Mu Palog Ko Pi Teliw Ni Yugu Ban’en!

“Yog Somol ni gaar: Thingar mu chuwgad rorad, ngam pithiged gimed rorad. Ma dariy ban’en ni ngkum rin’ed ko n’en nde klin.”​—2 KORINTH 6:17.

1. Mang e n’en ni rib t’uf rok boch e girdi’ nib yul’yul’ ni ngar nanged?

 BOOR e girdi’ nib yul’yul’ nde nang e tin riyul’ u murung’agen Got nge pi n’en ni bay ko gabul nge langlath ni fan ko girdi’ nu fayleng. Ma bochan ni dar nanged e fulweg ko pi deer rorad u murung’agen Got nge n’en ni bay nga m’on rorad, ma ke maruwaran’rad ma ke wagey e yafos rorad. Yugu ma fol bokum milyon e girdi’ ko machib ni yugu ban’en, nge ngongol ko pi yurba’ i teliw rorad, nge pi madenom rorad ni de fel’ u wan’ e En ni Sunmiydad. Dabi siy ni bay e girdi’ rom ara girdi’ ko binaw rom nib mich u wun’rad ni bay e nifiy u infierno, ara Got e ir e Trinitas, ara bay e yaal rok e girdi’ ni dabiyog ni nge yim’, ara yugu boch e machib ni yugu ban’en.

2. Mang e be rin’ e pi tamachib ko pi yurba’ i teliw, ma mang wenegan?

² Mang fan ni boor e girdi’ nde nang e tin riyul’ u murung’agen Got? Dar nanged ni bochan e pi yurba’ i teliw​—ara pi yurba’ i teliw nge pi tamachib rorad ni kar machibnaged e tin nib togopluw ko thin rok Got. (Mark 7:7, 8) Bochan e machib rorad, ma boor e girdi’ ni kan bannagrad yad be lemnag ni yad be meybil ngak e bin riyul’ e Got, machane bin riyul’ riy e yad be togopluw ngak. Aray rogon e gafgow ni be tay e girdi’ ni bochan e pi yurba’ i teliw ni yugu ban’en.

3. Mini’ e baga’ ni ma mon’ognag e yurba’ i teliw ni yugu ban’en, ma uw rogon ni ma weliy e Bible murung’agen?

³ Bay be’ ni dabiyog ni ngan guy nga owchey ni be ayuweg e pi yurba’ i teliw ni yugu ban’en. I weliy apostal Paul murung’agen e cha’nem ni gaar: “Der mich u wun’rad ni bochan e fare kan nib kireb nu roy u fayleng e ke ta’ lanin’rad u fithik’ e lumor. Ya ke ta’rad ndab ra guyed ramaen fare tamilang ni be mat nga dakenrad, ni fare tamilang ni be yib ko Thin Nib Fel’ ni yib rok Got ni murung’agen e flaab rok Kristus, ni Kristus ni ir e ri taareb rogorow Got.” (2 Korinth 4:4) “Fare kan nib kireb nu roy u fayleng” e ir e got ko re m’ag nib kireb ney ni ir Satan ni Moonyan’. Ir e baga’ ni ma mon’ognag e pi yurba’ i teliw ni yugu ban’en. I yoloy apostal Paul ni gaar: “Ere dab ni gin ngay! Ya ku rayog rok moonyan’ ni nge piliyeg ir nge bod yaan ba engel ko tamilang! Ere gathi ban’en ni ngan gin ngay ni faanra piliyeg e pi tapigpig rok moonyan’ yad ngar boded yaan e pi tapigpig ko tin nib mat’aw.” (2 Korinth 11:14, 15) Ma k’aring Satan ni nge m’ug ni gowa ba fel’ e tin nib kireb ma ma bannag e girdi’ ni nge mich e pi ban rok u wun’rad.

