ARTICLE NI NGAN FIL 38
“Mired Ngog, . . . Mu Gu Pi’ e Toffan Ngomed”
“Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed.”—MATT. 11:28.
TANG 17 “Gu Baadag”
TIN NI YIRA WELIY *
1. Mang e ke micheg Jesus ko Matthew 11:28-30?
BAY ban’en nrib manigil ni micheg Jesus ngak ba ulung i girdi’ ni kar muulunggad yad be motoyil ngak. I gaar: “Mired ngog, . . . mu gu pi’ e toffan ngomed.” (Mu beeg e Matthew 11:28-30.) Pi thin ney e gathi bogi thin ni kan micheg ndabi riyul’. Am lemnag e n’en ni rin’ ni fan ngak be’ nib pin ni bay ba mit e m’ar rok nrib gel e gafgow riy.
2. Mang e rin’ Jesus ni fan ngak fare pin nib m’ar?
2 Rib t’uf e ayuw ko re ppin ney. Boor e togta ni ke yan i guy ni be athapeg ni ngar golnaged ko m’ar rok. Machane tomuren 12 e duw ma dariy be’ ni ke yag ni nge golnag. Rogon ni bay ko fare Motochiyel e re ppin ney e be par nib taay. (Lev. 15:25) Ere rung’ag murung’agen Jesus ni be golnag e piin yad ba m’ar, ma aram mi i yan ni be gay. Nap’an ni pirieg ma aram me math nga taban e mad rok ma ka chingiyal’ nem me gol! Machane gathi kemus ni golnag Jesus e re ppin ney, ya ki dag e t’ufeg nge tayfan ngak. I dag nib t’uf rok ma be tayfan ni aram e fanay fare bugithin ni “fakag” u nap’an ni be non ngak. Ba mudugil nre n’ey e pi’ e athamgil nga laniyan’ fare pin miki pi’ gelngin!—Luke 8:43-48.
3. Mang boch e deer ni gad ra weliy e fulweg riy?
3 Mu tay fanam i yan riy ni fare pin e ir e yan ngak Jesus. Ku arrogodad e ngiyal’ ney nthingar da athamgilgad nga ‘darod ngak’ Jesus. Piin yad ba m’ar ni yad be ‘yan ngak’ Jesus e ngiyal’ ney e dabi golnagrad u daken e maang’ang, machane ka be gaar ngodad: “Mired ngog, . . . mu gu pi’ e toffan ngomed.” U lan e re article ney e gad ra weliy riy e fulweg ko re lal i deer ni baaray ni be gaar: Uw rogon ni nga ‘darod ngak’ Jesus? Mang e yip’ Jesus fan u nap’an ni gaar: “Mfeked e mat’ rog ngam tiyed nga pomed”? Mang e gad ra fil rok Jesus? Mang fan ni fare maruwel ni ke pi’ Jesus e ra pi’ e toffan ngodad? Ma uw rogon nrayog ni ngaud pirieged e toffan u tan e mat’ rok Jesus?
“MIRED NGOG”
4-5. Mang boch e kanawo’ nrayog ni nga ‘darod’ riy ngak Jesus?
4 Reb e kanawo’ ni nga ‘darod’ riy ngak Jesus e aram e ngad filed gubin ban’en nrayog ni ngad filed u murung’agen e tin i weliy nge tin i rin’. (Luke 1:1-4) Ba milfan ngodad ni ngad filed e n’en ni be weliy e Bible u murung’agen Jesus. Kud ‘bad ngak’ Jesus u nap’an ni kad dugliyed ni ngad uned ko taufe, ma gad mang reb i gachalpen.
