1. Mang fan nthingar da folgad rok Jehovah?

THINGAR da folgad * rok Jehovah ni bochan e ir e En Ke Sunmiydad. Aram fan ni bay mat’awun ni nge yog e n’en ni ngad rin’ed. (Rev. 4:11) Machane ku reb i fan nthingar da folgad rok e bochan ni ir e th’abi fel’ e gagiyeg rok. Kab kakrom i yib ni boor e girdi’ ni yad ma gagiyegnag yugu boch e girdi’. Machane faan yira taarebrogonnag e gagiyeg rorad ko gagiyeg rok Jehovah, ma gad ra guy ni Jehovah e ir e th’abi gonop, ma th’abi gel e t’ufeg nge runguy ni ma dag, ma dariy reb e Pilung ni taareb rogon ngak.​—Ex. 34:6; Rom. 16:27; 1 John 4:8.

2. Mang boch i fan ni ngad folgad rok Jehovah nrogon ni be tamilangnag e Hebrews 12:9-11?

² Baadag Jehovah ni ngad folgad rok ni bochan e ir e Chitamangidad ni gad ba t’uf rok, ma gathi ri bochan e gad be rus nri chey ma gad kirebnag laniyan’. I weliy Paul u lan e babyor ni yoloy nge pi’ ngak e pi walag ko ulung nu Hebrew nthingar da “folgad rok Got ni Chitamangidad” ni bochan e be skulnagdad ni “fan ngodad.”​—Mu beeg e Hebrews 12:9-11.

3. (a) Uw rogon ni ngad daged ni gad be fol rok Jehovah? (b) Mang l’agruw e deer ni gad ra weliy e fulweg riy?

³ Rogon ni gad ma fol rok Jehovah e aram e gad ma athamgil u rogon nrayog rodad ni ngad folgad u gubin ban’en ni ke yog, ma darud taga’gad ko tin gad manang. (Prov. 3:5) Ra mom ngodad ni  ngad folgad rok Jehovah ni faan gad ra fil murung’agen pi fel’ngin nrib manigil. Mang fan? Bochan e ma m’ug e pi fel’ngin nem u urngin ban’en ni ma rin’. (Ps. 145:9) Ra yoor ban’en nda nanged u murung’agen Jehovah, ma aram e ra gel feni t’uf rodad. Ma nap’an nra t’uf Jehovah rodad, ma aram e de t’uf ni nge tay boch e motochiyel ni boor ni ngad folgad riy ni bay rogon ko tin ni ngad rin’ed nge tin ndab da rin’ed. Gad ma athamgil ni ngad lemgad ni bod rogon ni baadag Jehovah, ma gad siyeg e tin nib kireb ban’en. (Am. 5:15) Machane yu ngiyal’ e rayog ni nge mo’maw’ ngodad ni ngad folgad rok Jehovah. Mang fan? Ma mang e rayog ni nge fil e piin piilal, nge pi matam, nge matin rok Nehemiah ni Governor, nge David ni Pilung, nge Maria ni chitiningin Jesus? Gad ra weliy e fulweg ko gal deer ney u lan e re article ney.

4-5. Mang fan nrayog ni nge mo’maw’ ngodad ni ngad folgad rok Jehovah nrogon ni bay ko Roma 7:21-23?

⁴ Reb i fan nrayog ni nge mo’maw’ ngodad ni ngad folgad rok Jehovah e bochan e denen ni ke af ngodad, maku dawor da flontgad. Ere gathi gubin ngiyal’ ni gad baadag ni ngad folgad rok Got. Nap’an ni togopuluw Adam nge Efa ngak Jehovah mar kew wom’engin fare ke gek’iy, ma aram e kar dugliyew rorow ko mang e ba fel’ ma mang e ba kireb. (Gen. 3:22) Yooren e girdi’ e ngiyal’ ney e darur folgad rok Jehovah, ma yad baadag ni yad rorad e ngar dugliyed e tin nib mat’aw nge tin nde mat’aw.