4. Mang e ke yog e Motochiyel Rok Got ni fan ngak piyu Israel kakrom u murung’agen e pi profet nde riyul’?

⁴ Aram fan ni rib gel e thin u lan e Bible ni be yog nib kireb e rok e pi yurba’ i teliw ni yugu ban’en! Be yog e Motochiyel rok Moses ni nge ayuw e girdi’ rok Got rok e pi profet ni de riyul’. Ma “ngan thang e fan” rok be’ ni ma machibnag e tin nde riyul’ ara be yog ni ngan liyor ngak e pi got ni de riyul’ ya “be yog ni ngan togopluw ngak Somol.” Ka nog ngak piyu Israel ni ngar “chuweged e kireb ni bay u fithik’rad.” (Deuteronomy 13:1-5) Arrogon, ba kireb e pi yurba’ i teliw ni yugu ban’en u wan’ Jehovah.​—Ezekiel 13:3.

5. Mang thin e thingar da folgad riy e ngiyal’ ney?

⁵ Ku arrogon u wan’ Jesus Kristus nge pi apostal ni ri dubrad e pi yurba’ i teliw ni yugu ban’en. I gaar Jesus ngak pi gachalpen: “Mu ayuwgad ko profet nde riyul’; ya bay ra bad ngomed ni yad bod e saf u wuru’ i dowrad, machane u  fithik’ i lanin’rad e ri yad bod e wolf ni ma k’ad.” (Matthew 7:15; Mark 13:22, 23) I yoloy Paul ni “Dumumuw rok Got e ke m’ug ni be yib u tharmiy i yib nga daken urngin e denen nge kireb ni be ngongliy e girdi’, ni piin ni ngongol rorad nib kireb e be ning e kanawo’ ko tin riyul’ ni nge dab nnang.” (Roma 1:18) Ere thingari fol e tin riyul’ e Kristiano ko pi thin ney ma ngar paloggad rok e piin ni yad ma mithag e machib nriyul’ ko Thin Rok Got ara ma wereg e machib ni de riyul’!​—1 John 4:1.

Mu Chuw ko “Babylon nib Gilbuguwan”

6. Uw rogon ni kan weliy murung’agen “Babylon nib Gilbuguwan” u lan e Bible?

⁶ Amu lemnag rogon ni ma weliy e Revelation u lan e Bible murung’agen e pi yurba’ i teliw ni yugu ban’en. Pi yurba’ i teliw e gowa be’ ni ppin nib ching ni ma chuway’ ngak ni ir e ma gagiyegnag e pi nam nge girdi’ riy. Re pin ney nib fanathin e ma un ko ngongol ndarngal ngak e pi pilung ma ke ching nga rachaen e tin riyul’ e girdi’ rok Got. (Revelation 17:1, 2, 6, 18) Bay ba ngochol ni kan yoloy nga peri’ nib puluw ko ngongol rok nde yalen. Re ngochol nem e “Fare Babylon nib Gilbuguwan, ni ir e chitiningin urngin e ppin ni yad ma chuway’ ngorad nge urngin e kireb nu fayleng.”​—Revelation 17:5.

7, 8. Uw rogon ni ma chuway’ e pi yurba’ i teliw ngorad, ma mang wenegan?

⁷ Rogon ni weliy e Bible murung’agen Babylon nib Gilbuguwan e rib puluw ngak e pi yurba’ i teliw ni yugu ban’en. Yugu aram rogon ni de taab ulung e pi yurba’ i teliw ni bokum biyu’ machane taareb lanin’rad nge ngongol rorad. Bay gelngin e pi yurba’ i teliw ni ngar gagiyegniged e pi am ni bod fare pin ni de yalen u lan e Revelation. Pi yurba’ i teliw ni yugu ban’en e bod be’ ni ppin ni de yul’yul’ ngak e pumoon rok ya pi yurba’ i teliw ni kar pied yad nchuway’ e kar ngongliyed e tha’ ngak e pi am. I yol James ni gaar: “Gimed e piin nda myul’yul’gad ngak Got! Da mu nanged ni faanra mfagergad ko fayleng ma aram e kam manged toogor rok Got? Cha’ nra finey ni nge mang fager rok e fayleng e aram e ke tay ir ni ir e toogor rok Got.”​—James 4:4.

