Nge Yog Rom E Pi N’en Ni Fan Ko Taufe Ko Kristiano

“Mang ndab ntaufenigeg?”​—ACTS 8:36.

1, 2. Mang e rin’ Filip me yog ni nge non ngak faanem nu Ethiopia, ma mang e be dag ni ba adag faanem e machib?

 GONAP’AN reb ara l’agruw e duw nga tomren ni yim’ Jesus, me milekag be’ ni girdien e am ni be sor i yan ko yimuch ko kanawo’ ni be yan u Jerusalem nga Gaza. Be yan faanem u daken e karrow ni be giringiy e os ma gonap’an bbiyu’ e mayel e milekag ni ra tay. I yib e cha’ nem u Ethiopia nga Jerusalem ya nge meybil ngak Jehovah. Ma nap’an ni be sul ko nam rok, ma be beeg e Thin Rok Got​—ya ir be’ nib gel e michan’ rok. I guy Jehovah faanem nib yul’yul’ me l’og reb e engel ni nge gagiyegnag Filip ni nge machibnag faanem.​—Acts 8:26-28.

² Mom rok Filip ni nge non ngak faanem ni girdien e am nu Ethiopia ya be beeg e Bible ni ba ga’ laman, ya aram rogon yalen e pow babyor e ngiyal’ nem. Ere i rung’ag Filip ni be beeg faanem e babyor rok Isaiah. Reb e deer rok Filip e ke pug e tafinay rok fa cha’ nu Ethiopia, ya ke fith: “Mog, ga be nang fan e pi n’ir ni ga be beeg?” Ma aram e kar weliyew e thin ni bay ko Isaiah 53:7, 8. Ma aram me weliy Filip ngak faanem “fare Thin Nib Fel’ ni murung’agen Jesus.”​—Acts 8:29-35.

3, 4. (a) Mang fan ni taufenag Filip fa cha’ nu Ethiopia e chingiyal’ nem? (b) Mang boch e deer ni ngad lemnaged e chiney?

³ De n’uw nap’an me nang fa cha’ nu Ethiopia rogon ni ra lebguy Jesus e pi n’en nib m’agan’ Got ngay miki nang ni thingari mang reb i gachalpen Kristus nge un ko taufe. Faani guy bangi ran me fith ngak Filip ni gaar: “Mang ndab ntaufenigeg?” Ya yugu ba thil rarogon e cha’ nem. Ir be’ nib mich u wan’ ma ma liyor ngak Got ni ke un ko teliw rok piyu Jew. Ma sana ra n’uw boch nap’an mfini mab e kanawo’ ngak bayay ni nge un ko taufe. Ma bin ni ba ga’ fan riy e manang fan e pi n’en ni ba adag Got ni nge rin’, ma ba adag ni nge rin’ u polo’ i gum’irchaen. Me fol  Filip ko n’en ni ning faanem. Ma tomren ni ke taufe faanem nu Ethiopia “Me yan ko gin ni be sor ngay ni kari felfelan’.” Dabi siy ni i machibnag fare thin nib fel’ ngak girdien e nam rok ni rib pasig ngay.​—Acts 8:36-39.

⁴ Yugu aram rogon ni susun e dab ni gurgur ngay ni ngan un ko taufe ni dawor ni gonopiy, machane ke m’ug ko n’en ni rin’ faanem nu Ethiopia ni yu ngiyal’ ma ra un boch e girdi’ ko taufe ndawori n’uw nap’an nga tomren ni kar rung’aged e machib nriyul’ ko Thin Rok Got. a Er fan nib fel’ ni ngada weliyed e pi deer ni baaray: Mang e nge rin’ be’ u m’on ni nge un ko taufe? Bay rogon yangaren be’ me un ko taufe, fa? Mang boch e mon’og ko tirok Got ban’en ni thingari m’ug rok be’ u m’on ni ngan taufenag? Ma bin ni ba ga’ fan riy e mang fan ni ke tay Jehovah chilen ngak e pi tapigpig rok ni ngar uned ko taufe?

Ba M’ag ni Ba Ga’ Fan

5, 6. (a) Mang e rin’ e girdi’ rok Got kakrom nbochan e ke t’ufegrad Jehovah? (b) Mang tha’ e rayog u thildad Got u tomren ni kada uned ko taufe?

