Piin Ni Fel’ Yangaren, Mu Turguyed Ni Ngam Pigpiggad Ngak Jehovah

“Ere mu dugliyed e daba’ e re kan ni nguum pigpiggad ngak.”​—JOSHUA 24:15.

1, 2. Miti mang taufe e bay ko pi yurba’ i teliw ko Kristiano ni de riyul’?

 “NGAM paged e piin ni bitir ni ngar manged e Kristiano u nap’an ni ke tamilang Kristus u wun’rad.” Aram e n’en ni yog be’ ni Tertullian fithingan, me yoloy e re thin nem ni ke chugur nga tungun e bin l’agruw e chibog ko C.E. I yog e re thin nem ya be togopluw nga reb e ngongol ni yibe rin’ e ngiyal’ nem ni aram e yibe taufenag e piin ni bitir ni kabran. Reb e Padre ni Augustine fithingan e i togopluw ngak Tertullian nge machib nu Bible, ya i yog ni taufe e ma chuweg wenegan e denen ni original, ma piin ni bitir nra yim’ ni kab bitir ni dawor ni taufenag e ra yan ko nifiy u infierno. Ere bochan e re machib nem ma yima taufenag e bitir ni dawori n’uw nap’an ni kan gargeleg.

² Boor yurba’ i teliw ko Kristiano nde riyul’ e chiney ni yad ma taufenag e bitir ni kabran. Maku reb, e n’umngin nap’an chepin e girdi’ ma pi tayugang’ nge pi tayugang’ ko teliw ko pi nam ni yad ma yog ni yad e Kristiano e yad ma towasariy e piin ni “dar nanged Got” ara pagan’ ni ngar uned ko taufe u nap’an ni ke war e nam rorad ko mahl. Machane re ngongol ney ni ngan taufenag e bitir ara ngan towasariy e girdi’ ni ngar uned ko taufe e gathi ba machib ni bay u lan e Bible.

Ngiyal’ Ney e Be’ Ma Ir e Nge Ognag Ir

3, 4. Mang e ra ayuweg e piin nib fel’ yangaren ni ngar turguyed ni ngar ognaged yad ngak Got?

³ Be yog e Bible ni ba thothup e piin ni bitir u wan’ Got ni faanra reb e gallabthir rok e ba Kristiano nib yul’yul’. (1 Korinth 7:14) Ere be yip’ fan ni kan ognag e pi bitir nem ngak Jehovah ni yad e pi tapigpig rok, fa? Danga’. Machane, bitir ni chuguliyrad e pi gallabthir ni kar ognaged yad ngak Jehovah e kan fil ngorad rogon ni nge bagayad ma ir rok e nge ognag ir ngak Jehovah.  Be gaar Solomon ni Pilung: “Fakag, mu fol ko motochiyel rok e chitamam, ma dab mu pag e motochiyel rok e chitinam. . . . Nap’an ni ga be yan ma be pow’iyem, ma nap’an ni ga ra mol me matanageyem, ma nap’an ni ga ra od ma ra ayuwegem. Ya fare motochiyel e bod e magal, ma fare motochiyel e tamilang, ma fonow e aram kanawoen e yafos.”​—Proverbs 6:20-23, NW.

⁴ Fonow ni yib rok e gallabthir ni Kristiano e ra matanagiy e piin nib fel’ yangaren ni faan yad ra fol riy. Ki gaar Solomon: “Be’ nib gonop e ra felan’nag e chitamangin, machane be’ nib balyang e ra kirebnag laniyan’ e chitiningin.” “Fakag, mu telim, um par ni gab gonop, ma ga be fal’eg i lemnag rogon e ngongol ni ga be tay.” (Proverbs 10:1; 23:19, NW) Arrogon, gimed e piin nib fel’ yangaren e thingar mu telmed ko fonow, nge machib, nge ginang ni fan e nge yib angin e fonow rok e gallabthir ngomed. Dan gargelegem ni gab gonop, machane rayog ni nge ‘yog e gonop ngom’ ma ga yan u “kanawoen e yafos.”

