Kam Fal’eg Rogom Ni Ngam Magey Nib Fos?
Kam Fal’eg Rogom Ni Ngam Magey Nib Fos?
“Mmarod girdien e tabinaw rom nga lan fare barkow; ya kug pirieg ni ke mus ni gur u fithik’ e girdi’ e ka gab fel’ u wan’ug.”—GENESIS 7:1.
1. Mang kanawo’ e ke pi’ Jehovah ni fan ni nge magey e girdi’ nib fas u nap’an Noah?
JEHOVAH e “pag e ran nge tharey e nam ni tafen e girdi’ ni kireb” u nap’an Noah, machane ki fal’eg rogon ni nge magey boch e girdi’. (2 Peter 2:5) Bin riyul’ e Got e ke pi’ ngak Noah ni be’ nib mat’aw e kanawo’ u rogon ni ngan toy fare barkow ni fan ni nge ayuweg e yafas u nap’an nra yib fare ran ni nge tharey e fayleng. (Genesis 6:14-16) Ni bod ni gad be athapeg e n’en nra rin’ e pi tapigpig rok Jehovah nib yul’yul’, ni bod ni “Rin’ Noah urngin e tin ni yog Got ngak ni nge rin’.” Riyul’, ‘ni rin’ ni aram rogon.’ Bochan e fol ni tay Noah, ma arfan ni gadad ba fas e chiney.—Genesis 6:22.
2, 3. (a) Uw rogon u wan’ e girdi’ ni immoy u nap’an Noah e maruwel rok Noah? (b) Mang e pagan’ Noah ngay me yan nga lan fare barkow?
2 Ngan toy fare barkow e ban’en nde mom. Ri baga’ ni, boor e girdi’ ni ke gin ko n’en ni ke mu’nag Noah nge chon e tabinaw rok. Machane, de gaman e re n’em ni nge micheg ngan’rad ni yad ra yan nga lan fare barkow ma rayog ni nga ra mageygad nib fas. Tomur riy, me mus gelngin e k’adan’ rok Got u puluwon fare fayleng ni kireb.—Genesis 6:3; 1 Peter 3:20.
3 Tomuren bokum e duw ni ke maruwel Noah nge chon e tabinaw rok ni rib gel, me gaar Jehovah ngak Noah: “Mmarod girdien e tabinaw rom nga lan fare barkow; ya kug pirieg ni ke mus ni gur u fithik’ e girdi’ e ka gab fel’ u wan’ug.” U fithik’ e michan’ nge pagan’ ko thin rok Jehovah, ma “Noah nge leengin, nge pi fakrow ni pumoon nge leengirad e ranod nga lan fare barkow.” Me ning Jehovah e mab ni nge ayuweg e pi tapigpig rok. Nap’an ni yib fare ran nga daken e fayleng, ma fare barkow e micheg ni ke tay Got ni nge ayuweg e yafas.—Genesis 7:1, 7, 10, 16.
Ngiyal’ N’ey e Taareb Rogon nga Nap’an Noah
4, 5. (a) Mang e ke taareb rogonnag Jesus ko ngiyal’ ni bay? (b) Mang e ba taareb rogon u thilin e ngiyal’ ni immoy Noah nge ngiyal’ ney?
4 “Wub nra tay e en ni Fak e Girdi’ e ra bod e n’en nrin’ ko fa ngiyal’ i n’em nnap’an Noah.” (Matthew 24:37) Pi thin ney e be dag Jesus ni ngiyal’ ni ba’ ni dab ni guy nga owchey e ba taareb rogon nga nap’an Noah, ma ke riyul’. Baga’ ni ka nap’an e 1919, min wereg e thin ni yibe ginang e girdi’ u gubin e nam ni bod rogon e n’en ni i rin’ Noah. Yooren e girdi’, e ngongol rorad e taareb rogon ko girdi’ u nap’an Noah.
