Ra Gal Ramaen Got Ko Yafas Rom, Fa?

“Be gal ramaen Somol rodad ni ke af rok ngodad.”​—2 KORINTH 3:18.

1. Mang e i guy Moses, ma mang e buch rok nga tomren?

 REB e tin ni th’abi yira ngat ngay e changar ni kan piliyeg ni ke guy e girdi’. Immoy Moses ni goo ir u daken e Burey ni Sinai min pi’ ngak e n’en ni gathi ri yima ning. Min pag ni nge guy ban’en ni dawori guy be’ biyay​—ke pig e changar rok me guy ramaen Jehovah ni be gal. Aram e bin th’abi fel’ e n’en ni ke guy e girdi’. Bin riyul’ riy e de guy Moses Jehovah nga owchen. Ya bpag gelngin ramaen ndabiyog ni nge guy e girdi’ Got mi i par nib fas. Ere reb e engel ni owchen Jehovah e yan u tooben Moses me upunguy Jehovah “pa’” ngak Moses u nap’an ni yan fare engel u tooben. Ma faani yan fare engel me pag Jehovah Moses ni nge guy ramaen ni ke achig. Ki non Jehovah ngak Moses u daken reb e engel. Fare Bible e weliy e n’en ni buch nga tomren ni gaar: “Faani yib Moses u daken e Burey ni Sinai nga but’ . . . ni be galgal ramaen owchen ni bochan e i non ngak Somol.”​—Exodus 33:18–34:7, 29.

2. Mang e ke weliy apostal Paul u murung’agen ramaen Got ni be gal rok e pi Kristiano?

² Amu lemnag ni ga bay rok Moses u daken e re burey nem. Ri ga ra felfelan’ ni ngam guy ramaen e Ani Ga’ ma ga be motoyil ko thin rok! Ba gel e tow’ath riy ni ngan un ngak Moses nga nib nga pening ko Burey ni Sinai ni Moses e ir e ni pi’ fare Motochiyel u daken! Ga manang ni ma gal ramaen Got rok e tin riyul’ e Kristiano ni ke af ngorad u reb e kanawo’ ni kab fel’ ko bin ni gal ramaen rok Moses, fa? Re thin nem e bay u reb e babyor ni ke yoloy apostal Paul. I yog ni pi Kristiano ni kan dugliyrad ko kan ni thothup e “be gal ramaen Somol rorad ni ke af rok ngorad.” (2 Korinth 3:7, 8, 18) Ma ku arrogon e pi Kristiano ni athap rorad e yafas u fayleng ni ku ma gal ramaen Got rorad ni ke af ngorad.

Rogon ni Ma Gal Ramaen Got Rok e Pi Kristiano

3. Uw rogon ni kada nanged Jehovah u boch e kanawo’ ni de nang Moses?

³ Ra diin me yog ni nge gal ramaen Got rodad ni ke af ngodad? Ya dada guyed Jehovah ara da rung’aged e thin rok ni bod rogon ni guy ara rung’ag Moses. Machane gad manang Jehovah u yugu boch e kanawo’ ni de nang Moses. I m’ug Jesus ni ir fare Messiah ni gonapan 1,500 e duw nga tomren ni yim’ Moses. Ere de nang Moses rogon ni lebguy Jesus fare Motochiyel u nap’an ni yim’ me chuweg e girdi’ ko denen nge yam’. (Roma 5:20, 21; Galatia 3:19) Ri buchuuw ban’en ko tin nib m’agan’ Jehovah ngay ni manang Moses, ma de nang rogon nra lebguy Gil’ilungun fare Messiah e tin nib m’agan’ Got ngay me yibnag e Paradis nga fayleng. Ere gathi gad be guy ramaen Jehovah nga owchedad ya gad be guy ko michan’ rodad u daken e machib nu Bible. Ma de non Jehovah ngodad u daken reb e engel, ya kada rung’aged laman Jehovah, ni be non ngodad u lan e Bible ni ba ga’ ni thin ko Gospel ni bay e machib rok Jesus riy.

4. (a) Uw rogon ni ma gal ramaen Got rok e piin ni kan dugliyrad ko kan ni thothup? (b) Ma mang boch e kanawo’ nrayog ni nge gal ramaen Got rok e piin ni yad be athapeg e yafas u fayleng?

