“Ma Pi’ Gelngin e Piin ni Dakuriy Gelngirad”
Thin nu Bible ni fan ko 2018: “Piin ni yad be tor ngak Somol ni nge ayuwegrad e bay ra pirieged ni ke yib gelngirad bayay.”—ISA. 40:31.
1. Mang boch e magawon nthingar da athamgilgad u fithik’? Mang fan nib felfelan’ Jehovah ko pi tapigpig rok ni yad ba yul’yul’? (Mu guy fapi sasing ni bay u tabolngin e re article ney.)
DE MOM e par rodad u lan e re m’ag ney. Boor i gimed e ke yib boch e m’ar nib ubchiya’ ngak. Ku bay boch i gimed ni kar pilibthirgad ni ku yad be ayuweg boch i girdien e tabinaw rorad ni kar pilibthirgad. Ma boch i gimed e be mo’maw’ ngak ni nge pi’ e tin nib t’uf ko tabinaw rok. Bin riyul’ riy e, gad manang ni boor i gimed e gathi taab mit e pi magawon ney e be mada’nag ya boor! Re n’ey e ba t’uf boor e tayim, nge gelngiy, nge salpiy ni ngan fanay ngay. Machane, ba pagan’med nra ayuwegmed Jehovah, ma kub mich u wan’med nra boch nga m’on ma ra chuw e pi magawon ney. Ere, dariy e maruwar riy nrib felfelan’ Jehovah ngomed!
2. Uw rogon ni be pi’ fare thin u Isaiah 40:29 e athamgil nga lanin’dad? Mang reb e oloboch nrib gel e kireb riy nrayog ni ngad rin’ed?
2 Machane gur, bay yu ngiyal’ ni ga ma lemnag ni kaygi mo’maw’ ni ngam athamgil u fithik’ e pi magawon rom? Faanra aray rogon e lem rom, ma gathi kemus ni yigoo gur e kam lem ni aray rogon. Be yog e Bible ni immoy boch e tapigpig rok Got kakrom ni yad ba yul’yul’ nra lemnaged ndabkiyog ni ngar athamgilgad u fithik’ e pi magawon rorad. (1 Ki. 19:4; Job 7:7) Machane, de mulan’rad ya ra sapgad ngak Jehovah ni nge pi’ gelngirad, ma aram me ayuwegrad, ya Got rodad e “ma pi’ gelngin e piin ni . . . kar magargad.” (Isa. 40:29) Ba gel e kireban’ riy, ya bay boch e tapigpig rok Got e ngiyal’ ney ni kar lemnaged ni bin th’abi fel’ e kanawo’ ni ngar athamgilgad u fithik’ e pi magawon rorad e aram e ngar talgad ba ngiyal’ ko pigpig ngak Jehovah. Yad be lemnag ni be magawonnagrad e pigpig ni yad be tay ko bin ni ngar lemnaged ni aray reb e tow’ath ni bay rorad. Ere, aram fan ni kar talgad ndakurur beeged e Bible rorad, ma dakurur uned ko muulung, nge machib. Aram e n’en nri baadag Satan ni ngar rin’ed.
3. (a) Uw rogon ni nge dab da paged Satan ni nge meewarnagdad? (b) Mang e gad ra weliy ko re article ney?
3 Manang Moonyan’ ni faan gad ra par ni tirok Got ban’en e ir e gad be maruweliy, ma aram e rayog ni nge yib gelngidad, ma dabun ni ngad gelgad. Ere, nap’an ni ga ra thamiy ni ke meewar fithik’ i dowam ara lanin’um, ma dab mu palognagem rok Jehovah. Mu guy rogon ni ngari chugur e tha’ u thilmew ya ra ‘tem ni gab mudugil, me gelnagem.’ (1 Pet. 5:10; Jas. 4:8) Re article ney e gad ra weliy riy l’agruw ban’en nrayog ni nge magawonnag e pigpig ni gad be tay nge rogon nrayog ni nge ayuwegdad e pi kenggin e motochiyel u Bible ni ngad athamgilgad u fithik’ e pi magawon rodad ni faan gad ra fol riy. Machane, som’on e ngad weliyed rogon nrayog ni nge pi’ Jehovah gelngidad nrogon ni kan tamilangnag ko Isaiah 40:26-31.
