1, 2. Mang e taare madnom ni yira tay ko duw ni 2018 ni ir e rra taarebnag e girdi’, ma mang fan? (Mu guy e sasing ni bay u tabolngin e re article ney.)

 RA TAW ko rofen ni March 31, 2018, ma ra yan bokum milyon e girdi’ u ga’ngin yang e fayleng nga reb e madnom ni yima tay ni taab yay u reb e duw. Tomuren nra aw e yal’ e rofen nem, ma ra muulung e Pi Mich Rok Jehovah nge piin ni yad baadag e machib nga taabang ni ngar madnomnaged fare Puguran ko yam’ ni tay Kristus. Ireray e taare madnom ni yima tay u gubin e duw nri ma taarebnag e girdi’ u ga’ngin yang e fayleng!

² Dariy e maruwar riy nrib gel e felfelan’ ni ma tay Jehovah nge Jesus u nap’an ni yow ra guy bokum milyon e girdi’ u ga’ngin yang e fayleng e rofen nem ni yad be yan ko re madnom ney. Ke yiiynag e Bible u m’on riy nra muulung e girdi’ ni “pire’ ni pire’​—ndariy be’ nrayog ni nge theegrad! Nra bad u gubin e nam, nge ganong, nge gubin mit e girdi’, ngu gubin e thin,” mar tolulgad ni be lungurad: “Kanawoen ma gamad thap ngak Got e yib rok e Got romad ni ir e ke par nga tagil’, ma ki yib rok fare Fak e Saf!” (Rev. 7:9, 10) Rib manigil e re n’ey ni yima rin’ u gubin e duw ni aram e ma pining boor e girdi’ e  sorok ngak Jehovah nge Jesus ko pi n’en nrib manigil ni kar rin’ew ni fan ngodad u nap’an fare Puguran!

3. Mang boch e deer ni gad ra weliy e fulweg riy ko re article ney?

³ Machane, bay boch e deer ni ke sum ni yira weliy e fulweg riy ko re article ney. (1) Uw rogon ni nge bagadad me fal’eg rogon ni fan ko fare Puguran, me yib angin ngak? (2) Mang boch e kanawo’ ni ma taareban’ e girdi’ rok Got riy u daken fare Puguran ni yima tay? (3) Mang e rayog ni ngad rin’ed ni be’ nge be’ ya nge yag nda mon’ognaged e taareban’ ni bay u thilin e girdi’ rok Got? (4) Gur, bay ba ngiyal’ nra taw ngay ma yira tay e bin tomur e Puguran? Faanra bay, ma wuin?

4. Mang nib ga’ fan ni yugu demtrug rogon ma ngad athamgilgad ni ngad uned ko fare Puguran?

⁴ Am lemnag feni ga’ fan ni ngam un ko fare Puguran. Dab mu pagtalin ni pi muulung ni gad ma tay e aram bang ko liyor rodad. Ere, dariy e maruwar riy ni manang Jehovah nge Jesus e piin ni yad ma athamgil ni ngar uned ko re muulung ney, ni aram e bin th’abi ga’ fan e muulung ni yima tay u gubin e duw. Bin riyul’ riy e, gad baadag ni ngar guyew ni demtrug rogon ma gad ra athamgil u rogon nrayog rodad ni ngad uned ko re Puguran ney. Faan gad ra dag ko ngongol rodad nib ga’ fan u wan’dad e pi muulung ni gad ma un ngay ni fan ko liyor ni gad ma tay, ma aram e gad be dag ngak Jehovah ni bay rogon ni nge uneg fithingdad nga lan fare “ke babyor rok” ni bay riy fithingan e piin ni bay rogon ni nge yag e yafos ni manemus ngorad.​—Mal. 3:16.

5. Nap’an e pi rran u m’on nge taw ko rofen ni yira tay e Puguran, ma uw rogon ni ngad ‘changargad ngodad ko gad be par ni gad be ngongol u fithik’ e michan’ rodad ngak Kristus fa danga’’?

