“Puguran Rom E Gu Ma Felfelan’ Ngay”

“Ya urngin ban’en nni yoloy nga lan e babyor nib thothup e ni yoloy ni nge fonownagdad.”​—ROMA 15:4.

1. Uw rogon ni ma pi’ Jehovah e puguran ngodad, ma mang fan nib t’uf rodad e pi n’em?

 JEHOVAH e ma ayuweg e girdi’ rok ni ma puguran ngorad boch ban’en nra ayuwegrad ko magawon ko ngiyal’ ney ni ke mo’maw’ e par. Boch e pi puguran ney e ma yib ko ngiyal’ ni be beeg be’ e Bible, ma boch e yima pi’ u nap’an e muulung ko Kristiano. Boch ko pi n’en ni gad ma beeg ara gad ma rung’ag ko yu ngiyal’ i n’ey e gathi aram e som’on ni kad nanged. Baga’ ni, fare thin e kada weliyed bayay. Bochan ni yu ngiyal’ ma gad ma pagtalin ban’en, ere ba t’uf ni ngkun puguran ngodad e tin nib m’agan’ Jehovah ngay nge pi motochiyel rok nge fonow rok. Thingar dogned e magar nbochan e puguran rok Got ngodad. Ma pi’ e athamgil nga lanin’dad ma ma ayuwegdad ni ngada lemnaged rogon e yafas rodad ni nge puluw ko tin mm’agan’ Got ngay. Arfan, ni ke yin’ fare psalmist e tang ni fan ku Jehovah ni gaar: “Tin ga ma puguran e gu ma felfelan’ ngay.”​—Psalm 119:24, NW.

2, 3. (a) Mang fan ni ke ayuweg Jehovah e pi chep nu Bible ke mada’ ko chiney? (b) Bin ngan e chep nu Bible e ngada weliyed ko re article ney?

² Yugu aram rogon ni kan yoloy ni ke yoor e chibog ni ke yan, machane Thin rok Got e kab gel gelngin. (Hebrews 4:12) Bible e ma weliy ngodad e tin riyul’ ni ke buch ko girdi’ kakrom. Yugu aram rogon ni yalen nge rogon e lem e boor e ke thil nga nap’an e Bible, ma magawon ni gad be mada’nag e chiney e baga’ ntaareb rogon ko kakrom. Boor e chep ni kan ayuweg u Bible ni fan ni nge ayuwegdad u rogon e kanawo’ ni ke dag boch e girdi’ nib yul’yul’ nib t’uf Jehovah rorad ni ur pigpiggad ngak ni yugu aram rogon ni ba gel e togopuluw ni i yib. Ma boch e ma weliy e ngongol nri ma fanenikay Got. Urngin e pi chep ney, nib fel’ nge tin ba kireb, e kan tay nga lan e Bible ni puguran ngodad. Baaray rogon ni ke yoloy apostal Paul: “Ya urngin ban’en nni yoloy nga lan e babyor nib thothup e ni yoloy ni nge fonownagdad, ni bochan e nge yog e l’agan’ ngodad u fithik’ e gum’an’ nge athamgil laniyan’ ni be pi’ e thin ko babyor nib thothup ngodad.”​—Roma 15:4.

³ Ngada guyed dalip ban’en ni kan yoloy nga Bible: murung’agen David nge Saul, nge Ananias nge Safira, nge ngongol rok Josef nge leengin Potifar. Ra reb e pi chep ney ma be fil ngodad e tin baga’ fan.

Yul’yul’ ko Yaram Rok Got

4, 5. (a) Mang magawon e immoy ni ke l’ag Saul ni Pilung nge David ngay? (b) Uw rogon e ngongol rok David ngak Saul nib gel e fanenikan rok?

⁴ Saul ni Pilung e de yul’yul’ ngak Jehovah ere dariy rogon ni nge gagiyegnag e girdi’ Rok. Arfan ni ke n’ag Got ma ke l’og Samuel ni profet ni nge dugliy David nge mang pilung nu Israel. Nap’an ni dag David ni der rus mab falu’ me yog e girdi’ nib sorok, me tabab Saul ni nge tagenging ngak David. Boor yay ni i gay Saul rogon ni nge li’ David ngem’. Bochan ni bay Jehovah rok David ma de yog ni ngan li’.​—1 Samuel 18:6-12, 25; 19:10, 11.

