“Nge Urngin E Girdi’ Me Nang”

“Bay mu weliyed murung’ageg nge yan i mada’ ko yungi n’en ni yan i mus e fayleng ngay.”​—ACTS 1:8.

1. Wuin nge uw e rung’ag e pi gachalpen riy ni som’on fare yiiy ni bay ko Matthew 24:14?

 THIN ni yog Jesus ni bay u Matthew 24:14 e goo yi manang ma boor i gadad ni ke mit ngak. Riyul’ nrib manigil e re yiiy nem! Am lemnag e n’en ni i lemnag e pi gachalpen u nap’an ni rung’aged e re thin nem! Re duw nem e 33 C.E. I moy e pi gachalpen Jesus rok ni ke gonapan dalip e duw, ma chiney e kar uned ngak nga Jerusalem. Kar guyed e pi maang’ang ni i ngongliy ma kar motoyilgad ko pi machib rok. Yugu aram rogon ni rib fel’ u wan’rad fapi thin riyul’ ni ke fil Jesus ngorad, ma ri yad manang ni gathi gubin e girdi’ ni ra fel’ u wan’rad. Boor e toogor ku Jesus nib kireb.

2. Mang boch e riya’ nge magawon ni ra mada’nag pi gachalpen?

² U daken fare burey nu Olives, e par aningeg fapi gachalpen Jesus, ngaur motoyilgad ngak ni be weliy murung’agen e pi riya’ ni bay yib nge pi magawon ni bay ra mada’naged. U boch nga m’on riy, ma ke yog Jesus ngorad ni bay ni li’ nge yim’. (Matthew 16:21) Ke yog nib tamilang ni ku yad ra mada’nag e togopuluw nib maangach. Me gaar: “Bayi kolmed e girdi’ ngar pied gimed ngan gechinagmed. Ma urngin e girdi’ e bay ra fanenikayed gimed ni bochag.” Gathi kemus aram. Pi profet ni googsur e bay ra chafeged boor e girdi’ nga bang. Boch e girdi’ e bay ra olobochgad ma dab ra yul’yul’ gad ngorad mi yad fanenikayed yad. Machane tin nriyul’ riy e ‘tin boor’ e bay ra paged e t’ufeg rorad ngak Got nge thin rok ni nge war.​—Matthew 24:9-12.

3. Mang fan ni pi thin rok Jesus ni bay u Matthew 24:14 e yira gin ngay?

³ Kafin ni mu’ i yog rok Jesus ban’en nib kireban’ me yog ban’en ni gin pi gachalpen ngay ni gaar: “Ma re thin rok Got ney Nib Fel’ ni murung’agen e gagiyeg rok Got e bay ni machibnag u ga’ngin yang e fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:14) Arrogon, fare maruwel ni tababnag Jesus u Israel​—ni “ngan weliy murung’agen e tin riyul’”—​e ra ul’ul me garer nga ga’ngin yang e fayleng. (John 18:37) Re yiiy ney e riyul’ ni yira gin ngay! Nge yan e re maruwel ney nga “ga’ngin yang e fayleng” e sana ba gel e magawon riy; ngan rin’ ni yibe mada’nag e “fanenikay ni bay u fithik’ e pi nam” e ban’en ni yira gin ngay. Ngan mu’nag e re maruwel ney nib ga’ e gathi kemus ni ra gagiyelnag nib tolang  Jehovah nge gelngin ya ku ra dag e t’ufeg, runguy, nge gum’an’ rok. Ma ku reb riy e ra ayuweg e pi tapigpig rok ni ngar daged e michan’ nge yul’yul’ rorad.

4. Mini’ e ka nog ngorad ni ngar maruweliyed fare maruwel ni ngan machib, ma mang e thin ni ra fal’eg lanin’uy ni yog Jesus?