PIIN NI YAD BE TOR NGAK JEHOVAH E RA YIB GELNGIRAD BAYAY
4. Mang e rayog ni ngad filed ko Isaiah 40:26?
4 Mu beeg e Isaiah 40:26. Dariy be’ ni ke yag rok ni nge theeg urngin e t’uf u lan e palpalth’ib. Be lemnag e piin llowan’ nrayog nib gaman 400 bilyon e t’uf u lan e birodad e galaxy ni ka nog e Milky Way ngay. Yugu aram rogon, ma ra reb e pi t’uf ney ma bay fithingan ni ke pi’ Jehovah. Ere, mang e gad be fil riy? Faanra rib ga’ fan u wan’ Jehovah e pi n’en ni ke sunmiy ndariy e yafos riy, me ere mu lemnag rogom u wan’ nge rogon ni ga be pigpig ngak ni gathi bochan e ban’en nthingar mu rin’, ya bochan e ba t’uf rom! (Ps. 19:1, 3, 14) Manang e Chitamangidad urngin ban’en u rarogom. ‘Mus nga piyan lolugem ni ke m’ay i theeg’ rok. (Matt. 10:30) Ku be micheg e Bible ni be gaar: “Somol e ke yiluy e changar rok ngak e piin ni yad mmat’aw.” (1 Pet. 3:12) Arrogon, be guy e pi magawon ni ga be mada’nag, ma rayog ni nge pi’ gelngim ni ngam athamgil u fithik’ ni gubin.
Rayog ni nge pi’ Jehovah gelngim ya nge yag nim athamgil u fithik’ e pi magawon rom
5. Mang fan nrayog ni nge pagan’dad nrayog rok Jehovah ni nge pi’ gelngidad?
5 Mu beeg e Isaiah 40:28. Jehovah e Ir e Ke Pi’ gelngin urngin ban’en. Am lemnag rogon gelngin e yal’ ni ke sunmiy. David Bodanis ni ir be’ ni ma yoloy murung’agen boch ban’en ni bay rogon ko science e yog ni gaar: “Gelngin e Yal’ u lan reb e second e taareb gelngin nga [bokum bilyon e donmach] ni ke chub taab yay.” Ku bay be’ ni ma gay murung’agen boch ban’en ni ke sumarnag ma ke pirieg ni gelngin e yal’ “u lan reb e second . . . e ba gaman ni nge pi’ gelngin gubin ban’en ni be ayuweg e girdi’ u lan 200,000 e duw”! Ere, dariy e maruwar riy ni Jehovah ni ir e en ke pi’ gelngin e yal’ e rayog rok ni nge pi’ gelngidad ni ngad athamgilgad u fithik’ urngin mit e magawon ni ma yib ngodad.
6. Uw rogon nre mat’ nra pi’ Jesus ngodad e mmom? Mang angin e re n’ey ngodad?
6 Mu beeg e Isaiah 40:29. Rib gel e felfelan’ ni ma yib ngodad ko pigpig ni gad ma tay ngak Jehovah. I gaar Jesus ngak pi gachalpen: “Mfeked e mat’ rog ngam tiyed nga pomed.” Miki ulul ngay ni gaar: “Mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.” (Matt. 11:28-30) Rriyul’ e pi thin ney! Yu ngiyal’ e nap’an ni gad ra chuw u tafedad ni nga darod ko muulung ara machib, ma gad be thamiy ni kari aw parowdad. Machane, uw rogon e lem rodad u tomuren ni kad sulod ko muulung nge machib? Gad ma thamiy ni ke baud lanin’dad ma ke yib gelngidad ni ngad athamgilgad u fithik’ e pi magawon rodad. Ere, rriyul’ ni mat’ ni ma pi’ Jesus ngodad e mmom.