⁵ Ba yoor e duw, ni par David ni yugu be yan yan. Nap’an ni fel’ rogon David nrayog ni li’ Saul, me yog fapi girdi’ ngak David, ni Jehovah ke pi’ e toogor rok nga pa’. Machane,  ke siyeg David. Yul’yul’ rok ngak Jehovah nge tay fan ko liw rok Saul nbochan e Got e ke dugliy ni nge mang pilung e ke k’aring ni nge rin’ ni aray rogon. Gathi Jehovah e ke dugliy Saul ni nge mang pilung nu Israel? Jehovah e ku rayog ni chuweg Saul ko ngiyal’ ni baadag. I yog David ndariy mat’awun ni nge rin’ e binem. Tomuren ni ke rin’ urngin nrayog rok ni nge munguynag e lem rok Saul ngak, ma tomur riy me gaar David: “Jehovah ir e ra li’; ara bayi taw ko rran rok me yim’, ara ra yan ko mahl me yim’. Jehovah e be talegneg ndabi math paag ngak, e an ke dugliy Jehovah!”​—1 Samuel 24:3-15; 26:7-20, NW.

6. Mang fan fare chep ku David nge Saul e baga’ fan ni ngada lemnaged?

⁶ Re chep ney e bay ban’en nib ga’ fan ni ngan fil riy. Ka am lemnag ko mang fan ni ma sum e magawon u lan e ulung ko Kristiano? Sana bay be’ ni ma ngongol nde puluw. Ngongol rok e gathi rib kireb, machane ke magawonnag e lem rom. Susun mang e ngam rin’? Bochan ni ga baadag ni ngam dag ni ga be lemnag e re walag ney, ma ga baadag ni ngam dag e yul’yul’ rom ngak Jehovah, ma ngam turguy ni ngam non ngak u fithik’ e gol, ngam nameg ni ngam ayuweg nge fel’ thilmew. Ma uw rogon, ni faanra ka ba’ fare magawon? Tomren ni kam rin’ urngin nrayog rom, ma ngam pag fan ngak Jehovah. Aram e n’en ni rin’ David.

7. Ra ngan folwok rok David, ma uw rogon e ngongol rodad u nap’an ni gad ra mada’nag e tin de mat’aw ara girdi’ ni dubun e teliw?

⁷ Sana ga be mada’nag e magawon u puluwon boch e girdi’ ni ma dag e ngongol nde mat’aw ara girdi’ ni dubun e teliw. Dariy ban’en ni ngam rin’ ngay e chiney. Aram ban’en nib mo’maw’ ni ngan k’adan’uy riy, machane ngongol rok David ko tin de mat’aw e ke fil ban’en ngodad. Fare psalms ni ke yoloy David e ma pug lanin’uy ni gathi kemus ni murung’agen e meybil rok ngak Got ni nge ayuweg u pa’ Saul machane murung’agen e yul’yul’ rok ngak Jehovah nge rogon ni be lemnag ni ngan pining e sorok nga fithingan Got. (Psalm 18:1-6, 25-27, 30-32, 48-50; 57:1-11) I par David nib yul’yul’ ngak Jehovah nyugu demtrug rogon feni be ul’ul Saul i rin’ e kireb ngak ni boor e duw. Ku arrogodad ni ngad pared nib yul’yul’ ku Jehovah nge ulung rok ni demtrug rogon e gafgow ni gad be tay nbochan e n’en ni ma rin’ boch e girdi’. Rayog ni nge pagan’dad ni manang Jehovah e pi n’en ni be buch.​—Psalm 86:2.