⁴ Yugu aram rogon ni de gal ramaen Got rok e pi Kristiano ni be gal ramaen owcherad, machane gowa be gal ramaen owcherad u nap’an ni yad ma weliy murung’agen rarogon Jehovah nge tin nib m’agan’ ngay. I weliy Isaiah ni profet murung’agen e ngiyal’ rodad ney ni girdi’ rok Got e “ra weliy murung’agen fene sorok Got u fithik’ e pi nam.” (Isaiah 66:19, New World Translation) Maku gad ra beeg ko bin 2 Korinth 4:1, 2 ni gaar: “Got e ke runguydad ke pi’ e re maruwel  ney ngodad . . . . Kad paged urngin e ngongol nib mith ni yima tamra’ ngay; darid ngongolgad u fithik’ e sabanban fa reb e gadad be pingeg fan e thin rok Got ngad banniged e girdi’ ngay. Gadad be weliy e tin nib riyul’ nib tamilang, ma gadad be par u p’eowchen Got; ma gadad be guy rogon ni nge guy e girdi’ e ngongol rodad mi yad nang u lanin’rad ni aray rogon.” I non Paul ngak e pi Kristiano ni kan dugliyrad ko kan ni thothup ni yad be “pigpig ko fa bin nib beech e m’ag.” (2 Korinth 3:6) Machane bay angin e machib rorad ngak bokum e girdi’ ni yad be athapeg e yafas ni manemus u fayleng. Machib ko gal ulung ney e goo be gal ramaen Jehovah riy ni be gal ramaen ko n’en ni yad be machibnag nge rogon e ngongol rorad. Mmil fan ngodad ni nge gal ramaen e Ani Ga’ rodad ni ke af ngodad, ma gad ba tow’ath riy!

5. Fel’ rogon ko tirok Got ban’en ni bay rodad e ma micheg e mang?

⁵ Ngiyal’ ney e yibe machibnag fare thin nib fel’ ni murung’agen Gil’ilungun Got u fayleng i yan ni bod rogon ni yog Jesus ni yira rin’. (Matthew 24:14) Girdi’ u gubin e nam, nge ganong, nge urngin miti girdi’, nge urngin mit e thin e yad be fol ko fare thin nib fel’ ma kar pilyeged rarogon e yafas rorad ni fan e ngar rin’ed e tin nib m’agan’ Got ngay. (Roma 12:2; Revelation 7:9) Yad bod e tin som’on e Kristiano ni dabiyog ni nge dab ra weliyed murung’agen e tin ni kar guyed ara kar rung’aged. (Acts 4: 20) Ke pag nel’ milyon e girdi’ ni be gal ramaen Got rorad, ma dariy biyay u nap’an chepin e girdi’ ni ara’ urngin e girdi’ ni be gal ramaen Got rorad. Me gur, ga bay u fithik’ e pi girdi’ ney, fa? Fel’ rogon ko tirok Got ban’en ni be tay e girdi’ rok Got e ma micheg ni be flaabnagrad Got ma be matanagiyrad. Ri ba gagiyel ni bay gelngin Jehovah u dakendad ni bochan e rib gel e togopuluw ni yibe tay ngodad. Ngada weliyed fan ni bay gelngin Jehovah u dakendad.

