“Kam Rung’aged Murung’agen E Gum’an’ Ni Ta’ Job”

“Kam rung’aged murung’agen e gum’an’ ni ta’ Job, ma gimed manang e tin ni pi’ Somol ngak Job ko tomur. Yi Somol e ri ma runguy ma ma taganan’ ngak e girdi’.​—JAMES 5:11.

1, 2. Mang gafgow e ke mada’nag l’agruw e mabgol u Poland?

 DAWORI gaman reb e duw n’umngin nap’an ni ke mang Harald Abt reb e Pi Mich Rok Jehovah me yib i ga’ lungun e pi salthaw rok Hitler u Danzig (ni yima yog yu Gdansk ngay e chiney) ni bay u lel’uch u Poland. Ma aram me mo’maw’ rogon e par i yan, arrogon rib gel e riya’ riy ngak e tin nriyul’ e Kristiano u rom. Fapi Gestapo e ra guyed rogon ni ngar towasariyed Harald ni nge sign nga bangi babyor ni nge digey e michan’ rok, machane me siyeg. U tomren in e wik u kalbus, ma aram min pi’ nge yan nga Sachsenhausen concentration camp, mo rom e un gafgownag riy mu un li’. Ma bay ba salthaw ni yip’ pa’ nga tan e chigiy u lan fare naun ni yima urfiy e girdi’ riy ni ke yim’ me gaar ngak Harald, “Ka lan 14 e rran ma bay mman e ngaram ngak Jehovah rom ni faanra kag be fol ko michan’ rom.”

² Nap’an ni kan kol Harald, ma ppin rok, ni Elsa fithingan, e ka be tuthuthnag fak row ni ppin ni ragag e pul yangaren. Machane fapi Gestapo e dar paged Elsa. De n’uw nap’an, min fek fare tir ni fak rok, ma aram min pi’ nge yan ko extermination camp ni bay u Auschwitz. Machane, i yog rok ni nge par nib fos nib n’uw boch nap’an ni bod rogon Harald. U lan fare The Watchtower ko April 15, 1980, e rayog ni ngam beeg riy rogon ni yog ni ngar k’adan’gow ko gafgow ni yib ngorow. I yoloy Harald ni gaar: “Ragag nge aningeg e duw u lan e yafas rog ni kug par u lan e concentration camp ni bochan e michan’ rog ku Got. Ka ni fitheg ni gaar: ‘Ppin rom e ku ir reb e ayuw ngom ke yog nim k’adan’um u fithik’ urngin e pi n’ey?’ Ri arrogon! Gu manang ko som’on nri dabi digey e michan’ rok, ma re n’ey e ke ayuwegeg ke yog ni nggu par ni gub gel. Gu manang ni kab fel’ u wan’ ni nge guyeg ni ku gum’ ko bin ni nge nang ni kan pageg ni bochan e kug digey e michan’ rog. . . . I athamgil Elsa u fithik’ e gafgow ni boor ni i yib ngak u lan boor e duw u concentration camp u Chiyamen.”

3, 4. (a) N’en ni ke rin’ mini’ e rayog ni nge pi’ e athamgil nga laniyan’ e Kristiano ni ngar athamgilgad? (b) Mang fan ni be fonownagdad e Bible ni ngad fal’eged i lemnag e n’en ni buch ku Job?

³ Ngan gafgow ko kireb e de mom, nrogon ni ke yog boch e Pi Mich. Bochan e re n’ey, ma be fonownag e Bible e piin Kristiano ni gaar: “Mu tafinayniged fapi profet ni yad owchen Somol  ni ur weliyed e thin rok. Mu filed rorad rogon e gum’an’ nge k’adan’ ni ur tiyed u tan e gafgow ni un ta’ ngorad.” (James 5:10) N’umngin nap’an chepin e girdi’, ma boor e pi tapigpig rok Got ni kan gafgownagrad ni dariy tapgin. Bochan e n’en ni ke rin’ fapi “girdi’” ma rayog ni nge pi’ e athamgil nga lanin’dad ni ngkud ul’ulgad ko mil ko fare sagreng ko Kristiano ni gad be athamgiliy.​—Hebrew 11:32-38; 12:1.

