Ba Kanawo’ Ni Ngan Lebuguy E Tin Nib M’agan’ Got Ngay

“Ya urngin ban’en ma kan rin’ nrogon ni ke m’ay i lemnag rok Got ke tay nge rogon ni turguy.”​—EFESUS 1:11.

1. Mang fan ni urngin e ulung ko Pi Mich Rok Jehovah e yad ra muulung ko April 12, 2006?

 DALIP fen e maruwel ni nep’, ko April 12, 2006, ma sagonapan 16 milyon e ngar muulunggad ni ngar madenomnaged fare Abich ni Balayal rok Somol. Ra reb e pi tafen e muulung rorad, ma yira ta’ e tebel riy ma ngan tay e flowa nga daken ni be yip’ fan downgin Kristus, nge wain nib rowrow, ni be yip’ fan rachaen ni kan puog nga but’. U nap’an ni ke chuchugur ni nge mus e welthin ni yibe e weliy fan fare Puguran ko Yam’ ni Tay Jesus, ma som’on ngan pi’ flowa nge yan u fithik’ e girdi’​—ngemu’ ma fare wain ko tomur. Bay in e ulung ko Pi Mich rok Jehovah ni bay taa be’ fa in e girdi’ riy ni yad ra kay fare flowa mar unumed fare wain. Machane, baga’ ni dariy be’ ni nge rin’ ni aram rogon. Mang fan ni kemus ni buchuuw e Kristiano, ni athap rorad e yad ra yan nga tharmiy, e ngar ked, machane tin boor e girdi’, ni athap rorad e ngar pared u roy u fayleng ni manemus, e dab ra ked fare flowa maku dab ra unumed fare wain?

2, 3. (a) Uw rogon ni i sunumiy Jehovah ban’en nrogon nib m’agan’ ngay? (b) Mang fan ni ke sunumiy Jehovah e fayleng nge girdi’?

² Jehovah e Got ni bay e tin nib m’agan’ ngay. Rogon ni nge lebuguy e tin baadag ni nge rin’, e ma “ngongliy urngin ban’en” nib puluw ko tin nib m’agan’ ngay. (Efesus 1:11) Som’on me sunumiy Fak ni kari maagirag rok. (John 1:1, 14; Revelation 3:14) Ngemu’, me sunumiy Jehovah reb e tabinaw ko pi engel ma tomur riy me sunumiy e palpalthib, nib muun ngay e fayleng nge girdi’ ni bay riy.​—Job 38:4, 7; Psalm 103:19-21; John 1:2, 3; Kolose 1:15, 16.

³ De sunumiy Jehovah e fayleng ni nge skengnag e girdi’ riy nge nang ko mini’ e bay rogon ni nge yan nga tharmiy nge ga’ e tabinaw rok u rom, ni rogon e machib ni ma fil e Kristiano nde riyul’. I sunumiy e fayleng ni kari mudugil e tin nib m’agan’ ngay, ni aram e “ngi i par e girdi’ riy.” (Isaiah 45:18) I sunumiy Got e fayleng ni fan ko girdi’ miki sunumiy e girdi’ ni fan ko fayleng. (Psalms 115:16) Kan tay e fayleng ni polo’ ni nge mang paradis, ma nge sug ko girdi’ nib mat’aw ni fan ni ngar maruweliyed ma ngar ayuweged. Dariy biyay ni ka nog ngak e wu’ ni som’on e mabgol ni ra boch nga ram ma ranow nga tharmiy.​—Genesis 1:26-28; 2:7, 8, 15.

Kan Togopuluw ko Tin nib M’agan’ Jehovah Ngay

4. Uw rogon ma kan togopuluw mat’awun Jehovah ko gagiyeg u nap’an ni kafin yigi tabab chepin e girdi’?

⁴ Reb e engel rok Got e ke togopuluw ngak me dugliy ni nge taleg e tin nib m’agan’ Jehovah ngay, me kireb e puf rogon ni ke pi’ Got ngak. Me magawonnag e gapas ni ke aw nga daken urngin e girdi’ ni kar pared u tan pa’ Got u fithik’ e t’ufeg. I pow’iy Satan e wu’ ni som’on e mabgol  ni ngar tababgow i fol nga reb e kanawo’ nib togopuluw ku Got. (Genesis 3:1-6) De yog ni dariy gelngin Jehovah, machane ke togopuluw nga mat’awun ko gagiyeg rok. Ere, ke sum fare deer u murung’agen mat’awun Jehovah ko gagiyeg u roy u fayleng, u nap’an ni kafin yigi tabab chepin e girdi’.