5 Ke fanay Jehovah e ran ni nge tharey e fayleng ko girdi’ ni “ke sug ko ngongol rorad nib kireb.” (Genesis 6:13) Ri manang e girdi’ ni ra guyed ni Noah nge chon e tabinaw rok ni dar uned ko ngongol ni kireb ya ra pared u fithik’ e gapas nguur maruweliyed fare barkow. Aray rogon, ni kada guyed nib taareb rogon ko ngiyal’ ney. Girdi’ nib yul’yul’ e “bay kur guyed bayay e n’en nib thil u thilin e piin ni yad mmat’aw nge piin ni yad be ngongliy e kireb, ngu thilin e en ni be pigpig ngog nge en nder pigpig ngog.” (Malaki 3:18) Fare yul’yul’, nge gol, nge gapas, nge pasig ni bay ko Pi Mich Rok Jehovah e ba adag e girdi’ ni darur laniyan’gad mu daken e pi felngin ney e rayog ni ngan poy riy nib thil e girdi’ rok Got ko girdi’ ko fayleng. Pi Mich e kar paged urngin mit e ngongol ni kireb ma be pow’iyrad gelngin Jehovah. Arfan ni kan tow’athnagrad ko gapas ma yad be lek e kanawo’ nib mat’aw.—Isaiah 60:17.
6, 7. (a) Mang e de naab e girdi’ u nap’an Noah ngay, ma uw rogon nib taareb rogon ko ngiyal’ ney? (b) Mang boch e kanawo’ ni be dag e Pi Mich Rok Jehovah ni yira poyrad riy ni yad ba thil?
6 Girdi’ u nap’an Noah e dar naabgad ni ke ayuweg Got Noah ma ma rin’ e pi n’en ni be yog Got ni nge rin’. Ere dar tayedan’rad ko machib rok Noah ma dar folgad ko thin ni be ginangrad. Uw rogon e ngiyal’ ney? Yugu aram rogon ni boor e girdi’ ni ke gin ko maruwel nge ngongol ko Pi Mich Rok Jehovah, ma boor i yad e darur tayedan’rad ko fare thin nib fel’ nge thin nu Bible ni be ginangey. Piin buguli yoror rok e Kristiano, nge masta rorad, nge girdi’ rorad e yad ma yog nib fel’ pangirad machane ku yad ma yog ni, “Ke maadab ni faan gomanga gathi yad e Pi Mich Rok Jehovah!” Pi fel’ngin ni ma dag e Pi Mich ni der guy e girdi’ e t’ufeg, nge gapas, nge gol, nge fel’ ngak e girdi’, nge sumunguy, nge t’ar laniyan’ nbochan ni be pow’iyrad e kan ni thothup rok Got. (Galatia 5:22-25) Re ngongol ney nib fel’ e ma k’aring e girdi’ ni nge mich u wan’rad e machib ni yad be wereg.
7 Bod rogon ni Pi Mich Rok Jehovah e ur toyed reb e Kingdom Hall u Russia. Me yib i tal be’ nib pumoon nge non ngak reb e girdien e maruwel me yog ngak ni gaar: “Re maruwel ney e rib thil—dariy e tamagow riy, dariy e thin nib kireb, ma dariy be’ ni ma chingaw riy! Gur reb e Pi Mich rok Jehovah fa?” Fare pumoon ni be un ko maruwel e fith ni gaar, “Faan gu ra yog e danga’, ma ra mich u wan’um?” Me fulweg fare pumoon nib gur ni gaar, “Danga’.” U yugu reb e mach u Russia, e ke gin reb mayor u nap’an ni guy e Pi Mich ni yad be toy e Kingdom Hall rorad nib beech. Me gaar yugu aram rogon ni ma lemnag ni urngin raba’ e teliw ma taareb rogon, ma tomren ni ke guy e yul’yul’ nge gol ni bay ko Pi Mich Rok Jehovah ni yad be maruwel, ma daki lem ni aram rogon. Ireray l’agruw e kanawo’ ni ke dag ni girdi’ rok Jehovah e yad ba thil ko piin nder fol ko kenggin e motochiyel nu Bible.
8. Ra ngad mageygad u tomren fare fayleng nib kireb ma ngan tor nga daken e mang?
8 U nap’an e ngiyal’ ni tomur ko fare “fayleng ni kakrom” ni Tharey e ran, me Noah e i par nib yul’yul’ “ni i machibnag e tin nib mat’aw.” (2 Peter 2:5) Tin tomren e re m’ag ni kireb ney, ma girdi’ ku Jehovah e yad be machibnag e pi motochiyel rok nib mat’aw nge rogon ni ngan magey ngan thap nga lan e bin beech e fayleng. (2 Peter 3:9-13) Bod Noah nge chon e tabinaw rok ni bay madgun Got u wan’rad ni kan ayuwegrad nga lan fare barkow, girdi’ nra magey e ngiyal’ ney e ra yan u rogon e michan’ nge yul’yul’ rorad ni ngar chaggad ko ulung rok Jehovah u fayleng.