7. Mu weliy ban’en ni ke buch rok reb e walag ni be tamilangnag nriyul’ fare thin u Matthew 11:28-30.
7 Bay reb e walag nib pin ni ka nog Kayla ngak ni bay ba mit e m’ar rok ni ka nog e chronic fatigue syndrome ngay ni ma k’aring e girdi’ ni nga i par ndariy gelngin ma be amith fithik’ i dow, maku ir be’ ni ma par nib kireban’, maku ma yib e alngong ngak nib pag rogon. Ere, yu ngiyal’ e ba mo’maw’ ni nge un ko muulung. Machane, ba’ bayay ni athamgil nge un nga reb e muulung. Tomuren ma aram me yoloy ni gaar: “Welthin nni pi’ e rofen nem e murung’agen rogon ni ngan athamgil u fithik’ e pi n’en ni ma muleg lanin’uy. Cha’ ni pi’ e welthin e non u reb e kanawo’ ni be m’ug riy ni manang maku be lemnag rogon laniyan’ e piin ni yad be motoyil. Ere, k’aringeg e re n’ey ni nggu yor, ya yib ngan’ug nib t’uf ni ngaug un ko muulung.” Rib gel e felfelan’ ni tay e re walag ney ni bochan e athamgil ni nge un ko re muulung nem!
8, 9. Mang e be yip’ fan fapi thin ni yog apostal Paul u nap’an ni yoloy ni gaar: “Ngiyal’ ni gub meewar, e aram e ngiyal’ ni gub gel”?
8 Mu beeg e Isaiah 40:30. Demtrug urngin e salap rodad, mab mudugil urngin ban’en nrayog ni ngad rin’ed u gelngidad. Gad gubin nthingar da filed ban’en ko re n’ey. Yugu aram rogon ni boor ban’en nrayog ni nge rin’ apostal Paul, machane bay boch ban’en ni baadag ni nge rin’ ndabiyog rok. Nap’an ni weliy laniyan’ ngak Got, ma aram me gaar Got ngak: “Gelngig e rib gel ko ngiyal’ ni gab meewar.” I nang Paul fan e n’en ni yog Jehovah ngak. Aram fan ni gaar: “Ngiyal’ ni gub meewar, e aram e ngiyal’ ni gub gel.” (2 Kor. 12:7-10) Mang e be yip’ fan e pi thin ney ni yog?
9 Manang Paul ni faanra dabi ayuweg Got ma boor ban’en ndabiyog ni nge rin’. Rayog ni nge pi’ gelngin Got nib thothup gelngin Paul. Machane gathi kemus aram, ya ku rayog ni nge pi’ e re gelngin nem gelngin Paul ni nge rin’ boch ban’en ndabiyog ni nge rin’ u gelngin. Ku arrogodad ni faanra Jehovah e ir e be pi’ gelngidad, ma aram e rayog ni ngad gelgad!
10. Uw rogon ni ayuweg Jehovah David ni nge athamgil u fithik’ e pi magawon rok?
10 Boor yay ni i pi’ gelngin Got nib thothup gelngin David ni ir e yoloy e Psalm. I tang ni gaar: “Ga ma pi’ gelngig ni nggu cham ko pi toogor rog nge gelngig ni nggu buthug e yoror rorad.” (Ps. 18:29, BT) Bay yu ngiyal’ ni ma yib e magawon ngodad ni yugu ba pag rogon ndabiyog ni ngad pithiged ni yigoo gadad. Re n’ey e taareb rogon nga ba yoror nib tolang ndabiyog ni nga darod u daken. Ra taw ko ngiyal’ nem, ma aram e ba t’uf ni nge ayuwegdad Jehovah.
