Ba Motochiyel Ko T’ufeg U Lan Ngorongorey

“Bay gu tay e motochiyel rog nga lanin’rad mu gu yoloy nga lan ngorongorrad.”​—JEREMIAH 31:33.

1, 2. (a) Mang e gad ra weliy e chiney? (b) Uw rogon ni dag Jehovah ir u daken e Burey ni Sinai?

 FA GAL nib m’on e article, e kad filed riy murung’agen Moses u nap’an ni yib u daken e Burey ni Sinai nga but’, ma be galgal ramaen owchen ni bochan e be m’ug raen Jehovah riy. Ku kada weliyed murung’agen fa gi upong u owchen Moses. Ngada weliyed e chiney boch ban’en ni ba l’ag rogon ko pi Kristiano e ngiyal’ ney.

² Ngiyal’ ni immoy Moses u daken fare burey, mi i fonownag Jehovah. Nap’an ni muulung piyu Israel ko Burey ni Sinai, ma ra guyed felngin Got. “Mi i chub e dirra’ ma be mat e uluch u daken e re burey nem, ma ke m’ag e manileng nib dib’ag e re burey nem, ma be yan laman ba yabul ni gagey ko saf ni yibe thoy ni baga’ laman. Ma urngin e girdi’ ni yad bay ko fapi tent ni kan n’uf nga lang ko gin ni yad be par riy e ur t’ongad ko marus. . . . Me par e burey ni Sinai ni polo’ ni ke ing e ath, ya ke yib Somol u lang nga daken u fithik’ e nifiy. Me yan e ath riy nga lang ni bod e ath u ba tafen e nifiy, me t’on e girdi’ ni urngin ko marus nib gel.”​—Exodus 19:16-18.

3. Ri mang fan ni ke pi’ Jehovah fa Ragag i Motochiyel ngak piyu Israel, ma mang e kar nanged fan riy?

³ Ke non Jehovah ngak e girdi’ u daken reb e engel, ke pi’ ngorad fa Ragag i Motochiyel. (Exodus 20:1-17) Ere, dariy e maruwar riy ni pi motochiyel nem e yib rok e an Gubin ma rayog rok. Ke yoloy Jehovah fapi motochiyel nga daken e malang ni kan th’ab​—fa gal yang i malang ni bilig Moses u nap’an ni guy piyu Israel ni yad be liyor ko fare liyos ni bod yaan ba pi fak e garbaw ni kan ngongliy ko gol. Miki yoloy Jehovah biyay fapi motochiyel nga daken e malang. Ye ney, ni yib Moses ni be fek fa gali yang i malang e be mat ramaen owchen. Ma aram e, yad urngin ni kar nanged fan ni fapi motochiyel e rib baga’ fan.​—Exodus 32:15-19; 34:1, 4, 29, 30.

4. Mang fan ni fa Ragag i Motochiyel e rib baga’ fan?

⁴ Fa gali yang i malang ni kan yoloy fa Ragag i Motochiyel nga daken e kan chaariy nga lan fare kiwaren e m’ag ni bay ko gin Th’abi Thothup u lan e tabernacle me munmun min ta’ nga tempel. Fapi motochiyel ni bay ko fa gali yang i malang e aram kenggin e Motochiyel ko M’ag rok Moses ma be dag rogon nra gagiyegnag Got fare nam nu Israel. Pi Motochiyel nem e be micheg ni Jehovah e ma ayuweg e girdi’ rok, ni ke mel’egrad.

5. Uw rogon fare motochiyel rok Got ni be dag e t’ufeg rok ngak piyu Israel?

⁵ Fapi motochiyel e baga’ ni be dag murung’agen e t’ufeg rok Jehovah, ngak e girdi’ rok. Rib taw’ath fapi motochiyel ngak e piin ni yad ra fol riy! Reb e tayol e ke yoloy ni gaar: “Dabiyog ko girdi’ ni nge ngongliy e motochiyel ni taareb rogon ko fa Ragag i Motochiyel ni ngongliy Got kakrom.” Baaray rogon ni yog Jehovah murung’agen fare Motochiyel rok Moses ni polo’, “Faan gimed ra fol rog ngam ayuweged e m’ag rog, ma gimed ra par ni kam manged e girdi’ rog. Fayleng ni polo’ e ban’en rog, machane bay mpired ni gimed e girdi’ ni kug mel’egmed ni ngam manged girdieg. Bay mpired ni gimed girdien ba nam ni gimed be pigpig ngog ni kam manged pi prist, ma ke mus ni gag e ke mil suwmed ngog.”​—Exodus 19:5, 6. 