8. Mang e ke rin’ e Pi Mich Rok Jehovah u Mozambique u nap’an ni kan skengnag e yul’yul’ rorad ngak Jehovah?

⁸ Pi Kristiano nu Mozambique e kar daged e kanawo’ ko yul’yul’ ngak Jehovah u nap’an ni yib e skeng. Duw ni 1984, ma boor yay ni ma yib e girdi’ ni kireb ni yad bang u reb e ulung ni ma togopluw, ni yad ma iring e chugum, ma yad ma urfiy e naun, ma yad ma li’ e girdi’. Gowa dariy ban’en nrayog ni nge rin’ e pi Kristiano nriyul’ ney ngar ayuweged  yad. Girdi’ ni ma par ko re binaw nem e kar guyed rogon ni ngar feked boch e girdi’ ngar uned ko tin ma rin’ e pi salthaw ara kan towasariyrad ni ngar ayuweged yad u boch e kanawo’. Pi Mich Rok Jehovah e kar lemnaged ni yad ra rin’ ni aram rogon ma de puluw ko liw ko Kristiano ni ma par u mathilin. Bochan ni kar siyeged ma ke k’aring e damumuw nib gel ko pi salthaw. Boor ko 30 e Pi Mich ni kan li’rad ko chingiyal’ nem, machane mus ni ngan thang e fan ma dabiyog ni nge kirebnag e yul’yul’ ko girdi’ rok Got. a Yad bod David, ni kar athamgilgad u fithik’ e tin de mat’aw ma kar gelgad.

Ba Puguran ni Be Ginangey

9, 10. (a) Uw rogon ni nge fel’ rogodad u boch ban’en ni kan dag u Bible? (b) Mang e ba kireb ni ke rin’ Ananias nge Safira?

⁹ Boch e girdi’ ni yibe weliy murung’agen u Bible e be puguran rogon e ngongol ni ngan palog riy. Riyul’, Bible e boor murung’agen e girdi’ riy, ni ki mada’ ko pi tapigpig rok Got, ni i rin’ e kireb mar gafgowgad u wenegan. (1 Korinth 10:11) Reb e murung’agen Ananias nge Safira, ba wu’ i mabgol ni girdien e ulung ni Kristiano u Jerusalem ko bin som’on e chibog.

¹⁰ Tomuren e Pentekost ko duw ni 33 C.E., ma ke t’uf e ayuw ni ngan pi’ ko piin ka fini michan’rad ni ngar mageygad u Jerusalem ngar chaggad ngak e pi apostal nge yib fel’ngin ngorad. Boch girdien e ulung e kar pied nchuway’ e binaw rorad ni ngan fek puluwon ya ngan pi’ ko girdi’ nib t’uf e ayuw rorad. (Acts 2:41-45) Ananias nge Safira e kar piew nchuway’ e binaw rorow kar fekew bayang i puluwon kar piew ko pi apostal, ma ka rognew ni kari mus urngin e salpiy ni puluwon fa ngi binaw. Riyul’, ni bay rogon Ananias nge Safira ni ngar piew rogon ni yow baadag, machane n’en nib kireb riy, e dar yul’yul’gow. Yow baadag ni ngar dagew e ngongol nib fel’ ni nge m’ug ni kar rin’ew ban’en nib ga’ ko tin riyul’ ni kar rin’ew. Bochan ni bay e kan ni thothup rok apostal Peter, ma ke dag ni dar yul’yul’gow ma yow be dake moding, ma aram me li’row Jehovah ngar m’ow.​—Acts 5:1-10.

11, 12. (a) Mang boch e puguran ngodad ni murung’agen e yul’yul’? (b) Mang e pi fel’ngin nra yib nbochan e yul’yul’?

¹¹ Faanra kan wawliydad ni ngada rin’ed e tin nde riyul’ ngad fel’ gad u wan’ e girdi’, ma rayog ni nge puguran ngodad chepin Ananias nge Safira. Sana rayog ni ngad bannaged e girdi’, machane dabiyog ni ngad  bannaged Jehovah. (Hebrews 4:13) Boor yay ni Thin nu Bible e ma puguran ngodad ni ngada yul’yul’gad ngodad, ya piin ni ma malulfith l’ugun e dabiyog ni ngar pared u fayleng ndariy e tin nde mat’aw riy. (Proverbs 14:2; Revelation 21:8; 22:15) Fan e re n’em e thingari tamilang. Cha’ ni ma mon’ognag urngin e tin ni de yul’yul’ e Satan ni Moonyan’.​—John 8:44.