Mang e Nguun Pow’iy e Lem?

5. Mang e machib rok Paul ngak e piin ni bitir nge piin ni matam?

⁵ Be gaar apostal Paul: “Piin ni bitir, nguum folgad rok e gallabthir romed nrogon nib chag ngak Somol, ya aray e n’en nib mat’aw. ‘Mu liyor ko chitamam nge chitinam’; ni aray e bin som’on e motochiyel nib muun ngay ban’en ni kan micheg: ‘Ni aram e nguum par nib fel’ rogom, me n’uw nap’an ni mu par u fayleng.’ Ma gimed e pi matam, dab um k’aringed e damumuw ngak pi fakmed, machane ngam chuguliyed yad nrogon ni ma fonownigey Jehovah nge rogon ni ma pow’iy e lem.”​—Efesus 6:1-4, NW.

6, 7. Mang e muun ngay ni ngan chuguliy e bitir nrogon ni ma ‘pow’iy Jehovah e lem,’ ma mang fan ni dabiyog ni nga nog ni de mat’aw ni be suruy e gallabthir laniyan’ e bitir rorow?

⁶ De mat’aw ni nge suruy e gallabthir ni Kristiano laniyan’ e bitir rorad ni yad be chuguliyrad “nrogon ni ma fonownigey Jehovah nge rogon ni ma pow’iy e lem,” fa? Danga’. Dabiyog ni nga nog nib kireb e rok e gallabthir ni yad be fil ngak e bitir rorad e pi n’en nib mat’aw mab yalen. Piin ni de mich Got u wun’rad e yad ma fil ngak e bitir rorad ni dariy e Got, ma dariy be’ ni ma gathibthibnagrad. Piin nib Katolik e ma machibnag e bitir rorad nrogon e machib ko Katolik, ma dariy be’ ni ma gathibthibnagrad. Ere ku dabiyog ni nga nog ni ma suruy e Pi Mich Rok Jehovah pi fakrad ni yad be chuguliyrad ni nge mich e machib rok Jehovah u wun’rad.

⁷ Rogon ko fare babyor ni Theological Dictionary of the New Testament (Jibiki ni Murung’agen Got ko Bin Biech e M’ag), e fare bugithin nu Greek ni kan pilyeg ni “pow’iy e lem” u Efesus 6:4 e be yip’ fan “ni ngan yal’uweg lanin’uy, ara ngan yal’uweg e n’en ni ke oloboch, ni fan ni nge fel’ rogon e lem ni yibe tay ngak Got.” Ra uw rogon ni faan manga togopluw be’ nib fel’ yangaren ko fonow rok e gallabthir rok ni bochan e towasar ni yib rok e pi tafager rok, ara ba adag ni nge fol ko girdi’ ni yoor? Mini’ e be suruy laniyan’ faanem nib fel’ yangaren​—gallabthir rok, fa pi tafager rok? Ma faanra be suruy e pi tafager rok faanem nib fel’ yangaren ni nge un i fanay e falay ni kireb ara drugs, ara chingaw, ara nge un ko ngongol nde yalen, bpuluw ni ngan gathibthibnag e gallabthir rok ni yow be guy rogon ni ngar yal’uwegew laniyan’ fakrow nge nang wenegan e ngongol nib kireb, fa?

