Uw Feni Mudugil E Pagan’ Rom Ngak Got?

“Ere ngam m’oneged u wan’med e gagiyeg rok Got.”​—MATTHEW 6:33.

1, 2. Mang e n’en ni ke rin’ fare pagel ko maruwel rok, ma mang fan?

 REB E pagal e ba adag ni nge yoor e maruwel ni nge rin’ ko ulung rok. Maruwel rok e aram e n’en ni be magawonnag ko muulung. Ere uw rogon ni nge pithig? Ke momnag e par rok, ke tal ko maruwel rok, ke pirieg reb e maruwel ni dabi magawonnag e maruwel rok u lan e ulung. Chiney, e ke buchuuw e salpiy ni be yog ngak ko kafram, machane ka be yog ni ayuweg e tin ba t’uf ko tabinaw rok maku be ayuweg e ulung.

² Ga be nang fan ko mang fan ni ke rin’ fare pagel ni aram rogon? Ga be guy ma rayog ni ngam rin’ ban’en ni bod ni ke rin’ e cha’ nem nfaanra keb e magawon ni taareb rogon ngak? Boor e Kristiano ni ke rin’, ma ngongol rorad e ke dag e pagan’ rorad ko n’en ni ke micheg Jesus faani gaar: “Ere ngam m’oneged u wan’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey ngomed.” (Matthew 6:33) Kar pagedan’rad ngak Jehovah nib gel ma gathi maruwel rorad nu fayleng.​—Proverbs 3:23, 26.

3. Mang fan ni ma lemnag boch e girdi’ ko ka ba’ fan ni ngan m’oneg e Gagiyeg rok Got e ngiyal’ ney, fa?

³ Bochan ni gad be par ko ngiyal’ ney ni ke mo’maw’ e par riy, rayog ni nge lemnag boch e girdi’ ko ba gonop fare pagel ko n’en ni ke turguy ni nge rin’, fa danga’. Ngiyal’ ney, e boch e girdi’ e be par u fithik’ e gafgow nib gel ma boch e girdi’ e yad ma felfelan’ ko par rorad nib fel’ rogon. Boch e girdi’ ni ma par ko nam nib gafgow e yad ma gay kanawoen ni nge mom boch e par rorad. Ma reb, boor e girdi’ ko pi nam nib fel’ rogon e ka yad baadag ni ngar pared nib fel’ rogon e par rorad ni yugu aram rogon ni ke gel e magawon ko salpiy nge ku boch ban’en. Bochan nib mo’maw’ e par, ma boch e girdi’ e ma lemnag ko, ‘Ka ba’ fan ni ngan m’oneg fare Gagiyeg rok Got, fa?’ Ngan fulweg e re deer nem, e ngan lemnag e piin ni ur motoyilgad ngak Jesus.

“Dabi Magafan’uy”

4, 5. Uw rogon ni weliy Jesus ni ba’ fan ko girdi’ rok Got ni dabi magafan’rad nge pag rogon ko tin ni ba t’uf rorad ni gubin e rran?

⁴ Immoy Jesus u Galile, ma i welthin ngak ba ulung e girdi’ ni baga’ ni boor yang e gin ni ra bad riy. (Matthew 4:25) Buchuuw ko pi girdi’ nem e boor ban’en rorad. Ma boor i yad e ba gafgow. Machane, i pi’ Jesus e athamgil nga laniyan’rad ni ngar m’oneged e tin baga’ fan ma gathi chugum ya ngan ulunguy ban’en ni kab ga’ fan​—ni aram e tirok Got ban’en. (Matt. 6:19-21, 24) I gaar: “Dabi magafan’med ko ggan nge garbod ni nge yog ngomed ni fan e ngam pired ni gimed ba fos, fa mad ni fan nga dowmed. Gathi ka ba ga’ fan e pogofan ko ggan? Ma gathi ka ba ga’ fan e dowef ko mad ni yibe yin’?”​—Matthew 6:25.