⁴ U lan e Bible, me Job e par ni be’ nib fel’ ni ngan folwok rok u rogon e k’adan’ ni i tay. I yoloy James ni gaar: “Gadad be yog ni kar felan’gad ni bochan e ra k’adedan’rad. Kam rung’aged murung’agen e gum’an’ ni ta’ Job, ma gimed manang e tin ni pi’ Somol ngak Job ko tomur. Yi Somol e ri ma runguy ma ma taganan’ ngak e girdi’.” (James 5:11) N’en ni buch ku Job e be dag ngodad rogon e tow’ath ni ran pi’ ngak e piin yad ba yul’yul’, ni ma tow’athnagrad Jehovah. Babyor ku Job e be ayuwegdad nge pi’ e fulweg ko pi deer ni baaray: U nap’an ni ra yib e gafgow ngodad ma mang fan nib t’uf ni ngad gayed rogon ngad nanged fan e pi deer nib l’ag ngay? Mang e pi fel’ngin nge ngongol e ra ayuwegdad ngad athamgilgad? Uw rogon nrayog ni ngad gelnaged e pi walagdad ni Kristiano ni kar gafgowgad?

Ngan Nang Fan Urngin Ban’en nib L’ag Ngay

5. Mang e bin nth’abi ga’ fan e deer ara issue ni susun ni nguud lemnaged u nap’an ni gad ra mada’nag e skeng?

⁵ Ra ngad pared nib thabthabel ko tirok Got u nap’an ni keb e magawon ngodad mab t’uf ni ngad nanged urngin ban’en nib l’ag ngay. Ya faanra danga’, ma magawon rodad e rayog ni nge warnag e michan’ rodad. Fare issue ara deer u murung’agen e yul’yul’ ngak Got e rib ga’ fan. Chitamangidad ni bay u tharmiy e be yog ban’en nrayog ni ngad ted nga gum’irchadad ni be gaar: “Fakag, mu llowan’, ma ga felfelan’nag gum’irchaeg, ni fan ni nge yog ni nggu pi’ e fulweg ngak e en ni be moningnageg.” (Proverbs 27:11, NW) Rib gel e ta’ fan ko re n’em! Yugu aram rogon ni gad ba meewar ma daworda flontgad, machane rayog ni ngad felfelan’niged e En ni Sunumiydad. Gad ma rin’ ni aram rogon u nap’an ni ma k’aringdad e t’ufeg rodad ngak Jehovah ni ngad gelgad ko skeng. T’ufeg nib riyul’ ko Kristiano e ma k’adan’ u urngin ban’en. Ma dabi war.​—1 Korinth 13:7, 8.

6. Uw rogon ni ma moningnag Satan Jehovah, ma uw feni gel?

⁶ Fare babyor ku Job e rib tamilang ni be gagiyelnag Satan ni ir e en ni ma moningnag Jehovah. Ku be dag rogon e ngongol nib kireb rok e re tatogopuluw ney ndabin guy nge n’en ni be yim’ ni bochan ni nge kirebnag e tha’ u thildad Got. Rogon e n’en ni ke buch rok Job, e be yog Satan nib kireb e rok gubin e tapigpig rok Jehovah ma be gay rogon ni nge micheg ni t’ufeg rorad ngak Got e rayog ni nge war. Be moningnag Got ni ke yan bokum biyu’ e duw. Nap’an ni kan non’ Satan nga wuru’ e tharmiy, ma ba lam u tharmiy e weliy murung’agen ni ir e “ma egnag pi walagdad” me yog ni ma “sak’iy u p’eowchen Got ngi i thibthibnagrad ni rran nge nep’.” (Revelation 12:10) U daken e athamgil ni gad be tay u fithik’ e yul’yul’, ma rayog ni ngad daged ni gathibthib ni be tay e de riyul’.