8. Mang e n’en nib muun ko n’en ni ‘un fil’ ngak Timothy ni nge michan’?

⁸ I yog apostal Paul ngak Timothy ni ir be’ nib fel’ yangaren ni gaar: “Machane gur e nguum par ko tin nib riyul’ e thin ni kan fil ngom, ni ir e kari mich u wan’um. I gur e ga manang ko mini’ e piin ni ur machibnaged gur, ma ga manang nnap’an ni ka gab bitir ma ga manang e thin ni bay u lan fare babyor nib thothup, ni ir e rayog ni nge tamilangnigem u rogon ni yima thap ngak Got, ni ma yog u daken e michan’ ngak Kristus Jesus.” (2 Timothy 3:14, 15) Ka nap’an ni kab bitir Timothy ma chitiningin nge titaw rok e ur gelnagew e michan’ rok Timothy me ri mich Got u wan’ ni bochan e tamilangan’ ni yib ko Babyor nib Thothup. (Acts 16:1; 2 Timothy 1:5) Boch nga tomren u nap’an ni un e  chitiningin nge titaw rok Timothy ko Kristiano ma dar towasariyew Timothy ni nge michan’ ya ur ‘filew’ ngak e tamilangan’ nu Bible.

Be Piningem Jehovah ni Ngam Mel’eg

9. (a) Uw rogon ni tay Jehovah fan e girdi’ rok, ma mang fan ni ke yodor? (b) Mang e rin’ Fak Got ni maagirag rok ni ir rok e ke turguy ni nge rin’?

⁹ Rayog rok Jehovah ni nge sunumiy e girdi’ rok ni yad bod e masin ni yugu ma rin’ e tin ni m’agan’ Jehovah ngay, ma dabiyog rorad ni ngar mel’eged e tin ni yad ba adag. Machane gathi aram e n’en ni rin’, ya ke tay fan e girdi’ me tow’athnagrad ni nge yog rorad ni ngar turguyed e n’en ni ngar rin’ed. Ma felan’ Jehovah ngay ni nge guy e girdi’ rok ni piin pilibthir ara fel’ yangaren ni yad be pigpig ngak ni bochan e ba t’uf Got rorad. En ni th’abi fel’ e kanawo’ ni ke dag ni be fol ko tin nib m’agan’ Got ngay e ir Fak ni kari maagirag rok. I weliy Jehovah murung’agen Fak ni gaar: “Ereray Fakag nib t’uf rog ni kari felan’ug ngak.” (Matthew 3:17) Ma bin nganni’ i Fak e yog ngak e Chitamangin ni gaar: “Got rog, ri gub adag ni nggu rin’ e tin nib m’agan’um ngay! Thin rom e be par u fithik’ i lanin’ug.”​—Psalm 40:8; Hebrews 10:9, 10.

10. Mang e pigpig ku Jehovah nib fel’ u wan’?

¹⁰ Ba adag Jehovah ni nge fol e pi tapigpig rok ko tin nib m’agan’ ngay ni bochan e yad ba adag ni ngar folgad riy. I weliy e en ni yoloy e psalm murung’agen e pi girdi’ ney ni gaar: “Rofen ni ga ra mahl ngak e pi toogor rom e ra un e tirom e girdi’ ngom nra bagayad me ir e ra ognag ir. Rogon e waangchal ni bay nri kakadbul e aram rogon e piin ni pagel ni girdi’ rom ni bay ra bad ngom nga daken fapi burey nib thothup.” (Psalm 110:3) Urngin girdien e ulung rok Jehovah ni piyu tharmiy nge piyu fayleng e yad ma rin’ e tin nib m’agan’ Got ngay ni bochan e ba t’uf Got rorad.

11. Mang kanawo’ e nge turguy e piin ni fel’ yangaren ni kan chuguliyrad nrogon e Kristiano?

¹¹ Ere gimed e piin nib fel’ yangaren, thingari tamilang u wan’med ni dabi towasariymed e gallabthir romed ara towasariymed e piin ni piilal u lan e ulung ni ngam uned ko taufe. Thingari mu pigpig ku Jehovah ni bochan e ga ba adag ni ngam rin’. I yog Joshua ngak piyu Israel kakrom ni gaar: “Ere mu tiyed fan Somol mi gimed meybil ngak, mi gimed pigpig ngak u fithik’ e tiyan’ nge yul’yul’ . . . Mu dugliyed e daba’ e re kan ni nguum pigpiggad ngak.” (Joshua 24:14-22) Ma ku arrogom, thingar mu turguy rom ni ngam ognagem ngak Jehovah ma ga fanay e yafos rom ni ngam rin’ e tin nib m’agan’ Got ngay.