⁵ Nap’an e pi rran u m’on nge taw ko rofen ni yira tay e Puguran, ma rayog ni ngad ted e tayim ni ngaud meybilgad ma gad be fal’eg i lemnag rogon e tha’ u thildad Jehovah. (Mu beeg e 2 Korinth 13:5.) Uw rogon ni ngad rin’ed e re n’ey? Aram e ngad ‘changargad ngodad ko gad be par ni gad be ngongol u fithik’ e michan’ rodad ngak Kristus fa danga’.’ Ra ngad rin’ed e re n’ey, ma aram e nge bagadad me fith ir ni nge gaar: ‘Rib mich u wan’ug ni gag bang ko fare ulung ni ir e ke mel’eg Jehovah ni nge lebguy e n’en nib m’agan’ ngay, fa? Gu be rin’ e tin nrayog rog ni nggu machibnag mug fil ko girdi’ fare thin nib fel’ ni murung’agen Gil’ilungun Got, fa? Be m’ug ko ngongol rog nrib mich u wan’ug ni gad be par ko tin tomuren e rran ma ke chugur ni ngan thang e gagiyeg rok Satan, fa? Ri kab pagan’ug ngak Jehovah nge Jesus e chiney ni bod rogon ko ngiyal’ nug ognag e yafos rog ngak Jehovah Got, fa?’ (Matt. 24:14; 2 Tim. 3:1; Heb. 3:14) Faan gad ra lemnag e fulweg ko pi deer ney, ma rayog ni nge ayuwegdad ni ngad nanged ko gad be ngongol u fithik’ e michan’ rodad fa danga’.

6. (a) Mang e taare kanawo’ ni bay nrayog ni nge yag e yafos riy ngodad? (b) Uw rogon ni ma fal’eg reb e piilal rogon ni fan ko Puguran ni yima tay u gubin e duw? Uw rogon nrayog ni ngam folwok rok?

⁶ Mu beeg mag fal’eg i lemnag boch e article rodad ni be tamilangnag feni ga’ fan fare Puguran. (Mu beeg e John 3:16; 17:3.) Rogon ni gad ra ‘nang’ Jehovah ma gad maruweliy e “michan’” rodad ngak Jesus ni Fak ni kari maagirag rok e aram e taare kanawo’ ni bay nrayog ni nge yag e yafos ni manemus riy ngodad. Ere, faanra ngam fal’eg rogom ni fan ko fare Puguran, ma  aram e rayog ni ngam mel’eg boch ban’en nrayog ni ngam fil nra chugurnagem ngak Jehovah nge Jesus. Am lemnag e n’en ni rin’ reb e walag ni pumoon ni ke n’uw nap’an ni ke mang reb e piilal. Ke yoor e duw ni ma chaariy boch e article ni ke fek ko fare Wulyang ko Damit ni be weliy murung’agen e Puguran nge t’ufeg ni ke dag Jehovah nge Jesus ngodad. Nap’an e pi wik u m’on ko Puguran, ma aram e ma beeg e pi article nem me fal’eg i lemnag feni ga’ fan e re madnom ney. Maku bayi n’en me uneg taareb ara l’agruw e article nib beech ko pi article nem ni ke chaariy. Ke guy e re piilal ney ni faanra i sul nga i beeg e pi article nem ni gubin e duw, maku be beeg fapi thin nu Bible ni yima beeg ni fan ko Puguran me fal’eg i lemnag, ma boor ban’en nib beech ni ma fil riy. Bin th’abi ga’ fan riy e ma guy ni gubin e duw ni be gel e t’ufeg rok ngak Jehovah nge Jesus. Faan ga ra tay e fol Bible ni aray rogon, ma aram e rayog ni ngari gel feni t’uf Jehovah nge Jesus rom, me ga’ fan u wan’um e n’en ni kar rin’ew ni fan ngom, me yag ni yib angin fare Puguran ngom.

7. (a) Mang e yibilay Jesus ko fare nep’ i n’em ni tay e bin som’on e Abich ni Blayal’ rok Somol? (b) Mang e be dag ni ke fulweg Jehovah taban e meybil rok Jesus?