⁵ Mus ngak e piin yad manang Jehovah mab t’uf rorad e ku rayog ni nge mo’maw’ ngorad yu ngiyal’ ni ngar folgad rok Jehovah. Ireray e n’en ni buch rok apostal Paul. (Mu beeg e Roma 7:21-23.) Gad baadag ni ngad rin’ed e tin nib mat’aw u p’eowchen Jehovah ni bod rogon Paul. Machane ba t’uf ni gubin ngiyal’ ni ngad athamgilgad ni ngad siyeged e tin nib kireb ban’en.

6-7. Ku mang reb i fan nrayog ni nge mo’maw’ ngodad ni ngad folgad rok Jehovah? Mu weliy ban’en ni ke buch.

⁶ Ku reb i fan nrayog ni nge mo’maw’ ngodad ni ngad folgad rok Jehovah e bochan rogon e yalen ko gin nda ilalgad riy. Boor e girdi’ ni yad ma yog boch ban’en ngodad nib thil ko n’en ni be yog Jehovah. Ere rib t’uf ni ngad athamgilgad ni nge dab da lemgad ni bod rogon e pi cha’ney. Am lemnag reb e ban’en ni ke buch.

⁷ Bay boch e nam nib ga’ ni yima towasariy e pi fel’ yangaren riy ni ngar nameged ni nge yoor e salpiy rorad. Ireray e n’en ni buch rok reb e walag nib pin ni ka nog Mary * ngak. U m’on ni nge fil murung’agen Jehovah, ma i un nga reb e skul nib tolang ni bay ko nam rok. I guy rogon e tabinaw rok Mary ni ngar towasariyed ni nge yag reb e maruwel ngak nib tolang puluwon ya nge yoor e girdi’ ni tayfan. Mus ngak maku ireray e n’en ni baadag. Machane tomuren ni fil murung’agen Jehovah me t’uf rok, ma aram me thilyeg e tin be nameg. Machane de mom e re n’ey ngak. I yog ni gaar: “Yu ngiyal’ e gu ma pirieg boch e maruwel nrayog ni nge yag boor e salpiy riy ngog, machane gu manang nra magawonnag rogon e pigpig rog ngak Jehovah e chiney. Bochan rogon e chugol nni tay ngog, ma aram fan ni kub mo’maw’ ngog ni nggu siyeg e pi maruwel nem. Gu ma wenig ngak Jehovah ni nge ayuwegeg ni nggu siyeg boch e maruwel nrayog ni nge magawonnag e pigpig rog ngak.”​—Matt. 6:24.

8. Mang e ngad weliyed e chiney?

⁸ Gad ra fol rok Jehovah ma ra yib angin ngodad. Machane piin kan pi’ mat’awrad nrayog ni ngar ted murung’agen boch ban’en ni bod rogon e piin piilal, nge pi matam, nge matin e faan yad ra fol rok Jehovah ma aram e ku rayog ni ngar ayuweged boch e girdi’. Ngad weliyed murung’agen boch e girdi’ u Bible nrayog ni nge ayuwegdad ni ngad maruwelgad nga mat’awdad u reb e kanawo’ nib m’agan’ Jehovah ngay.

9. Mang boch e magawon ni mada’nag Nehemiah?

⁹ Ke pi’ Jehovah reb e maruwel nib ga’ fan ngak e piin piilal ni aram e ngar ayuweged e girdi’ rok. (1 Pet. 5:2) Boor ban’en nrayog ni nge fil e piin piilal rok Nehemiah u rogon e ngongol ni i dag ko girdi’ rok Jehovah. Bochan ni ir e governor u Judah ma aram fan ni boor ban’en ni i tay murung’agen. (Neh. 1:11; 2:7, 8; 5:14) Am lemnag boch e magawon ni mada’nag Nehemiah. Ke nang ni bay boch ban’en ni be rin’ e pi Jew u lan e tempel ni be darifannag e liyor ni yibe tay ngak Jehovah, maku darur pied e salpiy ngak e pi Levite nrogon ni bay ko Motochiyel. Ku bay boch e Jew ni yad be th’ab e motochiyel ko Sabbath, maku bay boch e pumoon ni yad be leay e ppin u boch e nam ndarur pigpiggad ngak Jehovah. Ere ba t’uf ni nge rin’ Nehemiah ni Governor ban’en ko re n’ey.​—Neh. 13:4-30.