⁵ Boor e girdi’ ni ur motoyilgad ko thin rok Jesus, ma gowa ban’en ni de fel’. Yad manang ni faanra dab ra maruwelgad nib gel, ma ra gafgow e tabinaw rorad. Machane, yugu aram rogon miki puguran Jesus ngorad murung’agen e arche’. Arche’ e gubin e rran ni yad ma gay e ggan rorad nge gin ni ngar pared riy, machane ma ayuwegrad Jehovah. Jesus e ki puguran ngorad rogon ni ma ayuweg Jehovah e pi floras nu fithik’ e pan, ma feni fel’ yaan e kab gel ko flaab rok Solomon. Faanra ma lemnag Jehovah e arche’ nge floras, ma uw feni gel ni ma lemnagdad? (Matthew 6:26-30) I gaar Jesus, yafas rodad (yaal) nge dowef rodad e kab ga’ fan ko ggan ni gad ma chuw’iy nge ayuweg e yafas rodad nge mad ni gad ma yin’ nga dakendad. Faanra ngada pied urngin rodad ni fan ko ggan nge mad, ma dakuriy ban’en nra magay ni fan ko pigpig ngak Jehovah ma aram e de yog rodad e bin baga’ fan ko yafas.​—Eklesiastes 12:13.

 Ba Lem nib Thabthabel

6. (a) Mang e mmil fan ngak e pi Kristiano? (b) Ba uw e gin nge tay e pi Kristiano e pagan’ rorad ngay nib polo’?

⁶ Riyul’ ni, gathi be pi’ Jesus e athamgil nga laniyan’ e piin ni be motoyil ngak ni ngar talgad ko maruwel ngar sonniged Got ni nge pi’ e tin nib t’uf ko tabinaw rorad. Ya mus ko arche’ ni yad ma gay e ggan ni fan ngorad nge pi fakrad. Ere, piin ni yad ma fol ko tin ni ke fil Jesus e ngar maruwelgad ni faanra yad baadag ni ngar abichgad. Ma ba t’uf ni nga ra ayuweged e tabinaw rorad. Pi tapigpig ni Kristiano nge piin ni yad e sib e ngar pasiggad ko maruwel ni fan ko pi masta rorad. (2 Thessalonika 3:10-12; 1 Timothy 5:8; 1 Peter 2:18) Paul ni apostal e i fal’eg e tento ni nge ayuweg ir. (Acts 18:1-4; 1 Thessalonika 2:9) Yugu aram rogon, ma pi Kristiano nem e da ra torgad ko maruwel ko fayleng ni nge ayuwegrad. Kari pagan’rad ngak Jehovah. Angin ni ke yib riy, e keb e gapas nga laniyan’rad ndariy ko yugu boch e girdi’. Ke yog fare psalmist ni gaar: “Piin ni ma pagan’rad ngak Jehovah e yad bod e Burey nu Zion, dabiyog ni nge mithmith, ma ra par ndariy n’umngin nap’an.”​—Psalm 125:1, NW.

7. Mang e ra buch ko lem ko en de mudugil e pagan’ rok ngak Jehovah?

⁷ Cha’ nde mudugil e pagan’ rok ngak Jehovah e ba thil rogon ni ma lem. Boor e girdi’ ni chugum e ba m’on u laniyan’rad ni ra ayuweg e yafas rorad. Arfan, ni boch e gallabthir e yad ma pi’ e athamgil nga laniyan’ pi fakrad ni nge l’agan’rad ko skul nib tolang, nge fel’ rogorad ko maruwel nib tolang puluwon. Bay e kireban’ riy, ya boch e tabinaw ko Kristiano e kar pirieged ni bitir rorad ni kar uned ko skul nib tolang e yad be nameg e tin nu fayleng, ma ke mul u pa’rad e tirok Got.

8. Pi Kristiano e yad ma par nib thabthabel ko mang?

⁸ Machane, Kristiano nib gonop e yad manang ni fare fonow rok Jesus ni kan pi’ ko bin som’on e chibog e ku rayog ni ngan fanay e chiney ma yad ma guy rogon ni nge par nib thabthabel. Mus ni faan yad ra maruwel ni boor e awa ni yad be maruweliy e tin nu fayleng ma yad be tiyan’rad ko tin mil fan ngorad ni fan ko tirok Got, ma dab ra paged ni nge ning e salpiy owcherad nge k’aringrad ngar feked owcherad ko tin baga’ fan ni fan ku Got.​—Eklesiastes 7:12.

