Ngaud Folgad Rok Jehovah Ni Got Rodad

“Gadad e bay ud meybilgad ngak Somol ni Got rodad ma gadad be fol rok ndariy n’umngin nap’an.”​—MIKAH 4:5.

1. Uw rogon ngongolen e girdi’ u nap’an Noah, ma uw rogon nib thil e ngongol rok Noah?

 BIN SOM’ON e girdi’ ni ka nog u Bible ni ma fol rok Got e Enok. Bin l’agruw e Noah. Be yog ni gaar: “Noah e be’ nib moon nib fel’ ni ke mus ni ir e immoy ni kab fel’ u wan’ Got e ngiyal’ nem; i par ni ba’ Got rok.” (Genesis 6:9) U nap’an Noah, ma oren e girdi’ e ka ra paged e liyor nib riyul’. Fare kireb ko fayleng e gel nbochan e pi engel ni dar yul’yul’gad ni ra mabgolgad fapi ppin nde yalen me yib pi fakrad ni ka nog e Nephilim ngorad, ni yad e piin ni “ur gelgad ko mahl” ara piin nib “gilbuguwrad,” e ngiyal’ nem. Arfan ni sug e fayleng ko cham nge bugel! (Genesis 6:2, 4, 11) Machane, Noah e dariy thibngin me “machibnag e tin nib mat’aw.” (2 Peter 2:5) Nap’an ni ke tay Got chilen ni nge toy fare arke ni nge ayuweg e yafas, me rin’ Noah “urngin e tin ni yog Got ngak ni nge rin’.” (Genesis 6:22) Riyul’, ni ke fol Noah ku Got.

2, 3. Mang e n’en ni ke rin’ Noah nib fel’ ni ngad folgad riy e ngiyal’ ney?

² I uneg Paul Noah nga babyor rok ni murung’agen e pi mich nib yul’yul’ ni gaar: “Michan’ rok Noah ngak Got e ir e ayuweg Noah nge motoyil ko tin ni yog Got ngak ni murung’agen e pi n’en ni bayi taw, ni bogi ban’en ndabiyog ni nge guy Noah e ngiyal’ nem. Me fol ko tin ni ke yog Got ngak ni nge rin’, me toy fare barkow ni arke fithingan, ni re arke nem e ir e faseg Noah nge girdi’ nu tabinaw rok. Ereray kanawoen me gagiyelnag nib kireb e rok e girdi’ nu fayleng, me yog ngak Noah mat’awuy ni ma pi’ Got ngak e girdi’ u daken e michan’ rorad ngak.” (Hebrews 11:7) Rib fel’ ni ngan fol rok! Bochan ni manang Noah ni thin rok Jehovah e ra yib i m’ug nib riyul’, me fanay e tayim rok, nge gelngin, nge tin ni bay rok ni nge yog ni lebguy e thin ni ke yog Got ni nge rin’. Maku, aram rogon ni be rin’ boor e girdi’ e ngiyal’ n’ey ni darur fanayed e tin ni be ognag e re fayleng ney ma kar fanayed e tayim rorad, nge gelngirad, nge tin ni bay rorad ni fan ni ngar folgad ko tin ni ke yog Jehovah ni ngar rin’ed. Michan’ rorad e baga’ fan ma ra pi’ e yafas ngorad nge ngak boch e girdi’.​—Luke 16:9; 1 Timothy 4:16.

³ Dabisiy ni mo’maw’ rok Noah nge tabinaw rok ni ngar maruweliyed e michan’ rorad ni bod Enok, ni chitamangin e tutuw rok Noah, ni kan weliy ko article ara guruy ni ke yan. U nap’an Noah ngu nap’an Enok, e kemus ni buchuuw e tapigpig nib riyul’​—ma kemus ni meruk e girdi’ ni kar pared nib yul’yul’ ma kar mageygad nib fas u nap’an ni kan tharey e fayleng ko Ran. I machibnag Noah e tin nib mat’aw ban’en u lan ba fayleng ni ke sug ko cham nge ngongol ni darngal. Maku, Noah nge tabinaw rok e kar toyed e barkow ni palang ni baga’ ni fan ko ran ni nge tharey e fayleng ni ga’ngin, nyugu aram rogon ni dariy be’ ni ka i guy e ran ni aram rogon ko som’on. Dabisiy ni kari gin e girdi’ ni yad be yaliyrad e ngiyal’ nem.

