“Yam’ e Kan Thang Mit ni Manemus”

SUSUN ni yi be beeg bang i shimbung ni ireram kenggin e thin riy. Riyul’, dariy reb e shimbung ni ke yog ni nge yog reb e thin ni aram rogon. Machane re thin nem e ma m’ug u lan ba ke babyor ni bokum biyu’ e duw nap’an ni​—fare Bible.

U lan e Bible e kan weliy rarogon e yam’ riy nib tamilang. Maku reb, e fare Bible e gathi ke mus ni be dag ko mang fan ni gad ma yim’ ya ku be weliy ko uw rarogon e pi yam’ me pi’ e athap ni fan ko piin kar m’ad ni yad ba t’uf rodad. Tomur riy, me weliy rogon ba ngiyal’ ni rib ga’ fan ni ngiyal’ ni rayog ni nga nog ni: “Got e ke kirebnag gelngin e yam’; mi Got e ke gel.”​—1 Korinth 15:54.

Fare Bible e weliy rogon e yam’ ni rayog ni ngan nang fan gathi dab ni nang fan. Ni bod rogon, ni yigi i sul nga i taarebnag e yam’ ko ‘kan mol,’ mi i weliy murung’agen e girdi’ ni kem’ ni bod ni be “mol” ni yam’.​—Psalm 13:3; 1 Thessalonika 4:13; John 11:11-14.

Rib tamilang, ni Jesus Kristus e rin’ reb e n’en ni rib ga’ fan u rogon ni ngan chuweg e yam’. I yog ni ke yib nga fayleng ni “nge pigpig me pi’ e pogofan rok nge biyuliy boor e girdi’ ngay.” (Matthew 20:28) Rarogon e re n’ey e rayog i taarebnag ngak be’ ni kan iring, ni rogon min pag faanem e kan dugliy e n’en ni ngan pi’ ni puluwon. Rogon e biney, ni bay e chiney e fare biyul ni rayog ni nge chuwegdad ko denen nge yam’ e yafas rok Jesus nib girdi’ nib flont.​—Acts 10:39-43.

Yam’ e ba toogor. Girdi’ e boor bogi toogor rorad, ni bod e m’ar nge pilibthir, ni taareb rogon ni ma k’aring e gafgow. I micheg Got ni ra gel ngorad ni yad gubin, tomur riy me turguy e n’en ni ngan rin’ ko n’en nth’abi ma gafgownag e girdi’ ni gaar e Bible: “Ma bin th’abi tomur e toogor ni nge gel ngak e yam’.”​—1 Korinth 15:26.

Nap’an ni ra lebug e re n’em ni kan micheg, ma girdi’ e ra felfelan’ ko yafas nib flont, ni dabi kirebnag e denen nge yam’. Ma chiney, e rayog ni nge pagan’dad ni gadad manang ni piin nib t’uf rodad e yad be toffan, ma faanra yad bay u wan’ Got, ma yira fasegrad ko yam’ ko ngiyal’ ni ke taw nga nap’an.

“Yam’, Ke Yan Gelngim Ngan ni Ga Ma Amithnigey Ngay?”

Rib tamilang, ni gad ra nang fan rogon e yam’ ma ra ayuwegdad ngad lemnaged e yafas nib fel’ rogon. Yam’ e de t’uf ni ngan balyangan’uy ngay. Rayog ni ngaud felfelan’gad ko yafas ma dariy e ma rus ko biney e toogor ni be lekdad. Ma yira nang ni yam’ e dabiyog ni thang e yafas rodad ni manemus ma ra chuweg e lem ni nga un athamgiliy nga un par ni yib felfelan’, ya ba mich u wan’uy ni “yafas e rib ngoch.” Yira nang ni piin ba t’uf rodad ni kar m’ad e kar molod ni yam’ ma yad be sonnag e fas ko yam’ ma ra pi’ e pagan’ ngodad ma ra k’aring lanin’dad nge fel’ e yafas u wan’dad.

Arrogon, rayog ni da pagedan’dad ngad sapgad ko gabul nge langlath ko ngiyal’ ni Jehovah Got, ni Ani ma pi’ e yafas, e ra k’eyag e yam’ ni manemus. Ba taw’ath ni rib fel’ ko ngiyal’ ni rayog ni ngad fithed ni nge lungudad: “Yam’, ba uw e gel ni kam tay? Yam’, ke yan gelngim ngan ni ga ma amithnigey ngay?”​—1 Korinth 15:55.