Madugdag Ku Jehovah​—Mu Felfelan’!

“Nge felfelan’ e ani bay madgun Jehovah u wan’.”​—PSALM 112:1, NW.

1, 2. Mang e ra yibnag madgun Jehovah?

 FELFELAN’ e gathi ban’en nib mom ni ma yib. Bin nriyul’ e felfelan’ e ma yan u rogon e tin nib fel’ ni gad ma mel’eg, nge tin nib fel’ ni gad ma rin’, nge pi n’en nib kireb ni gad ma digey. Jehovah, ni ir e Ani Sunmiydad, e ke pi’ e Thin rok ngodad, ni aram e Bible, ni nge fil ngodad rogon ni ngad felfelan’gad ko bin nth’abi fel’ i kanawoen e yafas. Faan gad ra gay ma gad fol ko kanawo’ rok Jehovah, ni gad be dag ni bay madgun Got rodad, ma riyul’ nrayog ni ngad felfelan’gad.​—Psalm 23:1; Proverbs 14:26.

² U lan e biney e thin, e gad ra guy boch ban’en ni ke buch u nap’an e Bible nge ngiyal’ ney ni be dag ko uw rogon ma madgun Got e rayog ni nge pi’ gelngin be’ ni nge togopuluw ko n’en ni be wawliy ni nge rin’ e tin nib kireb me yib gelngin ni nge rin’ e tin nib fel’. Gad ra guy ni madgun Got e ra yibnag e bin nriyul’ e felfelan’ ni aram e ma k’aringdad ni ngad yal’uweged e tin ni gad be rin’ nib kireb, ni bod rogon e n’en ni rin’ David ni Pilung. Gad ra guy ni madgun Jehovah e ban’en ni kan fil ngodad nrib ga’ fan nrayog ni nge pi’ e gallabthir ko bitir rorad. Arrogon, be micheg e Thin Rok Got ngodad ni: “Nge felfelan’ e ani bay madgun Jehovah u wan’.”​—Psalm 112:1, NW.

Nge Yog Bayay e Felfelan’ ni Ke Mul

3. Mang e ke ayuweg David ke fel’ rogon bayay ko tirok Got u tomren ni ke denen?

³ Rogon ni kan weliy ko fa binem e thin, e dalip yay ni de yog rok David ni nge dag madgun Got ma aram me denen. Machane n’en ni ke rin’ u nap’an ni ke fonownag Jehovah e be dag ni yugu aram rogon ni ke denen machane ir be’ ni bay madgun Got u wan’. Liyor nge tay fan ni ke ta’ ku Got e k’aring ni nge yog nriyul’ e kireb ni ke rin’, me yal’uweg e kanawo’ rok, miki fal’eg bayay e tha’ u thilrow Jehovah nge fel’. Yugu aram rogon ni oloboch ni rin’ e yibnag e gafgow ngak nge ku boch e girdi’, ma kalngan’ ni tay e ir e k’aring ni ngki ayuweg Jehovah me tow’athnag. N’en ni rin’ David e riyul’  nrayog ni nge k’aring e Kristiano ni nge dab ra rusgad u nap’an ni kar rin’ed reb e oloboch nib ubchiya’.

4. Uw rogon nrayog ni nge ayuweg madgun Got be’ ni nge yib bayay e felfelan’ ngak?

⁴ Bod rogon Sonja. a Yugu aram rogon ni be maruwel ni ir reb e tamachib u polo’ e tayim rok, me chag Sonja ngak boch e girdi’ nib kireb pangirad, me un nga boch e ngongol ni de m’ag ko Kristiano, ma aram min tharbog ko ulung. Nap’an ni sul laniyan’ ngak, me rin’ Sonja urngin nrayog rok ni nge fal’eg bayay e tha’ u thilrow Jehovah. De n’uw nap’an, min sulweg bayay ko ulung. U fithik’ e pi n’ey, ma de digey Sonja e n’en ni baadag ni aram e pigpig ni be tay ku Jehovah. Munmun, miki un bayay ko pioneer ara machib u polo’ e tayim rok. Boch nga tomur riy, me leengiy reb e piilal ni Kristiano, ma chiney e yow ma pigpig u taabang u fithik’ e felfelan’ u lan e ulung. Yugu aram rogon ni ke kalngan’ Sonja ni malog u kanawoen e Kristiano, machane ke felfelan’ ni ke ayuweg madgun Got ni nge sul bayay ku Jehovah.