¹² Ran par nib yul’yul’ ma boor fel’ngin nra yib. U fithik’ e pi fel’ngin nem e ra beech e nangan’ rodad ma ra pagan’ e girdi’ ngodad. Boor yay nbochan ni pi Kristiano e yad ba yul’yul’ ma ke yog e maruwel rorad ara kar mageygad u tabon e maruwel. Machane bin th’abi ga’ fan i fel’ngin e yul’yul’ e ra fal’eg thildad Got ni Th’abi Tolang.​—Psalm 15:1, 2.

Ngan Par nib Machalbog Pangiy

13. Mang e magawon ni ke pirieg Josef, ma mang e ke rin’?

¹³ Josef, e fak Jakob ni patriarch, e ni pi’ nchuway’ ni nge mang sib ni ke gaman 17 e duw rok. Ma par u tafen Potifar, ni ir e baga’ ko tapuf oloboch u Egypt, aram e gin ni gabalan’ leengin e masta rok Josef ngak riy. Kari adag ni ngar pirew Josef, ya rib pichoay, gubin e ran ni yugu ma yog ngak ni aray rogon: “Moy nga darow nga chob rog.” Me Josef e rib palog ko chon e tabinaw rok ndariy be’ ni manang murung’agen. Susun mmom ni ngar pirew e re pin ney ya dariy be’ nra nang. Machane, nap’an ni malle’ leengin Potifar ngak me mil Josef.​—Genesis 37:2, 18-28; 39:1-12.

14, 15. (a) Mang fan ni chepin Josef e bay fan ngodad? (b) Mang fan ni reb e ppin ni Kristiano e pining e magar nbochan ni ke fol ko puguran rok Got?

¹⁴ Josef e kan chuguliy u reb e tabinaw ni bay madgun Got riy, e re manang ni ba kireb ni nge par e girdi’ ni gathi mabgol. “Ere uw rogon ni nggu ngongliy e binir e ngongol nib kireb ni aram e kug denen nib togopluw ngak Got?” aray rogon ni fith Josef. Rogon ni dugliy e be pow’iy e tamilangan’ ko motochiyel rok Got ni fan ko girdi’ nrogon ni yog u Eden, ni taareb e ppin ma taareb e pumoon. (Genesis 2:24) Girdi’ rok Got e ngiyal’ ney e ku rayog ni yib angin ngorad ni ngan fal’eg i lemnag rogon e n’en ni rin’ Josef ko re magawon nem. U yu yang, ma ngongol ko par ko pumoon nge ppin e ke puf rogon nfaanra dabi un reb e fel’ yangaren ngay ma ra i moningnag e taab yangar rok. Par ko pumoon nge ppin nga wuru’ e mabgol e ke garer. Ere, chepin Josef e ba puguran ngodad nrib fel’ ngal’an e ngiyal’ ney. Ka be par kenggin e motochiyel rok Got ni kargon ni ngongol ndarngal nge ngongol ni puwlag  e ba denen. (Hebrews 13:4) Boor e girdi’ ni kar uned ko ngongol ndarngal ni ke mich u wan’rad nib kireb ni ngan rin’ ni aram rogon. Wenegan e ngongol ni kireb e aram e tamra’, nge magawon ko nangan’, nge taliyeg, nge diyen, nge m’ar ni ma af. Thin nu Bible e ma puguran ngodad, ni girdi’ ni ma un ko pumoon nge ppin nde mabgol “e ke denen nib togopuluw ko birok e dowef.”​—1 Korinth 5:9-12; 6:18; Proverbs 6:23-29, 32.