Mu Rin’ e Tin nib Mil Fan Ngom

12. (a) Rayog rok e gallabthir ni ngar skulnaged pi fakrad, ma mang e dabiyog ni ngar rin’ed ni fan ngorad? (b) Mang ngiyal’ e ra fel’ u p’eowchen Jehovah reb e fel’ yangaren ni nge mil fan ngak ni nge turguy rok e tin nge rin’?

¹² Bayi taw nga nap’an ma gimed e piin nib fel’ yangaren e gimed ra chuw u tan e ayuw rok e gallabthir romed ni yad ba yul’yul’. (1 Korinth 7:14) Be gaar James: “Ere cha’ nde rin’ e tin nib fel’ ni manang nsusun e ir e nge rin’ e ba kireb e rok, ni aram e ke denen.” (James 4:17) Dabiyog rok e gallabthir ni ngar pigpiggad ngak Got ni fan ngak pi fakrad, maku arrogon e piin ni bitir ni dabiyog ni ngar pigpiggad ngak Got ni fan ngak e gallabthir rorad. (Ezekiel 18:20) Kam fil murung’agen Jehovah nge tin nib m’agan’ ngay, fa? Me gur, kam ilal ni rayog ni ngam nang fan e n’en ni ga be fil ma rayog rom ni ngam fal’eg e tha’ u thilmew Got, fa? Ere gathi ba puluw ni ngam lemnag ni ra tay Got ni rayog rom ni ngam turguy rom ni ngam pigpig ngak?

13. Mang deer e nge fith e piin nib fel’ yangaren ngorad ni dawor ra uned ko taufe?

¹³ Gur be’ nib fel’ yangaren ni dawor mu un  ko taufe, ni gallabthir rom e be chuguliyem nrogon e Kristiano, ma ga be un ko pi muulung ni Kristiano, ma ga be un i machibnag fare thin nib fel’ u murung’agen Gil’ilungun Got, fa? Faanra arrogon, ma ga fithem u fithik’ e yul’yul’: ‘Mang fan ni gu be rin’ e re n’ey? Gu ma un ko muulung ma gu be un ko machib ni bochan e ba adag e gallabthir rog ni nggu rin’, fa gu be rin’ ni bochan e gu ba adag ni nggu felan’nag Jehovah?’ Kam micheg ngom “e tin nib m’agan’ Got ngay​—ni tin nib fel’, nib fel’ u wan’ Got ma rib yal’uw,” fa?​—Roma 12:2.

Mang Fan ni Dawor Mu Un ko Taufe?

14. Chon mini’ u lan e Bible e be dag ni dab ni sagaal ko taufe?

¹⁴ “Mang ndab ntaufenigeg?” Aram e n’en ni fith faanem nu Ethiopia ngak Filip u nap’an ni fil ni Jesus e ir fare Messiah. Machane manang faanem nu Ethiopia e machib nu Bible mab tamilangan’ ni susun e dabi sagaal ngay ni nge micheg u fithik’ e yoor ni aram e ngiyal’ ni nge pigpig ngak Jehovah ni ir reb i girdien fare ulung ni Kristiano, me yib e felfelan’ ngak ni bochan e ke un ko taufe. (Acts 8:26-39) Ku arrogon be’ ni ppin ni Lydia fithingan ni ke “tamilangnag Somol laniyan’ ni nge uthum tel ko n’en ni be weliy Paul” ma chingiyal’ nem “min taufenag e re pin nem nge girdi’ nu tabinaw rok.” (Acts 16:14, 15) Maku arrogon faanem ni pilungen e kalbus nu Filippi ni i motoyil ngak Paul nge Silas ni “yow be machibnag e thin rok Somol” nge mu’ “min taufenag ni ka chingiyal’ nem ni ir nge urngin e girdi’ nu tabinaw rok.” (Acts 16:25-34) Ere faanra ke tamilang kenggin e machib u murung’agen Jehovah nge tin nib m’agan’ ngay u wan’um, ma ba fel’ e ngongol rom u lan e ulung, ma gab yul’yul’ ni ga be un ko muulung ma ga be un i machibnag fare thin nib fel’ u murung’agen Gil’ilungun Got, ma mang ni dab mu un ko taufe?​—Matthew 28:19, 20.