Kab Fel’ ni Ngan Gafgow ko Bin ni Ngan Denen

5, 6. Mu weliy rogon nge mang fan ni pag David Saul nge yan ni l’agruw yay nde li’ ngem’.

⁵ Arrogon, kab gel e fel’ riy, u nap’an ni ra ayuwegdad madgun Got ni ngad siyeged e denen nib ubchiya’. Riyul’ e re n’ey u puluwon David. Immoy ba ngiyal’ u nap’an ni be l’ol’og Saul nge dalip biyu’ e salthaw David, me yan Saul nga lan e bokngo​—ni fare bokngo ni bay David nge pi salthaw rok riy ni yad be mith. Me gay rogon fapi pumoon ni yad be yan David ni ngar k’aringed ni nge cham ngak Saul. Gathi be pi’ Jehovah e toogor rok David nib girdi’ nga lan pa’? I yan David ni ke n’ag lingan ni be mith nge yan i th’ab e thal ni wuru’ e mad rok Saul. Bochan ni bay madgun Got rok David, ma binem e ngongol ni gathi ri ba uw rogon e gafgownag e nangan’ rok. Me non David ko fapi pumoon ni gaar: “I Somol e nge ayuwegeg nge dab gu rin’ ban’en ngak e masta rog ni Somol e turguy ni nge mang pilung! Ya thingar dab gu rin’ bochi ban’en ngak, ya ir fare pilung ni Somol e ke turguy!” b​—1 Samuel 24:1-7.

⁶ Ba’ ba ngiyal’ nga tomuren, u daken e burey ni ke nep’, me “k’aringrad Jehovah ngar molod.” Me sagakil David nge fak walagen ni Abishai fithingan ngar ranow ra sak’iygow nga tooben Saul. Baadag Abishai ni nge li’ Saul e chingiyal’ nem. Me taleg David Abishai me gaar ngak: “Mini’ e ani ke furuy pa’ nib togopuluw ngak e en ni ke dugliy Jehovah mi ki par nib fel’ e rok?”​—1 Samuel 26:9, 12, NW.

7. Mang e taleg David nde denen?

⁷ Mang fan nde li’ David Saul ko yay ni l’agruw ngay ni puf rogon ni nge rin’? Bochan ni kab gel madgun Jehovah rok nga madgun Saul. Bochan madgun Got ni bay rok, ma ke fal’eg David rogon ni nge gafgow, ni faanra ba t’uf, ko bin ni nge denen. (Hebrews 11:25) Bay e pagan’ rok ngak Jehovah nra ayuweg e girdi’ rok nge ir. Manang David ni fol ni ra tay ku Got e ra yibnag e felfelan’ nge tow’ath ni boor, machane faanra dabi fol ma dabki fel’ u wan’ Got. (Psalm 65:4) Ku manang ni ra lebguy Got e pi n’en ni Ke micheg ni aram e nge pilungnag David me chuweg Saul ko ngiyal’ nge kanawo’ nib m’ag u wan’.​—1 Samuel 26:10.

