:3) Dubrad ni ngar folgad ko n’en ni be yog Jehovah. Ya tin ni be yog Got nib fel’, e yad be yog nib “kireb,” ma tin ni be yog Got nib kireb e yad be yog ‘nib fel’.’ (Isa. 5:20) Ku bay yu ngiyal’ nib mo’maw’ ni ngad rin’ed e tin nib fel’ ni bochan rogon e chugol nni tay ngodad nge ku bochan e dawor da flontgad. Ere rayog ni ngad lemgad ni bod Anne * ni be’ ni ke yoor e duw ni ke pigpig ngak Jehovah. I yog ni gaar, “Rib mo’maw’ ngog ni nggu lemnag nrayog ni nggu mang be’ nib fel’.”

Machane, gad gubin nrayog ni ngad athamgilgad ni ngad rin’ed e tin nib fel’! Re n’ey e reb e fel’ngin ni ma yibnag gelngin Got nib thothup, ma gad manang ni kab gel gelngin Got nib thothup ko ngongol nib kireb ni ke liyegdad nge pi meewar rodad. Ere chiney e ngad weliy murung’agen e re fel’ngin ney ya nge yag nda nanged rogon ni nge m’ug rodad nib fel’ rogon.

Re n’ey ni ngan fel’ ngak e girdi’ e ba muun ngay rogon e ngongol nge lem ni gad ma tay. Be’ nib manigil e gubin ngiyal’ ni ma guy rogon ni nge ayuweg e girdi’ me rin’ boch ban’en nib fel’ ni fan ngorad.

Sana kam guy boch e girdi’ ni yad ma rin’ boch ban’en nib fel’ ni fan ngak chon e tabinaw nge fager rorad. Machane gur, ireray e gin ni nge mus e re fel’ngin ney riy? Riyul’ ndabiyog ni ngad daged e re fel’ngin ney nrib fel’ rogon, ya be yog e Bible ni “dariy be’ u fayleng ni goo tin nib mat’aw e ma ngongliy ni gubin ngiyal’ ma der ma oloboch.” (Ekl. 7:20, BT) I tamilangnag apostal Paul ni gaar: “Gu manang ni tin nib fel’ e der par u fithik’ag ni aram rarogog nrogon e girdi’.” (Rom. 7:18) Ere faanra gad baadag ni ngad mon’oggad u rogon ni gad ma dag e re fel’ngin ney, mab puluw ni ngad ninged e ayuw ngak e En ke yib rok.

Jehovah Got e ir e ma dugliy e tin nib fel’. Be weliy e Bible murung’agen ni gaar: “Ri gab manigil​—ma gab gol! Mu fil ngog e tin ka mog ni ngan rin’.” (Ps. 119:68, BT) Chiney e ngad weliyed l’agruw ban’en u rogon feni manigil Jehovah ni kan weliy ko re verse ney.

Ba manigil Jehovah. Jehovah e ir reb e Got nrib manigil, ere dabiyog ni nge dabi rin’ e tin nib fel’ ban’en. Gubin pi fel’ngin nib peth nga rogon ni ir reb e Got nib manigil. Mu lemnag e n’en ni buch u nap’an ni gaar Jehovah ngak Moses: “Bay gu gagiyegnag nge yib ramaeg nib fel’ i th’ab p’eowchem ngam guy.” Ere dag Jehovah ngak Moses ramaen nib fel’ nib muun ngay rarogon ni ir reb e Got nrib manigil. I rung’ag Moses ba lam ni be weliy murung’agen Jehovah ni be gaar: “I Somol, i Somol e ir fare Got nri ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad. Tin ni ke yog ngak boor i biyu’ e girdi’ ni bay rin’ ngorad e dabi thil, ma n’ag fan u wan’ e tin ni kan rin’ nde mat’aw, nge tin nib kireb, nge denen; machane dabi fek owchen fe pag ndabi gechignag pi fakay.” (Ex. 33:19; 34:6, 7) Re n’ey e be tamilangnag ni Jehovah e ma m’ug e tin nib fel’ u fithik’ urngin ban’en ni ma rin’. Aram fan ni yugu aram rogon ni Jesus e ir e taare girdi’ ni immoy nib fel’, me yog ni gaar: “Dariy taabe’ nib fel’ ya ke mus ni yigoo Got e ba fel’.”​—Luke 18:19.

