Television​—e Ba Ta Par Bitir nib Fel’ Fa?

YU NGIYAL’, ma ngam tay e bitir rom ngaura felan’gad i yaliy e television ma ga be fal’eg e maruwel rom e ban’en ni gowa rib manigil. Machane mang e ra rin’ e re n’ey ko bitir rom?

“Ki mada’ ko madway ma rayog ni nge yib e kireban’ ngak ko n’en ni be m’ug u television,” rogon ni yog e The New York Times. Kafin uni gay kan pirieg, ni bitir ni taareb e duw rok e kan dag ngorad nochi yang i n’en ni kan fek ko television ni yaan rogon e n’en be rin’ be’ nga ba tagosgos ni ba yoor rogon. Me ul’ul fare Times ni gaar, “Nap’an ra m’ug ni ke tamdag facha’ ko fare tagosgos, me digey fapi bitir ni dabkur fafelgad ngay ma baga’ nra n’en me m’ug ni kar magargad, ara kar dabuyed fa ra yorgad. Ma nap’an nfacha’ nu television e ra felan’ ko fare tagosgos, ma fapi bitir e yad ra fafel ko fare tagosgos.”

Ba gagiyel, ni television e rayog ni nge rin’ ban’en ko madway. Ma uw rogon nfaanra n’uw nap’an ni i yaliy e bitir e television? Dr. Naoki Kataoka, ni professor ara sensey ko bitir u Kawasaki Medical College in Kurashiki, Japan, e kar guyed ni boor e bitir ni ma par ni gathi ri ka ma non ma der m’ug ban’en u owcherad. Urngirad ni kuura guyed e TV ara videos nib n’uw nap’an. Reb e bitir nib pagel ni l’agruw e duw rok e dabiyog ni nge welthin ma de yoor e thin ni manang. Ma guy e videos ni kakadbul nge nep’ ni gubin e rran ni ka nap’an ni gaman e taareb e duw rok. Kemus ni tomuren ni fol e chitiningin ko fonow rok togta ni tal ni dabki pag fare pagel nge guy e videos me i chag ngak ngaur fafelgow ma aram me munmun me yoor bugithin ni nang fare pagel. Arrogon, gallabthir e thingar u ra chaggad ko bitir rorad.

Jehovah Got, e ir Tabolngin e yaram ko tabinaw, mi ri yog feni ga’ fan ni ngu un rin’ ban’en u taabang. Kab kakrom me yog ngak e girdi’ rok ni gaar: “Um filed ngak pi fakmed; [thin rok Got] um weliyed murung’agen ngorad ko ngiyal’ ni gimed bay u tabinaw nge ngiyal’ ni gimed be milekag, nge ngiyal’ ni gimed be toffan nge ngiyal’ ni gimed be maruwel.” (Deuteronomy 6:7) Gallabthir, gathi television, e rayog ni nge fonownag e bitir ko bin th’abi fel’ e kanawo’ ni thin nge ngongol, “ni ngi i tay.”​—Proverbs 22:6.