“Dabi Magafan’uy”

9. Uw rogon ni ke pi’ Jesus e athamgil nga laniyan’ e piin ri yad ma pagan’rad ngak Jehovah?

⁹ U nap’an e machib ni tay Jesus u daken e Burey, me yog ngak e piin ni yad be motoyil ni gaar: “Ere dabi magafan’ be’ nge gaar: U uw e bay yib e ggan rog riy? ara n’en ni nggu garbod ngay?  ara mad ni nggon’? Ereray e pi n’en ni gubin ngiyal’ ma be nameg e piin ni yugu boch e kan e yad be meybil ngorad. Chitamangimed ni bay u tharmiy e manang ni pi n’ey ni urngin e dabi siy ni nge yog ngomed.” (Matthew 6:31, 32) Pi thin ney e riyul’ ni ma pi’ e gel nga lanin’uy! Faanra pagan’dad nib polo’ ngak Jehovah, ma ra ayuwegdad ni gubin ngiyal’. Yugu aram rogon, ma fapi thin rok Jesus e ma k’aringey ni ngan lemnag ban’en. Ma puguran ngodad ni faan gad ra “adag” ni ngada leked e chugum, ma lem rodad e ra bod e lem “ko pi nam” ni girdi’ riy e gathi Kristiano ni riyul’.

10. Nap’an ni yib fare moon ngak Jesus ni nge fonownag, ma uw rogon ni m’ug ko mang e rib t’uf u wan’?

¹⁰ Ba’ ba ngiyal’, ni yib be’ nib moon ngak Jesus me fith ko mang e nge rin’ me yog e yafas ni manemus ngak. Me puguran Jesus ngak ko mang e n’en ni bay ko Motochiyel, ni aram e motochiyel ni ma fol e girdi’ riy e ngiyal’ nem. Ma fare moon e yog ngak Jesus ni gaar: “Yigoo gu be fol ko pi motochiyel nir ni urngin. Ere mang e n’en ni ka ba’ nthingar gu rin’?” Fulweg rok Jesus e sana de fel’ u wan’ boor e girdi’. I yog ni: “Faanra gab adag ni ngam yal’uw me ere mman ngam pi’ nchuway’ urngin ban’en ni bay rom ma ga fek e salpiy riy ngam pi’ ngak e piin yad ba gafgow, ma aram e ke yog e flaab ngom u tharmiy; ma ga yib ngam un ngog.” (Matthew 19:16-21) Me chuw fare moon ni ke kireban’, ya dabiyog ni nge digey e chugum rok ni pire’. Yugu aram rogon nib t’uf Jehovah rok, ma ka ba gel feni t’uf e chugum rok u wan’.

11, 12. (a) Mang fapi thin ni ma kireban’nagey ni weliy Jesus ni fan ko chugum? (b) Uw rogon ni chugum ni boor e ra magawonnagey ko pigpig ku Jehovah?

¹¹ N’en ni buch e ngiyal’ nem e k’aring Jesus nge weliy boch ban’en ni danir lemnag ni gaar: “Nggog ngomed, nrib mo’maw’ rok be’ ni pire’ ban’en rok ni nge un ko gagiyeg nu tharmiy. . . . Kab mo’maw’ rok be’ ni pire’ ban’en rok ni nge un ko gagiyeg rok Got ko bin ni nge yan ba kamel u mugufan ba rosom.” (Matthew 19:23, 24) Ke yog Jesus e re thin nem ni fan e dariy be’ ni pire’ ban’en rok ni ra yan nga Gil’ilungun Got fa? Danga’, me ul’ul ngay ni gaar: “Got e urngin ban’en ma rayog rok.” (Matthew 19:25, 26) Ere, bochan e ayuw rok Jehovah ma boch e girdi’ ni pire’ ban’en rok e kar manged Kristiano ni kan dugliyrad. (1 Timothy 6:17) Yugu aram rogon, ma ri bay fan nib fel’ ni ke yog Jesus e pi thin nem ni kan gin ngay. Ma be ginangey.