11. Mu weliy rogon ni ma ayuwegdad gelngin Got nib thothup ni ngad athamgilgad u fithik’ e pi magawon rodad.
11 Mu beeg e Isaiah 40:31. Arche’ ni eagle e gathi yigoo gelngin e ma fanay ni nge par u fithik’ e nifeng. Gelngin e nifeng nib gowel e aram e n’en ni ma pi’ e re arche’ ney nge kan nga lang me yag ni nge changeg nib n’uw yang ndabi furuy pon. Ere, nap’an ni ga ra mada’nag reb e magawon ndabiyog ni ngam pithig ni gur rom, mag lemnag e arche’ ni eagle. Mu wenig ngak Jehovah ni nge pi’ gelngim u daken e n’en ni ma ‘ayuwegdad’ ni aram gelngin nib thothup. (John 14:26) Bin riyul’ riy e, demtrug e ngiyal’ u lan reb e rran nrayog ni nga dogned ngak Jehovah ni nge pi’ e re gelngin ney ngodad. Ma ngiyal’ nri gad ra guy nib t’uf ni ngad ninged e ayuw rok e nap’an ni ke sum e maluagthin u thildad reb e walag. Machane, mang fan ni ma sum e maluagthin u thildad?
12, 13. (a) Mang fan ni ma sum e maluagthin u thilin e piin Kristiano? (b) Mang e gad be fil u murung’agen Jehovah ko n’en ni buch rok Josef?
12 Rayog ni nge luag l’agruw ni’ e thin ni bochan e gad gubin ndawor da flontgad. Aram fan ni bay yu ngiyal’ ni ma yog ara ma rin’ reb e walag ban’en ni dubdad, maku aram rogodad ni bay yu ngiyal’ ni gad ma yog ara gad ma rin’ ban’en ni dubrad. Ireray reb e skeng nib mo’maw’. Machane, re skeng ney e ku taareb rogon nga yugu boch e skeng ni gad ma mada’nag ni bochan e aram e ngiyal’ ni ma pagdad Jehovah ni ngad daged gelngin e yul’yul’ rodad ngak, ni aram e ma pagdad ni ngad filed rogon ni ngad maruwelgad pi walagdad u taabang nib taareban’dad. Yugu aram rogon ndawor ra flontgad machane ma t’ufegrad Jehovah, ere susun ni ku aram rogodad.
De pag Jehovah Josef, maku arrogom ndabi pagem (Mu guy e paragraph 13)
13 Der ma taleg Jehovah e pi tapigpig rok ndabi yib e skeng ngorad. Rayog ni ngad filed e re n’ey ko n’en ni buch rok Josef. Nap’an ni kab pagel, ma aram me pi’ bogi pumoon ni walagen ni chuway’ nga Egypt ni nge mang sib. (Gen. 37:28) I guy Jehovah e n’en ni i buch rok Josef, ma dabisiy ni i kireban’ nga gelngin e gafgow ni i guy ni un tay ngak ni ir be’ nib mat’aw maku fager rok. Yugu aram rogon ma de taleg e pi n’em. Boch nga tomuren u nap’an nni t’ar e thin nga daken Josef nga nog ni ke kol leengin Potifar u gelngin mi non’ nga kalbus, maku de rin’ Jehovah ban’en. Ere gur, re n’ey e be yip’ fan ni ke digey Jehovah Josef? Danga’, ya gubin ngiyal’ ni i ayuweg ‘nga i fel’ urngin ban’en ni be ngongliy.’—Gen. 39:21-23.
14. Mang angin nra yib ngodad ni faan gad ra ‘pag’ e damumuw?
14 Kum lemnag e n’en ni buch rok David. Yooren e girdi’ e dawor ra mada’naged e gafgow ni bod gelngin e gafgow ni un tay ngak. Yugu aram rogon, machane yugu da i par nib damumuw, ya yoloy ni gaar: “Dab mu pagem nge magafan’um ara mu damumuw; ya kemus ni oloboch e ra yib riy.” (Ps. 37:8, BT) Bin th’abi ga’ i fan ni ngad ‘paged’ e damumuw e bochan e gad baadag ni ngad folwokgad rok Jehovah ni “der ma gechignagdad nrogon ni ba’ rogon ni nge gechignagdad.” (Ps. 103:10) Machane, faan gad ra guy rogon ni ngad ‘paged’ e damumuw maku bay boch i angin nra yib ngodad. Damumuw e rayog ni nge k’aring e racha’ ni nge yan nga lang nge boch e m’ar ni ma magawonnag rogon e pogofan rodad. Ku rayog ni nge kirebnag e ad nge bang u fithik’ i dowey ni ka nog e pancreas ngay, maku rayog ni nge magawonnag rogon ni ma maruwel e chew nge gil’iggan rodad. Nap’an ni gad ra damumuw ma dabkiyog ni ngad lemgad nib fel’ rogon. Rayog ni nge k’aringdad e re n’ey ni nga dogned ara da rin’ed ban’en nra kirebnag laniyan’ yugu boch e girdi’, me k’aringdad ni ngad pared nib n’uw nap’an nib kireban’dad. Machane, be gaar e Bible: “Gapas laniyan’ e ma fal’eg fithik’ i dowey.” (Prov. 14:30, BT) Ere, mang e rayog ni ngad rin’ed u nap’an ni ke kirebnag reb e walag lanin’dad ma gad awnag e gapas u thildad? Rayog ni ngad folgad ko fonow u Bible ni bay e gonop riy.