⁴ I digey Jesus pi gachalpen ni de maruwaran’rad ni bay u pa’rad reb e maruwel ni rib ga’ fan. U m’on ni yan nga tharmiy, me m’ug Jesus ngorad me gaar: “Bay yib gelngimed ko ngiyal’ ni bay yib fare Kan ni Thothup riy nga dakenmed, ma aram mi gimed weliy murung’ageg u lan yu Jerusalem, ngu lan yu Judea, ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.” (Acts 1:8) Arrogon, boor e girdi’ ni ra uned ngorad. Machane, pi gachalpen e yad buchuuw. Uw feni ra fel’ lanin’uy ni ngan nang ni fare gelngin e Kan ni Thothup rok Got nib gel e ra yib gelngin ngorad ni ngar mu’naged e re maruwel ney!

5. Mang e n’en ni de nang e pi gachalpen u murung’agen e re maruwel ney ni ngan machib?

⁵ Manang e pi gachalpen ni thingar ra machibnaged fare thin nib fel’ “mar pingeged e girdi’ u gubin e nam ngar manged boch e pi gachalpen.” (Matthew 28:19, 20) Machane dar nanged ko uw feni fel’ rogon e machib ni ngan ta’, maku dar nanged e ngiyal’ ni ra yib e tomur. Ku arrogodad. Tiney e boch ban’en ni kemus ni Jehovah e rayog ni nge dugliy. (Matthew 24:36) Nap’an ni ra fel’ rogon u wan’ Jehovah e machib ni kan ta’, ma aram e ra chuweg e re m’ag nib kireb ney. Fin aram e ra nang e pi Kristiano ni kan mu’nag fare maruwel ni ngan machib u rogon nib m’agan’ Jehovah ngay. Pi gachalpen Jesus kakrom e rib mo’maw’ rorad ni ngar guyed e ga’ngin yang ni ke taw e machib ngay e chiney ko tomur.

Machib ko Bin Som’on e Chibog

6. Mang e buch u nap’an e Pentekost ko duw ni 33 C.E nge buchuuw nga tomren?

⁶ U lan e bin som’on e chibog, ma fare machib ko Gil’ilungun nge ngan yognag boch e pi gachalpen e k’aring boch ban’en ni yira gin ngay. U lan fare rran ni Pentekost ko duw ni 33 C.E., ma sogonapan 120 pi gachalpen ni yad bay ko thal ni lang e naun u reb e singgil u Jerusalem. Min puog e Kan ni Thothup rok Got nga dakenrad, me pi’ Peter ni apostal reb e welthin ni pug e tafinay rorad ni be weliy fan e re maang’ang ney, ma sogonapan 3,000 e mich u wan’rad min taufenagrad. Kemus ni tabolngin e ram. Yugu aram rogon ni be gay rogon e pi tayugang’ ko pi yurba’ i teliw ni ngar taleged fare machib ko thin nib fel’, “ma be puthuy Somol ko re ulung nem e piin ni ka fin ra thapgad ngak Got”. Munmun, “me yan urngin e pi girdi’ nem nge yan i mada’ ko lal e biyu’.” Tomren e binem, “me yoor e girdi’ ni mun ko re ulung nem, ni yu ulung i pumoon nge ppin ni piin ni ke mich u wan’rad.”​—Acts 2:1-4, 8, 14, 41, 47; 4:4; 5:14.

7. Mang fan fare n’en ni kan pingeg Kornelius e ban’en ni ke thil ni rib ga’ fan?

⁷ U nap’an e duw ni 36 C.E. ma ki buch reb e n’en ni kub ga’ fan​—kan pingeg ma kan taufenag Kornelius, ni reb e Gentile. U nap’an ni kan pow’iy Peter ko re moon ney ni bay madgun Got rok, me dag Jehovah ni fare n’en ni ke tay Jesus chilen ni ngan “pingeg e girdi’ u gubin e nam ni ngar manged pi gachalpen” e gathi ke mus ni fan ngak piyu Jew u boch e nam. (Acts 10:44, 45) Mang e n’en ni rin’ e piin ni yad be yog e thin? Nap’an ni nang e pi apostal nge  pi piilal u Judea ni ngkun fek fare thin nib fel’ i yan nga yugu boch e nam ni piin gathi piyu Jew mar pininged e sorok ngak Got. (Acts 11:1, 18) U nap’an e ngiyal’ nem, ma fare maruwel ko machib e ki ul’ul ni nge yib wom’engin u fithik’ e pi Jew. Boch e duw nga tomren, nsana u nap’an e duw ni 58 C.E. ma ke yoor e piin ni gathi yad piyu Jew ni ke mich u wan’rad ma “bokum biyu’ [piyu Jew] ni ke mich u wan’rad.”​—Acts 21:20.