Madgun Got e Ma Yibnag e Felfelan’

8. Uw rogon ma ngongol rok David ko ngiyal’ ni yibe magawonnag e be fil ban’en ngodad?

⁸ Bochan ni gad e Kristiano, ma gad manang ni yira moningnagdad, ma ran gafgownagdad, nge ku boch e skeng. (Matthew 24:9; 2 Peter 3:3) Yu ngiyal’, ma gad ra mada’nag boch ban’en nib mo’maw’ nib muun ngay e piin ni gad ma liyor u taabang. Machane, gad manang ni ma guy Jehovah gubin ban’en, ma ma rung’ag e meybil rodad, ma ra pithig e magawon u ngal’an nib puluw nrogon nib m’agan’ ngay. (Roma 12:17-21; Hebrews 4:16) Ere, dab da rusgad ko piin ni yad ma togopuluw ngodad machane gad ma mudugdag ku Got ma gad sap ngak ni nge ayuwegdad. Bod rogon David, dab ud fulweged taban e kireb, ara da togopuluwgad ko pi motochiyel nib mat’aw ya nge dabi yib e gafgow ngodad. Tomur riy, ma ra yibnag e re n’ey e felfelan’. Machane uw rogon?

9. Mog reb e kanawo’ ko uw rogon ni madgun Got e ra yibnag e felfelan’ ni yugu ra yibe gafgownagey.

 ⁹ Reb e missionary ni ke n’uw nap’an u Africa e yog ni gaar: “Gu lemnag ba matin nge bochi ppin ni fak nib fel’ yangaren ni ra siyegew ni ngar chuw’iyew nochi yangi babyor ni fan ko am ni bochan ni yow e Kristiano. Me gafgownagrow ba ulung i pumoon min nog ngorow ni nga ranow nga taferow. Nap’an ni yow be yan, ma be gay rogon fare matin ni nge fal’eg laniyan’ fachi ppin ni fak ni be yor, ma be gay rogon ni nge nang ko mang fan ni ke buch e re n’em. Dar felfelan’gow e ngiyal’ nem, machane ke par e nangan’ rorow nib klin. Boch nga tomuren, ma kar felfelan’gow ni kar folgow ku Got. Go manga ra chuw’iyew e nochi ngi babyor nem, ma ra felfelan’ fapi cha’. Ya yad ra pi’ ngorow boch ban’en ni ngar garbodgow ngay nib manigil mar churu’gad ni yad be lekrow nga tabinaw rorow. Machane fachi ppin nge chitiningin e ma ngar pagew e michan’ rorow ma yow ra par ni yow e th’abi kireban’ u fayleng.” Madgun Got e ir e ke ayuwegrow ko binem e lem nde fel’.

10, 11. Mang angin ni yib ngak reb e ppin ni dag ni bay madgun Jehovah rok?

¹⁰ Yira dag madgun Got maku ma yibnag felfelan’ u nap’an ni yira mada’nag e skeng nib muun ngay e ta’ fan ko n’en nib ga’ fan u lan e yafas. Nap’an nib diyen Mary ko bin dalip e bitir rok, me yog e togta ngak ni nge li’ fak u mayel. Gaar ngak: “Bay e riya’ u ra rogom e chiney. Demtrug e ngiyal’ ma rayog ni yib e m’ar ngom nib gel nga mum’ u lan 24 e awa. Miki yim’ e bitir. Ma demtrug rogon, ma dariy e mich riy ni ra yib e re tir nir nib fel’ rogon.” Be fil Mary e Bible ni yad e Pi Mich Rok Jehovah machane dawori un ko taufe. Me gaar Mary: “Machane, kug dugliy ni nggu pigpig ku Jehovah, ma kug dugliy ni nggu par ni gub yul’yul’ ngak, ndemtrug e n’en nra buch.”​—Exodus 21:22, 23.

¹¹ Nap’an nib diyen, ma rib gel e maruwel ni tay Mary ni be fil e Bible ma be ayuweg e tabinaw  rok. Tomur riy me gargeleg fare tir. I gaar: “Biney e bitir ni gu gargeleg e ba gel e mo’maw’ riy ko fa gal nsom’on, machane dariy e magawon riy nib ga’.” Madgun Got e ayuweg Mary ni nge par nib beech e nangan’ rok, ma de n’uw nap’an min taufenag. Nap’an ni ilal fare tir i yan, miki fil ni nge mudugdag ku Jehovah, ma chiney e be pigpig u reb e pi branch ofis ko Pi Mich Rok Jehovah.