5 Ku reb e kanawo’ ni nga ‘darod’ riy ngak Jesus e aram e nga darod ko piin piilal u lan e ulung u nap’an ni ke t’uf e ayuw rodad. Ma fanay Jesus e pi pumoon ney ni yad boch e “tow’ath” ni ngar ayuweged e pi saf rok. (Efe. 4:7, 8, NW, 11; John 21:16; 1 Pet. 5:1-3) Ba t’uf ni gadad e nga darod ko piin piilal ngad ninged e ayuw ngorad. Dab da lemnaged ni manang e piin piilal e n’en bay u lanin’dad nge tin nib t’uf rodad. Am lemnag e n’en ni yog reb e walag ni ka nog Julian ngak. I gaar: “Nap’an nug chuw u Bethel ni bochan e kug m’ar, ma aram me yog reb e fager rog ngog ni nggog ko piin piilal ni ngar bad ra guyed gag ngar pied e athamgil nga lanin’ug. Som’on e gu lemnag nde t’uf ni nggu rin’ e re n’ey. Machane faani boch nga tomuren, ma aram mug ning e ayuw me yib e piin piilal ra guyed gag ngar pied e athamgil nga lanin’ug. Aram reb e tow’ath nrib manigil ni ke yag ngog.” Piin piilal ni yad ba yul’yul’ ni bod fa gal piilal nranow ra guyew Julian, e rayog ni ngar ayuweged gadad ngad nanged rogon “laniyan’ Kristus” ni aram e be yip’ fan ni ngad nanged fan rogon ni ma lem ma gad folwok riy. (1 Kor. 2:16; 1 Pet. 2:21) Rriyul’ ni ireray reb e tow’ath nib manigil nrayog ni ngar pied ngodad.
“MFEKED E MAT’ ROG NGAM TIYED NGA POMED”
6. Mang e be yip’ Jesus fan u nap’an ni gaar: “Mfeked e mat’ rog ngam tiyed nga pomed”?
6 Nap’an ni gaar Jesus: “Mfeked e mat’ rog ngam tiyed nga pomed,” ma rayog ni n’en ni be yog e be gaar, “Nge m’agan’um nga mat’awug ni kan pi’.” Ku rayog ni be gaar, “Mu un ngog ngad fekew e mat’ rog ma gadow maruwel u taabang ni fan ngak Jehovah.” Demtrug rogon ma re mat’ ney e be yip’ fan e maruwel nib t’uf ni ngad rin’ed.
7. Mang maruwel e kan pi’ ngodad ni ngad rin’ed, ma mang e rayog ni nge pagan’dad ngay nrogon ni bay ko Matthew 28:18-20?
7 Nap’an ni gad ra ognag e yafos rodad ngak Jehovah ngad uned ko taufe, ma aram e ke m’agan’dad ngay ni nga darod ngak Jesus. Be pining Jesus gubin e girdi’ ni nga ranod ngak, ma dabi siyeg be’ nriyul’ ni baadag ni nge pigpig ngak Got. (John 6:37, 38) Gubin pi gachalpen Kristus ni kan tow’athnagrad ni aram e rayog ni ngar uned i rin’ fare maruwel ni yog Jehovah ngak Jesus ni nge rin’. Ba pagan’dad ni gubin ngiyal’ ni bay Jesus rodad ni nge ayuwegdad ko re maruwel ney.—Mu beeg e Matthew 28:18-20.
“MI GIMED FOLWOK ROG”
Mu baudeg laniyan’ e girdi’ ni bod ni rin’ Jesus (Mu guy e paragraph 8-11) *
8-9. Mang fan ni piin nib sobut’an’rad e yad baadag ni nga ranod ngak Jesus? Mang boch e deer ni ngad fithed gadad riy?
8 Piin nib sobut’an’rad e yad baadag ni nga ranod ngak Jesus. (Matt. 19:13, 14; Luke 7:37, 38) Mang fan? Am lemnag e n’en nib thil rok Jesus nge pi Farise. Pi tayugang’ ko teliw nem e darur daged e t’ufeg mab tolangan’rad. (Matt. 12:9-14) Ma Jesus e ir be’ ni ma t’ufegey mab sobut’an’. Pi Farise e yad baadag ni ngan nangrad me ga’ farad u wan’uy. Machane i yog Jesus nde fel’ ni ngaun lem ni aray rogon. I fil ngak pi gachalpen ni nge sobut’an’rad mar rin’ed boch ban’en ni fan ko girdi’. (Matt. 23:2, 6-11) Pi Farise e yad ma fanay gelngirad ni ngar k’aringed e marus ko girdi’ ya ngan fol rorad. (John 9:13, 22) Machane Jesus e i pi’ e toffan ngak e girdi’ ni aram e i dag e t’ufeg ngorad, ma be non ngorad u fithik’ e sumunguy.