15, 16. (a) Mang lem ni de puluw e ma magawonnag boch e fel’ yangaren ni nge dab ra uned ko taufe? (b) Uw rogon e ayuw ni ma yib ngak e piin nib fel’ yangaren ni kar ognaged yad ngak Got mi yad un ko taufe?

¹⁵ Gur, rayog ni nge aw ni ga be maruwar ko re n’ey ni ba ga’ fan ni bochan e ga be rus ni ran gechignagem ni bochan e ngongol nib kireb, fa? Faanra aram arrogon, ma ngam lemnag e re thin ni baaray: Ga ra tay ni nge dab mu fek e license ko yan u karrow ni bochan e ga be rusnag ni ga ra maad’ad u karrow, fa? Ri danga’! Ku arrogon ni nge dab mu maruwar ni ngam un ko taufe ni faanra ke bung rogom ni ngam rin’. Bin riyul’ riy e ra gel e athamgil ni ga ra tay ni ngam togopuluw ko ngongol nib kireb ni faanra kam ognag e yafos rom ngak Jehovah ma kam micheg ni ngam rin’ e tin nib m’agan’ ngay. (Filippi 4:13) Ere gimed e piin ni fel’ yangaren, dab mu lemnaged ni dab ni pufthinnagmed ni faan manga kam rin’ e kireb ma dawor mu un ko taufe. Ya nap’an ni ra taw ko duw rom, ma ra pufthinnagem Jehovah ni demtrug ko kam un ko taufe fa dawor.​—Roma 14:11, 12.

¹⁶ Boor e Pi Mich Rok Jehovah u fayleng i yan ni yad ma lemnag ni ke yib e ayuw ngorad u tomren ni kar turguyed ni ngar uned ko taufe. Bay be’ ni reb e Mich Rok Jehovah u Lenngal yu Europe ni 23 e duw rok. Be yog ni ke un ko taufe  u nap’an ni gaman e 13 e duw rok ma n’en ni ke turguy e ke ayuweg ni nge athamgil ni nge par “u urel ko tin ni ma ar’arnag e piin ni pagel.” (2 Timothy 2:22) Ma nap’an ni kab pagel boch me nameg ni nge un ko machib ni gubin ngiyal’. Ma chiney e be maruwel u reb e branch ofis rok e Pi Mich Rok Jehovah ma be felfelan’ ngay. Maku arrogon gur ni rayog ni nge yog e flaab ngom ni faan ga ra turguy ni ngam pigpig ku Jehovah.

17. Mang boch e ngongol ni kub muun ko “tin nib m’agan’ Jehovah ngay”?

¹⁷ Nap’an ni gad ra ognagdad ngak Got ma gad un ko taufe ma aram tabolngin e yafos rodad ni gad be rin’ e tin nib m’agan’ Jehovah ngay u gubin ban’en ni gad be rin’. Faan gad ra rin’ e n’en ni kada micheged u nap’an ni kada ognaged gadad ngak Got ma thingar da ‘tayed e tayim’ riy. Uw rogon ni gad ra tay e tayim? Dab da fanayed e tayim rodad ni fan ko tin nib m’ay fan ban’en ya gad ra fanay e re tayim nem ni fan ko fol Bible, ma gad ra un ko muulung, ma gad ra un i machibnag fare “thin nib fel’ ni murung’agen e gagiyeg rok Got” nrogon rayog rodad. (Efesus 5:15, 16; Matthew 24:14) Bay angin e n’en ni kada turguyed ni kada ognaged gadad ngak Jehovah ma gad ba adag ni ngada rin’ed e tin nib m’agan’ ngay ya n’en ni kada turguyed e bay rogon nga urngin ban’en ni gad ra rin’, nib muun ngay e fafel ni gad ma tay nge rogon e abich nge garbod ni gad ra tay nge miti musik ni gad ra motoyil ngay. Mang ni dab mu mel’eg e fafel ni rayog ni ngam un ngay ni manemus? Bokum biyu’ e Pi Mich Rok Jehovah nib fel’ yangaren e ma un ko miti fafel nib fel’ mab puluw ko “tin nib m’agan’ Somol ngay.”​—Efesus 5:17-19.