⁵ Tomren ni ke ayuweg Jehovah piyu Israel ni ngar chuwgad u Egypt, me m’agan’ ngay ni nge fakayrad ngar manged e “girdi’ rok ni ke mel’egrad” ma ra t’ufegrad nge matanagiyrad ma ngar manged “ba nam nib thothup.” Ma faanra nge yog e pi flaab nem ngorad, ma thingari rin’ e girdi’ ban’en ni bochan e ke t’ufegrad Got. Me rin’ piyu Israel e re n’em u nap’an ni fel’ u wun’rad ni ngar “rin’ed urngin e tin ni ke yog Somol” ma aram e kar uned ko fare m’ag ni ke micheg Got. (Exodus 19:4-9) U nap’an e bin som’on e chibog, me motochiyelnag Jesus ngak pi gachalpen ni ngar ayuweged e girdi’ ko urngin e nam ni ngar manged pi gachalpen, ma ngan taufenag e piin ni kar folgad ko pi machib rok. Faanra nge fel’ thilin be’ nge Got ma thingari mich Jesus Kristus u wan’ ma nge un ko taufe.​—Matthew 28:19, 20; Acts 2:38, 41.

⁶ Pi thin ko Bible ney e ma dag ni ma flaabnag Jehovah e piin ni ma micheg ngak ni ngar pigpiggad ngak mi yad fol ko pi n’en ni kar micheged. Thingari ognag be’ ni Kristiano ir ngak Got me un ko taufe. Ma aram e ra yib e flaab rok Jehovah ngak. Mmudugil u wan’dad ni ngada folgad ko pi motochiyel rok Got me mang ir e nge pow’iydad. (Psalms 48:14) Ma aram e gowa ra kol Jehovah pa’dad me pow’iydad u kanawo’ ni susun e nga darod riy.​—Psalms 73:23; Isaiah 30:21; 41:10, 13.

7. Mang fan ni ra be’ ma ir e nge turguy rok ni nge ognag ir ngak Got me un ko taufe?

⁷ N’en ni ra k’aringdad ni ngada ognaged gadad ngak Jehovah ma ngada uned ko taufe e aram e t’ufeg rodad ngak maku bochan e gad ba adag ni ngada pigpiggad ngak. Susun e dabi un be’ ko taufe ni bochan e yog be’ ngak ni kaygi n’uw nap’an ni ke fil e machib ma ke taw ko ngiyal’ ni nge un ko taufe ara nge un ko taufe ni bochan e ra un e pi tafager rok ko taufe. Rayog ni nge pi’ e gallabthir ara yugu boch e Kristiano e athamgil nga laniyan’ be’ ni nge lemnag ni nge ognag ir nge un ko taufe. I pi’ apostal Peter e athamgil nga laniyan’ e piin ni kar rung’aged e machib ko chirofen ni Pentekost ni ‘ngan taufenagrad.’ (Acts 2:38) Machane ra be’ ma ir e nge turguy rok ko nge ognag ir ngak Got fa, ma dariy be’ ni ra yog ngodad ni ngada uned ko taufe. Ra be’ ma ir e nge turguy rok ni nge rin’ e tin nib m’agan’ Got ngay.​—Psalm 40:8.

Pi N’en ni Ngan Rin’ u M’on ko Taufe

8, 9. (a) Mang fan ni de puluw ni ngan taufenag e piin ni bitir? (b) Susun uw rogon e michan’ rok e piin nib fel’ yangaren u m’on ni ngar uned ko taufe?

⁸ Rayog rok e piin ni bitir ni ngar turguyed rorad ni ngar ognaged yad ngak Got, fa? Dariy e thin u lan e Bible ni be yog yangaren be’ ni nge un ko taufe. Machane dabiyog rok e piin ni kab ran ara piin ni kab madway ni nge mich u wun’rad ara ngar turguyed ban’en ni bochan e michan’ rorad ara ngar ognaged yad ngak Got. (Acts 8:12) I weliy be’ ni Augustus Neandar fithingan ni ir be’ ni yoloy e chep rok e tin som’on e Kristiano u lan e babyor rok ni General History of the Christian Religion and Church (Gaangin e Chepin e Teliw ko Kristiano nge Galesiya)  ni gaar: “Som’on ma ke mus ni piin ni kar ilalgad e kar uned ko taufe, ya ke mus ni piin ni kar ilalgad e rayog ni ngar nanged ni bay rogon e taufe ko michan’.”