9 Ere kam fil ban’en rok Jesus, fa? Mu fithem ni nge lungum: ‘Yimanangeg ni gag be’ ni gub munguy ma gub sobut’an’, fa? Ba m’agan’ug ngay ni nggu rin’ boch e maruwel nde ga’ fan u wan’uy ni fan ngak yugu boch e girdi’, fa? Gub gol ko girdi’, fa?’
10. Uw rogon e maruwel ni i tay Jesus nge boch e girdi’ u taabang?
Luke 10:1, 19-21) I pi’ e athamgil nga laniyan’ pi gachalpen ni ngaur fithed e deer, ma baadag ni nge motoyil ko pi n’en bay u lanin’rad. (Matt. 16:13-16) I par pi gachalpen Jesus ni yad ba gel ko tirok Got ban’en ni bod e woldug ni yibe ayuweg nib fel’ rogon ya nge dabi yim’ u nap’an nib kireb e yafang, ara nap’an nib gel e garbeb, ara nap’an ni ke yib e nifeng nib gel. Ur motoyilgad nib fel’ rogon ko pi n’en ni i machibnag Jesus ngorad me yib wom’engirad u daken e ngongol nib fel’ ni yad be rin’.
10 Piin ni ur maruwelgad Jesus u taabang e i guy rogon ni ngar maruwelgad u fithik’ e gapas, ma baadag ni ma skulnagrad. (Mu guy rogon ni nge mom ni ngan non ngom mag gol ko girdi’
Mu par ni gab pasig
Mu sobut’nag lanin’um mag maruwel nib gel *
11. Mang boch e deer nthingar da fithed gadad riy?
11 Ga bay u reb e liw ni ga ma tay murung’agen boch ban’en, fa? Faanra aray rogon, me ere ngam fithem ni nge lungum: ‘Uw rogon e ngongol rog ngak e piin gamad nga maruwel ara chon e tabinaw rog? Gu ma guy rogon ni nggu maruwelgad u fithik’ e gapas nge felfelan’, fa? Gu ma pi’ e athamgil nga lanin’rad ni ngaur fithed boch ban’en, fa? Ba m’agan’ug ngay ni nggu motoyil ko n’en ni bay u lanin’rad, fa?’ Dubdad ni ngad boded e pi Farise. Pi Farise e faanra der mich u wan’ e girdi’ e pi n’en yad be fil ma yad ma damumuw, maku yad ma gafgownag e piin nib thil rogon e lem rorad ko tin yad be lemnag.—Mark 3:1-6; John 9:29-34.
“MI GIMED PIRIEG E TOFFAN”
12-14. Mang fan ni fare maruwel ni ke pi’ Jesus ni ngad rin’ed e ra pi’ e toffan ngodad?
12 Mang fan ni maruwel ni ke pi’ Jesus ni ngad rin’ed e ra pi’ e toffan ngodad? Boor fan, machane baaray in ni ngad weliyed.
13 Rib manigil e piin yad ma yarmiy rogon e maruwel rodad. Jehovah ni ir e En Th’abi Tolang ni Be Yarmiy Rogon e Maruwel rodad e gathi ir be’ nib kireb nder ma lemnag e maruwel ni gad be rin’ ni fan ngak, ya bin riyul’ riy e rib ga’ fan u wan’. (Heb. 6:10) Ku ma pi’ gelngidad ni ngad rin’ed e maruwel nib milfan ngodad. (2 Kor. 4:7; Gal. 6:5) Jesus ni Pilung rodad e ki dag e kanawo’ ngodad u rogon e ngongol ni ngaud daged ko girdi’. (John 13:15) Ma piin piilal ni yad ma ayuwegdad e yad ma guy rogon ni ngar folwokgad rok Jesus ni ir e “en ni Ga’ ni ma gafaliy e saf.” (Heb. 13:20; 1 Pet. 5:2) Yad ma guy rogon ni ngar daged e gol ngodad, mi yad pi’ e athamgil nga lanin’dad, mar daged ndarur rusgad u nap’an ni yad be pow’iydad ma yad be ayuwegdad.
