“Ngaum Micheged Ko Gimed Mini’”

“Mu changargad ngomed ko gimed be par ni gimed be ngongol u fithik’ e michan’ romed ngak Kristus fa danga’.”​—2 KORINTH 13:5.

1, 2. (a) Uw rarogodad ni faanra maruwar e machib rodad u wan’dad? (b) Uw rarogon e ulung nu Korinth kakrom me maruwaran’ bochi girdien?

 BE MILEKAG be’ u arow i yan me taw ko gini ke dar e kanawo’ riy. Me maruwaran’ ko kun kanawo’ e ra yan ko gini ni nge sor ngay, ere i fith yugu boch e girdi’ ni ngar pow’iyed machane de taareb e thin rorad. Dabiyog ni nge yan ya ke maruwaran’. Ku arrogodad ni faanra ke maruwar e machib u wan’dad ma dabiyog ni ngada nanged e kanawo’ ni ngada sorgad ngay. Ra maruwaran’dad ma dabiyog ni ngada turguyed ban’en ya dada nanged e kanawo’ ni nga darod riy.

² Ku aram e n’en ni buch rok boch girdien e ulung ni Kristiano nu Korinth u Greece ko bin som’on e chibog ni bochan e magawon ni ke sum. I togopuluw boch e girdi’ ngak Paul ni gowa yad “fapi apostal romed ni beer nib sororad.” Be lungurad, “Thin rok Paul u babyor e rib gel, machane ngiyal’ ni ba’ rodad e mmeewar ma thin rok e dariy rogon!” (2 Korinth 10:7-12; 11:5, 6) Ke maruwar boch e girdi’ u lan e ulung nu Korinth ni bochan e thin rok e piin ni ba dake yad e apostal nib sororad.

3, 4. Mang fan ni gad ba adag ni ngada nanged murung’agen e fonow rok Paul ngak piyu Korinth?

³ I tababnag Paul fare ulung nu Korinth u nap’an ni i machib u rom ko duw ni 50 C.E. I par u Korinth ni “reb e duw nge baley, ni be machibnag e thin rok Got ngak e girdi’.” “Ma boor e girdi’ u lan yu Korinth ni rung’ag e re thin nem ni murung’agen Jesus, me mich Jesus u wun’rad min taufenagrad.” (Acts 18:5-11) Ri ma lemnag Paul e michan’ rok e piin nib michan’rad nu Korinth. Maku reb e ki yol piyu Korinth ngak Paul ni nge fonownagrad. (1 Korinth 7:1) Ere i fonownagrad Paul.

⁴ I yol Paul ngorad ni gaar: “Mu changargad ngomed ko gimed be par ni gimed be ngongol u fithik’ e michan’ romed ngak Kristus fa danga’.” Ki yog ngorad ni ‘ngaur micheged ko yad mini’.’ (2 Korinth 13:5) Faanra fol girdien e ulung nu Korinth ko re fonow nem ma ra ayuwegrad ni nge dabi maruwaran’rad ko kanawo’ ni nga ranod riy. Maku arrogodad e ngiyal’ ney ni ra yib e ayuw ngodad ni faan gad ra fol ko re fonow nem. Uw rogon nrayog ni ngada folgad ko fonow rok Paul? Uw rogon nrayog ni ngada changargad ngodad ko gad be par u fithik’ e michan’, fa? Ma mang e gad ra rin’ ma gad be micheg ko gad mini’?

“Mu Changargad Ngomed ko Gimed Be Par ni Gimed Be Ngongol u Fithik’ e Michan’” fa Danga’

5, 6. Mang fol e bay ni nge skengnagdad ko gad bay u fithik’ e michan’ fa, ma mang fan ni ir e bin th’abi fel’ e fol?

