Nguun Folwok Ko Gum’an’ Rok Jehovah

“Ya dawori sowath Somol ni nge rin’ e tin ni ke yog nra rin’, . . . ya be gum’an’nag ir.”​—2 PETER 3:9.

1. Mang tow’ath e ke ognag Jehovah ngak e girdi’ ni dabiyog i taarebnag nga ban’en?

 KE OGNAG Jehovah ngodad ban’en ndariy be’ ni rayog ni nge ognag. Ban’en ni ri yi baadag ma rib tolang puluwon, machane dabiyog i chuw’iy maku dabiyog ni ngan yognag. N’en ni ke ognag e fare tow’ath ni yafas ni manemus​—ni fan e re n’ey e yafas ni manemus u paradis u fayleng. (John 3:16) Uw feni felfelan’ e re n’em! Ra chuw e pi n’en ni ma k’aring e kireban’​—cham, nge maangach, nge gafgow, nge oloboch, nge m’ar nge yam’. Ra par e girdi’ u fithik’ e gapas ni gubin ngiyal’ ma yad ba taareb u tan e gagiyeg u fithik’ e t’ufeg ko Gil’ilungun Got. Uw feni ri gad be yim’ ni bochan e re Paradis nem!​—Isaiah 9:6, 7; Revelation 21:4, 5.

2. Mang fan ndawori chuweg Jehovah fare fayleng rok Satan?

² Jehovah e ku be sonnag e ngiyal’ ni nge Paradisnag e fayleng. Riyul’ e re n’em, ya ir e ba t’uf rok e tin nib mat’aw ma ba yal’uw. (Psalm 33:5) Der ma felfelan’ ni ma guy ba fayleng ni ma dariyfannag ara ma togopuluw ko pi kenggin e motochiyel rok nib mat’aw, ba fayleng ni der ma tayfan mat’awon ma ma gafgownag e girdi’ rok. Machane, boor fan nib fel’ ni dawori chuweg e fayleng rok Satan nib kireb. Pi n’en ni fan nem e ba l’ag rogon ko fare deer u rogon mat’awun e gagiyeg rok. Ra ngan yal’uweg e pi deer ney, ma ke dag Jehovah ba felngin nrib fel’, ba felngin ni boor e girdi’ e ngiyal’ ney ndariy rorad​—ni aram e gum’an’.

3. (a) Mang fan fare thin ni kan piliyeg ni Greek nge Hebrew ni “gum’an’” u lan e Bible? (b) Mang e deer ni ngad lemnaged e chiney?

³ Bay bbug e thin ni Greek ni kan piliyeg u lan e New World Translation ni “gum’an’” ni dalip yay. Ni n’en fan e “n’uwan’” arfan ni boor yay ni yima yog e “gum’an’.” Thin nu Greek nge Hebrew ni fan ko “gum’an’” e aram e k’adan’ nge sowath ni ngan damumuw. Uw rogon e gum’an’ rok Jehovah ni ra yib angin ngodad? Mang e gad ra fil ko gum’an’ nge k’adan’ rok Jehovah nge pi tapigpig rok nib yul’yul’? Uw rogon ni gad manang ni gathi dariy e gin ma mus e gum’an’ rok Jehovah riy? Ngada guyed.

Ngan Lemnag e Gum’an’ Rok Jehovah

4. Mang e ke yoloy apostal Peter u rogon e gum’an’ rok Jehovah?

⁴ Rogon e gum’an’ rok Jehovah, e yoloy Peter ni apostal ni gaar: “Dab mpaged talin e re bugithin ni baara’: rogon ko changar rok Somol e dariy ban’en nib thil u thilin taareb e rran nge bbiyu’ e duw, ya l’agruw ni taareb rogon u wan’. Ya dawori sowath Somol ni nge rin’ e tin ni ke yog nra rin’, ni bod rogon ni be lemnag boch e girdi’. Ya be gum’an’nag ir u puluwmed, ni fan e dabun ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Peter 3:8, 9) Wenig ngom mu lemnag l’agruw ban’en ni ri baga’ fan ni kan weliy u roy ni rayog ni nge ayuwegdad nge tamilangan’dad ko gum’an’ rok Jehovah.