⁷ Fare nep’ i n’em ni tay Jesus e bin som’on e Abich ni Blayal’ rok Somol e yibilay pi gachalpen ni ngar taarebgad ni bod rogorow e Chitamangin ni yow ba taareb. (Mu beeg e John 17:20, 21.) Ke fulweg Jehovah taban e re meybil ney ni tay Fak, ma chiney e bokum milyon e girdi’ ni ke mich u wan’rad ni Jehovah e ir e l’og Fak nge yib nga fayleng. Kemus ni yigoo fare Puguran u fithik’ e pi muulung ni ma tay e girdi’ rok Got e aram e re muulung nri ma gagiyelnag rogon e taareban’ ni bay u thilin e Pi Mich Rok Jehovah. Ma muulung e girdi’ ni kar bad u boor e nam ma kub thilthil ramaen dowrad nga taabang u ga’ngin yang e fayleng. Bay boch e nam ni fin munmun me muulung e girdi’ riy ni kar bad u boch e nam nib thilthil nga taabang ni ngar rin’ed boch ban’en ni bay rogon ko teliw, fa reb e faan yad ra rin’, ma ra lemnag yugu boch e girdi’ nde puluw e n’en ni kar rin’ed. Machane, mit ney e taareban’ e ban’en nrib gamog u p’eowchen Jehovah nge Jesus!

8. Mang thin e yiiynag Jehovah u daken Ezekiel?

⁸ Gadad e pi tapigpig rok Jehovah e darud gingad ko taareban’ ni bay u thildad. Bin riyul’ e, ke yiiynag Jehovah e re n’ey u m’on riy. Am lemnag e n’en ni yog ngak Ezekiel ni profet ni murung’agen fa gal ley i gek’iy ni nge puthuy nga taabang ni ba ley e fen e “nam nu Judah” ma ba ley e fen e “nam nu Israel.” (Mu beeg e Ezekiel 37:15-17.) Fare article ni kenggin e “Deer ko Piin Ma Beeg” ni bay ko Fare Wulyang ko Damit ko July 2016 ni thin ni Meriken e be gaar: “I yiiynag Jehovah u daken Ezekiel nra sul e girdi’ rok ko fare Nam ni Kan Micheg mar manged reb e nam ni kar taarebgad. Re thin ney e ku be yiiynag murung’agen e taareban’ nra tay e girdi’ rok Got u nap’an e tin tomuren e rran.”

9. Uw rogon ni ma m’ug rogon ni ke lebug fare yiiy rok Ezekiel u nap’an e Puguran ni yima tay u gubin e duw?

⁹ Ka nap’an e duw ni 1919, ma aram me tabab Jehovah i yarmiy ma be taarebnag e piin ni kan dugliyrad ni buchuuw ma buchuuw. Ireray e piin ni kan taareb rogonnagrad ko fare ley i gek’iy ni fen e “nam nu Judah.” Munmun ma aram e be yoor i yan e piin ni yad be athapeg e par u fayleng nra pethgad ngak e piin ni kan dugliyrad ngar manged “taab ran’ i saf.” Pi girdi’ ney ni yad be athapeg e par u fayleng e taareb rogorad ko fare ley i gek’iy ni fen e “nam nu Israel.” (John 10:16; Zek. 8:23) Ke micheg Jehovah nra puthuy e gal ley i gek’iy nem nga taabang nge par u lan pa’ ni ke bod taab ley i gek’iy. (Ezek. 37:19) Chiney e be pigpig e gal ulung i girdi’ ney u taabang u tan pa’ Jesus Kristus ni Pilung, ni kan weliy murung’agen u lan e yiiy ni ir David ni ‘tapigpig rok’ Got. (Ezek. 37:24, 25) Re taareban’ ney ni kan weliy ko Ezekiel e ri ma gagiyel u gubin e  duw u nap’an nra muulung e piin ni kan dugliyrad ni ka yad bay u fayleng nge “yugu boch e saf” nga taabang ni ngar madnomnaged fare Puguran ko yam’ ni tay Kristus! Ere, mang e rayog ni ngad rin’ed ni be’ nge be’ ya nge yag nda mon’ognaged e re taareban’ ney?