7. Uw rogon nrayog ni ngad togopuluwgad ko meewar ko dowef rodad ya nge yog nda gelgad ko skeng ni ma yib ngodad?

⁷ Thingar dab da paged talin ni fare Moonyan’ e demtrug e miti gafgow nra yib ngodad ma ra fanay nge gay rogon ni ngad paloggad rok Jehovah. Wuin e wawliy Jesus? I wawliy u nap’an ni ke yib e bilig ngak u tomuren ni par nde abich ni boor e rran. (Luke 4:1-3) Machane, gelngin e tirok  Got ban’en ni bay rok Jesus, e ayuweg ni nge siyeg e wup rok Satan. Rib ga’ fan ni ngad togopuluwgad nga gubin e meewar ko dowef rodad​—ni sana ke yib ni bochan e m’ar ara bochan e pilibthir—​ni ngad fanayed gelngin e tirok Got ban’en! Yugu aram rogon ni “be meewar dowdad i yan,” ma dab da talgad ni bochan e “lanin’dad e yibe beechnag u reb e rran ngu reb.”​—2 Korinth 4:16.

8. (a) Uw rogon nrayog ni nge kirebnagdad e lem ni magafan’? (b) Mang lem e bay rok Jesus?

⁸ Tin ni kub muun ngay, e lem ni magafan’ e rayog ni nge kirebnag be’ ko tirok Got. Rayog ni nge lemnag be’ ni gaar: ‘Mang fan ni nge pag Jehovah nge buch e biney?’ Maku bochan e kan dag e ngongol ngak nde sumunguy, ma rayog ni ngki fith be’ ni gaar: ‘Mang fan ni nge dag reb e walag e ngongol ngog ni aray rogon?’. Lem ni aray rogon e rayog ni k’aringdad ni nge dab da sapgad ko pi n’en nib ga’ fan ma gad par ni yigoo rarogodad nge magawon rodad e gad be lemnag. Kab gel e gafgow ni ta’ fa dalip i fager nga laniyan’ Job ko gafgow ni tay e m’ar ngak. (Job 16:20; 19:2) Maku aram rogon, ni yog apostal Paul ni damumuw nib n’uw nap’an e rayog ni ‘nge [bing e kanawo’] ngak moonyan’.’ (Efesus 4:26, 27) Ra yib angin nib fel’ ngak e piin Kristiano ni faan yad ra bod Jesus ‘[ngar] paged fan urngin ban’en ngak fare Tapufthin nib mat’aw,’ ni aram Jehovah Got, ko bin ni nge chalbarad ara ra damumuwgad ku be’ ara kaygi pag rogon nra lemnaged e tin nde puluw ko pi magawon rorad. (1 Peter 2:21-23) Faanra bay e “binem e lem” rok Jesus rodad ma rayog ni nge yororiydad rok Satan.​—1 Peter 4:1.

9. Mang e n’en ni be micheg Got ngodad u murung’agen e magawon ara skeng ni ma yib ngodad?

⁹ Tin nib ga’ fan, e thingar dab da sapgad ko magawon rodad ni ban’en ni baadag Got ni nge buch rodad. Re lem ney e kirebnag laniyan’ Job u nap’an ni gathibthibnag u boch e thin ni yog e piin ni susun e ngar fal’eged laniyan’. (Job 19:21, 22) Be micheg e Bible ngodad e pi thin ni baaray ni gaar: “Thingari dabi gaar [be’] u laniyan’, ‘Re n’ey ni be n’en nge wawliyeg nggu denen e yib rok Got.’” (James 1:13) Ba thil, ya ke micheg Jehovah ngodad ni ra ayuwegdad ni yugu demtrug e miti magawon ni ke yib ngodad ma rayog ni ngad pithiged ma ku be pi’ ngodad e kanawo’ nrayog ni ngad siyeged e pi skeng ni ma yib ngodad. (Psalms 55:22; 1 Korinth 10:13) Faan gad ra chuchugur ngak Got ko ngiyal’ nib gel’ e gafgow rodad, ma rayog ni ngad pired nib thabthabel e lem rodad u gubin ban’en ma gad togopuluw ko fare Moonyan’.​—James 4:7, 8.

Ayuw ni Fan ko K’adan’

10, 11. (a) Mang e ayuweg Job ni nge k’adan’? (b) Uw rogon ni ke ayuweg Job e nangan’ nib fel’?