5. Uw rogon ma rogon ni ma sap Jehovah ko tayim e bay rogon ko ngongol rok?

⁵ Bin som’on riy e der yaliy Jehovah e tayim ni bod ni gad ma rin’. Cha’ nem ni ma par ni manemus, e ra yan reb e biyu’ e duw ma taareb e rran u wan’. Der ma m’ay fe ngoch e tayim rok, machane der ma sowath ni nge rin’ ban’en. Bochan e gonop rok ni dabi m’ay, ma manang Jehovah e ngiyal’ nib fel’ ni nge rin’ ban’en ni nge yib angin ngak urngin e girdi’, me k’adan’ nge sonnag e ngiyal’ nem ni nge taw ngay. Yugu  aram rogon, ma dab da lemnaged ni der thamiy Jehovah e gafgow ni ma yib ko girdi’ rok. Ir reb e Got ni ma “mmunguy ngodad,” me ir e t’ufeg. (Luke 1:78; 1 John 4:8) Ir e bay rogon nra chuweg urngin e kireb ni be k’aring e gafgow.​—Psalm 37:10.

6. Mang e n’en ni ri dab dogned u murung’agen Got, ma mang fan?

⁶ Riyul’, ni de mom, ni ngaun sonnag ban’en ni yibe yim’ ni bochan. (Proverbs 13:12) Arfan, ni nap’an nra dabi papey e girdi’ ni nge rin’ e tin kar micheged, ma ra yog boch e girdi’ ndab ku rin’ed e tin ni yad be nameg. Rib kireb ni ngan lemnag ni aram rogon Got! Faan gad ra oloboch ko gum’an’ rok Got nge lungudad e ke sowath, ma ra mom ni nge maruwaran’dad me mulan’dad, ma gad ra malmal ko tirok Got ban’en. Ma n’en ni kab gel e kireb riy, e rayog ni nge waliydad e piin ni ke ginangey Peter riy ni aram ko som’on​—ni pi ta moning, ndariy e michan’ rorad. Pi cha’ nem ni yad ma moning ni yad ma gaar: “I yog faram ni bay sul, er rogon ni yog fa danga’? Ere ba uw? Chitamangidad e kar m’ad, machane urngin ban’en ni ka be par ni ka rogon ni ka nap’an e ngiyal’ ni sum e fayleng riy ke mada’ ko chiney!”​—2 Peter 3:4.

7. Uw rogon fare gum’an’ rok Jehovah e bay rogon ko tin baadag ni nge kal e girdi’ ngan’rad?

⁷ Bin l’agruw riy nrayog ni ngada fanayed ko thin rok Peter e aram e Jehovah e ba gum’an’ ya baadag ni nge urngin e girdi’ me kalngan’. Piin ni ba gelan’ ni dubrad ni ngar paged e kireb e ra thangrad Jehovah. Machane, yugu aram rogon ma de felfelan’ Got ngay ni nge yim’ e piin kireb. Ya, ma felfelan’ ni nge guy e girdi’ ni ke tal i rin’ e kireb, me par nib fas. (Ezekiel 33:11) Arfan, ri be gum’an’nag ir ma ke pag ni ngan wereg fare thin nib fel’ u fayleng i yan ni bochan ni nge urngin e girdi’ me yog e athap ko yafas ngorad.