10. Uw rogon ni ngad mon’ognaged e taareban’ ni bay u thilin e girdi’ rok Got?

¹⁰ Reb e kanawo’ nrayog ni ngad mon’ognaged e taareban’ ni bay u thilin e girdi’ rok Got e aram e ngad maruweliyed e sobut’an’. Nap’an ni immoy Jesus u fayleng, me yog ngak pi gachalpen nthingar ra sobut’naged yad. (Matt. 23:12) Faanra ba sobut’an’dad, ma aram e dab ud lemgad ni bod e girdi’ nu fayleng ni aram e yad ma lemnag nib ga’ farad ngak yugu boch e girdi’. Ya gad ra guy rogon ni ngaud folgad rok e piin ni yad ma yog e thin u lan e ulung. Lem ni aray rogon e aram e n’en nra ayuweg e ulung rodad ni nga i par nib taareb. Bin th’abi ga’ fan riy e, faanra ba sobut’an’dad ma aram e gad ra felfelan’nag Got, ya “ma togopluw ngak e piin nib tolangan’rad, ma ma ayuweg e piin nib sobut’an’rad.”​—1 Pet. 5:5.

11. Faan gad ra fal’eg i lemnag e n’en ni be yip’ fan fare flowa nge wain ni yima fanay u nap’an e Puguran, ma uw rogon nra ayuwegdad ni ngad mon’ognaged e taareban’ ni bay u thildad?

¹¹ Bin l’agruw e kanawo’ nrayog ni ngad mon’ognaged e re taareban’ ney riy e aram e ngad fal’eged i lemnag e n’en ni be yip’ fan fare flowa  nge wain ni yima fanay u nap’an e Puguran. Thingar da rin’ed e re n’ey u m’on ko rofen ni yira tay e Puguran. Machane rofen nem e aram e rofen nrib ga’ fan ni ngad fal’eged i lemnag e re n’ey riy. (1 Kor. 11:23-25) Fare flowa e be yip’ fan downgin Jesus nib flont ni pi’ nib maligach, ma fare wain e be yip’ fan rachaen ni map’. Machane, gathi kemus e n’en nib t’uf ni nge tamilang u wan’dad. Dab mu pagtalin ni fare biyul ni maligach ni pi’ Kristus e ba muun ngay l’agruw e kanawo’ ni kan dag e bin th’abi gel e t’ufeg riy ngodad. Gali n’em e aram e t’ufeg ni ke dag Jehovah ngodad ni aram e ke pi’ Fak ni nge yim’ ni fan ngodad, nge t’ufeg ni ke dag Jesus ni aram e ke m’agan’ ngay ni nge ognag e yafos rok ni fan ngodad. Gad ra lemnag e t’ufeg ni kar dagew ngodad ma ra k’aringdad ni ngkud t’ufeged yow. Ma re t’ufeg ney ni bay rodad ngak Jehovah e bod rogon ba yil’ i gaf ni ke m’agdad nga taabang, maku ireray e n’en ni be gelnag e taareban’ ni bay u thildad.

12. Uw rogon ni tamilangnag Jesus ni baadag Jehovah ni ngad n’aged fan e kireb ni ke rin’ be’ ngodad u lan fare fanathin ni murung’agen ba pilung nge pi tapigpig rok?