⁸ Be gafgow e girdi’ ni bochan e kan athukuy e ngongol ko pi yurba’ i teliw ni yugu ban’en nge ngongol ko pi am. I yog be’ ni ma fil murung’agen e am u Africa ni Dr. Xolela Mangcu fithingan ni “ke sug e chep ko girdi’ u murung’agen e girdi’ ni boor ni kan thang e fan rorad ni bochan e kan chagiy e teliw nge am.” I yog reb e shimbung ni gaar: “Tin th’abi ga’ e mahl ni ba gel e riya’ riy e ngiyal’ ney . . . e bay rogon ko pi yurba’ i teliw.” Kan thang e fan rok bokum milyon e girdi’ ni bochan e mahl ni ke un e pi yurba’ i teliw ngay. Ma gafgownag Babylon nib Gilbuguwan e pi tapigpig rok Got me thang e fan rorad ni gowa ke ching nga racha’rad.​—Revelation 18:24.

9. Uw rogon ni be m’ug u Revelation ni kari fanenikay Jehovah e pi yurba’ i teliw ni yugu ban’en?

⁹ Ri ma dabuy Jehovah e pi yurba’ i teliw ni yugu ban’en ma ke m’ug riy ko n’en ni ra buch rok fare Babylon nib Gilbuguwan. Be gaar Revelation 17:16: “Ma fa ragag i  gagey ni kam guy nge fare gamanman e bay ra fanenikayed fare pin ni ma chuway’ ngak; bay ra feked urngin ban’en rok mi yad pag ndakuriy e mad u daken; ma bay ra longuyed e ufin u downgin mi yad li’ ko nifiy ngem’.” Som’on ma fare gamanman e ra li’ fare ppin nge yim’ me longuy e ufin u downgin. Ma tin ni ra aw ko fare pin e yira urfeg. Re n’en ney e be yip’ fan ni dabki n’uw nap’an ma ra togopluw e pi am nu fayleng ko pi yurba’ i teliw ni yugu ban’en. Got e ra k’aringrad ni ngar rin’ed. (Revelation 17:17) Ri ra math owchen e Babylon nib Gilbuguwan ni ir e be yip’ fan e pi yurba’ i teliw ni yugu ban’en. “Ma aram e dab ku ni guy bayay.”​—Revelation 18:21.

10. Susun e nge uw rogon e pi yurba’ i teliw ni yugu ban’en u wan’dad?

¹⁰ Susun uw rogon e Babylon nib Gilbuguwan u wan’ e piin ni ma liyor ngak Got nrogon? Dariy e maruwar ko thin ko Bible ni ke tay chilen ni gaar: “Mired ngam chuwgad rok! Ya thingar dab mu uned ko denen ni be ngongliy, ya thingar dab mu uned ko gechig ni bay nta’ ngak!” (Revelation 18:4) Piin ni yad ba adag ni ngar pared ni yad ba fos e thingar ra chuwgad ko pi yurba’ i teliw ni yugu ban’en e chiney ni ka bay ngal’an ni ngan chuw riy. Nap’an ni immoy Jesus Kristus u fayleng e i yog ni bay i taw ko tin tomren e rran ma boor e girdi’ e yad ra yog ni yad ma fol rok. (Matthew 24:3-5) I non Jesus ngak e pi girdi’ nem ni gaar: “Ri da gu nangmed. Mu chuwgad rog, gimed e piin ni gimed ma rin’ e kireb!” (Matthew 7:23) Ke Pilung Jesus Kristus e chiney ma kari pi’ keru’ ngak e pi yurba’ i teliw ni yugu ban’en.

Ngad Chuwgad Rok​—Uw Rogon?