8. Uw rogon fare gum’an’ rok Got ni kan guy u rogon ni i ayuweg fare nam nu Israel?

⁸ Fare gum’an’ rok Got e ku kan guy u rogon ni i ayuweg piyu Israel kakrom. Boor e chibog ni i k’adan’ nbochan dar folgad. U daken e pi profet rok e i ta’ ir riy ngorad ni boor yay ni gaar: “Pied keru’med ko kireb romed ma ngam folgad ko motochiyel rog, ni bod rogon urngin e pi motochiyel ni kug pi’ ngak pi chitamangimed u l’ugun e pi tapigpig rog ni fapi profet.” Mang angin ni ke yib? Rib gel e kireban’ riy, ya fapi girdi’ e “da ra folgad.”​—2 Kings 17:13, 14, New World Translation.

9. Uw rogon fare gum’an’ rok Jesus ni ri be dag rogon e gum’an’ ko Chitamangin?

⁹ Tomur riy me l’og Jehovah Fak, ni gubin ngiyal’ ni i yog ngak piyu Jew ni ngar sulod ku Got. Gum’an’ rok Jesus e kari dag rogon e gum’an’ rok e Chitamangin. Ri manang  Jesus ni ke chugur ni ngan li’ ngem’, me non ni kari kireban’ ni gaar: “Jerusalem, Jerusalem! Kam thang e pogofan rok e pi profet, ma kam malangnag e piin ni l’ograd Got ngar feked e thin rok i yib ngom! Nge gaman e in yay ni kug guy rogon ni nggu kunuy urngin e girdi’ rom, ni bod ba alabal ni chugumiy pi fak nga tan pon, machane da mpageg nggu rin’!” (Matthew 23:37) Pi thin ney ni ma kireban’uy ngay e gathi taareb rogon ko tapuf oloboch ni der ma runguy ma baadag ni nge gechignag be’ ya taareb rogon ngak reb e fager nib fel’ ni ma gum’an’nag ir u puluwon e girdi’. Jesus, e bod e Chitamangin nu tharmiy, ni baadag ni nge kal e girdi’ ngan’rad ngar thaygad ko gechig. Boch i yad e ke fol ko fonow rok Jesus ma ke thay ko fare gafgow ni yib nga Jerusalem ko duw ni 70 C.E.​—Luke 21:20-22.

10. Mang kanawo’ e keb angin fare gum’an’ rok Got riy ngodad?

¹⁰ Gathi fare gum’an’ rok Got e riyul’ ni ban’en ni yira gin ngay? Yugu demtrug rogon ni de ra fol e girdi’ rok Jehovah, machane ke pagdad nge ku bokum milyon e girdi’, nib mab e kanawo’ ngodad ni ngada nanged murung’agen me yog e athap ko yafas ngodad. Ke yol Peter ngak e pi Kristiano ni gaar, “Mu lemniged e gum’an’ rok e Somol rodad.” (2 Peter 3:15) Gathi gad ra felfelan’ ko gum’an’ rok Jehovah ni ke bing e kanawo’ ko yafas ngodad? Gathi gad ra meybil ngak Jehovah nge ul’ul i gum’an’nag ir u puluwdad u nap’an ni gad be pigpig ngak ni gubin e rran?​—Matthew 6:12.

11. Yira nang fan e gum’an’ rok Jehovah, ma mang e ra k’aringdad ni ngada rin’ed?

¹¹ Nap’an ni ra tamilangan’dad ko mang fan ni be gum’an’ Jehovah, ma rayog ni ayuwegdad ngauda sonnaged e ngiyal’ nra thapegdad ngak, ma dab uda lemnaged ni kayigi sowath ni nge lebguy e tin ke micheg. (Lamentations 3:26) Nap’an ni gad be ul’ul i yibilay fare Gil’ilungun ni nge yib, ma nge pagan’dad ni Got e manang e ngiyal’ nib fel’ ni nge fulweg taban fare meybil. Gad ra dag e gum’an’ ngak e pi walagdad nge piin ni gad be machibnag ma rayog ni ngad folwokgad ko gum’an’ rok Jehovah. Ku arrogodad ni dub dad ni nge yim’ be’ ya gadad baadag ni ngada guyed ni kar kalgadngan’rad me yog e athap ko yafas ni manemus ngorad.​—1 Timothy 2:3, 4.