8. Mang e ke rin’ fare thin nib fel’ ngak e girdi’ ni be’ nge be’?

⁸ Yugu aram rogon ni pi matheeg ney ni be yoor u fithik’ e pi Kristiano ko bin som’on e chibog e ke k’aring ni ngan gin ngay, ri dab da paged talin ni pi matheeg ney e be yip’ fan e girdi’. Fare thin nu Bible ni kar rung’aged e rib gel gelngin. (Hebrews 4:12) Rib tomgin ni ke thilyeg e yafas ko pi cha’ ni kar chichiiyed pa’rad riy. Boor e girdi’ ni kar beechnaged e yafas rorad, ma ka ron’ed nga dakenrad e bin nib beech e pangin, ma aram e ke fel’ thilrad Got. (Efesus 4:22, 23) Kab riyul’ e re n’ey e ngiyal’ n’ey. Pi cha’ ni yad ra motoyil ko fare thin nib fel’ e ra yog fare athap ngorad nib manigil ni ngan par nib fas ni manemus.​—John 3:16.

Piin ni Yad Ma Maruwel Got u Taabang

9. Mang e n’en ni ke nang e tin nsom’on e Kristiano kakrom nib mil fan ngorad ma bay mat’awrad ni ngar rin’ed?

⁹ Fa tin som’on e Kristiano kakrom e da rogned ni yad tapgin e n’en ni kar yognaged. Kar daged ni maruwel rorad ni yad e tamachib e ke ayuweg “gelngin fare kan ni thothup”. (Roma 15:13, 19) Jehovah e ir e cha’ nib mil fan ngak ni nge mon’og e tirok ban’en. Yugu aram rogon, ma pi Kristiano nem e yad manang ni bay mat’awrad mab mil fan ngorad ni ngar “maruwelgad Got u taabang.” (1 Korinth 3:6-9) Angin ni ke yib riy, ni taareb rogon ko ginang ni tay Jesus, e kar fanayed yad nib fel’ rogon ko fare maruwel ni ka nog ngorad ni ngar rin’ed.​—Luke 13:24.

10. Uw rogon ni athamgil boch e tin nsom’on e Kristiano kakrom ni ngar machibgad u ga’ngin yang e fayleng ni nge urngin e girdi’ me nang?

¹⁰ Bochan ni ir reb e “apostal ngak e piin ni gathi yad piyu Israel” ma i milekag Paul ni bokum biyu’ e mile u maday ngu arow, ma be sunumeg boor e ulung ko yungi n’en ni ma par piyu Roma riy u Asia nge Greece. (Roma 11:13) Maku i milekag nga Roma ma sana ki yan nga Spain. U nap’an e ngiyal’ nem, ma apostal Peter, e wereg fare “thin nib fel’ ngak e pi cha’ ni [kan] maad’ad ngorad”, me milekag u yugu pa’ e kanawo’ ni nge pigpig u Babylon, bang ni ri boor e piyu Jew riy e ngiyal’ nem. (Galatia 2:7-9, NW; 1 Peter 5:13) U fithik’ e pi girdi’ ni boor ni ur maruweliyed fare maruwel rok Somol e ba muun fagali ppin ni ka nog Tryphaena nge Tryphosa ngorow. Ku yugu reb e ppin ni ka nog Persis ngak e ku ka nog ni “boor e maruwel ni ke ngongliy ni fan ngak Somol”.​—Roma 16:12.