¹² Faanra chugum e rib t’uf ku be’ ma ra bod fare moon ni pire’ ban’en rok nib mo’maw’ ni nge pigpig ku Jehovah u polo’ i gum’irchaen. Rayog ni nge riyul’ e re n’ey u puluwon be’ ni pire’ ban’en rok nge be’ ni be athamgil ni “nge yoor e salpiy rok.” (1 Timothy 6:9, 10) Ra gel i pagan’uy ko chugum ma rayog ni pow’iy be’ nge ‘achig e tirok Got ban’en u wan’.’ (Matthew 5:3) Ma angin nra yib, e ra lemnag ni da ki t’uf e ayuw rok Jehovah. (Deuteronomy 6:10-12) Ma ra lemnag ni yira ayuweg nib fel’ rogon u lan e ulung. (James 2:1-4) Ma rayog ni fanay e tayim rok ko felfelan’ ni fan ko chugum rok ko bin ni nge pigpig ngak Jehovah.

Ngan Maruweliy e Lem ni Mmat’aw

13. Mang e lem nib kireb ni bay ko ulung nu Laodicea?

¹³ Reb e ulung nib kireb rogon ni ur lemniged e chugum e fare ulung nu Laodicea ni immoy ko bin som’on e chibog. I gaar Jesus ngorad: “Ya ke lungum u lanin’um, ‘Ke yoor ban’en rog ni ke fel’ rogog, ya urngin e tin ni nge yog ngog e ke yog ngog.’ Machane da mu nang gelngin e gafgow ni kam tay nge rogon yaam ni kari mu gafgow! Ya kam gafgow, ma dakuriy e mad u dakenam, ma kam malmit.” Gathi fan ko chugum ma ke gafgow e ulung nu Laodicea ya ke gafgow ko tirok Got. Bin riyul’ riy e yad ma pagan’rad ko chugum ko bin nge pagan’rad ngak Jehovah. Ma angin, e ka ra pired u mathilin e tirok Got nde gawel ma de garbeb, ma da ki n’uw nap’an ma ‘ngan thuwegrad nga but’ ngar chuwgad u lan l’ugun Jesus.’​—Revelation 3:14-17.

14. Mang fan ni bay rogon e piin Kristiano ni Hebrew ni nge n’ufrad Paul?

¹⁴ Maku reb, i yog Paul ngak e Kristiano nu Hebrew nib fel’ e ngongol rorad u nap’an ni kan gafgownagrad. Ni gaar: “Mu uned ko gafgow ni i tay e piin ni ka nin’rad nga kalbus, ma faan nni fek urngin e chugum romed u fithik’ e yargel mi gimed k’adan’med ko chugum romed ni  kan fek, ma gimed ba felfelan’ ngay, ya gimed manang ni ka ba’ ban’en romed ni kab fel’ ngay, ni bayi par ndabi m’ay biid.” (Hebrews 10:34) Pi Kristiano nem e de kireban’rad nbochan e chugum rorad ni ke mul u pa’rad. Ka be par ni yad ba felfelan’ nbochan e bay rorad e chugum ni th’abi ga’ fan “nib fel’ ma . . . dabi m’ay.” Bod rogon fare ta fol chuway’ ko fanathin rok Jesus ni pi’ urngin ban’en ni ba’ rok ni fan e be athamgil ni nge yog taareb e churuwo’ nu l’ugun e yar ngak, yad be athamgil ni nge dabi thay u pa’rad fare athap ko Gil’ilungun ni yugu demtrug gelngin e gafgow ni yad ra tay. (Matthew 13:45, 46) Uw feni fel’ e lem ni aray rogon!