Dabiyog ni Ngan Taleg e Machib ni Be Tay e Girdi’ Rok Got

6. Mang fan nib t’uf e michan’ ma kub t’uf ni nge dab da tamdaggad u nap’an ni gad bay ko ba’ rok Jehovah?

⁶ Faan manga kan piningem ni ngam micheg u tafen e puf oloboch nib kireb e rok be’ ni yugu ma th’ab e motochiyel. Ma ga manang ni bay girdien faanem ni yad ba gel ma ra fanay urngin ban’en ni bay rok ni fan e nge dab mu tamilangnag e kireb rok. Ba t’uf rom ni nge dab mu tamdag ni ngam pi’ e mich nib togopuluw ko faanem nib kireb ma kub t’uf ni nge pagan’um ni ra ayuwegem e am ni nge dabi rin’ faanem ban’en nib kireb ngom. Aram rogodad e chiney. Nap’an ni gad ma micheg ni Jehovah e ir e Got ma gad ma micheg e tin nib m’agan’ ngay, maku gad be pi’ e mich nib togopuluw ngak Satan ni Moonyan’, ma gad be tamilangnag ni ir e ma thang e fan rok e girdi’ ma ir e ba malulfith ni be sasalapiy urngin e girdi’ nu fayleng. (John 8:44; Revelation 12:9) Ba t’uf e michan’ ma kub t’uf ni nge dab da tamdaggad u nap’an ni gad bay ko ba’ rok Jehovah ma gad be togopuluw ngak Moonyan’.

7. Uw fene gel Satan, ma mang e be guy rogon ni nge rin’?

⁷ Bin riyul’ riy e Jehovah e ir e En ni Th’abi Tolang. Kab gel gelngin nga gelngin Satan. Ma rayog ni nge mich u wan’dad ni rayog rok Jehovah  ni nge ayuwegdad maku ba adag ni nge matanagiydad ni nge dabi yib e kireb ngodad ni gad be pigpig ngak u fithik’ e yul’yul’. (2 Kronicles 16:9) Machane Satan e ir e pilung rok e pi moonyan’ nge re fayleng ney nib dar rok Got. (Matthew 12:24, 26; John 14:30) Ka nin’ ni gowa ba kalbus nga fayleng ma “kari damumuw.” Ri be togopuluw Satan ngak e pi tapigpig rok Jehovah ma ma fanay e re fayleng ney ni bay u tan pa’ ni nge taleg e machib ni be tay e piin ni ma machibnag fare thin nib fel’. (Revelation 12:7-9, 12, 17) Uw rogon ni ma rin’? Ma rin’ u dalip e kanawo’.

8, 9. Uw rogon ni ma maruweliy Satan e bin ni de puluw e t’ufeg, ma mang fan ni ngada tedan’dad u rogon ni gad ma mel’eg e piin ni gad ra chag ngorad?

⁸ Reb e kanawo’ ni ma fanay Satan ni nge guy rogon ni nge chafegdad nga bayang e aram e magafan’ ko par rodad. Girdi’ ko tin tomren ney e rran e yad ma chogownag e salpiy, ma ke mus ni yad e yad be lemnagrad, ma ba t’uf e fafel rorad. Ma de t’uf Got rorad. (2 Timothy 3:1-4) Kar mitgad ko ngongol rorad ko yu rran, ma ba ga’ ni dar tedan’rad ko fare thin nib fel’ ni gad be machibnag ngorad. Ma gathi ri ba ga’ fan e machib nu Bible u wan’rad. (Matthew 24:37-39) Ma re lem nu fayleng nem e rayog ni nge af ngodad me yan i aw ni de t’uf e tirok Got ban’en rodad. Faan gad ra pag ni nge gel chogowen e chugum u wan’dad ara nge ga’ fan e fafel u wan’dad ma aram e ra war e t’ufeg rodad ngak Got.​—Matthew 24:12.

⁹ Aram fan ni ma mel’eg e pi Kristiano e piin ni yad ra chag ngorad. Be gaar Solomon ni pilung: “Mpachegem ngak e piin ni yad ba gonop me yog e gonop ngom. Mm’agem ngak e girdi’ ni balyang ma ga kireb.” (Proverbs 13:20) Nguu ‘darod’ e piin ni ma gal ramaen Got rorad. Ma rib fel’ ni ngan chag ngak e girdi’ ni aram rogorad! Ma nap’an ni gad ra chag e pi walagdad ni girdien Kristus u lan e muulung ara yugu ba ngiyal’ ma ra yib e athamgil nga lanin’dad ni bochan e t’ufeg rorad nge felfelan’ rorad nge gonop rorad. Gad ra chag ko miti girdi’ nem ma ra gel e athamgil u lanin’dad ni nguuda machibgad.