14 Bay e tin th’abi fel’ e fager rodad. Dakuriy boch e girdi’ nga bang ni bay e fager rorad ni ma t’ufegrad ni bod rogon e pi fager rodad. Ku dariy reb e maruwel nga bang ni ma yibnag fan e yafos rodad ni bod rogon fare maruwel ni kan pi’ ngodad. Am lemnag e re n’ey: Gad ma maruwel e pi walag u taabang nib fel’ pangirad, ma darur lemnaged ni ka yad ba fel’ ko tin ka bay e girdi’. Yugu aram rogon ni boor ban’en ni yad ba salap riy, machane darur ufgad. Ku yad ma tay nib ga’ fan e tin ka bay e girdi’ ngorad. Gathi kemus ni yad ma tay ni gad boch e girdi’ ni gad ma maruwel u taabang, ya ku yad ma tay ni gad boch e fager rorad. Ma t’ufeg ni bay u thildad e rib gel nra m’agan’rad ngay ni ngar m’ad ni fan ngodad!
15. Susun ni nge uw rogon u wan’dad e maruwel ni gad ma rin’?
15 Gad be rin’ e bin th’abi fel’ e maruwel. Gad ma fil e tin riyul’ u murung’agen Jehovah ko girdi’, ma gad ma micheg nde riyul’ e pi ban rok Moonyan’. (John 8:44) Ma gafgownag Satan e girdi’ u daken boch e ban ni ma k’aringrad ni ngar lemnaged ndakuriy e athap rorad. Bod ni baadag ni nge mich u wan’dad ndabi n’ag Jehovah fan e kireb rodad ma dariy rogon ni ngan t’ufegdad. Pi ban ney e ba kireb, ma ma k’aring e girdi’ ni nge mulan’rad! Nap’an ni gad ra ‘yan ngak’ Kristus ma yira n’ag fan e denen rodad. Bin riyul’ riy e, gad gubin nri gad ba t’uf rok Jehovah. (Rom. 8:32, 38, 39) Ri gad ma felfelan’ u nap’an ni gad ra ayuweg e girdi’ ngar nanged rogon ni ngar taga’gad ngak Jehovah, ma gad guy rogon ni ke thil e par rorad ke manigil!
NGAUM PIRIEG E TOFFAN U TAN E MAT’ ROK JESUS
16. Uw rogon ni pi n’en ni ke pag fan Jesus ngodad ni ngad rin’ed e ba thil nga yugu boch ban’en nib milfan ngodad ni ngad rin’ed?
16 Pi n’en ni ke pag fan Jesus ngodad ni ngad rin’ed e ba thil nga yugu boch ban’en nib milfan ngodad ni ngad rin’ed. Bod nu tomuren ni gad ra mu’ ko maruwel u reb e rran, ma gathi kemus ni ke aw parowdad ya ku darud felfelan’gad. Machane rib thil e re n’ey ko pigpig ni gad ma tay ngak Jehovah nge Kristus, ya tomuren ni gad ra rin’ boch ban’en ni fan ko pigpig rodad ngorow, ma ri gad ma felfelan’. Rayog nsana ke aw parowdad ko maruwel u reb e rran mab t’uf ni ngad athamgilgad ni ngad uned ko muulung ko rofen nem ni blayal’. Machane nap’an ni gad ra sul nga tabinaw u tomuren e muulung, ma ke baud lanin’dad ma ke sul gelngidad bayay. Ku arrogon nnap’an ni gad ra athamgil ni ngad uned ko machib ma gad tay e fol Bible ni yigoo gadad, ma ma baud lanin’dad miki sul gelngidad bayay.