⁵ Faan yira skengnag be’ ara ban’en ma bay ba motochiyel ara ban’en ni yira fanay ni ngan foleg ko ba gaman fa danga’. Ma n’en ni be weliy Paul e gathi be yip’ fan ni ngan “changar” ara skengnag fare michan’​—ara machib ni ke mich u wan’dad. Ya gadad e yibe skengnagdad. Ma bay ban’en ni yira fanay ni ngan folegdad ngay, ma re n’en nem e ba flont. Ba tang ni tunguy David e be gaar: “Motochiyel rok Somol e rib yal’uw; ra pasignag lanin’uy me pi’ gelngin; ma tin ni be yog ni murung’agen Somol  e ba riyul’ ma ma pi’ e gonop ngak e piin ndariy rorad. Tin ni ke yog Somol ni ngan rin’ e mmat’aw; piin ni be fol riy e ke felan’rad. Tin ni ke yog ni ngan rin’ e ba yal’uw, ma ma ayuwegey nge tamilangan’uy.” (Psalms 19:7, 8) Bay u lan e Bible e pi motochiyel rok Jehovah ni ba flont, ma tin ni ke yog ni ngan rin’ e ba yal’uw mab beech, ma tin ni ke tay chilen e rayog ni ngan pagan’uy ngay. Ere fare machib ni bay riy e nge mang fol ko fare skeng.

⁶ I weliy apostal Paul murung’agen fare machib ni yib rok Got ni gaar: “Ya thin rok Got e ba fos ma ba’ gelngin ni ma maruwel. Ya kab m’uth nga bangi sayden ni ruw raba’ ma mm’uth. Ya ma yan nge yan i taw nga fithik’ i lanin’dad ko n’en ni gadad be lemnag, nge fithik’ e ul’ul nge yil, ma ma pufthinnag e n’en ni yima yim’ ni bochan nge tin ni yima lemnag.” (Hebrews 4:12) Arrogon, rayog rok e thin rok Got ni nge skengnag gum’irchadad​—ara nge skengnag fithik’dad. Uw rogon nrayog ni ngada maruweliyed e thin rok Got nib m’uth mab gel? I weliy e ani yoloy e psalm e n’en ni thingar ni rin’. I tang ni gaar: “Ba felan’ e cha’ . . . Ma ra beeg e motochiyel rok Somol ma ma yib e felfelan’ riy ngak, ma ku aram rogon ni ra beeg ni rran nge nep’ ni bochan e nge nang fan.” (Psalms 1:1, 2) Bay e “motochiyel” rok Jehovah u lan e Thin Rok Got ni Bible. Thingar da felfelan’gad ni ngada beeged e Thin Rok Jehovah. Thingar da yarmiyed e ngiyal’ ni ngada beeged ni sakathkath ara ngada fl’eged i lemnag e thin riy. Nap’an ni gad ra beeg e thin riy ma thingar da paged e re thin nem ni nge skengnagdad.

7. Mang e bin th’abi fel’ e kanawo’ ni ngada skengnaged ko gad be ngongol u fithik’ e michan’ fa?

⁷ Ere bin th’abi fel’ e kanawo’ ni ngada skengnaged ko gad be ngongol u fithik’ e michan’ e aram e ngada bieged e Thin Rok Got ma ngada fl’eged i lemnag e thin riy ma ngada yaliyed e ngongol rodad ngada guyed ko bpuluw ko thin ni kada filed. Gad ba felfelan’ ni boor e ayuw ni bay rodad ni ngada nanged fan e Thin Rok Got.

8. Uw rogon ni ma ayuwegdad e pi babyor ni yib rok “fare tapigpig nib yul’yul’ mab gonop” ni nge skengnag ko gad be ngongol u fithik’ e michan’ fa?

⁸ Ma pi’ Jehovah e machib nge fonow u lan e pi babyor ni yib rok “fare tapigpig nib yul’yul’ mab gonop” ma pi babyor ney e ma weliy fan e Bible. (Matthew 24:45) Susun, tomren fapi guruy ko fare ke babyor ni Draw Close to Jehovah a e bay bang riy ni “Pi Deer Ni Ngan Fl’eg I Lemnag.” Re babyor nem e ma ayuwegdad ni ngada fl’eg i yaliy e ngongol rodad! Ma boor e thin ni bay ko pi babyor rodad ni Wulyang Ntagil’ E Damit nge Awake! ni ra ayuwegdad ni ngada skengnaged gadad ko gad be ngongol u fithik’ e michan’ fa. I weliy reb e ppin ni Kristiano murung’agen e thin u lan e Wulyang Ntagil’ E Damit ni be weliy e thin ko Proverbs ni be gaar: “Ba ga’ e ayuw ni bay ko pi thin nem. Ya ke ayuwegeg ni nggu skengnag e thin rog, nge ngongol rog, nge rogon lanin’ug ko ba puluw ko pi motochiyel rok Jehovah nib mat’aw fa.”