“Gamad Ra Un Ngom”

18. Mang deer e nge fith e piin nib fel’ yangaren ngorad?

¹⁸ Ka nap’an e duw ni 1513 B.C.E nge mada’ ko Pentekost ko 33 C.E., ma immoy ba ulung i girdi’ rok Jehovah u fayleng ni ke mel’egrad Jehovah ni ngar liyorgad ngak ma ngar manged e pi mich rok. (Isaiah 43:12) Kan gargeleg piyu Israel nga lan e re nam nem. Ma nap’an e Pentekost me sum reb e ‘nam’ nib beech rok Jehovah u fayleng, ni fare Israel nib fanathin, ni yad e girdi’ ni “ke melegrad Got.” (1 Peter 2:9, 10; Acts 15:14; Galatia 6:16) I yog apostal Paul ni ke “ngongliydad [Kristus] ngad manged ba ulung i girdi’ ni kad machalboggad nib mil fadad ngak me pasigan’dad ni ngad rin’ed e tin nib fel’.” (Titus 2:14) Gimed e piin nib fel’ yangaren e ke puf rogomed ni ngam turguyed romed e gini bay e pi girdi’ nem riy. Chon mini’ e ngiyal’ ney e yad “fare nam nib mat’aw nib yul’yul’ e ngongol rorad” ni yad ma fol ko machib nu Bible, ni yad e Pi Mich nib yul’yul’ rok Jehovah ni yad be wereg e machib u murung’agen Gil’ilungun Got ni ke mus kanawoen e athap rok e girdi’ nu fayleng? (Isaiah 26:2-4) Amu yaliy e pi yurba’ i teliw ma ga taarebnag e ngongol ko girdi’ riy ko ngongol rok e tin riyul’ e tapigpig rok Got.

19. Rib mich e mang u wan’ bokum milyon e girdi’ u fayleng i yan?

¹⁹ Rib mich u wan’ bokum milyon e girdi’ u fayleng i yan, ni ku boor e piin nib fel’ yangaren ni yad muun ngay, ni tin ni ka bay ko piin ni kan dugliyrad ko Pi Mich Rok Jehovah e yad fare “nam nib mat’aw.” Yad be gaar ngak fare Israel nib fanathin: “Gamad ra un ngomed, ya kug rung’aged ni bay Got romed.” (Zekariah 8:23) Gamad be athapeg ma gamad be yibilay ngak Got ni gimed e piin ni fel’ yangaren e ngam turguyed ni ngam uned nga fithik’ e girdi’ rok Got ma aram rogon ni gimed ra “mel’eg e yafos”​—ni yafos ni manemus u lan e m’ag rok Jehovah nib beech.​—Deuteronomy 30:15-20; 2 Peter 3:11-13.

Ngada Sulod Nga Daken

• Mang e muun ko ngan pow’iy e lem?

• Miti mang pigpig e ra felan’ Jehovah ngay?

• Mang e nge turguy urngin e piin nib fel’ yangaren ni kan chuguliyrad nrogon e Kristiano?

• Mang fan ni dab unun’ yaran e taufe nge n’uw nap’an?

[Study Questions]

[Pictures on page 12]

Mini’ e ga ra motoyil ngak?

[Picture on page 14]

Uw rogon e ayuw nra yib ngom ni bochan e kam ognagem ngak Got kam un ko taufe?

[Picture on page 15]

Mang ni dab mu un ko taufe?