17. Mang e thingar da nanged u rarogodad, ma mang e ngad gonopiyed?
17 Thingar da nanged nra bagadad ma rogon gelngin, ere thingar da gonopiyed urngin e tin gad be rin’. Bod nrayog ni ngaud fanayed gelngidad ni ngad guyed rogon ni nge yoor e chugum rodad. Mu tay fanam i yan ko n’en ni yog Jesus ngak be’ nib moon ni boor ban’en rok. I fith e re moon nem ngak Jesus ni gaar: “Mang e thingar gu rin’ me yog e yafas ndariy n’umngin nap’an ngog?” Re moon nem e ma fol ko fare Motochiyel. Maku rayog ni ir be’ nib manigil ni bochan e yog Mark u lan e Gospel rok “ni ke runguy [“ba t’uf rok,” NW]” Jesus e re moon nem. Ere gaar Jesus ngak: “Mman ngam pi’ ni chuway’ urngin ban’en ni ba’ rom, . . . ma ga yib ngam un ngog.” Baadag e re moon nem ni nge lek Jesus machane dabun ni nge digey e chugum rok ni bochan e ba “pire’ ban’en rok.” (Mark 10:17-22) N’en ni buch e siyeg ni nge fek fare mat’ ni ke ognag Jesus ngak me ulul ni nge mang sib ko “salpiy.” (Matt. 6:24) Faan gomanga gur e re moon nem, ma mang e ga ra rin’?
18. Mang e ba t’uf ni ngad rin’ed yu ngiyal’, ma mang fan?
18 Yu ngiyal’ e ba fel’ ni ngad fal’eged i lemnag e n’en ni gad be m’oneg u lan e yafos rodad. Mang fan? Ya bochan e ngad nanged ko gad be fanay gelngidad u fithik’ e gonop fa danga’. Am lemnag e n’en ni yog be’ nib pagel ni ka nog Mark ngak. I gaar: “Boor e duw ni ug lemnag ni kug momnag e par rog. Yugu aram rogon ni gu ma pioneer, machane yug gu ma lemnag murung’agen e salpiy nge rogon ni nge fel’ rogon e par rog. Ere ug par ngaug lemnag ko mang fan ni ke yoor pa’ nga puluwog. Mfin aram e gu nang ni gu be m’oneg e tirog ban’en ma chuuw ni ke magey ko tayim rog nge gelngig e ir e gu be pi’ ngak Jehovah.” I yal’uweg Mark e lem rok nge rogon e par rok ya nge yag ni yoor ban’en ni rin’ ni fan ko pigpig rok ngak Jehovah. Ki yog ni gaar: “Ka ma magafan’ug yu ngiyal’ ko salpiy, machane bochan e ayuw rok Jehovah nge Jesus ma ke yag ni nggu gel ko pi magawon rog.”
19. Mang nib ga’ fan ni nge puluw rogon e lem rodad u boch ban’en?
19 Rayog ni ngaud pirieged e toffan u tan e mat’ rok Jesus ni faan gad ra rin’ e re dalip i n’en ni baaray. Bin som’on, nge puluw rogon e lem rodad u boch ban’en. Gad be rin’ e maruwel rok Jehovah, ere thingar da rin’ed u rogon kanawoen ni baadag. Gadad girdien e maruwel ma Jehovah e ir e Masta rodad. (Luke 17:10) Faanra ngad rin’ed e re maruwel ney u rogon kanawoen ni gad baadag, ma aram e gadad e gad be gafgownagdad. Mus ngab garbaw ni pumoon nib gel gelngin ni bay u tan e mat’, ma rayog ni nge maad’ad miki aw parawon ni faanra yugu be guy rogon ni nge sor ko gin baadag, fa guy rogon ni nge chuw u tan fare mat’ ni be gagiyegnag e masta rok. Machane faan gad ra maruwel u kanawoen ni baadag Jehovah, ma aram e rayog ni ngad rin’ed boch ban’en ndad lemnaged nrayog rodad. Ku gad ra gel nga boch e magawon ndarud lemnaged nrayog ni ngad gelgad ngay. Dab mu pagtalin ndariy be’ nrayog ni nge taleg Jehovah ndabi lebguy e n’en nib m’agan’ ngay!—Rom. 8:31; 1 John 4:4.