NAP’AN NRA KIREBNAG REB E WALAG LANIN’DAD
15, 16. Mang e susun ni ngad rin’ed u nap’an ni ke kirebnag be’ lanin’dad?
15 Mu beeg e Efesus 4:26. Darud gingad u nap’an nra gafgownagdad e girdi’ nu fayleng. Machane, nap’an nra yog ara rin’ reb e walag ara chon e tabinaw rodad ban’en ni kari kirebnag lanin’dad, ma rayog ni ngad gingad ma gad dabuy e n’en ni ke rin’. Ere, uw rogon ni faanra dabiyog ni ngad feked owchedad ko n’en ni ke rin’ facha’. Gur, gad ra par ni gad ba damumuw ngak u lan boor e duw? Fa gad ra fol ko fonow nu Bible ni be yog ni ngad gurgad ngad pithiged e magawon ni ke sum u thildad? Faanra n’uw nap’an nda ted fare magawon ndab da pithiged, ma aram e ra gel e mo’maw’ riy ni ngad awnaged e gapas u thildad walagdad.
16 Susun e ke kirebnag reb e walag lanin’um ma dabiyog ni ngam tal ndab kum lemnag. Ere, mang e rayog ni ngam rin’ ya nge yag ni aw e gapas u thilmew? Som’on e ngam meybil ngak Jehovah, ma gog ngak ni nge ayuwegem nge yag nim nonow walagem nib fel’ rogon. Dab mu pagtalin ni ku ir reb e fager rok Jehovah. (Ps. 25:14) Ba t’uf rok Jehovah, ma gad manang ni Jehovah e ma dag e sumunguy ko pi fager rok. Maku aram rogon nib m’agan’ ngay ni ngad rin’ed. (Prov. 15:23; Matt. 7:12; Kol. 4:6) Bin migid e, ngam fal’eg i lemnag e n’en ni nga mog ngak. Yugu dab mu lemnag ni lem rok walagem ni nge kirebnag lanin’um. Bin riyul’ riy e, rayog ni ban’en ni ke oloboch riy fa gur e de puluw rogon ni kam lemnag. Maku reb e, ngkum lemnag nrayog ni ka gab l’ag ko fare magawon. Ere, som’on e sana rayog ni nge lungum ngak, “Sana gag e yugu be lem nib pag rogon, machane nap’an nim non ngog fowap, mug lemnag ni . . .” Faanra kam non ngak ma de yag ni nge aw e gapas u thilmew, ma aram mag gay yugu reb e tayim nrayog ni ngkum nonow riy. Yugu aram rogon mag uneg walagem u lan e meybil rom. Mog ngak Jehovah ni nge tow’athnag me ayuwegem ni ngam sap ko pi fel’ngin nib manigil. Demtrug rogon, ma rayog ni nge pagan’um nra felfelan’ Jehovah ni kam athamgil ni ngam awnag e gapas u thilmew walagem ni ku ir reb e fager rok.
FAANRA YUG GAD BE LEMNAG E KIREB NI UD RIN’ED KAFRAM
17. Uw rogon ni ma ayuwegdad Jehovah ni ngki fel’ e tha’ u thildad u tomuren ni kad denengad? Mang fan nsusun e ngad paged ni nge ayuwegdad?
