N’en Ni Ngan Fil U Murung’Agen E Tolangan’ nge Sobut’An’

BA’ BAN’EN ni buch u lan e yafas rok David ni Pilung ni be dag e n’en nib thil u thilin e bin nriyul’ e sobut’an’ nge tolangan’ nib kireb. Re n’ey e buch u tomuren ni ke gel David ngak piyu Jerusalem me fal’eg rogon nge mang tochuch rok. I sap David ngak Jehovah ni ir e bin nriyul’ e Pilung nu Israel, me guy rogon ni ngan fek fare Kiwar nga lan fare mach, ni pow riy ni bay Got rorad. Re n’ey e rib ga’ fan u wan’ David ma aram me dag e felfelan’ rok ni nge guy urngin e girdi’ u nap’an ni be lek fapi prist ni yad be fek fare Kiwar. Girdi’ ni yad ma par u lan yu Jerusalem e ra guyed e pilung rorad “ni be og nga lang” ma be “churu’ . . . ni ke musmus rogon.”​—1 Kronicles 15:15, 16, 29; 2 Samuel 6:11-16.

Machane, ppin rok David ni Mikal fithingan e de un ko re ulung i girdi’ nem ni yad be yan u but’. I par ni be sap u langan e winda, ma de adag rogon ni i pining David e sorok ngak Jehovah me “tabab ni nge darifannag u lan gum’irchaen.” (2 Samuel 6:16) Mang fan ni lem Mikal ni aray rogon? Tin nriyul’ riy e, i par nib tolang e lem rok ni bochan e ir fak fa bin som’on e pilung nu Israel, ni Saul, ma chiney e ir leengin e bin migid e pilung nu Israel. Rayog ni sana i lemnag ni fa en figirngin, ni ir e pilung, e susun ni dabi sobut’nag ir nge taareb rogon ngak urngin e girdi’ me un ngorad ko madenom. I m’ug rok e re lem nem nib tolang u nap’an ni non ngak David ni ke sul nga tabinaw. I gathibthibnag David ni gaar: “En ni pilung nu Israel e ke gilnag buguwan e daba’! Ya ke chuweg madan u daken u p’eowchen e piin ni ppin ni tapigpig ko piin ni ba’ nga tan pa’ ke darifannag ir!”​—2 Samuel 6:20.

Mang e n’en ni rin’ David u nap’an ni kan togopuluw ngak? I puwan’ David ngak Mikal me yog ngak ni ke n’ag Jehovah e chitamangin, ni Saul, ni bochan e baadag David. Miki ul’ul David ngay nge gaar: “Gu be dariyfannageg. Sana ga be lemnag ndariy fag, machane pi ppin nem ni ga be yog e ba’ fag u wun’rad.”​—2 Samuel 6:21, 22.

Arrogon, ke dugliy David u wan’ ni nge ul’ul ko pigpig ngak Jehovah u fithik’ e sobut’an’. Re pangin ney e be ayuwegdad ni ngad nanged ko mang fan ni yog Jehovah David ni “cha’ ni gu baadag.” (Acts 13:22; 1 Samuel 13:14) Tin nriyul’ riy e, i fol David ko cha’ ni ma dag e bin nriyul’ e sobut’an’​—ni aram Jehovah Got. Fare thin ni fanay David u nap’an ni gaar ku Mikal “gu ra mang be’ nib sobut’” e yib u lik’ingin fare thin nu Hebrew ni ku yima fanay ni nge dag rogon ni ma sap Got ngak e girdi’. Yugu aram rogon ni Jehovah e ir e Cha’ nth’abi tolang u palpalth’ib, ma Psalm 113:6, 7 e weliy murung’agen nib “sobut’ laniyan’ [ma sobut’nag ir ko liw ara tolngin u nap’an ni nge rin’ ban’en ngak be’ nib sobut’ ngak] ni fan ni nge sap ko tharmiy nge fayleng, ni be n’uf e en nib sobut’ ni kan ngongliy ko fiyath; ma be pining e sorok ngak e piin ni yad ba gafgow.”

Bochan nib sobut’an’ Jehovah, ma ma fanenikay e “changar ni ufanthin” ko girdi’ nib tolangan’. (Proverbs 6:16, 17) Bochan ni dag Mikal e re ngongol nib kireb ney ma de ta’ fan e en ni ke mel’eg Got ni nge mang pilung, ma dan tow’athnag ni nge diyennag reb e pagal rok David. Me yim’ ni de diyen. Uw feni rib ga’ fan e n’en ni be fil e re n’ey ngodad! Piin ni yad baadag ni ngar fel’gad u wan’ Got e thingar ra folgad ko fapi thin ni be gaar: “Mon’ed madan e sobut’ laniyan’ nge bigimed me pigpig ngak bigimed, ya Got e ma togopuluw ngak e piin nib tolangan’rad, ma ma ayuweg e piin nib sobut’an’rad.”​—1 Peter 5:5.