Piin Sumunguy e Bay Ra Tafanayed e Fayleng

“Gu be lemnag ni pi n’en ni kan sunumiy e bay ni thilyeg nge sul nga rogon. . . . Ni gathi gabul ni kadbul, machane ba ngiyal’ nib fel’ ni kab palog, u nap’an nra yib e bin nib beech e tharmiy nge bin nib beech e fayleng.”​—Jean-Marie Pelt, French environmental specialist.

MOCHUCH ko rarogon e pi n’en u toobey i yan nge rarogon e girdi’ nu fayleng, ma ke yoor e girdi’ ni ba adag ni nge guy e fayleng rodad ni kan piliyeg nge mang ba paradis. Machane, re n’ey ni yibe yim’ nbochan e gathi kemus nib lik’ay ko bin 21 e chibog. Ke kakrom ni micheg e Bible ni yira fulweg e Paradis nga rogon u fayleng. Yog Jesus ngan nang ni “piin sumunguy . . . e rayog e fayleng ngorad” ma “tinib m’agan’um ngay e bay ni rin’ u but’ ni bod u tharmiy,” ni aram e thin ni yima nang ni bay u Bible. (Matthew 5:5; 6:10, Revised Standard Version) Machane, chiney, e de yoor e girdi’ ni ma mich u wan’ ba paradis u fayleng nra par e piin nib sumunguy riy. Boor ko piin ni yad ma yog ni yad e Kristiano, e yad ma yog ni dakuriy e Paradis.

Fare magazine nu France ni yu wik ni La Vie e weliy ko mang fan ni paradis​—ni demtrug ko u fayleng fa tharmiy—​e kan pag ra danga’, ma Galesiya ko Katolik e ke pag: “Tomuren ni ke gel e machib ko Katolik u gonap’an e pi duw ko bin 19 e chibog, [ma fare lem ko] paradis e kan chuweg u reb meybil ni yad ma tay, welthin ko yu Madenom, skul ko tirok Got nge fol katekismo.” Fare bugithin ni paradis e ke “math math” nbochan ni “boor” riy e “danir nang fan.” Boch e tamachib e lanin’rad ni ngar paged ni bochan e “kaygi yoor rogon e felfelan’ u fayleng ni yibe weliy.”

Rogon ni be lemnag Frederic Lenoir, ba sociologist, ni be’ ni boor ban’en ni manang ma ma tiyan’ ko teliw, e lem ni murung’agen e paradis e “kan weliy ni weliy e ke m’ay fan.” Ku arrogon, Jean Delumeau, ni be’ ni ta yoloy e chep ma ke yoor e babyor ni ke yoloy ni murung’agen ere n’em, ma lemnag ni pi n’en ni kan micheg u Bible ni ma lebug e bogi fanathin. I yoloy ni gaar: “Fare deer ni, ‘Mange ke magey ko Paradis?’ Michan’ ko piin ni Kristiano e be fulweg ni be gaar: Yibe pining e magar ko fas ko yam’ rok e En ni ma Ayuwegey, ra bo rran ma gad gubin ni gad ra kol pa’dad ma gad guy e athap rodad ni ke lebug.”

Fare thin ni murung’agen e paradis u fayleng e kab puluw fa? Mange n’en ni ri ba’ ko gabul nge langlath ni fan ko fayleng rodad? Rogon e sap ko gabul nge langlath e ba ath ath ara rayog ni ngan guy nib fel’ rogon? Bin migid e article e ra fulweg e pi deer ney.

 [Picture Credit Line on page 2]

COVER: Emma Lee/​Life File/​Getty Images