“Ngam Meybilgad Ngak Got Mi Gimed Ning Ngak E Tin Ni Nge Yog Ngomed”

“Faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med.”​—FILIPPI 4:6.

1. Mini’ e bay rogodad ni ngada nonad ngak, ma mang fan ni yira gin ngay?

 FAAN ga ra wenig ni ngam non ngak e pilung ko nam rom, ma mang e yira yog ngom? Sana ra yib e thin rok e ofis rok ngom, machane sana dabiyog ni ngam non ngak fare pilung. Machane ba thil rogon ko en ir e th’abi Pilung, ni Jehovah Got, ni ir e Ga’ ko urngin ban’en. Ya rayog ni ngada nonad ngak ni yugu demtrug e gin ni gad bay riy, ara yugu demtrug e ngiyal’ ni gad ba adag ni ngada nonad ngak. Gubin ngiyal’ ma ra taw e meybil nib fel’ ngak. (Proverbs 15:29) Rib fel’ ni aram rogon! Gathi susun ni ngada pininged e magar ngak ma ngada meybilgad ngak e En ni ma “fulweg taban e meybil?”​—Psalms 65:2.

2. Mang e ba t’uf ni faanra nge fel’ e meybil u wan’ Got?

² Machane sana ra fith be’ nra gaar, “Miti mang meybil e ra motoyil Got ngay?” I weliy e Bible ban’en nib t’uf ni faanra nge fel’ e meybil u wan’ Got ni gaar: “Dariy be’ nra fel’ u wan’ Got ni faanra de mich Got u wan’. Ya en nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.” (Hebrews 11:6) Arrogon, kad weliyed ko fa binem e thin nib t’uf e michan’ ni faanra nge chugur be’ ngak Got. Ba adag Got ni nge motoyil ko meybil rok e piin ni yad ra yib ngak, machane thingari mich u wun’rad ma nge chag e ngongol ngay ma ngar yul’yul’gad ma nge puluw rogon gum’ircharad.

3. (a) Rogon ni be m’ug ko meybil rok e pi tapigpig rok Got kakrom e mang e pi n’en nrayog ni ngada uneged ko meybil? (b) Mang e miti meybil ni bay?

³ I yog apostal Paul ngak e piin Kristiano ko ngiyal’ nem ni gaar: “Ma dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med.” (Filippi 4:6, 7) Bay u lan e Bible murung’agen boor e girdi’ ni ur yibilayed e pi magawon rorad ngak Got. Boch i yad e Hannah, nge Elijah, nge Hezekiah nge Daniel. (1 Samuel 2:1-10; 1 Kings 18:36, 37; 2 Kings 19:15-19; Daniel 9:3-21) Thingar da folwokgad rorad. Mu tay fanam i yan riy ni weliy Paul ni boor miti meybil. I weliy ni rayog ni ngan pining e magar, aram e meybil ni gad ra pining e magar ngak Got ko urngin ban’en ni ma rin’ ni fan ngodad. Ku rayog ni ngada pininged e sorok ngak. Ku rayog ni ngada weniggad u fithik’ e meybil ni gad be rin’ u fithik’ e sobut’an’. Ma ku rayog ni ngada ninged ban’en ni nge yog ngodad ma rayog ni ngada tamilangnaged e pi n’en ni nge yog ngodad. (Luke 11:2, 3) Ra felfelan’ e Chitamangidad nu tharmiy ngay ni faan gad ra meybil ngak ndemtrug reb e pi kanawoen e meybil ney.

4. Aram rogon ni manang Jehovah e tin nib t’uf rodad, ma mang fan ni nga kud ninged ngak?

⁴ Sana ra fith boch e girdi’ nra lungurad, ‘Manang Jehovah urngin ban’en nib t’uf rodad, fa?’ Arrogon, manang. (Matthew 6:8, 32) Ere mang fan ni ba adag ni ngada meybilgad ngak ni ngada ninged e tin nib t’uf rodad? Amu lemnag e re thin ni baaray: En ni fen reb e kantin e ba adag ni nge tow’athnag e piin ma chuway’ ko kantin rok. Machane thingara bad ko en ni fen e kantin ngar ninged ngak. Piin ni dubrad ni ngar nonad ngak e en ni fen fare kantin ngar ninged fare tow’ath e gathi ri yad be tay fan fare tow’ath. Ere ku arrogodad, ni faan manga dab da ninged e tin nib t’uf rodad u fithik’ e meybil ma ra m’ug riy ni gathi  ri gad be tay fan e pi n’en ni ma pi’ Jehovah. Be gaar Jesus: “Mu ninged me yog ngomed.” (John 16:24) Aram rogon ni gad ra dag nib pagan’dad ngak Got.

