Kan Tay Fan e Tiyan’ ko Bible

MARIANA, ni reb e Mich Rok Jehovah u yimuch u Italy, e 18 e duw rok ma bay ko bin tomur e duw rok ko high school. Taab skul e kar uned boch e Pi Mich nib fel’ yangaren ngay.

Ke yoloy Marianna ni gaar, “Ke gaman in e duw e chiney, ni bochi gamad e ma beeg e Examining the Scriptures Daily u nap’an e toffan. Kemus ni gin ni rayog ni nggu rin’ed e re n’ey riy e ba yang ko yungi n’en ni yima yan riy nib chugur ko singgil ko pi sensey. Gathi rib gapas ni dariy lingan ban’en riy. Yooren e sensey e ma guymad u nap’an ni yad ra yan u charmad, boch i yad e ma tal nge guy ko mang e gamad be rin’. Ereray e ngiyal’ ni ke mab e kanawo’ ngomad ni nggu fulweged boch e deer rorad. Gubin e rran ma ba’ reb e sensey ni ma tal romad. Ma boch i yad e ma par nge motoyil nga rogon ni gamad ma weliy e thin nu Bible ni fan ko rorran nem me yog ni ri baadag rogon ni gadad ma tay fan e tirok Got ban’en ni gadad e Pi Mich. Biyay, e fa en migid ko principal e piningmad ni nggu warod nga singgil ko sensey nggu nonad u rom.

“Tomuren ni ke guy rogon ni gamad be weliy fare thin nu Bible ni fan ko rorran nem, me fith e sensey rog ngak fare principal ko rayog ni nggu weliyed u lan reb e singgil ni yibe skul riy, ni ba gapas. Me pi’ fare principal mat’awun, me yog fare sensey rog e sorok ngomad u p’eowchen fapi bitir ni urngin ni bochan e kanawo’ nib fel’ ni kugu daged. Gamad urngin ni ku felfelan’gad ni bochan fare taw’ath ni baga’ ni ke pi’ Jehovah ngomad.”