Ba manigil e tin ma rin’ Jehovah. Gubin ban’en ni ma rin’ Got e ma m’ug e tin nib fel’ riy. “Ba fel’ e tin ni ma rin’ ngak urngin e girdi’, ma ma runguy urngin e tin ni ke sunumeg.”  (Ps. 145:9) Bochan nib manigil Jehovah ma der ma laniyan’, ma aram fan ni ke pi’ e yafos ngak urngin e girdi’ nge tin nib t’uf rorad ya nge yag nra pared ni yad ba fos. (Acts 14:17) Ku ma gagiyel ni ir reb e Got nib manigil u nap’an nra n’ag fan e kireb rodad. I yoloy fare psalmist ni gaar: “Gur e gab gol ngomad ma ga ma n’ag fan u wun’um e kireb romad.” (Ps. 86:5, BT) Ere rayog ni nge pagan’dad ni Jehovah e dabi “siyeg ban’en nib fel’ ni nge pi’ ngak e piin ni yad be rin’ e tin nib mat’aw.”​—Ps. 84:11.

Kan sunmiydad ni gad bod yaan Got. Ere rayog ni ngad manged boch e girdi’ nib manigil ma gad rin’ e tin nib fel’ ban’en. (Gen. 1:27) Be pi’ e Thin rok Got e athamgil nga laniyan’ e pi tapigpig rok ni ngar ‘rin’ed’ e tin nib fel’. (Isa. 1:17) Machane, uw rogon ni ngad nanged rogon i rin’ e tin nib fel’? Am lemnag dalip e kanawo’ nrayog ni ngad rin’ed e re n’ey riy.

Bin som’on, rayog ni ngad yibilayed gelngin Got nib thothup. Re gelngin ney e rayog ni nge ayuweg e piin Kristiano ni ngar rin’ed e tin nib fel’. (Gal. 5:22) Arrogon, rayog ni nge ayuwegdad gelngin Got nib thothup ni ngad adaged e tin nib fel’ ma gad siyeg e tin nib kireb. (Rom. 12:9) Bin riyul’ riy e, be yog e Bible nrayog ni nge gelnagdad Jehovah ni ‘nguud rin’ed ma gad be yog urngin e tin nib fel’.’​—2 Thess. 2:16, 17.

Bin migid, thingar ud beeged e Thin rok Got ni kan thagthagnag. Faan gad ra rin’ ni aray rogon, ma aram e rayog ni nge skulnagdad Jehovah u rogon ni ngad ‘nanged ko mang e ngad rin’ed,’ me ayuwegdad ni ‘ngad rin’ed urngin mit e ngongol nib fel’.’ (Prov. 2:9; 2 Tim. 3:17) Lanin’dad e bod bangi ban’en ni yima chaariy e machaf ngay. Nap’an ni gad ra beeg e Bible ma gad fal’eg i lemnag, ma aram e gad be suguy lanin’dad ko tin nib fel’. Re n’ey e rayog ni ngan taarebrogonnag ko fagi n’en ni gad ma chaariy e machaf ngay ni gad be suguy boch ban’en nib tolang puluwon ngay nrayog ni nge ayuwegdad boch nga m’on.​—Luke 6:45; Efe. 5:9.