Uw Rogon e Meybil Rodad Ngak Got?

5. Mang fan ni thingar da meybilgad u fithingan Jesus?

⁵ De yoor e motochiyel rok Jehovah u rogon ni ngan meybil ngak. Machane thingar da filed rogon ni ngan meybil ngak Got, ma bay u lan e Bible rogon ni ngan meybil. I yog Jesus ngak pi gachalpen ni gaar: “Tin ni gimed ra ning ngak e en ni Chitamangiy u fithingag e ra pi’ ngomed.” (John 16:23) Ere thingar da meybilgad u fithingan Jesus, ni aram e gad be tay ni ke mus ni goo Jesus e ir e kanawo’ nra yib e flaab rok Got riy ngak urngin e girdi’ nu fayleng.

6. Nap’an ni ngad meybilgad ma uw rogon ni ngad pared?

⁶ Uw rogon ni ngad pared u nap’an ni gad be meybil? Dariy e thin u lan e Bible ni be yog rogon ni ngan par u nap’an ni yibe meybil min rung’ag e meybil rodad. (1 Kings 8:22; Nehemiah 8:6; Mark 11:25; Luke 22:41) N’en ni ba ga’ fan e ngada meybilgad u fithik’ e yul’yul’ mab puluw lanin’dad.​—Joel 2:12, 13.

7. (a) Mang fan fare bugithin ni “amen”? (b) Uw rogon ni ngan fanay nib puluw rogon u lan e meybil?

⁷ Ma uw rogon i fanay fare bugithin ni “amen”? Be m’ug u lan e Bible nib puluw ni nga nog e re bugithin nem u nap’an ni ke m’ay e meybil rodad, ni ba ga’ ni meybil rodad u fithik’ e yoor. (Psalms 72:19; 89:52) Fare bugithin nu Hebrew niʼa·menʹ e be yip’ fan e “mmutrug ni arrogon.” Be yog fare ke babyor ni McClintock and Strong’s Cyclopedia ni fan fare bugithin ni “Amen” u tungun e meybil e be yip’ fan ni “gad be micheg fare thin ni kada yibilayed ma gad be wenig ni nge lebug e meybil rodad.” Ere nap’an ni ra yog e en ni be meybil e “Amen” ma ra m’ug riy ni fare meybil ni ka fini yog e ri aram rogon laniyan’. Ma nap’an ni ra yog e en ni be fek e meybil ni fan ko muulung e re bugithin nem, ma girdien e ulung ni yad be motoyil ko meybil rok faanem e ku yad ra yog e “Amen” u lanin’rad ara ku rayog ni nga rogned nga lang ni be yip’ fan ni taareb lanin’rad ko meybil rok faanem.​—1 Korinth 14:16.

8. Ra diin ma meybil rodad e ra bod e meybil rok Jakob ara Abraham, ma mang e ra dag e re n’ey u murung’agdad?

⁸ Yu ngiyal’ ma ma pagdad Got ni ngada daged fene gel ni gad be lemnag e n’en ni gad be yibilay. Sana gad ra bod Jakob kakrom ni ra fathalgow ba engel reb e nep’ ni polo’ ya ba adag ni nge yog e flaab ngak. (Genesis 32:24-26) Ara yu ngiyal’ ma gad ra bod Abraham ni i wenig ngak Jehovah ni boor yay ni be yibilay Lot nge yugu boch e girdi’ nib mat’aw ni manga yad bay u lan yu Sodom. (Genesis 18:22-33) Ku arrogodad ni rayog ni ngada weniggad ngak Jehovah u murung’agen e pi n’en nib t’uf rodad ni gad be wenig ya ir be’ nib mat’aw mab gol ma ma runguyey.

Mang e Rayog ni Ngada Ninged?

9. Mang e nge m’on u wan’dad u nap’an ni gad ra meybil?

⁹ Mu tay fanam i yan riy ko n’en ni yog Paul ni gaar: “Dariy ban’en ni nge magafan’med ngay . . . mi gimed ning ngak e tin ni nge yog ngomed.” (Filippi 4:6) Ere gonap’an urngin ban’en ma rayog ni ngada yibilayed. Machane thingar da m’oneged e tirok Jehovah ban’en u lan e meybil rodad. Ke dag Daniel e kanawo’ ngodad. Nap’an nni gechignag piyu Israel ni bochan e pi denen rorad, me wenig Daniel ngak Jehovah ni nge runguyrad ni gaar: “Mu telim ngomad ma ga ngongol nge nang urngin e girdi’ ni gur e Got, dab mu sowath.” (Daniel 9:15-19) Be m’ug ko meybil rodad nib m’on u wan’dad ni nge thothup fithingan Jehovah ma nge lebug e tin nib m’agan’ ngay, fa?