11. Mang e thingar da rin’ed ni fan e ngada chuwgad ko machib ni yugu ban’en?

¹¹ Ma chuw e tin riyul’ e Kristiano ko meybil rok e pi yurba’ i teliw ni yugu ban’en nge machib rorad. Fan e re thin ney e ngada pilo’gad ko machib ni yima tay u radio ara television ara pi babyor ko pi yurba’ i teliw ni ma wereg e machib nde riyul’ u murung’agen Got nge Thin Rok. (Psalms 119:37) Ma piin nib gonop e ra palog ko pi muulung ara fafel ni ma tay e pi yurba’ i teliw ara pi ulung rorad. Maku dab da ayuweged e teliw rorad u yugu boch e kanawo’. (1 Korinth 10:21) Faan gad ra palog ko pi n’en ney ma ra ayuwegdad ni nge dabi “koldad be’ ngad manged kalbus rok ni be’ ni be maruwel ko gonop rok e girdi’ nge sabanban ndariy rogon nga bayang, ni yib ko machib ni sum rok e girdi’ ni yibe fil ngak reb e mfen nge reb, ma ki yib ko pi kan ni yad be gagiyeg u lan e gin’en ni ba’ urngin ban’en nu lan e lang riy nib muun e fayleng ngay, ma gathi Kristus e yib rok.”​—Kolose 2:8.

12. Ra diin ma ke dag be’ ni dakir un ko pi yurba’ i teliw nem ni yugu ban’en?

¹² Ma uw rogon ni faanra ba adag be’ ni nge mang reb e Mich Rok Jehovah machane ir girdien barba’ e teliw? Ra yoloy reb e babyor ni  be yog ni ba adag ni nge chuw ko re raba’ i teliw nem ya nge mang mich riy ni dakir un ko pi yurba’ i teliw ni yugu ban’en. Ri ba ga’ fan ni nge rin’ ban’en ni fan e nge dabki alit ni bochan e machib ni yugu ban’en. Ma ngongol rok be’ ni ba adag ni nge mang reb e Mich Rok Jehovah e ra tamilangnag ngak e pi yurba’ i teliw nge yugu boch e girdi’ ni gathi ka ir girdien e re raba’ i teliw nem.

13. Mang e fonow nu Bible ni be yog ni thingar da chuwgad ko pi yurba’ i teliw ni yugu ban’en?

¹³ Be gaar apostal Paul: “Dab mu guyed rogon ni ngam pachgad ngak e piin nde mich Got u wun’rad nguum maruwelgad u taabang nib taareb lanin’med, ya dabiyog. Ra diin me taareban’ e tin nib mat’aw nge tin nib kireb? Ra diin me par e tamilang nge talumor u taabang? Ra diin me taareban’ Kristus nge moonyan’? Be mang e re n’en nib taareb rogon rok e en ni ke michan’ ngak Kristus nge en nde michan’ ngak? Ra diin me taareban’ e tempel rok Got ko pi liyos ni ma meybil e piin ndar nanged Got ngay? . . . ‘Thingar mu chuwgad rorad, ngam pithiged gimed rorad. Ma dariy ban’en ni ngkum rin’ed ko n’en nde klin, ma aram e gimed ra yib ngog.’” (2 Korinth 6:14-17) Gad ra fol ko pi thin nem ni faan gad ra chuw ko machib ni yugu ban’en. Fonow rok Paul e be yip’ fan ni ngada paloggad rok e piin ni ma un ko pi yurba’ i teliw ni yugu ban’en, fa?

“Um Ngongolgad u Fithik’ e Gonop”

14. Thingar da paloggad rok e piin ni darur liyorgad ngak Got nrogon, fa? Mu weliy.

¹⁴ Thingari palog e piin riyul’ ni ma liyor ngak Got rok e piin ni ma un ko meybil ni yugu ban’en, fa? Thingar dab da uned ngak e piin ni de michan’rad ni bod gadad, fa? Fulweg ko gali deer ney e danga’. Bin l’agruw ko fagali motochiyel ni th’abi ga’ e be gaar: “Thingari t’uf rom e en ni ir e mmigid ngom ni gowe gur.” (Matthew 22:39) Gad ma dag ni ba t’uf e girdi’ rodad u nap’an ni gad ma weliy fare thin nib fel’ u murung’agen Gil’ilungun Got ngorad. Ma m’ug e t’ufeg rodad u nap’an ni gad ma fil e Bible ngorad ma gad ma tamilangnag ngorad ni thingar ra paloggad ko meybil ni yugu ban’en.