¹⁰ I par Job ni kab yul’yul’ ni yugu aram rogon e magawon rok​—nib muun ngay e thin nib gel ko “piin ni susun e ngar fal’eged laniyan’” nge balyangan’ ni ke tay ni bochan e gafgow ni ke yib ngak. Mang e rayog ni ngad filed ko k’adan’ ni ke tay? Dariy e maruwar riy ni n’en ni ke ayuweg ni nge gel e yul’yul’ rok ngak Jehovah. ‘I par ni ir be’ nib manigil ma be ayuw ni nge dabi rin’ ban’en nib kireb.’ (Job 1:1) Ereram kanawoen e yafas rok. I siyeg Job ni nge digey Jehovah, ni mus ko ngiyal’ ni de nang ko mang fan nib tomgin ni kireb gubin ban’en. Ba mich u wan’ Job ni thingari pigpig ku Got ni yugu demtrug e n’en nra buch rok.​—Job 1:21; 2:10.

¹¹ I par laniyan’ Job nib fel’ ni bochan e ba fel’ e nangan’ rok. Yu ngiyal’ e gowa nge yim’, machane manang ni ke rin’ e tin nrayog rok ni nge ayuweg yugu boch e girdi’, ma ke par ni be fol ko pi motochiyel rok Jehovah nib mat’aw, ma ke siyeg gubin mit e liyor ni googsur.​—Job 31:4-11.

12. Uw rogon e ngongol ni dag Job ko ayuw ni pi’ Elihu ngak?

¹² Rriyul’, arrogon, ba t’uf ku Job ni nge thilyeg rogon ni ma sap nga boch ban’en. Me m’agan’ ko re n’em u fithik’ e sobut’an’​—ni reb e ban’en ni ayuweg ni nge k’adan’ u fithik’ e pi n’ey. I motoyil Job u fithik’ e sobut’an’ ko fonow ni pi’ Elihu ngak, ma i fol ko pi n’en ni yal’uweg Jehovah riy. I yog ni gaar: ‘Ug weliy murung’agen bogi ban’en nri da gu nang fan. Kug tamra’ nga urngin e tin ni kug weliy ma kug kalngan’ug u roy u fithik’ e fiyath nge awat.’ (Job 42:3, 6) I gaar Job: “Gu manang ni gubin ma rayog rom [Jehovah].” (Job 42:2) Bochan e n’en ni weliy Jehovah u murung’agen feni gilbuguwan, me tamilang rogon i nang fan rok Job gelngin e thil u thilrow e En ni Tasunumiy.

13. Uw rogon ni yib angin ngak Job e runguy ni dag?

 ¹³ Tomur riy, me dag Job e kanawo’ ni ngan fol riy u murung’agen e runguy. Fa piin ni ur dake yad be fal’eg laniyan’ e ra kirebnaged e lem rok, machane nap’an ni yog Jehovah ni nge meybil ni fan ngorad, me fol riy. Ka nap’an e ngiyal’ nem, me sulweg Jehovah dow Job nga rogon. (Job 42:8, 10) Rib tamilang, ni damumuw e dabi ayuwegdad ni ngad k’adedan’dad, machane t’ufeg nge runguy e rayog. Gad ra pag e damumuw ma rayog ni ngad baudnaged gadad nge yog nda gelgad ko pigpig ni gad be tay ku Jehovah, ma ireray reb e kanawo’ nra felfelan’nagdad Jehovah riy.​—Mark 11:25.

Ta Fonow nib Gonop ni Ma Ayuwegdad ni Ngad K’adedan’dad

14, 15. (a) Mang boch e pi fel’ngin nra bung rogon nag reb e ta fonow ni nge ayuweg yugu boch e girdi’? (b) Mu weliy fan ni yog ni nge ayuweg Elihu Job.

¹⁴ Ku reb e n’en nrayog ni ngkud filed ko n’en ni buch ku Job e fel’ngin e fonow ni i pi’ boch e girdi’ ngak u fithik’ e gonop. Pi cha’ ney e yad bod reb e walag “ni bay ko ngiyal’ ni keb e gafgow.” (Proverbs 17:17) Machane, bod ni dag e n’en ni buch ku Job, boch e ta fonow e rayog ni ngar kirebaniged laniyan’ ko bin ni ngar fal’eged. Reb e ta fonow nib fel’ e ba t’uf ni nge nang laniyan’ e girdi’, me ta’ fan, me sumunguy, ni bod Elihu. Piin Piilal nge ku boch e Kristiano ni kar ilalgad ko tirok Got ban’en e sana ba t’uf ni ngar thilyeged rogon e lem rok boch e walag ni ke yib e magawon ngorad, ma re n’ey, e piin ni yad be pi’ e fonow e rayog ni ngar filed boch ban’en ko fare babyor ku Job.​—Galatia 6:1; Hebrews 12:12, 13.