10. Uw rogon ni gad manang nib puluw ni ngada yibilayed e tirodad ban’en?

¹⁰ Nge m’on e tirok Got ban’en ko meybil rodad, machane kub puluw ni ngada yibilayed e tirodad ban’en. Rayog ni ngada meybilgad ni bod ni meybil e en ni yoloy e Psalm ni i yibilay ni nge nang fan e tin toar e machib rok Got. I meybil ni gaar: “Mu machibnageg ya nggu nang fan mu gu fol ko motochiyel rom, mu gu fol riy u polo’ i gum’irchaeg.” (Psalm 119:33, 34; Kolose 1:9, 10) I meybil Jesus ni i “wenig ngak Got ni ba ga’ laman u fithik’ e lu’, ya ir e rayog rok ni nge tay Jesus ndabi yim’.” (Hebrews 5:7) Be m’ug ko meybil rok nib puluw ni ngada ninged gelngin Got u  nap’an ni ra yib e riya’ ara skeng ngodad. Nap’an ni fil Jesus rogon e meybil ngak pi gachalpen, me yog ni rayog ni ngan yibilay e tirok e girdi’ ban’en ni bod ni ngan n’ag fan e denen ma nge yog e ggan ni fan ko yu rran.

11. Uw rogon nra ayuwegdad e meybil ni nge dab da awgad ko pi n’en ni ma wawliyey?

¹¹ U lan fare meybil rok Somol, me uneg Jesus e wenig ngay ni gaar: “Dab mfekmad i yan ko skeng nib mo’maw’, machane ngam ayuwegmad rok Faanem nib Kireb.” (Matthew 6:9-13) Boch nga tomren me fonownag pi gachalpen ni gaar: “Um odgad nguum meybilgad ngak Got, nge siy mpaged gimed ngak e pi n’en ni ma pingeg e girdi’ nge denen. Ya lanin’uy e ba adag, ma dowef e mmeewar.” (Matthew 26:41) Ba t’uf ni ngan meybil u nap’an ni bay ban’en ni ra wawliydad ko kireb. Sana ra yib ngan’dad ni ngada togopluwgad ko machib nu Bible u skul ara taban e maruwel. Sana ra piningdad e piin ni gathi yad e Mich Rok Jehovah ni ngada uned nga boch ban’en nde fel’. Sana yira piningdad ni ngada rin’ed ban’en nib togopluw ko tin nib mat’aw. Faanra yib e pi n’en nem ngodad mab fel’ ni ngada folgad ko thin rok Jesus ni ngada meybilgad​—rayog ni ngada meybilgad u m’on ni ra yib e pi n’en ni ra wawliydad ko kireb ara ngiyal’ ni gad bay u fithik’ e magawon—​ni gad be ning e ayuw rok Got ya nge dab da meewargad.

12. Mang boch ban’en ni ma magafan’dad ngay ni ra k’aring ngada meybilgad, ma mang e ra rin’ Jehovah?

¹² Boor mit e magawon rok e pi tapigpig rok Got e ngiyal’ ney ma boor ban’en ni ma magafan’rad ngay. M’ar nge mochuch e ku boch e kenggin e magafan’ rok boch e girdi’. Gad ma rus ni bochan e bugel. Gad ma magawon ko salpiy mab mo’maw’ ni nge yog e tin nib t’uf rodad. Ma gapas lanin’dad ni bochan e gad manang ni ra motoyil Jehovah ngak e pi tapigpig rok ni yad be weliy e pi magawon ney ngak! Psalm 102:17 (NW) e be weliy murung’agen Jehovah ni gaar:  “Rib mich ni ra motoyil ko meybil rok e piin ni dariy ban’en rorad, ma dabi aw ni dariy fan e meybil rorad u wan’.”

13. (a) Mang boch ban’en nrayog ni ngada yibilayed? (b) Mu weliy murung’agen reb e meybil ni aram rogon.