15. Uw rogon ni m’oneg fare rugod nu Liberia e Gil’ilungun Got nge tin m’agan’ ngay?

¹⁵ Ngiyal’ n’ey e pire’ e girdi’ ni kar athamgilgad ni ngar rin’ed e ngongol nib fel’ ni aram rogon. Ni bod u Liberia, reb e rugod ni Kristiano e kan ognag ngak ni nge yan ko skul nga university. Re nam nem, e yima lemnag ni yira ognag ngak be’ ban’en ni aram rogon ma ra fel’ rogon e yafas rok nga m’on. Yugu aram rogon, ma re rugod nem e be un ko pioneer, ma ke taw e babyor ngak ni nge mang reb e special pioneer ni dabi n’uw nap’an. Ma ke mel’eg ni nge m’oneg Gil’ilungun Got nge par ni be pigpig ni polo’ e tayim rok. Me yan ko gin ni kan pi’ ngak ni nge maruwel riy me tabab i fil e Bible ngak 21 e girdi’ u lan dalip e pul. Re rugod ney nge bokum biyu’ e girdi’ ni bod ir e kar m’oneged Gil’ilungun, ni mus ni ra mul e chugum rorad u pa’rad. Uw rogon ni nge par laniyan’rad ni nge dabi m’on chogowen e chugum ko re fayleng ney riy? Kar maruweliyed ni nge yog ngorad e pi felngin nib fel’. Ngada weliyed boch e pi n’ey.

16, 17. (a) Faanra nge par nib pagan’dad ngak Jehovah ma mang fan ni sobut’an’ e baga’ fan? (b) Mang fan ni thingar ni maruweliy nge pagan’uy ko tin ni ke micheg Got?

¹⁶ Ga Manang e Tin ni Dabiyog Rom: Be gaar e Bible: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang. Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’. Dab mu lemnag ni gur e gab gonop.” (Proverbs 3:5-7) Yu ngiyal’, bay ban’en ni gowa fel’ u wan’ e girdi’. (Jeremiah 17:9) Machane, Kristiano nib yul’yul’ e be pagan’rad ngak Jehovah ni nge pow’iyrad. (Psalm 48:14) ‘Ko urngin e kanawo’ rok’​—maruwel u lan e ulung, nge skul ara tin nu fayleng e maruwel, ara fafel, nge yugu boch ban’en—​ma ma gay e fonow ni yib rok Jehovah u fithik’ e sobut’an’.​—Psalm 73:24.

¹⁷ Ngan pagan’uy ko tin ke micheg Jehovah: Ke gaar Paul: “Ya en nra yib ngak Got e thingari mich  u wan’ ni ba’ Got ma ra tow’athnag e piin ni yad be gayiy Got.” (Hebrews 11:6) Faanra be maruwaran’dad ni ra lebguy Jehovah e n’en ni ke micheg, ma ra puluw ni nguun ‘ngongliy e tin nu fayleng ban’en.’ (1 Korinth 7:31) Ma reb, e faanra ba gel e michan’ rodad ma gad ra dugliy ni ngad m’oneged Gil’ilungun Got nge tin m’agan’ ngay. Uw rogon me yog ni nge mon’og e michan’? Yira chuchugur ngak Jehovah ni gubin ngiyal’ u fithik’ e meybil, nge fol Bible ni goo gur. (Psalm 1:1-3; Filippi 4:6, 7; James 4:8) Rayog ni ngad meybilgad ni bod David ni Pilung, ni gaar: “I gur e gu ma pagan’ug ngom, O Jehovah. ‘Yi gur e Got rog.’ Uw feni yoor e tin nib fel’ ni bay rom!”​—Psalm 31:14, 19, NW.

18, 19. (a) Uw rogon ni ma gel e pagan’ rodad ngak Jehovah nbochan e maruwel nib gel? (b) Mang fan ni ke m’agan’ e Kristiano ngay ni ngar paged farad?

¹⁸ Ngan pasig i pigpig ngak Jehovah: Ke puthuy Paul e pagan’ ngak Jehovah nge tin ni ke micheg nge maruwel nib gel u nap’an ni yol ni gaar: “N’en ni kug m’ad ni bochan e mang e yigi bigimed me par ni be athamgil nge yan i taw ko tomur, nge yog ni yib i m’ug nib riyul’ e pi n’en ni ir e be l’agan’med ngay.” (Hebrews 6:11) Faanra ngada pasiggad ko pigpig ngak Jehovah, ma ra ayuwegdad. Gubin ngiyal’ ni gamad ra pirieg e re ayuw nem, ma ri ma gel e pagan’ romad mu gu pired “ni gamad mmudugil.” (1 Korinth 15:58) Ma michan’ romad e ke beech bayay, ma ka ri mudugil e athap romad.​—Efesus 3:16-19.