Ba Motochiyel ni Kan Yoloy nga Lanin’uy

6. Mang motochiyel e be micheg ni baga’ fan ko fapi motochiyel ni kan yoloy nga daken e malang?

⁶ Arrogon, pi motochiyel rok Got nem e ri baga’ fan. Ka ga manang ni pi Kristiano ni kan  dugliyrad e be gagiyegnagrad ban’en ni baga’ fan boch ko fare motochiyel ni kan yoloy nga daken e malang? Ke yog Jehovah ni ra fal’eg reb e m’ag nib biech nib thil ko fa binem e m’ag ni fal’eg ko fare nam nu Israel. “Bay gu tay e motochiyel rog nga lanin’rad mu gu yoloy nga lan ngorongorrad.” (Jeremiah 31:31-34) Jesus, e ir fare tamaaf ko fare m’ag nib biech, de yoloy nge pi’ ngak pi gachalpen. Ke ta’ nga lanin’rad nge ngorongorrad e pi motochiyel rok Jehovah u daken e thin nge ngongol rok.

7. Chon mini’ e som’on ni kan pi’ “fare motochiyel rok Kristus” ngorad, ma chon mini’ e ra munmun mi yad un ngay?

⁷ Re motochiyel ney e ka nog ni “motochiyel rok Kristus.” Gathi fa bin som’on e motochiyel ni kan pi’ ngak fare nam nu Israel ni owchen Jakob, ya kan pi’ ngak fare Israel rok Got ara “be’ u Israel u fithik’ i laniyan’.” (Galatia 6:2, 16; Roma 2:28, 29) Fare Israel rok Got e aram e piin ni Kristiano ni kan dugliyrad. Ra munmun, ma ra un fare “ulung ni baga’” ngorad ni ra bad u gubin e nam ni yad be gay Jehovah ni ngar uned ko pigpig ngak. (Revelation 7:9, 10; Zekariah 8:23) Yad ra “taab ran’ i saf” ni “taa be’ e be gafaliyrad,” ni yad gubin ma yad be fol ko fare “motochiyel rok Kristus,” ni ir e be gagiyegnagrad.​—John 10:16.

8. Mang e ba thil u thilin fare Motochiyel rok Moses nge motochiyel rok Kristus?

⁸ De bod piyu Israel, ni kan m’ag fare Motochiyel rok Moses ngorad u nap’an ni kan gargelegrad, ya Kristiano e be par u tan e motochiyel rok Kristus nbochan e ke m’agan’rad ngay, gathi bochan raen dowrad nge gin kan gargeleg be’ riy. Kar filed murung’agen Jehovah nge kanawo’ rok ma ka ra adaged ni ngar rin’ed e tin ba m’agan’ ngay. Bay e motochiyel rok Got u “fithik’rad” ni gowa kan “yoloy nga lanin’rad,” pi Kristiano ni kan dugliyrad e da ra folgad ku Got nbochan e rayog ni gechignag e piin ni dabi fol; ara yad be fol ni bochan e ba t’uf. Rogon ni ni yad ma fol e bay likngin ko pi n’en ni baga’ fan ma ba gel gelngin, ma yugu boch e saf e taareb rogorad ni yad ma fol rok Got ya bay e motochiyel rok u laniyan’rad.

Pi Motochiyel ni Bay Rogon ko T’ufeg

9. Uw rogon ni dag Jesus ni t’ufeg e ir e lem ko pi motochiyel rok Jehovah?

⁹ Urngin e pi motochiyel rok Jehovah e rayog ni nga nog ni: t’ufeg. Aram bang ko liyor ni machalbog ni baga’ fan ni ngaun rin’ ni gubin ngiyal’. Nap’an ni kan fith Jesus, ko bin ngan e motochiyel e rib ga’ fan, me fulweg ni gaar: “Thingari t’uf rom Somol ni ir e Got rom u polo’ i gum’irchaem, ngu polo’ i lanin’um, ngu polo’ i lem rom.” Ma bin migid ngay e: “Thingari t’uf rom e en ni ir e mmigid ngom ni gowe gur.” Miki gaar: “Urngin e Motochiyel rok Moses nge tin i fil e pi profet ko girdi’ e be tor ko gali motochiyel ney.” (Matthew 22:35-40) Ere arfan ni yog Jesus ni gathi kemus ni fa Ragag i Motochiyel, ya urngin ni ba’ ko som’on ko Bible ni ka nog e Hebrew Scriptures ngay e ba’ u daken e t’ufeg.