¹² Bin dalip e kanawo’ nrayog ni ngad mon’ognaged e re taareban’ ney riy e aram e ngaud n’aged fan e kireb rok yugu boch e girdi’. Nap’an ni gad ra n’ag fan e kireb rok e piin ni kar rin’ed e kireb ngodad, ma aram e gad be dag nib ga’ fan u wan’dad rogon ni kan n’ag fan e denen rodad u daken fare biyul ni maligach ni ke pi’ Kristus. Am lemnag reb e fanathin ni yog Jesus ni bay ko Matthew 18:23-34, mag fithem ni nge lungum: ‘Be k’aringeg e re n’ey ni nggu fol ko n’en ni yog Jesus, fa? Gu ma gum’an’ u puluwon e pi walag u lan e ulung ma gu ma dag ni gu manang rarogorad, fa? Ba m’agan’ug ngay ni nggu n’ag fan e kireb rok e piin ni kar denengad nib togopuluw ngog, fa?’ Riyul’ nib thilthil rogon e denen ni yima rin’. Bochan ndawor da flontgad, ma bay boch e denen nrib mo’maw’ ni ngad n’aged fan. Yugu aram rogon, ma re fanathin ney e be fil ngodad e n’en nib m’agan’ Jehovah ngay ni ngad rin’ed. (Mu beeg e Matthew 18:35.) I tamilangnag Jesus nnap’an nra t’uf ni ngad n’aged fan e kireb rok pi walagdad ma dab da rin’ed, ma aram e dabi n’ag Jehovah fan e denen rodad. Rib ga’ fan ni ngad fal’eged i lemnag e re n’ey! Rayog ni ngad mon’ognaged e taareban’ ni bay u thildad ni faanra ud n’aged fan e kireb ni ke rin’ be’ ngodad ni bod rogon ni yog Jesus.

13. Uw rogon nrayog ni ngad mon’ognaged e taareban’ u thildad ni faanra ud guyed rogon ni nga i par nib aw e gapas u thildad yugu boch e girdi’?

¹³ Ra ud n’aged fan e kireb ni ke rin’ be’ ngodad, ma aram e gad be dag ni gad boch e girdi’ ni gad ma awnag e gapas u thiliy. Mu tay fanam i yan ko fonow ni pi’ apostal Paul ni be yog ni ‘ngad athamgiliyed nguud pired ni gad taab girdi’’ u daken ‘fare gapas ni ir e ke m’agdad nga taabang.’ (Efe. 4:3) Ere u m’on, ngu tomuren, ngu nap’an ni yibe tay fare Puguran mag fal’eg i lemnag rogon e ngongol rom ngak yugu boch e girdi’, mag fithem ni nge lungum: ‘Ma m’ug ko ngongol rog ni gag be’ nda gur ma tay u lanin’ug e kireb ni ke rin’ yugu boch e girdi’ ngog, fa? Yima guy ni gag be’ ni gu ma athamgil u rogon nrayog rog ni nggu awnag e gapas u thilmad yugu boch e girdi’ ma gamad par nib taareban’mad, fa?’ Ireray boch e deer nib ga’ fan ni ngad fal’eged i lemnag.

14. Uw rogon ni ngad daged nra ‘bagadad ma be k’adan’ u puluwon bagadad u fithik’ e t’ufeg’?

¹⁴ Bin aningeg e kanawo’ nrayog ni ngad mon’ognaged e taareban’ u thildad e aram e ngaud daged e t’ufeg ni bod rogon ni ma rin’ Jehovah ni ir e Got ko t’ufeg. (1 John 4:8) Dariy ba ngiyal’ ni ngad weliyed murung’agen pi walagdad ni nge lungudad, “Sana gu ra t’ufegrad ya ban’en nthingar gu rin’, machane dariy rogon ni nggu adag dakenrad”! Faanra ud lemgad ni aray rogon, ma aram e gad be togopuluw ko fare fonow ni pi’ Paul ni be yog ni “nge bagadad mi i k’adan’ u puluwon bagadad u fithik’ e t’ufeg.”  (Efe. 4:2, NW) Mu tay fanam i yan riy nde yog nsusun e “nge bagadad mi i k’adan’ u puluwon bagadad,” ya yog nthingar da rin’ed “u fithik’ e t’ufeg.” Ere, bay ban’en nib thil u thilin e gali n’ey. Boor mit e girdi’ u lan e ulung ni ke pow’iyrad Jehovah ngak. (John 6:44) Ere, faanra aram rogon ni ke pow’iyrad ngak, me ere dariy e maruwar riy ni ku yad ba t’uf rok. Ere, mang ni ngad dugliyed u wan’dad ni bay reb i walagdad ndariy rogon ni ngad t’ufeged? Susun e ngad t’ufeged yad nrogon ni baadag Jehovah ni ngad rin’ed.​—1 John 4:20, 21.