15. Mang fan fare bugithin ni “gathi ka gadad girdien e fayleng”?

¹⁵ Yugu aram rogon ni gad ma machibnag fare thin nib fel’ ngak e girdi’, ni gadad pi gachalpen Jesus ma “gathi ka gadad e girdi’ nu fayleng.” (John 15:19) Fare bugithin ni “fayleng” ni kan fanay ko re thin ney e be yip’ fan e girdi’ ni gathi yad e girdi’ rok Got. (Efesus 4:17-19; 1 John 5:19) Gathi gad girdien e fayleng ya gad ma palog ko lem nge welthin nge ngongol ni dubun Jehovah. (1 John 2:15-17) Ma dab da chaggad ngak e piin ni darur folgad ko pi motochiyel rok e pi Kristiano ya gad ma fol ko fare machib ni faanra “ngan chag ngak e girdi’ nib kireb me kireb pangiy nib fel’.” (1 Korinth 15:33) En ni gathi girdien e fayleng e ra par ni ‘nge dabi kirebnag e kireb nu fayleng.’ (James 1:27) Ere, ngada pared ni gathi gadad girdien e fayleng e gathi be yip’ fan ni ngada paloggad rok e girdi’.​—John 17:15, 16; 1 Korinth 5:9, 10.

16, 17. Susun uw rogon e ngongol rok e pi Kristiano ngak e piin ni dar nanged e machib nu Bible?

¹⁶ Ere uw rogon e ngongol rodad ngak e piin ni dar nanged e machib nu Bible? I yol Paul ngak e ulung nu Kolose ni gaar: “Um gonopiyed rogon pangimed ngak e piin ndawori mich Jesus Kristus u wun’rad, ma gubin ngiyal’ nra bung rogomed ni ngam weliyed e thin rok Got ngorad mi gimed weliy. Ma gubin ngiyal’ nthingar umogned e thin ngorad nib fel’ ma ba’ fan, ma thingar mu nanged rogon ni ngam pied e fulweg nib mat’aw ko tin ni ke fith be’ nge be’ ngomed.” (Kolose 4:5, 6) I yol apostal Peter ni gaar: “Machane ngam liyorgad ngak Kristus u lanin’med, mi gimed tay ni ir e Somol romed. Mu fal’eged rogomed ni gubin ngiyal’ ni ngam pied  e fulweg ko n’en nra fith be’ ngomed ni ngam weliyed u murung’agen e re n’en ni ir e ke l’agan’med ngay.” (1 Peter 3:15) I fonownag Paul e pi Kristiano ni nge “dab ra t’ared e thin nga daken be’, machane ngar pired nib fel’ thilrad e girdi’ ma ba fel’ owcherad nge thin rorad ngak e girdi’, ma gubin ngiyal’ ni ngar sumunguygad ngak urngin e girdi’.”​—Titus 3:2.

¹⁷ Gad e Pi Mich Rok Jehovah e gad ma ayuw ni nge dabi gel e thin rodad ngak e girdi’ ara nge tolangan’dad ngorad. Ku dab da t’ared e thin nga daken girdien e pi yurba’ i teliw. Danga’, ya ra sumunguy e thin rodad ni yugu aram rogon ni ra kireb e thin rok e girdi’, ni girdi’ ko binaw rodad ara girdi’ u tabon e maruwel.​—Kolose 4:6; 2 Timothy 2:24.