11. Uw rogon ni ke taw’athnag Jehovah e athamgil ni ke tay pi gachalpen?

¹¹ Kari taw’athnag Jehovah e pi cha’ nem nge ku boch e girdi’ ni kar maruwel gad ni rib pasig. Ba lich ko 30 e duw nga tomuren ni ke yog Jesus ni ngan machibnag urngin e girdi’ u fayleng, me yoloy Paul ni fare “thin nib fel’” e kan “machibnag ngak urngin e girdi’ u fayleng.” (Kolose 1:23) Ke yib e tomur e ngiyal’ nem, fa? Arrogon u reb e kanawo’. Ke yib nga daken fare m’ag rok  piyu Jew ko duw ni 70 C.E u nap’an ni ke gothey e pi salthaw nu Roma yu Jerusalem nib muun ngay fare tempel. Machane, ke dugliy Jehovah ni kab ga’ boch e machib ni ran tay u m’on ni ngan thang e re m’ag nib kireb rok Satan ney.

Machib ni Yibe Tay e Ngiyal’ Ney

12. Uw rogon ni ke nang fan e piin ni Yad Ma Fil e Bible aram ko som’on fare motochiyel ni ngan machib?

¹² U nap’an tungun fa bin ni ragag nge mereb e chibog, u tomren ni ke n’uw nap’an ni ke wer e girdi’ ni kar digeyed e thin nriyul’, ma kan tababnag biyay fare liyor nib machalbog. Piin Yad Ma Fil e Bible, ni aram e yad e Pi Mich Rok Jehovah e chiney, e kar nanged fan nib fel’ rogon fare motochiyel ni ngar pingeged e girdi’ ngar manged pi gachalpen u fayleng. (Matthew 28:19, 20) U nap’an e duw ni 1914, ma bay 5,100 e girdi’ ni kar uned ko fare maruwel ko machib u fithik’ e pasig, ma ke taw fare thin nib fel’ nga sogonapan 68 e nam. Yugu aram rogon ma piin ni Yad Ma Fil e Bible e dar nanged nib fel’ rogon fan fare thin ni bay ko Matthew 24:14. U tungun fa bin mereb i ragag e chibog, ma fare Bible, ni bay riy fare thin nib fel’, ara fare gospel, e kan piliyeg ma ke fal’eg e pi girdi’ ni yad ma piliyeg e Bible nga boor mit e thin ma kan wereg nga ga’ngin yang e fayleng. Arfan, ni lan boor e duw ni ke yan, ma piin Yad Ma Fil e Bible e kar lemnaged ni fare machib e ke taw ngak e pi nam.

13, 14. Mang e n’en ni kan nang fan nib tamilang u murung’agen e n’en nib m’agan’ Got ngay ni kan dag ko fare Wulyang Ntagil’ E Damit ko 1928?

¹³ Ke pi’ Jehovah e tamilangan’ ni buchuuw ma buchuuw u murung’agen e n’en nib m’agan’ ngay. (Proverbs 4:18) Fare Wulyang NTagil’ E Damit ko December 1, 1928, e ke gaar: “Rayog ni nga dogned ni fare Bible ni kan wereg e ke yognag fare machib ni bay ko fare gospel ko gil’ilungun, fa? Rib mudugil ni danga’! Yugu aram rogon ni kan wereg e pi Bible ney ma kab t’uf ko nochi ulung ko pi mich u roy u fayleng ni ngar ngongliyed boch e babyor ni be weliy e n’en nib m’agan’ Got ngay ma ku ranod ra guyed e pi tabinaw ni kan tay e pi Bible ney riy. Ya faanra danga’ ma dabiyog ni ngar nanged murung’agen fare gil’ilungun Kristus ni kan sunumiy e ngiyal’ n’ey.”

¹⁴ Maku re babyor nem ni Wulyang Ntagil’ e Damit e ki gaar: “U nap’an e duw ni 1920, ma piin ni Yad Ma Fil e Bible e kar nanged e bin nib puluw i fan fare yiiy rok e Somol rodad ni bay ko Matthew 24:14. Kar nanged ni ‘re gospel ney’ ni bay ni machibnag u gubin yang u fayleng ni nge nang urngin e girdi’, e gathi ba gospel u murung’agen fare Gil’ilungun ni nge yib machane ba gospel ni be weliy ni fare Messiah ara Kristus ni ke pilung ni be gagiyeg u daken e fayleng.”