¹⁵ Jenny, b ni reb e Mich Rok Jehovah nib muchugbil, e bay fan ni nge pining e magar ko pi n’en ni be puguran Got ngak. Bay reb e pumoon ni pichoay u tabon e maruwel rok ni ma dag ngak ni baadag. Ma nap’an ni de rin’ Jenny ban’en ngay, me elmerin boch ko kafram. Ke gaar, “kug pirieg nib mo’maw’ ni nggu par nib machalbog pangig, bochan ni gu baadag ni be yog be’ nib pumoon ni gub fel’.” Machane, ke nang ni fare pumoon e ke mus ni be guy rogon ni nge yoor e matheeg ko ppin ni kar pirew. Nap’an ni ke thamiy ni ke mo’maw’ ni nge siyeg, me meybil ku Jehovah ni nge ayuweg nge par nib yul’yul’ ngak. Ke pirieg Jenny ni fapi n’en ni ke fil u nap’an ni be fal’eg i gay ban’en u Bible nge boch e babyor ko ulung e be puguran ngak ni be pi’ e athamgil laniyan’ nrayog ni nge kol ayuwngin. Reb e pi puguran e fare chepin Josef nge leengin Potifar. “Faanra u gu par ni gu be puguran ngog feni t’uf Jehovah rog, ma de t’uf ni nggu rus ni ri gu rin’ reb e denen nib ubchiya’ nib togopuluw ngak,” aray rogon ni yog.

Fol ko Puguran Rok Got!

16. Uw rogon nra yib fel’ngin ngodad ni faan gad ra beeg ma gad fal’eg i lemnag murung’agen fapi girdi’ ni kan weliy u Bible?

¹⁶ Rayog ni ngada pininged e magar ni fan ko pi motochiyel rok Jehovah ni faan gad ra guy rogon ni ngad nanged fan ko mang fan ni kan chaariy boch e chep nga Bible ni fan ngodad. Mang e be fil? Mang boch e pi fel’ngin ara pi n’en ni ma buch ni yibe dag u Bible ni ba t’uf ni ngad folwokgad riy ara ngad siyeged? Riyul’ riy e bokum miriay e girdi’ ni kan yoloy murung’agrad nga Bible. Urngin e piin nib t’uf e fonow rok Got rorad e rayog ni yib angin ni faan yad ra maruweliy ngar adaged e gonop ni ma yognag e yafas, nib muun ngay e pi n’en nrayog ni ngad filed ko wok ni ke chaariy Jehovah. Re babyor ney e bay chepin boch e girdi’ riy ni be fil ban’en ngodad. Mang fan ni dab mu beeg boch?

17. Uw rogon u wan’um murung’agen e n’en ni be puguran Jehovah, ma mang fan?

¹⁷ Uw feni ri gad be pining e magar nga rogon ni gad ba t’uf rok Jehovah ni ke tamilangnag ngak e piin ni yad be guy rogon ni ngar rin’ed e tin mm’agan’ ngay! Gadad e riyul’ ndawor da flontgad, ni bod fapi pumoon nge ppin ndar flontgad ni kan weliy murung’agrad u Bible. Yugu aram rogon, ma fare thin ni kan yoloy ni murung’agrad e ri baga’ angin ngodad. Yira fol ko tin ke puguran Jehovah, ma rayog ni ngan siyeg e oloboch, ma rayog ni ngad folgad ko ngongol nib fel’ ni ke tay boch e girdi’ ni u ranod ko kanawo’ nib mat’aw. Faan gad ra rin’ ni aram rogon, ma rayog ni ngada uned i yin’ e tang ni bod fare psalmist ni gaar: “Ba felfelan’ e piin yad ma fol ko n’en ni ke puguran [Jehovah] ma yugu yad be gay u polo’ i gum’ircharad. Yaal rog e ka be chaariy e n’en ni kam puguran, ma rib t’uf rog.”​—Psalm 119:2, 167, NW.

[Footnotes]

Uw Rogon ni Ngam Fulweg?

• Mang e rayog ni ngad filed ko ngongol rok David ngak Saul?

• Chepin Ananias nge Safira e be fil ngodad e mang?

• Mang fan ni chepin Josef e bay angin ngodad e ngiyal’ ney?

[Study Questions]

[Picture on page 24]

Mang fan ni siyeg David ni nge li’ Saul ngem’?

[Picture on page 25]

Mang e kad filed u murung’agen Ananias nge Safira?

[Picture on page 26]

Mang e ke k’aring Josef nde un ko ngongol ndarngal?