Ba T’uf e Michan’ ni Ngan Fas
9, 10. Mang fan ni rib ga’ fan e michan’ ni faanra ngan magey u tomren fare m’ag rok Satan?
9 Mang e thingari rin’ be’ me magey ko fare magothgoth ni ke chugur ni nge yib ko re fayleng ney ni bay u tan gelngin Satan? (1 John 5:19) Som’on e thingari nang nib t’uf rok e ayuw. Ma thingari fanay ere ayuw nem. Girdi’ u nap’an Noah e gubin ngiyal ni ur ul’ulgad ko maruwel rorad ma dakur guyed ni ba t’uf e ayuw rorad ni ngar mageygad ko fare magothgoth ni be yib. Maku bay ban’en ndariy rorad—ni aram e michan’ ngak Got.
10 N’en nib thil riy, e Noah nge chon e tabinaw rok e kar guyed e tin ba t’uf ni nge ayuwegrad nge yog e yafas ngorad. Maku bay e michan’ rorad ngak Jehovah, ni fare Got ko Palpalth’ib. I yoloy apostal Paul ni gaar, “Dariy be’ nra fel’ u wan’ Got [Jehovah] ni faanra de mich Got u wan’. Ya en nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.” Ki puthuy Paul ngay ni gaar: “Michan’ rok Noah ngak Got e ir e ayuweg Noah nge motoyil ko tin ni yog Got ngak ni murung’agen e pi n’en ni bayi taw, ni bogi ban’en ndabiyog ni nge guy Noah e ngiyal’ nem. Me fol ko tin ni ke yog Got ngak ni nge rin’, me toy fare barkow ni ark fithingan, ni re ark nem e ir e faseg Noah nge girdi’ nu tabinaw rok. Ereray kanawoen me gagiyelnag nib kireb e rok e girdi’ nu fayleng, me yog ngak Noah mat’awuy ni ma pi’ Got ngak e girdi’ u daken e michan’ rorad ngak.”—Hebrews 11:6, 7.
11. Mang e kada filed uw rogon ni ke ayuweg Jehovah e girdi’ kakrom?
11 Faanra ngada mageygad u tomren fare m’ag ni kireb, ma thingar da rin’ed boch ban’en gathi kemus ni nge michan’dad ni yira thang. Thingar da maruweliyed e michan’ rodad, ma ngarda fanayed e pi n’en ni ke pi Got nra ayuwegdad ngada mageygad. Riyul’ ni, ba t’uf ni ngada maruweliyed e michan’ rodad ko fare biyul ni ke pi’ Fak Got, ni Jesus Kristus. (John 3:16, 36) Machane, thingar da lemnaged ni kemus ni piin nranod nga lan fare barkow rok Noah e kar mageygad ni dar m’ad ko fare Ran. Taareb rogon, ko fapi mach ni tagil’ e ayuw kakrom u Israel ni yima ayuwegey riy ni faanra ke thang be’ e pogofan nde lemnag ma rayog ni mil nga reb e pi mach nem nge par u rom nge mada’ ko ngiyal’ ni ke yim’ fare prist nib tolang. (Numbers 35:11-32) Nap’an fa bin ragag e gafgow ni yib nga daken yu Egypt u nap’an Moses, i yim’ e piin ni nganni’ u fak yu Egypt, machane pi fak piyu Israel e de buch ban’en rorad. Mang fan? Jehovah ke pow’iy Moses ni gaar: “[Piyu Israel] ngar feked boch e racha’ [ko fare gamanman ko Paluk’af] ngar liyfed nga daken e gal raba’ i langan e mab nge nga daken langan e mab ko pi naun ni ir e ngan longuy e pi gamanman nem riy. . . . Dariy bigimed ni nge yan nga wuru’ e naun rok nge mada’ ko kadbul.” (Exodus 12:7, 22) Mini’ ko bin nganni’ i fak yu Israel nra darifannag e fonow rok Got nge yan nga wuru’ e naun ni bay e racha’ ni kan liyef nga daken e gal raba’ i langan e mab nge nga daken langan e mab riy?