5. Mang deer ara magawon ni kan sunumiy, ma mini’ e ba muun ngay?

⁵ Maku ke sunumiy Satan e bin l’agruw e deer u nap’an Job ni bay rogon ko bin som’on e deer ara magawon u murung’agen mat’awun Got ko gagiyeg. Ke maruwarnag Satan fan e pigpig ko piin ke sunumiyrad Jehovah ni ngar folgad rok mar pigpiggad Ngak. I micheg Satan ni yad be pigpig nbochan e lem ni fel’ ngak, ma ra yib e skeng ngorad, ma yad ra togopuluw ku Got. (Job 1:7-11; 2:4, 5) Yugu aram rogon ni ke sum e re magawon ney ni bay rogon ko pi tapigpig rok Jehovah ni girdi’, maku ba muun ngay e pi engel rok Got, nge Fak Jehovah ni kari maagirag rok.

6. Uw rogon ni micheg Jehovah nib yul’yul’ ko tin nib m’agan’ ngay nge fithingan?

⁶ Bochan Jehovah e ba yul’yul’ ko tin nib m’agan’ ngay nge fithingan, me gagiyegnag Jehovah nge mang ba Profet nge ba Taayuw. a Me yog ngak Satan ni gaar: “I gur nge fare pin e bay mpirew ni gimew ba toogor; ma ku er rogon pi fak nge pi fakam ni bay ur pired ni yad ba toogor. Ma be’ nib moon ni fak fare pin e bay pirdiiy lolugem nge maad’ad nib gel, mi gur e bay mu k’ad wurilen e rifrif ay.” (Genesis 3:15) U daken Fak fare “pin,” ara ulung rok Got u tharmiy, e ra fulweg Jehovah taban e kireb rok Satan me pi’ e athap nge yafas ngak pi fak Adam.​—Roma 5:21; Galatia 4:26, 31.

“Tin Thothup mab Mith ko Tin nib M’agan’ Ngay”

7. Mang tin nib m’agan’ Jehovah ngay ni ke yog Paul ni apostal kan nang?

⁷ U lan e babyor rok Paul ni apostal ngak e pi Kristiano u Efesus, e weliy nib fel’ rogon ko uw rogon ni ke yarmiy Got ni fan ni nge lebuguy e tin nib m’agan’ ngay. I yoloy ni gaar: “Me dag ngodad e n’en ni ke tay nib mith ni ke mu’ i lemnag rok ni nge libguy u daken Kristus. N’en ni ke mu’ i lemnag rok Got ni nge rin’ e bay fini taw nga nap’an me libguy, ni aram e nge kunuy urngin e tin ni sunumeg ban’en nga taabang, ni urngin ban’en ni bay u tharmiy ngu but’, me par Kristus ni ir e llug riy.” (Efesus 1:9, 10) Tin nib m’agan’ Got ngay nrib fel’ e nge ngongliy ni urngin ban’en u palpalthib e nge taareban’rad me sug ko tin kan sunumiy ni ma tay fan mat’awun ko gagiyeg nth’abi tolang u fithik’ e t’ufeg. (Revelation 4:11) Ere bay ni thothupnag fithingan, ma ra gagiyel ni Satan e ke lifith l’igin, min rin’ e tin nib m’agan’ Got ngay “u roy u but’ ni bod rogon ni yibe rin’ u tharmiy.”​—Matthew 6:10.

8. Mang fan fare thin ni kan thiliyeg ni “kanawo’”?

⁸ Tin ni “ke m’ay i lemnag rok” Jehovah ni aram e tin baadag ara tin nib m’agan’ ngay, e bayi lebug u daken ba “kanawo’”. I fanay Paul ba thin ni ri be yip’ fan e “ngan ayuweg e tabinaw.” Re n’en ney e gathi be weliy murung’agen ba am, ni bod fare Gil’ilungun Kristus, ya ba kanawo’ ni ngan ayuweg ara gagiyegnag boch ban’en. b  Fare kanawo’ nib fel’ rogon ni ma gagiyegnag Jehovah boch ban’en ni nge lebuguy e tin nib m’agan’ ngay ni “ban’en nib thothup nib mith” ni bay ni nang ni buchuuw ma buchuuw i yan.​—Efesus 1:10; 3:9, footnotes.