10. Uw rogon ni gad ma nang ni fare t’ufeg e ir e def ko fare motochiyel rok Kristus?

 ¹⁰ Ngan t’ufeg Got nge piin buguli yoror e aram fare def ko motochiyel ni bay u laniyan’ e pi Kristiano, fa? Arrogon! Fare motochiyel rok Kristus e muun ngay e t’ufeg rok Got ko fa bin ni biech e motochiyel​—ni piin ni Kristiano e yad ma pag farad ni fan ngak bochi yad. T’ufeg rorad e bod e t’ufeg rok Jesus, ni pi’ e pogofan rok ni fan ngak e pi tafager rok. Ke fil ngak pi gachalpen ni ngari t’uf Got rorad nge yugu boch e girdi’ ni bod rogon ni yad ba t’uf rok. Fare t’ufeg nib gagiyel ni yad ma dag ngorad e aram e bin th’abi ga’ fan e felngin ni ma dag ngan nang e tin riyul’ e Kristiano. (John 13:34, 35; 15:12, 13) Ki fonownagrad Jesus ni nguura t’ufeged e pi toogor rorad.​—Matthew 5:44.

11. Uw rogon ni ke dag Jesus rogon e t’ufeg ni fan ngak Got nge girdi’?

¹¹ Ke dag Jesus rogon ni ngan dag e t’ufeg ni rib fel’ rogon. I par u tharmiy ni reb e kan nib gel, me m’agan’ ngay ni nge yib nga fayleng nge rin’ e tin baadag e Chitamangin. I pi’ e yafas rok ni maligach ni fan ni nge yog e yafas ni manemus ngak e girdi’, maku ke dag ko uw rogon ni nguur pared. Rib sobut’an’, ma ba gol, maku ma lemnag e girdi’ ma ma ayuweg e piin ni ke magafan’rad nge piin ni yibe gafgownagrad. Maku ma weliy murung’agen “e yafas ni manemus,” ma der ma ngochan’ i ayuweg e girdi’ ni ngar nanged Jehovah.​—John 6:68.

12. Mang fan nrayog ni nga nog ni t’ufeg ku Got nge en ni buguli yoror e ba peth nga taabang?

¹² T’ufeg ngak Got nge en ni buguli yoror, e riyul’ nib peth nga taabang. I weliy John ni apostal ni gaar: “T’ufeg e yib rok Got . . . Faanra gaar be’: ‘Ba t’uf Got rog,’ machane be fanenikay walagen ni girdien Kristus, ma be lifith l’ugun. Ya dabiyog ni nge t’uf Got rok, ni be’ nder guy ni faanra de t’uf rok walagen ni girdien Kristus ni be’ ni be guy.” (1 John 4:7, 20) Jehovah e ir e ma yib e t’ufeg rok ma ir e ri ma dag e t’ufeg. Urngin ban’en ni ma rin’ e bay rogon ko t’ufeg. Bay e t’ufeg rodad nbochan e kan sunmiydad u yaan Got. (Genesis 1:27) Gad ra dag e t’ufeg ngak e en ni buguli yoror rodad, ma aram e gad be dag e t’ufeg rodad ngak Got.

Ngan T’ufeg e Fan e Ngan Fol

13. Faanra nge t’uf Got rodad, ma mang e som’on ni ngada rin’ed?

¹³ Uw rogon ni gad ra t’ufeg Got, ni dabiyog ni ngad guyed? Bin som’on e ngada nanged. Dabiyog ni nge t’uf ara pagan’dad ngak be’ ni dada nanged. Thin rok Got, e be pi’ athamgil ngodad ni ngada nanged u daken e bieg Bible, mu uda meybilgad, nge ngan chag ko piin kar nanged Got ma ba t’uf rorad. (Psalm 1:1, 2; Filippi 4:6; Hebrews 10:25) Fa aningeg i Gospel e ri baga’ fan, ya be dag rarogon Jehovah ni be m’ug ko yafas rok Jesus Kristus nge rogon ni ma machib. Rogon ni gad baadag ni ngad folgad rok Got nge ngad folwokgad u rarogon e ra gel u nap’an ni gad ra nang murung’agen ma gad ra felfelan’ ko t’ufeg rok ni ke dag ngodad. Arrogon, t’ufeg rok Got e ba muun ngay ni ngan fol.