12. Mang e deer ndabisiy ni nge bagadad me fith ir riy nge mang fan?
12 Arfan ni ri bay fan ni ngada fal’eged i lemnag rarogodad. Riyul’ ni gad bay u lan e yaram rok Jehovah ni be ayuwegdad ko tirok fa? Nap’an nra yib fare gafgow nib ga’, ma lu’ ko felfelan’ ni yibe pining e magar e ra yib u owchen e piin kar gayed e ayuw. Ma boch e girdi’ e kemus ni lu’ ko kireban’ ya bochan dar folgad.
Mon’og ko Yaram ko Ulung e Be Fal’eg Rarogodad
13. (a) Mang boch i fan ni yibe thilyeg boch ban’en ko ulung? (b) Mu weliy boch e n’en ni kan thilyeg.
13 Ke thiliyeg Jehovah boch ban’en u lan e ulung rok u fayleng. Re yaram ney e be fal’eg yaan, ma be ayuweg, ma be gelnag e tirok Got ni ra yororiydad. Nap’an e duw ni 1870 nge mada’ ko 1932, ma pi piilal nge deacons e ke towaliyrad girdien e ulung. Nap’an e duw ni 1932 ma fapi piilal ni kan towaliyrad e kar manged service committee ko ulung ni ngar ayuweged e en kan dugliy ni nge mang service director. Nap’an e duw ni 1938, min ngongliy e yaram ngan dugliy e piin ministerial servants u lan e ulung. U tan e ayuw ko Governing Body ko Pi Mich Rok Jehovah, u nap’an e duw ni 1972, min yarmiy ni piin ni piilal u lan e ulung e nga rogned e piin ni nge mang piilal ara ministerial servants ma Governing Body e ra yog ko ba fel’ fa danga’ ni yad ra pi’ e babyor. Ma munmun, ma fare maruwel ko Governing Body e ke gel e re ba t’uf ni ngan thilyeg boch ban’en ni nge mom e maruwel.
14. Mang skul e ke tabab ko duw ni 1959?
14 Nap’an e duw ni 1950, u tomren ni kan fal’eg i lemnag nib fel’ rogon e thin ko Psalm 45:16 me sum e skul me ul’ul i yan. Re thin ko Bible nem e gaar: “Pi fakam ni pumoon e ra fek luwan e pi chitamangin e pi chitamangirad, ni piin kam dugliyrad ni ngar manged pi fak e pilung u ga’ngin yang e fayleng.” Piin piilal e chiney ni yad be pow’iy e ulung e yima skulnagrad ni fan ko maruwel e ngiyal’ ney nge ku boch e maruwel nga tomren e Armageddon. (Revelation 16:14, 16) Fare Kingdom Ministry School e ke tabab ko duw ni 1959. Ngiyal’ nem, e kan yarmiy ni reb e pul ni ngan skulnag e piin congregation servant ara piin ma pigpig ko ulung ni ka nog e presiding overseer ngorad e chiney. Re skul ney e chiney e be ul’ul i yan ni ngan fonownag urngin e piilal ara overseer nge ministerial servant. Pi walag ni pumoon ney, e tomur riy, ma ra ur pow’iyed mu ur skulnaged e Pi Mich Rok Jehovah ni bay ko pi ulung ni yad ma ayuweg. Arfan ni, yad urngin ma kan ayuwegrad ko tirok Got min ayuwegrad ni ngar salapgad ko machib ni yad e pi tamachib ko fare thin nib fel’ ni murung’agen Gil’ilungun.—Mark 13:10.
15. Mang l’agruw e kanawo’ ni yima ayuweg nge beech e ulung ko Kristiano riy?
15 Girdi’ ni baadag ni nge mang bang ko ulung ni Kristiano e bay boch ban’en ni thingari yog rok. Ba puluw, ni girdi’ ko ngiyal’ ney nib tamoning e dabi mang bang ko ulung ni Kristiano, ni bod ndariy tagil’rad u lan fare barkow rok Noah. (2 Peter 3:3-7) Ni baga’ ni ka nap’an e duw ni 1952, ma kan pi’ e ayuw ngak e Pi Mich Rok Jehovah ni aram e yaram nra ayuweg e ulung ni ngan tharbog ko ulung e piin ni ke denen ma dabi kalngan’. Riyul’, ni piin kar kalgadngan’rad ko kireb ni yad be rin’ e kan ayuwegrad u fithik’ e t’ufeg ‘ni ngar yal’uweged e kanawo’ rorad.’—Hebrews 12:12, 13; Proverbs 28:13; Galatia 6:1.
