“Rib T’uf Rog E Motochiyel Rom!”

“Rib t’uf rog e motochiyel rom! Gu ma par ni gu ma lemnag ni polo’ e rran.”​—PSALM 119:97.

1, 2. (a) Mang magawon e mada’nag fa en ni yoloy e Psalm 119? (b) Mang e rin’, ma mang fan?

 FAEN ni yoloy e Psalm 119 e i mada’nag e skeng nib gel. Pi toogor ni ur rin’ed ban’en ni dan pi’ mat’awrad ma yad be dariyfannag e motochiyel rok Got e u ra moningnaged mi yad t’ar e thin nga daken. Pi fak e pilung e ur puruy’gad nib togopuluw ngak mar gafgowniged. Ke longobiy e piin nib kireb, ma ke par e yafas rok u thatharen e riya’. Gubin e pi n’ey e k’aring nge ‘dakiyog ni nge mol ni bochan e ke kireban’.’ (Psalm 119:9, 23, 28, 51, 61, 69, 85, 87, 161) Yugu aram rogon ni ba gel e skeng ni ke yib ngak, me tang fare Psalmist ni gaar: “Rib t’uf rog e motochiyel rom! Gu ma par ni gu ma lemnag ni polo’ e rran.”​—Psalm 119:97.

² Thingar mu fithem ko, “Uw rogon ni ke fal’eg e motochiyel rok Got laniyan’ fare psalmist?” N’en ni ke ayuweg e bochan nib mudugil u wan’ nib baga’ fan u wan’ Jehovah. Pi fel’ngin ni yib ni bochan e ke fol ko pi motochiyel ni ke pi’ Got ngak u fithik’ e t’ufeg e ke k’aring e felfelan’ ko fare Psalmist, nyugu aram rogon ni ke yibnag e pi tatogopuluw e gafgow ngak nib gel. Ke guy nib fel’ e n’en ni ke rin’ Jehovah ngak. Maku, bochan ni ke fol ko pi thin ni bay ko motochiyel rok Got ma aram e ke k’aring fare psalmist ni nge gel e llowan’ rok ko pi toogor rok maku ki k’aring ni nge par nib fos. Bochan ni ke fol ko fare motochiyel ma aram e ke yib e gapas ngak ma ke par e nangan’ rok nib beech.​—Psalm 119:1, 9, 65, 93, 98, 165.

3. Mang fan nib mo’maw’ ko pi Kristiano ni ngar pired nrogon e pi kenggin e motochiyel rok Got e ngiyal’ ney?

³ Boch e pi tapigpig rok Got e ngiyal’ ney e ku yad be mada’nag boor ban’en ni ma skengnag e michan’ rorad nib gel. Sana dab da mada’naged ban’en ni ra tay e yafas rodad nga thatharen e riya’ ni bod rogon fare Psalmist, machane gad be par ko “tin tomuren e rran.” Boor e girdi’ ni gad ma non ngorad ni dariy e t’ufeg rorad ko tin nib ga’ fan ni bay ko tirok Got ban’en​—n’en ni yad ma nameg e kemus ni pi n’en ni fan ngorad nge chugum, ma ngongol rorad e ba tolngan’ ma dariy e tayfan riy. (2 Timothy 3:1-5) Piin Kristiano ni fel’ yangaren e thingar ra mada’naged boch ban’en ni ma skengnag rogorad. U lan e biney e fayleng ni aray rogon, ma rayog ni nge mo’maw’ ni ngad ayuweged e t’ufeg rodad ni fan ku Jehovah nge tin nib fel’. Uw rogon nrayog ni ngad ayuweged gadad?

4. Uw rogon ni dag fare psalmist nib fel’ u wan’ e pi motochiyel rok Got, maku thingari rin’ e piin Kristiano ni aram rogon fa?