14. Mang fan ni rayog ni nga nog ni de tomal e motochiyel rok Got?

¹⁴ Nap’an ni ra t’uf e girdi’ rodad, ma gad ra nang ko mang e yad baadag, ma mang e dubrad, ma rayog ni ngada ngongolgad nib puluw. Dubdad ni ngada kireban’niged e piin yad ba t’uf rodad. Ke yoloy apostal John ni gaar, “Ya baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.” (1 John 5:3) De tomal, maku de yoor. T’ufeg e ma pow’iydad. De t’uf ni nge mit ngodad boor e motochiyel ni nge pow’iydad; ya t’ufeg rok Got e be pow’iydad. Faanra ba t’uf Got rodad, ma gad ra felfelan’ ni ngada rin’ed e tin ba m’agan’ ngay. Ere gad ra fel’ u wan’ Got, ma ra fel’ rogodad, ma thin rok ni be pow’iydad e ra fel’ rogodad riy ni gubin ngiyal’.​—Isaiah 48:17.

15. Mang e ra k’aringdad ni ngad folwokgad rok Jehovah? Mu weliy.

¹⁵ T’ufeg rok Got e ra k’aringdad ni ngada folwokgad ko pi n’en ni felngin. Nap’an ni ra t’uf be’ rodad, ma gad ra adag felngin ma gad ra gay rogon ni ngad boded. Ngan lemnag fare tha’ u thilin Jehovah nge Jesus. Ur parew u tharmiy ni sana bokum bilyon e duw. Rib toar, ma rib machalbog fare t’ufeg u thilrow.  Ere Jesus e ri taareb rogon ko Chitamangin nu tharmiy aram fan nrayog ni yog ngak pi gachalpen ni gaar: “Cha’ ni ke guyeg e ke guy e en ni Chitamangiy.” (John 14:9) Nap’an ni ra yog e tamilangan’ ngodad nge tay fan ngak Jehovah nge fak, ma ra k’aringdad ni ngad boded yow. T’ufeg rodad ngak Jehovah, nge ayuw ko kan ni thothup rok, e ra “chuweg e tin ni kan mecham ngay, ma bin nib biech i [gimed] e ka mon’ed nga dakenmed.”​—Kolose 3:9, 10; Galatia 5:22, 23.

T’ufeg nib Muun Ngay e Maruwel

16. Uw rogon ni yima dag fare t’ufeg ngak Got nge piin buguli yoror rodad ko machib rodad u mit e tabinaw nge rogon ni yibe fil ban’en ko girdi’?

¹⁶ Gad e Kristiano, gad ma pag e t’ufeg rodad ngak Got nge piin buguli yoror rodad nge k’aringdad ngada uned ko maruwel ni ngan machibnag fare Gil’ilungun nge ngan pingeg e girdi’ ngar manged pi gachalpen. Ran rin’ ni aray rogon, ma gad be felfelan’nag Jehovah Got, “ni ir e ba adag urngin e girdi’ ni ngar thapgad ngak ma ngar nanged e tin nib riyul’.” (1 Timothy 2:3, 4) Ku rayog ni da pirieged e felfelan’ ni ngan ayuweg yugu boch e girdi’ ni ngan yoloy fare motochiyel rok Kristus nga laniyan’rad. Gad ra felfelan’ ngay ni ngad guyed ni kar folgad kar thilyeged pangirad ke m’ug felngin Jehovah rorad. (2 Korinth 3:18) Riyul’, ni yira ayuweg boch e girdi’ ngar nanged Got ma aram e bin th’abi fel’ e taw’ath ni kada pied ngorad. Piin ra adag ni nge mang fager rok Jehovah e rayog ngak e felfelan’ ndariy n’umngin nap’an.

17. Mang fan ni bay e gonop riy ni ngan maruweliy nge t’uf Got nge piin buguli yoror ko bin nge t’uf e chugum?

¹⁷ Gad be par u reb e fayleng ni chugum e kari ga’ fan, ma kari t’uf. Machane, chugum  e dabi par ni manemus. Rayog ni ngan iring ara kirebnag e ngal nge t’ay. (Matthew 6:19) Be ginangdad e Bible ni: “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.” (1 John 2:16, 17) Arrogon, Jehovah e bayi par ni manemus, maku arrogon e piin ni yad ma t’ufeg ma yad be pigpig ngak. Ere, gathi ffel’ ni ngan maruweliy e t’ufeg ngak Got nge girdi’ ko bin ngan lek e tin nu fayleng, ni ke mus ni dabi n’uw nap’an nra par?