¹⁹ Ngan pagfay ni ke m’agan’uy ngay: Paul e ke pag fan e maruwel rok nu fayleng nbochan e ngi i fol rok Jesus. Rib tamilang ni ke mel’eg e bin mmat’aw ni yugu aram rogon ni be gafgow u boch ban’en. (1 Korinth 4:11-13) De micheg Jehovah ni nge par e girdi’ nib yoor e chugum rorad, yu ngiyal’ ma pi tapigpig rok e ma athamgil u fithik’ e gafgow. Ma nge m’ag u wan’dad ni nge lich e tin ni bay rodad ma gad pag fadad e be micheg ni ri gad baadag ni nguuda pigpiggad ngak Jehovah.​—1 Timothy 6:6-8.

20. Mang fan ni ba t’uf e gum’an’ ko piin ni kar m’oneged Gil’ilungun Got nge tin ke m’agan’ ngay?

²⁰ Gum’an’: James ni gachalpen e i ta’ ir ngak e pi Kristiano ni gaar: “Mpired ni gimed ba gum’an’ nge mada’ ko ngiyal’ ni bayi sul Somol riy.” (James 5:7) Re fayleng ney ni ke wagey ma boor pa’ riy, e ke mo’maw’ ni ngan par nib gum’an’. Gadad baadag ni ngan rin’ ban’en ni papey nge chuw. Machane be ta’ Paul ir ngodad ni ngad folwokgad rok e piin ke “mich Kristus u wan’rad ma ba gum’an’rad, ma aram fan ni ke yog ngorad e tin ni yog Got nra pi’.” (Hebrews 6:12) Nge fel’ u wan’uy ni nguun sonnag Jehovah. Yafas ni manemus u paradis u fayleng​—e riyul’ ni gad be sonnag!

21. (a) Mang fan ni ngad daged ni nge m’on Gil’ilungun Got nge tin m’agan’ ngay? (b) Mang e gad ra weliy ko bin migid e article?

²¹ Arrogon, fonow rok Jesus ni ngan gay Gil’ilungun Got ni som’on e baga’ fan. Nap’an ni gad ra rin’ ni aram rogon, ma gad be dag ni riyul’ ni ke pagan’dad ngak Jehovah ma kad mel’eged e bin th’abi fel’ i kanawoen e Kristiano. Machane, ku be fonownagdad Jesus ni nguuda pared ni ngada “m’oneged . . . [Got] nge tin nib m’agan’ ngay.” Bin migid e article, e gad ra guy ko mang fan nrib t’uf e re thin nem ni be pi’ e athamgil ngodad ko ngiyal’ ney.

Rayog ni Ngam Weliy?

• Mang e lem nib thabthabel, ni pi’ Jesus e athamgil nga laniyan’dad riy u murung’agen e chugum?

• Mang e kad filed ko fanathin rok Jesus u murung’agen fare kamel ni nge yan u mugufan ba rosom?

• Mang boch felngin e Kristiano nra ayuwegdad ngad m’oneged e Gagiyeg rok Got?

[Study Questions]

[Picture on page 19]

Boor e girdi’ nib gafgow ni kar rung’aged e thin rok Jesus

[Picture on page 21]

Be’ nib moon ni pire’ ban’en rok e kab t’uf e chugum rok u wan’ ko bin nge t’uf Got rok

[Picture on page 21]

Fare ta fol chuway’ ko fanathin rok Jesus e ke pi’ urngin ban’en ni bay rok nbochan e nge yog taareb e churuwo’ nu l’ugun e yar ngak

[Picture on page 22]

Faan gad ra pasig ko pigpig ngak Jehovah, ma ra i ayuwegdad