⁹ Bay boch e piin nib fel’ yangaren ni manang fan e machib u murung’agen Got nge tin nib m’agan’ ngay ma yad ba adag ni ngar folgad ko pi motochiyel rok Got. Ma yugu boch e piin nib fel’ yangaren e yad ra nang e pi n’en ney u nap’an ni kar ilalgad boch. Machane u m’on nra un reb e fel’ yangaren ko taufe ma thingari fel’ e tha’ u thilrow Jehovah, ma thingari nang e tin ni kenggin e machib nu Bible, ma thingari nang fan e pi n’en ni thingari rin’ ni bochan e ke ognag ir ngak Got, ni bod e pi n’en ni ku thingari rin’ e piin ni kar ilalgad.

10. Mang e thingari rin’ be’ u m’on ni nge ognag ir nge un ko taufe?

¹⁰ I yog Jesus ngak pi gachalpen ni ngar filed ngak e piin ni ka fin nra uned ko machib urngin e motochiyel rok. (Matthew 28:20) Ere som’on ma thingari tamilang e machib u wan’rad, ma re tamilangan’ nem e ra ayuwegrad ni nge mich Jehovah nge Thin Rok u wun’rad. (Roma 10:17; 1 Timothy 2:4; Hebrews 11:6) Ma nap’an ni ra rich e machib nu Bible nga gumir’chaen be’ ma ra k’aring ni nge kalngan’ ma nge thil e ngongol rok. (Acts 3:19) Ma aram e ra mon’og e michan’ rok faanem me adag ni nge ognag ir ngak Jehovah me un ko taufe nrogon ni tay Jesus chilen.

11. Mang fan ni thingar da uned i wereg e machib u m’on ni ngada uned ko taufe?

¹¹ Be’ ni be mon’og i yan ko taufe e thingari un i machibnag fare thin nib fel’ u murung’agen Gil’ilungun Got. Ya ereray fare maruwel nrib ga’ fan ni ke pi’ Jehovah ngak e girdi’ rok ni ngar rin’ed e chiney ko ngiyal’ ko tomur. (Matthew 24:14) Ere rayog ni nge felfelan’ e piin ni dawor ra uned ko taufe ni ngar weliyed e tin ni ke mich u wun’rad ngak yugu boch e girdi’. Ma aram e yad ra pasig ko machib u tomren ni kar uned ko taufe.​—Roma 10:9, 10, 14, 15.

Bay Ban’en ni Be Talegnem ni Dab Mu Un ko Taufe?

12. Mang boch ban’en ni ma taleg boch e girdi’ ma dab ra uned ko taufe?

¹² De un boch e girdi’ ko taufe ni bochan e dubrad ni ngar rin’ed e maruwel rok e piin ni kar uned ko taufe. Yad manang ni thingari thil e ngongol rorad ni faan yad ra fol ko pi motochiyel rok Jehovah. Ara ke magawon lanin’rad ni bochan e ra mo’maw’ ni ngar folgad ko tin ni ba adag Got ni ngar rin’ed u tomren ni kar uned ko taufe. Ma yugu boch e girdi’ e ma lemnag ni, “Sana ra reb e rran mu gu rin’ ban’en nib kireb min tharbogeg ko ulung.”

13. U nap’an Jesus ma mang boch ban’en ni ke taleg boch e girdi’ ni ngar manged pi gachalpen Jesus?

¹³ Nap’an ni immoy Jesus u fayleng ma immoy boch e girdi’ ni dar uned ngak Jesus ni bochan e yad be lek e tirorad ban’en ara bochan girdien e tabinaw rorad. I yog reb e tamachib ko motochiyel ni ra un ngak Jesus ni yugu de mutrug e gini ra yan ngay. Me yog Jesus ngak ni yu ngiyal’ ma dariy e gin nra mol riy nnep’. I pining Jesus yugu reb e pumoon ni nge un ngak, me fulweg faanem ni som’on e nge “k’eyag” e chitamangin. N’en ni be yip’ faanem fan e dabi un ngak Jesus ya ba adag ni nge par u tabinaw nge mada’ ko ngiyal’ ni nge yim’ e chitamangin me k’eyag. Ma en ni dalip ni pining Jesus ni nge un ngak e yog ni nge “fingichiy” e girdi’ rok mfini un ngak Jesus. I yog Jesus ni be’ ni ma chichigog ni aram rogon e be “changar nga keru’.” Ere be m’ug ko pi cha’ ney ni piin ni dubrad ni ngar rin’ed e pi maruwel ni ke mil fan ngak e pi Kristiano e yugu ra i yib e tawey rorad.​—Luke 9:57-62.

14. (a) Mang e rin’ Peter nge Andrew nge James, nge John u nap’an ni piningrad Jesus ni ngar uned ngak ngar yognaged e girdi’? (b) Mang fan ni dab da sagaalgad i fek e mat’ rok Jesus?