10. Mang boch e kanawo’ ni ma fanay Satan e moning riy ni nge togopuluw ngak e piin ni be gal ramaen Got rorad?

¹⁰ Bin l’agruw e kanawo’ ni ma fanay Satan ni nge taleg urngin e Kristiano ni nge dabi gal ramaen Got rorad e aram e moning. Dab da gingad ko re kanawo’ ney ni ma fanay Satan e moning. Ya nap’an ni i machib Jesus Kristus u fayleng ma un moningnag—un minmin ngak, min dariy fannag, min nog e thin nib kireb ngak min thuw nga daken. (Mark 5:40; Luke 16:14; 18:32) Kun moningnag e tin som’on e Kristiano. (Acts 2:13; 17:32) Maku arrogon e pi tapigpig rok Jehovah e ngiyal’ ney ni yima moningnagrad. Rogon e thin rok apostal Peter e yira pining e “profet ni yugu ban’en” ngorad. Be gaar Peter: “Bin som’on e thingar mu nanged ni tin tomur e rran e bay yib i m’ug boch e girdi’ riy ni tin ni yad  be yim’ ni bochan e ir e be gagiyegnag pangirad. Bay ur moninggad ngomed ni be lungurad, ‘I yog faram ni bay sul, er rogon ni yog fa danga’? Ere ba uw? Chitamangidad e kar m’ad, machane urngin ban’en ni ka be par ni ka rogon ni ka nap’an e ngiyal’ ni sum e fayleng riy ka mada’ ko chiney!’” (2 Peter 3:3, 4) Yima moningnag e girdi’ rok Got ni gowa dar nanged e tin riyul’. Yima lemnag ni yalen e Bible e gathi fan ko ngiyal’ ney. Boor e girdi’ e ma lemnag ni fare machib ni gad be wereg e aram e thin ko balyang. (1 Korinth 1:18, 19) Yima moningnagdad ni gad e Kristiano u skul, nge taban e maruwel ma yu ngiyal’ ma girdien e tabinaw rodad e ra moningnagdad. Machane pi moning ney e dabi talegdad ya ka be gal ramaen Got rodad ko machib ni gad be wereg ya gad manang ni ba riyul’ e Thin Rok Got ni bod rogon ni yog Jesus.​—John 17:17.

11. Uw rogon ni ke fanay Satan e togopuluw ni nge guy rogon ni nge taleg e machib ni be tay e pi Kristiano?

¹¹ Bin dalip e kanawo’ ni ma fanay Moonyan’ ni nge th’ab gulungdad e aram e togopuluw ara gafgow. I yog Jesus ngak pi gachalpen ni gaar: “Ma aram e bayi kolmed e girdi’ ngar pied gimed ngan gechignagmed, ma bay nthang e fan romed. Ma urngin e girdi’ ni bay ra fanenikayed gimed ni bochag.” (Matthew 24:9) Mab riyul’ ni ke yib e gafgow nib gel ngodad ni gad e Pi Mich Rok Jehovah u boor yang u fayleng. Gad manang ni yog Jehovah kakrom ni ra sum e fanenikay u thilin e piin ni yad ma pigpig ku Got nge piin ni yad ma pigpig ku Satan ni Moonyan’. (Genesis 3:15) Ma ku gad manang ni faan gad ra yul’yul’ u fithik’ e skeng ma gad be micheg nib mat’aw e gagiyeg rok Jehovah. Ra tamilang u wan’dad ni aram rogon ma ra gelnagdad u fithik’ e skeng nib ga’. Dariy reb e togopuluw ni ra taleg e machib ni gad be tay ni faanra mudugil u wan’dad ni nge gal ramaen Got rodad.

12. Mang fan ni ngada felfelan’gad u nap’an ni gad ra yul’yul’ u fithik’ e togopuluw ni yib rok Satan ngodad?

¹² Ga ma yul’yul’ ni ga be togopuluw ko pi n’en ko fayleng ni ma wawliyey ma ga yul’yul’ ni yugu aram rogon ni yibe moningnagem ara togopuluw ngom, fa? Faan ga ra yul’yul’ ma bay tapgin ni ngam felfelan’. I micheg Jesus ngak e piin ni yad be fol rok ni gaar: “Ngam felan’gad ko ngiyal’ nra yog e girdi’ e thin nib tagan ngomed mi yad ngongliy e tin nib kireb ngomed ma yad be tunguy urngin mit e thin nib kireb nib togopuluw ngomed ni bochan e gimed girdieg. Ngari felan’med, ya bay labgen ni ba ga’ ni fan ngomed ni kan tay u tharmiy. Ya erera’ rogon e gafgow ni i tay e girdi’ ngak e pi profet ni yad ba kakrom ngomed.” (Matthew 5:11, 12) Gum’an’ ni ga be tay e ma micheg ni bay e kan ni thothup rok Jehovah u dakenam ma be gelnagem ni nge gal ramaen Got rom.​—2 Korinth 12:9.