15. Uw rogon ni ke garer fare maruwel ko machib ni ka nap’an e pi duw ko 1920?

¹⁵ Fachi “ulung ko pi mich ni ba achig” u nap’an e pi duw ko 1920 e de par nib ba achig. Boch e duw nga tomren, min nang murung’agen “ba ulung ni baga’” ko “yugu boch e saf” min tabab i kunuyrad. (Revelation 7:9; John 10:16) Chiney, ma bay 6,613,950 e pi tamachib ko fare thin nib fel’ u lan 235 e nam u fayleng. Ireray reb e yiiy ni ke lebug ni yira ngat ngay! Dariy ba ngiyal’ u m’on riy ni kan machibnag fare “thin nib fel’ ko gil’ilungun” nga bang ni ar feni ga’ yang. Dariy ba ngiyal’ ni ke aray feni yoor e pi tapigpig nib yul’yul’ ku Jehovah u fayleng.

16. Mang e n’en ni kan yognag ko fa binem e duw ni ke yan? (Mu guy e chart ko page 13-16.)

¹⁶ Re ulung ney ni rib ga’ ko Pi Mich e rib gel e maruwel ni kar ted u taabang ko duw ni 2005. Ke pag reb e bilyon e awa ni kan wereg fare thin nib fel’ u 235 e nam. Bokum milyon e return visit ara ngan sul ngak e girdi’ biyay ni kan tay, ma bokum biyu’ e girdi’ ni kan fil e thin nu Bible ngorad. Re maruwel ney e ke yognag e Pi Mich Rok Jehovah, ni kar pied e tayim rorad nge chugum rorad ni fan ni ngar weliyed e thin rok Got ngak yugu boch e girdi’. (Matthew 10:8) U daken gelngin e kan ni thothup rok nib gel, ma be ul’ul Jehovah ni nge pi’ gelngin e pi tapigpig rok ni ngar mu’naged e n’en nib m’agan’ ngay.​—Zekariah 4:6.

Yibe Maruwel nib Gel ni Ngan Machib

17. U rogon ni be sap e girdi’ rok Jehovah ko thin rok Jesus u murung’agen e ngan machibnag fare thin nib fel’?

¹⁷ Yugu aram rogon ni ke chugur ko 2,000 e duw ni ke yan u nap’an ni ke yog Jesus ni fare thin nib fel’ e ran machibnag, machane pasig ni  be tay e girdi’ rok Got ko re maruwel ney e dar m’ay. Gadad manang ni faan gad ra athamgil ni ngad rin’ed e tin nib fel’, ma gadad be dag e pi fel’ngin Jehovah ni t’ufeg, runguy, nge k’adan’. Bod rogon ir, dubdad ni ngan gechignag be’ machane gadad baadag ni nge urngin e girdi’ mar kalgadngan’rad ko denen rorad miki fel’ thilrad Jehovah. (2 Korinth 5:18-20; 2 Peter 3:9) Ke gelnagrad e kan ni thothup rok Got, Pi Mich Rok Jehovah e yad be ul’ul u fithik’ e pasig yad be wereg fare thin nib fel’ nga ga’ngin yang e fayleng. (Roma 12:11) Angin ni ke yib, e girdi’ u gubin yang e yad ba adag fare thin nriyul’ ma yad be fol ko pi kanawo’ ni ma pi’ Jehovah u fithik’ e t’ufeg. Am lemnag boch e n’en ni ke buch.

18, 19. Mang boch ban’en ni ke rin’ boch e girdi’ nrayog ni ngam weliy murung’agen ni kar adaged ni ngar motoyilgad ko fare thin nib fel’?

¹⁸ Charles e reb e ta milay’ u ngal u Kenya. U nap’an e duw ni 1998 me pi’ boor ko 18,000 e pound e tamagow ni chuway’ min pi’ reb e certificate ngak ni ke mang e cha’ ni Th’abi Cheg ko Mayuw Tamagow. Re ngiyal’ nem ma ke tabab i fil e Bible. Munmun me yib i nang ni be’ ni ma un i ngongliy e tamagow e be togopuluw ko fare motochiyel ku Jesus ni nge t’uf rodad e en nib migid ngodad. (Matthew 22:39) Nap’an ni nang ko tomur ni ‘facha’ ni th’abi cheg ko mayuw tamagow’ e ir e ‘cha’ ni th’abi cheg ko mili’ girdi’’ ma aram me pag Charles e yub ko fapi woldug rok ni tamagow nge yim’. Ke mon’og i yan ke ognag e yafas rok ke un ko taufe ma chiney e ke mang reb e pioneer nge ministerial servant.