¹³ Bin riyul’ riy e rayog ni ngada yibilayed gubin ban’en ni bay rogon ko pigpig rodad ngak Jehovah ara bay rogon ko fare tha’ u thildad Got. (1 John 5:14) Faanra thingar mu turguy ban’en u murung’agen e mabgol, ara maruwel ni ngam un ngay, ara nge yoor e machib ni ga ra tay, ma nge puf rogom ngak Got ngam ning e ayuw rok ni nge pow’iyem. Bay reb e rugod nu Philippines ni ba adag ni nge machib ni gubin ngiyal’. Machane dariy e maruwel rok ni nge ayuweg ko tin nib t’uf rok. I yog fare rugod ni gaar: “Reb e Sabado mu gu meybil ngak Jehovah nggu weliy murung’agen e machib u polo’ e tayim ngak. Re rran nem ni gu be machib mu gu pi’ reb e babyor ngak reb e rugod, me yigi non fare rugod ni gaar: ‘N’en ni som’on ni ngam rin’ ko Montag ni kadbul e nga man ko skul rog.’ Me lungug: ‘Mang fan?’ Me weliy ngog ni bay reb e maruwel ni yibe ning be’ ni nge un ngay ni ka chiney. Mug wan ko fare skul ma ka chingiyal’ nem min pi’ fare maruwel ngog. I buch urngin e pi n’en ney ni papey.” Ku arrogon e thin rok bokum e Mich Rok Jehovah u fayleng i yan ni ma fulweg Jehovah taban e meybil rorad. Ere dabi magawon lanin’um ni ngam meybil ngak Got ni ngam ning e tin ni bay u gum’irchaem!

Uw Rogon e Meybil Rodad ni Faan Manga Kada Denengad?

14, 15. (a) Mang fan ni nge dabi magawon laniyan’ be’ ni nge meybil ni faanra ke denen? (b) Ku mang meybil e ra ayuweg faanem ni ngki gel e michan’ rok?

¹⁴ Uw rogon nra ayuwegey e meybil nfaanra ke denen be’? Mo’maw’ rok boch e girdi’ ni kar denengad ni ngar meybilgad ni bochan e kar tamra’gad. Machane de fel’ ni aram rogon. Susun: Piin ni ma kol e yap ko sikoki e yad manang ni rayog ni ngar ninged e ayuw rok e piin ni yad ma gagiyegnag e yan ko pi sikoki u lan e lang. Ra uw rogon ni faanra ke malog be’ ni be kol yap ko sikoki me tamra’ ni nge non ngak e piin ni yad be gagiyegnag e sikoki u lan e lang? Ra ga’ e riya’ riy! Ku arrogon be’ ni ke denen me tamra’ ni nge meybil ngak Got ni ra gel e gafgow rok. Susun tamra’ ko denen e dabi magawonnag be’ ni nge non ngak Jehovah. Ma pining Got e girdi’ ni kar ngongliyed e denen nrib kireb ni ngar meybilgad ngak. I wenig Isaiah ni profet ngak e girdi’ kakrom ni ngar meybilgad ngak Jehovah “ya ri ma runguy e girdi’, ma ba gur ni nge n’ag fan ban’en u wan’.” (Isaiah 55:6, 7) Ma ku thingari kalngan’ be’ ni ke denen, nge pi’ keru’ ko kireb ni ke rin’, ma aram e ra munguynag laniyan’ Jehovah ni bochan e ke munguynag gum’irchaen ko som’on.​—Psalms 119:58; Daniel 9:13.

¹⁵ Bay yugu reb i fan ni ba ga’ fan e meybil ni faan manga ke denen be’. I weliy James ni gachalpen Jesus murung’agen be’ nib t’uf e ayuw rok ya gowa mm’ar e michan’ rok ni gaar: “Ba’ be’ u fithik’med nib m’ar? Faanra ba’ ma nge pining e piin ni yad piilal ko galesiya ngar bad ngak, ngar yibilayed ngak Got, . . . i Somol e ra chuweg e m’ar rok, ma pi denen ni ke ngongliy e ra n’ag Got fan.” (James 5:14, 15) Arrogon, thingari tamilangnag e denen rok ngak Jehovah u fithik’ e meybil, maku thingari pining e piin ni piilal ko ulung ngar yibilayed. Meybil ni aram rogon e ra ayuweg ngki gel e michan’ rok me fel’ thilrow Got bayay.

Ra Fulweg Taban e Meybil

16, 17. (a) Uw rogon ni ma fulweg Jehovah taban e meybil? (b) Mang boch ban’en ni ke buch ni be dag ni bay rogon e meybil ko fare machib ni gad be tay?