¹⁵ Boor ban’en nib fel’ nrayog ni ngan fil u rogon ni pithig Elihu e re magawon ney. I motoyil nib n’uw nap’an u m’on ni rin’ ara yog ban’en u tomuren fapi thin ni yog fapi fager ku Job ngak. (Job 32:11; Proverbs 18:13) I pining Elihu fithingan Job me non ngak ni wod reb e fager. (Job 33:1) De bod fa dalip ni’ ni ur dake yad be fal’eg laniyan’ Job, ya de ta’ Elihu nib tolang ngak Job. I yog ni gaar: “I gag e ku ni ngongliyeg ko but’.” Dabun ni nge yog boch e thin ni dariy fan nge wun’ daken e gafgow ku Job. (Job 33:6, 7, NW; Proverbs 12:18) I pining e magar ku Job ni bochan ni ke rin’ e tin nib mat’aw, ma de gathibthibnag ni bochan rogon ni i ngongol ko som’on. (Job 33:32) Bin nth’abi ga’ fan e, i sap Elihu nga gubin ban’en nrogon ni ma sap Got ngay, me ayuweg Job ni nge nang ni Jehovah e dabi ngongol nde mat’aw. (Job 34:10-12) I pi’ e athamgil nga laniyan’ Job ni nge sonnag Jehovah, ko bin ni nge dag rogon feni mat’aw. (Job 35:2; 37:14, 23) Piin ni piilal nge ku boch e girdi’ e rayog ni nge fel’ rogorad ko re fonow ney.

16. Uw rogon ma fa dalip e fager rok Job nde riyul’ e ra manged talin e maruwel rok Satan?

¹⁶ Thin ni yog Elihu ni bay e gonop riy e ba thil ko n’en ni yog Elifaz, Bildad, nge Zofar. I yog Jehovah ngorad ni gaar: “Da mu weliyed e tin riyul’ ni murung’ageg.” (Job 42:7) Ni ku ra rogned nib fel’ e n’en ni kar lemnaged, ma kar ngongolgad ni bod rogon e talin e maruwel rok Satan ko bin ni ngar manged tafger nib yul’yul’. Yad gubin nra lemnaged nib kireb e rok Job ko gafgow ni yib ngak. (Job 4:7, 8; 8:6; 20:22, 29) Rogon e n’en ni yog Elifaz, e Got e dariy e pagan’ rok ngak e pi tapigpig rok, ma dariy fan u wan’ ko gad ba mat’aw fa danga’. (Job 15:15; 22:2, 3) Ku i yin’ Elifaz e kireb nga daken Job u boch e oloboch ni dawori rin’. (Job 22:5, 9) Machane Elihu e ayuweg Job ni nge yog ni thabthabel e sap rok biyay ko liyor rok ngak Jehovah, ni aram e n’en ni ma nameg e ta fonow ni ma t’ufegey.

17. Mang e susun e nga ud lemnaged u nap’an ni ke yib e skeng ngodad?

 ¹⁷ Ku bay ban’en nrayog ni ngad filed u murung’agen e k’adan’ ko fare babyor rok Job. Got rodad ni ma t’ufegey e ma fal’eg i yaliy gubin ban’en ma rayog ni nge ayuwegdad u boor e kanawo’. Kad weliyed faram murung’agen e n’en ni buch ku Elsa Abt. Ngad sulod ko n’en ni yog ko tomur ni gaar: “U m’on nni koleg, ma kug beeg bangi babyor ni yoloy reb e walag ni ppin ni gaar nap’an ni gad bay u tan e gafgow ma gelngin Got e ma k’aring ni nge yib e gapas ngodad. Kug lemnag ni sana ke ga’ nag i yog fare n’em. Machane nap’an ni yib e gafgow ngog, mug nang ni n’en ni yog e riyul’. Ri ma buch ni aram rogon. Mo’maw’ ni ngam lemnag ni faanra dawori buch rom. Machane riyul’ ni buch rog. Ma ayuw Jehovah.” Dar weliy Elsa e n’en nrayog ni nge rin’ fa n’en ni rin’ Jehovah bokum e chibog kakrom u nap’an Job. Be weliy murung’agen e tayim rodad. Arrogon, “ma pi’ Jehovah e ayuw”!