10. Uw rogon ni pithig Nehemiah e pi magawon ni i mada’nag?

¹⁰ De fanay Nehemiah mat’awun ni nge towasariy e girdi’ ni ngar folgad ko n’en ni be lemnag ni ngan rin’. Machane i meybil u fithik’ e yul’yul’ ngak Jehovah ni be ning e ayuw rok, miki fil ngak e girdi’ e pi Motochiyel rok Jehovah. (Neh. 1:4-10; 13:1-3) Ki un ngak e pi girdi’ nem ngar maruwelgad u taabang ni ngar ngongliyed bayay fare yoror u Jerusalem.​—Neh. 4:15.

11. Susun ni nge uw rogon e ngongol ko piin piilal ngak e pi walag u lan e ulung nrogon ni bay ko 1 Thessalonika 2:7, 8?

¹¹ Sana dabi mada’nag e piin piilal e pi magawon ni i mada’nag Nehemiah, machane boor e kanawo’ nrayog ni ngar folwokgad rok. Ba gel e maruwel ni yad ma tay ni ngar ayuweged pi walagrad. Maku darur lemnaged ni kab ga’ farad ngak e tin ka bay e girdi’ ni bochan e yad be yog e thin. Yad ma dag e sumunguy ngak e pi walag u lan e ulung. (Mu beeg e 1 Thessalonika 2:7, 8.) Bochan nib sobut’an’rad ma riyul’ nib t’uf e girdi’ rorad, ma aram fan ni yad ma non ngorad u fithik’ e gol. Andrew ni ke yoor e duw ni ke mang reb e piilal e gaar: “Kug guy nnap’an nra non reb e piilal u fithik’ e sumunguy nge gol ma ri ma motoyil e pi walag ngak. Re n’ey e ku ma pi’ e athamgil  nga lanin’rad ni ngar folgad ko piin piilal.” Ku bay reb e walag ni ka nog Tony ngak ni ki yoor e duw ni ke mang reb e piilal ni gaar: “Gu ma guy rogon ni nggu fol ko fare fonow ni bay ko Filippi 2:3 ni aram e ngaug tay ni bay boch e girdi’ ni kab ga’ farad ngog. Re n’ey e ke ayuwegeg ni nge dab gu towasariy e girdi’ ni ngar folgad rog.”

12. Mang nib ga’ fan ni nge sobut’nag e piin piilal lanin’rad?

¹² Piin piilal e thingar ra sobut’naged lanin’rad ni bod rogon Jehovah nib sobut’an’. Yugu aram rogon ni Jehovah e ir e En Th’abi Tolang u ga’ngin e palpalth’ib, machane ma “lumel nga but’” ni nge ayuweg e “piin gafgow u fithik’ e ab.” (Ps. 113:6, 7, BT) Bin riyul’ riy e be yog e Bible ni ma fanenikay e piin nib tolangan’rad.​—Prov. 16:5.

13. Mang fan nib t’uf ni nge “gagiyegnag” reb e piilal bolowthen?

¹³ Reb e piilal ni ma fol rok Jehovah e ba t’uf ni nge “gagiyegnag bolowthen.” Ya faanra danga’, ma rayog ni nge yog e thin nib gel ngak be’ u nap’an ni kan darifannag. (Jas. 1:26; Gal. 5:14, 15) Andrew ni kad weliyed murung’agen boch kafram e gaar: “Yu ngiyal’ e gu baadag ni nggog e thin nib gel ngak reb e walag ni gu be lemnag ni be darifannageg. Machane kug fal’eg i lemnag murung’agen boch e pumoon ni yad ba yul’yul’ u Bible ma ke ayuwegeg ni nggu nang feni ga’ fan ni ngan sobut’nag lanin’uy.” Ma dag e piin piilal ni yad be fol rok Jehovah u nap’an ni yad ra non u fithik’ e t’ufeg nge sumunguy ngak e pi walag u lan e ulung ni kub muun yugu boch e piilal ngay.​—Kol. 4:6.