⁴ N’en ni ke ayuweg fare psalmist ni nge k’adan’ ko pi towasar ni i yib ngak e ke pi’ e tayim rok ni nge fal’eg i lemnag nib fel’ rogon e motochiyel rok Got. Aram rogon me t’uf rok e motochiyel rok Got. Riyul’ ni, ba chugur ni nge gubin e verse ko Psalm 119 ma be weliy yu yang ko motochiyel rok Jehovah. a Pi Kristiano e ngiyal’ ney e gathi ka yad bay u tan fare Motochiyel rok Moses, ni pi’ Got ngak fare nam nu Israel kakrom. (Kolose 2:14) Machane, pi motochiyel ni kan dag u lan fare kenggin e Motochiyel e kab ga’ fan. Pi motochiyel ney e ma fal’eg laniyan’  fare psalmist, maku rayog ni nge fal’eg laniyan’ e pi tapigpig rok Got ni yad be athamgil u fithik’ e pi magawon ko yafas e ngiyal’ ney.

5. Gin ngan ko fare Motochiyel rok Moses e gad ra weliy?

⁵ Ere ngad guyed ko mang athamgil e ra yog ngodad u dalip ban’en ko fare Motochiyel rok Moses: fare yaram ni fan ko Sabbath, nge mukun woldug ni ke magey u milay’, nge fare motochiyel ni fan ko piin ni yad ba chogow. Ra reb ma gad ra guy riy ni gad ra nang fan e pi kenggin e motochiyel ney ma rayog ni nge ayuwegdad ni ngad gelgad ko pi magawon rodad e ngiyal’ ney.

Ngad Gamnaged Rogon nib T’uf ni Nge Pow’iydad Got

6. Mang boch ban’en nib t’uf ni nge yog ngak urngin e girdi’?

⁶ Girdi’ e nsunumiyrad nib t’uf boor ban’en rorad. Faanra nge par be’ nib fel’ rogon fithik’ i dow mab t’uf rok e ggan, garbod, nge naun ni nge par riy. Machane yugu aram rogon, ma girdi’ e ba t’uf ni nge ayuweg e “tirok Got ban’en”. Dabi yib e felfelan’ ngak ni faanra dabi rin’ ni aram rogon. (Matthew 5:3) Ke ta’ Jehovah ni rib ga’ fan e tirok Got ban’en me tay chilen ngak e girdi’ rok ni ngar talegned e pi n’en ni yad ma rin’ reb e rran ni polo’ u reb e wik ni ngar tayedan’rad ko tirok Got ban’en.

7, 8. (a) Uw rogon ni tay Got e thil u thilin fare Sabbath nge yugu boch e rran? (b) Mang fan fare Sabbath?

⁷ Fare yaram ni fan ko Sabbath e ke m’ug riy feni ga’ fan ni ngan tay e tayim ni fan ko tirok Got ban’en. Gin som’on ni m’ug riy fare thin ni “sabbath” u lan e Bible e ba peth ko fare manna ni kan pi’ u daken e ted. Ka nog ngak piyu Israel ni thingara kunuyed e re flowa ney u lan nel’ e rran. Bin nel’ e rran ngay, e nog ngorad ni ngar kunuyed e ‘flowa ni fan nga l’agruw e rran,’ ni bochan e dabin pi’ ngorad ko bin medlip e rran. Fa bin medlip e rran e ra mang e “rran nib thothup ni ngan tal ko maruwel,” ma ra be’ ma nge par u tafen. (Exodus 16:13-30) Reb ko fa ragag i motochiyel ni kan tay chilen e dabin maruwel ko rorran ni Sabbath. Re rran nem e ba thothup. Wenegan nra yib ni faanra dabin fol ko re motochiyel ney e yam’.​—Exodus 20:8-11; Numbers 15:32-36.