4. Mang kireb ni ke rin’ e girdi’ u nap’an Noah ni ke tamilangnag Jesus?

⁴ Nap’an ni weliy Jesus murung’agen e tayim rok Noah, ma de weliy murung’agen e cham ara bugel, nge teliw ni googsur, ara ngongol ni darngal​—ni yugu aram rogon ni rib gel e kireb riy. Fare oloboch ni ke tamilangnag Jesus e bay rogon ko tin ni rin’ e girdi’ ni ra dariyfannaged e thin ni ka nog ngorad. Ke yog ni gaar, “un abich ma yibe garbod, ma be mabgol e pumoon nge ppin nge yan i mada’ ko rofen ni baaram ni yan Noah riy nga lan fare arke.” Ngan abich, ngan garbod, ngan mabgol​—mang e n’en nib kireb  riy? Kemus ni yad be rin’ e “tin ma rin’” e girdi’! Machane ngiyal’ nem e be yib e ran ni nge tharey e fayleng, ma be machibnag Noah e tin nib mat’aw ban’en. Thin ni yog nge ngongol rok e susun ni nge ginangrad. Machane, “da ur nanged e n’en ni bay yib ngorad nge yan i mada’ ko ngiyal’ ni baaram ni yib e ran nge tharey e binaw nge fekrad ni yad gubin.”​—Matthew 24:38, 39.

5. Mang e pi felngin nib t’uf rok Noah nge tabinaw rok?

⁵ Gad ra lemnag e ngiyal’ nem, ma gad ra guy e gonop ko n’en ni rin’ Noah. Machane, u m’on ni yib e Ran ni nge tharey e fayleng, mab ba t’uf e lem nib mudugil ni nge yog ni ngan par ni yib thil ko girdi’. Ba t’uf e michan’ nib gel rok Noah nge tabinaw rok ni fan ni ngan toy fare arke ara barkow nib ga’ min ta’ urngin mit e gamanman ngay. Gur, pi girdi’ nem ni ur yul’yul’gad ma bay boch i yad ni kar adaged yu ngiyal’ ni nge dabi tiyan’ e girdi’ ngorad ma ra “rin’ed e n’en ni ma rin’ e girdi’”? Yugu demtrug ko keb ngan’rad e lem ni aram rogon, ma dar paged ni nge war e yul’yul’ rorad. Tomren boor e duw​—ni kab n’uw nap’an ko yafas rodad ko re fayleng ney—​ma michan’ rok Noah e ke ayuweg ni nge magey nib fas u nap’an ni yib e Ran ni nge tharey e fayleng. Machane, i pufthinnag Jehovah urngin e girdi’ ni “ur rin’ed e tin ma rin’ e girdi’” ma dar lemnaged fan e n’en ni be buch u nap’rad.

Cham ara Bugel e Ku Ke Gafgownag e Girdi’ Biyay

6. Tomren ni tharey e fayleng ko ran, ma uw rarogon e fayleng?

⁶ Tomren ni ke chuw fare Ran, me tabab e yafas ko girdi’ nib biech. Machane, ku dawori flont e girdi’, ma “ka nap’an ni kabran e girdi’” ma “ba kireb e lem rok.” (Genesis 8:21) Maku, yugu aram rogon ni fapi moonyan’ e dabkiyog ni ngar fanayed e dowef rok e girdi’, ma kab gel gelngirad. Fayleng ni ke sug ko tin kireb e ri be dag ni girdi’ nu fayleng e ke “suweyrad Faanem nib Kireb,” ma wod rogon e ngiyal’ n’ey, girdi’ ni ma liyor ku Got nib riyul’ e thingara chamgad nga “gelngin e kan nib kireb.”​—1 John 5:19; Efesus 6:11, 12.