9, 10. Mang ayuw ni ke pi’ Jehovah ngodad ni ngada skengnaged gadad ko gad be ngongol u fithik’ e michan’ fa?

⁹ Ku ma yib ngodad e fonow nge machib ni ma pi’ e athamgil nga lanin’uy ko pi muulung  nge assembly. Ereray boch e flaab ni yib rok Got. I weliy Isaiah murung’agen e pi girdi’ ni ra yog e pi flaab ney ngorad ni gaar: “Tin ni bay yib e rran nga m’on e re burey ni bay e tempel riy e bayi par ni ir e ba th’abi tolang. Pire’ e nam ni bay ra bad ngay. Ma girdi’ ko pi nam nem e bayi lungurad, ‘Nga darod ko fare burey rok Somol . . . Ya ngada filed e n’en ni ba adag ni ngad rin’ed; mu u darod ko yu pa’ i kanawo’ ni ke turguy ni nga darod riy.’” (Isaiah 2:2, 3) Ri gad ba taw’ath ni bochan e yibe fil ngodad e kanawo’ rok Jehovah.

¹⁰ Ku reb e kanawo’ ni rayog ni ngada skengnaged gadad riy e aram e fonow ni yib rok e piin ni bay rogorad ni ngar machibnaged gadad mab muun e piilal ni Kristiano ngay. I weliy e Bible murung’agen e piin ni piilal ni gaar: “Pi walageg ni girdien Kristus, faanra rin’ be’ ban’en nib kireb, ma gimed e piin ni fare Kan ni Thothup e be gagiyegnagmed e ngam guyed rogon faanem nge sul nga rogon nge par ni ke mat’aw biyay; machane thingar mu rin’ed u fithik’ e sumunguy. Ma ku er rogomed ni ngam guyed rogomed, nge dabiyog ni mu paged gimed ko n’en ni ma pingeg e girdi’ nge denen.” (Galatia 6:1) Ri gad ba felfelan’ ni bay e re taw’ath ney rodad ni nge yal’uwegdad!

11. Mang e thingari yog ngodad ya ngada skengnaged gadad?

¹¹ Pi babyor rodad, nge pi muulung ko Kristiano, nge piin ni piilal—e urngin e pi n’en ney e aram e taw’ath ni yib rok Jehovah. Machane gadad e thingar da yaliyed gadad ya ngada skengnaged ko gad bay ko michan’ fa. Ere nap’an ni gad be beeg e pi babyor rodad ara gad be motoyil ko fonow ko Bible ma thingar da fithed gadad ko: ‘Be weliy murung’ageg, fa? Aram e pi n’en ni gu ma rin’, fa? Ri gu be fol ko machib ni Kristiano, fa?’ Rogon e pi machib ni yib ko pi ayuw ney u wan’dad e bay rogon ko michan’ rodad. Be gaar e Bible: “Machane cha’ ndariy fare Kan ni Thothup rok e dabiyog ni nge yog ngak e pi tow’ath ni ma yib rok e Kan ni Thothup rok Got. Ya ri der nang fan, ma thin ko balyang u wan’. Cha’ ni bay fare Kan ni Thothup rok e ir e rayog rok ni nge nang fel’ngin urngin ban’en riy.” (1 Korinth 2:14, 15) Ere susun ni nge puluw lanin’dad ko tirok Got ban’en u nap’an ni gad ra beeg e pi babyor rodad nge n’en gad ra rung’ag u nap’an e muulung nge nap’an ni be non e piin ni piilal, fa?

“Ngaum Micheged ko Gimed Mini’”

12. Mang e kub muun ko bin ni gad be micheg ko gad mini’?

¹² Nap’an ni gad ra micheg ko gad mini’ ma thingar da yaliyed gadad. Arrogon, sana kada uned ko machib, machane uw fene gel ni gad be fol riy? Faan gad ra micheg ko gad mini’ ma gad be micheg fene gad ba ilal nrogon e Kristiano ma gad be tay fan e tirok Got ban’en.