K’adan’ ni Ma Yib u Daken e Ayuw Rok Jehovah

13. Mang e bin kenggin i fan ni gad ma k’adan’dad ko machib ni gad be tay?

¹³ Bin kenggin i fan ni gad ma k’adan’ ko machib ni gad be tay e bochan e bay Jehovah rodad ma gad ma felfelan’ ngay ni nge gal ramaen rodad. Ma folwok e girdi’ rok e piin ni ba t’uf rorad ma yad ma tay farad, ma Jehovah Got e ir e th’abi fel’ ni i ngan folwok rok. Ma bochan e ri gad ba t’uf rok Jehovah ma ke l’og Fak nga fayleng ni nge machibnag e tin riyul’ ma nge biyuliy e girdi’ ni yad ra fol. (John 3:16; 18:37) Taareb lanin’dad Got ni gad ba adag ni nge urngin e girdi’ mi yad pi’ keru’rad ko kireb ni yad be rin’ me yog e yafas ngorad. Aram fan ni gad ma machibnagrad. (2 Peter 3:9) Bochan ni gad ba adag ni nge yog e yafas ngak e girdi’ ma bochan ni ke mudugilan’dad ni ngada folwokgad rok Got ma aram fan ni gad ma athamgil ni nge gal ramaen Got rodad ko machib ni gad be tay.

14. Uw rogon ni ma gelnagdad Jehovah ya ngada k’adan’gad ko machib ni gad be tay?

¹⁴ Gelngidad ni ngada k’adan’gad ko machib ko Kristiano e ma yib rok Jehovah. Ma ayuwegdad ma ma gelnagdad u daken e kan ni thothup, nge ulung rok, nge Thin Rok ni Bible. Ma pi’ Jehovah e k’adan’ ngak e piin ni yad ba adag ni nge gal ramaen rorad. Ma fulweg taban e meybil rodad me pi’ e gonop ngodad ya ngada nanged rogon ni ngada gelgad ko pi skeng rodad. (Roma 15:5; James 1:5) Maku dabi pag Jehovah ni nge yib e skeng ngodad ni dabiyog rodad ni ngada  athamgiliyed. Faanra pagan’dad ngak Jehovah ma ra bing e kanawo’ ngodad ni ngada gelgad ko pi skeng rodad ya nge yog ni nge gal ramaen rodad.​—1 Korinth 10:13.

15. Mang e be ayuwegdad ni ngad k’adedan’dad?

¹⁵ K’adan’ ni gad be tay u nap’an ni gad be machib e ir e mich riy ni bay e kan ni thothup rok Got u dakendad. Susun: Faanra yog be’ ngom ni ngam wereg e flowa u mit e tabinaw ni dariy puluwon fapi flowa. Ka nog ngom ni ngam rin’ e re maruwel ney ni gur e ngam pi’ puluwon ni ngan rin’ fare maruwel ma ngam rin’ ko ngiyal’ ni susun e ngam rin’ e tirom. Ma kam pirieg ni de yoor e girdi’ ni ba adag e re flowa nem, ma boch i yad e ma togopuluw ko maruwel rom ni ga be wereg fapi flowa. Gur, ga be lemnag ni rayog rom ni nguum rin’ e re maruwel nem ni gubin e pul nge gubin e duw, fa? Sana dabiyog rom. Machane kam athamgil ko fare maruwel ni ngam wereg fare thin nib fel’ ni gur e kam pi’ puluwon ma kam rin’ ko ngiyal’ ni susun ni ngam rin’ e tirom. Ma kam rin’ e re maruwel ney ni bokum e duw. Mang fan? Kam rin’ ya ba t’uf Jehovah rom ma ke flaabnagem me pi’ e kan ni thothup ngom ya nge yog ni ngam k’adan’um. Ri arrogon!