7. Uw rogon ni ke yoor i yoor e cham nge bugel u fayleng u tomren ni ke tharey e Ran?

⁷ Nap’an Nimrod u tomren fare Ran ni tharey e fayleng ma ki sug biyay e fayleng ko girdi’ ni bugel mab ta cham. Bochan ni ke yoor i yoor e girdi’ ma ke mon’og e maruwel rok girdien e science, ma re cham nem nge bugel e ke yoor ni be un ko rran. Kakrom, ma immoy e sayden, nge sarey, nge gat’ing nge ggan e gat’ing, nge karrow ni ma giringiy e os. Dawori n’uw nap’an me yib ba mit e boyoch ni ka nog e musket nge canon ngay, ngemu’ ma nap’an ni kefin ni tabab e bin 20 e chibog ma kan ngongliy fare rifle nge fare artillery. Mahl ni Bin 1 e ke yibnag e talin e cham ni ri ma k’aring e marus ko girdi’, ni bod e skuki, nge tangku, nge barkow nu ar, nge yub ara poison gas. Ma nap’an e re mahl nem, ma bokum milyon e girdi’ ni kar m’ad nbochan e pi talin e cham nem. Gur, dan lemnag ni ra buch ni aram rogon? Danga’.

8. Uw rogon ni ke lebug e thin ko Revelation 6:1-4?

⁸ U nap’an e duw ni 1914, min tay Jesus nga tagil’ nge mang Pilung ko Gil’ilungun Got u tharmiy, me tabab fare “rran rok Somol.” (Revelation 1:10) Fare n’en ni kan piliyeg e changar kan guy kan weliy u babyor ni Revelation, ni kan guy Jesus ni Pilung ni bay u daken e os nib wech wech ni be gel ko mahl i yan. Boch e girdi’ ni yad bay u daken e os e yad be lek, ni ra bagayad ma be dag yaan reb e gafgow nib thil ni ra yib ngak e girdi’. Bagayad e bay u daken e os nib rowrow,  min pi’ gelngin ni “nge fek e mahl nga daken e fayleng, ni aram e ngi i cham e girdi’ nguur li’ed yad nguur m’ad; ma kan pi’ ba sayden ngak ni baga’.” (Revelation 6:1-4) Re os ney nge faen ni bay u daken e be yip’ fan e mahl, ma fare sayden ni baga’ e be yip’ fan e magothgoth ni baga’ ni dawori buch ba ngiyal’ ni bochan e talin e cham ni rib gel gelngin e ngiyal’ ney. Ma pi talin e cham ney e ngiyal’ ney e ba muun ngay e n’en ni ka nog e nuclear device ngay, ni reb riy e rayog ni nge li’ bokum biyu’ e girdi’; nge rocket ara masin ni ma changeg ni be fek e talin e cham nga bang ni kan lemnag nib palog ni bokum biyu e mile nga orel; nge fare falay ni yub nge biological weapons ara bayking nib gel ni ma li’ e girdi’ ni boor.

Ngad Tedan’dad ko Thin Rok Jehovah ni Be Ginangdad

9. Uw rogon e fayleng e chiney nra ngan taarebnag ko fayleng ni immoy u m’on ni tharey e Ran?

⁹ U nap’an Noah, me thang Jehovah e pogofan ko girdi’ ni bochan ni kayigi gel e cham nge bugel ni ma rin’ e girdi’ nib kireb ni fapi Nephilim e kar suruyed lanin’rad. Ma uw rogon e ngiyal’ ney? Gur, buchuuw e cham nge bugel e chiney ni ra ngan taarebnag ko kakrom? Ri danga’! Maku, girdi’ e ngiyal’ ney e kemus ni yad ma rin’ e maruwel rorad, ni yad be guy rogon ni ngar “rin’ed e tin ni ma rin’ e girdi’”, ma darur motoyilgad ko thin ni yibe wereg ni be ginangrad. (Luke 17:26, 27) Ere, bay fan ni nge maruwaran’uy ni ra thang Jehovah e pogofan ko girdi’ biyay fa? Danga’.

10. (a) Mang thin ni be ginangey ni yibe yog biyay nge biyay ko yiiy u Bible? (b) Kemus ni mang e taare kanawo’ nib gonop ni bay e ngiyal’ ney?