18. Uw rogon ni dag reb e missionary e t’ufeg ni ke pag fan ir?

¹⁸ Piin ni ma maruweliy e t’ufeg e ma pining e sorok ngak Jehovah. Ngan lemnag Sonia, ba missionary u Senegal. Ke fil e Bible ngak reb e ppin ni Heidi fithingan, ni ke af e HIV ngak ko pumoon rok nde michan’. Tomuren ni ke yim’ figirngin Heidi, me un ko taufe, ma de n’uw nap’an, me m’ar mi nin’ nga aspital ni ke af e AIDS ngak. Ke weliy Sonia ni gaar: “Girdien e maruwel u aspital e ri yad buchuuw ma kar rin’ed urngin nrayog rorad. Kan ning e ayuw ko ulung ni ngan ayuweg ko tin ni ba t’uf rok u aspital. Bin l’agruw e nep’, e kug par nga daken e chob u tooben e bed rok gu be ayuweg nge mada’ ko ngiyal’ ni ke yim’. Fare togta ni ir e be maruwel e ke gaar: ‘Magawon romad nib ga’ e faanra ba’ e AIDS rok be’ ma mus ko chon e tabinaw rok e yad ma digey. Mang fan ni gathi girdi’ rom ma de taareb e nam romew nge raen dowmew ma ke m’agan’um ngay ni ngam tem nga thatharen e riya’?’ Ku gog ngak, ni Heidi e ir e rriyul’ ni walageg, ni gamow ba chuchugur ni bod rogon ni taa be’ e chitiningmow nge chitamangimow. Nap’an ni kugu nang e cha’ ney ni walageg, ma kugu felfelan’ ni nggu ayuweg.” Yugu aram rogon, ma de af e m’ar ngak Sonia ni i athamgil nga i ayuweg Heidi.

19. Ra bay e motochiyel rok Got u laniyan’dad, ma mang e dabi siy ni ngada rin’ed?

¹⁹ Ba yoor rogon e t’ufeg ni kan pag fay ni yira pirieg u fithik’ e pi tapigpig rok Jehovah. Dariy e motochiyel ni kan yoloy ni yira nang e girdi’ rok Got riy e ngiyal’ ney. Ni bod ni, kada guyed ni ke lebug e thin ni bay ko Hebrews 8:10 ni gaar: “‘Baaray e re m’ag ni bay gu ngongliy u thilig nge girdi’ nu Israel u tomren e pi rran nem: Bay gu tay e pi motochiyel rog nga fithik’ i lanin’rad, ma bay gu yoloy nga gum’ircharad. Bay gu mang Got rorad, ma bay ra manged e girdi’ rog.’” Gubin ngiyal’ ni ngad chaariyed fare motochiyel ko t’ufeg ni ke yoloy Jehovah nga laniyan’dad, ma ngad daged u gubin ngiyal’ ni ke mab e kanawo’ ngodad.

20. Mang fan ni motochiyel rok Kristus e ban’en nrib tolang puluwon?

²⁰ Riyul’ nib ga’ e felfelan’ riy ni ngad pigpiggad ngak Got ni gadad pi walagdad u fayleng ni gad be dag e t’ufeg! Piin ni bay e motochiyel rok Kristus u laniyan’rad e yad be felfelan’ ya bay ban’en rorad nib ga’ ndariy ko re fayleng ney ni dariy e t’ufeg riy. Gathi ke mus ni yad be felfelan’ ko t’ufeg rok Jehovah ya bochan ni bay e m’ag ko t’ufeg nib gel u thilrad pi walagrad. “Am sap! Nga feni fel’ nge feni gel e felfelan’ ko pi walag ni yad be par u taabang ni ba taareb lanin’rad!” Yugu aram rogon ni ma par e Pi Mich Rok Jehovah u boor e nam, ni yad ma non nib thil, ma ba yoor e yalen, ma yad be felfelan’ nbochan e ba taareb lanin’rad. Re taareb laniyan’ ney e ma felan’nag Jehovah. Rogon ni yoloy fare psalmist e gaar: “Ya [u fithik’ e girdi’ ni ke chag nbochan e t’ufeg] aram e gin ni ke tay Jehovah chilen ni ran flaabnag, ko yafas ni manemus.”​—Psalm 133:1-3, NW.

Rayog ni Ngam Fulweg?

• Uw feni ga’ fan fa Ragag i Motochiyel?

• Mang fare motochiyel ni kan yoloy nga lanin’uy?

• Mang e ma rin’ e t’ufeg ni bay ko “motochiyel rok Kristus”?

• Mang e pi kanawo’ ni gad ra dag e t’ufeg rodad riy ku Got nge piin ni buguli yoror?

[Study Questions]

[Picture on page 15]

Piyu Israel e kan yoloy e motochiyel rorad nga daken e malang

[Picture on page 17]

Sonia nge reb e buliyel u Senegal ko duw ni 2004 district convention