Ke Thil e Lem ni Bochan e Nib ni Guy

“KARI gu ran’ug ni nggog ko chon e tabinaw rog murung’agen l’agruw i ‘engel’ ni ke l’ogrow Got ngog.” Aram rogon ni ke yoloy be’ nib moon ni ke yib l’agruw i rugod ni Pi Mich Rok Jehovah ra guyew. Boch e wik u m’on ni kar bow, ma ke yim’ leengin ni rib t’uf rok ni 45 e duw yangaren. Ke par nib kireban’. Bay pi fak ni pumoon nge ppin ni kar ilalgad ni yad ma fal’eg laniyan’, machane yad ma par nib palog. Dariy e fager nge piin buguli yoror ni yad ma yib ra guyed.

I gaar fare moon ngak fagal rugod ni kar bow ra guyew, “Dagur meybil ngak Got.” Yugu aram rogon, ma yow ba sumunguy mar piew bang e tract ngak ni kan fek e thin riy u Bible ni bay kenggin ni Mang e Athap Rodad ni Fan ko Piin ni Kar M’ad ni Yad Ba T’uf Rodad? Re nep’ nem me beeg me baud laniyan’.

De n’uw nap’an me sul fagal Mich Rok Jehovah. Ke yib ngan’row feni kireban’ fare moon u nap’an ni ra bow ra guyew ko som’on ma chiney e kar sulow ni ngar nangew salpen. Ke yoloy fare moon ni gaar, “Kug gin, ya fagal rugod e ri yow be lemnageg ma yow baadag ni ngar nangew salpeg.” Rogon ni kar weliyew e thin nu Bible ngak e ke pi’ e athamgil nga laniyan’. Me gaar fagal rugod ngak bay kur sulow bayay. Fare moon e kari felfelan’ me k’aring ni nge yoloy fare thin ni be er nga lang ko re babyor ney nge pi’ nga Kingdom Hall ko Pi Mich Rok Jehovah ni bay ko binaw rok.

U m’on ni nge chuw ko binaw rok ya nge yan i par nib chugur ko bitir rok, me un nga reb e muulung ko Kristiano ko Pi Mich Rok Jehovah ma ra abichgad chon e tabinaw rok reb fagal rugod. Me yol ni gaar: “Nggu chuw ko fa ngi n’em, machane fagal rugod nge boch e girdi’ u lan e ulung romed e bay tagil’rad u lan ngorongoreg nge lan e meybil rog. Arrogon, gu ma meybil e chiney—ni gubin ngiyal’. Kari gu thil ni polo’. Pi girdi’ nem e kar ayuweged e yafas rog, ma gu be felfelan’ ngorad ndariy n’umngin nap’an.”