¹⁰ Bokum miriay e duw u m’on ni keb e Ran ke tharey e fayleng, me yiiynag Enok murung’agen e magothgoth ni thingari yib e ngiyal’ ney. (Jude 14, 15) Maku i yog Jesus ni ra yib fare “gafgow ni ba ga’.” (Matthew 24:21) Boch e profet e ka rogned murung’agen e re rran nem. (Ezekiel 38:18-23; Daniel 12:1; Joel 2:31, 32) Mu lan fare babyor ni Revelation, e rayog ni ngad beeged riy e thin nib tamilang ni murung’agen e re magothgoth nem. (Revelation 19:11-21) Gadad ni be’ nge be’, e ngada folwokgad rok Noah ma gadad e tamachib nib pasig ko tin nib mat’aw. Gad ra tiyan’dad ko thin rok Jehovah ni be ginangey ma gad ayuweg u fithik’ e t’ufeg e piin buguli yoror rodad ni nga ku u ra yodoromgad. Ere, bod rogon Noah gad be fol ko thin rok Got. Tin riyul’ riy, e urngin e piin ni baadag e yafas e baga’ fan ni nge fol rok Got u gubin ngiyal’. Uw rogon ni ngad rin’ed e n’en ni aram rogon ni ma yib e magawon ngodad u gubin e rran? Ba t’uf ni ngari mich u wan’dad nra lebug e tin nib m’agan’ Got ngay.​—Hebrews 11:6.

Nguum Fol Rok Got ko Ngiyal’ ni Ke Gel e Wagey

11. Uw rogon ni ngauda folwokgad rok e piin ni Kristiano ko fa bin som’on e chibog?

¹¹ U nap’an e bin som’on e chibog, ma piin Kristiano ni kan dugliyrad e ka nog ni yad bang ko “Fare Kanawo’.” (Acts 9:2) Yafas rorad ni polo’ e ka ri dag ni ke mich Jehovah nge Jesus Kristus  u wan’rad. Ur folgad u kanawoen e Masta rorad. Ngiyal’ ney, e ku be rin’ e piin Kristiano nib yul’yul’ ni aram rogon.

12. Mang e ke buch u tomren ni ke duruiy Jesus e girdi’ ni yoor u daken e maang’ang?

¹² Tin ni buch u nap’an e machib ni tay Jesus e ke tamilangnag feni ga’ fan e michan’. Ba’ biyay, ni duruiy Jesus sogonapan 5,000 e girdi’ u daken e maang’ang. Me ngat e girdi’ ngay ma ra felfelan’gad. Yugu aram rogon ma ngam guy ko mang e n’en ni buch ni migid. Gad ra beeg ni gaar: “Ma girdi’ ni yad bay u rom e ra guyed e re maang’ang nem ni ke ngongliy Jesus, me lungurad, ‘Riyul’ ni ereray fare profet ni faani ir e nge yib ngaray nga fayleng!’ Me nang Jesus ni yad be n’en ni ngar bad ngak ngar feked ngar tiyed ni ir e nge mang pilung rorad, ndemtrug ko ba adag fa dubun; ma aram me pagrad nge yan nga daken e burey ni goo ir.” (John 6:10-15) Re nep’ nem me yan Jesus nga bang. Bochan ni de adag Jesus ni nge mang pilung ko girdi’ e ngiyal’ nem me yoor e girdi’ ni mulan’. I dag ngak e girdi’ ni ir be’ nib gonop ma bay rogon ni nge mang pilung ma bay gelngin ni nge gamaneg e tin nib t’uf ko dowef rok e girdi’. Machane, dawori taw nga nap’an rok Jehovah ni nge gagiyeg ni ba Pilung. Ma ku reb, e Gil’ilungun Jesus e bay u tharmiy, gathi u roy u fayleng.

13, 14. Mang lem e i dag boor e girdi’, ma uw rogon ni kan skengnag e michan’ rorad?

