Fare Mat’awun ni Nge Yog e Ngochol Ngak Be’

URNGIN e girdi’ ma bay mat’awun ni nge yog ngak reb e ngochol. U Tahiti, e ki mus ko bitir ni kefin ni gargeleg ma kan n’ag ndan nang e chitamangin nge chitiningin ma yima pi’ fithingan. Fare ofis ni ma tay fithingey nga babyor e ra tunguy fithingan ni bin som’on nge bin tomur e ngochol rok fare tir ni kan n’ag.

Machane, bay be’ nrayog ni nga nog ni kan fek mat’awun, ni aram ba mat’awun ni kan pi’ ngak yooren e girdi’. Yira gin ngay, ya ir fare “Chitamangiy ni bin riyul’ i fithingan urngin e tabinaw nu tharmiy ngu but’ e ir e yib rok.” (Efesus 3:14, 15) Ga ma guy, ni boor e girdi’ ni darur fanayed e ngochol rok e en Tasunmiy nrogon ni ba’ u Bible. Yad ma thilyeg e re n’ey ko pi liw ni “Got,” nge “fare Somol,” ara “Ani Manemus.” Ere, mang e ngochol rok? Fare psalmist e ke fulweg e re deer nem ni gaar: “Nge nangem e girdi’ ni fithingam e Jehovah ni gur e Th’abi Tolang u ga’ngin yang e fayleng.”​—Psalms 83:18, NW.

U nap’an ni kefin ni tabab e bin 19 e chibog ko ngiyal’ ni fapi missionaries ko fare London Missionary Society e kar tawgad nga Tahiti, ma piyu Polynesia e yad be liyor ngak boor e got. Ra bagayad ma bay e ngochol rok, ma gali got nth’abi ga’ e Oro nge Taaroa. Ma rogon ni ngan keeg fare Got nu Bible nge yugu boch e got, ma pi missionay nem e de maruwaran’rad ni ngar fanayed e ngochol rok Got, ni kan thilyeg ni Iehova ni thin nu Tahiti.

Ke yoor i yoor e girdi’ ni kar nanged e re ngochol nem ma yima fanay ko sabethin nge babyor ni yibe yoloy ni gubin e rran. Pomare ni bin II ni pilung nu Tahiti, ni ir e ke gagiyeg u nap’an ni kafin ni tabab e bin 19 e chibog, e ma fanay e re ngochol ney ko pi babyor ni ma fal’eg. Bay e mich riy ko pi babyor rok ni kan fal’eg kan yoornag. Kan yoloy ko thin nu Meriken, min tay nga lan fare Museum of Tahiti and Its Islands. Re babyor n’ey e be micheg ni ri adag e girdi’ ni ngar fanayed e re ngochol ney ko ngiyal’ nem. Maku, ngochol rok Got e ke m’ug ni bokum biyu’ yay ko bin som’on e Bible ni kan yoloy ko thin nu Tahiti, ni kan mu’nag ko duw ni 1835.

[Picture on page 32]

Pomare ni Pilung ni bin II

[Picture Credit Line on page 32]

Pilung nge babyor: Collection du Musée de Tahiti et de ses Îles, Punaauia, Tahiti