17 Bay boch e girdi’ ni yad ma lemnag ndariy rogorad ni ngar pigpiggad ngak Jehovah ni bochan e kar rin’ed reb e denen nib ubchiya’. Faanra ud pared ni gad be lemnag e kireb ni kad rin’ed ma rayog ni nge chuw e gapas rodad, ma dab kud felfelan’gad, me m’ay gelngidad. David ni Pilung e i par ba ngiyal’ ni be lemnag e kireb ni ke rin’, ma aram me yog ni gaar: “Ngiyal’ ni baaram ndawor gu weliy e denen rog ngak Somol e m’ay gelngig ni bochan e meyor ni gu tay ni kadbul nge mada’ ko nep’. Ya mu gechignigeg ni rran nge nep’.” Machane bin riyul’ riy e, gay David rogon ni nge pithig e magawon rok ni bod rogon be’ ni ke ilal ko tirok Got ban’en. I yoloy ni gaar: “Ma aram mu gu weliy e denen rog ngom . . . ma ga n’ag fan urngin e kireb rog.” (Ps. 32:3-5) Faanra kam rin’ reb e denen nib ubchiya’, ma baadag Jehovah ni nge ayuwegem ya nge yag ni ngki fel’ thilmew bayay. Machane, thingari m’agan’um ko ayuw ni ma pi’ u daken e ulung rok. (Prov. 24:16; Jas. 5:13-15) Ere, mu gur ngam ning e ayuw, ya ireray e n’en ni be tor e yafos rom ngay! Machane, mang e susun ni ngam rin’ ni faanra kan n’ag fan reb e kireb ni kam rin’ ni ke n’uw nap’an, machane ka be magawonnagem e nangan’ rom?
18. Uw rogon nrayog ni nge ayuweg e n’en ni buch rok Paul e piin ni yad be lemnag ndariy rogorad ni ngar pigpiggad ngak Jehovah?
18 Immoy yu ngiyal’ ni i magawon laniyan’ apostal Paul ni bochan e kireb ni i rin’ kafram. I gaar: “Gag e th’abi sobut’ u fithik’ urngin e apostel—ya ri dariy rogog ni nga nog ni gag reb e apostel, ni fan e gu gafgownag girdien e galesiya rok Got.” Machane, ki ulul ngay ni gaar: “Machane Got e runguyeg nge ayuwegeg me pingegeg nggu par ni bod rogog e chiney.” (1 Kor. 15:9, 10) I par Paul nib fel’ u wan’ Jehovah ni yugu aram rogon ni manang ndawori flont, maku aram e n’en nib m’agan’ ngay ni nge lemnag Paul u rarogon. Ere ku arrogom ni faanra kam kalngan’um ko denen ni kam rin’ ni ke thumur, ma kam weliy ngak e piin nib t’uf ni ngam weliy ngorad, ma nge pagan’um ngay nra runguyem Jehovah. Ere, nge mich u wan’um me m’agan’um ngay ni ke n’ag Jehovah fan e kireb rom!—Isa. 55:6, 7.
19. Mang e thin nu Bible ni fan ko duw ni 2018? Mang fan nib puluw e re thin ney?
19 Chiney ni gad be chugur nga tungun e re m’ag ney e gad manang nra yoor boch e magawon rodad. Machane, nge pagan’um ni En “ma pi’ gelngin e piin ni dakuriy gelngirad ma kar magargad” e rayog ni nge pi’ e n’en nib t’uf rom ya nge yag nim athamgil u fithik’ e pi magawon rom. (Isa. 40:29; Ps. 55:22; 68:19) Gubin yay ni gad ra yib ko muulung nga Tagil’ e Liyor rodad u nap’an e duw ni 2018, ma ireray e re thin nra i yib ngan’dad ni fan ko biney e duw ni be gaar: “Piin ni yad be tor ngak Somol ni nge ayuwegrad e bay ra pirieged ni ke yib gelngirad bayay.”—Isa. 40:31.