9. Uw rogon ni dag Jehovah e tin nib mith mab thothup ko tin nib m’agan’ ngay ni buchuuw ma buchuuw?

⁹ Bochan e pi m’ag ni yib reb nge reb, ma aram e be tamilangnag Jehovah ni buchuuw ma buchuuw ko uw rogon ni nge lebug e tin nib m’agan’ ngay ni bay rogon ko faen Owchen fare pin ni kan micheg u Eden. Fare m’ag u thilin Jehovah nge Abraham e be dag ni faen ni Owchen fare pin e ra yib nga fayleng u daken e tabinaw rok Abraham ma “urngin e nam u fayleng” e bay ra taw’athgad ni bochan. Maku ke dag e re m’ag nem ni boch e girdi’ e ra un ngak faen ni Owchen fare pin ni th’abi ga’ fan. (Genesis 22:17, 18) Fare Motochiyel ko m’ag ni fan ngak yu Israel e ke yog ni tin nib m’agan’ Jehovah ngay e ngeb ba gil’ilungun ko “pi prist.” (Exodus 19:5, 6) Fare m’ag u thilin Got nge David e dag ni faen ni Owchen e ra mang Lolugen fare Gil’ilungun ni dariy n’umngin nap’an. (2 Samuel 7:12, 13; Psalms 89:3, 4) U nap’an ni i pow’iy fare m’ag ko Motochiyel piyu Jew nge mada’ ko fare Messiah, miki dag Jehovah rogon ni nge lebug bang ko tin nib m’agan’ ngay. (Galatia 3:19, 24) Pi girdi’ nem ni ngar uned ngak faen ni owchen ni th’abi ga’ fan e ngar manged fare n’en ni kan yiiynag ni “gil’ilungun ko pi prist” ma yad ra mang bang ko fare “m’ag nib beech” ni fare “Israel,” nib beech ni piin kan dugliyrad.​—Jeremiah 31:31-34; Hebrews 8:7-9. c

10, 11. (a) Uw rogon ni dag Jehovah ngan nang faen Owchen ni kan yiiynag? (b) Mang fan ni keb Fak Got ni kari maagirag rok ngaray nga fayleng?

 ¹⁰ Rogon ni nge lebug e tin nib m’agan’ Got ngay ko fare kanawo’, e taw ngal’an faen Owchen ni kan yiiynag ni nge m’ug u fayleng. Me l’og Jehovah Gabriel ni fare engel ni nge yog ngak Maria nra gargeleg ba bitir ni Jesus fithingan. I yog fare engel ngak ni gaar: “Ma bayi mang be’ nib tolang ma bay nog ni ir Fak Got ni Th’abi Tolang. Mi Somol ni ir Got e bayi pilungnag; ni bod rogon David ni ir e ga’ rok, ma bayi mang pilung rok e piin ni owchen Jakob ndariy n’umngin nap’an; ma gagiyeg ni nge tay e dariy n’umngin nap’an ma dabi math biid!” (Luke 1:32, 33) Ke tamilang kan nang faen Owchen ni kan micheg.​—Galatia 3:16; 4:4.

¹¹ Fak Jehovah ni kari maagirag rok e ngeb nga fayleng ni ngan skengnag nge mus rogon. Fare fulweg nrib fel’ ko deer ara magawon ni ke sunumiy Satan e aram e be tor nga daken rogon kanawoen e yafas rok Jesus. Gur, ra par nib yul’yul’ ngak e Chitamangin? Re n’ey e ba muun ngay e tin nib mith mab thothup. Tomur riy me weliy Paul ni apostal e maruwel rok Jesus ni gaar: “Rib mudugil ni yira ngat ko n’en nib riyul’ ni ir e ke michan’dad ngay: I yib i m’ug ni ke bod yaan e girdi’, ma Kan ni Thothup e dag nib mat’aw, ma pi engel e ra guyed. Ma kan machibnag murung’agen ko pi nam i yan, me michan’ e girdi’ nu fayleng ngak, min fek nga tharmiy.” (1 Timothy 3:16) Arrogon, bochan ni kari par nib yul’yul’ nge mada’ ko yam’, me pi’ Jesus e fulweg nrib puluw ko togopuluw ni tay Satan. Machane boch ban’en ko fa tin nib mith mab thothup e ka ba’ ni kun dag ngan nang.

“Tin nib Mith mab Thothup ko Gil’ilungun Got”

12, 13. (a) Mang reb e ban’en ni bang ko “tin nib mith mab thothup ko fare gil’ilungun Got”? (b) Mang e ba muun ngay ni ke mel’eg Jehovah in e girdi’ ni nga ranod nga tharmiy?