¹⁶ Uw rogon ni ma fulweg Got taban e meybil? Ma fulweg Got taban boch e meybil ni papey ma rib tamilang. (2 Kings 20:1-6) Ma yugu boch e meybil e ra n’uw boch nap’an mfini fulweg Got taban ma gathi rib gagiyel rogon ni ke fulweg  taban. Ma yu ngiyal’ e thingar ni yibilay fare magawon ni boor yay, ni bod ni tamilangnag Jesus u lan e fanathin rok u murung’agen fare pin ni yigi i sul ngak reb e tapuf oloboch ni be ning e ayuw. (Luke 18:1-8) Machane rayog ni nge mich u wan’dad ni faan gad ra meybil nrogon nib m’agan’ Got ngay ma dabi gaar Jehovah: “Dab kum magawonnigeg.”​—Luke 11:5-9.

¹⁷ Boor e girdi’ rok Jehovah ni kar guyed ni ke fulweg Jehovah taban e meybil rorad. Re n’ey e boor yay ni ke m’ug u nap’an ni gad be machib. L’agruw e ppin ni girdi’ rodad nu Philippines e ur weregew e babyor u lan e arow i yan. Nap’an ni ra piew e babyor ngak reb e ppin me sugsug e lu’ nga owchen. Me gaar: “Fowngan e gu meybil ngak Got ni nge l’og be’ ni nge fil e Bible ngog, gu be lemnag ni ireray e fulweg ko meybil rog.” De n’uw nap’an nga tomren me un fare pin ko muulung u Kingdom Hall. U yugu reb e binaw u Yimuch ni Ngek u Asia e i tatamdag reb e pumoon ni girdi’ rodad ni nge machib u lan boch e naun ni bay e matanag riy ni ma siyeg e yugu girdi’ ni ngar bad ngay. I meybil faanem ngak Jehovah me gel laniyan’ me yan nga lan fare naun. Me tugtuguy e mab u reb e tabinaw me yib ba rugod. Nap’an ni weliy fare girdi’ rodad fan ni ke yib me yor fare rugod. Me yog ni be gay e Pi Mich Rok Jehovah ma ke meybil ni ngan ayuweg nge piriegrad. Fare girdi’ rodad e ke ayuweg fare rugod ni nge un nga reb e ulung ko gin ma par riy.

18. (a) Mang e ngada rin’ed u nap’an nra fulweg Got taban e meybil rodad? (b) Mang e rayog ni nge mich u wan’dad ni faan gad ra meybil ni gubin ngiyal’ ni ke mab e kanawo’?

¹⁸ Riyul’ ni meybil e aram e tow’ath nrib fel’. Ba adag Jehovah ni nge motoyil ko meybil rodad ma nge fulweg taban e meybil rodad. (Isaiah 30:18, 19) Machane thingar da tedan’dad nga rogon ni ma fulweg Jehovah taban e meybil rodad. Gathi gubin ngiyal’ nra fulweg taban e meybil rodad nrogon ni gad ba adag. Ma nap’an ni gad ra naab ngay ni ke ayuwegdad, ma thingar dab da paged talin ni ngada pininged e magar ngak ma ngada pininged e sorok ngak. (1 Thessalonika 5:18) Ma dab da paged talin e fonow rok apostal Paul ni gaar: “Ma dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med.” Arrogon, urngin yay nra mab e kanawo’ ma ngad nonad ngak Got. Ma ga ra pirieg ni riyul’ e thin rok Paul u murung’agen e piin ni ke fulweg Got taban e meybil rorad ni gaar: “Ma gapas rok Got ndabi chuchugur ni nge nang e girdi’ fan e ra yororiy gum’irchamed nge tafinay romed ngi i par rok Kristus Jesus.”​—Filippi 4:6, 7.

Rayog ni Ngam Pi’ e Fulweg?

• Miti mang meybil e nguud tayed?

• Uw rogon ni ngaud meybilgad?

• Mang boch ban’en ni rayog ni ngada yibilayed?

• Mang ayuw ni ra yib ni faanra meybil be’ ni ke denen?

[Study Questions]

[Pictures on page 21]

Meybil ni ma yib u gum’irchadad e ra ayuwegdad ni nge dab da awgad ko pi n’en ni ma wawliyey

[Pictures on page 23]

Rayog ni ngada pininged e magar ngak Got, ma ngada weliyed e tin ni be magafan’dad ngay ma ngada ninged e tin nib t’uf rodad u fithik’ e meybil