¹³ Yugu aram rogon, me dugliy e girdi’ ni ngar leked Jesus ma ra pirieged, ni rogon ni yog John, e “u ba’ nem fare lipath.” Mang fan ni kar leked u tomren ni ke siyeg ni nge mang pilung ni ireray e n’en ni kar maruweliyed? Boor i yad e kar daged ni yad ba siin, ma ka rogned e thin nib gel u murung’agen e pi n’en ni pi’ Jehovah u daken e ted u nap’an Moses. Kar susunaged ni ra ul’ul Jesus i pi’ ngorad e tin nib t’uf rorad. Ke nang Jesus e lem rorad ni de puluw, me tabab ni nge fil ngorad e thin riyul’ ni ra ayuwegrad ni ngar yal’uweged e lem rorad. (John 6:17, 24, 25, 30, 31, 35-40) Bochan e n’en ni ke fil ngorad, ma kar gun’gun’gad nib togopuluw ngak, ni baga’ ni nap’an ni ke weliy e re fanathin ney ni gaar: “Nggog e tin riyul’ ngomed: faanra dab mu ked e ufin rok e en ni Fak e Girdi’ mi gimed unum rachaen ma dabi yib e yafas nga fithik’med. En nra kay e ufin u dowag me unum rachaeg e ke yog e yafas ndariy n’umngin nap’an ngak, ma gu ra faseg ko yam’ ko chirofen ni tomur ko rran.”​—John 6:53, 54.

¹⁴ Pi fanathin rok Jesus e baga’ ni ma k’aring e girdi’ ni ngar daged ko riyul’ ni yad baadag ni ngar folgad ku Got fa danga’. Maku aram rogon e re fanathin ney. I damumuw boch e girdi’. Gad ra beeg ni gaar: “Boor pi gachalpen ni rung’ag e re bugithin ney me lungurad, ‘Re machib ney e kayigi mo’maw’. Mini’ e ra motoyil ko tiney e thin?’” Me weliy Jesus ngorad ni thingara nanged fan e thin rok. Me yog ni gaar: “En ni ma pi’ e yafas e aram fare Kan ni Thothup; ma bin kakrom i gimed e dariy ban’en nib fel’ ni yib rok. Fapi thin ni kug weliy ngomed e yib rok fare Kan ni Thothup ma re thin nem e ma pi’ e yafas.” Yugu aram rogon, ma boor e girdi’ ni dar motoyilgad, ma be yog e thin nu Bible ni gaar: “Bochan e re bugithin ney ni yog Jesus, ma aram e boor pi gachalpen nra paged nge dakur uned ngak.”​—John 6:60, 63, 66.

15. Mang lem nib mat’aw e bay rok boch pi gachalpen Jesus?

¹⁵ Yugu aram rogon, ma gathi urngin pi gachalpen Jesus e kar rin’ed e n’en ni aram rogon. Riyul’, ni pi gachalpen Jesus nib yul’yul’ e ku gathi rib tamilang u wan’rad e n’en ni yog Jesus ngorad. Yugu aram rogon, ma ka be par ni rib gel e pagan’ rorad ngak. Peter, ni bagayad e pi gachalpen nib yul’yul’, e ke yog murung’agen e  n’en ni be lemnag urngin e girdi’ ni dar chuwgad ni gaar: “Somol, i mini’ e gamad ra yan ngak? Yi gur e bay fapi thin rom ni ir e ma pi’ e yafas ndariy n’umngin nap’an ngak e girdi’.” (John 6:68) Rib fel’ e lem rok, ma rib fel’ ni ngan fol riy!

16. Uw rogon nra yib e skeng ngodad, ma mang e lem nib puluw ni thingar da maruweliyed?

¹⁶ Gadad e ngiyal’ ney e rayog ni ngeb e skeng ngodad ni bod e n’en ni buch rok pi gachalpen Jesus kakrom. Ma gadad, e sana ra mulan’dad ni tin ni ke micheg Jehovah e de lebug nrogon nib puluw nga ngal’an ni gad baadag ni be’ nge be’. Sana gad be lemnag ni tin ni be weliy e babyor rodad u murung’agen e thin nu Bible e mo’maw’ ni ngan nang fan. Sana ke mulan’dad nbochan e ngongol rok reb e Kristiano. Gur, ba mat’aw ni dab kun fol ku Got nbochan e pi n’en ney? Ri danga’! Pi gachalpen Jesus ni kar digeyed e kar daged e lem nib meewar. Thingar dab da rin’ed ni aram rogon.