Ngan Lemnag e Gum’an’ Rok e Pi Profet

12, 13. Uw rogon ni i maruweliy fare profet ni Isaiah e gum’an’ rok nib fel’ rogon?

¹² Faan gad ra lemnag fare gum’an’ rok Jehovah, ma ra ayuwegdad ni nge fel’ u wan’dad ma gad maruweliy e re felngin nem. De mom ko girdi’ nde flont ni nge gum’an’nag ir, machane rayog. Kada filed rogon ko pi tapigpig rok Got kakrom. Ke yoloy James ni reb i gachalpen ni gaar: “Pi walageg ni girdien Kristus, mu tafinayniged fapi profet ni yad owchen Somol ni ur weliyed e thin rok. Mu filed rorad rogon e gum’an’ nge k’adan’ ni ur tiyed u tan e gafgow ni un ta’ ngorad.” (James 5:10) Ma pi’ e athamgil nge gel nga lanin’dad ni bochan ni kada nanged ni immoy boch e girdi’ ni ke yog ni ra gelgad ko magawon ni bod e tin ni be yib ngodad.

 ¹³ Bod rogon, Isaiah ni profet, ni ba t’uf e gum’an’ rok ko maruwel ni kan pi’ ngak. Me yog Jehovah ngak ni nge yan ni nge “Weliy ngak e girdi’ e pi thin rok ni baaray: Ra mmotoyil mmotoyilgad ma dab mu nanged fan. Ma demtrug urngin yay ni gimed ra changar, ma dab mu nanged e n’en ni yibe rin’.” Me gaar ngog, “Mu m’urm’urnag lolugen e girdi’ ko re nam ney, ma ga ning telrad nge owcherad, nge dab kur guyed ara rrung’aged ban’en ara ra nanged fan ban’en. Ya yad ra rin’ ma sana yad ra chel ngog ngug golnagrad.” (Isaiah 6:9, 10) Dariy fan ni der motoyil fapi girdi’, ya Isaiah e gum’an’nag ir nge yog e thin rok Jehovah ni be ginangrad ni lich ni fen e 46 e duw! Ku aram rogon, ni gum’an’ e ra ayuwegdad ngad athamgiliyed e maruwel rodad ni ngada machibnaged fare thin nib fel’, ni yugu aram rogon ni boor i yad e dabun.

14, 15. Mang e ke ayuweg Jeremiah ni nge par nib mudugil u fithik’ e gafgow nge meewar laniyan’?

¹⁴ Rriyul’, ni nap’an ni i machib fapi profet, ma gathi kemus ni ur mada’naged e piin ni dar motoyil, ya kuur gafgowgad nbochan e togopuluw. Min kalbusnag Jeremiah min “tay nga lan e naun” ni dabkiyog ni nge yan ma ranod ron’ed nga lan e luwed. (Jeremiah 20:2; 37:15; 38:6) Ke gafgow u pa’ e girdi’ ni i lemnag ni nge ayuwegrad. Machane, de damumuw Jeremiah, ma de fulweg taban. Ke gum’an’nag ir ke athamgil u lan boor e duw.