14. Mang liw e ke pi’ Jehovah ko pi matam, ma mang e baadag ni ngar rin’ed?

¹⁴ Ke pi’ Jehovah reb e liw ko pi matam ni aram e ngar manged lolugen e tabinaw, ma baadag ni ngar skulnaged, mar pow’iyed, mar yal’uweged pi fakrad. (1 Kor. 11:3; Efe. 6:4) Machane re n’ey e gathi be yip’ fan ndariy e gin ni nge mus mat’awrad riy. Jehovah e Ir e Ke Sunmiy e tabinaw, ere pi matam e yad ra weliy ngak rogon ni ur maruwelgad nga mat’awrad u lan e tabinaw. (Efe. 3:14, 15) Ma fol e pi matam rok Jehovah ni aram e yad ma maruwel nga mat’awrad u reb e kanawo’ nib m’agan’ ngay. Yad ra fil murung’agen David ni Pilung, ma boor ban’en nrayog ni ngar filed rok.

15. Mang fan nib fel’ ni nge lemnag e pi matam e n’en ni rin’ David ni Pilung?

¹⁵ Gathi kemus ni dugliy Jehovah David ni nge mang lolugen e tabinaw rok ya kub muun fare nam nu Israel ngay. Boor ban’en ni i tay David murung’agen ni bochan e ir e pilung. Yu ngiyal’ e de mat’aw rogon ni i fanay mat’awun maku bay e oloboch nib ubchiya’ ni ngongliy. (2 Sam. 11:14, 15) Machane i dag ni be fol rok Jehovah ni aram e m’agan’ ngay ni nge fol ko fonow ni kan pi’ ngak. I weliy gubin ban’en ni bay u laniyan’  ngak Jehovah u daken e meybil. Me guy rogon ni nge fol ko fonow rok Jehovah u rogon nrayog rok. (Ps. 51:1-4) Maku reb e, ba sobut’an’ me m’agan’ ngay ni nge fol ko fonow ni pi’ boch e pumoon ngak ni kub muun boch e ppin ngay. (1 Sam. 19:11, 12; 25:32, 33) I fil David ban’en ko oloboch ni rin’ me tay ni pigpig rok ngak Jehovah e aram e n’en th’abi ga’ fan u lan e yafos rok.

16. Mang boch ban’en nrayog ni nge fil e pi matam rok David?

¹⁶ Mang boch ban’en nrayog ni nge fil e pi matam rok David ni Pilung? Dab mu fanay mat’awum ni ke pi’ Jehovah u reb e kanawo’ nde puluw. Dab mu mithag e oloboch rom, ma nge m’agan’um ngay ni ngam fol ko fonow ni be pi’ boch e girdi’ ngom nib puluw ko Bible. Faan ga ra rin’ e re n’ey, ma aram e ra tay chon e tabinaw rom fam ni bochan e gab sobut’an’. Nap’an ni gimed be meybil chon e tabinaw rom u taabang, mag weliy ngak Jehovah e tin bay u lanin’um. Ga ra rin’ e re n’ey, ma aram e ra nang chon e tabinaw rom nri ga baadag ni nge ayuwegem Jehovah me pow’iyem. Bin th’abi ga’ fan riy e ngam tay ni pigpig rom ngak Jehovah e aram e n’en th’abi ga’ fan u lan e yafos rom. (Deut. 6:6-9) Ngongol rom nib fel’ e aram e bin th’abi fel’ e tow’ath nrayog ni ngam pi’ ko tabinaw rom.

17. Mang liw e ke pi’ Jehovah ngak e pi matin?

¹⁷ Ke pi’ Jehovah reb e liw nib ga’ fan ngak e pi matin u lan e tabinaw, ma kki pi’ mat’awrad ni ngar ted murung’agen boch ban’en ni bay rogon ngak pi fakrad. (Prov. 6:20) Bin riyul’ riy e, thin nge ngongol rok reb e matin e rayog ni nge par angin rok pi fak u n’umngin nap’an e yafos rorad. (Prov. 22:6) Mu tay fanam i yan ko n’en nrayog ni nge fil e pi matin rok Maria ni chitiningin Jesus.

18-19. Mang e rayog ni nge fil e pi matin rok Maria?

¹⁸ Ri manang Maria e thin ni bay u lan fare Babyor nib Thothup nrib fel’ rogon. Ri ma tayfan Jehovah ma rib chugur e tha’ u thilrow. Ba m’agan’ ngay ni nge rin’ e n’en nib m’agan’ Jehovah ngay ni yugu aram rogon nre n’ey e be yip’ fan nthingari thil rogon e par rok.​—Luke 1:35-38, 46-55.