13. Rogon e thin ko Hebrews 5:14, mang e ra micheg ni kada ilalgad nrogon e Kristiano?

¹³ Mang e ra micheg ni kada ilalgad nrogon e Kristiano? Be gaar apostal Paul: “Ma ggan nib el e piilal e ngar ked, ya kar filed rogon ni ngar nanged e tin nib fel’ ko tin nib kireb.” (Hebrews 5:14) Gad ra micheg ni kada ilalgad nrogon e Kristiano ni faanra kada filed rogon  ni ngada gonopiyed ban’en ara ngada nanged ban’en. Bod be’ ni ma un ko gosgos e ra i chamag ya nge gel ni yugu be athamgil ya nge salap ko gosgos, ma ku arrogon gadad ni rayog ni ngada filed rogon ni nge gel e gonop rodad ni gad be maruweliy e pi machib ko Bible.

14, 15. Mang fan ni thingar da athamgilgad ni ngada filed e tin toar e machib ko Thin Rok Got?

¹⁴ U m’on ni nge yog e gonop ngodad ma thingari yog e tamilangan’ ngodad. Thingar da tedan’dad ko fol babyor ni fan e nge yog e tamilangan’ ngodad. Nap’an ni gad ra fil e babyor​—ni baga’ ni tin toar e machib ko Thin Rok Got—​ma ra gel e gonop rodad. Boor e tin toar e machib ni kan weliy u lan fare Wulyang Ntagil’ E Damit. Mang e gad ra rin’ u nap’an ni gad ra beeg e tin toar e machib riy? Gad ra palog ko tinem e machib ni bochan e “mo’maw’ ni ngan nang fan,” fa? (2 Peter 3:16) Danga’, ngada athamgilgad boch ya ngada nanged fan e n’en ni ka nog.​—Efesus 3:18.

¹⁵ Ma ra uw rogon ni faanra mo’maw’ rodad ni ngada filed e babyor? Thingar da filed rogon ni ngada adaged e fol babyor. b (1 Peter 2:2) Faan gad ra ilal nrogon e Kristiano ma thingar da filed rogon ni nge yog ngodad e ggan nib el ni be yip’ fan e tin toar e machib ko Thin Rok Got. Faanra danga’ ma dabi gel e gonop rodad. Machane be’ ni ke ilal nrogon e Kristiano e gathi ke mus ni ra yog e gonop ngak. Ya thingar da maruweliyed e machib ni kada filed.

16, 17. Mang e fonow rok James u rogon ni ngan maruweliy e machib?

¹⁶ Gad ra micheg ko gad mini’ ko thin rodad ni be m’ug riy ni gad be tay fan e machib​—ara gad be maruweliy e michan’ rodad. I weliy James reb e fanathin ya nge tamilangnag rogon ni ngada yaliyed gadad. Be gaar: “Dab mbanniged gimed ni ke mus ni nguum motoyilgad ko thin rok; ya ngam maruwelgad ngay. Ya en nra motoyil ko thin rok Got ma dabi maruwel ngay e bod be’ ni changar nga lan mit e thirek nge guy rogon yaan. Me yaliy ir nge mu’ me yan, ma ka chingiyal’ nem me pag talin rogon yaan. Machane en nra fal’eg i yaliy ir nga fithik’ fare motochiyel nrib yal’uw ni ir e ma pithig e girdi’ ko kireb, me tiyan’ ngay ma gathi ke mus ni motoyil ngay me pag talin, ya be maruwel ngay cha’ nem ni aram rogon e Got e ra ayuweg ko tin ni be rin’.”​—James 1:22-25.

 ¹⁷ Be gaar James: ‘Nguum sap nga lan fare thirek ni be yip’ fan e thin rok Got, ma ga yaliyem. Nguum rin’ ni gubin ngiyal’ ni ga be skengnagem ko tin ni ga ra fil ko thin rok Got. Ma aram e dab mu pag talin e tin ni kam guy. Ma ga yal’uwegnem.’ Yu ngiyal’ mab mo’maw’ ni ngan fol ko re fonow nem.

18. Mang fan nib mo’maw’ ni ngan fol ko fonow rok James?

¹⁸ Kan tay chilen ngodad ni ngada wereged e machib u murung’agen Gil’ilungun Got. I yol Paul ni gaar: “Ya ra mich u wun’dad me mat’awnagdad Got ngak; ma gadad ra yog nga dap’i l’ugundad, ma aram e kad thapgad.” (Roma 10:10) Boor ban’en ni thingar da thilyeged ni faan gad ra wereg e machib ya nge yog e yafas ngodad. Gathi ba mom rodad ni ngada wereged e machib. Maku thingar da thilyeged boor ban’en u rarogodad ma ngada paged fadad ni fan e ngada m’oneged fare maruwel ni ngan wereg e machib. (Matthew 6:33) Machane nap’an ni gad ra rin’ fare maruwel ni ke pi’ Got ngodad ni ngada maruweliyed ma gad ra felfelan’ ni bochan e kada pininged e sorok ngak Jehovah. Ere gadad ba pasig i wereg e machib, fa?