Dab ni Pag Talin e Re Maruwel Ney

16. Mang angin e k’adan’ ni gad be tay ni ra yib ngodad nge piin ni ma motoyil ngodad?

¹⁶ Fare maruwel ni kan pi’ ngak e piin ni kan dugliyrad ko kan ni thothup ni ngar wereged e machib e ir reb e tow’ath ni dariy ban’en nrayog ni ngan taarebnag ngay. (2 Korinth 4:7) Maku arrogon e machib ni be tay yugu boch e saf u fayleng i yan ni ku reb e tow’ath. Ma nap’an ni ga ra k’adan’ ko machib ma rayog ni ngam “ayuwegem nge piin ni yad ma motoyil ngom ngar thapgad ngak Got.” (1 Timothy 4:16) Amu lemnag fan e re thin nem. Fare thin nib fel’ ni ga be machibnag e ma bing e kanawo’ ngak yugu boch e girdi’ ni nge yog e yafas ni manemus ngorad. Me yog ni nge fel’ e thin romed e piin ni kam ayuwegrad ko machib. Amu lemnag fene gel e felfelan’ rom ni ngam par ni manemus u Paradis u taabang nge piin ni kam ayuweg ni ngar filed murung’agen Got! Dabi siy ni dab ra paged talin e maruwel rom ni kam ayuwegrad. Ri ra fel’ lanin’um riy!

17. Mang fan ni yugu ba thil e ngiyal’ ni gad be par riy u nap’an chepin e girdi’?

¹⁷ Ga be par u ba ngiyal’ ni yugu ba thil u nap’an chepin e girdi’. Dakuriy biyay ni yira machibnag fare thin nib fel’ ngak e girdi’ ni yad ba dar rok Got. I par Noah u reb e fayleng ni aram rogon, me guy e re fayleng nem ni ke chuw. Dabi siy ni kari felfelan’ ya manang ni ke yul’yul’ ko tin nib m’agan’ Got ngay ni ke toy fare arke me yog ni nge magay nib fas, ni ir nge chon e tabinaw rok! (Hebrews 11:7) Ku rayog e re felfelan’ nem ngom. Amu lemnag rogon lanin’um u lan fare m’ag nib biech ni ga be lemnag e maruwel ni kam rin’ ko tin tomren ney e rran ni kam nang ni kam rin’ e tin rayog rom ni ngam ayuweg e tin ni bay rogon ko Gil’ilungun.

18. Mang e ke micheg Jehovah ngak e pi tapigpig rok me pi’ e athamgil nga lanin’rad?

¹⁸ Ere ngii gal ramaen Got rodad ni ke af ngodad. Dab da paged talin e re maruwel ney biid. Maku dabi pag talin Jehovah e maruwel rodad. Ma pi’ e Bible e athamgil nga lanin’dad ni gaar: “Yi Got e gathi ba laniyan’. Gathi bayi pag talin e maruwel ni kam ngongliyed, ara rogon nib t’uf romed ni kam daged ni bochan e ayuw ni kam pied ma ki gimed be pi’ ngak e piin ni gimed ni girdien Kristus. N’en ni kug m’ad ni bochan e mang e yigi bigimed me par ni be athamgil nge yan i taw ko tomur, nge yog ni yib i m’ug nib riyul’ e pi n’en ni ir e be l’agan’med ngay. Dabumad ni ngam malmalgad, machane ngam pired ni gimed bod e piin nib mich Kristus u wun’rad ma ba gum’an’rad, ma aram fan ni ke yog ngorad e tin ni yog Got nra pi’.”​—Hebrews 6:10-12.

Rayog ni Ngam Weliy Fan?

• Uw rogon ni ma gal ramaen Got rok e pi Kristiano?

• Mang boch e kanawo’ ni ma fanay Satan ni be guy rogon ni nge taleg e machib ni be tay e girdi’ rok Got?

• Mang mich ni bay ni kan ni thothup rok Got e bay u dakendad?

[Study Questions]

[Picture on page 5]

I gal ramaen owchen Moses ni ramaen ni ke af ngak

[Pictures on page 6]

Ma gal ramaen Got rodad ko machib ni gad ma tay