⁸ Fare motochiyel ko Sabbath e be dag e magafan’ rok Jehovah ko tin nib t’uf ko dowef ko girdi’ rok nge tha’ ni bay u thilrad. I yog Jesus ni gaar: “I sunumiy Got e sabbath ni nge yib fan ko girdi’.” (Mark 2:27) Re n’en ney e gathi kemus ni pi’ mat’awun piyu Israel ni ngar toffan gad ya ku ma pi’ e tayim ngorad ni ngar chuchugurgad mar daged e t’ufeg ngak Fa En ni ke Sunumiyrad. (Deuteronomy 5:12) Ireram reb e rran ni kan tay ni fan ko liyor u lan e tabinaw rorad, meybil, nge ngan fal’eg i lemnag fare Motochiyel Rok Got. Re yaram nem e ayuweg piyu Israel ni dab ra fanayed gubin e tayim rorad nge gelngirad ni fan ko ngan yognag e chugum ni boor. Re Sabbath nem e be puguran ngorad ni tha’ ni bay u thilrad Jehovah e ir e n’en th’abi ga’ fan u lan e yafas rorad. I sul Jesus u daken e re motochiyel nem ni dar ma thil u nap’an ni gaar: “Fare babyor nib thothup e be gaar, girdi’ e dabiyog ni yigoo flowa e ra i kay me par nib fos, machane urngin bug e  thin ni be yog Got e ir e ra tay e girdi’ nib fos ndabi yim’.”​—Matthew 4:4.

9. Mang e n’en ni be fil fare yaram ko Sabbath ni fan ko piin Kristiano?

⁹ Girdi’ rok Got e dakurur ma madenomnaged fare Sabbath ni ngan par nib polo’ reb e rran ara 24 e awa ni yibe toffan, machane ka be par fare yaram ko Sabbath nib ga’ fan ni gathi kemus nib chep ni kakrom. (Kolose 2:16) Gathi be puguran e re n’ey ngodad ni mus ngodad mab t’uf ni ngad ted reb e tayim ni ngad rin’ed boch ban’en ni rayog ni nge mon’ognag e tha’ u thildad Got? Tin ni gad ma rin’ ni fan ko liyor rodad ngak Got e susun ni dabi war ni bochan ni kaygi gel i lemnag murung’agen e chugum ara ngan lek e fafel. (Hebrews 4:9, 10) Ere rayog ni ngad fithed gadad ni nge lungudad: “Mang e n’en nib m’on u lan e yafas rog? Gu be tay nib ga’ fan u wan’ug e fol Bible, meybil, un ko muulung, nge machib ni murung’agen fare Gil’ilungun, fa? Fa bay boch ban’en nib m’on ko pi n’ey?” Faan gad ra tay e tirok Got ban’en nib m’on u lan e yafas rodad, ma be micheg Jehovah ngodad ni dabi m’ay rodad e tin nib t’uf ko par rodad.​—Matthew 6:24-33.

10. Uw rogon nra fel’ rogodad ni faan gad ra tay boch e tayim ni fan ko tirok Got ban’en?

¹⁰ Tayim ni gad ma tay ni fan ko fol Bible nge ngan beeg boch e babyor ni bay rogon ko Bible, nib muun ngay ni ngan fal’eg i lemnag e thin ni bay riy, e rayog ni nge ayuwegdad ni ngad chuchugurgad ngak Jehovah. (James 4:8) Be’ ni Susan fithingan ni ke pag 40 e duw ni ke yan e tababnag ni nge tay boch e tayim ni fan ko fol Bible, e yog ni som’on ma gathi ri biyan’ riy. Bod ni ireram reb e maruwel nib gel. Machane nap’an ni ke ulul i beeg, ma munmun ma ke adag. Ma chiney e faanra bay ba ngiyal’ ni dabi fil e Bible ni ir rok ni bochan boch ban’en ma ma kireban’. I yog ni gaar: “Fol Bible e ke ayuwegeg ni nggu nang Jehovah mug sap ngak ni ir e Chitamag. Rayog ni nge pagan’ug ngak mab puf rogog nrayog ni nggu meybil ngak. Rib manigil ni ngan guy feni ri ma t’ufeg Jehovah e pi tapigpig rok, nge rogon ni ma magafan’ ngog, nge rogon ni ngongol ni fan ngog.” Uw feni rib gel e felfelan’ ni ra yib ngodad ni faanra ud ayuweged e tin nib t’uf rodad ni fan ko tirok Got ban’en!