19. Mang e kub muun ko maruwel rodad ni gad be maruweliy e michan’ rodad?

¹⁹ Mang e kub muun ko maruwel rodad ni gad be maruweliy e michan’ rodad? Be gaar Paul: “Mmaruwelgad ko tin ni kam filed rog nge tin ni ke yog ngomed rog, ni tin ni yog ngomed ko thin rog nge ngongol rog. I Got ni ir e be pi’ e gapas nga lanin’med e bay i par romed.” (Filippi 4:9) Gad ra micheg ko gad mini’ ko maruwel rodad ni gad be fol ko tin ni kada filed nge tin nib mich u wan’dad, nge tin ni kada rung’aged ara kada guyed​—ni urngin e maruwel rok be’ ni gachalpen Kristus ni ke ognag ir ngak Got. I non Jehovah u daken Isaiah ni profet ni gaar: “Ereray e kanawo’. Marod riy.”​—Isaiah 30:21.

20. Miti mang girdi’ e yad e tow’ath u lan e ulung?

²⁰ Rib tow’ath e ulung ni bochan e bay e piin ni pumoon nge ppin riy ni yad ma tiyan’rad ko fol Bible, ma yad ba pasig i wereg fare thin nib fel’, ma yad ba yul’yul’ ma yad ma fol ko Gil’ilungun Got. Ba mudugil e ulung ni ma un e pi girdi’ ney ngay. Ri ba ga’ e ayuw ni yad ma pi’ ni bochan e boor e piin ni ka fin nra uned ko machib. Ma faan gad ra fol ko fonow rok Paul ni ‘ngada changargad ngodad ko gadad be ngongol u fithik’ e michan’’ ma gad be micheg ko gadad mini’ ma ku arrogodad ni rayog ni ngada ayuweged yugu boch e girdi’.

Ngada Felan’gad ni Ngada Rin’ed e Tin nib M’agan’ Got Ngay

21, 22. Uw rogon nrayog ni ngada felfelan’gad i rin’ e tin nib m’agan’ Got ngay?

²¹ I tang David ni ir e Pilung nu Israel kakrom ni gaar: “Got rog, ri gub adag ni nggu rin’ e tin nib m’agan’um ngay! Thin rom e be par u fithik’ i lanin’ug.” (Psalms 40:8) I felfelan’ David ni nge rin’ e tin nib m’agan’ Got ngay. Mang fan? Ya immoy e motochiyel rok Jehovah u fithik’ i gum’irchaen David. De maruwaran’ David ko kanawo’ ni nge yan riy.

²² Faanra bay e motochiyel rok Got u fithik’dad ma dabi maruwaran’dad ko mang kanawo’ e nga darod riy. Gad ma felfelan’ ni ngada rin’ed e tin nib m’agan’ Got ngay. Ere ngada ‘athamgilgad’ u nap’an ni gad be pigpig ku Jehovah u polo’ i gum’irchadad.​—Luke 13:24.

[Footnotes]

Ka Ga Manang?

• Uw rogon nrayog ni ngada skengnaged gadad ko gad be ngongol u fithik’ e michan’ fa?

• Mang e kub muun ko gad be micheg ko gad mini’?

• Ra diin ma gad micheg ni kada ilalgad nrogon e Kristiano?

• Uw rogon ma maruwel rodad ko michan’ rodad e ra ayuwegdad ni ngada nanged ko gadad mini’?

[Study Questions]

[Picture on page 9]

Ga manang e bin th’abi fel’ e kanawo’ ni ngada skengnaged ko ga bay u fithik’ e michan’, fa?

[Picture on page 10]

Gad ra micheg ni kada ilalgad nrogon e Kristiano ni gad be maruweliy e gonop rodad

[Pictures on page 11]

Gad ra micheg ko gad mini’ ni ‘gathi ke mus ni gad be motoyil ko thin rok Got ma gad pagtalin ya gad be maruwel ngay’