¹² U nap’an reb e machib ni tay Jesus u Galile, me dag ni fa tin nib mith mab thothup e rib peth ko am ara Gil’ilungun Kristus. I yog ngak pi gachalpen ni gaar: “Gimed e kan weliy ngomed e tin nda nnang ni murung’agen e [“gagiyeg rok Got,” Mark 4:11].” (Matthew 13:11) Bang ko tin nib mith nem e aram ke mel’eg Jehovah “fachi ulung” ni 144,000 e biyu’ e girdi’ ni ngara uned ngak Fak ni ngar manged bang ko faen ni Owchen, ni ngar gagiyeggad u tharmiy.​—Luke 12:32; Revelation 14:1, 4.

¹³ Bochan ni kan sunumiy e girdi’ ni ngar pared u roy u fayleng, ma girdi’ ni yad ra yan nga tharmiy e bod ni “ka fin” ni sunumiyrad Jehovah. (2 Korinth 5:17) Peter, ni bagayad e piin ni bay e athap rorad ni nga ranod nga tharmiy e yoloy ni gaar: “Ngad pininged e magar ngak Got ni ir e Chitamangin e Somol rodad i Jesus Kristus! Ya bochan e ri be runguydad me pi’ e yafas nib beech ngodad ni fan e faseg Jesus Kristus ko yam’. Ereray fan ni kad nanged ni tin ni ke l’agan’dad ngay e bay yib i m’ug nib riyul’, ere gadad be son ni nge yog ngodad e flaab ni ba ga’ ni ke chaariy Got ni fan ngak e tirok e girdi’, ni be chaariy e pi tow’ath nem u tharmiy ni fan ngomed ko gin ndabiyog ni nge wod riy ara kireb fe kaday.”​—1 Peter 1:3, 4.

14. (a) Uw rogon ma girdi’ ni gathi yad piyu Jew e kar manged bang ko “tin nib mith mab thothup ko gil’ilungun Got”? (b) Uw rogon ni kad nanged fan e pi n’en “nib mith” rok Got ney?

¹⁴ Maku reb ni bang ko tin nib mith mab thothup ni bay rogon ko Gil’ilungun ni ba yib e aram e tin nib m’agan’ Got ngay ni nge mel’eg boch e girdi’ ni gathi yad piyu Israel ngar uned ngak Kristus ngar gagiyeggad u tharmiy. I weliy Paul murung’agen e re “kanawo’” rok Jehovah ney ara kanawoen ni nge lebuguy e tin nib m’agan’ ngay ni gaar: “Kakrom e da nog e re bugithin nib mith ney ngak e girdi’, machane chiney e ke dag Got ngak e pi apostal nge pi profet rok nib thothup u daken fare Kan ni Thothup. Re bugithin nem nib mith e baaray: Thin Nib Fel’ ni yib rok Got e ir e ke ayuweg e piin ni gathi yad piyu Israel kar chaggad ngak piyu Israel ke fel’ rogorad ko tin ni be pi’ Got kar manged yu yang u taab dowef, ma be fel’ rogorad ko tin ni yog Got nra pi’ u daken Kristus Jesus.” (Efesus 3:5, 6) Fan e re n’ey ni bang ko tin nib mith mab thothup e kan dag ngak e “pi apostal nib thothup.” Maku arrogon e ngiyal’ ney, faanra de ayuwegdad fare kan ni thothup, ma dabiyog ni ngad nanged fan e  pi n’en “nib mith” rok Got ney.​—1 Korinth 2:10; 4:1; Kolose 1:26, 27.

15, 16. Mang fan ni ke mel’eg Jehovah e girdi’ ni ngar uned ngak Kristus ko gagiyeg?

¹⁵ Fa “raay nge aningeg i ragag nge aningeg i biyu’ e girdi’” ni kan guy ni yad ba sak’iy u tooben fare “Fak e Saf” ni kar sak’iygad nga daken e burey ni Zion e ka nog ni “kan biyuliyrad u fayleng” ya “kan biyuliyrad u fithik’ e tin ni ka ba’ e girdi’ nu fayleng ma yad e tin som’on e girdi’ nni pi’rad ngak Got nge ngak fare Fak e Saf,” ni Kristus Jesus. (Revelation 14:1-4) I mel’eg Jehovah bagayad pi fak u tharmiy ni nge mang bang ni th’abi ga’ fan ko faen Owchen ni kan micheg u Eden, machane mang fan ni ke mel’eg e girdi’ ni ngar uned ngak Kristus? I weliy Paul ni apostal ni pi cha’ nem ni yad buchuuw e ni piningrad ni rogon ni “ba adag [Jehovah] nge tin ni lemnag” “nrogon ni ke m’ay i lemnag rok Got ke tay nge rogon ni turguy.”​—Roma 8:17, 28-30; Efesus 1:5, 11; 2 Timothy 1:9.

