Ga Baadag ni Nge Yog Boch e Fager nib Manigil Ngom?

BOOR e girdi’ ni yad baadag ni nge yog e fager nib fel’ ngorad. Ma yib e felfelan’ nga lan e yafas rodad ni faanra bay be’ nib chugur ngodad ni ngad weliyed e tin ma buch rodad ngak. Machane uw rogon ni rayog ni ngan pirieg e tin riyul’ e fager? Sa gonap’an 2,000 e duw ni ke yan, me dag Jesus ni n’en nth’abi ga’ fan ko tha’ ni bay u thilin e girdi’ e aram e t’ufeg ni dariy e siin riy. I fil ni gaar: “Mu rin’ed ngak boch e girdi’ e tin ni ir e gimed ba adag ni ngar rin’ed ngomed.” (Luke 6:31) Re thin ney, ni baga’ ni yima yog ni Golden Rule ara Motochiyel nib Fel, e be dag ni thingar da manged e girdi’ ni de siin mab gol ni faanra nge yog e fager ngodad. Faanra nge yog e fager ngom ma thingar kum mang reb e fager. Uw rogon?

Tafager nib manigil mab chugur e tha’ u thilin e dabiyog ni ngan maruweliy nib tomgin. Tin riyul’ riy e, pi tafager e kab thil ko girdi’ ni kemus ni gad manang. Ireray e girdi’ ni gab chugur ngorad ma ga ma yog lanin’um ngorad. Ba t’uf ni ngan athamgil ni faanra ngan maruweliy min ayuweg ni nge par nib fel’ e tha’ u thiliy. U lan e tafager ma ba t’uf ni ngad ted e tin nib t’uf ko ani tafager rodad nib m’on ko tin nib t’uf rodad. Pi tafager e gathi kemus ni yad ma felfelan’ u taabang machane ku arrogon ni yad ma kireban’ u taabang.

Gad ma dag ni gadad e pi tafager nib fel’ ni faanra gad ma pi’ e athamgil nga laniyan’ ara gad ma pi’ e tin nib t’uf ngak e pi cha’ ni ba t’uf ban’en rorad. U Proverbs 17:17 (NW) e be yog ni gaar: “Ba fager nriyul’ e ma dag e t’ufeg ni gubin ngiyal’, ma ir reb e walag ni bay ko ngiyal’ ni keb e gafgow.” Tin riyul’ riy, ma tha’ u thilin e pi tafager e rayog ni nge gel ko tha’ ni bay u thilin e girdi’ u lan e tabinaw. U Proverbs 18:24 (NW) e be gaar: “Bay e fager ni rayog ni nge wereg e girdi’ ngar yurba’gad, machane bay e fager nib chugur nib gel ko walag.” Ga ba adag ni ngkum nang boch rogon ni rayog ni ngam maruweliy nge yog ngom e tafager nib manigil? Ga ba adag ni ngam mang reb i gothon ba ulung i girdi’ ni ri yi manangrad ni bochan e t’ufeg ni bay u fithik’rad? (John 13:35) Faanra arrogon, ma Pi Mich Rok Jehovah e ri yad ba felfelan’ ngay ni ngar daged ngom rogon ni rayog ni ngam pirieg e tin nriyul’ e fager u lan e binaw rom.