¹⁹ Gimed e pi matin e boor e kanawo’ nrayog ni ngam folwokgad rok Maria riy. Uw rogon? Som’on e, ba t’uf ni nge par e tha’ u thilmed Jehovah nib chugur ni aram e ngaum filed e Bible romed ni yigoo gimed, ma gimed be meybil ni gubin e rran. Bin l’agruw, nge m’agan’med ngay ni ngam thilyeged boch ban’en ko par romed ya ngam fel’gad u wan’ Jehovah. Sana rayog ni gallabthir romed e ba papey e damumuw ngorad, mab kireb e thin ni yad ma yog ngomed. Ere rayog nnap’an nim ilalgad ma gimed ma lemnag ni aray rogon ni yima chuguliy e bitir. Mus nga tomuren ni kam filed e motochiyel rok Jehovah, ma rayog ni kab mo’maw’ ngomed ni ngam pared ni gimed ba gapas ma gimed be gum’an’ u puluwon  pi fakmed, nib ga’ ni faanra darur folgad ko ngiyal’ ni ke aw parowmed. (Efe. 4:31) Ireray e ngiyal’ nib t’uf ni ngam ninged e ayuw ngak Jehovah u daken e meybil. Bay reb e matin ni ka nog Lydia ngak ni gaar: “Yu ngiyal’ e gu ma meybil nib gel ya nge dab gu non u fithik’ e damumuw u nap’an nder fol ba pagel ni fakag. Kug ma tal ndawor gu mu’ ko numon nggu meybil ngak Jehovah u lanin’ug ni nge ayuwegeg. Meybil e ir e ma gapaseg lanin’ug.”​—Ps. 37:5.

20. Mang reb e magawon ni ma mada’nag e pi matin, ma uw rogon nrayog ni ngar gelgad ngay?

²⁰ Reb e magawon ni ku ma mada’nag e pi matin e aram e ba mo’maw’ ngorad ni ngar daged e t’ufeg ngak pi fakrad. (Titus 2:3, 4) Bay boch e ppin nni chuguliyrad u reb e tabinaw nder ma dag e gallabthir rorad e t’ufeg ngorad. Faanra aray rogon e chugol nni tay ngom, ma ngam guy rogon ni ku dab mu folwok ko n’en ni i rin’ e gallabthir rom. Reb e matin ni ma fol rok Jehovah e rayog ni nge fil rogon ni nge dag e t’ufeg ngak pi fak. Rayog nib mo’maw’ ngak ni nge thilyeg rogon e lem nge ngongol rok, machane rayog ni nge rin’ e re n’ey. Pi n’ey nra thilyeg u rarogon e ra gelnag e felfelan’ u lan e tabinaw rok.

21-22. Faan yira fol rok Jehovah, ma mang angin nra yib nrogon nib puluw ko Isaiah 65:13, 14?

²¹ Manang David ni Pilung angin nra yib ni faan yira fol rok Jehovah. I yoloy ni gaar: “Tin ni ke yog Somol ni ngan rin’ e mmat’aw; piin ni be fol riy e ke felan’rad. Tin ni ke yog ni ngan rin’ e ba yal’uw, ma ma ayuwegey nge tamilangan’uy. Ma tamilangnigeg, i gag e tapigpig rom; fol ni gu be tay riy e be yib puluwon ngog.” (Ps. 19:8, 11) Ngiyal’ ney e rayog ni ngad guyed e n’en nib thil u thilin e piin yad ma fol rok Jehovah nge piin yad ma siyeg e fonow rok. Piin yad ma fol rok Jehovah e yad be tolulnag e “felfelan’.”​—Mu beeg e Isaiah 65:13, 14, BT.

²² Nap’an nra fol e piin piilal, nge pi matam, nge matin rok Jehovah ma aram e ra mon’og e par rorad, me gel boch e felfelan’ u lan e tabinaw rorad, me gel e taareban’ u lan e ulung. Bin th’abi ga’ fan riy e, yad ra felfelan’nag Jehovah. (Prov. 27:11) Mang tow’ath e bay ni kab fel’ ko biney?