¹⁶ Tin nib m’agan’ Jehovah ngay e ngan thothupnag fithingan nib thothup ma ngan tamilangnag e gagiyeg rok ni th’abi tolang u palpalthib. U daken e “kanawo’” rok nrib gonop, ara kanawoen ni ma gagiyegnag ban’en, me l’og Fak ni bin nganni’ ngeb nga fayleng, min skengnag nge mada’ ko yam’. Maki, dugliy ni Gil’ilungun Kristus ni Fak e nge un boch e girdi’ ngay ni nga kur pared nib yul’yul’ ko gagiyeg rok ni th’abi tolang nge ni mada’ ko yam’.​—Efesus 1:8-12; Revelation 2:10, 11.

17. Mang fan ni gad ba felfelan’ ni Kristus nge girdi’ ni ngar gagiyeggad e ur moyed ni yad boch e girdi’?

¹⁷ I dag Jehovah e t’ufeg rok ngak pi fak Adam ma aram me l’og Fak nga fayleng miki mel’eg boch e girdi’ ni nge un ngak Fak ngar manged bang ko Gil’ilungun. Uw rogon ni ra fel’ rogon riy boch e girdi’ ko re n’em ni piin ni kar pared nib yul’yul’ ku Jehovah, ni tabab rok Abel? Girdi’ ndawora flontgad, ma kar manged sib ko denen nge yam’ e ba t’uf ni ngan golnagrad ko tirok Got nge dowef rorad min ayuwegrad ngar flontgad, nib puluw ko tin nib m’agan’ Jehovah ngay ni fan ko girdi’. (Roma 5:12) Rib gel e felfelan’ ko urngin e girdi’ ni yad be athapeg e yafas ni manemus u fayleng ni ngar nanged ni ra t’ufegrad e pilung rorad ma ra gol ngorad ni bod ni ke dag ngak pi gachalpen u nap’an e machib ni tay u fayleng! (Matthew 11:28, 29; Hebrews 2:17, 18; 4:15; 7:25, 26) Ma ri ma gapasnag lanin’rad ni ngar nanged ni girdi’ ni ngar uned ngak Kristus ngar manged pi pilung ni prist e yad e piin nib gel e michan’ rorad ma kar athamgilgad ko meewar rorad ma kar mada’niged e magawon nib gel, ni bod gadad!​—Roma 7:21-25.

Tin nib M’agan’ Jehovah Ngay ni Dabi Thil

18, 19. Mang fan ni thin rok Paul ni bay ko Efesus 1:8-11 e ke tamilang boch ngodad, ma mang e n’en ni gad ra weliy ko bin migid e thin ara article?

¹⁸ Chiney e rayog ni ngad nanged fan e thin rok Paul ni fan ngak e Kristiano ni kan dugliyrad, ni bay ko Efesus 1:8-11. I yog ni ke dag Jehovah ngorad e n’en nib “mith,” ni aram e kan ‘dugliyrad’ ni ngar uned ngak Kristus ko flaab, ma “ke mu’ i lemnag rok Got nib puluw ko tin nib m’agan’ ngay ni ir e be gagiyegnag urngin ban’en.” Gad manang ni pi thin ney e ba puluw ko “kanawo’” ni rin’ Got nga boch ban’en ni fan ni nge lebuguy e tin nib m’agan’ ngay. Maku ra ayuwegdad e re n’ey ni ngada nanged fan ko mang fan ni kemus ni buchuuw e Kristiano u fithik’ e piin ni ma un ko Abich ni Balayal Rok Somol e ma kay fare flowa ma ma unum fare wain.

¹⁹ Bin migid e thin ara article, ma gad ra guy ko mang fan fare Puguran ko Yam’ ni tay Jesus ngak e Kristiano ni bay athap rorad ni nga ranod nga tharmiy ma mang fan ni bokum million e girdi’ ni bay e athap rorad ni ngar pared u roy u fayleng ni manemus e thingara adaged ni ngar nanged ko mang e be yip’ fan fare Puguran.

[Footnotes]

Ngan Sul Nga Daken

• Mang fan ni ke sunmiy Jehovah e fayleng me tay e girdi’ nga daken?

• Mang fan ni Fak Jehovah ni kari maagirag rok e ba t’uf ni ngan skengnag u fayleng?

• Mang fan ni ke mel’eg Jehovah e girdi’ ni ngar uned ngak Kristus ko gagiyeg?

[Study Questions]