Machib Nib Riyul’ Uw e Rayog ni Ngam Pateg Riy?

BE’ NIB moon u Tibet e be cheleg ba tayya ni fan ko meybil, ba kobre’ ni bay boor e meybil u lan ni kan yoloy. Ba mich u wan’ ni be sul e meybil rok u daken biyay nge biyay u gubin yay ni be chel fare tayya. U lan ba tabinaw ni baga’ u India, ma kan ta’ bochi reb e singgil ni ba achig ni fan ko boch e liyor ni ka nog e puja nga’​—ni aram e liyor ni ngan pi’ e incense ara ban’en ni ngan urfiy nib fel’ bon, nge boch e floras, nge ku boch ban’en ni fan ko fon ku boch e got ni pumoon nge ppin. Bokum biyu’ e mile nga orel u Italy, ma be’ nib ppin u lan ba galesiya e be ragbug u p’eowchen ba liyos ni yaan Maria, ni chitiningin Jesus, be meybil ni be kol bakiy rosario.

Sana kam guy angin e pi yuraba’ i teliw ko yafas ko girdi’. “Teliw e ke mang ban’en nib ga’ fan u ga’ngin yang e fayleng,” rogon ni yog reb e babyor ni The World’s Religion​—Understanding the Living Faiths. U lan fare babyor ni God​—A Brief History, ni yoloy be’ ni John Bowker e yog ni gaar: “Dariy barba’ e ulung ko girdi’ ni gathi Got bang riy, baga’ ko gin ni be gagiyeg nge gin ni ke sunumiy. Riyul’ e re n’em ya ku arrogon e yu ulung i girdi’ ni tin nu fayleng ban’en e yad ma fal’eg rogon.”

Riyul’, teliw e ke suruy e yafas ko bokum million e girdi’. Gathi ireray e mich riy ni girdi’ e ba t’uf rorad e tirok Got ban’en? U lan e babyor rok ni The Undescovered Self, ma be’ nib gilbuguwan ni ma fil murung’agen e man’ey ko girdi’ ni Dr. Carl G. Jung e weliy murung’agen e n’en nib t’uf ku be’ ni nge fil murung’agen reb e gelngin ni kab tolang boch me yog ni “pow riy e rayog ni ngan fol u gubin chepin e girdi’.”

Machane, boor e girdi’ ni der ma yog nib mich Got u wan’rad ara yad baadag ni ngar nanged murung’agen e teliw. Boch e girdi’ ni de mudugil u wan’rad fa yad ma lemnag ni de moy Got e yad ma rin’ ni aram rogon ya bochan ni teliw ni yad  manang e dar yog ni ngar gamaneged e tin nib t’uf rorad ko tirok Got ban’en. Kan weliy ni fan e teliw e “ngan yul’yul’ nga boch e kenggin e motochiyel; ara ngan yul’yul’ nib mudugil, ara ngan pagan’uy ngay; ara t’ufeg.” Fan e pi thin ney, ma ba chuchugur ni urngin e girdi’ ni yad ma dag ni yad ba yul’yul’ ko teliw rorad. Ma re n’ey e ba muun ngay e girdi’ nib mich u wan’rad ni dariy e Got.

U lan fare biyu’ e duw ni chepin e girdi’, ma girdi’ ni ma gay rogon ni nge gamaneg e tin nib t’uf rok ko tirok Got ban’en e ke pow’iy nga boor mit e liyor. Angin e ke k’aring ni nge yoor rogon ni ma sap e girdi’ ko liyor ni ngan tay ku Got u ga’ngin yang e fayleng. Ni bod ni, yugu aram rogon ni gubin raba’ e teliw ni ayuweg ni nge gel e michan’ ko girdi’ ko reb e gelngin nib gel, machane ba thilthil rogon ni yad ma lemnag ko mini’ fa mang e re n’em. Yooren e michan’ ko girdi’ e ku be ga’nag fan rogon ni ngan thap ngak Got. Machane machib rorad e ba thilthil ni faanra ngan weliy ko mang e ngan thap ngak Got nge uw rogon ni rayog ni nge yog rodad. U fithik’ urngin e pi michan’ ney, ma uw rogon ni rayog ni ngad nanged e bin nriyul’ e machib nib fel’ u wan’ Got?