¹⁹ Dariy e maruwar riy ni be rurug Jehovah e pi nam ko machib ni yibe tay, ma tin ni baga’ fan​—ni aram e girdi’—​e yad be yib. (Haggai 2:7) Pedro, ni ma par u Portugal, e un nga reb e skul ko padrey u nap’an ni 13 e duw rok. N’en ni ke nameg e nge mang reb e missionary nge fil e Bible ngak e girdi’. De n’uw nap’an ma ke chuw ko fare skul ya bochan ni gathi ri yima fil e Bible ko pi class ni ma fek. Nel’ e duw nga tomren me tabab i fil murung’agen e man’ey ko girdi’ u reb e skul nib tolang u Lisbon. I par rok reb e ppin ni walagen e nina’ rok, ni reb e Pi Mich Rok Jehovah, ma i pi’ e athamgil ngak ni nge fil e Bible. Ngiyal’ nem e gathi rib mich u wan’ Pedro ni bay Got, ma ku dawori mudugil u wan’ ko nge fil e Bible fa danga’. Ke non ngak e sensey rok u murung’agen ni dar yog ni nge dugliy ban’en nib fel’ rogon. Me yog fare moon ni sensey rok ngak ni girdi’ ni dabiyog ni ngar dugliyed ban’en e yad be gafgownaged yad. Ngiyal’ nem, me dugliy Pedro ni ngan fil e Bible ngak. Kafin i un ko taufe ni dawori n’uw nap’an ma chiney e be fil e Bible ngak boch e girdi’.

20. Mang fan ni rayog ni ngad felfelan’gad ni fare machib ni ngan wereg ngak e pi nam e kan mu’ i pi’?

²⁰ Ka daworda nanged ko uw feni palog e machib ni yira tay ngak e pi nam, maku dad nanged e re rran nge awa ni ba yib e tomur riy. Kemus ni gadad manang ni ke chugur. Gadad be felfelan’ ni fare machib ko thin nib fel’ ni be garer i yan e ku ir bang ko fare pow ni be dag ni ke chugur ko fare tayim ni Gil’ilungun Got e bayi yin’ lon e pi am ko girdi’. (Daniel 2:44) Gubin e duw ni be yan, ma bokum milyon e girdi’ ni kan pi’ ngorad e tayim ni ngar filed fare thin nib fel’, ma re n’ey e be pining e sorok ko Got rodad, ni Jehovah. Manga yugu dugliyed an’dad ni ngad pared nib yul’yul’ ngad chaggad ngak pi walagdad u ga’ngin yang e fayleng ngaud maruweliyed nib gel fare maruwel ni ngan machibnag urngin e pi nam. Faan gad ra rin’ ni aram rogon, ma aram e gad ra ayuweg e yafas rodad nge pi cha’ ni ra motoyil ngodad.​—1 Timothy 4:16.

Ka Gamanang?

• Mang fan ni rib manigil fare yiiy ni bay ko Matthew 24:14?

• Uw rogon ni i athamgil e tin som’on e Kristiano kakrom ni ngar machibgad, ma mang angin ni ke yib riy?

• Uw rogon ni ke nang fan e piin Ma Fil e Bible feni t’uf ni ngan machibnag gubin e nam?

• Nap’an ni kad nanged rogon e maruwel ni ke tay e pi girdi’ rok Jehovah fa binem e duw, ma mang e n’en ni ke fel’ u wan’um riy?

[Study Questions]

 [Chart on page 13-16]

2005 SERVICE YEAR REPORT OF JEHOVAH’S WITNESSES WORLDWIDE

 (See bound volume)

[Map/Pictures on page 11]

Ke milekag Paul ni bokum biyu’ e mile u arow ngu maday ni nge machibnag fare thin nib fel’

[Picture on page 10]

Ke gagiyegnag Jehovah Peter ni nge machibnag Kornelius nge girdien e tabinaw rok