“Um Par u Fithik’ e Thin Riyul’”

18. Uw fene gafgow e piin ni kar sulod ko machib ni yugu ban’en?

¹⁸ Ra gafgow be’ ni faanra sul ko machib ni yugu ban’en u tomren ni ke fil e machib nu Bible! I weliy e Bible wenegan e re kanawo’ nem ni gaar: “Ya faanra chuw e girdi’ u fithik’ e tin nib kireb e ngongol u roy u fayleng ni ir e ma kirebnagey ni bochan e kar nanged e Somol rodad i Jesus Kristus ni ir e ma thapegdad ngak Got, mi ki kolrad e kireb bayay nge gel ngorad, ma aram e pi’ girdi’ nem e yad ra par ni ke gel boch e kireb rorad ko som’on. . . . Ya n’en ni kar rin’ed e ke m’ug riy ni fare bugithin ni yima yog e ba riyul’ ni faani ke lunguy, ‘Pilis e ma sul ko n’en ni ke sul u l’ugun nga but’,’ ma ‘Ba babiy ni kan luknag downgin ke beech e ma sul nge yan i pig u fithik’ e bar.’”​—2 Peter 2:20-22.

19. Mang fan ni thingar da tedan’dad ko pi n’en nrayog ni nge kirebnag e michan’ rodad?

¹⁹ Thingar da tedan’dad ko pi n’en nrayog ni nge kirebnag e michan’ rodad. Ma ba riyul’ ni boor e riya’ ni bay! I ginangdad apostal Paul ni gaar: “Ke yog fare Kan ni Thothup nib tamilang ni boch e girdi’ e bay ra n’iged e michan’ rorad ngak Kristus ko tin tomren e rran; mi yad fol ko pi kan ni yad ma lifith l’ugunrad, ni aram e kar folgad ko machib rok e pi moonyan’.” (1 Timothy 4:1) Gad be par ko “tin tomren e rran.” Ma piin ni dar paloggad ko machib ni yugu ban’en e rayog ni nge “fekrad e n’ew i yan, ma be fekrad e nifeng i yan ni gubin yay nra n’ag e nifeng gil’, ni aram e machib rok e girdi’ ni yad be bannag e girdi’, ni piin ni yad be pow’iy boch e girdi’ ko tin ni gathi ir ko ban ni kar ngongliyed rogon.”​—Efesus 4:13, 14.

20. Mang e thingar da rin’ed ya ngada ayuwgad u gelngin e pi yurba’ i teliw ni yugu ban’en?

²⁰ Uw rogon nrayog ni ngada ayuweged gadad u gelngin e pi yurba’ i teliw ni yugu ban’en ni rayog ni nge kirebnagdad? Amu lemnag urngin ban’en ni ke pi’ Jehovah ni nge ayuwegdad. Bay rodad e Thin Rok Got ni Bible. (2 Timothy 3:16, 17) Miki pi’ Jehovah e ggan ni machib ni boor u daken “fare tapigpig nib yul’yul’ mab gonop.” (Matthew 24:45) Ma nap’an ni gad ra mon’og ko machib nriyul’ ma susun e ngada adaged e “ggan nib el ni piilal e ngar ked” ma ngada adaged ni ngada uned ko pi muulung ni aram e gini gad ra fil e machib riy. (Hebrews 5:13, 14; Psalms 26:8) Ngada turguyed u wan’dad ni ngada fanayed urngin e ayuw ni ma pi’ Jehovah ni fan e “nguuda pared u fithik’ e michan’.” (2 Timothy 1:13) Ya aram rogon ni nguuda paloggad ko machib ni yugu ban’en.

Mang e Kam Fil?

• Mang e “Babylon nib Gilbuguwan”?

• Mang e thingar da rin’ed ya ngad chuwgad ko pi yurba’ i teliw ni yugu ban’en?

• Mang boch ban’en nrayog ni nge kirebnag e michan’ rodad ni ngada pilo’gad riy?

[Study Questions]

[Picture on page 4]

Ga manang ko mang fan ni “Babylon nib Gilbuguwan” e be yip’ fan be’ ni ppin ni ma chuway’ ngak?

[Picture on page 5]

Kan dugliy “Babylon nib Gilbuguwan” ni ngan gothey

[Picture on page 7]

Gad ra “sumunguy ma gad ra tay fan” e piin ni dar nanged e machib nriyul’