Motochiyel Rok Got ko Mukun Woldug ni Ke Magey u Milay’

11. Uw rogon ni nge ayuwegey fare yaram ni ngan kunuy e tin ni ke magey u milay’?

¹¹ Gin migid ko fare Motochiyel Rok Moses ni be m’ug rogon e magafan’ rok Got nga rogon e par ko girdi’ e aram e ke pi’ mat’awuy ni ngan kunuy e tin ni ke magey u milay’. Ke tay Jehovah chilen ni nap’an ni ra t’ar reb e ta milay’ wom’engin e woldug u milay’ rok, ma susun ni ngan pag e piin nib gafgow ni ngar kunuyed e tin ni ke digey e piin ta mokun woldug. Pi ta milay’ e thingar dab ra t’ared wom’engin e woldug u marichlen e milay’ rorad nge m’ay, ara ra kunuyed gubin e grapes nge olives ni ke aw. Susun ndabin sul ngan fek e yu thum i grain ni kan digey u milay’. Ireray reb e yaram ni bay e t’ufeg riy ni fan ko piin ni yad ba gafgow, nge girdi’ nu bang, nge bitir ndariy e gallabthir rorad, nge piin ni ke yim’ figirngirad. Riyul’, nib gel e maruwel ni ngan kunuy e tin ni ke aw ko woldug ni kan t’ar wom’engin, machane bochan e re n’ey, ma aram e dab kur ninged ban’en.​—Leviticus 19:9, 10; Deuteronomy 24:19-22; Psalms 37:25.

12. Mang e rayog ni nge rin’ e piin tamilay’ nbochan fare yaram ni ngan kunuy e tin ke magey u milay’?

¹² Fare motochiyel ko ngan kunuy e tin ni ke magey u milay’ e de dugliy urngin wom’engin e woldug ni susun ni nge digey e piin ta milay’ ni fan ko piin gafgow. Pi ta milay’ e yad ma dugliy ga’ngin yang ni dab ni t’ar e grain riy u marichlen e milay’. Bochan e re n’em, ma fare yaram e ke fil rogon ni ngan gol. I ayuweg e pi ta milay’ ni ngar daged ni yad be pining e magar ko Cha’ ni be pi’ wom’engin fare woldug, ni bochan ni “ani ma dag e runguy ko piin gafgow e ir e be ta’ fan e [En ni Sunumiy].” (Proverbs 14:31, NW) Boaz e ir be’ ni rin’ ni aram rogon. I guy rogon ni nge yog ku Ruth ni be’ ni ke yim’ figirngin urngin e grain nib t’uf rok. I pi’ Jehovah puluwon nib fel’ rogon ku Boaz ni bochan e gol ni dag.​—Ruth 2:15, 16; 4:21, 22; Proverbs 19:17.

13. Mang e be fil ngodad e motochiyel ni kakrom ko mukun woldug ni ke magey u milay’?

¹³ Rogon e lem ko fare motochiyel ko rogon e mokun woldug ni ke aw e dawori thil. Baadag Jehovah  ni ngii gol e pi tapigpig rok ngak e piin ni yad ba gafgow. Rogon feni gad ba gol, e aram rogon feni yoor e tow’ath nrayog ngodad. I gaar Jesus: “Mu golgad ngak e girdi’ me gol Got ngomed: nra pi’ ngomed nge yan i mus nga rogon e fol riy u wan’, nra map’ nga pa’med ni pire’ nge sugsug pa’med riy. Ya re fol ni ga ra pi’ ngak be’ e ereram e re fol nra pi’ Got ngom.”​—Luke 6:38.

14, 15. Uw rogon nrayog ni ngad daged e gol, ma mang angin nra yib riy ngodad nge piin ni gad be ayuweg?