‘Mu Gelnigem u Daken Jehovah’

12. Uw rogon ni gelnag madgun Got David?

¹² Madgun Jehovah ni bay rok David e boor boch ban’en ni rin’ gathi kemus ni taleg ni dabi rin’ e tin nib kireb. I pi’ gelngin ni nge dugliy ban’en nib papey ngu fithik’ e gonop u nap’an e tayim nib mo’maw’. U lan reb e duw nge aningeg e pul, ni par David nge fapi pumoon ni yad be un ngak u Ziklag u lan e arrow u Filistine ni yad be mith rok Saul. (1 Samuel 27:5-7) Ma biyay e nap’an ni demoy fapi pumoon, me urfiy e piin ni Amalekites nib kireb fare binaw mi yad fek e ppin ko fapi pumoon, nge bitir rorad nge gubin ban’en. Nap’an ra sulod mar guyed e n’en ni ke buch, me yor David nge fapi girdi’ rok. Kireban’ e k’aring e damumuw ngorad, ma aram me yog fapi pumoon ni ngar malangnaged David. Yugu aram rogon ni ke mochuch, machane de mulan’ David. (Proverbs 24:10) Madgun Got ni bay rok e k’aring ni nge sap ngak Jehovah, me “gelnag ir u daken Jehovah.” U daken e ayuw rok Got, me cham David nge fapi girdi’ rok ko fapi Amalekites mar sulweged gubin ban’en nga rogon.​—1 Samuel 30:1-20.

13, 14. Uw rogon ni ayuweg madgun Got reb e Kristiano ni nge mel’eg e tin nib fel’?

¹³ Pi tapigpig ku Got e ngiyal’ ney e yad ma mada’nag boch ban’en nib t’uf ni ngar pagedan’rad riy ngak Jehovah mar pired ni yad ba gel ngar dugliyed ban’en nib papey. Bod rogon Kristina. Nap’an ni kab fel’ yangaren me fil e Bible ni yad e Pi Mich Rok Jehovah. Machane baadag ni nge mang reb e concert pianist ara be’ ni ma chubeg e piano, ma ke mon’og riy nib papey. Maku, ba tamra’ ni nge un ko machib ma aram me rus ni nge rin’ fare maruwel ni ra yib u tomuren e taufe. Nap’an ni ul’ul Kristina ko fol Bible, me tabab ni nge nang feni gel gelngin. Ke fil murung’agen madgun Jehovah, ma aram me nang ni baadag Jehovah ni pi tapigpig rok e ngar t’ufeged u polo’ i gum’ircharad, lanin’rad, nge lem rorad, nge gelngirad. (Mark 12:30) Re n’ey e ir e k’aring ni nge ognag ir ku Jehovah me un ko taufe.

¹⁴ I ning Kristina e ayuw ngak Jehovah ni nge mon’og ko tirok Got ban’en. I weliy ni gaar: “Gu manang ni yafas rok reb e concert pianist e ba muun ngay e chur nge m’ag ni ngan fal’eg ngak boch e girdi’ ni nguun musik ni 400 yay u reb e duw. Ere kug dugliy ni nggu mang reb e sensey nge yog ni yog buchuuw e salpiy ni nge ayuwegeg mug pigpig ni reb e tamachib u polo’ e tayim rog.” Nap’an e ngiyal’ nem, ma kan dugliy e rran ni nge musik Kristina u reb e naun ni tagil’ e musik ko nam rok. Miki ul’ul ngay nge gaar: “Fare musik ni gu tay e ireram e bin nsom’on nge bin tomur ni gu tay.” Ke leengiy Kristina reb e Kristiano ni piilal. Ma yow be pigpig u taabang u reb e branch ofis ko Pi Mich Rok Jehovah. Ke felfelan’ ni ke pi’ Jehovah gelngin ni nge mel’eg e tin nib fel’ ma chiney e rayog ni nge fanay e tayim rok nge gelngin ko pigpig ku Jehovah.