Ba Felfelan’ e En ni Ma K’adan’

18. Mang angin ni yib ku Job ni bochan e k’adan’ ni tay?

¹⁸ Buchuuw i gadad e ra mada’nag e gafgow ni taareb rogon ku Job. Machane demtrug e gafgow nra yibnag e re m’ag nib kireb ney ngodad, ma bay fan ni ngad pired ni gad ba yul’yul’, ni bod e n’en ni rin’ Job. Tin nriyul’ riy e, k’adan’ e ir e flaabnag e yafas ku Job. I fal’eg rogon, me par ni ke yal’uw. (James 1:2-4) I gelnag e tha’ ni bay u thilrow Got. I yog Job ni gaar: “Ug par ni ke mus ni tin ni ke weliy e girdi’ ngog e gu manang, ma chiney e kug guyem nga owcheg.” (Job 42:5) Kan micheg ni ke ban Satan ni bochan e de yog rok ni nge kirebnag rogon e yul’yul’ rok Job. Bokum miriay e duw nga tomren, ma ka ma yog Jehovah e tapigpig rok ni Job ni ir be’ ni ma dag e ngongol nib mat’aw. (Ezekiel 14:14) Murung’agen e yul’yul’ nge k’adan’ rok Job e ku ma pug laniyan’ e girdi’ rok Got e ngiyal’ ney.

19. Mang fan ni ga be lemnag ni ba ga’ fan e k’adan’?

¹⁹ Nap’an ni yoloy James murung’agen e k’adan’ ngak e tin nsom’on e Kristiano, ma i weliy rogon nra fel’ laniyan’ be’ ni bochan. Ma i fanay e n’en ni buch ku Job ni nge puguran ngorad ni ma tow’athnag Jehovah e pi tapigpig rok nib yul’yul’. (James 5:11) Gad ra beeg u Job 42:12 ni gaar: “Me fal’eg Somol waathan Job ko tin ni baaram e duw ni bay nga tungun e par rok Job ko biney e tamilang.” I pi’ Got ngak Job e tin ni ke mul u pa’ ni l’agruw yay nib muun ngay, me par nib n’uw nap’an nib felfelan’. (Job 42:16, 17) Ku aram rogon, ndemtrug e amith, gafgow, nge mochuch ni gad ra k’adan’ riy u nap’an tomren e re m’ag ney ma yira chuweg min pag talin u lan e fayleng rok Got nib beech. (Isaiah 65:17; Revelation 21:4) Kad rung’aged murung’agen e k’adan’ ni tay Job, ma ke mudugil u wan’dad, u daken e ayuw rok Got, ni ngad folwokgad ko n’en ni rin’ Job. Be micheg e Bible ni gaar: “Ba felan’ e en nra par nib yul’yul’ ngak Got ko ngiyal’ ni be yib e tin nib mo’maw’ riy ngak, ni aram e yibe skengnag; ya ra athamgil ndabi mul ko re skeng nem ma yira pi’ e yafos ngak, ni ereram fare puluwon ni ke yog Got nra pi’ ngak e piin nib t’uf Got rorad.”​—James 1:12.

Uw Rogon ni Ga Ra Fulweg?

• Uw rogon nrayog ni ngad felfelan’naged gum’irchaen Jehovah?

• Mang fan ndab dogned ni magawon rodad e be dag ni ban’en ni baadag Got ni nge buch?

• Mang e n’en ni ayuweg Job ni nge k’adan’?

• Uw rogon nrayog ni ngad boded Elihu u nap’an ni gad be gelnag pi walagdad?

[Study Questions]

[Picture on page 26]

Ba ta fonow nib manigil e ma thamiy e kireban’ ko girdi’, ma ma dag e ta’ fan nge gol

[Pictures on page 27]

Elsa nge Harald Abt