Bin dalip, ngad athamgilgad u rogon nrayog rodad ni ngad ‘folwokgad ko tin nib fel’.’ (3 John 11) Bay murung’agen boch e girdi’ u lan e Bible nrayog ni ngad folwokgad rorad. Jehovah nge Jesus e aram e gali cha’ ni kar dagew e bin th’abi fel’ e kanawo’ nrayog ni ngad folwokgad riy. Machane, ku bay boch e girdi’ ni ur rin’ed boch ban’en nib fel’. L’agruw i yad e aram Tabitha nge Barnabas. (Acts 9:36; 11:22-24) Rayog ni ngam fal’eg i fil murung’agrow u Bible, mag tay fanam i yan u boch ban’en ni ur rin’ew ni ngar ayuwegew yugu boch e girdi’. Mu fal’eg i lemnag rogon nrayog ni ngam ayuweg boch e girdi’ u lan e tabinaw nge ulung rom. Maku reb e, dab mu pagtalin angin ni yib ngorow ni bochan e ur rin’ew boch ban’en nib fel’ ni fan ngak yugu boch e girdi’. Faan ga ra rin’ ni aray rogon maku rayog ni nge yib angin ngom.

Ku rayog ni ngad lemnaged boch e girdi’ e ngiyal’ ney ni yad ma rin’ e tin nib fel’. Am lemnag e piin piilal u lan e ulung nib gel e maruwel ni yad ma tay ma yad “ba adag e tin nib fel’.” Ku arrogon e pi walag nib pin ni yad ba yul’yul’ ni yad ma dag ko thin nge ngongol rorad ni yad e piin ni yad ma ‘fil e tin nib fel’’ ko girdi’. (Titus 1:8; 2:3) Reb e walag nib pin ni ka nog Roslyn ngak e yog ni gaar: “Bay  reb e fager rog nib pin ni ma athamgil u rogon nrayog rok ni nge ayuweg e girdi’ u lan e ulung ma be pi’ e athamgil nga lanin’rad. Ma lemnag rarogorad maku ma pi’ bochi tow’ath ngorad ara ayuwegrad u yugu boch e kanawo’. Cha’ney e gu ma tay ni ir be’ nrib manigil.”

Be pi’ Jehovah e athamgil nga laniyan’ e pi tapigpig rok ni ngar ‘guyed rogon ngar rin’ed e tin nib mat’aw.’ (Amos 5:14) Faan gad ra rin’ ni aray rogon, ma aram e gathi kemus ni gad ra adag e pi n’en nib fel’ u wan’ Jehovah ya ku gad ra adag ni ngad rin’ed e tin nib fel’.

Dab da lemnaged ni faanra ngad rin’ed e tin nib fel’ ma aram e be yip’ fan ni ngad rin’ed boch ban’en ni yugu ba pag feni fel’ ni fan ngak yugu boch e girdi’ ara da pied boch e tow’ath ngorad nib tolang puluwon. Baaray rogon nrayog ni ngan susunnag: Be’ ni ma jingo’ e dabiyog ni yugu taab yay ara l’agruw yay ni nge thiy e brush rok u daken bangi ban’en me yib yaan ban’en riy, ya thingari achey ni boor yay mfini gagiyel yaan ban’en riy. Ku arrogodad ni faanra ud pared ma gad be rin’ nochi ban’en nib achig ni fan ngak yugu boch e girdi’, ma aram e ra m’ug riy ni gad boch e girdi’ nib manigil.

Be pi’ e Bible e athamgil nga lanin’dad ni ngad ‘pared’ ni ke “bung” rogodad nrayog ni ngad rin’ed e tin nib fel’. (2 Tim. 2:21; Titus 3:1) Faan gad ra tedan’dad ko pi n’en ni be buch rok yugu boch e girdi’, ma aram e rayog ni ngad pirieged boch e kanawo’ nrayog ni nga darod nga laniyan’ e piin nib migid ngodad ya nge yag nda ayuweged yad ni ‘nge gel e michan’ rorad ngak Somol.’ (Rom. 15:2) Re n’ey e ba muun ngay ni ngad pied ngorad boch ban’en ni bay rodad. (Prov. 3:27) Rayog ni ngad pininged be’ nga tafedad ni ngad abichgad u taabang ara ngad sabethingad me bagadad me pi’ e athamgil nga laniyan’ bagadad. Faanra gad manang be’ nib m’ar, ma rayog ni ngad yoloyed e babyor ngad pied ngak, ara darod da guyed ngad nanged salpen, ara da callnaged. Arrogon, boor e kanawo’ nrayog ni nga dogned boch e thin riy nra ayuweg be’ ‘ni fa mit nem e thin ni ma fonownag e girdi’ me yib fan ngorad, fan e tin ni nga dogned e nge rin’ e tin nib fel’ ban’en ngak e piin ni kar motoyilgad ngodad.’​—Efe. 4:29.