F’oth Rodad nib Ga’ Fan

15. Mang e n’en ni baadag David ni nge pi’ ngak pi fak, ma uw rogon ni rin’ e re n’em?

¹⁵ I yoloy David ni gaar: “Mired, e pi tafager rog ni gimed bbitir ngog, ngam telmed ngog, mu gu fil ngomed rogon ni nguum pired ni ba’ madgun Somol u wun’med.” (Psalm 34:11) Bochan ni ir reb e matam, ma ke dugliy David ni nge pi’ ngak pi fak ban’en nrib ga’ fan​—ni aram madgun Jehovah nib gel. Thin nge ngongol rok David e ke dag rarogon Jehovah ni gathi ma gelfen ma gathi ba Got ni ma k’aring e marus, fa be gay e piin ni be th’ab e motochiyel rok, machane ir ba matam ni ma t’ufegey ma ma ayuwegey ma ma n’ag fan e kireb rok pi fak nu fayleng. I fith David ni gaar: “Mini’ e rayog ni nge ta’ fanayan ko oloboch?” Miki ul’ul ngay nge gaar: “Mu tiyeg nib tamilangan’ug u boch ban’en ni dan nang!” Manang David ni faanra athamgil nib mus mus rogon, ma thin rok nge lem rok e ra fel’ u wan’ Jehovah.​—Psalms 19:12, 14, NW.

16, 17. Uw rogon nrayog ni nge fil e gallabthir ngak pi fakrad rogon ni nge yib madgun Jehovah?

¹⁶ N’en ni rin’ David e be fil ban’en ngak e pi gallabthir ko ngiyal’ ney. “I chuguliymow e gallabthir  romow u reb e kanawo’ ni k’aringmow nggu felfelan’gow ni bochan e gamow bay ko tin nriyul’,” aray rogon ni yog Ralph, ni yow ma pigpig walagen nib pagal u taabang u reb e branch ofis ko Pi Mich Rok Jehovah. “Nap’an ni ka gamow bitir, ma ma unegmow e gallabthir romow nga lan e sabethin rorow u murung’agen boch ban’en ni ngan rin’ u lan e ulung, ma rug pasiggow ko machib ni bod rogorow. Kar k’aringew gamow ni nge mich u wan’mow nrayog ni nggu rin’ew boch ban’en nra yib angin ko pigpig romow ku Jehovah. Tin nriyul’ riy, e yan boch e duw ni i par e tabinaw romow u lan reb e nam ni ba t’uf riy boch e tamachib ko Gil’ilungun ma gamad ayuweg ni ngan sunumiy boch e ulung nib beech.”

¹⁷ “N’en ni ayuwegmow ni nggu pirew ko bin nib mat’aw e kanawo’ e gathi bochan e pi motochiyel nni ta’ ni fan ngomow machane bochan ni gallabthir romow, e rib riyul’ Jehovah u wan’row ma rib gol mab fel’. Ri yow baadag ni ngar nangew Jehovah nib fel’ rogon mar fel’gow u laniyan’, ma kugu filew boch ban’en ko madgun Got nge t’ufeg ku Got ni bay rorow. Mus nga nap’an ni kug rin’ew ban’en nib kireb, ma dar ma guy rogon e gallabthir romow ni nggu lemnagew ni da kug t’uf gow ku Jehovah; ara rognew boch ban’en ni dab gu rin’ew ni gathi rib t’uf. Oren ngiyal’ ni yow ma tay mow nga but’ ngar nonow ngomow, ma yu ngiyal’ e yow ma non ngomow ni ke sug e lu’ nga owcherow ni yow be gay rogon ni nge taw e n’en ni yow be yog nga gum’irchamow. Ma ma yib angin. Kug filew ko gallabthir romow boch e thin ni madgun Jehovah e ban’en nrib manigil ma ngan mang reb e Pi Mich e reb e felfelan’, ma gathi reb e magawon.”​—1 John 5:3.

