Nge taw nga Gum’irchaen ba Bitir

KA AM guy reb e bitir ni be fafel ko gosgos ni yaan e mahl me kireban’um fa? Re n’ey e yibe rin’ u gubin yang ni ki mada’ ngak e piin ni kab bitir, ya bochan ni gosgos ni yaan e cham e ke yoor u fayleng. Uw rogon ni ngam ayuweg reb e bitir nge thilyeg e n’en ni ma fafel ngay ni fan ko mahl nge fafel nga ban’en ni fan ko gapas? Waltraud, e reb e missionary ko Pi Mich Rok Jehovah ni ke n’uw nap’an u Africa, e ke pirieg rogon ni nge ayuweg bochi pagel ni nge rin’ ban’en ni aram rogon.

Bochan e mahl, me chuw Waltraud ko nam rok nge yan i par nga reb e binaw u Africa. U rom e tabab ni nge fil e Bible riy ko chitiningin reb e pagel ni lal e duw rok. Nap’an ni ra yan i guy e chitiningin fare pagel, ma be fafel nga bochi boyoch ni tagosgos, ni kemus e n’en ni bay rok. Dawori guy Waltraud bayay ni ke sapeg nga ban’en, ya kemus ni ma bing nge ning fare boyoch ni gowa be yin’ e gan ngay.

Me gaar Waltraud ngak fachi pagel: “Werner, ga manang ko mang fan ni gu be par ko binaw rom? Bochan e mahl​—ma kugu mil ko binaw ni gu ma par riy nggu chuw ko riya’ ko girdi’ ni ma yip’ e girdi’ ko boyoch ni bod e birom. Ga be lemnag ma re n’em ni nga nip’ be’ e bafel’?”

Me fulweg Werner ni gaar, “Danga’.”

Me gaar Waltraud, “Arrogon sorom.” Ngemu’ miki fith ni gaar: “Ga manang fan ni gu ma yib gguymew e chitinam ni gubin e wik fa? Bochan ni Pi Mich Rok Jehovah e yad ba adag ni ngar ayuweged e girdi’ nge par nib gapas thilrad Got nge piin buguli yoror rorad.” Bochan ni ke m’ag u wan’ e chitiningin Werner ngay ma aram me yog Waltraud ni gaar: “Faanra ga ra pi’ e boyoch rom ngog, nggu n’ag, ma rriyul’ ni gu ra pi’ reb e karrow ni tagosgos ngam fanay ni aningeg e tayya riy.”

Me pi’ Werner fare boyoch ni tagosgos rok ngak. Thingari sonnag ni aningeg e wik, machane me taw fare tagosgos rok nib beech​—ni reb e karrow ni kan ngongliy ko palang, me fek ni kari siminmin.

Kam tay ba ngiyal’ ni ngam non ko bitir rom, ga be guy rogon ni nge taw nga gum’ircharad nge yog nra n’aged e tagosgos rorad ni talin e cham fa? Faanra arrogon, ma ga be fil ngorad ban’en nra yib angin u nap’an e yafas rorad.