¹⁴ I fonownag Paul ni “ngad ngongliyed e ngongol nib fel’ ngak e piin ni kad manged girdien e tabinaw rok got u fithik’ e mich u wan’uy ngak Kristus.” (Galatia 6:10) Ere, ba t’uf ni nguuda lemnaged rogon e piin walagdad ni Kristiano ni ma yib e ayuw rok Got ngorad u nap’an ni ran skengnag e michan’ rorad. Machane sana kub t’uf e ayuw rorad u boch ban’en, ni bod rogon e wub rorad nga Kingdom Hall ara nap’an ni nga ranod nga kantin ko chuway’ fa? Bay e pilibthir, ara piin nib m’ar, ara piin ni ke aw nga naun ni bochan e m’ar rorad u lan e ulung rom ni yad ra adag ni ngan yan ni guyrad ngan ayuwegrad min pi’ e athamgil nga lanin’rad? Faanra uda athamgilgad ni ngaud nanged e piin nib t’uf e ayuw rorad, ma rayog ni nge fanaydad Jehovah ni nge fulweg taban e meybil ku be’ nib t’uf e ayuw rok. Ngad ayuweged gadad e maruwel ko Kristiano, machane faanra yira rin’ ma aram e ku be ayuweg e cha’ ni be pi’ e ayuw. Faan gad ra dag e t’ufeg ngak e pi walagdad ma aram e ra k’aring e felfelan’ ngodad nib gel ma gad ra fel’ u wan’ Jehovah.​—Proverbs 15:29.

¹⁵ Ku reb e kanawo’ nib ga’ fan ni ma dag e piin Kristiano e ngongol ndariy e siin riy e aram e yad ma fanay e tayim rorad nge gelngirad ni ngar weliyed e tin nib m’agan’ Got ngay. (Matthew 28:19, 20) Cha’ ni ke felfelan’ ni ke ayuweg be’ ke taw ko ngiyal’ ni ke ognag e yafas rok ngak Jehovah e manang e tin nriyul’ ko fapi thin ni yog Jesus ni gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.”​—Acts 20:35.

Ngad Ayuwgad ko Chogow

16, 17. Mang e be yog fa bin ragag e motochiyel ndabin rin’, ma mang fan?

¹⁶ Fa bin dalip yang ko fare Motochiyel rok Got ngak piyu Israel ni gad ra weliy e chiney e fa bin ragag e motochiyel, ni be yog ni dab ni chogow. Fare motochiyel e be gaar: “Dab mu guy e naun rok be’ me awan’um ngak faanem ni bochan e kam chogownag e naun rok. Dab mu guy e ppin  rok, ara pi sib rok, ara garbaw rok, ara donkey rok, ara ban’en ni fen faanem me awan’um ngak ni bochan e kam chogownag e tin ni ba’ rok.” (Exodus 20:17) Dabiyog ko girdi’ ni nge tay gelngin e re motochiyel ney, ni bochan e dariy be’ nrayog ni nge guy e n’en ni bay u gum’irchaen be’. Ere, re motochiyel nem e ke tolang ke yan i par nga reb e dodow nib tolang ko motochiyel ko girdi’. Ke k’aring piyu Israel ni be’ nge be’ ni ngar nanged ni ra bagayad ma thingari pi’ e fulweg ngak Jehovah, ni ir e ma guy e n’en ni bay u gum’irchaen e girdi’. (1 Samuel 16:7) Maku, re motochiyel ney e ma yan nge taw nga lik’ngin boor mit e ngongol nib togopuluw ko motochiyel.​—James 1:14.

¹⁷ Fare motochiyel nib togopuluw ko chogow e ke ayuweg e girdi’ rok Got ni ngar pilo’gad ko chogowen e chugum, ara chogow, ara ngar gun’gun’ gad ni bochan rarogon e par rorad. Ki ayuwegrad ni dabi waliyrad ban’en ngar uned ko moro’ro’ ara ngongol nde yalen. Gubin ngiyal’ ni bay e girdi’ ni boor ban’en rorad ara ba fel’ rogorad ngodad ni gadad baadag dakenrad. Machane faanra dabda gagiyegnaged rogon e lem rodad u boch ban’en ni aray rogon, ma rayog ni nge kireban’dad me awan’dad ngak yugu boch e girdi’. Be yog e Bible ni chogow e pow ko ‘lem nib kireb.’ Ma kab fel’ ni faanra dab da chogowgad.​—Roma 1:28-30.