“Gathi Gadad e Piin ni Kar Pied Keru’rad Ngak Got”

17. Uw rogon ma rayog ni ngan ayuwegdad ngauda folgad ku Got?

¹⁷ I yoloy Paul ni apostal ni gaar: “Ya urngin e thin ni bay u lan e babyor nib thothup e Got e yib e pi’ nga laniyan’ e girdi’ ngar yoliyed nga babyor.” (2 Timothy 3:16) U daken e Bible, e yog Jehovah riy ngodad nib tamilang ni gaar: “Ireray e kanawo’. Mman riy.” (Isaiah 30:21) Ngan fol ko Thin rok Got e ra ayuwegdad ni ‘nguuda ayuwgad u rogon e ngongol rodad.’ (Efesus 5:15) Ngan fil e Bible ma ngan fal’eg i lemnag e n’en ni kad filed e ra ayuwegdad ni ngauda folgad ko “tin riyul’.” (3 John 3) Riyul’, nrogon ni yog Jesus ni, “kan ni thothup . . . e ma pi’ e yafas; ma dowef rok be’ e dariy fan.” Ayuw ni rayog ni nge pow’iy e tin ni gad ma rin’ ma yima pagan’uy ngay e ayuw ko tirok Got, ni ma yib ngodad u daken e Thin rok Got, nge kan ni thothup rok, nge ulung rok.

18. (a) Mang e be rin’ e girdi’ ni de gonop? (b) Miti mang michan’ e gad be maruweliy?

¹⁸ Ngiyal’ ney, ma piin ni ke kireban’rad nbochan e lem rorad nib kireb ara bochan e n’en ni yad be be sonnag ni de yib ngorad e baga’ ni yad ma chel ngar rin’ed oren e tin rayog rorad ni be ognag e re fayleng ney. Dakur lemnaged ni ngan gur ko pigpig ku Got, ma dakur lemnaged nib t’uf ni ngar “fal’eged rogorad,” ma ra mel’eged ni ngar nameged e tin nib siin ko bin ni ngar ted e pi n’en ko Gil’ilungun ni nge m’on ko yafas rorad. (Matthew 24:42) Ngan fol ko lem ni aram rogon e ri dariy e gonop riy. Mu lemnag e thin rok Paul ni gaar: “Gathi gadad e piin ni kar pied keru’rad ngak Got kar maloggad; ya gadad e ke michan’dad ngak Kristus kad thapgad ngak Got.” (Hebrews 10:39) Ni bod Enok nge Noah, gadad be par ko ngiyal’ ni kari wagey, machane bay e taw’ath rodad ni ngad folgad ku Got ni bod yow. Ngan rin’ e n’en ni aram rogon, e kari pagan’dad ni gad ra guy ni ra lebug e tin ni ke micheg Jehovah, ni aram e ngan thang owchen e girdi’ nib kireb, ma bayi sum e bin nib biech e fayleng nib mat’aw. Reb e athap nrib fel’!

19. Uw rogon ni weliy Mikah murung’agen kanawoen e tin riyul’ e Kristiano?

¹⁹ Mikah ni fare profet ni kan thagthagnag e ke yog ni pi nam u fayleng e “Ra reb e nam ma yad be meybil ma yad be fol rok e birorad e kan.” Ngemu’ me weliy murung’agen nge boch e tapigpig nib yul’yul’ ni gaar: “Machane gadad e bay ud meybilgad ngak Somol ni Got rodad ma gadad be fol rok ndariy n’umngin nap’an.” (Mikah 4:5) Faanra n’en ni kam dugliy e bod Mikah, ma ga par nib chuchugur ngak Jehovah nyugu demtrug rogon feni gel e wagey nra yib. (James 4:8) Yibe athapeg ni ra bagadad ma be yim’ ni bochan ni nge fol ku Jehovah ni Got rodad e chiney ma nge par ni aram rogon ndariy n’umngin nap’an!

Uw Rogon ni Ngam Pi’ e Fulweg?

• Mang e pi n’en ni ba taareb rogon u nap’an Noah nge chiney?

• Mang kanawo’ ni ke fol Noah nge tabinaw rok riy, ma uw rogon ni ngad folwokgad ko michan’ rorad?

• Mang lem ni de puluw e dag boch pi gachalpen Jesus?

• Mang e ke dugliy e tin riyul’ e Kristiano ni ngar rin’ed?

[Study Questions]

[Pictures on page 26]

Taareb rogon nga nap’an Noah, girdi’ e ngiyal’ n’ey e kaygi yoor pa’ u puluwrad ni gubin e rran

[Picture on page 27]

Gadad e pi tamachib, e “dab da sulod nga riyel”