16. Uw rogon rarogon e girdi’ rok Jehovah ko tirok Got?
16 Girdi’ rok Jehovah ni yad be par nib fel’ rogorad ko tirok Got e gathi kan gin ngay ara yigi buch. I yog Jehovah u daken Isaiah ni profet ni gaar: “Am sap! Pi tapigpig rog e yad ra ka’ ban’en, machane gimed e gimed ra yim’ ko bilig. Am sap! Pi tapigpig rog e yad ra garbod, machane gimed e gimed ra yim’ ko belel. Am sap! Pi tapigpig rog e ra felfelan’rad, machane gimed e gimed ra gafgow ko tamra’. Am sap! Pi tapigpig rog e ra tolul u fithik’ e felfelan’ ya ba fel’ rarogon gum’ircharad, machane gimed ra yor ni gimed be gowol ko amith u gum’irchamed ma ra m’ay gelngimed.” (Isaiah 65:13, 14, NW) Ka be ul’ul Jehovah ni be duruw’iydad ko ggan ni tirok Got nra gelnag e michan’ rodad ni be yib u ngal’an.—Matthew 24:45.
Mu Fal’eg Rogom Ngam Fas
17. Mang e ra ayuwegdad ni ngad fal’eged rogodad ni ngad mageygad ni gad ba fas?
17 Da un rin’ kafram, ma chiney e ireray e ngiyal’ ni “nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak, ma ngad guyed rogon ndab da paged e muulung rodad, ni bod rogon ni be rin’ boch e girdi’. Ma nge bagadad me pi’ e athamgil nga laniyan’ bagadad.” (Hebrews 10:23-25) Nguuda pared u taabang ni gad ba chuchugur ngad manged bagayad fapi girdi’ ko ulung ko Pi Mich Rok Jehovah ni ke pag 98,000 ma ra ayuwegdad ni ngad fal’eged rogodad ni fan ni ngad mageygad. Rayog e ayuw ngodad ko pi walagdad ma aram e gad be athamgil ni ngad daged “e bin nib beech i gadad” ngada ayuweged boch e girdi’ u polo’ i laniyan’dad ngar nanged rogon ni ra ayuwegrad Jehovah nge yog e yafas ngorad.—Efesus 4:22-24; Kolose 3:9, 10; 1 Timothy 4:16.
18. Mang fan ni kam turguy ni ngam par nib chuchugur ko ulung ko Kristiano?
18 Satan nge fare fayleng rok ni kireb e be wawliydad nga urel ko ulung ni Kristiano. Machane, rayog ni ngad pared ni bang ko ulung ko Kristiano ngad mageygad u tomren e re m’ag ney nib kireb. Yibe athapeg ni t’ufeg ni fan ngak Jehovah nge pining e magar ko ayuw rok e ra k’aringdad ngad pared nib mudugilan’dad ngad togopuluwgad ko maruwel rok Satan. Ngad fal’eged i lemnag fapi tow’ath ni bay rodad e ra gelnag e n’en ni kad dugliyed u lanin’dad. Boch ko pi tow’ath ney e gad ra weliy ko bin migid e article.
Mang e Fulweg Rom?
• Uw rogon ni ngiyal’ rodad ney e taareb rogon nga nap’an Noah?
• Mang e ba t’uf ni ngad rin’ed ngad fosgad?
• Mang boch ban’en ni kan thilyeg ni ke gelnag e yaram rok Jehovah ni be ayuwegdad?
• Uw rogon ni ngad fal’eged rogodad nge yog nda fosgad?
[Study Questions]
[Picture on page 18]
Girdi’ u nap’an Noah e da ur tayedan’rad ko n’en ni i rin’ Noah
[Picture on page 19]
Rib ga’ fan ni ngan fol ko thin ni be ginangey Got riy
[Picture on page 20]
Kan ta’ fare Kingdom Ministry School ni fan ko mang?
[Picture on page 21]
Ereray e ngiyal’ ni ngan par ni yib chugur ko ulung ko Kristiano