18. Mang lem e ke wer u fayleng e chiney, ma mang wenegan nib kireb nrayog ni ngeb?

¹⁸ Re lem ney ni be gel i yan u lan e re fayleng ney ko ngiyal’ ney e be mon’ognag e chogowen e chugum nge tagenging. U daken e advertising ara mdag yaan ban’en, ma pi siyobay e ke k’aring ni ngan adag e chugum ni kab beech ma ku ma k’aring fare lem ni dab da felfelan’gad nge taw nga nap’an ni ke yog ngodad e pi n’ey. Ireray e miti lem ni be yog e Motochiyel rok Jehovah nib kireb. I ginangey apostal Paul ni gaar: “Machane piin ni yad ba adag ni nge yoor e salpiy rorad e yad ma pagrad ngak e pi n’en ni ma pingeg e girdi’ nge denen, mi yad aw ko wup ko ar’ar ni aram e yibe ar’arnag e tin ndariy fan nge tin nra kirebnigey, ni ir e ma giringiy e girdi’ ko tagan mi yad malog. Ya chogowen e salpiy e ir lik’ngin urngin mit e kireb. Boch e girdi’ e ri yad baadag ni nge yog ngorad ni aram tapgin ma kar mal’afgad u rogon ni nge mich Kristus u wan’rad, ma ke m’ingan’rad ke yib e kireban’ ni pire’ ngorad.”​—1 Timothy 6:9, 10.

19, 20. (a) Mang e th’abi ga’ fan ngak e piin nib t’uf rorad e motochiyel rok Jehovah? (b) Mang e yira weliy ko bin migid e article?

¹⁹ Piin nib t’uf rorad e motochiyel rok Got e yad manang e riya’ nra yib ko lem ni chogowen e chugum ma kan ayuwegrad riy. Ni bod rogon fare psalmist ni meybil ku Jehovah ni gaar: “Mu k’aring gum’irchaeg ni ngii lemnag e pi puguran rom, ma gathi salpiy. Motochiyel ni be yib u lugunam e ba fel’ ngog, ma kab fel’ nga bokum biyu’ yang e gol nge silver.” (Psalm 119:36, 72, NW) Ra mich u wan’dad e tin nriyul’ ko pi thin ney ma ra ayuwegdad ni ngad pired ni gad ba palog ko wup ni bod e chogowen e chugum, chogow, nge gun’gun’ ni bochan e rarogon e yafas rodad. “Liyor ni yima tay ngak Got,” e ir e key ko bin riyul’ e fel’ rogon ma gathi ngan yoornag e chugum.​—1 Timothy 6:6.

²⁰ Fare lem ni bay ko fare motochiyel ni ke pi’ Jehovah ngak piyu Israel kakrom e kub ga’ fan ko tayim rodad e ngiyal’ ney ni bod rogon e ngiyal’ ni pi’ Jehovah e re motochiyel nem ngak Moses. Faan gad ra fol ko pi motochiyel ney, ma gad ra nang fan, ma ra t’uf rodad, ma ra gel e felfelan’ rodad. Fare motochiyel e boor e fonow riy ni fan ngodad, ma feni ga’ fan e pi fonow ney e kan dag u lan e yafas nge n’en ni i buch ko girdi’ u lan e Bible kakrom. Boch e pi ney e yira weliy u lan e bin migid e article.

[Footnote]

Uw Rogon ni Ga Ra Fulweg?

• Mang fan nib t’uf e motochiyel rok Jehovah rok fa en ni yoloy e Psalm 119?

• Mang e rayog ni nge fil e piin Kristiano ko fare yaram ko Sabbath?

• Mang ban’en nib ga’ fan ko fare motochiyel rok Got ko mokun woldug ni ke magey u milay’?

• Uw rogon ni be ayuwegdad fare motochiyel u murung’agen e chogow?

[Study Questions]

[Picture on page 19]

Mang e be ga’nag fan fare motochiyel ko Sabbath?

[Picture on page 21]

Mang e be fil ngodad fare motochiyel ko mukun woldug ni ke magey u milay’?