 ¹⁴ Machane rib thil e n’en ni rin’ Peter, nge Andrew, nge James, nge John. Nap’an ni piningrad Jesus ni ngar uned ngak ngar yognaged e girdi’, e yog e Bible ni gaar: “Ka chingiyal’ nem mi yow digey e nug rorow ngar unew ngak.” (Matthew 4:19-22) Bochan ni kar turguyed ni ka chingiyal’ nem ni ngar uned ngak Jesus, ma ke yog ngorad e n’en ni yog Jesus ngorad ni gaar: “Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.” (Matthew 11:29, 30) Yugu aram rogon ni bay e maruwel nib mil fan ngak be’ nra un ko taufe, ma ke micheg Jesus ngodad ni re maruwel nem ara re mat’ nem e mmunguy mab mom ma ra yib e toffan ngodad riy.

15. Uw rogon ni ke m’ug rok Moses nge Jeremiah ni rayog ni ngada pagedan’dad ngak Got ni nge ayuwegdad?

¹⁵ Dariy e kireb riy ni nge lemnag be’ ni de yog rok ni nge rin’ e maruwel ni ke mil fan ngak e en ni ra un ko taufe. Ya de lemnag Moses nge Jeremiah ni rayog rorow ni ngar rin’ew e maruwel ni ke pi’ Jehovah ngorow ni ngar rin’ew. (Exodus 3:11; Jeremiah 1:6) Mang e rin’ Got ya nge micheg ngorow ni ra ayuwegrow? I yog ngak Moses ni gaar: “Bay gu un ngom.” Miki micheg ngak Jeremiah ni gaar: “Bay ug un ngom nguug yoror rom.” (Exodus 3:12; Jeremiah 1:8) Ku arrogodad ni rayog ni nge pagan’dad ngay ni ra ayuwegdad Got. T’ufeg rodad nge pagan’ rodad ngak Got e ra ayuwegdad ni nge dabi maruwaran’dad ni ngada rin’ed e n’en ni kada ognaged ngak Got. Be gaar apostal John: “Ra ba t’uf Got nge girdi’ rok be’ ma der rus faanem; ya rogon ni nge t’uf Got nge girdi’ rok be’ e ra yan i aw nga rogon ma ra chuweg urngin e marus rok faanem.” (1 John 4:18) Bochi pagal e ra rus ni nge yan ni goo ir, machane ra pagan’ ni faanra be yan ni be kol pa’ e chitamangin. Ku arrogodad ni ke micheg Jehovah ngodad ni ra k’iyag e kanawo’ rodad ni faan gad ra pagan’dad ngak Jehovah u polo’ i gum’irchadad.​—Proverbs 3:5, 6.

Ba Ngiyal’ ni Ngan Ta’ Fan

16. Mang fan ni ngan lithag e piin ni ngar uned ko taufe nga ar?

¹⁶ U m’on ni ngan taufe ma bay ba welthin ni yira weliy riy fene ga’ fan e taufe rok e Kristiano. Tomren e re welthin nem e yira fith l’agruw e deer ngak e piin nra un ko taufe ya ngar tamilangnaged e michan’ rorad u fithik’ e yoor. (Roma 10:10; ku mu guy fare thin ni bay u lan e kahol ko page 13.) Ma aram e ngan lithagrad nga ar, ya ngan fol ko kanawo’ ni ke pi’ Jesus ngodad. I yog e Bible ni tomren ni kan taufenag Jesus me “yib u fithik’ e ran nga talang.” (Matthew 3:16;  Mark 1:10) Ba tamilang ko re thin nem ni John ni Tataufe e ke lithag Jesus nga ar. b Ngan lithag nga ar e be yip’ fan ni kari thil e yafos rodad​—ya gowa kada m’ad ko ngongol rodad kakrom ma kada tababgad nga reb e yafos nib beech ni fan ni ngada pigpiggad ngak Got.

17. Uw rogon ma piin ni ngar uned ko taufe nge piin ni yad be yaliyrad e ngar ted fan e taufe?

¹⁷ Ba ga’ fan ngal’an e taufe maku bay e felfelan’ riy. Be yog e Bible ni i meybil Jesus u nap’an ni John e ke lithag nga ar u lan e lul’ nu Jordan. (Luke 3:21, 22) Be m’ug ko kanawo’ rok Jesus ni piin ni be un ko taufe e thingar ra ted fan e taufe. Ma be yog e Bible ni nge yalen e mad rodad ko yu rran, ere ku ba ga’ fan ni ngada folgad ko re thin nem ko rorran ni gad ra un ko taufe! (1 Timothy 2:9) Ma piin ni yad be yaliy e piin ni ra un ko taufe e ku rayog ni ngar ted fan e taufe ni yad be motoyil ko fare welthin ma nge yalen e ngongol rorad u nap’an e taufe.​—1 Korinth 14:40.