18. Mang e rayog ngodad ni faan gad ra dag ni bay madgun e bin nriyul’ e Got rodad?

¹⁸ U fithik’ e “tin tomur e thin ku David,” e gad ra beeg riy ni: “Faanra en ni be gagiyegnag e girdi’ e ba mat’aw, ma be gagiyeg u fithik’ madgun Got, ma bod rogon raen e tamilang ni kakadbul, u nap’an nra mat raen e yal’.” (2 Samuel 23:1, 3, 4, NW) Solomon, ni fak David ma ku ir e yan nga luwan, e nang e gonop ni bay ko pi thin ney, ya i ning ni nge pi’ Jehovah ngak e “gonop” nge yog ni “gagiyegnag e girdi’ nrogon nib yal’uw mab manigil.” (1 Kings 3:9) I nang Solomon ni faanra ni dag madgun Jehovah ma ra yibnag e gonop nge felfelan’. Boch nga tomuren, me ngochnag i yog fare babyor ni Eklesiastes ko pi thin ni baaray: “Tungun e re babyor ney e be fonownag e girdi’ ni be gaar: Nguum par ni ba’ madgun Got u wan’um ma ga be fol ko thin rok, ya kari mus fan ni sunumiy Got e girdi’. Ya fare Got nib riyul’ e ir e bayi fek i yib urngin e maruwel nib muun ngay e tin nib mith ni un rin’, ngan pufthinnag ni demtrug ko ba fel’ fa ba kireb.” (Eklesiastes 12:13, 14) Faanra uda folgad ko re fonow nem, ma gad ra nang ni ‘nguun par ni bay madgun Somol u wan’uy, ma ba sobut’an’uy me yoor ban’en rodad mad pared ni yibe tay fadad, me n’uw nap’dad.’​—Proverbs 22:4.

19. Mang e ra ayuwegdad ni ngad nanged fan “madgun Jehovah”?

¹⁹ Rogon ni kad guyed ko pi n’en ni ke buch rok boch e girdi’ u lan e Bible nge pi n’en ni ke buch rok boch e girdi’ e ngiyal’ ney, ma kad nanged ni madgun Got e baga’ fan ko yafas ko tin nriyul’ e tapigpig ku Jehovah. Gathi kemus ni ra ayuwegdad e re lem ney ni dab da rin’ed e tin ni dubun e Chitamangidad ni bay u tharmiy machane ku be gelnagdad nrayog ni ngad gelgad ko toogor rodad ma ku be pi’ gelngidad ni ngad athamgilgad ko pi skeng nge magawon ni ma yib ngodad. Ere, ngad filed e Thin Rok Got ndemtrug ko gad e piilal ara gad e bitir, ma ngad fal’eg i lemnag e n’en ni kad filed, ma gad chuchugur ku Jehovah u fithik’ e meybil ni gubin e rran. Faan gad ra rin’ ni aray rogon, ma gathi kemus ni gad ra pirieg “fare tamilangan’ rok Got” ya ku gad ra nang fan “madgun Jehovah.”​—Proverbs 2:1-5.

[Footnotes]

Rayog ni Ngam Weliy?

Uw rogon ma madgun Got e rayog ni nge

• ayuweg be’ ni nge fel’ bayay ko tirok Got u tomuren ni ke denen?

• yibnag e felfelan’ u nap’an ni ke yib e skeng nge togopuluw?

• gelnagdad ni ngad rin’ed e tin nib m’agan’ Got ngay?

• mang ban’en nib ga’ fan ni kad filed ko bitir rodad?

[Study Questions]

[Picture on page 13]

Madgun Jehovah e ir e ta’ David nde cham ku Saul ni Pilung

[Pictures on page 15]

Madgun Got e ba f’oth nib ga’ fan nrayog ni nge pi’ e gallabthir ko bitir rorad