15. Uw rogon ni kad nanged nra taw nga ba ngiyal’ ma yira tay e bin tomur e Puguran?

¹⁵ Ra taw nga ba ngiyal’ ma yira tay e bin tomur e Puguran. Uw rogon ni kad nanged e re n’ey? Nap’an ni yoloy Paul e gin som’on e babyor nge pi’ ngak piyu Korinth, ma aram me yog ngak e pi Kristiano ni kan dugliyrad ni faanra ur madnomnaged e puguran ko yam’ ni tay Jesus u gubin e duw, ma aram e yad be ‘weliy murung’agen e yam’ ni tay Somol’ nge ‘yan i mada’ ko ngiyal’ ni bayi sul Somol riy.’ (1 Kor. 11:26) Fare bugithin ni “sul” ni ka nog u roy e be weliy murung’agen e ngiyal’ nra “yib” Jesus riy nrogon ni weliy ko fare yiiy rok u murung’agen e tomur. I weliy murung’agen fare gafgow nib ga’ ni bayi yib ni gaar: “Bayi m’ug e pow ko en ni Fak e Girdi’ u lan e lang; ma aram e urngin e ganong nu fayleng ni bay ra yorgad, ma bay ra guyed e en ni Fak e Girdi’ ni be yib nga but’ u daken e manileng ni bay gelngin ma rib galgal ramaen. Ma fare rappa ni ba ga’ lungun e bay non, ma aram e bayi l’og [Jesus] e engel rok ko fa aningeg yangi n’en u fayleng ni ma thow e nifeng riy, ma aram mi yad kunuy e girdi’ rok ni ke mel’egrad u baraba’ e fayleng nge yan i mada’ nga baraba’.” (Matt. 24:29-31) Pi ‘girdi’ ney ni ke mel’egrad’ ni ngan kunuyrad nga taabang e be yip’ fan e ngiyal’ ni yira tow’athnag e piin ni kan dugliyrad ni ka yad bay u fayleng u nap’an ni yad ra yan nga tharmiy. Ra buch e re n’ey u tomuren ni ke m’ay e gin som’on ko fare gafgow nib ga’, machane u m’on nra yib e Armageddon. Tomuren e re n’ey, ma aram e ra un fare 144,000 ngak Jesus ngar chamgad ko pi pilung nu fayleng mar gelgad ngorad. (Rev. 17:12-14) Re Puguran ni yira tay u m’on ni yira kunuy e piin ni kan dugliyrad nga tharmiy, e aram e bin tomur e Puguran ni yira tay ni bochan e aram e ngiyal’ ni ke “sul” Jesus.

16. Mang fan ni kam dugliy u wan’um ni ngam un ko Puguran ni yira tay ko biney e duw?

¹⁶ Manga yugu da dugliyed u wan’dad ni ngad uned ko fare Puguran ni yira tay ko rofen ni March 31, 2018 ya nge yag ni yib angin ngodad, ma gad wenig ngak Jehovah ni nge ayuwegdad ni ngad rin’ed e n’en nib milfan ngodad ya nge yag ni ud mon’ognaged e taareban’ ni bay u thilin e girdi’ rok! (Mu beeg e Psalm 133:1.) Dab mu pagtalin nra taw nga ba ngiyal’ ma yira tay e bin tomur e Puguran. Machane, u m’on ni nge taw e re ngiyal’ i n’em ma ngad athamgilgad u rogon nrayog rodad ni ngad uned ko Puguran ni yima tay u gubin e duw, ma gad dag nib ga’ fan u wan’dad e taareban’ ni ma m’ug u thildad e ngiyal’ nem.