¹⁵ Togopuluw nge moning e de th’ab gulungan Jeremiah, maku arrogodad e ngiyal’ ney. Rriyul’, yu ngiyal’ e ma meewar laniyan’dad. Ku arrogon Jeremiah. Me yoloy ni gaar, “Gu be yog e kireb nib gel ni be rin’ e girdi’, ma gu be yiiynag e n’en ni bay ni rin’ ngorad. Somol yibe minmin ngog ma yibe moning ngog ni gubin ngiyal’, ni bochan e gu be yog e thin rom ngorad. Machane faanra lungug u wan’ug, ‘Dab kug lemnag Somol ma dab kug weliy e thin rok ngak e girdi’.’” Me ere mang e ke buch? Ke tal Jeremiah ko machib? Me ul’ul ngay ni gaar: “Mi i gak’ e thin rom ni bod ba nifiy u fithik’ i lanin’ug ngu fithik’ e yil rog ni dabiyog ni nge chuw. Me ngochngochan’ug ni kug tay rog ndagur yog, mu gu par ndabkiyog ni nge dab gog.” (Jeremiah 20:8, 9) Kam guy, ni ngiyal’ nra lemnag e girdi’ ni yad be moningnag, ma dabki felfelan’. Nap’an ra tiyan’ nga felngin nge feni ga’ fan fare thin ni be machibnag, me yib e felfelan’ ngak nib gel biyay. Maku reb, e Jehovah e be un ngak Jeremiah “ni bod be’ nib yargel,” ni be pi’ gelngin ni nge machibnag fare thin rok Got u fithik’ e pasig ni dabi rus.​—Jeremiah 20:11.

16. Uw rogon me par ni gad ba felfelan’ ko maruwel rodad ni ngan wereg fare thin nib fel’?

¹⁶ Ke pirieg Jeremiah e felfelan’ ko maruwel rok, fa? Arrogon! I gaar ngak Jehovah: “Mu non ngog, mu gu rung’ag urngin bug e thin ni mog. Somol ni Got ni Gubin ma Rayog Rom, i gur e mmil suwog ngom, ere thin rom e be fal’eg lanin’ug ma be pi’ e felfelan’ ngog.” (Jeremiah 15:16) Ke felfelan’ Jeremiah ko maruwel rok ni ke pi’ Got ni be machibnag e thin rok. Ku arrogodad ni ngad felfelan’gad. Maku reb, e ngad felfelan’gad ni bod fapi engel nu tharmiy, ya ke yoor e girdi’ ni ke fol ko machib ni murung’agen Gil’ilungun, kar kalgadngan’rad, kar uned ko fare kanawo’ ni bay e yafas ni manemus riy.​—Luke 15:10.

 “Fare Gum’an’ Rok Job”

17, 18. Uw rogon ni ke par Job nib k’adan’, ma mang angin ni ke yib?

¹⁷ Tomren ni kan weliy murung’agen fapi profet kakrom, me yoloy James ni reb i gachalpen ni gaar: “Kam rung’aged murung’agen e gum’an’ ni ta’ Job, ma gimed manang e tin ni pi’ Somol ngak Job ko tomur. Yi Somol e ri ma runguy ma ma taganan’ ngak e girdi’.” (James 5:11) Thin nu Greek ni kan piliyeg u roy ni “k’adan’” e ba chuchugur fan ko fare thin ni i fanay James ni “gum’an’.” Reb e scholar e weliy rogon e thil u thilin e fa gali bugithin ni: “Gum’an’ e fan ko ngiyal’ ni kan gafgownagdad, ma k’adan’ e fan ko kireban’ nge magawon ni ma yib ngodad.”

¹⁸ Ke yib ngak Job e gafgow nib gel. Ke m’ay urngin e chugum rok, ke yim’ urngin e bitir rok, ma ke yib e m’ar ngak nib gel e amith riy. Ke gafgow ko thin ni ke yog e girdi’ ngak ni Jehovah e ke gechignag. De th’ab Job gulungan ni ke gafgow; ya ke weliy salpen u fithik’ e kireban’ rok ni ir e ba fel’ e rok ku Got. (Job 35:2) Yugu aram rogon, ma de war e michan’ rok, maku de pag e yul’yul’ rok. De gernag Got ni bod ni yog Satan ngak. (Job 1:11, 21) Mang angin? “Ka baga’ nga rogon ni fal’eg waathan ko tin ni baaram e duw ni immoy nga tabolngin e par rok ko biney e tamilang.” (Job 42:12) Ngemu’ me fal’eg Jehovah rogon downgin Job, me flaabnag ni l’agruw yay e ke mun ngay, me par nib felfelan’ u fithik’ e piin ba t’uf rok. Yul’yul’ u fithik’ e k’adan’ ni tay mi ri nang Job Jehovah nib fel’ rogon.