20. Mang e bin nib puluw i fan ni ngad feked e mat’ rok Jesus?
20 Bin migid, nge puluw fan ni gad be rin’ boch ban’en. N’en ni gad be nameg e ngad pininged e sorok ngak Jehovah ni Chitamangidad ni ma t’ufegdad. Girdi’ ni ur moyed u nap’an Jesus ni ur rin’ed boch ban’en ni bochan e yad ba chogow ma yad baadag ni nge yag boch ban’en ngorad ni yad e nge fel’ rogorad riy e de yag ni ngar pirieged e felfelan’, ma aram mar chuwgad u tan e mat’ rok Jesus. (John 6:25-27, 51, 60, 66; Fil. 3:18, 19) Machane piin nriyul’ nib t’uf Got nge girdi’ rorad e yad ba felfelan’ ngay ni ngar feked e re mat’ nem ngar ted nga porad u n’umngin nap’an e yafos rorad u roy u fayleng. Athap ko pi girdi’ ney e aram e ngar pigpiggad Kristus u tharmiy. Ere ku arrogodad ni gad ra par ni gad ba felfelan’ ni faanra ba puluw fan ni gad be fek e mat’ rok Jesus.
21. Mang e rayog ni nge pagan’dad nra rin’ Jehovah nrogon ni bay ko Matthew 6:31-33?
21 Bin dalip, nge pagan’dad ni bay Jehovah nra ayuwegdad. Kad dugliyed ni ngaud paged fadad u boch ban’en ma ngad maruwelgad nib gel. I yog Jesus u m’on riy ni yira gafgownagdad. Machane rayog ni nge pagan’dad ndemtrug e re miti magawon ni gad ra mada’nag, ma ra pi’ Jehovah gelngidad ni ngad athamgilgad u fithik’. Faanra ud pared ni gad be athamgil ma aram e rayog ni nge gel e michan’ rodad. (Jas. 1:2-4) Ku rayog ni nge pagan’dad nra pi’ Jehovah e tin nib t’uf rodad, ma ra pow’iydad Jesus, ma ra pi’ e pi walag e athamgil nga lanin’dad. (Mu beeg e Matthew 6:31-33; John 10:14; 1 Thess. 5:11) Dakuriy ban’en nga bang nib t’uf rodad!
22. Mang e rayog ni ngad felfelan’gad ngay?
22 Fare pin ni golnag Jesus ko m’ar rok e rib ga’ ba toffan ni tay u tomuren ni kan golnag e rofen nem. Machane rayog ni nge pirieg e bin riyul’ e toffan nra par ni manemus ni faanra mang reb i gachalpen Kristus nib yul’yul’. Ere mang e ga be lemnag ni rin’? Am lemnag e tow’ath nra yag ngak ni aram e nge un ngak Jesus ko pigpig u tharmiy ni faanra ke dugliy ni nge fek e mat’ ni ke pi’ Jesus ngak! Pi n’en nra pag fan ni bochan e nge lek Kristus e dabi taareb rogon ko tow’ath nra yag ngak. Demtrug ko gad be athapeg e yafos ni manemus u tharmiy ara u fayleng, ma rayog ni ngad felfelan’gad ni ke m’agan’dad ngay ni ngad folgad ko fapi thin ni yog Jesus ni gaar: “Mired ngog!”
TANG 13 Ngan Folwok rok Kristus
^ par. 5 Be piningdad Jesus ni nga darod ngak. Mang e ba t’uf ni ngad rin’ed ni faanra nge m’agan’dad ni nga darod ngak Jesus? Re article ney e ra weliy e fulweg ko re deer ney, maku ra puguran ngodad rogon nrayog ni nge baud lanin’dad u nap’an ni gad be maruwel Kristus u taabang.