Flaab ni Ra Yog Ngak Pi Gachalpen Jesus ko Taufe

18, 19. Mang boch e tow’ath nge boch e flaab nra yognag e taufe?

¹⁸ Nap’an ni gad ra ognagdad ngak Got ngada uned ko taufe, ma kada manged girdien reb e tabinaw ni yugu ba thil nga yugu boch e tabinaw. Ya reb e tow’ath riy e ra mang Jehovah e Chitamangidad nge Tafager rodad. Ya u m’on ni kada uned ko taufe ma gad ba palog rok Got; ma chiney e ke fel’ thildad Got. (2 Korinth 5:19; Kolose 1:20) Bochan e maligach rok Kristus e kad chugurgad ngak Got ma ke chugur Got riy ngodad. (James 4:8) I weliy Malaki ni profet rogon ni ma tiyan’ ma ma motoyil Jehovah ngak e piin ni ma fanay fithingan Got ma bay e ngochol rok u dakenrad, ma ra tay fithingrad nga lan e babyor rok. Be gaar Got: “Bay ra manged e tirog e girdi’ ko chirofen ni bay gu maruwel, ma bay ra pired ni kari mil suwrad ngog. Bay gu runguyrad ni bod ba matam ni runguy ba pagel ni fak ni ma pigpig ngak.”​—Malaki 3:16-18.

¹⁹ Ku gad ra mang girdien ba ulung i walag u fayleng i yan ni bochan e taufe. I fith apostal Peter ko mang boch e flaab nrayog ngak pi gachalpen Kristus ni bochan e kar paged farad, me micheg Jesus ni gaar: “Ma urngin e girdi’ ni kar digeyed e tabinaw rorad, ara pi walagrad ni pumoon ara pi walagrad ni ppin, ara matam, ara matin, ara bitir, ara yungi binaw ni taferad ni bochag, e raay yay e pi n’ey ni bayi mun ngorad, ma yira pi’ e yafos ndariy n’umngin nap’an ngorad.” (Matthew 19:29) Bokum e duw nga tomren, me yoloy Peter murung’agen e re ulung i walag nem ni yad “e pi cha’ ni gimed ni ke mich Got u wun’rad” ni “yad be par u roy u fayleng ni polo’.” I yib e ayuw ngak Peter rok e re ulung i walag nem maku arrogodad ni gad ra tow’ath ni bochan e ma t’ufegdad e pi walagdad.​—1 Peter 2:17; 5:9.

20. Mang flaab ni bay nga m’on rok e piin ni ra un ko taufe?

²⁰ Miki yog Jesus ni “yira pi’ e yafos ndariy n’umngin nap’an” ngak e piin ni yad ra folwok rok. Arrogon, “ra yog ngorad e yafos ni ir e bin riyul’ e yafos”​—ni yafos ni manemus u lan e m’ag rok Got nib beech ni bochan e kar ognaged yad ngak Got mi yad un ko taufe. (1 Timothy 6:19) Dariy reb e def nga bayang ni kab fel’ ko re def ney ni fan ko gabul nge langlath rodad nge chon e tabinaw rodad. Re flaab ney e ra ayuwegdad ni nguuda folgad rok Got “ndariy n’umngin nap’an.”​—Mikah 4:5.

[Footnotes]

Rayog ni Ngam Weliy Fan?

• Uw rogon ma mang fan ni ngada rin’ed ban’en ni bochan e ke t’ufegdad Jehovah?

• Mang boch ban’en ni yira rin’ u m’on ko taufe?

• Mang fan ni dab da rusgad ni ngada uned ko taufe, ara nge magawon lanin’dad ni bochan e gad be lemnag ni dabiyog ni ngada rin’ed e pi n’en nib mil fan ngak e piin ni kar uned ko taufe?

• Mang boch e flaab nra yog ngak pi gachalpen Jesus Kristus ni kar uned ko taufe?

[Study Questions]

[Picture on page 17]

“Mang e be talegneg ndab gu taufe?”

[Pictures on page 20]

Ngal’an e taufe e ba ga’ fan ma ku bay e felfelan’ riy