19. Mang e gad ra fil ko gum’an’ nge k’adan’ ni i tay Job?

¹⁹ Mang e kada filed ko gum’an’ nge k’adan’ ni i tay Job? Ku rayog ni nge yib ngodad e gafgow ko m’ar nge boch ban’en nib mo’maw’, ni bod Job. Rayog ni dabi tamilangan’dad ko mang fan ni ke pag Jehovah ni nge yib e skeng ngodad. Yugu aram rogon, ma ba mudugil u wan’dad ban’en: Faan gad ra par nib yul’yul’, ma yira taw’athnagdad. Dariy e maruwar riy ni ra taw’athnag Jehovah e piin ni yad be gayiy. (Hebrews 11:6) I gaar Jesus: “Machane en nra athamgil nge mada’ ko tomur e ra yog e yafas ngak.”​—Matthew 10:22; 24:13.

“Bay Yib e Rran Rok Jehovah”

20. Mang fan nrayog ni nge mudugil lanin’dad ni bay yib e rran rok Jehovah?

²⁰ Jehovah e ba gum’an’, ma ku ba yal’uw ma dabi pag e kireb nge par ni manemus. Bay e gini mus e gum’an’ rok riy. I yoloy Peter ni gaar: “[Got] e de pag e piin ni kakrom nde gechignagrad.” Ke ayuweg Noah nge chon e tabinaw rok ndar m’ad, me pag e ran nge tharey e fayleng nib kireb. Ma ki gechignag Jehovah e binaw nu Sodom ngu Gomorrah, nge tayrad ni awat. Pi gechig ney e ke “dag ngak e piin nib kireb e n’en nra rin’ ngorad.” Re n’ey, e rriyul’ ni: “Chirofen ni rran rok Somol e bayi taw.”​—2 Peter 2:5, 6; 3:10.

21. Susun uw rogon ni ngad daged e gum’an’ nge k’adan’ rodad, ma mang e gad ra weliy ko bin migid e article?

²¹ Ba t’uf ni ngad folwokgad ko gum’an’ rok Jehovah ngad ayuweged e girdi’ ngar kalgadngan’rad ma rayog ni ngar thapgad. Maku ba t’uf ni ngada folwokgad ko gum’an’ rok fapi profet ngada wereged fare thin nib fel’ ndariy fan ni der motoyil e girdi’ ko machib. Ku reb, e faanra ngada boded Job ko k’adan’ ni tay u fithik’ e pi skeng, ma rayog ni nge mich u wan’dad ni ra taw’athnagdad Jehovah ni faan gad ra par nib yul’yul’. Bay fan ni ngad felfelan’gad ko machib ni gad ma tay ya gad manang nra pi’ Jehovah boor e taw’ath ko girdi’ rok ni be athamgil ni be wereg fare thin nib fel’ u gubin yang u fayleng. Gad ra guy e re n’ey ko bin migid e thin ara article.

Ka Ga Manang?

• Mang fan ni i dag Jehovah e gum’an’?

• Mang e gad ra fil ko gum’an’ ni i tay fapi profet?

• Uw rogon ni i dag Job e k’adan’ rok, ma mang angin ni ke yib?

• Uw rogon ni kada nanged ni gum’an’ rok Jehovah e bay e gini mus riy?

[Study Questions]

[Picture on page 5]

Gum’an’ ni i tay Jesus e bod rogon e en Chitamangin

[Pictures on page 6]

Uw rogon ni ke taw’athnag Jehovah Jeremiah nbochan e ba gum’an’?

[Pictures on page 7]

Uw rogon ni ke taw’athnag Jehovah Job nbochan e k’adan’ ni i tay?