Gad ma gay rogon ni ngad rin’ed e tin nib fel’ ni fan ngak urngin e girdi’ ni bod rogon Jehovah. Aram fan nib taareb rogon e girdi’ u wan’dad. Reb e kanawo’ nrib manigil nrayog ni ngad rin’ed e re n’ey riy e aram e ngad machibnaged fare thin nib fel’ ni murung’agen Gil’ilungun Got ngak urngin e girdi’. Ku gad ma guy rogon ni ngad daged e ngongol nib fel’ ngak e piin ni yad be fanenikaydad ni bod rogon ni ke tay Jesus chilen ni ngad rin’ed. (Luke 6:27) Dariy ban’en nib kireb riy ni ngad golgad ko girdi’ ma gad rin’ e tin nib fel’ ni fan ngorad, ya “dariy ba motochiyel nib togopluw ko pi n’ey.” (Gal. 5:22, 23) Faan gad ra rin’ e tin nib fel’ ni yugu aram rogon ni yibe togopuluw ngodad ara gad be mada’nag e skeng, ma aram e rayog ni ngad ayuweged boch e girdi’ ni ngar bad ko tin riyul’ ma gad pining e sorok ngak Got.​—1 Pet. 3:16, 17.

“Girdi’ nib manigil e yad ra fek puluwon e gafarig rorad nib fel’.” (Prov. 14:14, BT) Mang boch e tow’ath nra yag riy ngodad? Faanra ba fel’ e ngongol rodad ko girdi’, ma dabisiy ni ku yad ra rin’ e ngongol nib fel’ ngodad. (Prov. 14:22) Mus ni faanra bay boch i yad ndabi dag e ngongol nib fel’ ngodad, ma faan gad ra ulul i rin’ e tin nib fel’ ngorad ma rayog ni nge munguy lanin’rad boch nga m’on.​—Rom. 12:20.

Boor e walag ni ka rogned nib ga’ angin ni ke yib ngorad ni bochan e kar athamgilgad ni ngar rin’ed e tin nib fel’ mar digeyed e tin nib kireb ban’en. Am lemnag e n’en ni buch rok Nancy. I yog ni gaar: “Gu ilal ma gag be’ ndariy fan ban’en u wan’ug, mab kireb e ngongol rog, maku da gur ma tayfan e girdi’. Machane, nap’an nug nang e n’en nib m’agan’ Got ngay mug fol rok, ma aram me yag ni nggu pirieg e felfelan’. Chiney e keb fag u wan’ug.”

Bin th’abi ga’ i fan ni gad ma rin’ e tin nib fel’ e bochan e ngad felfelan’naged Jehovah. Yugu aram rogon nder guy e girdi’ e n’en ni gad be rin’, machane be guy Jehovah. Manang urngin ban’en nib fel’ ni gad ma rin’ nge tin ni gad ma lemnag. (Efe. 6:7, 8) Mang angin nra yib ngodad? “I Somol e ba fel’ u wan’ e girdi’ nib manigil.” (Prov. 12:2, BT) Ere ngad athamgilgad ngaud rin’ed e tin nib fel’, ya ke micheg Jehovah ni “ra pi’ e gapas ngak urngin e piin ni yad be rin’ e tin nib fel’.”​—Rom. 2:10.